ལེའུ་སུམ་ཅུ་པ། གསོ་ཐབས་དངོས་བསྟན་པ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །ཁྱད་པར་ཉེས་པ་གསུམ་པོ་སོ་སོར་བཅོས་པ་ནི། །

དང་པོ་ཚ་གྲང་གཉིས་ཟུང་དུ་འཇུག་པའི་རླུང་རྐྱང་པ་གསོག་ལྡང་གཉིས་ཀ་ལ་ཏིལ་མར་མཆོག་ཡིན་ཏེ། །བུ་རམ་ཆང་དང་མར་རྙིང་ལུག་ཤ་ཡིབ་མ་དང་། །འཕྱི་བ་རྟ་བོང་མི་ཤ་སྒོག་བཙོང་སོགས། །ལྕི་སྣུམ་འཇམ་དྲོའི་ཟས་ཀྱིས་བཅོས་པར་བྱ། །

གཉིས་པ་སྤྱོད་ལམ་ནི་མུན་ཁུང་དྲོ་བའི་གནས་སུ་བསྡད། །ཡིད་དུ་འོང་བའི་ཚིག་སྙན་གཉིད་ལོག་ཏུ་བཅུག་ཅིང་གོས་དྲོན་མོ་བགོ། །

གསུམ་པ་སྨན་དུ་རུས་བཅུད་སྲེ་ལོང་སོག་ཡུ་དང་གཞུག་ཆུང་གསུམ་གྱི་ཁུ་བ་དང༌། །ལུག་མགོ་རྙིང་པའི་མགོ་འཁྲོལ་སྦྱོར་བ་བྱ། །ཤ་མར་བུ་རམ་ཆང་བཅུད་བཞིའི་ཐང་དང་སྒ་དང་རྒྱམ་ཚྭ་ཤིང་ཀུན་གསུམ་ཐང་བཏང༌། །ཕྱེ་མ་ཛཱ་ཏི་དང་ཤིང་ཀུན་ཅུར་ནིས་ཕྱི་རྒྱུད་ལྟར་བསྟེན། །མན་རྒྱུད་ལྟར་དཀར་འདོན་དང་ཤ་འདོན་དང་སྒོག་འདོན་དང་སྐྱུར་འདོན་དང༌། །ཛཱ་ཏི་དང་སྒོག་སྐྱ་དང་བཙན་དུག་དང་རུས་ཆེན་དང༌། །ཕྱི་རྒྱུད་ལྟར་འབྲས་བུ་གསུམ་དང་རྩ་བ་ལྔའི་སྨན་མར་སྦྱར། །མདོར་ན་མངར་སྐྱུར་ལན་ཚྭ་སྣུམ་དྲོས་བཅོས། །ཁྱད་པར་མར་རྙིང་དྲོད་ཀྱི་འཇམ་རྩི་བསྔགས། །

བཞི་པ་དཔྱད་དུ་ལོ་མར་རྙིང་པའི་བསྐུ་མཉེ་བྱ། །སྣུམ་ལྡན་དུགས་ཀྱིས་གཟེར་བའི་གནས་སུ་བདུག །སྤྱི་གཙུག་ལ་སོགས་རླུང་གསང་མེ་ཡིས་མནན་ནོ། །

དང་པོ་མཁྲིས་པ་རྐྱང་པའི་ནད་ལ་མར་གསར་མཆོག་ཡིན་ཏེ། །བ་ལང་རི་དྭགས་ཤ་གསར་ཆུ་བསིལ་ཇ། །བ་རའི་ཞོ་དར་ཁུར་སྐྱབས་དང་རྒྱ་ཁུར་ཚོད་མ་དང༌། །ཆག་ཚེ་ཕྱེ་ཐུག་བསིལ་བའི་ཟས་ཀྱིས་བཅོས། །

གཉིས་པ་སྤྱོད་ལམ་བསེར་བུ་ཤིང་གྲིབ་ནིའུ་གསིང་བསྟེན། །ཆུ་འགྲམ་བསིལ་གནས་མ་འཁྲུགས་དལ་བར་བསྡད། །དྲི་བཟང་བསིལ་ཞིང་ཡིད་དུ་འོང་བས་བྱུག །

གསུམ་པ་བསིལ་བའི་སྨན་དུ་སྔོ་སྨན་ཐང་སྨན་རྩི་སྨན་ཐུན་མོང་གསུམ། །ཚ་བ་ཆེ་ན་ག་བུར་སྦྱོར་བ་དང་འབྲིང་ན་ཙན་དན་དང་ཐ་མར་གི་ཝཾ་ཚ་བའི་སྟོབས་དང་སྦྱར། །མདོར་ན་མངར་བ་དང་ཁ་བ་བསྐ་བ་བསིལ་བའི་སྨན་གྱིས་བཅོས། །ཁྱད་པར་མངར་བའི་བཤལ་གྱིས་སྦྱང་བ་བསྔགས། །

བཞི་པ་དཔྱད་དུ་རྔུལ་དབྱུང་ཆུ་ཡི་འཕྲུལ་འཁོར་བསྐོར། །གང་རྒྱས་རྩ་ལ་གཏར་ཞིང་ཆུ་གྲང་དང་རྡོ་གྲང་དང་ལྕགས་སྦྱང་མའི་བསིལ་གྱིས་བདུག་གོ། །

དང་པོ་བད་ཀན་རྐྱང་པའི་ནད་ལ་སྦྲང་རྩི་མཆོག་ཡིན་ཏེ། །ཉ་ཤ་དང་ལུག་ཤ་དང་བྱང་འབྲོང་གཡག་རྒོད་གཡི་དང་བྱ་རྒོད་ཤ །འབྲུ་རྙིང་ཟན་དྲོན་ཡོས་ཀྱི་ཆང་ནར་ཕྱིན་པ་དང༌། །ཆུ་སྐོལ་སྒ་སྐྱ་བཏབ་བའི་ཆུ་ལ་སོགས་ཡང་ཞིང་རྩུབ་པ། །དྲོ་ལ་ཆུང་བའི་ཟས་ཀྱིས་བཅོས་པར་བྱ། །

གཉིས་པ་སྤྱོད་ལམ་མེ་ཉིས་སྲོ་ཞིང་གོས་དྲོར་གཡོག །སྐམ་སར་ལུས་སེམས་རྩོལ་སྤྱད་གཉིད་མི་ལོག །

གསུམ་པ་སྨན་ལ་ལན་ཚྭ་དང་གཞན་ཡང་རོ་ནུས་ཚ་བའི་བསྡུས་ཐང་བཏང༌། །ཕྱེ་མ་སེ་འབྲུ་དྭ་ལིས་སྦྱོར་བ་ཐལ་སྨན་སྦྱར། །མདོར་ན་ཚ་སྐྱུར་ཡང་རྩུབ་རྣོ་བ་བསྟེན། །ཁྱད་པར་རྣོ་ལ་རྩུབ་པའི་སྐྱུགས་སྨན་བསྔགས། །

བཞི་པ་དཔྱད་དུ་ལན་ཚྭ་རྔོས་མ་དང་བོང་བ་དང་གཡི་སྤྱང་སོགས་ཀྱིས་སྤུ་དུགས་བསྟེན། །བང་ཀན་ཤིན་ཏུ་རྒྱས་ལ་མེ་བཙའ་དང་ཐུར་མ་ཡང་བྱ། །

མདོར་བསྡུ་ན་རླུང་ནད་འཇམ་རྩི་དང་ཟས་སྨན་བཅུད་ཀྱིས་བཅོས། །མཁྲིས་པའི་ནད་རྐྱང་པ་ལ་བཤལ་དང་སྨན་སོགས་བསིལ་གྱིས་བཅོས། །བད་ཀན་ནད་རྐྱང་པ་ལ་སྐྱུགས་དང་ཟས་སོགས་དྲོད་ཀྱིས་བཅོས། །རླུང་དང་མཁྲིས་པར་ལྡན་ལ་ཤ་གསར་དང་མར་གསར་སོགས་བསིལ་བཅུད་བསྟེན། །བད་མཁྲིས་ལྡན་པ་ལ་འབྲུ་རྙིང་དང་སྐོམ་པོ་ཤ་དང་ཕག་ཤ་དང་ཆག་ཚེ་མཛོ་མོ་ཞོ་སོགས་བསིལ་ལ་ཡང་བས་བཅོས། །བད་རླུང་ལྡན་པ་ལ་ལུག་ཤ་དང་ཆང་དང་མར་རྙིང་སོགས་དྲོ་ལ་བཅུད་པས་བཅོས། །འདུས་པའི་ནད་ལ་རི་དྭགས་ཤ་དང་རྟོལ་ཤ་དང་མཛོ་ཞོ་སོགས་བསིལ་བཅུད་ཡང་བས་བཅོས། །མདོར་བསྡུས་ཚ་བ་ཐམས་ཅད་མཁྲིས་ནད་ལྟ་བུ་བསིལ་གྱིས་བཅོས། །གྲང་བའི་ནད་གཞི་ཐམས་ཅད་བད་ཀན་ལྟར་དྲོད་ཀྱིས་བཅོས། །རླུང་ནི་ཚ་གྲང་གང་དང་འབྲེལ་ཡང་རླུང་རང་གི་གཉེན་པོ་སྣུམ་དྲོས་བཅོས། །ཞེས་གསུངས་སོ། །

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གསོ་ཐབས་དངོས་བསྟན་པའི་ལེའུ་སྟེ་སུམ་ཅུ་པའོ། །དེ་ལྟར་ལེའུ་བཞི་ནི་གསོ་བྱེད་ཐབས་ཀྱི་གནས་ཏེ་བཅུ་པའོ།།

མཐའ་མའི་འདོན་ཐེངས་།: 28.05.2019 ཉིན། 12:48 PM