ལེའུ་གཉིས་པ། ལུས་ཀྱི་ཆགས་ཚུལ་བསྟན་པ།

འདི་ལ་མདོའི་གནས་ཞེས་པའི་རྒྱུ་མཚན་ཅི་ཡིན་སྙམ་ན། འཆད་འགྱུར་གྱི་དོན་ཐམས་ཅད་ཤིན་ཏུ་ཉུང་བར་མདོར་བསྡུས་ཏེ་བསྟན་པས་ན་དེ་སྐད་ཅེས་བྱ་བ་ཡིན་ནོ། །ད་ནི་གྲུབ་པ་ལུས་ཀྱི་གནས་བཤད་དེ། རྒྱུ་མཚན་ཅི་ཡིན་སྙམ་ན། འབྱུང་བ་ཆེན་པོ་རྣམས་ལས་ཡོངས་སུ་གྲུབ་ཅིང༌། བྱེ་བྲག་ཏུ་ཆགས་ཚུལ་དང་འདྲ་དཔེ་དང༌། ལྡང་ཚད་དང་མཚན་ཉིད་དང༌། དབྱེ་བ་དང་འཇིག་ལྟས་ལ་སོགས་པ་ལུས་ཀྱི་རྣམ་འགྱུར་གཙོ་བོར་འཆད་པའི་གནས་ཡིན་པས་ན་འདི་སྐད་ཅེས་བྱའོ་ཞེས་དེ་མ་ཐག་པ། དེ་ནས་དྲང་སྲོང་ཡིད་ལས་སྐྱེས་ཀྱིས་བཤད་རྒྱུད་འཆད་པའི་སྟོན་པ་དྲང་སྲོང་རིག་པའི་ཡེ་ཤེས་ལ་དྲི་བའི་ཚིག་འདི་སྐད་ཅེས་ཞུས་སོ། །ཞེས་མཚམས་སྦྱར་ནས། ཀྱེ་སྟོན་པ་དྲང་སྲོང་ཆེན་པོ་རིག་པའི་ཡེ་ཤེས་ལགས། ཞེས་གུས་པ་དང་བཅས་ཏེ་བོས་ནས། སྔར་གནས་བཅུ་གཅིག་ལ་བསླབ་པར་བྱའོ་ཞེས་གསུངས་པའི་དང་པོ་རྩ་བ་མདོའི་གནས་གསུངས་ཚར་མོད། ད་ནི་གནས་གཉིས་པ་གྲུབ་པ་ལུས་ཀྱི་གནས་ལ་ཇི་ལྟར་བསླབ་པར་བགྱི་ཞེས་འདྲི་ན། འཚོ་མཛད་སྨན་པའི་རྒྱལ་པོས་བདག་ཅག་རྣམས་ལ་ལེགས་པར་བཤད་དུ་གསོལ་ཞེས་ཞུས་པའོ། །ལས་ཞེས་བྱ་བ་ནི་རྣམ་དབྱེ་ལྔ་པ་འབྱུང་ཁུངས་ཀྱི་སྒྲ་སྟེ། སྟོན་པའི་གསུང་རབ་ལས་ཆོས་འབྱུང་བར་ངེས་པའི་དོན་ཏོ། །དྲང་སྲོང་ཡིད་ལས་སྐྱེས་ཀྱིས་དེ་སྐད་ཅེས་ཞུས་པའི་ལན་དུ། སྟོན་པ་དྲང་སྲོང་རིག་པའི་ཡེ་ཤེས་ཀྱིས་འདི་ལྟར་གསུངས་པ།

ཀྱེ་དྲང་སྲོང་ཆེན་པོ་ཡིད་ལས་སྐྱེས་ལེགས་པར་ཉོན་ལ་ཡིད་ལ་ཟུངས་ཤིག་ཅེས་བཀའ་བསྒོས་ནས་གོང་དུ་ཡན་ལག་བཅུ་གཅིག་ཡོད་པར་བཤད་པའི་དང་པོ་ཚེ་རིང་ཆོས་ནོར་གང་གི་དོན་དུ་གསོ་བ་ལུས་ཁམས་དྲུག་ལས་ཡོངས་སུ་གྲུབ་པ་རྡོ་རྗེའི་ལུས་ཀྱི་གནས་འདིར་བསྟན་པར་བྱ་བ་ནི་འདི་ལྟ་བུ་ཡིན་ཏེ། ལུས་ཇི་ལྟར་ཆགས་པའི་ཚུལ་དང༌། དེའི་ཆ་ཤས་རེ་རེ་ནས་འདྲ་བའི་དཔེ་དང༌། ཁམས་སོ་སོའི་ལྡང་ཚད་དང༌། ལུས་དེ་ཉིད་ཚུལ་ཇི་ལྟར་ངེས་པར་བྱ་བའི་གནས་ལུགས་དང༌། ལུས་དེའི་གནོད་བྱ་ཁམས་དང་གནོད་བྱེད་ཉེས་པའི་མཚན་ཉིད་དང༌། ལུས་དེའི་རྣམ་གྲངས་ཀྱི་དབྱེ་བ་དང༌། དེ་ལས་ཇི་ལྟར་བྱ་བའི་ཚུལ་དང་མཐར་འཇིག་པའི་སྔ་ལྟས་བསྟན་པ་དང་རྣམ་པ་བདུན་དུ་བཤད་པར་བྱའོ་ཞེས་བྱ་བའི་དོན་ཏོ།།

དེ་ལྟར་གྲུབ་པ་ལུས་ཀྱི་གནས་དེ་ལ་མདོར་བསྟན་བདུན་ཡོད་པའི་དང་པོ་ལུས་ཆགས་པའི་ཚུལ་བསྟན་པར་བྱ་སྟེ། དེའང་ལུས་ཆགས་པའི་རྒྱུ་དང༌། དེ་འཕེལ་བར་བྱེད་པའི་རྐྱེན་དང༌། ཁོང་ནས་བཙའ་བའི་རྟགས་བསྟན་པ་དང་རྣམ་པ་གསུམ་དུ་ཡོད་ཅེས་པའོ། །དེ་ཡང་དཔེར་ན་ཕོ་ཤིང་གཙུབ་ཤིང་དང་མོ་ཤིང་གཙུབ་གཏན་དང་སྤྲ་བ་དུལ་མ་རླན་མེད་པ་དང༌། སྐྱེས་བུའི་རྩོལ་བ་རྣམས་གནས་གཅིག་ཏུ་ཚང་ཞིང་འདུས་པར་རུང་བ་ནི་མེ་འབྱུང་བའི་རྒྱུ་ཡིན་ཏེ་རྩོལ་བ་ལ་ཞུགས་པ་ཙམ་གྱིས་མེ་འབྱུང་དུ་རུང་བ་ཡིན་པའི་ཕྱིར། དེ་བཞིན་དུ་ཕའི་ཁུ་བ་དང༌། མའི་ཟླ་མཚན་ལ་རླུང་སོགས་ཀྱི་སྐྱོན་མེད་པ་དང༌། སྔོན་གྱི་སྨོན་ལམ་དང་རྗེས་སུ་འབྲེལ་བའི་བར་དོའི་རྣམ་པར་ཤེས་པ་ལས་ཀྱིས་བསྐུལ་བ་དང༌། དེ་དག་སོ་སོ་རང་རང་གི་འབྱུང་བ་ལྔའི་རང་བཞིན་དང་ཆ་ཤས་རྣམས་ཚང་ཞིང་འདུས་ལ། གནས་གཅིག་ཏུ་ཆགས་པར་རུང་བ་ནི་མངལ་ཆགས་པའི་རྒྱུ་ཡིན་ཏེ། དེའི་ཚེ་ཕ་མ་གཉིས་འཁྲིག་པ་ལ་ཞུགས་པ་ཙམ་གྱིས་ལྟོ་བ་སྦྲུམ་པར་མཐོང་བའི་ཕྱིར་རོ། །འདིའི་སྐབས་ཀྱི་འབྱུང་ལྔ་ཞེས་པ་ནི། སྤྱིར་ཁུ་ཁྲག་སེམས་གསུམ་རང་རང་གི་ཆ་ལ་གནས་པའི་འབྱུང་ལྔའི་ཆ་ཤས་རྣམས་ལ་ཟེར་བ་ཡིན་ཀྱང༌། ཁྱད་པར་དུ་བར་དོའི་རྣམ་པར་ཤེས་པ་དང་ལྷན་ཅིག་ཏུ་གནས་པའི་འབྱུང་བ་ལྔ་ཤིན་ཏུ་ཕྲ་བའི་ཆ་ཞིག་ཡོད་པ་དེ་ལ་བྱ་ཞིང༌། དེ་ཡང་གཞན་རྣམས་དང་མཉམ་དུ་ཚོགས་པར་རུང་བ་ཞིག་གི་དོན་ཡིན་ཏེ། དཔའ་བོས་ཡན་ལག་བརྒྱད་པའི་རང་འགྲེལ་དུ། དང་པོ་ཕ་མའི་ཁུ་ཁྲག་ལ་རླུང་ལ་སོགས་པའི་སྐྱོན་མེད་པ་དང༌། ལས་དང་ཉོན་མོངས་པ་དང་ལྡན་པའི་རྣམ་པར་ཤེས་པ་དང༌། དེ་དང་ལྷན་ཅིག་ཏུ་ནམ་མཁའ་ལ་སོགས་པའི་འབྱུང་བ་ཆེན་པོ་ལྔ་ཤིན་ཏུ་ཕྲ་བ་དབང་པོའི་ཡུལ་ལས་འདས་པ་རྣལ་འབྱོར་གྱི་ཡུལ་དུ་གྱུར་པ་དེ་དག་སྐད་ཅིག་མངལ་དུ་ཚོགས་ཤིང་འདུས་པ་ནི་རུམ་དུ་ཆགས་པ་ཞེས་བྱ་སྟེ། དཔེར་ན་གཙུབ་ཤིང་དང༌། གཏན་པ་དང༌། སྤྲ་བ་དང༌། སྐྱེས་བུའི་རྩོལ་བ་ལག་པ་དང༌། འདི་དག་ཚོགས་པ་ལས་མེ་འབྱུང་བ་ཡིན་ནོ་ཞེས་གསུངས་པའི་ཕྱིར་ངེས་པའོ།།

གོང་དུ་ཆགས་རྒྱུ་དང་འཕེལ་རྐྱེན་བཙའ་རྟགས་ཞེས་བཤད་པའི་དང་པོ་ཆགས་རྒྱུ་ནི། ཕ་མའི་ཁུ་བ་དང་ཁྲག་ལ་རླུང་མཁྲིས་བད་ཀན་ལྡན་འདུས་སོགས་འཕེལ་ཟད་འཁྲུགས་པའི་སྐྱོན་མེད་པ་དང༌། བར་དོར་འཁྱམས་པའི་རྣམ་པར་ཤེས་པ་དེ་ཉིད་དགེ་བ་དང་མི་དགེ་བ་གང་རུང་གི་ལས་དང་མ་རིག་པ་ལ་སོགས་པ་ཉོན་མོངས་པའི་རླུང་གིས་ཉེ་བར་བསྐུལ་ནས། ཕ་མ་གཉིས་ཉལ་པོ་བྱས་པ་ལ་རྟེན་ཆགས་པ་དང༌། ཁུ་ཁྲག་སེམས་གསུམ་གྱི་འབྱུང་བ་ལྔ་པོ་ལྷན་ཅིག་ཏུ་ཚོགས་ཤིང་འདུས་པར་རུང་བ་ནི་མངལ་དུ་བུ་ལ་སོགས་པ་ཆགས་པར་འགྱུར་བའི་རྒྱུ་ཡིན་ཏེ། དཔེར་ན་གཙུབ་ཤིང་དང་གཙུབ་གཏན་དང་སྤྲ་བ་དང་སྐྱེས་བུས་བསྲུབས་པའི་འབད་རྩོལ་རྣམས་ལྷན་ཅིག་ཏུ་ཚོགས་པ་དེ་དག་ལས་ནི་མེ་འབྱུང་བ་དང་རྣམ་པ་དུ་མའི་སྒོ་ནས་མཚུངས་པ་ཡིན་ནོ།།

དེ་ཡང་ཕོ་མོ་གཉིས་ལྷན་ཅིག་ཏུ་མ་འདུས་པའི་སྔོན་རོལ་དུ་སྐྱེས་པའི་ཁུ་བ་ལ་སྐྱོན་དེ་རྣམས་ཡོད་པའམ། བུད་མེད་ཀྱི་ཟླ་མཚན་ལ་སྐྱོན་དེ་ལྟ་བུ་ཡོད་པའམ། གཉིས་ཀ་ལ་ཡོད་ཀྱང་རུང༌། མངལ་དུ་སེམས་ཅན་ཆགས་པའི་ས་བོན་བྱེད་མི་ནུས་པས་དེ་ལ་ནི་གསོ་བའི་ཐབས་འདིར་དངོས་སུ་གསལ་བ་མ་བྱུང་ཡང༌། ཡན་ལག་བརྒྱད་པར། རླུང་ལ་སོགས་པས་གནོད་གྱུར་པ། །རང་གི་སྨན་གྱིས་གསོ་བར་བྱ། །ཞེས་དང༌། ཙནྡན་བླུད་བྱ་ཕྱིས་བཤད་པའི། །གསང་བའི་ནད་གསོར་བཤད་ཀུན་དང༌། །འཇམ་རྩིར་བཅས་པ་གང་ཡིན་བྱ། །ཞེས་དང༌། དེའི་འགྲེལ་པ་གཉིས་ལས་བཤད་པ་འམ། མན་ངག་རྒྱུད་ཀྱི་གསང་ནད་གསོ་བའི་སྐབས་ལྟར་གསོ་བའི་ཆོ་ག་བྱས་པས་དེ་དང་དེའི་སྐྱོན་རྣམས་སོ་སོར་དག་ནས་ས་བོན་གྱི་དོན་བྱེད་ནུས་པ་ཡིན་ནོ། །འོན་ཀྱང་རླུང་མཁྲིས་ཀྱི་སྐྱོན་གྱིས་ཟད་པ་འམ་སྐམ་པར་གྱུར་པ་ནི་གསོ་དཀའ་ཞིང༌། འདུས་པའི་སྐྱོན་གྱིས་བཤང་གཅི་འདྲ་བ་ནི་གསོ་མི་ནུས་པར་བཤད་དེ། བརྒྱད་པར། རླུང་དང་མཁྲིས་པས་ཟད་པར་འགྱུར། །འདི་དག་གསོ་དཀའ་ཉེས་གསུམ་ལྡན། །བཤང་གཅི་འདྲ་བ་གསོར་མི་རུང༌། །ཞེས་གསུངས་པའི་ཕྱིར་རོ། །མདུད་པ་ཅན་ཞེས་པ་ནི། ཟླ་ཟེར་ལས། བུད་མེད་ཀྱི་ཟླ་མཚན་མདུད་པའམ་རྨེན་བུ་འདྲ་བ་ལ་ནི་ཞེས་བཤད་པས་གོང་བུར་འདྲིལ་བའི་དོན་ཡིན་ཏེ། དེའི་སྨན་བཤད་པ་ལའང་སྨན་པ་མཐའ་ལ་སོགས་པ་བསྐོལ་བའི་ཆུ་བླུད་པར་བྱའོ་ཞེས་པའི་གོང་བུར་འདྲིལ་བ་དེ་ཉིད་བཤིག་པའི་སྨན་ཡིན་པའི་ཕྱིར་རོ།།

བུ་འདོད་པའི་ཕོ་མོ་གཉིས་ལྷན་ཅིག་ཏུ་མ་འདུས་པའི་སྔ་རོལ་གྱི་ཁུ་བ་དང་ཁྲག་གཉིས་ནད་ཀྱི་དབང་གིས་གལ་ཏེ་འཛག་པར་གྱུར་པའི་ཚེ་གསོ་བར་བྱ་དགོས་ཏེ། དེའི་ཕྱིར་ཉེས་པ་གང་གིས་བསྐྱེད་བརྟག་དགོས་པ་ལས་དེའང་རླུང་གིས་བསྐྱེད་པའི་རྟགས་སུ་ཁུ་བ་དང་ཁྲག་དེ་གཉིས་ཀྱི་རེག་བྱ་རྩུབ་པ་དང༌། ཁ་དོག་ནག་པོ་དང་རོ་བསྐ་བ་འབྱུང་ལ། དེའི་ཚུལ་མཁྲིས་པས་བསྐྱེད་པའི་རྟགས་སུ་རོ་སྐྱུར་བ་དང༌། མདོག་སེར་བ་དང་དྲི་མ་ངན་པ་མནམ་པ་འབྱུང་ངོ༌། །བད་ཀན་གྱིས་བསྐྱེད་པའི་རྟགས་སུ་ཁ་དོག་སྐྱ་བ་དང་ངོ་བོ་འབྱར་བག་ཆེ་བ་རོ་མངར་བ་དང་རེག་བྱ་བསིལ་བར་འབྱུང་བ་ཡིན་ཏེ། རླུང་མཁྲིས་བད་ཀན་རང་རང་གི་མཚན་ཉིད་རྗེས་སུ་མཐུན་པའི་བྱ་བ་བྱེད་པའི་ཕྱིར་རོ། །དེ་བཞིན་དུ་ཁྲག་གི་སྐྱོན་གྱིས་རུལ་ཏེ་རོ་མྱགས་པ་ལྟར་འགྱུར་བ་དང༌། བད་རླུང་ལྡན་པའི་སྐྱོན་གྱིས་དུམ་བུ་དུམ་བུར་ཆད་དེ་གཅིག་ཏུ་མི་འདུ་བ་དང༌། ཁྲག་མཁྲིས་དང་ལྡན་པའི་སྐྱོན་གྱིས་རྣག་སྨིན་པ་འདྲ་བར་ཤིན་ཏུ་རྙོགས་པ་ལྟར་འགྱུར་བ་དང༌། བད་མཁྲིས་དང་ལྡན་པའི་སྐྱོན་གྱིས་མདུད་པ་ཅན་སྟེ་གོང་བུ་གཅིག་ཏུ་འདྲིལ་བ་དང༌། རླུང་མཁྲིས་དང་ལྡན་པའི་སྐྱོན་གྱིས་ཁུ་ཁྲག་གཉིས་རང་རང་གི་གནས་སུ་སྐམས་པའམ་ཟད་པར་གྱུར་ན་མི་འབྱུང་སྟེ། འདི་ནི་གསོ་དཀའ་ཞིང༌། དེ་དག་ཐམས་ཅད་འདུས་པས་ཉེས་པ་བསྐྱེད་པ་ནི་བཤང་གཅི་དང་འདྲ་བ་བྱུང་སྟེ། འདི་ནི་གསོ་མི་ནུས་པར་བཤད་ལ། མདོར་ན་བཤད་མ་ཐག་པ་འདི་དག་གི་སྐྱོན་རེ་རེས་ཀྱང་ས་བོན་གྱི་དོན་བྱེད་མི་ནུས་སོ།།

ལས་ཞེས་བྱ་བ་ནི་དགེ་མི་དགེ་ལུང་མ་བསྟན་གང་རུང་གི་འདུས་བྱས་པ་ལས་བྱུང་བའི་དངོས་པོ་ཞིག་གི་དོན་ཡིན་ལ་དེའང་བར་སྲིད་དུ་འཁྱམས་པའི་སེམས་ཅན་དེས་མི་ལུས་ལེན་པའི་རྒྱུ་དགེ་བའི་ལས་བསགས་ཤིང༌། ཕ་མ་དེ་གཉིས་ཀྱི་ལས་དང་རིགས་མཐུན་པ་ཞིག་ཡིན་ན་དེ་དང་དེ་འདྲ་བའི་མངལ་དུ་འཇུག་ལ། དེ་ལས་ལྡོག་པའི་ལས་དང་མི་ལྡན་པ་རྣམས་ནི་ལས་མ་འཛོམ་པ་ཞེས་བྱ་སྟེ་དེ་དང་དེ་ལྟ་བུའི་ཕ་མའི་མངལ་དུ་རྣམ་པར་ཤེས་པ་འཇུག་པར་མི་འགྱུར་ཞེས་པའི་དོན་ཡིན་ནོ། །གཞན་ཡང་ཐེག་པ་ཆེན་པོའི་མདོ་སྡེ་དཀོན་མཆོག་བརྩེགས་པའི་ལེའུ་བཅུ་བཞི་པ་དགའ་བོ་མངལ་འཇུག་ལས་འདི་ལྟར་གསུངས་ཏེ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །དགའ་བོ་སེམས་ཅན་རྣམས་མངལ་དུ་འཇུག་པར་འདོད་པའི་ཚེ། རྒྱུ་དང་རྐྱེན་ཕུན་སུམ་ཚོགས་པར་གྱུར་ན་ནི་ལུས་ལེན་པར་འགྱུར་གྱིས། གལ་ཏེ་ཕུན་སུམ་ཚོགས་པར་མ་གྱུར་ན་ནི་ལུས་ལེན་པར་མི་འགྱུར་རོ། །དེ་ལ་རྐྱེན་དང་མི་ལྡན་པ་ཞེས་བྱ་བ་གང་ཞེ་ན། འདི་ལྟ་སྟེ། ཕ་དང་མ་གཉིས་ཀའང་ཆགས་པའི་སེམས་བྱུང་བར་གྱུར། བར་མ་དོའི་ཕུང་པོ་ཡང་མངོན་དུ་གྱུར་ཅིང་སྐྱེ་བའི་གནས་ཡོངས་སུ་འཚོལ་བར་བྱེད་ཀྱང༌། ཕ་མ་དེ་དག་གི་འདུ་འཕྲོད་སྔ་ཕྱིར་གྱུར་ཅིང་དུས་གཅིག་ཏུ་བྱུང་བར་མ་གྱུར་ཏམ། སོ་སོའི་ལུས་ལ་ནད་རྣམས་དང་ལྡན་པར་གྱུར་ནའང་མངལ་དུ་འཇུག་པར་མི་འགྱུར་རོ་ཞེས་དང༌། གལ་ཏེ་ཕ་མ་ཆོ་རིགས་བཙུན་ཞིང་བསོད་ནམས་ཆེན་པོ་དང་ལྡན་པར་གྱུར་ལ། བར་མ་དོའི་ཕུང་པོ་བསོད་ནམས་ཆུང་བའམ། བར་མ་དོའི་སྲིད་པ་ཆོ་རིགས་བཙུན་ཞིང་བསོད་ནམས་ཆེན་པོ་དང་ལྡན་པར་གྱུར་ལ། ཕ་མ་བསོད་ནམས་ཆུང་བར་གྱུར་ཏམ། གཉིས་ཀ་བསོད་ནམས་དང་ལྡན་ཡང་ཕན་ཚུན་ཕྲད་པར་འགྱུར་བའི་ལས་བསགས་པར་མ་གྱུར་ན་ཡང་མངལ་དུ་འཇུག་པར་མི་འགྱུར་རོ་ཞེས་གསུངས་པ་ལྟར་ངེས་པར་བྱའོ། །ཕ་མ་གཉིས་བར་དོའི་སེམས་ཅན་ཕན་ཚུན་ཕྲད་པར་འགྱུར་བའི་ལས་ལ་སོགས་པ་ལྷན་ཅིག་ཏུ་མ་འཛོམ་ན། སྐྱེས་པ་དང་བུད་མེད་གཉིས་ཀ་ཁུ་ཁྲག་གི་ཆོས་དང་ལྡན་ཞིང༌། རླུང་སོགས་ཀྱི་སྐྱོན་ཡང་མེད་ལ། འབྱུང་བ་ཆེན་པོ་ལྔ་རྣམས་ཚང་ཡང་བར་དོའི་རྣམ་པར་ཤེས་པ་དེ་ཉིད་མངལ་དུ་མི་འཇུག་སྟེ་ལས་ཉིད་དབང་བཙན་པའི་ཕྱིར་རོ།།

འབྱུང་བ་ལྔ་མ་འཛོམ་ན་རྒྱུར་མི་རུང་བའི་ཚུལ་གྱིས། ས་མེད་མི་འགྲུབ་ཆུ་མེད་སྡུད་མི་ནུས། །ཞེས་སོགས་ཀྱི་ཚིག་འདི་ལ་རྟོགས་ལྡན་འགའ་ཞིག་ན་རེ། ཕ་མའི་ཁུ་བ་དཀར་དམར་ནི་འབྱུང་བ་ལྔའི་རང་བཞིན་དུ་གྲུབ་ཅིང་བར་སྲིད་ཀྱི་རྣམ་པར་ཤེས་པའང་ཤིན་ཏུ་ཕྲ་བའི་འབྱུང་ལྔ་རང་ཆས་སུ་ཡོད་པས་ས་སོགས་མེད་པ་ག་ལ་འབྱུང༌། དེ་ལས་གཞན་པའི་འབྱུང་ལྔ་ནི་མངལ་དུ་འཇུག་པའི་སྐབས་མེད་པས་ཚིག་འདི་ནི་གྱི་ན་བ་ཙམ་མོ་ཞེས་སྨྲ་བར་དོགས་པས་བརྗོད་པར་བྱའོ། །ཁུ་ཁྲག་སེམས་གསུམ་པོ་ལ་རང་ཆས་ཀྱི་འབྱུང་ལྔ་ཡོད་པ་དང༌། དེ་ལས་གཞན་པའི་འབྱུང་ལྔ་མངལ་དུ་འཇུག་པའི་སྐབས་མེད་པ་ནི་བདེན་མོད། འོན་ཀྱང་གཞུང་ཚིག་འདིས་ནི་འདི་ལྟར་སྟོན་པ་ཡིན་ཏེ། མི་ཤེས་པ་འགའ་ཞིག་གི་བསམ་པ་ལ། འབྱུང་བ་ཆེན་པོ་རྣམས་ལ་མ་ལྟོས་པར་ཁུ་ཁྲག་ཁོ་ནས་ལུས་ཆགས་ཤིང་འཕེལ་བའི་རྒྱུ་བྱེད་པར་འདོད་ཅིང༌། ཁུ་ཁྲག་དེ་ཡང་འབྱུང་ལྔའི་རང་བཞིན་དུ་མི་ཤེས་པ་རྣམས་ཀྱི་ལོག་རྟོག་དགག་པའི་ཆེད་དང་མདོ་དོན་དུ་ལུས་ཆགས་བསྐྱེད་ཐམས་ཅད་རྒྱུ་རྐྱེན་བྱེད་པ་ནི་འབྱུང་བ་ཆེན་པོ་ལྔ་ལས་མ་བྱུང་བ་མི་སྲིད་དོ་ཞེས་སྟོན་པ་ཡིན་ནོ། །ཚུལ་འདི་ཉིད་བརྒྱད་པ་རྩ་འགྲེལ་དུ་གསལ་པོ་མི་འབྱུང་ཡང༌། དགའ་བོ་མངལ་འཇུག་གི་མདོ་ལས་མེར་མེར་པོའི་ལུས་དེ་དག་གལ་ཏེ་སའི་ཁམས་འབའ་ཞིག་དང་ལྡན་ལ། ཆུའི་ཁམས་མེད་པར་གྱུར་ན་ནི་འདི་ལྟ་སྟེ། དཔེར་ན་ཕྱེ་དང་ཐལ་བ་སྐམ་པོ་བཅངས་པ་བཞིན་སྡུད་མི་ཐུབ་པར་འགྱུར་རོ། །གལ་ཏེ་ཆུའི་ཁམས་འབའ་ཞིག་དང་ལྡན་ལ་སའི་ཁམས་མེད་པར་གྱུར་ན་ནི་འདི་ལྟ་སྟེ། དཔེར་ན་འབྲུ་མར་རམ་ཆུའི་རང་བཞིན་སྣུམ་ཞིང་གཤེར་བ་ལ་སྲ་བ་མེད་པ་བཞིན་དུ་བོ་ཞིང་གྱེས་པར་འགྱུར་རོ། །གལ་ཏེ་ས་དང་ཆུའི་ཁམས་འབའ་ཞིག་དང་ལྡན་ལ་མེའི་ཁམས་མེད་པར་གྱུར་ན་ནི་འདི་ལྟ་སྟེ། དཔེར་ན་དབྱར་ཚ་བའི་དུས་སུ་ཤའི་གོང་བུ་གྲིབ་མ་ལ་བཞག་པ་ཉི་མའི་འོད་ཀྱིས་མ་ཕོགས་པ་བཞིན་དུ་འདྲུལ་ཞིང་མྱགས་པར་འགྱུར་རོ། །གལ་ཏེ་ས་དང་ཆུ་དང་མེའི་ཁམས་དང་ལྡན་ཞིང་རླུང་གི་ཁམས་མེད་པར་གྱུར་ན་ནི་འཕེལ་བར་མི་འགྱུར་ཏེ། འདི་ལྟ་སྟེ། དཔེར་ན་ཁུར་བ་མཁན་ནམ་དེའི་སློབ་མ་མཁས་པས་ཁུར་བ་བཅོས་ནས་དབུགས་ཀྱིས་བུས་ཏེ་ཅི་དང་ཅི་བྱ་བ་རྣམས་མངོན་པར་འདུས་བྱས་པ་དེ་དག་ནང་ཁོང་སྟོང་བྱེད་པ་ལ་གལ་ཏེ་རླུང་གི་སྟོབས་མེད་པར་གྱུར་ན་མངོན་པར་འགྲུབ་པར་མི་འགྱུར་རོ། །དེ་བཞིན་དུ་འབྱུང་བ་ཆེན་པོ་བཞི་པོ་དེ་དག་ཀྱང་ཕན་ཚུན་གཅིག་ལ་གཅིག་བརྟེན་ཅིང་ཡོངས་སུ་བཟུང་ནས་རྣམ་པར་གཞག་པ་ཡིན་པས་དེའི་ཕྱིར་མེར་མེར་པོའི་ལུས་ནི་ཕ་མའི་འབྱུང་བ་ཆེན་པོ་བཞི་དང་ལས་ཀྱི་རླུང་གི་རྒྱུས་སྐྱེ་བར་འགྱུར་བ་དེ་བཞིན་དུ་རྐྱེན་མང་པོ་རྣམས་ཀྱི་ནང་ན་དམིགས་པར་མི་འགྱུར་ཡང༌། འདུས་པའི་སྟོབས་ཀྱིས་ལུས་ཡང་དག་པར་ལེན་པར་འགྱུར་བར་རིག་པར་བྱའོ།།

དེ་ཡང་ལུས་ཀྱི་གཙོ་བོ་ཁུ་ཁྲག་སེམས་གསུམ་པོ་ལྷན་ཅིག་ཏུ་འདུས་སུ་ཟིན་ཡང༌། དེའི་ཚེ་འབྱུང་བ་ཆེན་པོ་རྣམས་ཀྱི་ནང་ནས་སའི་རང་བཞིན་མེད་ན་འབྱུང་བ་གཞན་རྣམས་ཡོད་ཀྱང་ལུས་འདི་ཉིད་མི་འགྲུབ་སྟེ། ལུས་འདི་སྲ་བ་ལ་སོགས་པའི་རང་བཞིན་ཕལ་ཆེར་ནི་ས་ལས་གྲུབ་པའི་ཕྱིར། དེ་བཞིན་དུ་འབྱུང་བ་ཆུ་མེད་ན་གཞན་རྣམས་ཡོད་ཀྱང་གཅིག་ཏུ་བསྡུ་བར་མི་ནུས་ཏེ་གོར་གོར་མེར་མེར་པོ་ལ་སོགས་པ་འབྱུང་བར་མི་འགྱུར་རོ། །འབྱུང་བ་གཞན་རྣམས་ཡོད་ཀྱང་མེའི་རང་བཞིན་མེད་ན་རིམ་པ་བཞིན་མི་སྨིན་ཏེ། རུལ་ཞིང་མྱགས་པར་འགྱུར་བས་སོ། །གཞན་རྣམས་ཡོད་ཀྱང་རླུང་གི་རང་བཞིན་མེད་ན་ཆེས་ཆེར་འཕེལ་བར་མི་འགྱུར་ཏེ། ལྕི་ཞིང་འཐས་པར་གནས་པའོ། །དེ་དག་ཐམས་ཅད་ཡོད་ཀྱང་ནམ་མཁའ་སྟེ་སྟོང་པའི་ཆ་ཤས་གལ་ཏེ་མེད་པར་གྱུར་ན་ནི་འཕེལ་བའི་གོ་སྐབས་མི་ཕྱེད་དོ། །འཕེལ་ཞིང་རྒྱས་པའི་གནས་བཀག་པར་འགྱུར་བའི་དོན་གྱིས་སོ། །འོ་ན་དགའ་བོ་མངལ་འཇུག་ལ་སོགས་པར་འབྱུང་བ་བཞི་ལས་མ་བྱུང་བས། འདིར་ནམ་མཁའ་ཡང་ལུས་ཆགས་ཤིང་འཕེལ་བའི་རྒྱུར་བཤད་པ་མི་རིགས་ཏེ། ནམ་མཁའ་ནི་འདུས་མ་བྱས་ཡིན་པས་སོ་ཞེ་ན་སྐྱོན་མེད་དེ། སྤྱིར་ནམ་མཁའ་ནི་འདུས་མ་བྱས་ཡིན་མོད་ཀྱང༌། ནམ་མཁའི་མཚན་ཉིད་ལ་སྟོང་ཞིང་གོ་འབྱེད་པ་ཞེས་འབྱུང་བའི་དོན་གྱིས་ན། འདིར་ཡང་ཁུ་ཁྲག་སེམས་གསུམ་མངལ་དུ་གནས་པའི་དུས་ན། དེ་སྟོང་པའི་ཆ་ལུས་འཕེལ་བའི་གོ་སྐབས་ཡངས་པོར་བྱེད་ནུས་པ་ཞིག་ཡོད་པ་དེ་ལ་འཕེལ་བའི་གོ་འབྱེད་ཅེས་མཚན་ཉིད་རྗེས་སུ་མཐུན་པར་མིང་བཏགས་པ་ཙམ་མ་གཏོགས་ནམ་མཁའ་ལུས་ཀྱི་རྒྱུ་དངོས་བྱེད་པ་ནི་མ་ཡིན་ནོ།།

ལུས་ཆགས་པའི་རྒྱུ་ནི། ཟླ་ཟེར་ལས། ཁུ་བ་དཀར་ཞིང་ལྕི་བ་དང༌། །མངར་དང་བསྐ་དང་མང་པ་དང༌། །མར་དང་སྦྲང་རྩི་ཏིལ་མར་འདྲ། །མངལ་དུ་ལེགས་ཆགས་ཞེས་བྱ་ལ། །ཁུ་ཆུ་གངས་དཀར་པོ་ལ་སོགས་པའི་ཡོན་ཏན་དང་ལྡན་པ་དེ་ནི་མངལ་དུ་ལེགས་པར་ཆགས་ཤིང་འཛིན་པའི་རྒྱུ་ཡིན་པར་ཤེས་པ་སྟེ། དཀར་བ་ནས་ཏིལ་མར་འདྲ་ཞེས་པའི་བར་འདི་དག་ནི་ཁུ་བའི་ཁྱད་པར་ཡིན་པར་ཤེས་པར་བྱའོ། །ཟླ་མཚན་ཡང༌། རྒྱ་སྐྱེགས་ཁུ་བ་རི་བོང་ཁྲག །འདྲ་ཞིང་བཀྲུས་ན་དག་འགྱུར་བཟང༌། །ཞེས་བྱ་བ་ལ། ཟླ་མཚན་གྱི་ཁྲག་ཀྱང་ཁྱད་པར་འདི་དག་དང་ལྡན་ན་བཟང་ཞིང་མངལ་དུ་ཆགས་ཏེ། རྒྱ་སྐྱེགས་བཙོས་པའི་ཁུ་བ་འདྲ་བ་དང༌། རི་བོང་གི་ཁྲག་ལྟར་དམར་བ་དང༌། གང་གོས་ལ་ཆགས་ཤིང་ཞེན་པ་བཀྲུས་ན་དག་ཅིང་དམར་བ་མེད་པར་འགྱུར་ན་དེ་མངལ་དུ་ཆགས་པ་བཟང་བའི་རྒྱུ་ཡིན་ནོ་ཞེས་པ་ལྟར། སྐྱེས་པའི་ཁུ་བ་མར་དང་སྦྲང་རྩི་ལྟར་དཀར་ཞིང༌། རླུང་སོགས་ཀྱི་སྐྱོན་མེད་པ་ལྕི་བ་དང་རོ་མངར་ལ་བསྐ་བ་མང་བ་འབྱུང་བ་དང༌། བུད་མེད་ཀྱི་ཟླ་མཚན་ཚོས་རྒྱ་སྐྱེགས་ཀྱི་ཁུ་བ་དང་རི་བོང་གི་ཁྲག་འདྲ་བ་ཁ་དོག་དམར་ཞིང་དྭངས་ལ་བུད་མེད་དེ་ཉིད་ཀྱི་གོས་ལ་འགོས་པ་བཀྲུས་ན་ཁྲག་གི་ཞད་མེད་པར་དག་པར་འགྱུར་བ་དེ་ནི་ཁུ་ཁྲག་གཉིས་ཀ་ལ་སྐྱོན་མེད་པའི་དོན་ཡིན་པས། མངལ་དུ་ཆགས་པ་ལུས་ཅན་དེ་ཉིད་གཟུགས་བཟང་ཞིང་བློ་དང་དབང་པོ་ཤིན་ཏུ་གསལ་བ་དག་སྐྱེད་པར་བྱེད་དོ་ཞེས་བྱ་བའི་དོན་ཏོ།།

དེ་ལྟར་གྱི་ཟླ་མཚན་དེ་ཡང་སྦྲུམ་མ་དང་མོ་གཤམ་མ་ཡིན་པ་ལ་ཟླ་བ་རེ་རེའི་ཚེས་བཅུ་དྲུག་ནས་གནམ་གང་གི་བར་དུ་ཉི་མའི་སྟོབས་ལྷག་པར་འཕེལ་བའི་དོན་གྱིས་ནང་དུ་ཁམས་དམར་པོ་རིམ་པས་འཕེལ་ཏེ་བསམ་སེའུར་གསོག་པར་བྱེད་ལ། སླར་ཚེས་གཅིག་ལ་སོགས་པ་ཟླ་བའི་དཀར་ཕྱོགས་ཤར་བའི་ཚེ། བསམ་སེའུ་དང་བུ་སྣོད་གཡས་གཡོན་སོ་སོར་འབྲེལ་བའི་རྩ་ཆེན་གཉིས་པོ་བརྒྱུད་ནས་མངལ་གྱི་སྦུབས་སུ་འཇུག་ཅིང༌། དེར་ཞུགས་པ་ཙམ་གྱིས་མངལ་སྒོ་བྱེ་སྟེ་ཐུར་དུ་འཛག་པ་དང༌། དེ་ཡང་ཚེས་གཅིག་ནས་བཅོ་ལྔའི་བར་དུ་ཟླ་བའི་ཁམས་ལྷག་པར་འཕེལ་ཞིང་ཉི་མའི་ཁམས་འབྲི་བའི་དུས་ཡིན་པས་དཀར་ཕྱོགས་ལ་འཛག་པ་ཤས་ཆེ་ཞིང་ཟླ་བ་རེ་རེ་བཞིན་གྱི་དེ་དང་དེའི་དུས་སུ་འབྱུང་བས་ན་ཟླ་མཚན་ཞེས་བྱའོ། །ཟླ་མཚན་དེའང་བུ་མོ་ལོ་བཅུ་གཉིས་མ་ལོན་པའི་གོང་དུ་དྭངས་མ་རྣམས་རང་རང་གི་གསོ་བསྐྱེད་ཀྱི་བྱ་བས་བསམ་སེའུར་གསོག་པའི་སྐབས་མེད་ཅིང༌། ལོ་ལྔ་བཅུ་ཐལ་ནས་འབྱུང་བ་ཉམས་པའི་དབང་གིས་གསོག་པའི་རྒྱུ་མེད་པའི་དོན་གྱིས་མི་འཛག་ལ། དེའི་བར་དུ་ཟླ་བ་རེ་རེ་བཞིན་དུ་འབབ་པར་འགྱུར་ཏེ། དེ་ཡང་བུད་མེད་ཕལ་ཆེར་རྣམས་ལོ་བཅུ་གཉིས་ལོན་ནས་ལྔ་བཅུ་མ་འདས་ཀྱི་བར་དེར་ཁ་ཟས་ཀྱི་དྭངས་མ་རྣམས་ལས་རིམ་བཞིན་བྱུང་བའི་ཁུ་བ་དམར་པོ་བསམ་སེའུར་གནས་པ་དེ་ཉིད་ཟླ་བ་རེ་རེ་བཞིན་བསམ་སེའུར་བསགས་པའི་ཁྲག་ཡིན་ལ། ཁྲག་དེ་ཡང་ཟླ་བ་རེ་རེའི་དུས་ཚིགས་སུ་བསམ་སེ་དང་བུ་སྣོད་ཀྱི་གཡས་གཡོན་རྩ་ཆེན་གཉིས་ཀྱིས་འབྲེལ་བ་དེ་ལས་བརྒྱུད་དེ་བུ་སྣོད་ཀྱི་ནང་དུ་ཞུགས་ཤིང༌། དེ་ནས་ཁྲག་དེ་ཉིད་ཁ་དོག་ཅུང་ཟད་ནག་ཅིང་དྲི་མ་དང་བྲལ་བ་ཞིག་ཐུར་སེལ་གྱི་རླུང་གིས་མངལ་གྱི་སྒོར་འབྱིན་པར་བྱས་ཏེ་ཞག་གསུམ་གྱི་བར་དུ་ཅུང་ཟད་རེ་འཛག་པ་ཡིན་ལ། དེ་ནས་ནི་མ་ཡིན་ནོ། །དེ་དག་འབྱུང་བའི་རྟགས་ནི་ལུས་ཀྱི་ཉམས་ཤེད་ཆུང་ཞིང་བཞིན་རས་རིད་པས་ངན་པ་དང༌། ནུ་མ་དང་རྐེད་པ་དང་མགུལ་པ་དང༌། མིག་དང་དཀུ་སྟེ་ཚང་ར་རྣམས་འདར་ཞིང་གཡོ་བ་སྟེ་འདིའི་དུས་སུ་ཟླ་མཚན་དང་ལྡན་ཞིང་ཆགས་པས་གཟིར་བ་ཡིན་པས་སྐྱེས་པ་དང་འཁྲིག་པར་འདོད་པའི་རྟགས་ཡིན་པར་ཤེས་པར་བྱའོ། །གལ་ཏེ་གཞན་དག་ན་རེ། འདིར་ཟླ་མཚན་ཁ་དོག་ནག་པོ་འབབ་པར་བཤད་པས། གོང་གི་རི་བོང་གི་ཁྲག་ལྟར་དམར་བ་ཞིག་མ་བྱུང་ན་ས་བོན་བྱེད་མི་ནུས་ཞེས་སྨོས་པ་དོན་མེད་དོ་ཞེ་ན་སྐྱོན་མེད་དེ། འདིར་ཕྱིར་འབྱུང་བའི་དུས་སུ་ཐུར་སེལ་གྱི་རླུང་གིས་དེད་པས་ཁ་དོག་ཅུང་ཟད་གནག་ཅིང་དྲི་མ་དང་བྲལ་བ་ཞིག་འབྱུང་ཞེས་པ་ཞག་དང་པོའི་དོན་ཡིན་ལ། ཕྱིར་འབྱུང་བ་རྒྱུན་ཆད་ནས་སླར་སྐྱེས་པ་དང་འདུས་པའི་དུས་སུ་བསམ་སེའུ་ནས་འབབས་པ་ནད་གཞན་དང་མ་འདྲེས་པ་དེ་རི་བོང་གི་ཁྲག་ལྟར་འབྱུང་བའི་དོན་ཡིན་ནོ། །མངལ་ལེན་པའི་ཚུལ་ནི་ཟླ་མཚན་འབྱུང་བའི་ཞག་གསུམ་པོ་བོར་ནས། ཞག་བཞི་པ་དང་པོར་བྱས་པའི་གཅིག་པ་དང༌། གསུམ་པ་དང༌། ལྔ་པ་དང༌། བདུན་པ་དང༌། དགུ་པ་ལ་མངལ་དུ་ཆགས་ན་བུར་འགྱུར་ཏེ་ཞེས་བཤད་ནས་འབུམ་ཆུང་དུ་ཞག་དགུ་པ་ལ་དགག་པ་བྱས་པའི་ཕྱིར་ཞག་བརྒྱད་པ་ལ་དགག་པའང་མི་རིགས་ཏེ། ཞག་བརྒྱད་པ་དེ་ཟླ་མཚན་འཛག་པའི་ཐོག་མ་ནས་བཟུང་བའི་བཅུ་གཅིག་པ་ཡིན་པས། དེ་ལ་བུ་མི་ལེན་ཟེར་བ་མ་གཏོགས་བུ་མོ་ལེན་པར་བཤད་པའི་ཕྱིར་ཅི་ནས་ཀྱང་དགོས་པའི་ཕྱིར་དང༌། དང་པོའི་ཞག་གསུམ་དང་བཅུ་གཅིག་གི་བར་གྱི་ཞག་བརྒྱད་པོ་མ་གཏོགས་གཞན་ལ་མངལ་མི་ཆགས་པར་འདོད་པའང་མི་རིགས་ཏེ། དང་པོ་ཞག་གསུམ་གྱི་ཟླ་མཚན་འཛག་པའི་སྐབས་ཡིན་པས་ཕལ་ཆེར་མི་འཛིན་ཅིང༌། དེའི་ཚེ་འཁྲིག་པ་ནི་སྐྱེས་པའི་སྲོག་དང་ལུས་ལ་ཆེས་ཆེར་གནོད་པར་བཤད་པས་སྨད་པ་ཡིན་གྱི། མངལ་མི་ཆགས་པ་ཁོ་ན་ནི་མ་ཡིན་ནོ། །དེ་བཞིན་དུ་ཞག་བཅུ་གཅིག་པ་ལ་བུ་མི་ལེན་ཀྱང་བུ་མོ་ལེན་པ་དང༌། བཅུ་གཉིས་པ་ལ་བུ་ལེན་པར་བཤད་པ་ཡིན་ཏེ། སློབ་དཔོན་གྱི་རང་འགྲེལ་ལས། ཐོག་མར་ཟླ་མཚན་བྱུང་བར་ཤེས་ནས་ཞག་བཅུ་གཉིས་ཀྱི་བར་དུ་ནི་ཟླ་མཚན་རྒྱུ་བའི་དུས་ཏེ། དེ་ལས་ཀྱང་དང་པོའི་ཞག་གསུམ་དང་བཅུ་གཅིག་པའི་དུས་སུ་ཉལ་པོ་བྱེད་པ་ནི་སྨད་དོ། །དེ་ལ་ཟུང་ཐིམ་པའི་ཞག་བཞི་པ་དང༌། དྲུག་པ་དང༌། བརྒྱད་པ་དང༌། བཅུ་པ་དང༌། བཅུ་གཉིས་ལོན་པ་དེའི་ཚེ་ནི་བུ་ཕོར་འགྱུར། ཟླ་མཚན་རྒྱུས་ནས་ཞག་ལྔ་པ་དང༌། བདུན་པ་དང༌། དགུ་པ་དང༌། བཅུ་གཅིག་པ་འདི་དག་གི་ཚེ་ཉལ་པོ་བྱས་ན་བུ་མོར་འགྱུར་རོ་ཞེས་དང༌། ཟླ་ཟེར་ལས། ཟླ་མཚན་ཞག་ནི་བཅུ་གཉིས་དུས། །དེ་ལས་དང་པོའི་ཞག་གསུམ་དང༌། །བཅུ་གཅིག་པ་སྨད་ཅེས་བྱ་ལ། ཟླ་མཚན་སྣང་བ་ནས་ཞག་བཅུ་གཉིས་ཀྱི་བར་དུ་ནི་དུས་དེ་ཟླ་མཚན་འཛིན་པའི་དུས་ཡིན་ལ། ཞག་བཅུ་གཉིས་པོ་དེ་དག་ལས་དང་པོའི་ཞག་གསུམ་ནི་སྨད་ཅིང་སྤང་བ་ཡིན་ལ། དེའི་ཚེ་འཁྲིག་པའི་བྱ་བ་མི་བྱེད་དོ། །དེ་བཞིན་དུ་བཅུ་གཅིག་པ་ཡང་སྨད་པར་བྱ་བ་ཡིན་ནོ། །ཚེས་ཟུང་ལ་བུར་འགྱུར་གཞན་དུ་བུ་མོར་འགྱུར། ཞེས་བྱ་བ་ལ་ཚེས་ཟུང་ཐིམ་པ་ཚེས་བཞི་དང༌། ཚེས་དྲུག་དང༌། ཚེས་བརྒྱད་དང༌། ཚེས་བཅུ་དང༌། ཚེས་བཅུ་གཉིས་དག་ལ་བུ་ཕོར་སྐྱེ་བར་འགྱུར་ལ། དེ་ལས་གཞན་པ་ཚེས་ལྔ་དང༌། ཚེས་བདུན་དང༌། ཚེས་དགུ་དང༌། ཚེས་བཅུ་གཅིག་གིས་ཉེ་བར་མཚོན་པ་དག་ནི་བུ་མོར་སྐྱེ་བར་འགྱུར་ཞེས་པའི་ལུང་འདི་ཉིད་ཀྱི་རྗེས་སུ་འབྲངས་ནས། ཟླ་མཚན་འབབ་པའི་ཞག་གསུམ་བཞག་པའི་རྗེས་ཀྱི་ཞག་དེ་ནས་བགྲངས་པའི་ཞག་བརྒྱད་པ་ལ་བུ་མོ་ལེན་ཞིང༌། དགུ་པ་བུ་ལེན་པར་འདོད་དེ། བཅུ་གཉིས་པ་ལ་བུ་མི་ལེན་ཞེས་པ་རྒྱུད་ནས་ཀྱང་མ་གསུངས་པའི་ཕྱིར། གཞན་ཡང་སློབ་དཔོན་གྱི་རང་འགྲེལ་ལས། དེ་ལྟར་པདྨ་ལ་ཉི་ཟེར་གྱིས་ཕོག་ནས་ཁ་བྱེ་བ་དང་འདྲ་བར་ཟླ་མཚན་བྱུང་ནས་ཞག་བཅུ་གཉིས་ཀྱི་བར་དུ་མངལ་གྱི་པདྨའི་ཁ་བྱེ་བ་ལྟར་འདུག་གོ །གནས་སྐབས་དེའི་བར་དུ་སྐྱེས་པ་དང་ཕྲད་ན་ས་བོན་འཛིན་ལ་དེ་ཕན་ཆད་ནི་ཟུམ་པར་འགྱུར་རོ། །ཟླ་མཚན་ཐོག་མར་བྱུང་ནས་ཞག་བཅུ་གཉིས་ཀྱི་བར་དུ་ཟླ་མཚན་གྱི་དུས་དེར་འདོད་པ་སྤྱད་ན་བུ་ཚ་ཆགས་སོ། །དེ་ཡང་བུད་མེད་གང་ཟླ་མཚན་འཛག་པས་མངལ་གྱི་ཁ་བྱེ་བའི་དུས་ནས་མི་ཟུམ་པར་གནས་པ་ཞག་ནི་བཅུ་གཉིས་ཀྱི་བར་ཡིན་ནོ། །ཞག་བཅུ་གཉིས་པོ་དེ་ལས་དང་པོའི་ཞག་གསུམ་ཟླ་མཚན་འཛག་བཞིན་པའི་དུས་དང༌། བཅུ་གཅིག་པ་དེ་ལ་འཁྲིག་པ་སྤྱོད་པ་ནི་སྨད་པའི་གནས་ཡིན་ཅིང༌། བུ་ཕོ་ཡང་མི་ལེན་ལ། ཟླ་མཚན་འབྱུང་བའི་དུས་ཀྱི་ཞག་གསུམ་པོ་དོར་བའི་རྗེས་ཀྱི་ཞག་དེ་ཉིད་ཐོག་མར་བརྩིས་པའི་གཅིག་གསུམ་ལྔ་བདུན་དགུ་རྣམས་ལ་འཁྲིག་པ་སྤྱད་ན་བུ་ཕོར་འགྱུར་རོ་སྟེ་ཞེས་པ་འོག་མ་འདྲེན་པའི་ཚིག་གོ །དེ་ལས་ལོག་པ་སྟེ་ཞག་གཉིས་དང་བཞི་དང་དྲུག་དང་བརྒྱད་པ་རྣམས་ལ་བུ་མོར་ཆགས་པར་འགྱུར་རོ། །དེ་ལྟར་བུ་དང་བུ་མོ་འདོད་པ་རྣམས་ཀྱིས་ཞག་བཅུ་གཉིས་ཀྱི་བར་དེར་འཁྲིག་པ་མ་བསྟེན་ན་ཉི་མ་ནུབ་པས་ཉིན་པར་ཁ་བྱེ་བས་པདྨའི་ཁ་མཚན་མོ་ཟུམ་པ་བཞིན་དུ་ཞག་བཅུ་གཉིས་འདས་ནས་མངལ་གྱི་ཁ་ཟུམ་པའི་ཕྱིར། འཁྲིག་པ་སྤྱད་ཀྱང་སྐྱེས་པའི་ཁུ་བ་མངལ་གྱི་ནང་དུ་མི་སྡོད་པར་ལམ་ནས་ཕྱིར་འབྱུང་བས་ན་མངལ་ཆགས་པར་མི་འགྱུར་བས་སླར་ཟླ་མཚན་གྱི་དུས་སུ་བསྒུག་པར་བྱ་དགོས་ཤིང༌། བུ་ལེགས་པར་འདོད་པ་རྣམས་ཀྱིས་ཇི་ལྟར་བྱ་བའི་ཐབས་ཞིབ་པར་ཡན་ལག་བརྒྱད་པ་རྩ་འགྲེལ་དང་བཻ་ཌཱུར་དཀར་པོ་མ་བུར་བལྟ་བར་བྱའོ།།

གཞན་ཡང་ཆགས་ཚུལ་ནི། ཡན་ལག་བརྒྱད་པར། ཁུ་ཁྲག་རླུང་གིས་དུ་མར་ཕྱེ། །ཇི་ལྟ་བ་ལས་མཚེ་མར་འགྱུར། །ཞེས་དང༌། དེའི་རང་འགྲེལ་ལས། དེ་ལ་རྣམ་པར་ཤེས་པ་དང༌། དེ་ལ་ལྷན་ཅིག་འབྱུང་བའི་རྒྱུ་འབྱུང་བ་ཆེན་པོ་ལྔ་ནི་སེམས་ཅན་སྐྱེ་བའི་རྒྱུ་གཅིག་ན། སྐྱེ་བ་རྣམ་པ་དུ་མ་སྣང་བའི་ཕྱིར་ཞེས་དང༌། མཐུན་པའི་དཔེ་བསྟན་ཏེ། ཇི་ལྟར་སྤྲ་ཚིལ་དང་ཟངས་མ་ལ་སོགས་པའི་རྒྱུ་གཅིག་ལས་གཟུགས་ཐ་དད་པར་སྣ་ཚོགས་དགའ་མགུར་བྱར་ཡོད་དོ། །ཅི་ཡང་སྣང་བ་དང་འདྲ་བར་རང་བཞིན་གཅིག་པ་ལས་ཀྱང་ཐ་དད་པར་སྣང་དུ་རུང་ངོ༌། །དེ་བས་ན་ཕའི་ཁུ་བ་ཤས་ཆེ་བ་ལས་ནི་བུ་སྐྱེ་བར་འགྱུར་ལ། བུ་མཚེ་མར་འོང་བ་ནི་ཆགས་མེར་མེར་པོའི་སྐབས་སུ་རླུང་གིས་དུམ་བུར་བཅད་པ་ལས་དུ་མར་འགྱུར་རོ། །དེ་ཡང་ཕོ་མོ་ལ་སོགས་པར་འབྱུང་བ་ནི་ཁུ་ཁྲག་གི་ཤས་ཆེ་ཆུང་གོང་མ་ལྟར་ཤེས་པར་བྱའོ། །ཕ་མའི་ཁུ་ཁྲག་རླུང་ལ་སོགས་པའི་སྐྱོན་དང་བཅས་པ་ལས་ནི། སྐྱེ་བ་མི་མཐུན་པ་སྦྲུལ་དང་བྱི་ལ་སོགས་པ་འབྱུང་བ་དང༌། གཞན་ཡང་ལོང་བ་དང༌། འོན་པ་དང༌། ཞ་བོ་དང༌། གྲུམ་པོ་དང༌། འཐེང་པོ་དང༌། མིའུ་ཐུང་དང༌། གཟུགས་མི་སྡུག་པ་ལ་སོགས་པ་ལུས་སྐྱོན་དང་བཅས་པར་འགྱུར་བ་ཡིན་ནོ་ཞེས་དང༌། ཟླ་ཟེར་ལས། ཕའི་ཁུ་ཆུ་མང་ཞིང༌། ཤས་ཆེ་བ་ལས་ནི་སྐྱེས་པར་སྐྱེ་བར་འགྱུར་གྱི། བུད་མེད་དུ་མ་ཡིན་ནོ། །དེ་བཞིན་དུ་མའི་ཁྲག་མང་བ་ལ་བུད་མེད་དུ་སྐྱེ་བར་འགྱུར་གྱི། ཕོར་མི་སྐྱེའོ། །ཁུ་བ་དང་ཁྲག་དེ་གཉིས་ཆ་མཉམ་ཞིང་མཚུངས་པ་ལ་ནི་མ་ནིང་དུ་སྐྱེ་བར་འགྱུར་བ་འམ། མཚན་གཉིས་པར་སྐྱེ་བར་འགྱུར་རོ། །ཕལ་ཆེར་ཞེས་སྨོས་པས་ནི་རྐྱེན་གཞན་གྱིས་གཞན་དུ་འགྱུར་བ་ཡང་སྲིད་པའོ། །མངལ་དུ་སེམས་ཅན་དུ་མ་ཆགས་པར་འགྱུར་བ་དེའི་རྒྱུ་ཅི་ཞིག་ཡིན་པར་བསྟན་པར་བྱ་བའི་ཕྱིར། སྨྲས་པ་ནི། ཁུ་ཁྲག་རླུང་གིས་དུ་མར་ཕྱེ། །ཇི་ལྟ་བ་ལས་མཚེ་མར་འབྱུང༌། །ཞེས་བྱ་བ་ལས། ཕ་མའི་ཁུ་ཁྲག་རླུང་གིས་མང་དུ་ཕྱེ་ཞིང་དུ་མར་བྱས་པ་ལས་རང་གི་མཚན་ཉིད་ཇི་ལྟ་བ་བཞིན་དུ་མཚེ་མར་སྐྱེ་བར་འགྱུར་བ་ཡིན་ནོ། །དེ་ཡང་ཁུ་བ་མང་བའི་ཁུ་ཁྲག་གྱེས་པ་ལས་ནི་ཕོའི་མཚེ་མར་འགྱུར་བ་ཡིན་ལ། ཟླ་མཚན་ཤས་ཆེ་བའི་ཁུ་ཁྲག་གྱེས་པ་ལས་ནི་མོའི་མཚེ་མར་འགྱུར་བ་ཡིན་ནོ། །དེ་བཞིན་དུ་ཁུ་ཁྲག་ཆ་མཉམ་པ་དུ་མར་གྱེས་པ་ལས་ནི་མ་ནིང་གི་མཚེ་མར་འགྱུར་བ་ཡིན་ནོ། །དེ་ལྟར་ན་ལན་འགའ་ལ་ནི་ཕོར་སྐྱེ་བར་འགྱུར་ལ། ལན་འགའ་ལ་ནི་མོར་སྐྱེ། ལན་འགའ་ལ་ནི་མ་ནིང་དུ་སྐྱེ། ལན་འགའ་ལ་ནི་མ་ནིང་དང་བུད་མེད་གཉིས་སུ་གཅིག་ཅར་སྐྱེ་བར་འགྱུར། དེ་དག་ཇི་ལྟར་སྐྱེ་ཞེ་ན། སྐྱེ་གནས་མི་མཐུན་གཟུགས་མི་སྡུག །གནོད་པའི་དྲི་མས་སྐྱེ་བར་འགྱུར། །ཞེས་བྱ་བ་ལ་སྐྱེ་གནས་རིགས་མི་མཐུན་པ་དང༌། གཟུགས་མི་སྡུག་པ་དག་ཏུ་ནི་རླུང་ལ་སོགས་པས་ཁུ་ཁྲག་གི་དྲི་མ་དེ་ལ་གནོད་ཅིང་མ་རུངས་པར་བྱས་པ་ལས་སྐྱེ་བར་འགྱུར་རོ་ཞེས་བཤད་མ་ཐག་པའི་ལུང་གི་དོན་དང་མཐུན་པ་སྟེ། དེ་ཡང་མངལ་དུ་གནས་པའི་རླུང་གི་བྱེད་པ་འགའ་ཞིག་གིས་ཁུ་ཁྲག་དེ་ཉིད་དུམ་བུར་ཆད་པའི་གྲངས་ཇི་ཙམ་པ་དེ་ཙམ་གྱི་མཚེ་མར་འགྱུར་བ་ཞིག་སྟེ་མཚེ་མ་གསུམ་པ་འབྱུང་བ་ཡང་མཐོང་ཞིང༌། དེ་ཡང་ཁུ་ཁྲག་ཤས་ཆེ་ཆུང་གི་རྣམ་པས་ཕོ་དང་མོ་དང་མ་ནིང་དང་འདྲེས་པའི་མཚེ་མ་གང་ཡང་འབྱུང་བ་ཡིན་ཏེ། ཕ་མ་གཉིས་ཀྱི་ཁུ་ཁྲག་དང་བར་དོའི་རྣམ་ཤེས་ལྷན་ཅིག་ཏུ་ཆགས་པ་དེའི་ཚེ་ཕའི་ཁུ་བ་མང་བ་ན་བུ་རུ་སྐྱེ་བར་འགྱུར་ཞིང༌། ཟླ་མཚན་མང་བ་དེའི་ཚེ་ན་བུ་མོར་སྐྱེ་བར་འགྱུར་བ་དང༌། ཁུ་ཁྲག་མང་ཉུང་ཆ་མཉམ་པ་དེའི་ཚེ་ན་མ་ནིང་མཚན་མེད་དང༌། མཚན་གཉིས་པ་དང་འགྱུར་བའི་མ་ནིང་གང་ཡང་རུང་བར་སྐྱེ་བ་དང༌། ཁུ་ཁྲག་འདྲེས་པའི་མེར་མེར་པོ་དེ་ཉིད་རླུང་གི་བྱེད་པ་འགའ་ཞིག་གིས་དུམ་བུ་གཉིས་གསུམ་དུ་བྱེ་བ་ལས་དེ་དང་དེའི་མཚེ་མ་སྐྱེ་བར་གྱུར་བ་ཡིན་ནོ། །དེ་ལྟ་བུའི་དུམ་བུ་སོ་སོ་ལ་ཡང་ཁུ་བ་དང་ཁྲག་ཤས་ཆེ་ཆུང་དང༌། ཆ་མཉམ་གང་རུང་དུ་གྱུར་པ་དེའི་སྐྱེ་བ་གོང་བཞིན་འབྱུང་བ་ཡིན་ནོ། །མི་ལ་སྐྱེ་བའི་གནས་མི་མཐུན་པ་གཞན་སྐྱེ་བ་དང༌། སྐྱེ་གནས་མཐུན་ཡང་མིའུ་ཐུང་དང༌། ཞ་ལོང་སོགས་གཟུགས་མི་སྡུག་པ་གཞན་ཡང་ཇི་སྙེད་ཅིག་སྐྱེ་བར་སྣང་བ་འདི་དག་གི་རྒྱུ་ཅི་ལྟ་བུ་སྙམ་ན། སྤྱིར་རང་རང་གི་ལས་ཉིད་དབང་བཙན་པ་ལས་བྱུང་བ་ཡིན་དུ་ཟིན་ཀྱང་ཁྱད་པར་ཕ་མའི་ཁུ་ཁྲག་ལ་གོང་དུ་བཤད་པའི་སྐྱོན་འགའ་ཞིག་དང་བཅས་ཏེ་རྣམ་པར་སྨིན་པའི་དབང་གིས་མངལ་བཟུང་བ་ལས་བྱུང་བས་ན་རླུང་ལ་སོགས་པའི་གནོད་པའི་ཁུ་ཁྲག་དྲི་མ་ཅན་གྱིས་ཀྱང་ས་བོན་གྱི་དོན་སྤྱི་ཙམ་བྱས་པས་སྐྱེ་བར་འགྱུར་བ་ཡིན་ཞེས་བྱ་བའི་དོན་ཏོ།།

ཆགས་པའི་རྟགས་ནི་འགྲེལ་ཆེན་དྲི་མེད་འོད་ལས། འདིར་དབང་པོ་གཉིས་ཀྱི་སྦྱོར་བ་ལས་གསང་བའི་པདྨར་ལྷུང་བའི་ཁུ་བ་དང༌། བྷ་གའི་ཁྲག་གང་ཡིན་པ་དེ་ནི་ས་བོན་ཞེས་བརྗོད་དོ། །ཞེས་གསུངས་པ་ལྟར་ཕ་མའི་ཁུ་ཁྲག་དེ་ཉིད་ལ་ས་བོན་ཞེས་བྱ་ཞིང༌། དེ་ལ་བརྟེན་ནས་བར་དོའི་རྣམ་པར་ཤེས་པ་འཇུག་པའི་ཚུལ་ཤེས་དགོས་པས། དེ་ཡང་བཤད་པའི་རྒྱུད་རྡོ་རྗེ་ཕྲེང་བ་ལས། རྒྱུ་ནི་བར་དོའི་རྣམ་ཤེས་ཏེ། །བག་ཆགས་ཉོན་མོངས་ཅན་གྱི་ཡིད། །རླུང་གི་ངོ་བོས་གཟུགས་གཞན་མཐོང༌། །དོན་ནི་ངེས་པར་མི་ཤེས་ཤིང༌། །རླུང་ཙམ་གཅིག་པུ་རྨོངས་འདུ་བྱེད། །ཀུན་གཞིའི་རྣམ་ཤེས་བཀུག་ནས་ནི། །མངལ་འཇུག་བག་ཆགས་རྣམ་པར་སྤྱོད། །བག་ཆགས་ཉིད་ཀྱིས་རྣམ་ཤེས་གཟུང༌།། དེ་ཚེ་ཁུ་ཁྲག་ཞུ་ཐིགས་ལས། །འདྲེས་པ་རུ་ནི་གྱུར་པ་དང༌། །ཀུན་གཞིའི་རྣམ་ཤེས་རྒྱུར་བཅས་པ། །ཇི་ལྟར་ཆང་རོས་མྱོས་པ་བཞིན། །ཞེས་དང༌། དགའ་བོ་མངལ་འཇུག་ལས། འདི་ལྟར་བར་དོའི་ཕུང་པོ་དེ་མངལ་དུ་འཇུག་པར་འགྱུར་བ་ན། ཐོག་མ་ཁོ་ནར་ཕྱིན་ཅི་ལོག་གི་སེམས་རྣམ་པ་གཉིས་འབྱུང་བར་འགྱུར་རོ། །གཉིས་གང་ཞེ་ན་འདི་ལྟ་སྟེ། ཕ་མ་གཉིས་ཕྲད་པར་གྱུར་པའི་ཚེ་གལ་ཏེ་ཕོར་འགྱུར་བ་ཞིག་ཡིན་ན་ནི་མ་ལ་ཆགས་པ་སྐྱེ་ཞིང་ཕ་ལ་ནི་ཞེ་སྡང་བར་འགྱུར་ཏེ། ཕའི་ཁུ་བ་བྱུང་ན་འདི་ནི་བདག་གི་ཡིན་ནོ་སྙམ་དུ་སེམས་སོ། །གལ་ཏེ་མོར་གྱུར་པ་ཞིག་ཡིན་ན་ནི་ཕ་ལ་ཆགས་པ་སྐྱེ་ཞིང་མ་ལ་ནི་ཞེ་སྡང་བར་འགྱུར་ཏེ། མའི་ཁྲག་བྱུང་བ་ན་འདི་ནི་བདག་གི་ཡིན་ནོ་སྙམ་དུ་སེམས་པས། གལ་ཏེ་འདི་ལྟ་བུའི་ཞེ་སྡང་དང་ཆགས་པའི་སེམས་སྐྱེས་པར་མ་གྱུར་ན་མངལ་དུ་འཇུག་པར་མི་འགྱུར་རོ། །གཞན་ཡང་དགའ་བོ་ཇི་ལྟར་མའི་མངལ་དུ་འཇུག་པར་གྱུར་ཞེ་ན་འདི་ལྟ་སྟེ། ཕ་མ་ཡང་ཆགས་པའི་སེམས་སྐྱེས་པར་གྱུར། དུས་ཀྱི་ཟླ་མཚན་ཡང་རྗེས་སུ་མཐུན་པར་གྱུར། བར་མ་དོའི་ཕུང་པོ་ཡང་མངོན་དུ་གྱུར་ལ་གོང་མ་ལྟ་བུའི་སྐྱོན་ཡང་མེད་ཅིང་ལས་ཀྱི་རྐྱེན་དང་ལྡན་པར་གྱུར་ན་མངལ་དུ་འཇུག་པར་འགྱུར་རོ། །འདི་ལྟར་བར་མ་དོའི་ཕུང་པོ་དེ་མངལ་དུ་འཇུག་པར་འདོད་པ་ན། དེ་ཡང་རྣམ་པ་གཉིས་སུ་འགྱུར་ཏེ། གཉིས་གང་ཞེ་ན། བསོད་ནམས་དང་མི་ལྡན་པ་དང་བསོད་ནམས་ཆེན་པོ་དང་ལྡན་པ་གང་ཡིན་པའོ། །བསོད་ནམས་དང་མི་ལྡན་པ་གང་ཡིན་པ་དེ་ནི་རྣམ་པར་རྟོག་པའི་སེམས་བྱུང་ནས་ཡུལ་མཐོང་བར་གྱུར་པ་ན་འདི་སྙམ་དུ་སེམས་ཏེ། དེང་བདག་ནི་རླུང་དང༌། གྲང་བ་དང༌། གནམ་རྨུགས་པ་དང༌། ཆར་འབབ་པ་དང༌། སྐྱེ་བོ་མང་པོའི་ཅ་ཅོ་དང༌། མང་པོའི་མཐུ་སྟོབས་ཀྱིས་གནོད་པར་བྱེད་པ་དང་ཕྲད་པར་འགྱུར་རོ་ཞེས་འཇིགས་ཤིང་སྐྲག་པ་སྐྱེས་ནས། དེང་བདག་རྩྭའི་ཁྱིམ་དང༌། ལོ་མའི་ཁྱིམ་དང༌། རྩིག་ཁུང་དབེན་པར་འཇུག་པར་བྱའོ། །ཡང་ན་རི་དང་ནགས་སྟུག་པོ་དང་བྲག་ཕུག་དག་ཏུ་འཇུག་པར་བྱའོ་སྙམ་དུ་སེམས་ཏེ། གཞན་ཡང་འདུ་ཤེས་རྣམ་པ་སྣ་ཚོགས་བསྐྱེད་ནས་ཇི་ལྟར་མཐོང་བ་བཞིན་དུ་མའི་མངལ་དུ་འཇུག་པར་འགྱུར་རོ། །གང་བསོད་ནམས་ཆེན་པོ་དང་ལྡན་པ་དེ་ཡང་འདི་སྙམ་དུ། དེང་བདག་ནི་རླུང་དང༌། གྲང་བ་དང༌། གནམ་རྨུགས་པ་དང༌། ཆར་འབབ་པ་དང༌། སྐྱེ་བོ་མང་པོའི་ཅ་ཅོ་དང༌། མང་པོའི་མཐུ་སྟོབས་ཀྱིས་གནོད་པར་བྱེད་པ་དང་ཕྲད་པར་འགྱུར་རོ་ཞེས་འཇིགས་ཤིང་སྐྲག་པ་སྐྱེས་ནས་ཁང་པ་བརྩེགས་པའི་སྟེང་དུ་འཛེག་པའམ། ཡང་ཐོག་མཐོན་པོའི་སྟེང་དུ་འཛེག་པའམ། གཞལ་མེད་ཁང་གི་ནང་དུ་འཇུག་པའམ་ཁྲི་ལ་འདུག་པར་བྱའོ་སྙམ་དུ་སེམས་ཏེ། གཞན་ཡང་འདུ་ཤེས་རྣམ་པ་སྣ་ཚོགས་བསྐྱེད་ནས་ཇི་ལྟར་མཐོང་བ་བཞིན་དུ་མའི་མངལ་དུ་འཇུག་པར་འགྱུར་རོ་ཞེས་པ་དང༌། དཔེ་ཤིན་ཏུ་གསལ་བ་སློབ་དཔོན་གྱི་རང་འགྲེལ་ལས། དེ་ལ་རྣམ་པར་ཤེས་པ་དབང་པོའི་ཡུལ་ལས་འདས་པ་མའི་མངལ་དུ་ཇི་ལྟར་འཇུག་ཏུ་རུང་ཞེ་ན། འདི་ནི་མངོན་སུམ་གྱི་དཔེ་བསྟན་ཏེ། ཇི་ལྟར་ཉི་མའི་འོད་ཟེར་མེ་ཤེལ་ལ་ཕོག་པའི་དབང་གིས་རྩྭ་དང་ཤིང་ལ་སོགས་པ་བསྲེག་པར་སྣང་བ་ཡང༌། ཤིང་མེ་ཤེལ་ལ་རེག་པར་མི་སྣང་ལ། །མེ་ཤེལ་ཡང་ཤིང་ལ་རེག་པར་མ་མཐོང་མོད་ཀྱང་ཚིག་པར་སྣང་བ་བཞིན་དུ་རྣམ་པར་ཤེས་པ་མངལ་གྱི་ནང་དུ་ཞུགས་པ་ཡང་མི་སྣང་བའི་སྒོ་ནས་འཇུག་པ་ཡིན་ནོ་ཞེས་དང༌། ཟླ་ཟེར་ལས་དྲིས་པ། སེམས་ཅན་འདི་རྣམས་མངལ་དུ་འཇུག་པ་ནི་མངོན་སུམ་ན་མི་སྣང་བས་ཉེ་བར་དམིགས་སུ་མེད་དོ་ཞེས་རྟོག་པ་ལ་དེའི་ཕྱིར་སྨྲ་བ་ཡིན་ཏེ། ཇི་ལྟར་ཉི་མའི་འོད་ཟེར་གྱིས། །མེ་ཤེལ་དང་ནི་ཕྲད་གྱུར་པའི། །ཤིང་ལས་དྲོ་བ་མི་སྣང་སྟེ། །སེམས་ཅན་མངལ་གནས་དེ་དང་འདྲ། །ཞེས་བྱ་བ་ལ། དཔེར་ན་ཉི་མའི་འོད་ཟེར་དང་འབྲེལ་བའི་མེ་ནི་མེ་ཤེལ་ཞེས་བྱ་བའི་ནོར་བུ་དང་ཕྲད་ཅིང༌། འོད་དེས་བསྒྲིབས་ན་མེ་ཤེལ་གནས་པའི་ཤིང་ལ་མཆེད་མོད་ཀྱི་དེར་འགྲོ་ཞིང་ཞུགས་པར་མི་སྣང་ངོ༌། །དེ་བཞིན་དུ་སྲིད་པ་བར་མའི་སེམས་ཅན་མངལ་གྱི་གནས་སུ་འགྲོ་བ་མངོན་སུམ་དུ་འགྲོ་བར་མི་སྣང་ཡང༌། དེར་འཇུག་པ་ཡིན་ནོ། །དྲིས་པ། སེམས་ཅན་རང་བཞིན་གཅིག་པ་ཉིད་ལས་སྐྱེ་བ་དག་ལུས་ཀྱི་རྣམ་པ་དུ་མ་ཇི་ལྟར་སྣང་དུ་རུང་ཞེས་རྟོག་པར་བྱེད་པ་དག་གི་ཕྱིར་གཞུང་རྩོམ་པར་བྱེད་པ་དག་གིས་སྨྲས་པ་ཡིན་ཏེ། རྒྱུ་ཡི་རྗེས་སུ་འགྲོ་བས་ན། །འབྲས་བུ་དེ་དང་སྐལ་མཉམ་ཉིད། །སེམས་ཅན་སྐྱེ་གནས་སྣ་ཚོགས་འཛིན། །ཟངས་མ་ལ་སོགས་བཞུས་དང་མཚུངས། །ཞེས་བྱ་བ་ལས། རྒྱུའམ་བྱེད་པའི་རྗེས་སུ་འབྲང་བ་ཡིན་པས་ན་རྗེས་སུ་འགྲོ་བ་ཞེས་བྱ་སྟེ། རྒྱུའི་རང་བཞིན་སྤངས་ཤིང་ལྟོས་པ་མེད་པར་འབྲས་བུར་འགྱུར་བ་ནི་མ་ཡིན་ནོ། །དེ་བས་ན་རྒྱུའི་རྗེས་སུ་འབྲང་བའི་ཕྱིར་འབྲས་བུ་ནི་དེ་དང་འདྲ་བའམ་སྐལ་བ་མཉམ་པ་ཉིད་ཡིན་ཏེ་འབྱུང་བ་ཆེན་པོ་ལ་སོགས་པ་རྣམ་པ་གང་དག་ཡིན་པ། དེ་དང་དེ་དག་སྐལ་བ་མཉམ་ཞིང་ཆ་འདྲ་བ་ཡིན་ཏེ། སྐལ་བ་མཉམ་པའམ་ཆ་འདྲ་བ་ཞེས་བྱ་བ་ནི་ཚིག་གི་རྣམ་གྲངས་ཡིན་ནོ། །གཏན་ཚིགས་སམ་རྒྱུ་དེས་ན་སེམས་ཅན་འབྱུང་བ་ཆེན་པོ་ལ་སོགས་པ་རྒྱུའི་རྗེས་སུ་འགྲོ་བས། རང་བཞིན་གཅིག་པ་ཉིད་ལས་སྐྱེ་གནས་སྣ་ཚོགས་པའི་ཚུལ་ཅན་གྱིས་སྐྱེ་བའི་རྣམ་པའི་གཟུགས་ཅན་གྱི་ཁྱད་པར་འཛིན་ཅིང་འཇོག་པ་ཡིན་ནོ། །དེ་ཡང་དཔེར་ན་ཟངས་མ་ལ་སོགས་པ་དངོས་པོའི་རིགས་མེས་བཞུ་ཞིང་ཁུ་བར་བྱས་པ་ཞུ་བའི་རྣམ་པའི་ཚུལ་གཅིག་པ་དག་ཀྱང༌། སྤྲ་ཚིལ་ལ་སོགས་པ་ལས་བཟོ་བྱས་པའི་མི་ལ་སོགས་པའི་གཟུགས་སུ་བྱས་པ་དེར་བླུགས་ན་གཞིའི་རྣམ་པ་ཅི་འདྲ་བ་དེ་དང་དེའི་གཟུགས་སུ་སྣང་ཞིང་འབྱུང་བར་འགྱུར། དེ་བཞིན་དུ་སེམས་ཅན་རྣམས་ཀྱང་སྐྱེ་གནས་དུ་མར་སོང་ཞིང་གནས་པ་ལས་དེའི་གཟུགས་ཀྱི་རྣམ་པ་འཛིན་པར་འགྱུར་རོ་ཞེས་འབྱུང་བ་ལྟར་ཤེས་པར་བྱའོ། །འདི་ལས་འཕྲོས་ནས་མངལ་དུ་འཇུག་པའི་ཚུལ་བཞི་ཡོད་དེ། སོ་སྐྱེ་ཐ་མལ་པ་རྣམས་ནི་མི་དྲན་མི་ཤེས་པ་བཞིན་དུ་འཇུག་ཅིང་གནས་ལ་སྐྱེ་བ་ཡིན་ནོ། །འཁོར་ལོས་སྒྱུར་བ་དང་རྒྱུན་དུ་ཞུགས་པ་རྣམས་ནི་དྲན་ཞིང་ཤེས་པས་མངལ་དུ་འཇུག་ལ་མི་དྲན་མི་ཤེས་པས་གནས་ཤིང་སྐྱེ་བ་ཡིན་ནོ། །བྱང་ཆུབ་སེམས་དཔའ་ལས་དང་པོ་བ་དང༌། །རང་རྒྱལ་རྣམས་ནི་དྲན་ཤེས་བཞིན་དུ་འཇུག་ཅིང་སྐྱེ་ལ་མི་དྲན་མི་ཤེས་པར་གནས་པ་ཡིན་ནོ། །བྱང་ཆུབ་སེམས་དཔའ་དག་པའི་ས་ལ་གནས་པ་རྣམས་ནི་དྲན་ཤེས་བཞིན་གྱི་སྒོ་ནས་མངལ་དུ་འཇུག་གནས་སྐྱེ་བར་བྱེད་པ་ཡིན་ནོ་ཞེས་དང༌། གཞན་ཡང་རྒྱུད་སྡེ་རྣམས་ནས་སྐྱེ་བ་སྤྲུལ་སྐུའི་དུས་གསུངས་པ་ལྟར་རྣམ་པར་ཤེས་པ་དེ་ཕའི་ཁ་ནང་ནས་འཇུག་སྟེ་ཁུ་བ་དང་ལྷན་དུ་མའི་མངལ་དུ་འགྲོ་བར་བྱེད་པ་དེ་ལ་ཡང་གོང་གི་ཆགས་སྡང་མིག་སེར་གྱི་བསམ་པས་ཕོ་ལུས་ལེན་ན་ཕ་ལ་མི་དགའ་བའི་ཚུལ་གྱིས་རྒྱབ་གཏད་དེ་མ་ལ་ཆགས་པའི་སེམས་ཀྱིས་འཇུག་པ་དང༌། མོ་ལུས་ལྡོག་སྟེ་མ་ལ་རྒྱབ་གཏད་ཕ་ལ་ཆགས་སེམས་ཀྱིས་འཇུག་པ་ལ། དེ་ཡང་བཤད་མ་ཐག་པའི་ས་བོན་དང་བར་དོའི་རྣམ་པར་ཤེས་པ་ལྷན་ཅིག་ཏུ་མངལ་དུ་ཆགས་པའི་རྟགས་དང་མཚན་མ་གསལ་པོ་ནི་འདི་ལྟ་སྟེ། ཕོ་མོ་གཉིས་འཁྲིག་པ་ལ་ཞུགས་པ་ལས་བྱུང་བའི་ས་བོན་དེ་ཉིད་མངལ་གྱི་ནང་དུ་འཛིན་པ་དང༌། དེས་རེ་ཞིག་འདོད་པ་ངོམས་ཤིང་ཚིམ་པ་དང༌། ལུས་སྙོམ་ཞེས་པ་བརྡ་རྙིང་པ་སྟེ་བྱ་བ་གང་ལ་ཡང་མི་འཕྲོད་པར་སྒྱིད་ལུག་པའི་དོན་ཡིན་པས་ལུས་སྙོམ་ཞིང་ལྕི་བ་ལྟར་གློ་བུར་དུ་བྱུང་ན་ཐེ་ཚོམ་མེད་པར་མངལ་དུ་བཟུང་བ་ཡིན་ནོ་ཞེས་བྱ་བའི་དོན་ཏོ། །དེ་ལྟར་ཡང་སློབ་དཔོན་གྱི་རང་འགྲེལ་ལས། བུད་མེད་ཀྱི་ས་བོན་ལེགས་པར་ཆགས་པར་གྱུར་པ་ནི། འཕྲལ་དེ་མ་ཐག་མཚན་མ་འདི་དག་འབྱུང་སྟེ། འདོད་པ་ངོམས་པ་དང༌། ལུས་ལྕི་བ་དང༌། ཡན་ལག་འགུལ་བ་དང༌། ཁུ་ཁྲག་འདྲེས་པ་དེ་ཡང་འཁྲུག་པར་བྱེད་པ་སྙོམ་བྱེད་པ་དང༌། སྙིང་ཅུང་ཞིག་འཕར་བ་དང་སྙོམ་པ་དང༌། དུབ་པ་དང༌། བ་སྤུ་ལྡང་བ་དང༌། སྔོན་རྟགས་དེ་དག་དང་ལྡན་པར་འགྱུར་རོ་ཞེས་དང༌། ཟླ་ཟེར་ལས་ཀྱང་མཐུན་པར་འབྱུང་བ་ཡིན་ནོ།།

དེ་ཡང་སྤྱིར་ནི་ཁུ་ཁྲག་སེམས་གསུམ་ག་འབྱུང་བ་ཆེན་པོ་ལྔ་ལས་གྲུབ་པ་ཡིན་ཞིང༌། ཁྱད་པར་དུ་རྣམ་པར་ཤེས་པ་ཁོ་ནའི་དབང་གིས་གྲུབ་ལ་རིམ་པས་མའི་ཁ་ཟས་ཀྱི་རོ་དྲུག་པོའི་དབང་གིས་འབྱུང་བ་ཆེན་པོ་སོ་སོར་འཕེལ་བར་བྱེད་པ་ཡིན་ཏེ། རྡོ་རྗེ་གདན་བཞི་ལས། ཆུ་ནི་སེམས་ལས་འབྱུང་བས་ན། །རྣམ་པར་ཤེས་པ་ཆུ་ཡི་ཁམས། །གལ་ཏེ་ཆུ་ཉིད་གཞན་དུ་ན། །ཤི་ནས་ཅི་སྟེ་ཆུ་མི་འབྱུང༌། །རྣམ་ཤེས་མེ་རུ་འབྱུང་བས་ན། །ལུས་ལ་དྲོ་བ་ཉིད་དུ་ངེས། །ཡེ་ཤེས་འཕྲོས་པའི་ལུས་ལ་ནི། །ཅི་སྟེ་དྲོ་བ་ཉིད་མི་སྣང༌། །རྣམ་ཤེས་རླུང་གི་ལུས་དག་ལ། །འབྱུང་འཇུག་དབུགས་ནི་དུ་བ་འདྲ། །ཡེ་ཤེས་འཕྲོས་པའི་ལུས་དག་ལ། དེ་དག་ལ་ཡང་དབུགས་མེད་དོ། །སེམས་ནི་ས་རུ་འབྱུང་བས་ན། །ལྕི་བ་རུ་ནི་སྣང་བ་ཉིད། ཡེ་ཤེས་འཕྲོས་པའི་ལུས་དག་ནི། །ཆུ་ཡི་སྟེང་དུ་ལྡིང་བ་འོ། །ལུས་ཀྱི་ཚད་མ་ལྔ་ཆར་ཡང༌། །ལྔ་ཆར་གཅིག་གི་ངོ་བོས་བསྟན། །གཅིག་ཏུ་འགྱུར་བ་ཤེས་བྱས་ནས། །རྣམ་འབྱོར་པ་ཡིས་གནས་བལྟའོ།། ཞེས་གསུངས་སོ། །འོ་ན་རྣམ་པར་ཤེས་པ་ལས་གྲུབ་པའི་འབྱུང་བ་རྣམས་ནི་ཤིན་ཏུ་ཕྲ་བའི་ཕྱིར་དབང་པོའི་སྤྱོད་ཡུལ་དུ་མ་གྱུར་ན་འདིར་སྣང་དུ་རུང་བའི་ཁྱད་ཅི་ལྟ་བུ་ཞིག་གོ་སྙམ་ན། །རྩ་བའི་རྒྱུད་བརྟག་པ་གཉིས་པ་ལས། བོལླ་ཀཀྐོ་ལར་སྦྱར་བས། །རེག་པ་སྲ་བའི་བག་ཆགས་ཉིད། །ས་ནི་དེ་ལས་སྐྱེས་བར་འགྱུར། །བྱང་སེམས་ཁུ་བའི་རང་བཞིན་ཡང༌། །ཆུ་ཡི་ཁམས་ནི་འབྱུང་བ་སྟེ། །བསྐྱོད་པ་ལས་ནི་དྲོད་སྐྱེ་སྟེ། །གཡོ་བ་རླུང་དུ་རབ་ཏུ་གྲགས། །བདེ་བ་ནམ་མཁའ་ཉིད་ཀྱི་ཁམས། །ལྔ་པོས་རྣམ་པར་ཤེས་པ་བསྐོར། །ཞེས་པ་དང༌། དེ་ལྟར་འབྱུང་བ་ལྔའི་རང་བཞིན་ཁུ་ཁྲག་སེམས་གསུམ་པོ་མངལ་དུ་ཚོགས་ནས་དེ་དག་སོ་སོའི་བྱེད་ལས་ནི། དེ་ཉིད་ལས། རུས་པ་རྐང་དང་ཁུ་བ་ནི། །ཕ་ལས་སྐྱེས་པ་གསུམ་དུ་བརྗོད། །པགས་པ་དང་ནི་ཤ་དང་ཁྲག །མ་ལས་སྐྱེས་པ་དེ་བཞིན་བརྗོད། །ཅེས་པ་དང༌། འགྲེལ་ཆེན་དྲི་མེད་འོད་ལས། ས་བོན་གྱིས་རང་གི་ཁམས་ཀྱི་བྱ་བ་གསུངས་པ། ས་བོན་དག་གིས་ཞེས་པ་ལ་སོགས་པ་སྟེ། འདིར་ས་བོན་ཁུ་བ་དང་ཁྲག་གི་ས་གང་ཡིན་པ་དེས་གསང་བའི་པདྨ་ལ་གནས་པའི་ཕྱིར་རོ་དྲུག་པོ་རྣམས་ཟོས་ནས་ལུས་སྐྱེད་པ་ལ་གསལ་བར་ལྕི་ཞིང་སྲ་བ་ཉིད་བྱེད་པ་ཡིན། ཆུ་ནི་དེ་བཞིན་གཤེར་བ་ཉིད་བྱེད་དོ། །མེ་ནི་ཟོས་པའི་རོ་རྣམས་སྨིན་པར་བྱེད་དོ། །རབ་མཆོག་རྣམ་པ་བཅུའི་རླུང་སྲོག་ལ་སོགས་པ་དག་ནི་ས་བོན་འདིའི་ལུས་ལ་འཕེལ་བར་བྱེད་དོ། །འཕེལ་བ་དག་ལ་སླར་ཡང་ནམ་མཁའ་ཉིད་ནི་གོ་སྐབས་སྦྱིན་བྱེད་དུས་ལས་དེ་ལྟར་སྔར་བརྗོད་པའི་རྣམ་པས་སྐྱེད་པ་སྟེ། སྣ་ཚོགས་དངོས་པོ་དུ་མ་དག་གི་ལུས་བཅས་སྒྲ་དང་ཡིད་དང་ཞེས་པ་ནི་ལུས་དང་ངག་དང་སེམས་སོ། །ནུས་པ་རྣམས་ནི་དུ་བ་ལ་སོགས་པ་སྟེ། ལུས་དང་ངག་དང་སེམས་ཀྱི་ཆོས་ཅན་རྣམས་སྤྲོ་བར་བྱེད་དོ་ཞེས་པ་ནི་ས་བོན་གྱི་ཁམས་ཀྱི་བྱ་བ་བརྗོད་པའོ་ཞེས་པ་དང༌། དགའ་བོ་མངལ་དུ་འཇུག་པ་ལས། ལུས་འདི་ཉིད་བསྐྱེད་པ་ན་ཕ་མའི་ཁུ་ཁྲག་དང་འབྱུང་བ་ཆེན་པོ་བཞི་དང་ངོ་བོ་ཐ་མི་དད་པར་འགྱུར་ཏེ། འདི་ལྟ་སྟེ། སའི་ཁམས་ཀྱིས་ནི་སྲ་བའི་བྱ་བ་བྱེད་དོ། །ཆུའི་ཁམས་ཀྱིས་ནི་གཤེར་བའི་བྱ་བ་བྱེད་དོ། །མེའི་ཁམས་ཀྱིས་ནི་དྲོ་བའི་བྱ་བ་བྱེད་དོ། །རླུང་གི་ཁམས་ཀྱིས་ནི་ཡང་ཞིང་གཡོ་བའི་བྱ་བ་བྱེད་དོ་ཞེས་པ་དང༌། རླུང་འདི་རྣམས་ལས་ནི་མི་འབྱུང་ཡང༌། འདིར་ས་ཆུ་མེ་རླུང་ལྔ་པོ་ནང་གི་དབང་པོ་གཟུགས་ཅན་ལྔ་དང་ཕྱི་རོལ་དུ་དབང་པོ་རྣམས་ཀྱི་ཡུལ་དོན་ལྔ་པོ་བསྐྱེད་པར་བཤད་པ་རྣམས་ཀྱང་འབྱུང་བ་ལྔ་ཆེན་པོ་རང་རང་གི་ཡོན་ཏན་གྱི་ཁྱད་པར་དང༌། ཐོག་མ་ཉིད་ནས་གོམས་ཤིང་འདྲིས་པའི་བག་ཆགས་ལས་དེ་ལྟར་འབྱུང་ཞིང་བཟུང་བ་ཡིན་ནོ། །དེ་ཡང་མངལ་དུ་ཆགས་པའི་ཁུ་ཁྲག་སེམས་གསུམ་དང༌། དེ་ཡི་རང་བཞིན་འབྱུང་བ་ལྔ་པོ་རྣམས་ཀྱི་ནང་ནས་ཕ་ལས་བྱུང་བའི་ཁུ་བ་དེས་ནི། མངལ་དུ་གནས་པའི་སེམས་ཅན་དེ་དག་གི་རུས་པ་དང་ཀླད་པ་དང་གཞུང་པ་རྣམས་སྐྱེད་པར་བྱེད་པ་ཡིན་ལ། དེ་བཞིན་དུ་མ་ལས་བྱུང་བའི་ཟླ་མཚན་གྱིས་ནི་ཤ་དང་ཁྲག་དང་དོན་སྣོད་བཅུ་གཉིས་རྣམས་སྐྱེད་པར་བྱེད་པ་ཡིན་ནོ། །མངལ་དུ་གནས་པའི་སེམས་ཅན་རང་གི་སེམས་ལས་མིག་ལ་སོགས་པའི་དབང་པོ་ལྔ་དང་རྣམ་པར་ཤེས་པ་ལྔ་པོ་འབྱུང་ཞིང་སྐྱེ་བ་ཡིན་ནོ། །ཚུལ་དེ་དང་མཐུན་པར་འབྱུང་བ་རྣམས་ཀྱི་ནང་ནས་སའི་རང་བཞིན་གྱི་ཡོན་ཏན་དེ་ལས་ལུས་ཀྱི་ཤ་དང་རུས་པ་ལ་སོགས་སྲ་བའི་ཆ་ཤས་རྣམས་འབྱུང་ཞིང་ཁྱད་པར་དུ་སྣའི་དབང་པོ་གཟུགས་ཅན་པ་ཟངས་ཁབ་གཤིབས་པ་ལྟ་བུ་དང༌། དེའི་ཡུལ་དྲིའི་རང་བཞིན་རྣམས་སྐྱེད་པར་བྱེད་དོ། །ཆུའི་རང་བཞིན་གྱི་ཡོན་ཏན་དེ་ལས་ནི་ཁྲག་དང༌། །ཁྱད་པར་དུ་ལྕེའི་དབང་པོ་གཟུགས་ཅན་པ་ཟླ་བ་བཀས་པ་ལྟ་བུ་དང༌། དེའི་ཡུལ་རོ་དྲུག་གི་རང་བཞིན་ལ་སོགས་པའི་བརླན་ཞིང་གཤེར་བའི་རྣམ་པ་རྣམས་སྐྱེད་པར་བྱེད་དོ། །མེའི་རང་བཞིན་གྱི་ཡོན་ཏན་དེ་ལས་དྲོད་ཀྱི་ཆ་ཤས་ཀུན་དང་ལུས་ཀྱི་མདོག་རབ་ཏུ་གསལ་བ་དག་འབྱུང་ཞིང༌། ཁྱད་པར་དུ་མིག་གི་དབང་པོ་གཟུགས་ཅན་པ་ཟར་མའི་མེ་ཏོག་ལྟ་བུ་དང༌། དེའི་ཡུལ་གཟུགས་ཀྱི་རང་བཞིན་རྣམས་སྐྱེད་པར་བྱེད་དོ། །རླུང་གི་རང་བཞིན་གྱི་ཡོན་ཏན་དེ་ལས་ཕྱི་ནང་དུ་རྒྱུ་པའི་དབུགས་དང་དེའི་ཆ་ཤས་རྣམས་འབྱུང་ཞིང༌། ཁྱད་པར་དུ་ལུས་ཀྱི་དབང་པོ་གཟུགས་ཅན་པ་བྱ་རེག་འཇམ་གྱི་པགས་པ་ལྟ་བུ་ཡོངས་སུ་འཛིན་པའི་ལུས་ཀྱི་པགས་པ་དང༌། དེའི་ཡུལ་རེག་བྱའི་རང་བཞིན་རྣམས་སྐྱེད་པར་བྱེད་དོ། །ནམ་མཁའི་རང་བཞིན་གྱི་ཡོན་ཏན་དེ་ལས་ལུས་ཀྱི་ཕྱི་ནང་སྲོག་ཟུངས་ཀྱི་བུ་ག་རྣམས་དང༌། ཁྱད་པར་རྣ་བའི་དབང་པོ་གྲོ་གའི་འཛེར་བུ་གཅུས་པ་ལྟ་བུ་དང༌། དེའི་ཡུལ་སྒྲའི་རང་བཞིན་རྣམས་འབྱུང་ཞིང་བསྐྱེད་པར་འགྱུར་བ་ཡིན་ནོ།།

དེ་ལྟར་བཤད་མ་ཐག་པའི་རྒྱུ་དང་བྱེད་ལས་རྣམས་ཀྱང་མདོར་ན་སྐྱེ་བ་གཞན་དུ་གོམས་ཤིང་འདྲིས་པའི་དབང་ལས་དེ་དང་དེ་འདྲ་བའི་བྱ་བ་ལ་རང་བཞིན་གྱིས་འཇུག་པའི་སྣང་བ་སྣ་ཚོགས་སུ་རིམ་པས་མཆེད་པ་ལས་འབྱུང་ཞིང་གྲུབ་པ་ཡིན་ནོ། །དེ་ལྟར་རྒྱུ་དང་རྐྱེན་དང་རྟེན་ཅིང་འབྲེལ་པར་འབྱུང་བའི་ཚུལ་ཐམས་ཅད་ཕྱོགས་གཅིག་ཏུ་འཛོམ་ཞིང་འདུས་པ་ལས་ལུས་འདི་ཉིད་མངལ་གྱི་ནང་དུ་འགྲུབ་པར་འགྱུར་བ་ཡིན་ནོ།།

དེ་ལྟར་མངལ་དུ་ཆགས་པའི་ལུས་ཅན་དེ་ཉིད་ཀྱི་ལུས་འཕེལ་བའི་རྒྱུ་ནི་ལྟེ་བ་ཡིན་ཞེས་སོགས་གསུངས་པ་ལས་མ་བུ་གང་གི་ལྟེ་བ་ཡིན་པ་རྣམས་མི་ཤེས་པ་དག་སྣང་བའི་དོན་གྱིས་བརྗོད་པར་བྱའོ། །དེ་ཡང་མངལ་དུ་ཞུགས་པའི་སེམས་ཅན་དེའི་ལུས་གྲུབ་པའི་ཐོག་མ་ནི་འོག་ནས་འབྱུང་བ་ལྟར། མས་རོ་དྲུག་གི་བཟའ་བཏུང་འཕྲོད་པར་ཟོས་པའི་བཅུད་རྣམས་ཕོ་བའི་གནས་ནས་རིམ་པས་ལུས་ཟུངས་སོ་སོར་འཕེལ་བའི་དྭངས་མ་བདུན་པ་དེ་ཉིད་བསམ་སེ་འུར་བསགས་པ་ལས། ལས་ཀྱི་དབང་གིས་བསམ་སེའུ་དང་བུ་སྣོད་ཀྱི་གཡས་གཡོན་གཉིས་རྩའི་རྒྱུན་སྲང་གིས་འབྲེལ་ཞིང་བུ་སྣོད་ཀྱི་རྩ་དེ་ཡང་མངལ་གནས་ཀྱི་ལུས་ཅན་དེའི་ལྟེ་བ་སྟེ། དཀྱིལ་ལམ་དབུས་དྲང་ཐད་དེ་དང་འབྲེལ་བའི་དབང་གིས་ན་རྫིང་དང་འདྲ་བའི་བསམ་སེའུ་ནས་ཡུར་བ་དང་འདྲ་བའི་རྩའི་སྦུབས་གཉིས་སུ་ཆུ་དང་འདྲ་བའི་དྭངས་མའི་རྒྱུན་འབྱུང་སྟེ། ཞིང་དང་འདྲ་བའི་མངལ་གནས་ཀྱི་ལུས་ལ་ལོ་ཏོག་དང་འདྲ་བའི་ཁམས་སུམ་ཅུ་རྩ་དྲུག་རྣམས་འཕེལ་ཞིང་རྒྱས་པར་བྱེད་པ་ཡིན་ལ། བུད་མེད་གང་མངལ་དང་ལྡན་པའི་སྐབས་སུ་ཟླ་མཚན་མི་འབྱུང་བའི་རྒྱུ་མཚན་ཀྱང་དེ་ཉིད་ཡིན་ནོ། །དེ་བཞིན་དུ་སློབ་དཔོན་གྱིས་ཀྱང༌། མངལ་གནས་ལྟེ་བ་མ་ཡི་ནི། །སྙིང་གི་རྩ་དང་འབྲེལ་བའི་ཕྱིར། །དེ་ཡིས་དེ་ནི་འཕེལ་འགྱུར་ཏེ། །ཞིང་གི་ཡུར་བ་དག་དང་མཚུངས། །ཞེས་དང༌། རང་འགྲེལ་ལས། བྱིས་པ་ནང་དུ་འཕེལ་བའམ་སྐྱེ་བའི་རྒྱུ་ནི་མའི་སྙིང་དང་བུའི་ལྟེ་བ་འབྲེལ་བའི་རྒྱུན་སྲང་ཡོད་ལ། དེ་ནས་མས་ཟོས་པའི་བཅུད་འཇུག་སྟེ། དཔེར་ན་ཞིང་ལ་ཡུར་བ་ནས་ཆུ་དྲངས་ནས་བཅུས་ན་ངེས་པར་འཕེལ་ཞིང་རྒྱས་པ་བཞིན་ནོ་ཞེས་དང༌། ཟླ་ཟེར་ལས། མངལ་ན་གནས་པའི་སེམས་ཅན་དང་མའི་སྙིང་གི་རྩ་ལས་ཀྱི་དབང་གིས་འབྲེལ་པར་གནས་ཏེ། དེའི་ཕྱིར་རྩའི་རྒྱུན་དེ་ནས་མངལ་ན་གནས་པའི་ལུས་འཕེལ་ཞིང་རྒྱས་པར་འགྱུར་ཏེ། དཔེར་ན་འབྲས་ལ་སོགས་པའི་ཞིང་ཡུར་བ་ནས་ཆུ་དྲངས་ཏེ་དེས་ཞིང་གི་ལོ་ཏོག་འཕེལ་ཞིང་རྒྱས་པར་འགྱུར་བ་དང་འདྲའོ་ཞེས་འབྱུང་ལ། འདི་སྐབས་སྙིང་ཞེས་པ་ཡང་དོན་བསམ་སེ་དང་གཅིག་པ་ཡིན་ཏེ། བཟའ་བཏུང་རྣམས་ཀྱི་དྭངས་མ་བདུན་པ་བཅུད་ཆེན་པོ་དེ་ཉིད་གསོག་པའི་སྣོད་ཡིན་པའི་ཕྱིར་རོ།།

དེ་ཡང་མངལ་དུ་ཆགས་ཚུལ་གོང་དུ་ཞིབ་པར་བཤད་པ་དེ་ལྟར་ཆགས་ནས། དེ་ནི་ཆེར་འཕེལ་བའི་ཚུལ་བསྟན་པར་བྱའོ། །དེ་ཡང་མངལ་དུ་ཆགས་པའི་ལུས་དེ་ཉིད་ཆེས་ཆེར་འཕེལ་བར་བྱེད་པའི་རྒྱུའི་གཙོ་བོ་ནི་མངལ་དུ་གནས་པའི་སེམས་ཅན་རང་ཉིད་ཀྱི་ལྟེ་བ་ཡིན་ཏེ་ཅིའི་ཕྱིར་ན། མའི་བུ་སྣོད་གཡས་གཡོན་གྱི་རྩ་དང་མངལ་གནས་ཀྱི་ལྟེ་བར་འབྲེལ་ལ། བུ་སྣོད་ཀྱི་རྩ་གཉིས་པོ་དེའི་གྱེན་ཕྱོགས་སུ་བསམ་སེའུ་ཞེས་བཅུད་ཀྱི་རྟེན་དང་འབྲེལ་བ་དེའི་ཕྱིར་མའི་ཁ་ཟས་རྣམས་ཀྱི་དྭངས་མ་བདུན་པོ་རྒྱུན་མི་ཆད་པར་འབྱུང་བའི་ཐ་མ་བཅུད་ཆེན་པོ་དེ་ཉིད་བསམ་སེའུ་ནས་རྩ་གཉིས་སུ་བརྒྱུད་དེ་མངལ་དུ་གནས་པའི་ལྟེ་བར་ཞུགས་པ་དེས་རིམ་གྱིས་མངལ་དུ་ལུས་རྣམ་པར་འཕེལ་བར་འགྱུར་བ་ཡིན་ཏེ། དཔེར་ན་ཆུ་རྒྱུན་ཤིན་ཏུ་ཕྲ་བ་རྣམས་བསགས་པའི་རྫིང་དེ་ནས་ཡུར་བ་ཕྲ་མོར་ཆུ་དྲངས་ཏེ། ཆུ་དེ་འདྲ་བས་ཞིང་ཆེན་པོའི་ལོ་ཏོག་བསྐྱེད་པ་དང་འདྲ་བ་ཡིན་ནོ། །དེ་ཡང་མངལ་དུ་ཆགས་པའི་ལུས་ཅན་དེ་ཡང་ཞག་བདུན་ཕྲག་སུམ་ཅུ་རྩ་བརྒྱད་ཀྱི་གྲངས་དང་མཉམ་པའི་རླུང་གིས་རིམ་པར་བསྒྱུར་ནས་ཟླ་བ་དགུའི་བར་དུ་འཕེལ་བར་འགྱུར་རོ་ཞེས་བྱ་ལ། ཏེ་ཞེས་པ་ལྷག་མའི་ཚིག་འདྲེན་པའི་དོན་ཏོ།།

དེ་ཡང་མངལ་ཆགས་མ་ཐག་པ་ནས་བརྩིས་པའི་ཞག་བདུན་ཕྲག་དང་པོ་ལ་རླུང་ཐམས་ཅད་ཀྱི་དང་པོར་ཉོན་མོངས་ཅན་གྱི་ཡིད་སྲོག་རླུང་ཨའི་རྣམ་པ་ཅན་ཡོངས་སུ་གྲུབ་པ་དེས་ཁུ་ཁྲག་དཀྲུགས་ཤིང་སྡུད་པ་སོགས་བྱེད་ལ། དེ་ནས་བདུན་ཕྲག་གཉིས་པའི་སྐབས་སུ་རླུང་ཀུན་དུ་སྡུད་པ་ཞེས་བྱ་བ་སྲོག་གི་རླུང་ལས་འཕྲོས་ཏེ་ལས་བྱེད་དོ། །བརྒྱད་པ་རྩ་འགྲེལ་དུ་ནི་སྤྱིར་བཏང་བའི་དབང་གིས་ཟླ་བ་རེ་འཕེལ་ཚུལ་ཙམ་མ་གཏོགས་ཞིབ་ཏུ་མི་འབྱུང་ཡང༌། འདིར་གཞན་ནས་ཁ་བསྐང་བའི་ཚུལ་གྱིས་ཞིབ་ཏུ་བཤད་པར་འདོད་དོ། །དེ་ལྟར་ཡང་འཕེལ་བའི་ཚུལ་ནི་ཅི་ལྟ་བུ་ཞེ་ན། དགའ་བོ་མངལ་གནས་ལས། གཞན་ཡང་དགའ་བོ་འདི་ལྟར་མའི་མངལ་དུ་ཞུགས་པ་དེའི་གྲངས་ཀྱང་མདོར་བསྡུ་ན་ཞག་བདུན་ཕྲག་སུམ་ཅུ་རྩ་བརྒྱད་ཡོད་པར་རིག་པར་བྱ་སྟེ། ཞག་བདུན་ཕྲག་དང་པོའི་ཚེ་མའི་མངལ་མི་གཙང་བ་ཐོགས་པའི་གནས་སུ་ཉལ་བས་འདི་ལྟ་སྟེ། དཔེར་ན་ཟངས་ཆེ་བའི་ནང་དུ་བཙོས་ཤིང་བརྔོས་པ་བཞིན་དུ་ལུས་ཀྱི་དབང་པོ་དང་རྣམ་པར་ཤེས་པ་ལྷན་ཅིག་ཏུ་སྡུག་བསྔལ་མི་བཟོད་པ་མྱོང་བ་གང་ཡིན་པ་དེ་ནི་མེར་མེར་པོ་ཞེས་བྱའོ། །དེའི་དབྱིབས་ནི་འདི་ལྟ་སྟེ། དཔེར་ན་འབྲས་ཀྱི་ཁུ་བའམ་ཞོའི་སྤྲིས་མ་དང་འདྲ་བར་ཞག་བདུན་གྱི་བར་དུ་ནང་དུ་བཙོས། རབ་ཏུ་བཙོས་པས་ན་སའི་ཁམས་སྲ་བ་ཉིད་དང་ཆུའི་ཁམས་གཤེར་བ་ཉིད་དང་མེའི་ཁམས་དྲོ་བ་ཉིད་དང་རླུང་གི་ཁམས་ཡང་ཞིང་གཡོ་བ་ཉིད་གདོད་མངོན་དུ་སྣང་བར་འགྱུར་རོ་ཞེས་སོགས་ཀྱིས་རྒྱས་པར་གསུངས་མོད་ཀྱང༌། མཐའ་དག་མང་པོར་དོགས་ནས་དོན་རྣམས་རིམ་གྱིས་བརྗོད་པར་བྱའོ། །དེ་ཡང་མངལ་དུ་ཁུ་ཁྲག་སེམས་གསུམ་ལྷན་ཅིག་ཏུ་ཚོགས་པའི་སྐད་ཅིག་མ་དང་པོ་དེ་ནས་མགོ་བརྩམས་པའི་ཟླ་བ་དང་པོ་ལ་ཞག་བདུན་ཕྲག་བཞི་ལྷག་པར་ཡོད་པའི་ནང་ནས་བདུན་ཕྲག་དང་པོའི་དུས་སུ་ལས་ཀྱི་དབང་གིས་ཀུན་གཞིའི་རྣམ་པར་ཤེས་པ་ལས་སྲོག་གི་རླུང་ཞེས་བྱ་བ་ཐོག་མར་སྤྲོས་ཏེ། དེའི་བྱེད་པས་ཞོའི་དོན་དུ་འོ་མ་བསྐོལ་བར་རུ་མ་བླུགས་པ་དང་འདྲ་བར་ཁུ་ཁྲག་གི་རྡུལ་ཐམས་ཅད་ཕན་ཚུན་དབྱེར་མེད་རོ་གཅིག་ཏུ་འདྲེས་པར་འགྱུར་རོ། །དེ་བཞིན་དུ་བདུན་ཕྲག་གཉིས་པ་ལ་ལས་ཀྱི་རླུང་ཀུན་ཏུ་སྡུད་པ་ཞེས་བྱ་བ་འཕྲོས་ནས་སྔ་མ་ལས་ཅུང་ཟད་བསྐ་བའི་རྣམ་པ་ནུར་ནུར་པོར་འགྱུར་རོ། །བདུན་ཕྲག་གསུམ་པ་ལ་ལས་ཀྱི་རླུང་མཛོད་ཀ་ཞེས་བྱ་བ་འཕྲོས་ནས་ཞོ་ཆགས་ཟིན་པ་ལྟ་བུ་བསྐ་བའི་རང་བཞིན་ཅན་དུ་སྣང་བར་འགྱུར་རོ།།

ལྟེ་བསྒྱུར་ནི། སློབ་དཔོན་གྱིས། སྐྱེས་བུ་བྱེད་པ་འདི་སྟོབས་ལྡན། །ལས་ཀྱང་ཟིལ་གྱིས་གནོན་པར་ནུས། །སྐར་མ་རྒྱལ་ལ་སྐྱེས་བུའི་གཟུགས། །གསེར་རམ་དངུལ་ལམ་ལྕགས་ལས་བྱས། །མེ་མདོག་འགྱུར་བསྲེགས་འོ་མར་བཅུག །དེ་ནི་སྙིམ་གང་བླུད་པར་བྱ། །ཡང་ན་གོ་ར་དཎྜ་དང༌། །ཨ་པཱ་མརྒ་ཛི་ཝ་ཀ །ཟངས་རྩི་བ་དང་ཤེ་རྒྱ་ཀ། གཅིག་གམ་གཉིས་སམ་གསུམ་ཞིག་གམ། །ཐམས་ཅད་ཆུ་ལ་བཏགས་པ་ནི། །སྐར་མ་རྒྱལ་ལ་བབས་ཚེ་བླུད། །བྲི་ཧ་ཏི་ནི་དཀར་པོའི་རྩ། །འོ་མར་བཏགས་པ་རང་ཉིད་ཀྱིས། །བུ་འདོད་སྣ་ཁུངས་གཡས་པར་བླུགས། །བུ་མོ་འདོད་ན་གཡོན་པར་བླུགས། །ལ་ཀྵ་ཎའི་རྩ་འོ་མར་སྦྱར། །བུ་བསྐྱེད་གནས་པ་རབ་སྐྱེད་བྱེད། །དེ་བཞིན་ནྱ་གྲོའི་མྱུ་གུ་བརྒྱད། །སྦྱར་བ་སྣའམ་ཁ་ནས་བཏུང༌། །ཞེས་དང༌། རང་འགྲེལ་ལས། ཡང་ནི་སྐྱེས་བུའི་ལས་དགེ་བ་དང་མི་དགེ་བ་ནི་རྗེས་སུ་འབྲང་མོད་ཀྱི། འོན་ཀྱང་རྐྱེན་ལ་རག་ལུས་པ་ཡང་ཡོད་པས་གསོ་བ་དང་བསྲུང་བའི་ཆོ་ག་བྱའོ་ཞེས་པ་ཙམ་ལས་མ་བྱུང་ཡང༌། མངལ་དུ་ཆགས་པའི་ལུས་ཅན་དེ་ཉིད་སྐྱེས་བུར་འབྱུང་བར་འདོད་པ་རྣམས་ཀྱིས་ཞག་བདུན་ཕྲག་གསུམ་པ་དང་བཞི་པའི་དུས་འདིར་ལྟེ་བ་བསྒྱུར་བའི་ཐབས་བསྟེན་པར་བྱ་དགོས་ཏེ། ཅིའི་ཕྱིར་ཞེ་ན། ཕོ་མོའི་མཚན་མ་གསལ་བར་མ་གྱུར་པའི་གོང་དུ་མ་བྱས་ན་བསྒྱུར་དཀའ་བའི་ཕྱིར། དུས་འདི་འམ་སྔ་བ་ལ་བྱར་རུང་ངོ༌། །དེའང་ཇི་སྐད་དུ། འཆད་པར་འགྱུར་བའི་ཐབས་ཟབ་མོ་འདི་ནི་ལྟེ་བ་བཙན་ཐབས་སུ་བསྒྱུར་བའི་སྟོབས་ཆེན་པོ་དང་ལྡན་པས་ན་བུ་མོ་ཁོ་ནར་སྐྱེ་འགྱུར་གྱི་ལས་བསགས་པ་རྣམས་ཀྱང་ཟིལ་གྱིས་གནོན་པར་ནུས་ན། འདྲེས་པའི་ལས་རྣམས་ལྟ་སྨོས་ཀྱང་ཅི་དགོས། དེའི་ཕྱིར་རིགས་བརྒྱུད་དོན་དུ་གཉེར་བ་རྣམས་ཀྱིས་འདི་ལྟར་བྱ་དགོས་ཏེ། རབ་ཏུ་རྒྱལ་ཕུར་འཛོམ་པའམ་མ་བྱུང་ཡང་སྐར་མ་རྒྱལ་ལ་བབས་པའི་ཉིན་པར་མགར་བ་མཁས་པས་སྐྱེས་བུའི་མཚན་མ་དང་བཅས་པའི་བུའི་གཟུགས་སོར་བཞི་པ་ཤིན་ཏུ་དོད་པ་ཞིག་ཕོ་ལྕགས་ནག་པོ་འབའ་ཞིག་གམ་ཕོ་ལྕགས་རིགས་མི་འདྲ་བ་སྣ་ཁ་ཡར་ཏེ་གསུམ་མམ་ལྔ་ལས་ལེགས་པར་བརྡུངས་ལ་སླར་ཡང་སྐར་མ་རྒྱལ་ལ་བབས་པའི་ཉིན་སོལ་མེའི་ནང་ལ་ཧ་ཅང་ཚོས་པ་མ་ཡིན་པ། མདོག་འགྱུར་བ་ཙམ་བསྲེགས་པ་ནས། བ་བེའུ་ཕོ་ཡོད་པའི་འོ་མ་སྙིམ་པ་དོའི་ནང་དུ་གོང་གི་ལྕགས་སྣ་གང་ཡོད་དང་མཉམ་པའི་གྲངས་དང་མཐུན་པར་གསུར་སྒྲ་ཐོན་ཙམ་བྱས་པའི་ལྕགས་ཀྱི་ཁུ་བ་དེ་ཉིད་ནས་སྙིམ་པ་གང་བུད་མེད་ཀྱི་ཁར་ཁྱོ་དེས་བླུད་པར་བྱའོ། །ཉི་མའི་དྭངས་མ་ཞེས་གྲོང་པའི་ཆོས་ཀྱིས་མ་གོས་པའི་བུ་མོའི་ཁམས་དང་ཟླ་བའི་དྭངས་མ་དེ་བཞིན་གྱི་བུའི་ཁམས་ཆ་མཉམ་པ་བུ་རམ་དང་བསྲེས་པའམ་གལ་ཏེ་དེ་ལྟར་མ་འགྲུབ་ན་ཉི་མའི་དྭངས་མ་ལྷང་ཚེར་དམར་པོ་དང༌། ཟླ་བའི་དྭངས་མ་དངུལ་ཆུ་བཙོ་བཀྲུ་སྦྱངས་གསུམ་བྱས་པ་དེ་ཉིད་ཆ་མཉམ་པ་གཏུན་གྱིས་མཉེས་པས་དབྱེར་མེད་དུ་འདྲེས་པ་དེ་ཉིད་བུ་རམ་དང་བསྲེས་ནས་བཟའ་བར་བྱ་བ་དང༌། ལུག་ཐུག་གསུམ་མམ་ལྔ་ལ་སོགས་པ་ཁ་ཡར་བའི་སོག་པ་གཡས་ཀྱི་བལ་ལ་ཁྱེའུ་གཙང་མས་བཀལ་བའི་ཐི་གུ་སུམ་སྒྲིལ་བྱས་ལ་ལུག་གི་གྲངས་དང་མཉམ་པའི་མདུད་པ་བྱས་ལ་བུད་མེད་ཀྱི་རྐེད་པར་བཅིངས་པ་དང༌། དེའི་སྣེ་མོ་གཉིས་ལྟེ་བའི་འོག་ཏུ་འཕྱང་བ་ལ། གོང་གི་བུའི་གཟུགས་དེ་ཉིད་ལུ་གུ་ཕོའི་པགས་པར་གྲིལ་ནས་མགོ་མཇུག་མ་ལོག་པར་གདགས་པ་འདི་ལྟ་བུའི་རྟེན་འབྲེལ་ཟབ་མོ་རྣམས་ཇི་ལྟ་བ་བཞིན་བསྟེན་པར་བྱས་ན་ནི། དེས་ངེས་པར་ལྟེ་བ་བསྒྱུར་ནུས་པའོ། །དེའི་རྗེས་སུ་མངལ་གནས་ཀྱི་ལུས་བསྲུང་བའི་སླད་དུ་བུད་མེད་དེའི་ཟས་སྤྱོད་ནི་འདི་ལྟར་བྱ་དགོས་ཏེ། དེའང་ཉལ་པོ་དང་རྩོལ་བ་དྲག་པོས་ལུས་ཀྱི་ལས་ཆེན་པོ་དང༌། མཚན་མོ་གཉིད་མི་ལོག་ཅིང་ཉིན་མོ་གཉིད་ལོག་པ་དང༌། བཤང་གཅིའི་ཤུགས་བཀག་པའམ་བཙིར་ཤས་ཆེས་པ་དང༌། ཚ་རྣོ་ལྕི་བའི་ཁ་ཟས་དང༌། བཤང་གཅི་བགག་པར་འགྱུར་བའི་ཁ་ཟས་རྣམས་དང༌། རློན་ཁྲུས་མས་བཏང་སྟེ་སྐྱུགས་བཤལ་ནི་རུ་ཧ་སོགས་དང་གཏར་ག་ལ་སོགས་ཏེ་མངལ་གནས་མ་དང་བཅས་པ་ལ་གནོད་པར་འགྱུར་བ་ཐམས་ཅད་ལྟེ་བསྒྱུར་བྱ་བའི་དུས་ནས་མ་བཙས་ཀྱི་བར་དུ་སྤང་བར་བྱ་ཞིང༌། སྤྱིར་ཡང་སྤང་བྱ་འགའ་ཞིག་བྱ་དགོས་པ་བྱུང་ཡང་ཟླ་བ་བརྒྱད་རྫོགས་ནས་བྱ་ཡིས། དེའི་བར་དུ་ནི་སྤང་བར་བྱ་བ་ཁོ་ནའོ། །དེ་ལྟར་སྤང་དགོས་པའི་རྒྱུ་མཚན་ཅིའི་ཕྱིར་ཞེ་ན་ཟས་སྤྱོད་དེ་རྣམས་མའི་ཟུངས་ལ་ལྷག་པར་གནོད་པའི་ཕྱིར། མའི་ཟུངས་ཟད་ན་བུའི་ལུས་བསྐྱེད་པའི་རྒྱུ་མེད་པས་མངལ་འཇིག་པ་སྟེ་ཕྱིར་འབྱུང་བའམ་འཆི་བའམ། ཡང་ན་རླུང་གི་དབང་གིས་དཀུ་སྟེ་མངལ་གྱི་ནང་ཉིད་དུ་སྐམས་པར་འགྱུར་རོ། །དེ་ལྟ་བུའི་ལྟེ་བ་བསྒྱུར་ཐབས་དང་རྗེས་ཀྱི་སྤང་བླང་རྒྱས་པར་པདྨ་གཅེས་ཕྲེང་དུ་བལྟ་བར་གྱིས་ཤིག

གསུམ་པ་ཟླ་བ་གཞན་གྱིས་འཕེལ་བ་བཤད་པ་ལ་གཉིས་ཏེ། སོ་མ་རཱ་ཛ་སོགས་རྒྱ་ནག་གི་སྨན་དཔྱད་རྣམས་ལས། དང་པོ་ཞག་བདུན་ལས་ཀྱི་རླུང༌། །རྒྱུ་སྟེ་མེར་མེར་པོ་དེ་ནི། །ཀུན་གཞི་འཛིན་པའི་རླུང་ཞེས་པས། །དང་པོའི་ཞག་ནི་གཅིག་ན་འོ། །ཞག་གཉིས་མངལ་ནི་འཇུག་པའི་རླུང༌། །འབྱུང་བས་མེར་མེར་པོར་འགྱུར་རོ། །ཞག་གསུམ་མངལ་ནི་འཁྲུགས་པའི་རླུང༌། །མཁྲང་འགྱུར་ཞེས་པར་འགྱུར་བ་འོ། །ཞག་བཞི་ཀུན་ནས་སྡུད་པའི་རླུང༌། །འབྱུང་བས་གོར་གོར་པོར་འགྱུར་རོ། །ཞེས་པ་ལ་སོགས་པའི་ཞག་བདུན་ཕྲག་དང་པོའི་དུས་ཀྱི་ཞག་རེ་རེ་ལ་རླུང་མི་འདྲ་བ་རེ་རེ་དང༌། སླར་བདུན་ཕྲག་གཉིས་པ་ནས་བཟུང་སྟེ། བདུན་ཕྲག་བཞི་བཅུ་རྩ་གསུམ་གྱི་བར་དུ་རླུང་མི་འདྲ་བ་རེ་རེ་དང་བཅས་ཏེ་འཕེལ་བའི་ཚུལ་འབྱུང་ཡང༌། མདོ་དང་རྒྱུད་སྡེ་སོགས་ནས་འབྱུང་བའི་ཚུལ་དང་མི་མཐུན་པར་སྣང་བ་དང༌། དཔལ་དུས་ཀྱི་འཁོར་ལོ་ལ་སོགས་པ་རྡོ་རྗེ་ཐེག་པའི་རྒྱུད་སྡེ་རྣམས་ལས་མིའི་ལུས་ཅན་རྣམས་ལ་མངལ་དུ་ཆགས་པ་ནས་སྐྱེ་བ་ཕྱི་མ་ལ་ཐུག་གི་བར་དུ་ཁྱབ་འཇུག་གི་འཇུག་པ་བཅུའི་ཚུལ་གྱིས་གསུངས་པ་འདིར་མ་སྤྲོས་སོ། །འདིའི་སྐབས་སུ་ལྟེ་བ་དང་སྙིང་གི་བར་གྱི་སྲོག་པ་རྩ་ཆགས་པས་ཉའི་རྣམ་པ་ཅན་དུ་གསུངས་པའི་ཕྱིར་ཡན་ལག་གི་རྩ་སྐབས་འདིར་ཆགས་པ་མི་སྲིད་དོ།།

དེ་ཡང་བདུན་ཕྲག་བཞི་པ་འདིའི་སྐབས་སུ་ཁུ་ཁྲག་གཉིས་ཞོ་ཆགས་པ་ལྟ་བུ་དེ་ལས་གྱུར་ནས། གོར་གོར་པོ་སྟེ་ཅུང་ཟད་སྲ་ཞིང་འདྲིལ་བའི་རྣམ་པའམ་ཡང་ན་སླ་ཞིང་མེར་མེར་པོའི་རྣམ་པའམ། ཡང་ན་དབྱིབས་ནར་ནར་པོ་གང་རུང་ཞིག་ཏུ་འགྱུར་ཏེ། དེ་ལས་དང་པོ་ལྟར་བྱུང་ན་ཕོ་དང༌། གཉིས་པ་ལྟར་བྱུང་ན་མོ་དང༌། གསུམ་པ་ལྟར་བྱུང་ན་མ་ནིང་དུ་རིམ་པར་འགྱུར་ལ། འདི་ཐད་ཞལ་ལུང་སོགས་སྔ་རབས་ཀྱི་འགྲེལ་པ་རྣམས་སུ་དགག་བཞག་མེད་ཅིང་དོགས་པ་མ་ཤར་བས་སླད་ནས་རིག་པ་དང་ལྡན་པ་བྱུང་ན་ཐོག་མ་རྣམ་ཤེས་ཕའི་ཁུ་བ་དང་ལྷན་དུ་ཞུགས་དུས་ནས་ལས་སོགས་ལ་བརྟེན་ཕོ་མོ་གར་སྐྱེའི་སྒོ་དོད་ཚར་བ་དང་ཡང་མངལ་ཁ་བྱེ་ནས་ཞག་གྲངས་ཡ་ལ་བུ་དང་ཆ་ལ་བུ་མོ་སྐྱེ་བ་ཁུ་བ་དང་ཟླ་མཚན་མང་ཉུང་གིས་བུ་བུ་མོར་འགྱུར་ཚུལ་ཡང་བདུན་ཕྲག་གསུམ་པ་བཞི་པ་རྣམས་སུ་ལྟེ་བསྒྱུར་དང་འགྱུར་ཚུལ་སོགས་ལ་དོགས་པ་ཤར་ཡང་དེ་དག་ནི་ཐབས་ཤེས་དང་སྤྱིར་བཏང་དམིགས་བསལ་སོགས་ཀྱི་དགོས་པ་ཁྱད་པར་ཅན་ཡོད་དེ་འདིར་མངས་པས་གཞན་དུ་བཤད་པར་བྱའོ། །དེ་ལྟར་གང་ཡང་རུང་བ་ཞིག་ཏུ་གྱུར་པའི་ཚེ་བུད་མེད་རང་ཉིད་ཀྱིས་ཤེས་ཤིང་གསལ་བར་འགྱུར་བ་ཡིན་ཏེ། དེའི་རྟགས་ནི་དཀུ་སྟེ་མངལ་དང་ཚང་ར་ལྕི་བ་དང༌། ལུས་གློ་བུར་དུ་རིད་པ་དང༌། ཡི་ག་འགགས་ཏེ་ཁ་ཟས་མི་འགྲོ་བ་དང༌། གཡལ་མང་དུ་འབྱུང་ཞིང་བྱ་རྨྱང་ལ་དགའ་བ་དང༌། འགྲོས་ཀྱིས་དུབ་པ་ལྟར་སྒྱིད་པ་སྐྱུར་བ་དང༌། སྔར་བས་ནུ་མ་ཆེར་སྐྱེ་བ་དང༌། ཟས་ཀྱི་རོ་སྐྱུར་བ་རྣམས་ལ་དགའ་ཞིང་མདོར་ན་སྙིང་ལ་ཁ་ཟས་སྣ་ཚོགས་པ་འདོད་པ་ཞིག་མངལ་དུ་གནས་པའི་སེམས་ཅན་དེའི་དབང་གིས་འབྱུང་བས་ན། རྟ་བོང་བྱ་ཤ་མ་ཡིན་པའི་ཇི་ལྟར་འདོད་པའི་ཁ་ཟས་དེ་རྣམས་མ་བྱིན་པར་བཀག་པའི་ཚེ། ལུས་ཅན་དེ་ཉིད་མངལ་ནས་ཕྱིར་འཇིག་པའམ་ནང་དུ་འཆི་བར་འགྱུར་ལ། གལ་ཏེ་ཤི་བར་མ་གྱུར་ན་ཡང་དམུས་ལོང་དང་ཞ་བོ་དང་སྒུར་པོ་སོགས་གཟུགས་མི་སྡུག་པ་སྐྱེ་བར་འགྱུར་བ་དེ་བས་ན་བུད་མེད་དེ་ཉིད་ཀྱི་ནད་གཞི་ལ་གནོད་པའི་ཁ་ཟས་ཞིག་འདོད་པར་སྣང་ཡང༌།མ་བུ་གཉིས་ཀ་ལ་ཕན་པའི་ཁ་ཟས་འགའ་ཞིག་དང་བསྲེས་ནས་ཅུང་ཟད་བྱིན་པར་བྱའོ།།

དེ་ནས་བདུན་ཕྲག་ལྔ་པ་འདི་ལ་སྔར་གྱི་གོར་གོར་མེར་མེར་སོགས་གང་རུང་གི་རྣམ་པ་ལས་འདས་ནས་མཁྲེགས་པའམ་མཁྲང་བར་འགྱུར་བའི་དོན་གྱིས་ན་མཁྲང་འགྱུར་གྱི་ཞག་ཅེས་བྱ་ལ། འདི་ལ་རྩ་རླུང་ཐིག་ལེ་ཐམས་ཅད་བསྐྱེད་པའི་རྩ་བ་ལྟ་བུའི་ལྟེ་བ་དང་སྲོག་པ་རྩ་རིམ་པ་ལྟར་ཆགས་པར་འགྱུར་རོ། །དེ་ལ་སྲོག་པ་རྩ་ཞེས་པ་འདི་ལ་སྣ་ཚོགས་སུ་འདོད་པ་རྣམས་ལ་སྐྱོན་ཇི་སྙེད་ཅིག་མཆིས་ཏེ། རྣམ་པར་དག་པ་ནི་དྲི་མེད་འོད་ལས། བྱང་ཆུབ་ཀྱི་སེམས་མྱུ་གུར་གྱུར་པ་སྙིང་གའི་གོ་སྐབས་རྣམས་སུ་རྣམ་པ་བཅུའི་རྩ་སྲོག་ལ་སོགས་པའི་རླུང་རྣམས་ཀྱི་རྟེན་དུ་འགྱུར་ཏེ། དེ་དག་ཀྱང་ཤིན་ཏུ་ཕྲ་བ་སྟེ་སྐྲའི་ཚད་ཙམ་མོ་ཞེས་དང༌། ཀུན་དུ་ཁ་སྦྱོར་ལས། དེ་ཡི་དབུས་ན་གནས་པའི་རྩ། །མི་གསལ་གསལ་བའི་རང་བཞིན་ཅན། །ཆ་མེད་མཆོག་ཏུ་ཕྲ་བ་སྟེ། །གཟི་བརྗིད་ཆེན་པོའི་འོད་དང་ལྡན།། རྟག་ཏུ་སྙིང་གི་དབུས་ན་གནས། །ཞེས་དང༌། རྣལ་འབྱོར་ཆེན་པོའི་རྒྱུད་ལས། སུམ་ཅུ་རྩ་གཉིས་མདུད་པ་ལྡན། །ཕྲ་བའི་ཕྲ་བ་ཡང་དག་མཆོག །ཅེས་གསུངས་པ་ལྟར་ཤིན་ཏུ་ཕྲ་བར་གནས་པའི་ཕྱིར། ཚུར་རོལ་མཐོང་བ་པོ་རྣམས་ལ་སྣང་དུ་མི་རུང་བ་ཙམ་མ་གཏོགས་ཤི་བའི་ལུས་ལའང་མེད་པ་ནི་མ་ཡིན་ནོ། །དེ་ཡང་གཞུང་འདིར་དབུ་རྐྱང་རོ་གསུམ་གྱི་རྣམ་གཞག་དངོས་སུ་མ་གསུངས་ཀྱང་སྦས་པའི་ཚུལ་གྱིས་གསུངས་པ་ཡིན་ཏེ། དེ་ཡང་འོག་ནས་འབྱུང་བའི་སྲོག་རྩ་དཀར་ནག་གི་འབྲེལ་བའི་གཞི་རོ་རྐྱང་གཉིས་དང༌། སྲིད་པའི་རྩ་བོ་ཆེ་རྣམས་འཁོར་ལོའི་དོན་དུ་གསུངས་པ་ནི་ལེའུ་བཞི་པར་འཆད་ལ། འདི་སྐབས་ཀྱི་སྲོག་རྩ་ཞེས་པ་ནི་དོན་དུ་དབུ་མ་ཉིད་ཡིན་ཏེ། སྲོག་རླུང་ཨའི་རྣམ་པ་ཅན་གྱི་རྟེན་ཡིན་པ་གང་ཞིག་འཁོར་ལོ་བཞི་འམ་དྲུག་གི་སྲོག་ཤིང་ཡིན་པའི་ཕྱིར་དང༌། རྩ་ཐམས་ཅད་ཀྱི་ཐོག་མ་ཁོ་ནར་ཆགས་པའི་རྩ་ཡིན་པའི་ཕྱིར་རོ། །དེ་ལྟར་དྲི་མེད་འོད་ལས། སྲོག་ནི་སུ་སུ་མ་སྟེ་ཤིན་ཏུ་སྟོང་པའམ་ཤིན་ཏུ་ཡིད་བཟང་མར་རོ་ཞེས་དང༌། དབུ་མར་སྲོག་རླུང་བརྟེན་པར་བྱས་པའི་ཚེ་དང་ནད་མེད་པ་སྟེར་རོ་ཞེས་དང༌། དཔལ་སར་ཧས། རླུང་དང་རྒྱུ་བ་རྩ་ཆེན་སྲོག་པ་རྩར་ཚུད་ན། ཐ་མལ་ཤེས་པ་ངང་གིས་འགགས་པར་གདོན་མི་ཟ། །ཞེས་དང༌། སམྦུ་ཊི་ལས། རྐང་པ་ནས་ནི་སྤྱིར་མཐར་ཐུག །སྐུད་པ་གཅིག་ལ་ཡང་དག་འབྱུང༌། །ཞེས་པ་དང༌། ནང་དོན་རང་འགྲེལ་ལས། སྔར་ལུས་གྲུབ་པའི་སྐབས་སུ་བཤད་པའི་སྲོག་རླུང་གི་རྟེན་དེ་ཉིད་རྩ་དབུ་མ་སྟེ་འཁོར་ལོ་དྲུག་པའི་བར་བར་དུ་རང་སོར་ཕྱེད་དང་བཅུ་གསུམ་རེ་ཡོད་པ་དེ་གསང་བ་ནས་སྤྱི་གཙུག་གི་བར་འབྲེལ་བ། ཡར་སྣ་ཧཾ་གི་རང་བཞིན་ཅན་དཀར་ཆ་ཕ་ལས་ཐོབ་པའི་ཐིག་ལེ་ཡུངས་ཀར་ཙམ་གྱིས་བཀག་ལ། ལྟེ་བའི་འོག་ན་མ་ལས་ཐོབ་པའི་ཐིག་ལེ་དམར་ཆ་ཁྲག་གི་རང་བཞིན་ཏེ་ཨ་ཐུང་དུ་བརྗོད་པ་ཡིན་ནོ། །འདིའི་བར་ནི་ད་ལྟ་གནས་པའི་དུས་ན་ཀུན་གཞི་རྣམ་པར་ཤེས་པའི་རྟེན་སྲོག་ཆེན་པོའི་རླུང་གིས་གང་ནས་གནས་པས་སྟོང་སང་ངེ་བ་སྟེ་ནམ་མཁའ་དང་འདྲ་བ་ཡོད་པས་ན། དུས་ཀྱི་འཁོར་ལོ་ནས་འདི་ལ་སྟེང་སྒྲ་གཅན་དང་འོག་དུས་ཀྱི་མེ་ཞེས་མགོ་མཇུག་ཏུ་བཤད་པ་དང༌། ལུས་ཀྱི་བར་གྱི་སྲོག་རླུང་དུ་གསུངས་ཏེ། དོན་ལ་རླུང་ཐམས་ཅད་ཀྱི་རྩ་བ་དེར་བརྟེན་པས་ལུས་ཅན་གནས་པར་བྱེད་པའོ་ཞེས་དང༌། དབུ་མའི་མིང་གི་རྣམ་གྲངས་ཀྱང༌། ཨ་ཝ་དྷཱུ་ཏིའ་དང༌། སུ་སུ་མ་དང༌། ཀུན་འདར་མ་དང༌། ཕྲ་མོའི་གཟུགས་དང༌། སྲོག་པ་རྩ་དང༌། ནང་གི་ཤིང་གཅིག་མ་དང༌། སྲོག་གི་སྐུད་པ་དང༌། ལམ་པོ་ཆེ་དང༌། རྩ་དབུ་མ་དང༌། མར་སྣ་ལ་དུང་ཅན་མ་དང༌། ཡར་སྣ་ལ་སྒྲ་གཅན་གྱི་རྩ་ཞེས་པ་ལ་སོགས་གསུངས་པ་བཞིན་ནོ།།

དེ་ཡང་མངལ་དུ་ཆགས་པའི་ཟླ་བ་གཉིས་པ་ལ་སྔ་མའི་ལྷག་དང་བཅས་པའི་བདུན་ཕྲག་ལྔ་མ་ལོངས་ཙམ་ཡོད་པའི་ནང་ནས་བདུན་ཕྲག་སྔ་མའི་སྟེང་དུ་བརྩེགས་པའི་ལྔ་པ་མཁྲང་འགྱུར་གྱི་ཞག་ལ་མངལ་ན་གནས་པའི་སེམས་ཅན་དེའི་ལུས་ཀྱི་ཆ་ཤས་རྣམས་ལས་དང་པོར་ལྟེ་བ་སྤྲུལ་པའི་འཁོར་ལོ་རྩ་འདབ་བཞིའི་རྣམ་པ་ཙམ་ཚིགས་པ་བཅུ་དྲུག་པའི་ཐད་ཆགས་པར་འགྱུར་ལ། བདུན་ཕྲག་དྲུག་པ་ལ་ལྟེ་བའི་རྩ་འདབ་ཀྱི་དབུས་དེ་ལ་བརྟེན་ནས་དབུ་མའམ་སྲོག་པ་རྩ་ཞེས་བྱ་བ་ཀུན་གཞིའི་སྲོག་གི་རླུང་དང་བཅས་པའི་རྟེན་མངལ་གནས་རང་ཉིད་ཀྱི་སོར་བཅུ་དྲུག་གྱེན་དུ་སོང་སྟེ། ཡར་སྣ་ལ་སྙིང་ག་ཆོས་ཀྱི་འཁོར་ལོ་རྩ་འདབ་བཞིའི་རྣམ་པ་དང་བཅས་ཚིགས་པ་བརྒྱད་པའི་ཐད་ཆགས་པར་འགྱུར་རོ། །དངོས་སུ་མ་གསུངས་ཀྱང་བདུན་ཕྲག་བདུན་པ་ལ་སྙིང་ག་ནས་སླར་ཡང་རང་སོར་བཅུ་བཞི་སྲོག་རྩ་གྱེན་དུ་སོང་སྟེ་མགྲིན་པ་ལོངས་སྤྱོད་ཀྱི་འཁོར་ལོ་ཨན་སྟོང་དང་པོའི་ཐད་ཆགས། ཡང་དེ་ནས་རང་སོར་བཅུ་དྲུག་སྲོག་རྩ་གྱེན་དུ་སོང་སྟེ་སྤྱི་བོ་བདེ་ཆེན་གྱི་འཁོར་ལོ་མིག་གི་དབང་པོ་དང་བཅས་པའི་གཟུགས་སུ་དོད་ནས་བདུན་ཕྲག་བརྒྱད་པའི་མཇུག་ཏུ་མིག་དབང་དང་བཅས་པའི་འཁོར་ལོ་དེ་ལ་བརྟེན་ནས་མགོ་བོའི་དབྱིབས་ཙམ་ཞིག་ཆགས་སོ། །གོང་དུ་མགྲིན་པའི་རྩ་ཆགས་པའི་དུས་སུ་མཚུངས་པར་ལྟེ་བ་ནས་རང་སོར་བཅུ་བཞིའི་ཚད་ལྡན་སྲོག་རྩ་ཐུར་དུ་སོང་བ་ལས་གསང་གནས་བདེ་སྐྱོང་གི་འཁོར་ལོ་ཆགས་པ་ཡིན་ལ། འདིར་དུས་ཀྱི་འཁོར་ལོ་ནས་འཁོར་ལོ་སོ་སོའི་བར་ཐག་སོར་ཕྱེད་བཅས་ཉི་མར་གྲགས་ཞེས་གསུངས་པ་རྩ་འཁོར་དྲུག་གི་དབང་དུ་བཤད་པ་ཡིན་ལ། སྐབས་འདིར་དངོས་སུ་རྩ་འཁོར་བཞི་དང་ཤུགས་བསྟན་མགྲིན་པ་བཅས་ལྔ་ལ་སོར་ཚད་དེ་བཞིན་མེས་པོའི་ཞལ་ལུང་དུ་རྗེ་ཟུར་མཁར་བས་དྲངས་པ་ནི་འགྲེལ་པ་ཁྲུང་ཁྲུང་དང་མཇུག་རྩེར་མངོན་ཞིང་དོན་དུའང་མགྲིན་པ་སྣ་རྩེའི་ཐད་དང་སྙིང་ག་ཚིགས་པ་ཕྱེད་དྲུག་པ་ལྟེ་བ་ཚིགས་པ་བཅུ་གཉིས་པའི་སྨད་ཆ་ཕོ་བའི་ཐད་དུ་བྱུང་བ་དང་བཅས་མི་སྲིད་པ་དུ་མར་གྱུར་ལ། གཞན་ཡང་སྡོམ་འབྱུང་ཤཱ་རིའི་བུས་ཞུས་པ་སོགས་ལ་རྩ་འདབ་རེའི་བར་རགས་པར་མཐོ་རེ་བཤད་ལ་གསོ་བ་རིག་པ་འདིར་ལྟེ་བ་ཚིགས་པ་བཅུ་དྲུག་པ་དང་སྙིང་བརྒྱད་པ་ཡན་གྱིས་རྫོགས་པ་བཤད་པས་ན་གོང་ལྟར་འཐད་ཅིང༌། འདི་ལས་འཕྲོས་ཆ་དཔྱད་དང་ཚིགས་པའི་གྲངས་ནས་གཞལ་བའི་ཆ་དཔྱད་མི་མཐུན་པ་སོགས་ལ་བཤད་དུ་ཡོད་ཀྱང་འདིར་དེ་ཙམ་མོ། །བདུན་ཕྲག་དགུ་པར་ལུས་ཀྱི་དབྱིབས་ཏེ་ཁོག་པ་སྟོད་སྨད་ཀྱི་རྣམ་པ་ཕལ་ཆེར་ཆགས་པར་འགྱུར་ཏེ། ཡན་ལག་བཞིའི་གནས་རྣམས་ནི་མ་གཏོགས་སོ། །དེ་ལྟར་བཤད་པའི་འཕེལ་ཚུལ་འདི་རྣམས་གཙོ་བོར་སྲོག་གི་རླུང་ཁོ་ནའི་བྱེད་པ་ཡིན་མོད་ཀྱང༌། ཁྱད་པར་དུ་རིམ་པ་བཞིན་དུ་སྲོག་རླུང་ལས་ཡང་དག་པར་སྡུད་པ་དང༌། རྒྱ་ཆེན་པོ་དང༌། འཁྱིལ་བ་དང༌། བཟློག་ཅིང་བསྒྱུར་བ་དང༌། རྣམ་པར་འབྱེད་པ་ཞེས་བྱ་བའི་རླུང་འཕྲོས་པ་རྣམས་ཀྱིས་བྱེད་པ་ཡིན་ནོ། །སྐབས་འདིར་སྲོག་པ་རྩའམ་དབུ་མའི་ནུས་པས་ལུས་དཀྱུས་གཅིག་ཏུ་ཆགས་ཏེ་ཉ་ལྟ་བུར་གྲུབ་པ་ལ་ཉའི་གནས་སྐབས་ཞེས་གསུངས་པ་ཡིན་ནོ།།

ཟླ་བ་གསུམ་པ་ལ་ཞག་གསུམ་གོང་དུ་བཅད་པའི་བདུན་ཕྲག་བཞི་ཡོད་པ་ལས་གོང་གི་སྟེང་དུ་བརྩེགས་པའི་བདུན་ཕྲག་བཅུ་པ་ལ་ཉའི་རྣམ་པ་དེ་ལས་དཔུང་པ་གཉིས་དང་དཔྱི་རུས་གཉིས་འབུར་དུ་དོད་ནས། བདུན་ཕྲག་བཅུ་གཅིག་པ་ལ་དབང་པོ་དགུ་སྟེ་བུ་ག་དགུའི་གཟུགས་དབྱིབས་དོད་ཅིང༌། བཅུ་གཉིས་པ་ལ་དོན་ལྔའི་གཟུགས་དབྱིབས་དོད་ལ། བཅུ་གསུམ་པ་ལ་སྣོད་དྲུག་གི་གཟུགས་དབྱིབས་དོད།

དེ་བཞིན་དུ་ཟླ་བ་བཞི་པ་ལ་བདུན་ཕྲག་བཞི་ལྷག་ཙམ་ཡོད་པ་ལས་གོང་གི་སྟེང་དུ་བརྩེགས་པའི་བདུན་ཕྲག་བཅུ་བཞི་པ་ལ་དཔུང་པའི་རྐང་གཉིས་དང་བརླའི་རྐང་གཉིས་ཏེ་བཞི་པོའི་གཟུགས་དབྱིབས་དོད་ནས་བཅོ་ལྔ་པ་ལ་རྐང་པ་དང་ལག་པའི་རྗེ་ངར་བཞིའི་གཟུགས་དབྱིབས་དོད་ཅིང༌། བཅུ་དྲུག་པ་ལ་རྗེ་ངར་རྣམས་ལས་སོར་མོ་ལྔ་ལྔ་སྟེ་ཉི་ཤུའི་གཟུགས་དབྱིབས་དོད་ལ། བཅུ་བདུན་པ་ལ་ལུས་ཀྱི་ཕྱི་ནང་དུ་འབྲེལ་ནས་མངོན་པའི་རྩ་བཅུ་དྲུག་དང་མི་མངོན་པའི་རྩ་གྲངས་མེད་པ་རྣམས་ཆགས་པར་འགྱུར་རོ། །འདིའི་གཟུགས་དབྱིབས་ཞེས་པ་རྣམས་ནི་དེ་དང་དེའི་གཟུགས་ཀྱི་རྣམ་པ་ཙམ་ཆགས་པའི་དོན་ཡིན་གྱི། གཟུགས་གསལ་བར་ཆགས་པའི་དོན་མ་ཡིན་ནོ། །དེ་ལྟར་བཤད་པའི་བདུན་ཕྲག་བརྒྱད་པ་དེའི་དུས་སུ་སྲ་བར་བྱེད་པ་དང༌། བུ་ག་སྣང་བ་དང༌། ཡོན་པོའི་སྒོ་དང༌། སྦུར་རྒྱུས་པ་དང༌། སྐུད་པའི་ཁ་དང༌། པདྨ་དང༌། བདུད་རྩི་འགྲོ་བ་དང༌། འབྲི་གདོང་ཞེས་བྱ་བའི་རླུང་སྤྲོས་ཏེ་རིམ་པ་བཞིན་དུ་བྱ་བ་བྱེད་པ་ཡིན་ནོ། །སྐབས་འདིར་ཡན་ལག་ལྔ་པོ་ཆགས་པའི་དུས་ཡིན་པས་རུས་སྦལ་གྱི་གཟུགས་དང་འདྲ་བའི་དབང་གིས་རུས་སྦལ་གྱི་གནས་སྐབས་ཞེས་གསུངས་པ་ཡིན་ནོ།།

ཟླ་བ་ལྔ་པ་ལ་བདུན་ཕྲག་བཞི་ལྷག་ཙམ་ཡོད་པ་ལས། གོང་གི་སྟེང་དུ་བརྩེགས་པའི་བདུན་ཕྲག་བཅོ་བརྒྱད་པ་ལ་སྲོག་གི་རླུང་ལས་དྲི་མ་མེད་པ་ཞེས་བྱ་བའི་རླུང་འཕྲོས་ནས་ཤ་དང་ཚིལ་གྱི་ཆ་ཤས་ཕལ་ཆེར་ཆགས་པར་བྱེད། བཅུ་དགུ་པ་ལ་ཤིན་ཏུ་ཕྲ་བ་ཞེས་བྱ་བའི་རླུང་འཕྲོས་ནས་ཆུ་བ་ཆེ་ཆུང་དང་རྒྱུས་པའི་རང་བཞིན་རྣམས་ཆགས་སོ། །ཉི་ཤུ་པ་ལ་ཤིན་ཏུ་བརྟན་པ་ཞེས་བྱ་བའི་རླུང་འཕྲོས་ཏེ་རུས་པའི་བྱེ་བྲག་རྣམས་དང་རྐང་མར་གྱི་དབྱིབས་རྣམས་ཆགས་པར་བྱེད་དོ། །ཉི་ཤུ་རྩ་གཅིག་པ་ལ་ཡང་དག་པར་བསྐྱེད་པ་ཞེས་བྱ་བའི་རླུང་འཕྲོས་ཏེ་ཕྱིའི་པགས་པ་འོ་མ་བསྐོལ་བའི་སྤྲིས་མ་ལྟ་བུས་གཡོགས་པར་འགྱུར་རོ། །དེ་ནས་ཟླ་བ་དྲུག་པ་ལ་སྔ་མའི་ཞག་གཉིས་དང་ཕྱི་མའི་ཞག་གསུམ་བསྣན་པས་བདུན་ཕྲག་ལྔ་འབྱུང་བ་ལས་གོང་དུ་བརྩེགས་པའི་བདུན་ཕྲག་རྩ་གཉིས་པ་ལ་ཀུན་དུ་རྒྱལ་བ་ཞེས་བྱ་བའི་རླུང་འཕྲོས་ནས་དབང་པོ་ལྔ་དང་བཅས་པའི་སྒོ་དགུའི་བུ་ག་རྣམས་སོ་སོར་རྣམ་པར་བྱེ་བར་འགྱུར་རོ། །རྩ་གསུམ་པ་ལ་ཡོངས་སུ་ཡང་དག་པར་འཛིན་པ་ཞེས་བྱ་བའི་རླུང་བྱུང་སྟེ་སྐྲ་དང་བ་སྤུ་དང་སེན་མོའི་དབྱིབས་སྐྱེ་བ་ཡིན་ནོ། རྩ་བཞི་པ་ལ་ཀུན་དུ་འཕྱོ་བ་ཞེས་བྱ་བའི་རླུང་བྱུང་སྟེ་སྔར་ཆགས་པའི་སྣོད་རྣམས་གསལ་བར་སྨིན་ནོ། །དེའི་དུས་སུ་ཚོར་བ་ཉམས་སུ་མྱོང་བའི་དོན་གྱིས་བདེ་བ་དང་སྡུག་བསྔལ་གྱི་འདུ་ཤེས་ཀྱང་ཤེས་པར་འགྱུར་རོ། །རྩ་ལྔ་པ་ལ་གྲོང་ཁྱེར་འཛིན་པ་ཞེས་བྱ་བའི་རླུང་འཕྲོས་ནས་བུ་ག་རྣམས་ལས་རླུང་གི་རྒྱུ་བ་ཡང་འབྱུང་བ་ཡིན་ནོ། །རྩ་དྲུག་པ་ལ་སྐྱེ་བ་མངོན་པར་གྲུབ་པ་ཞེས་བྱ་བའི་རླུང་འཕྲོས་ནས་སེམས་ཀྱི་དྲན་པ་རབ་ཏུ་གསལ་བ་ཞིག་འབྱུང་བ་ཡིན་ཏེ། སྔོན་གྱི་ཚེ་རབས་ཀྱང་རྗེས་སུ་དྲན་པར་བྱེད་དོ། །དེ་ནས་ཟླ་བ་བདུན་པ་ལ་བདུན་ཕྲག་བཞི་ཡོད་པ་ལས་གོང་དུ་བརྩེགས་པའི་བདུན་ཕྲག་རྩ་བདུན་ནས་རྩ་བརྒྱད་རྩ་དགུ་སུམ་ཅུའི་བར་དུ་རིམ་པ་བཞིན་གྱིས་སྨན་ཡོན་ཆེན་པོ་དང་མེ་ཏོག་འཛིན་པ་དང་མེ་ཏོག་ཕྲེང་བ་དང་ལྕགས་ཀྱི་སྒོ་ཞེས་བྱ་བའི་རླུང་འཕྲོས་ནས་སྔར་ཇི་ལྟར་ཆགས་པ་ཐམས་ཅད་ཀྱང་མངོན་པར་གསལ་ཞིང་ཆ་ཤས་ཕྲ་མོ་རྣམས་ཀྱང་གྲུབ་སྟེ་ཡོངས་སུ་རྫོགས་པར་འགྱུར་རོ། །ཟླ་བ་བརྒྱད་པ་ལ་ཕྱི་མའི་ཞག་ལྔ་བསྣན་པས་བདུན་ཕྲག་སོ་གཅིག་ནས་སོ་གཉིས་སོ་གསུམ་སོ་བཞི་སོ་ལྔ་པའི་བར་དུ་མེ་ཏོག་སྡུད་པ་ཞེས་བྱ་བའི་རླུང་གཅིག་པུས་ཐམས་ཅད་ཆེས་ཆེར་འཕེལ་བར་བྱེད་དོ། །དེའི་ཚེ་ཁ་ཟས་ཀྱི་བཅུད་ཆེ་ཆུང་གི་དབང་གིས་མ་དང་བུ་ཚ་དེ་གཉིས་ཐེངས་རེ་མོས་ཀྱི་གཟི་མདངས་འཕོ་བར་འགྱུར་ཏེ། རེས་འགའ་ནི་མ་གཟི་མདངས་ཆེ་ལ་བུ་ཆུང་བ་དང༌། རེས་འགའ་ནི་བུ་གཟི་མདངས་ཆེ་བ་ལ་མ་ཆུང་བར་བྱེད་དོ། །དུས་འདིར་ཕལ་ཆེར་བཙའ་བའི་སྐབས་མེད་མོད། འོན་ཀྱང་རྐྱེན་འགའ་ཞིག་གིས་སྐྱེ་བར་ཡང་སྲིད་པས། གལ་ཏེ་མ་གཟི་མདངས་ཆེ་བའི་སྐབས་སུ་སྐྱེས་ན་མ་འཚོ་ཡང་བུ་འཆི་ལ། བུ་གཟི་མདངས་ཆེ་བའི་སྐབས་སུ་སྐྱེས་ན་བུ་འཚོ་ཡང་མ་འཆི་བར་གསུངས་ཤིང་སྐབས་འདིར་མངལ་གྱི་ལུས་ཅན་དེའི་དབང་གིས་མ་ལ་ནད་སྣ་ཚོགས་པ་འབྱུང་ཞིང་དེའི་གསོ་ཐབས་དང་བཅས་པ་བརྒྱད་པ་རྩ་འགྲེལ་དུ་ཞིབ་པར་བཤད་ཡོད་ནའང་མང་བར་དོགས་ནས་མ་སྨོས་ལ། སྤྲོས་པ་ལ་དགའ་ཞིང་རྣམ་དཔྱོད་དང་ལྡན་པ་རྣམས་དེར་བལྟ་བར་བྱའོ། །དེ་ལྟར་བཤད་པའི་སྐབས་འདི་ཉིད་ལ་མངལ་དུ་གནས་པའི་ལུས་ཀྱི་དབང་པོ་རྣམས་རིམ་པར་དོད་ནས་མི་གཙང་བའི་རོ་ཟ་བའི་དབང་གིས་ཕག་གི་གནས་སྐབས་སུ་གསུངས་པ་ཡིན་ནོ།།

དེ་ནས་ཟླ་བ་དགུ་པ་ལ་ཞག་ལྔ་གོང་དུ་བཅད་པའི་རྗེས་སུ་བདུན་ཕྲག་གསུམ་ལྷག་ཡོད་པ་ལས་གོང་དུ་བརྩེགས་པའི་བདུན་ཕྲག་སོ་དྲུག་པའི་ཉིན་ཞག་དང་པོ་ནས་བཟུང་སྟེ་རང་གི་གནས་ལ་མི་གཙང་བ་དང་དྲི་མི་ཞིམ་པ་དང༌། བཙོན་ར་ལྟ་བུ་དང༌། མུན་ནག་དང༌། མངོན་པར་མི་དགའ་བ་སྟེ་སྐྱོ་བའི་འདུ་ཤེས་ལྔ་ཡིད་ལ་འབྱུང་བས་གནས་གཞན་དུ་འཕོ་བར་འདོད་པ་དང༌། སོ་བདུན་པ་ལ་ཕོ་མོའི་དབང་གིས་ཕ་མ་ལ་ལོག་པའི་འདུ་ཤེས་ཆགས་སྡང་གི་སེམས་སྐྱེ་བར་འགྱུར་བར་བཤད་ནའང་འདོད་པའི་ཆགས་སྡང་གི་འདུ་ཤེས་མངལ་དུ་ཞུགས་དུས་སྐྱེས་ཟིན་པས་འདིར་ནི་མགོ་མཇུག་ལོག་པའི་འདུ་ཤེས་སོ། །སོ་བརྒྱད་པ་ལ་ཐོགས་པའི་རྐྱེན་ཞེས་བྱ་བའི་རླུང་འཕྲོས་ནས་མགོ་འཇུག་ལོག་སྟེ་མངལ་གྱི་ཕུགས་ནས་སྒོར་འབྱིན་ཞིང་བཙའ་བ་ལ་མངོན་དུ་ཕྱོགས་པར་འགྱུར་རོ། །འོན་ཀྱང་དུས་འདིར་བཙའ་བར་མི་ནུས་པའི་རྒྱུ་གསུམ་ཡོད་དེ། མའི་ལུས་ལ་ཁྲག་མང་དུ་ཟགས་པ་ན་མངལ་གནས་ཀྱི་ལུས་འཕེལ་བར་མི་ནུས་པས་མི་བཙའ་བ་དང༌། བུད་མེད་དེའི་ལུས་ཧ་ཅང་ཚོ་ཆེས་པ་ཡང་མངལ་གྱི་སྒོ་ཆེར་རྒྱས་པར་འགྱུར་བས་ཟླ་བ་དགུ་ཚང་ཡང་བཙའ་བ་དཀའ་བ་དང༌། ཐུར་སེལ་རླུང་འཁྱིམས་པ་དག་གིས་ཀྱང་དཀུ་སྟེ་མངལ་གྱི་སྒོ་ནས་བཀག་པས་ཟླ་བ་མ་རྫོགས་བར་དུ་མི་བཙའ་བར་ཚང་ཡང་འགོར་བ་སྟེ། དེ་ལྟ་བུའི་རྐྱེན་གསུམ་གྱིས་གེགས་བྱེད་པ་དག་ཀྱང་ཡོད་དོ། །དེ་ལྟར་བཤད་པ་དེ་རྣམས་ཟླ་བ་བཅུ་དང༌། བཅུ་གཅིག་བཅུ་གཉིས་རྣམས་སུ་བཙའ་ན་ལེགས་པར་བཙས་པ་ཞེས་བྱ། འགའ་ཞིག་ལོ་རྫོགས་ནས་ཀྱང་མི་བཙའ་བའི་སྐབས་ཡོད་པས་དེ་ནི་མ་བུ་གཉིས་ཀའི་ལས་ཀྱི་རྣམ་པར་སྨིན་པ་འགའ་ཞིག་ལས་འབྱུང་བ་ཡིན་པས་ལེགས་པར་བཙས་པ་མ་ཡིན་ནོ། །འོན་ཀྱང་རྒྱལ་བུ་དོན་འགྲུབ་ཀྱི་སྲས་སྒྲ་གཅན་འཛིན་ལྟ་བུ་ཡབ་ཡུམ་གྱི་ལྷུམས་སུ་ལོ་དྲུག་བཞུགས་ཏེ་གདོད་འཁྲུངས་པ་མདོ་ལས་གསུངས་སོ།།

དེ་ནས་སྐྱེ་བ་ནི། དགའ་བོ་མངལ་འཇུག་ལས། དགའ་བོ་དེ་ལྟ་བུའི་ལུས་དེ་ཡང་གལ་ཏེ་ཕོ་ཡིན་ན་ནི་མའི་མངལ་གྱི་གཡས་ཕྱོགས་སུ་ཙོག་པུར་འདུག་ལ་ལག་པ་གཉིས་ཀྱིས་གདོང་པ་ལ་གཡོགས་ནས་མའི་སྒལ་ཚིགས་ལོགས་སུ་བལྟས་ཏེ་འདུག་གོ །གལ་ཏེ་མོ་ཡིན་ན་ནི་རྩིབ་ལོགས་གཡོན་ཕྱོགས་ན་ཙོག་པུར་འདུག་ལ་ལག་པ་གཉིས་ཀྱི་གདོང་པ་ལ་གཡོགས་ཏེ་མའི་ལྟོ་བ་ལ་ཁ་བལྟས་ནས་མ་ཞུ་བའི་གནས་ཀྱི་འོག་ཞུ་བའི་གནས་ཀྱི་སྟེང་ན་ནང་དུ་བཙོས་རབ་ཏུ་བཙོས་ཤིང་གནས་ལྔ་ཀུན་དུ་བཅིངས་པས་འདི་ལྟ་སྟེ། དཔེར་ན་རྩའི་རྐྱལ་པའི་ནང་དུ་འདུག་པ་དང་འདྲའོ་ཞེས་པ་དང༌། སློབ་དཔོན་གྱིས། ཟླ་དགུ་འདས་ནས་སྣུམ་བཅས་པའི། །འབྲས་ཆན་ཤ་ཁུ་བླུད་པ་བསྔགས། །སྣུམ་མངས་ནས་ཐུག་སྦྱིན་པའམ། །སྔར་བཤད་པ་ཡི་འཇམ་རྩི་བཏང༌། །དེ་ཉིད་ལ་བཅུག་རས་བལ་ནི། །མཚན་མར་རྟག་ཏུ་གཞུག་པར་བྱ། །རླུང་འཇོམས་འོ་མ་བསྐོལ་བའི་ཆུ། །གྲངས་པས་ཉིན་རེ་བཀྲུས་ན་ཕན། །ཟླ་དགུ་ཕན་ཆད་ལུས་ལ་ནི།། སྣུམ་མེད་པར་ནི་མི་བཞག་གོ །ནུ་ཞོ་གཡས་པ་སྔར་འབྱུང་ཞིང༌། །གཡས་ལོགས་ལ་ནི་བརྟེན་པ་དང༌། །འདྲི་ཚིག་སྐྱེས་པའི་མིང་ཅན་སྨྲ། །དགའ་ཞིང་རྨི་ལམ་སྐྱེས་པ་མཐོང༌། །དཀུ་ནི་གཡས་པ་མཐོ་བ་དང༌།  །མངལ་ཡང་ཀུན་ནས་ཟླུམ་པ་དག །བུ་སྐྱེ་གཞན་དུ་བུ་མོར་འགྱུར། །གང་ཡང་སྐྱེས་པ་འཕྲད་འདོད་དང༌། །གླུ་གར་རོལ་མོ་ལ་དགའ་དང༌། །དྲི་དང་ཕྲེང་ཆགས་བུ་མོར་སྐྱེ། །དེ་འདྲེས་པ་ནི་མ་ནིང་འགྱུར། །དཀུ་ཡི་དབུས་ནི་མཐོ་བ་དང༌། །མཚེ་མ་ལོགས་གཉིས་མཐོ་བ་དང༌། །ལྟེ་བ་དམའ་བར་འདུག་པ་ཡིན། །ཞེས་གསུངས་པ་ཡིན་ནོ།།

དེ་ཡང་གོང་དུ་བཤད་པ་དེ་ལྟར་མངལ་དུ་ལུས་འཕེལ་ཞིང་སྨིན་པར་འགྱུར་བ་དེའི་ཚེ་ཟླ་བ་དགུ་པའི་མཇུག་གི་ཞག་ལྔ་ཡང་འདས་ནས་ངོ་བཅུ་ལ་ཟིན་པ་ན་བཙའ་བའི་དུས་ཡིན་ཏེ། དེ་ཡང་མའི་གཡས་ལོགས་ལ་བརྟེན་པའི་དབང་གིས་དཀུ་སྟེ་མངལ་གྱི་གཡས་ཕྱོགས་ཅུང་ཟད་མཐོ་ཞིང་ལུས་རང་བཞིན་གྱི་ཡང་བ་དང༌། རྨི་ལམ་དག་ནའང་སྐྱེས་པ་མང་དུ་མཐོང་ཞིང་འདོད་པ་མི་སྐྱེ་བ་དང༌། ནུ་མའི་ཞོ་ཡང་གཡས་པ་སྔ་བར་འབྱུང་ཞིང་འཛག་པ་རྣམས་ནི་ཁྱེའུ་སྐྱེ་བའི་རྟགས་ཡིན་ཏེ། །ཐབས་ཀྱི་ཆ་ཤས་རྣམས་མངོན་དུ་གྱུར་པའི་དབང་གིས་སོ། །ཡང་སྐྱེས་པ་དང་ཕྲད་ན་འཁྲིག་པར་འདོད་ཅིང༌། གླུ་གར་དང་ལུས་ཀྱི་རྒྱན་རྣམས་ལ་ལྷག་པར་དགའ་བ་སོགས་གོང་གི་རྟགས་རྣམས་ལས་ཕལ་ཆེར་གོ་ལྡོག་པ་ནི་བུ་མོ་སྐྱེ་བའི་རྟགས་ཡིན་ཏེ། ཤེས་རབ་ཀྱི་ཆ་རྣམས་མངོན་དུ་དམིགས་པའི་ཕྱིར་རོ། །དེ་དག་ལྟ་བུའི་རྟགས་ཕལ་ཆེར་འདྲེས་ཤིང་ལྷག་པར་མངལ་གྱི་དབུས་མཐོ་བ་ལས་ནི་མ་ནིང་འབྱུང་བར་འགྱུར་ཏེ་ཐབས་ཤེས་གཉིས་ཀ་མ་ཡིན་པའམ་འདྲེས་པའི་རྟགས་དང་ལྡན་པའི་དབང་གིས་སོ། །ཡང་རྟགས་གཞན་རྣམས་ཇི་ལྟར་གྱུར་ཀྱང་ལྟོ་བའི་དབུས་དམའ་ཞིང་མཐའ་གཉིས་མཐོ་བ་ན་མཚེ་མར་སྐྱེ་བར་འགྱུར་རོ།།

རྟགས་དེ་རྣམས་དང་ལྡན་པ་དེ་ནས་བྱིས་པ་མྱུར་དུ་བཙའ་བའི་རྟགས་ལུས་སྙོམ་པ་སྟེ་ཁམས་མྱོགས་ཤིང་དཀུ་ལྷོད་པ་སྟེ་མངལ་གྱི་སྒོ་ཕྱིར་ལུག་པ་དང༌། ལུས་ཀྱི་སྨད་ལྷག་པར་ལྕི་ཞིང༌། ཚང་ར་དང་མཁལ་མ་རྐེད་པ་ཀོ་ལེར་ན་བ་དང༌། ལྟོ་བ་དང༌། ཆུ་སོ་ཡང་གཡའ་བ་དང༌། ཚ་བ་སོགས་ཀྱིས་ན་ཞིང་དེ་ཡང་ལྡང་དུབ་བྱེད་པ་དང༌། མཚན་མ་ལུག་ཅིང་ཁ་ཆེར་བྱེ་བ་དང༌། གཅིན་མང་ཞིང་དབང་མེད་དུ་ཚང་ར་ལ་ནད་ཟུག་ལྡང་བར་འགྱུར་རོ། །དེའི་ཚེ་བུད་མེད་སྔར་བུ་བཙའ་བའི་སྡུག་བསྔལ་ཉམས་སུ་མྱོང་བ་འགའ་ཞིག་གིས་བསྐོར་ཞིང༌། ཉལ་ལུགས་དང་བཙིར་བ་ལ་སོགས་པའི་བསླབ་བྱ་དང་ལྡན་པས་བཙའ་བར་བྱའོ། །དེ་ལྟར་སྲོག་དང་འབྲལ་འདྲ་བའི་ནད་ཀྱིས་བྱིས་པ་བཙའ་པའི་སྡུག་བསྔལ་དྲག་པོ་མི་བཟད་པ་དེ་ལས་ཐར་ཞིང་གསོས་པ་སྟེ། སྐྱེས་ཟིན་ནས་སྟོབས་ཉམས་པ་དག་ཁ་ཟས་དྲོ་ཞིང་བཅུད་པའི་ཚས་ཀྱིས་འབད་དེ་གསོ་བར་བྱའོ་ཞེས་གསུངས་པ་ཡིན་ནོ།།

བཙས་ཚུལ་དེ་ཡང་དགའ་བོ་མངལ་དུ་འཇུག་པ་ལས་ཀྱང་འདི་ལྟར་གསུངས་ཏེ། གཞན་ཡང་ཁ་ཐུར་དུ་བལྟ་བ་ཞེས་བྱ་བའི་རླུང་འབྱུང་སྟེ། དེའི་མགོ་བོ་ཐུར་དུ་བལྟ་ཞིང་ལག་པ་གཉིས་ཀ་བརྐྱང་སྟེ་མཐར་གྱིས་འབྱུང་བར་འདོད་པར་འགྱུར་རོ། །མངལ་ན་གནས་པ་དེ་གལ་ཏེ་ཚེ་རབས་སྔ་མ་ལ་མངལ་དུ་འཆི་བར་འགྱུར་བའི་ལས་བསགས་པ་ཞིག་ཡིན་ན་ནི། དེའི་ལག་པ་དང་རྐང་པ་བསྣོལ་མར་གྱུར་ནས་བསྒྱུར་མི་ནུས་པས་སྡིག་པ་མི་དགེ་བའི་ལས་ཀྱི་རྐྱེན་གྱིས་མའི་མངལ་ཉིད་དུ་འཆི་བའི་དུས་བྱེད་པར་འགྱུར་རོ། །དེའི་མ་ཡང་དེའི་ཚེ་སྡུག་བསྔལ་ཆེན་པོ་མྱོང་བའམ་ཡང་ན་འཆི་བའི་དུས་བྱེད་པར་འགྱུར་རོ། །གལ་ཏེ་ཚེ་རབས་སྔ་མ་ལ་དགེ་བའི་ལས་རྣམས་མངོན་པར་འདུ་བྱས་ཤིང་ཚེ་རིང་པོར་འགྱུར་བའི་རྒྱུ་བསགས་པ་ཞིག་ཡིན་ན་ནི། བཙས་སུ་ཉེ་བའི་ཚེ་མ་བུ་གཉིས་ཀ་རབ་ཏུ་བདེ་ཞིང་སྡིག་པ་མི་དགེ་བའི་ལས་ཀྱི་སྡུག་བསྔལ་གོང་མ་ལྟ་བུ་དེ་མེད་མོད། ཞག་བདུན་ཕྲག་སུམ་ཅུ་རྩ་བརྒྱད་འདས་ནས་མངལ་ནས་འབྱུང་བར་འདོད་པའི་ཚེ་སྡུག་བསྔལ་སྣ་ཚོགས་མྱོང་ནས་གདོད་འབྱུང་བར་འགྱུར་བའི་ཕྱིར། ལུས་འདི་ལྟ་བུ་ལེན་པ་འདི་ནི་ཡང་དག་པར་སྡུག་བསྔལ་ཆེན་པོ་ཡིན་པར་རིག་པར་བྱའོ། །དང་པོ་མངལ་ནས་འབྱུང་བའི་ཕྱིར་ཁྱེའུ་འམ་བུ་མོ་ཡང་རུང་སྟེ་ས་ལ་ལྷུངས་མ་ཐག་ཏུ་ལག་པས་བཟུང་ངམ་གོས་ཀྱིས་བླངས་སམ། ཁྲི་ལ་བཞག་གམ། ཁང་པའི་ནང་དུ་བཞག་གམ། ས་ལ་བཞག་གམ། བླ་གབ་མེད་པར་བཞག་གམ། ཉི་མ་ལ་བཞག་གམ། དགུན་ནམ་དབྱར་གྱི་དུས་སུ་གྲང་བའམ་ཚ་བའི་རླུང་གིས་བཙས་མ་ཐག་པའི་ལུས་དེ་ལ་རེག་པར་གྱུར་ནའང་སྡུག་བསྔལ་ཆེན་པོ་མྱོང་བར་འགྱུར་ཏེ། འདི་ལྟ་སྟེ་དཔེར་ན་བ་ལང་གསོན་པོར་བཤུས་པ་རྩིག་པ་ལ་རེག་གམ་བླ་གབ་མེད་པའི་ཐང་ལ་ལྷུང་བར་གྱུར་ན་སྲོག་ཆགས་དག་གིས་ཟ་བར་འགྱུར་བའམ། གཞན་ཡང་འདི་ལྟ་སྟེ་དཔེར་ན། མི་ཞིག་ལ་སྦྲང་བུ་མཆུ་རིང་རྣམས་ཀྱིས་ཟ་བའམ། ལྕགས་ཀྱིས་བཞུས་པ་བཞིན་དུ་དང་པོ་མངལ་ནས་འབྱུང་བའི་ཚེ་ཆུ་དྲོན་མོ་དག་གིས་ལུས་བཀྲུས་པས་རེག་པའི་སྡུག་བསྔལ་མྱོང་བ་ཡང་དེ་དང་འདྲའོ་ཞེས་དང༌། གཞན་ཡང་དགའ་བོ་དང་པོ་མངལ་ནས་འབྱུང་བ་ནས་ཞག་བདུན་ལོན་པ་དང་སྲོག་ཆགས་སྲིན་བུའི་རིགས་སྟོང་ཕྲག་བརྒྱད་ཅུ་ལུས་ལ་གནས་ཤིང་དེ་ལ་ཟ་བར་བྱེད་དོ་ཞེས་བྱ་བ་ལ་སོགས་པ་སྲིན་བུའི་མིང་རེ་དང་བཅས་ཏེ་རྒྱས་པར་གསུངས་པ་དག་ཡོད་ཅེས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དུམ་བུ་གཉིས་པ་བཤད་པའི་རྒྱུད་ཀྱི་ལུས་ཀྱི་ཆགས་ཚུལ་བསྟན་པའི་ལེའུ་སྟེ་གཉིས་པའོ།། །།

མཐའ་མའི་འདོན་ཐེངས་།: 05.09.2023 ཉིན། 9:41 AM