ལེའུ་གསུམ་པ། མཁྲིས་པའི་ནད་བཅོས་པ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག མཁྲིས་པའི་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྗེས་བཅད་དྲུག་གིས་བསྟན།།

རྒྱུ་ནི་ནད་གཞི་སྣོད་ཀྱི་མཁྲིས་པ་ལ། །སློང་རྐྱེན་གནད་དུ་མཚོན་བསྣུན་འགྲམས་པ་དང༌། །ཟས་སྐོམ་ཚ་སྐྱུར་མི་འཕྲོད་མ་ཞུ་དང༌། །ཞེ་སྡང་མི་གཙང་ལྷ་བསྣོལ་འདྲེ་གཡོས་པས། །གསོ་དཀའ་མཁྲིས་ནད་བཞི་བཅུ་བདུན་དུ་འགྱུར།།

དེ་ལ་དབྱེ་བ་སྤྱི་དང་བྱེ་བྲག་གཉིས། །སྤྱི་ལ་རིགས་དང་གནས་ཀྱིས་དབྱེ་བ་གཉིས། །རིགས་ཀྱི་སྒོ་ནས་དབྱེ་ན་རྣམ་བཞི་སྟེ། །ནད་གཞིའི་མཁྲིས་པ་ཐང་ལ་ལྷགས་པ་དང༌། །མེ་དྲོད་མཁྲིས་པ་གཞན་གྱི་གནས་གྱུར་དང༌། །སྣོད་ཀྱི་མཁྲིས་པ་ཁ་ལུད་ཁ་ཤོར་དང༌། །ཐུན་མོང་མཁྲིས་པ་རྩ་རུ་རྒྱུ་བའོ། །དང་པོ་རྐྱེན་བཞིས་མཁྲིས་པ་འཕེལ་བ་སྟེ། །ཚད་པ་གསོ་བའི་སྐབས་སུ་རྒྱས་པར་སྟོན། །གཉིས་པ་རླུང་དང་མ་ཞུ་བད་ཀན་ཁྲག །འཇུ་བྱེད་མཁྲིས་པའི་ཡུལ་དུ་ཞུགས་པ་ཡིས། །མཁྲིས་པའི་གོ་ཕྲོགས་ཕྱི་རུ་བྱེར་བའོ། །གསུམ་པ་ཕོ་མཆིན་སྐྲན་གྱིས་མཁྲིས་པ་བཅར། །ཡང་ན་མཁྲིས་པ་རང་ལ་སྐྲན་ཞུགས་པས། །མཁྲིས་པ་དབང་མེད་ཕྱི་རུ་ཁ་ལུད་དམ། །འགྲམས་སམ་རླུང་གིས་མཁྲིས་ཁ་ཤོར་བའོ། །བཞི་པ་སྣོད་མཁྲིས་འཇུ་བྱེད་གང་ཡང་རུང༌། །འགྲམས་འཁྲུགས་རིམས་རྐྱེན་མཁྲིས་པ་འཕེལ་བའམ། །ཟས་སྤྱོད་རྐྱེན་གྱིས་འཕེལ་ཏེ་རྩར་ལུད་པས། །ཤ་སེར་མིག་སེར་རྣམ་པ་གཉིས་སུ་འགྱུར། །མཁྲིས་ནད་བཅུ་གསུམ་རིགས་ཀྱི་དབྱེ་བར་འདོད། །མདོར་བསྡུས་ཐོག་མཐའ་རང་རྒྱུད་ཚ་བའི་ནད། །བར་པ་གཉིས་པོ་གཞན་དབང་ལྡན་པ་ཡིན། །གནས་ཀྱིས་དབྱེ་ན་ལྤགས་ལ་གྲམ་པ་དང༌། །ཤ་ལ་རྒྱས་དང་རྩ་རུ་རྒྱུ་བ་དང་། །རུས་ལ་ཞེན་དང་དོན་བབས་སྣོད་དུ་ལྷུང༌། །དབང་པོ་ལྔ་ལ་མེ་ཏོག་ཤར་བའོ། །དོན་ནི་གློ་སྙིང་མཆིན་མཆེར་མཁལ་མ་ལྔ། །སྣོད་ནི་ཕོ་ལོང་རྒྱུ་མ་ལྒང་པ་མངལ། །དབང་པོ་མགོ་མིག་རྣ་བ་སྣ་ལྕེའོ། །དེ་ལྟར་བཅུ་དགུ་གནས་ཀྱི་དབྱེ་བར་འདོད། །བྱེ་བྲག་འཇུ་བྱེད་སྒྲུབ་བྱེད་མདངས་སྒྱུར་དང༌། །མཐོང་བྱེད་མདོག་གསལ་རྣམ་ལྔར་གྱུར་པའོ། །རླུང་དང་བད་ཀན་འདྲེས་པས་བཅུ་རུ་འགྱུར། །ཀུན་ཀྱང་མདོར་བསྡུས་ཚ་གྲང་གཉིས་སུ་འདུས། །ཁྲག་དང་མཁྲིས་པ་འཕེལ་བ་ཚ་བ་སྟེ། །མ་ཞུ་བད་རླུང་ཡུལ་ཕྲོགས་གྲང་བའོ།།

དེ་ཡི་རྟགས་ལ་སྤྱི་དང་བྱེ་བྲག་གཉིས། །སྤྱི་རྟགས་མིག་སྤྲིན་བཞིན་ལྤགས་ཆུ་མདོག་སེར། །ལྟོ་ཆེ་མཁྲིས་པ་འཁྲུ་སྐྱུག་ཟ་འཕྲུག་བྱེད། །དེ་ཡང་མཁྲིས་པ་ཚ་བ་སྐོམ་དད་ཆེ། །རྩ་གྲིམས་ཆུ་ཡི་རླངས་ཆེ་ཀུ་ཡ་མཐུག །ཁ་ཁ་ལུས་ཚ་གཉིད་ཆུང་བཤང་བ་སེར། །ཤ་ཆང་མར་རྙིང་བུ་རམ་དྲོད་བག་གནོད། །མཁྲིས་པ་གྲང་བ་དེ་ལས་གོ་ལོག་སྟེ། །མེ་དྲོད་འཇུ་སྟོབས་ཆུང་ལ་བཤང་བ་དཀར། །བྱེ་བྲག་ཚ་བ་རྒྱུ་བརྟག་གོམས་པས་བརྟག །རླུང་གི་གནས་གྱུར་སྦོ་འཁྲོག་རྟུག་པ་སྐམ། །གཡལ་མང་དྲོད་བཅུད་ཟོས་རྗེས་བདེ་བར་མངོན། །མ་ཞུ་བད་ཀན་གང་གི་གནས་གྱུར་ཀྱང༌། །ལུས་ལྕི་གཉིད་ཆེ་སྒྱིད་སྐྱུར་འདུག་སྙིང་འདོད། །ཟས་སྐོམ་སྤྱོད་ལམ་བསིལ་གནོད་དྲོ་ན་བདེ། །ཁྱད་པར་དྲི་མ་སྐྱ་ལ་གསོབ་པ་ཡིན། །ཁྲག་གི་གནས་གྱུར་སྨུག་པོའི་རྒྱུ་བྱས་ཏེ། །དྲི་མ་ནག་སྨུག་སྐམ་ལ་ཤ་རིལ་འདྲ། །མཆིན་པའི་སྐྲན་ནམ་མཆིན་པ་རྒྱས་པ་ཡིས། །མཁྲིས་ཡུལ་ཕྲོགས་ན་མྱངས་པས་དངོས་སུ་གསལ། །ཕོ་བའི་སྐྲན་གྱིས་ཡུལ་ཕྲོགས་ཟས་སྐོམ་འཁྲེན། །མཁྲིས་པའི་སྟེང་དུ་སྲ་ཞིང་མནན་མི་བཟོད། །མཁྲིས་པ་རང་ལ་སྐྲན་ཞུགས་ལུས་ཤེད་ཆུང༌། །ལུས་ཀྱི་མདོག་སེར་ཟ་འཕྲུག་དང་ག་འགག །བཤལ་དང་གཏར་ལ་ནད་ཐོན་བཅོས་སྐྱེད་མེད། །ནད་དེ་འཆི་བདག་ཁ་རུ་ཚུད་དང་འདྲ། །ཁ་ཤོར་ཤེད་མེད་མཁྲིས་པ་འཁྲུ་སྐྱུག་བྱེད། །མཁྲིས་པ་འགྲམས་སམ་འཁྲུགས་ཚད་མཁྲིས་པར་བབས། །རིམས་ནད་མཁྲིས་པར་བབས་པའི་རྩར་རྒྱུག་གསུམ། །དེ་རྟགས་བཅོས་ཐབས་རང་རང་ལེའུར་བལྟ། །རང་བཞིན་ཟས་སྤྱོད་རྐྱེན་གྱིས་མཁྲིས་འཕེལ་བའི། །རྩར་རྒྱུག་དག་ལ་ཤ་སེར་མིག་སེར་གཉིས། །མཁྲིས་པ་ཤ་སེར་ཤེད་ཆུང་གཉིད་མི་ཐུབ། །ལུས་ལྕི་ཞོ་དར་ཆུ་སོགས་གང་ཡང་ཁ། །ཤ་མདོག་གསེར་འདྲ་རྫས་དཀར་སེར་པོར་མཐོང༌། །སྔ་དྲོ་བསིལ་ཕེབས་བདེ་ལ་ཉིན་དགུང་ན། །མཁྲིས་པ་མིག་སེར་མིག་སྤྲིན་སེན་མོ་སེར། །ལུས་རྔུལ་ཉམ་ཆུང་ཁོང་ཚ་མིག་རུས་ན། །ཁ་ཟས་ཡི་གར་མི་འོང་སྐོམ་དད་ཆེ། །སྐྱུག་པ་སྙམ་བྱེད་མིག་སྔར་སྔོ་དམར་མཐོང༌། །ཀུན་ཀྱང་ཡུན་རིང་རྒྱས་ནས་སྨིན་པའི་དུས། །ཀྵ་ཡ་ནག་པོར་གྱུར་ནས་ཟ་འཕྲུག་བྱེད། །ལྤགས་མདོག་སྔོ་ནག་སྐྲ་དང་སྨིན་མ་འབྱི། །ཤེད་མེད་ཤ་སྐམ་སེན་མོ་ནག་ཐིག་ཆགས། །འདི་དུས་མཁྲིས་པས་ཤ་རུས་ཐམས་ཅད་ཁྱབ། །གཤིན་རྗེའི་ཞགས་པས་ཟིན་པས་འཚོ་མི་འགྱུར། །འདི་ལ་བཅོས་ཐབས་མི་བརྩམ་ཚོགས་གསོག་བསྐུལ། །མཁྲིས་པ་ལྤགས་ལ་གྲམ་པ་ཟ་འཕྲུག་བྱེད། །ཤ་ལ་རྒྱས་པ་ཤུ་བ་ཐོར་པ་འབྱུང༌། །ཕྲུགས་ན་ཆུ་སེར་ཁྲག་དང་མཁྲིས་པ་འཛག །རྩ་རུ་རྒྱུ་བ་ཚིགས་གཞི་ཉྭ་གཞི་དང༌། །དྲོ་སར་ཟ་ཞིང་རྒྱས་ནས་ལུས་ཀུན་ཟ། །རྩ་མིག་མཁྲིས་པས་གང་ཕྱིར་ལྤགས་མིག་སེར། །གཏར་ན་ཁྲག་མེད་མཁྲིས་པ་ཟང་མར་འོང༌། །རུས་ལ་ཞེན་པ་ཚིགས་པ་ཐམས་ཅད་ན། །ཁོལ་བུར་ན་ཞིང་ཤ་སྐམ་ཚིགས་ཐོག་སྐྲངས། །སྙིང་ལ་ཞུགས་ན་གློ་སྙིང་སྟོད་མི་བདེ། །ལྕེ་སེར་གཉིད་ཆུང་སྙིང་ལ་གྲང་མོ་འདོད། །གློ་ལ་ཞུགས་ན་སྣབས་ལུད་སེར་པོར་འོང༌། །མཆིན་པར་ཞུགས་ན་ཤ་སྔོ་མཆིན་སྟེང་ན། །མགོ་ན་མིག་ཚ་མཆིལ་མ་སྐ་ལ་འདྲིལ། །མཆེར་པར་ཞུགས་ན་ལྕེ་ཁྲ་ཁྲག་རླན་འཁྲུ། །སྦོ་རྫིང་རྐང་པ་གཡོན་སྐྲངས་ལྷུ་ཚིགས་ན། །མཁལ་མར་ཞུགས་ན་རྐང་པ་ལྕི་ལ་སྦྲིད། །མཁལ་རྐེད་ན་ཞིང་རྣ་རྒྱབ་སེར་པོར་འགྲོ། །ཕོ་བར་ཞུགས་ན་མཁྲིས་པ་འཁྲུ་སྐྱུག་བྱེད། །ལོང་དང་རྒྱུ་མར་ཞུགས་ན་མཁྲིས་པ་འཁྲུ། །ལྒང་པར་ཞུགས་ན་ཆུ་ཁ་སྲིའམ་སྙི། །མངལ་དུ་ཞུགས་ན་མཁྲིས་པ་འཛག་གམ་འདྲིལ། །མགོ་ལ་ཞུགས་ན་མཚོགས་མ་ཀླད་པ་ན། །ཉི་མ་ཕོག་དང་ཞོ་འཐུངས་སྟོན་དུས་ལྡང༌། །མིག་ཞུགས་མདོག་སེར་ཚ་ཞིང་མཆི་མ་མང༌། །རྣར་ཞུགས་ཟུག་ཆེ་ཚ་ལ་ཆུ་སེར་འཛག །སྣར་ཞུགས་སྣབས་ཀྱི་མདོག་སེར་མཚུལ་པ་འགག །ལྕེ་ལ་ཞུགས་ན་ལྕེ་སེར་རོ་ཀུན་ཁ། །ཀུན་ལ་མིག་ཆུ་སེར་ན་མཁྲིས་པར་བརྟག །བྱེ་བྲག་མཁྲིས་པ་ལྔ་ལས་འཇུ་བྱེད་ནི། །ནད་དུ་གྱུར་ན་ལྕེ་སེར་སྐོམ་དད་ཆེ། །ཁ་ཟས་མི་འཇུ་དང་ག་འགག་པར་འགྱུར། །མདངས་སྒྱུར་ནད་གྱུར་ཆུ་སེར་ཕོ་བ་ལྟེམ། །ལུས་པོ་ལྕི་ལ་ཤེད་ཉམ་ཆུང་བ་ཡིན། །སྒྲུབ་བྱེད་སྙིང་སྤྱུགས་དབུགས་རྒོད་སྐོམ་དད་ཆེ། །དང་ག་མི་བདེ་ལུས་འདར་གློ་སྙིང་ཚ། །མཐོང་བྱེད་ནད་གྱུར་མགོ་ན་ཆང་འཐུངས་གཟེར། །མིག་སེར་མིག་གིས་ཉེ་མཐོང་རིང་མི་མཐོང་། །མདོག་གསལ་ནད་གྱུར་ལུས་ཀྱི་ཤ་དྲོད་ཆེ། །ཤ་ལྤགས་སྔོ་ནག་ཚ་ལ་རྩུབ་པའོ། །རླུང་དང་བད་ཀན་གང་འདྲེས་དེ་རྟགས་སྟོན།།

བཅོས་པའི་ཐབས་ལ་སྤྱི་དང་བྱེ་བྲག་གཉིས། །སྤྱི་བཅོས་མཁྲིས་ནད་ཚ་གྲང་གཉིས་སུ་བསྡུ། །གཉེན་པོ་སྨན་དཔྱད་ཟས་དང་སྤྱོད་ལམ་བཞི། །མཁྲིས་ནད་ཚ་བའི་སྨན་ནི་ཏིག་ཏ་དང༌། །གསེར་གྱི་མེ་ཏོག་ཀྱི་ལྕེ་བ་ཤ་ཀ །བོང་ང་དཀར་པོ་བསྐོལ་གྲང་ཐང་དུ་བཏང༌། །དྲོད་ཆུང་འཇུ་བ་དཀའ་ན་དྲོད་སྨན་བསྣན། །དེ་འོག་གསེར་གྱི་མེ་ཏོག་ཏིག་ཏ་གསུམ། །བོང་ང་དཀར་པོ་རུ་རྟ་པར་པ་ཏ། །རྩ་མཁྲིས་ཧོང་ལེན་སྐྱེར་ཤུན་ཀ་ར་སྦྱར། །ཕྱེ་མ་ཆུས་འཕུལ་མཁྲིས་ནད་མ་ལུས་འཇོམས། །རུ་ཐུང་གཤའ་རིངས་སྣོད་ཀ་གང་བབས་གཏར། །དེས་མ་ཞི་ན་བསྡུ་སྦྱང་ཞི་གསུམ་སྦྱར། །དང་པོ་བྲག་ཞུན་ནིམ་པ་བ་ཤ་ཀ །སྤ་འབྲུ་ཏིག་ཏ་ཨ་བ་རྒུན་འབྲུམ་དང༌།།ལྕུམ་རྩ་ཤིང་མངར་སྐྱེར་ཤུན་ཀ་ར་སྦྱར། །གསེར་གྱི་མེ་ཏོག་བ་ཆུར་སྦངས་ཁུས་དབུལ། །འདུས་རྟགས་མིག་ཆུ་བཞིན་མདངས་སྔར་བས་དཀར། །སྐོམ་སྙེག་དང་ག་འགགས་ན་སྦྱང་བར་བྱ། །ཁྲོན་བུ་ཚ་ལ་གསེར་གྱི་མེ་ཏོག་ཕྱེ། །དྲི་ཆུར་སྦྱར་བཏང་བ་ཆུའི་ལྕག་གིས་བསྐུལ། །འབྲས་ཐུག་རྗེས་གཅོད་ཟས་སྐོམ་བསིལ་བ་གཅེས། །དེ་རྗེས་ནད་ལྷག་རོལ་དུ་བསད་པའི་ཕྱིར། །གསེར་གྱི་མེ་ཏོག་སྤྱི་ཞུར་ཀ་ར་སྦྱར། །བ་འོས་འཕུལ་བསྟེན་དེ་རྗེས་ཏིག་ཏ་གསུམ། །གསེར་གྱི་མེ་ཏོག་ལྕགས་ཕྱེ་བོང་ང་དཀར། །སྐྲ་བཟང་བྱི་ཏང་ག་དང་ཀ་ར་སྦྱར། །ཕྱེ་མ་གངས་ཆུས་འཕུལ་ལ་སུམ་ཡར་བཏང༌། །དེ་རྗེས་ཚ་བའི་ལྷག་མ་ལུས་སྲིད་ན། །ཁྲག་མཁྲིས་ཤས་ཆེ་ཉི་ཤུ་རྩ་ལྔ་སྦྱར། །རླུང་ཤས་ཆེ་ན་ཏིག་ཏའི་སྨན་མར་ཤིས། །ཁ་ཟས་བ་ལང་རི་དྭགས་ཤ་གསར་དང༌། །མར་གསར་ཁུར་མངས་འབྲས་དང་ནས་སྔོན་ཟན། །གངས་ཆུ་བ་རའི་ཞོ་དར་ཆབ་ཚ་སོགས། །བསིལ་ལ་ཡང་བའི་ཟས་སྐོམ་བཏང་བར་བྱ། །སྤྱོད་ལམ་མེ་ཉི་ཞེ་སྡང་དྲག་ཤུལ་སྤང༌། །ཡིད་འོང་སྙན་ཚིག་བསིལ་གནས་དལ་བར་འདུག །ཁྲུས་བྱ་མགོ་བཀྲུ་གོས་གསར་དྲི་མེད་བགོ། །གྲང་མཁྲིས་སྨན་ལ་སེ་འབྲུ་ཤིང་ཚ་དང༌། །སྐྱུ་རུ་ར་དང་ནིམ་པ་སྟར་བུ་དང༌། །ཕག་རིལ་ཐལ་བ་བུར་དཀར་ཆུ་སྐོལ་དབུལ། །དེས་མ་ཞི་ན་ཆ་མཉམ་བཞི་པའི་སྟེང༌། །ཏིག་ཏ་བསྣན་ལ་ཀར་སྦྱར་ཆུ་སྐོལ་དབུལ། །དེ་ཡིས་མཁྲིས་པ་བད་ཀན་སྡུད་དང་འདྲུལ། །དེ་ནས་གསེར་གྱི་ཕུད་བུ་རི་ཤོ་བ། །རྒྱམ་ཚྭ་པི་པི་ལིང་དང་དུར་བྱིད་རྣམས། །ཞིབ་བཏགས་འོ་མ་སྦྱར་བཏང་ནད་ཀུན་འདྲེན། །ཡང་ན་རྒྱམ་ཚྭ་ཨ་རུ་མཆུ་སྙུང་དང༌། །ལྕུམ་རྩ་ཟངས་རྩི་བ་དང་པི་པི་ལིང༌། །གསེར་གྱི་མེ་ཏོག་ཐང་གི་རྒྱུན་སྦྱོངས་བཏང༌། །རྗེས་ལ་ཟས་སྐོམ་དྲོད་ཀྱིས་བཅད་པ་གཅེས། །དེ་འོག་སེ་འབྲུ་སྒ་སྐྱ་པི་པི་ལིང༌། །ཏིག་ཏ་གསེར་གྱི་མེ་ཏོག་དུག་མོ་ཉུང༌། །མ་ནུ་ཀ་ར་སྦྱར་བ་ཆུ་སྐོལ་དབུལ། །རྗེས་གཅོད་ནད་རྣམས་མལ་དུ་འཇུག་པར་བྱེད། །གསོ་དཀའ་བརྒྱད་དགུ་བཅུ་གཉིས་ལོང་ཐེར་བསྲེག །ཁ་ཟས་བ་ར་མཛོ་མར་གསར་པ་དང༌། །ལུག་ཤ་གསར་པ་ཉ་ཤ་ཤ་རྙིང་སྐམ། །ཟན་དྲོན་སྒོག་སྐྱའི་ཚ་མིག་གསར་འཇམ་བསྟེན། །སྤྱོད་ལམ་རླན་གྲང་བསེར་བུས་གྲང་པ་སྤངས། །སྐམ་སར་མི་རྔུལ་ཙམ་དུ་བཅག་པར་བྱ། །དེ་ནས་བྱེ་བྲག་བཅོས་ཐབས་ཐང་ལ་ལྷགས། །ཚ་བ་སྤྱི་བཅོས་ལེ་འུར་བསྟན་པར་བྱ། །རླུང་གི་གནས་གྱུར་ལུག་ཤ་མར་གསར་ཆང་། །དྲོད་བཅུད་ཟས་བསྟེན་སེ་འབྲུ་པི་པི་ལིང༌། །ཏིག་ཏ་ཤིང་ཀུན་བཅའ་སྒ་ཁ་རུ་ཚྭ། །ཨ་རུ་བུ་རམ་སྦྱར་བ་ཆུ་སྐོལ་དབུལ། །མར་གསར་འཇམ་རྩི་བདུད་རྩི་ལྟ་བུར་བསྔགས། །ཚིགས་པ་དང་པོ་དགུ་པ་མེ་ཡིས་བསྲོ། །མ་ཞུ་བད་ཀན་གང་གི་གནས་གྱུར་ཀྱང༌། །སེ་འབྲུ་བཞི་འམ་རྒོད་མ་ཁ་ཡི་ཕྱེས། །མ་ཞུ་འཇུ་ཞིང་ཕོ་བའི་མེ་དྲོད་སྐྱེད། །དེ་རྗེས་སྐྱུགས་བཤལ་གང་འཚམ་གོང་བཞིན་བསྟེན། །དེ་འོག་ཏིག་ཏ་གསེར་གྱི་མེ་ཏོག་དང༌། །རྒྱམ་ཚྭ་གོང་ལ་བསྣན་པས་ནད་ལྷག་གདོན། །གསུམ་པ་བཅུ་གསུམ་མེ་མཉམ་ལྷེན་གསང་བསྲེག །ཁྲག་གི་གནས་གྱུར་བད་ཀན་སྨུག་པོར་བཅོས། །རྗེས་ལ་བརྒྱད་དགུ་མེ་ཡིས་མནན་པ་གཅེས། །མདོར་ན་ཞུགས་པའི་ནད་དེ་བཅོས་པ་ཡིས། །རང་གནས་མཁྲིས་པ་རང་སོར་འགྱུར་བ་ཡིན། །རྒྱུ་མ་བསལ་བར་འབྲས་བུ་ཁེགས་མི་སྲིད། །མཆིན་པ་རྒྱས་སམ་མཆིན་ཁྲག་ཁ་ལུད་ན། །ཅུ་གང་བརྒྱད་སྦྱར་དེ་རྗེས་རུ་ཐུང་ངམ། །སྣོད་ཀ་གཤའ་རིངས་མང་གཏར་ཁྲག་སྟོབས་དབྲི། །དེ་འོག་སྦྱངས་ཏེ་མེ་ཡིས་བཅད་པར་བྱ། །སྐྲན་གྱི་ཁ་ལུད་འགྲོན་བུའི་ཐལ་བ་དང༌། །མདའ་རྒྱུས་ཤུ་དག་སྤྱང་ཚེར་རྒྱམ་ཚྭ་དང་། །ཐལ་སྨན་སྦྱར་བའི་རིལ་བུས་བཤིག་ལ་སྦྱང༌། །རུ་ཐུང་གཤའ་རིངས་ཅུང་ཟད་གཏར་བར་བྱ། །རྗེས་ལ་ལྷེན་གསང་དགུ་པ་ཁ་གསུམ་བསྲེག །མཁྲིས་སྐྲན་མི་དང་ཕག་བྲུན་བསྲེགས་ཐལ་ལ། །ཀ་ར་སེ་འབྲུ་ལྔ་སྦྱར་ཆུ་སྐོལ་དབུལ། །སྐབས་སུ་ཏིག་ཏ་བརྒྱད་སྦྱར་ཅུང་ཟད་གཏར། །རྗེས་དཔྱད་བརྒྱད་དགུ་བཅུ་གཉིས་ཕོ་གསང་བསྲེག །མཁྲིས་པ་ཤ་སེར་ཏིག་ཏ་དུག་མོ་ཉུང༌། །གསེར་གྱི་མེ་ཏོག་ཧོང་ལེན་བ་ཤ་ཀ །བོང་ང་དཀར་པོ་བ་ལེ་ཀ་ཐང་བཏང༌། །རྩེ་ཆུང་དྲུག་འགོ་གཤའ་རིངས་གསུམ་ག་གཏར། །ཏིག་ཏའི་(དུག་མོ་ཉུང་ཀྱི་ལྕེ་དུར་བྱིད་)བཤལ་བྱ་ཕྱི་རྗེས་བསིལ་ཤས་བཅད། །གུར་ཀུམ་བདུན་པ་སྦྱར་བཏང་ཞོ་དཀྲུགས་བྱིན། །མཁྲིས་པ་མིག་སེར་ཏིག་ཏའི་གྲང་ཐང་བཏང༌། །འབྲས་བུ་(གསུམ་དུར་བྱིད་དོང་ག་ལྕུམ་རྩ་ཀྱི་ལྕེ་རྒུན་འབྲུམ་ཧོང་ལེན་བོང་ང་སླེ་ཏྲེས་)འི་ཐང་གིས་མཁྲིས་ཚད་འོར་དུ་སྐྱུར། །མཆིན་མཁྲིས་འདོམ་རྩ་རྩེ་ཆུང་གཤའ་རིངས་གཏར། །སླེ་ཏྲེས་ཏིག་ཏ་སྒ་སྐྱ་ཨ་རུ་ར། །ཧོང་ལེན་དུག་མོ་ཉུང་དང་ཀ་ར་སྦྱར། །ག་བུར་(ཅུ་གང་གུར་ཀུམ་ཙན་དན་བ་ཤ་ཀ་ཧོང་ལེན་པདྨ་གེ་སར་ཏེ་)བདུན་པ་ཀ་ར་སྦྱར་བ་བཏང༌། །མཁྲིས་པ་ཤ་ལྤགས་གཉིས་ལ་རྒྱས་པ་ལ། །ཁ་ལུད་ལ་སོགས་ནད་གང་ཡིན་ཡང་རུང༌། །རྒྱ་སྤོས་སྤང་སྤོས་བྲག་སྤོས་ཨ་རུ་ར། །ཤུག་པ་ལྕ་བ་ཏང་ཀུན་བ་ལུ་དང༌། །ཤུ་དག་རུ་རྟ་བ་ཆུར་སྦྱར་བའམ། །ཡང་ན་སྔོན་བུ་སྲུབ་ཀ་ཞོ་སྦྱར་བྱུག །དེས་མ་སོས་ན་ཟོ་མར་སྒོག་སྐྱ་ཚ། །ཆུ་དྲོན་བཀྲུས་རྗེས་བྱུགས་ལ་ཉི་མར་བསྲེག །སེན་མོས་བྲད་པས་མཁྲིས་པ་ཟང་མར་ཐོན། །ཤུག་ཚེར་སྤ་མ་སྲད་མའི་ལོ་མ་གསུམ། །ཚྭ་སྦྱར་བྱུགས་བསྲེགས་སེན་མོས་བྲད་ཅིང་ཞར། །ཡང་ཡང་བསྐྱར་བས་ཆུ་སེར་རྩད་ནས་འདོན། །དེས་ཀྱང་མ་སེལ་དུར་བྱིད་སྔོན་བུ་དང༌། །ཨ་རུ་ར་གསུམ་བསྡུས་པའི་དྭངས་མ་ལ། །ཆུ་སེར་སྨན་གསུམ་བཏབ་པའི་རྒྱུན་སྦྱོངས་བྱ། །མཆིན་མཆེར་ཆུ་སེར་མཁྲིས་རྩ་མང་དུ་གཏར། །ཆུ་ལུམས་བྱས་རྗེས་སེང་ལྡེང་སྨན་མར་ཕན། །རྩར་ཞུགས་ཏིག་ཏ་དུག་ཉུང་བ་ལེ་ཀ །བ་ཤ་ཀ་དང་ཀྱི་ལྕེ་གསེར་མེ་ཏོག །འོམ་བུ་ཏིག་ཏའི་ཐང་བཏང་རྩ་མང་གཏར། །དེ་འོག་སྦྱངས་རྗེས་ཉི་ཤུ་རྩ་ལྔ་སྦྱར། །རུས་ལ་ཞེན་ན་ཏིག་ཏའི་(གསུམ་དང་འབྲས་བུ་གསུམ་ཁྲོན་བུ་ལྕུམ་རྩ་སྟབ་སེང་བསྡུས་པ་)རྒྱུན་སྦྱོང་བཏང༌། །ཉི་ཤུ་རྩ་ལྔ་མཁྲིས་སྨན་ཁ་བསྒྱུར་སྦྱར། །ཁ་ཟས་བསིལ་བསྟེན་ཆུ་ལུམས་མཆོག་ཏུ་བསྔགས། །ཤ་ཁྲག་རྒྱུས་པ་སྐམས་པ་གསོ་བའི་ཕྱིར། །ག་བུར་ཙན་དན་དཀར་དམར་གེ་སར་གསུམ། །ཨུཏྤལ་བ་མར་ཀར་སྦྲང་ལྡེ་གུ་བཏང༌། །མདོར་ན་མཁྲིས་པ་ཕྱིར་བྱེར་ཆུ་སེར་བཅོས། །དོན་ལྔར་མཁྲིས་པ་ཞུགས་པའི་སྤྱི་སྨན་དུ། །ཏིག་ཏ་གསུམ་དང་གསེར་གྱི་མེ་ཏོག་དང་། །དུག་ཉུང་རྒུན་འབྲུམ་ཀྱི་ལྕེ་བོང་ང་དཀར། །སྙིང་ལ་ཛཱ་ཏི་རུ་རྟ་ཨ་ག་རུ། །གློ་ལ་ཤིང་མངར་ཅུ་གང་ཨ་ཀྲོང་བསྣན། །མཆིན་པར་བྲག་ཞུན་གུར་ཀུམ་བ་ཤ་ཀ །མཆེར་པར་རུ་རྟ་སེ་འབྲུ་པི་པི་ལིང༌། །མཁལ་མར་ཤུག་ཚེར་སུག་སྨེལ་དམར་པོ་གསུམ། །ཀ་ར་སྦྱར་བཏང་རང་རང་རྩ་ལ་གཏར། །ཚ་བ་ཆོམས་ནས་ཚིགས་གསང་མེ་ཡིས་བསྡམ། །སྣོད་ལྷུང་གང་ཡང་བཤལ་ལས་ལྷག་པ་མེད། །མགོ་ལ་ཁ་ལུད་བཤལ་སྐྱུགས་གཏར་བ་དང་། །(ཏིག་ཏ་བརྒྱད་པའི་)ཕྱེ་མ་ཆུ་ལྕག་(སྡུད་སྒོ་གསུམ་ལ་)མེ་བཙའ་(འབྲས་བུ་གསུམ་གྱི་)སྨན་མར་བཅོས། །མིག་ལ་དཔྲལ་རྩ་གཏར་ཞིང་སྐྱེར་ཁཎ་བྱུག །རྣ་བར་རུ་རྟ་སྲན་མའི་མེ་ཏོག་དང༌། །གསེར་གྱི་མེ་ཏོག་ཨར་བར་ཁུ་བ་བླུག །སྣ་ལ་སྣ་སྦྱོང་བཏང་རྗེས་གུར་ཀུམ་བླུག །ལྕེ་ལ་སྒབ་རྩ་གཏར་དང་མངར་བས་དགང༌། །ཁྱད་པར་མཁྲིས་པ་འཇུ་བྱེད་རྣམ་གྱུར་ན། །རྒྱམ་ཚྭའི་(གསུམ་པ་)ཐང་བཏང་གསེར་ཕུད་སྐྱུགས་ཀྱིས་དྲངས། །མདངས་སྒྱུར་བཤལ་རྗེས་རྒོད་མ་ཁ་ཕྱེ་ལ། །ཏིག་ཏ་བསྣན་བཏང་མཁྲིས་རྩ་མང་དུ་གཏར། །སྒྲུབ་བྱེད་ཨ་གར་(ཛཱ་ཏི་གུར་ཀུམ་ཏིག་ཏ་ཨ་རུ་ར་ནཱ་ག་གེ་སར་ཀ་ར་དང་)དྲུག་སྦྱར་རྩེ་ཆུང་བསྣོལ། །མཁྲིས་པའི་རྩ་གཏར་སྙིང་གར་ཆུ་ལྕག་བརྡེག །མཐོང་བྱེད་ནད་ལ་ཏིག་ཏའི་ལྡེ་གུ་སྦྱར། །གསེར་མདུང་གཏར་ལ་ཆུ་ལྕག་མང་དུ་བརྡེག །མདོག་གསལ་ནད་ལ་ཙན་དན་གུར་ཀུམ་བྱུག །གསེར་གྱི་མེ་ཏོག་ཙན་དན་སོ་མ་ར། །ར་གསུམ་ཀར་སྦྱར་ཆུས་བྲན་རྩ་ཕྲན་གཏར། །བད་རླུང་གང་འབྲེལ་དེ་ཡི་གཉེན་པོ་བསྟེན། །སྤྱིར་ན་ནད་འདི་གདོན་ཆེ་བཅོས་སྔོན་དུ། །སྐུ་མདོས་སྔོ་མདོས་གསེར་མདོས་ལ་སོགས་བསྔགས།།

ཐ་མ་མི་ལྡོག་ཕྱི་རྗེས་བཅད་པའི་ཐབས། །ནད་ལྷག་ཅུང་ཟད་ལུས་ཀྱང་ལོག་འགྱུར་བས། །བཤལ་གྱིས་རྗེས་བཅད་མི་དོམ་ཉ་མཁྲིས་གསུམ། །གུར་ཀུམ་ཀ་ར་སྦྱར་ལ་བ་འོས་འཕུལ། །དེ་རྗེས་ཀ་ར་སྤྱི་ཞུར་གསེར་མེ་ཏོག །བ་དམར་འོ་མས་འཕུལ་བས་ཕྱིར་མི་ལྡོག །བཅུ་གསུམ་བཅུ་དགུ་ཁ་གསུམ་མེ་ཡིས་བསྲེག །ཟུངས་ངན་རླུང་ཆེ་ཏིག་ཏའི་སྨན་མར་སྦྱར། །ལོ་གཅིག་ཟས་སྤྱོད་གཟབ་པས་བརྟན་པར་འགྱུར། །ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་མཁྲིས་པའི་ནད་བཅོས་པའི་ལེའུ་སྟེ་གསུམ་པའོ།། །།

མཐའ་མའི་འདོན་ཐེངས་།: 20.12.2022 ཉིན། 2:56 PM