ལེའུ་ཉེར་ལྔ་པ། ངན་གཡོ་སྐྱོན་བརྟག

 དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །ངན་གཡོ་སྐྱོན་གྱི་སྒོ་ནས་བརྟག་པ་ནི། །སྨན་པ་རང་གིས་ནད་ཀྱི་མཚན་ཉིད་ཤེས་པར་བྱ་བ་དང་མཚང་འབྲུ་བ་དང་དེ་དུས་བསྲིང༌། །སྔར་རྗེས་བཅད་དང་བཅུད་ལ་བོར་བ་དང༌། །ཁ་བཅིང་བ་དང་སྤོ་ལ་གདོན་པ་དང་ཐབས་འོག་གཞུག་པ་རྣམས་ལས། །དང་པོ་ནད་ཀྱི་མཚན་ཉིད་ཤེས་པར་བྱ་བ་ནི། །ནད་ཀུན་སྤྱི་དང་ཁྱད་པར་གྱི་རྟགས་ཐབས་ཤེས་པས། །ནད་པས་འདི་ན་ཙམ་ལས་སྨན་པས་འཚོ་འཆི་འདི་འོང་ཞེས་རྟོགས་པར་འགྱུར་བ་ཞིག་དགོས་པས། །དེ་ཕྱིར་རྟགས་ཐབས་འདི་ལ་གོམས་ཤིང་འདྲིས་པ་ཤིན་ཏུ་གཅེས་སོ། །དེ་ཡང་དཔེར་ན་རིན་ཆེན་ལ་སོགས་བཟང་ངན་ཤེས་པ་ཡང༌། །དཔྱད་དོན་བསྟན་བཅོས་ཁོ་ནས་ཤེས་དགོས་པ་དེ་མ་ཡིན་པ་དེ་མེད་ན་ཤེས་པར་ཡང་མིན་ཏེ་གཞུང་དོན་ཤེས་པ་དང་མྱོང་གོམས། །མཚང་འབྲུ་བའི་ཕོ་ཉ་སྨན་པ་དགོས་པས་འབྲེལ་བ་བྱས་ཏེ་དེ་ལ་མ་འོང་པའི་ཐབས་ཀྱི་ཕྱིར་དུ། །གཏམ་གཞན་དང་སྲེས་ཏེ་ཅི་ན་ཇི་ལྟར་ན་སྨན་གང་བཏང་སྨན་པ་སུ་ཡིན་དང༌། །ནད་ཕོག་ནས་ཞག་གྲངས་སོགས་དྲིས་ལ་དཔྱད་པས་སྨན་པ་སྔ་མ་སོགས་ནད་པས་མི་སྨྲ་ཡང་རང་གིས་མངོན་པར་ཤེས་པ་ལྟ་བུའི་སྙན་པ་འབྱུང་ངོ་། །

དུས་བསྲིང་བ་ནི་ནད་པའི་རྩར་སླེབས་ན་རིངས་སྟབས་མ་ཡིན་པར་ཐང་ཅིག་ལ་རྩ་ཆུ་སོགས་ལ་བལྟ་བར་བྱས་ཏེ་གནས། །དེ་བར་རང་གི་ལུས་ངག་མ་ཡེངས་པ་བཞིན་དུ་གཞན་གྱིས་གཏམ་སྨྲ་བ་ལའང་དཔྱད་དོ། །

སྔར་རྗེས་བཅད་པ་ནི་སྔ་གོང་གཏར་བ་དང་བསྲེག་པ་དང་སྨན་སྦྱོར་ཅི་བྱས་ཐབས་ཀྱི་ཡུལ་མི་སོགས་ལ་དྲི་ཞིང་བཙལ། །གཏམ་དེ་དག་བརྙེད་པ་ཙམ་གྱིས་ནད་ཚ་གྲང་གང་ཡིན་ཕྱོགས་མཐུན་ཙམ་རྟོགས་པར་འགྱུར་རོ། །

བཅུད་ལ་བོར་བ་ནི་ནད་པས་གསལ་པོར་མི་སྨྲ་བས་མ་རྟོགས་ན། །ནད་པས་ན་ལུགས་སོགས་སྒྲོག་པའི་ཕྱིར་དུ་ཟས་སྤྱོད་ངན་པ་མི་བྱ་པར་གདོན་བཅོས་དགོས་པར་འདུག །བདག་གིས་སྨན་ཅིག་སྦྱར་ན་ཕན་ཞེས་ཁ་གསལ་བོ་མ་ཡིན་པར་བྱིང་པོར་སྨྲ་དགོས་དེའང་དེ་ལྟར་བྱས་པས། །ནད་པའི་ངང་བསྲིང་གིས་མི་ཐུབ་པར་འདི་ན་ཅི་འདྲ་བྱ་ཞིང་ཞེས་གཞན་གསལ་བོར་འབྱིན་པར་འགྱུར་རོ། །ཁ་བཅིང་ཞེས་པ་ནི་ནད་པ་ཁ་ཅིག་གིས་སྨན་པ་དང་ཕྲད་པའི་ཚེ། །འདི་ན་འདི་བྱས་སོགས་སྨྲ་བར་བྱེད་པ་འབྱུང་བས་དེ་ལ་ནད་པས་མགོ་སྨོས་པས་ནད་གང་ཡིན་ཁོང་དུ་ཚུད་པར་བྱས་ཏེ། །ཅི་ན་བ་ཡིན་པར་སྨན་པས་ཤེས་ལ་ཁྱོད་ཀྱི་བཤད་མི་དགོས་ཏེ། །ནད་འདི་ལ་འདི་འདྲ་འབྱུང་ཞེས་གསལ་བར་ནད་པ་ལ་བརྗོད་པས་སྐྱེ་བོ་ཐམས་ཅད་ཀྱིས་ངོ་མཚར་ཆེ་ཟེར་བ་འབྱུང་ངོ་། །

སྤོ་ལ་གདོན་པ་ནི་ནད་དེ་གང་ཡིན་ཐབས་མཁས་ཀྱིས་རྟོགས་པར་གྱུར་ན། །སྨན་པ་གཞན་དག་གིས་རྩ་ཆུ་ན་ལུགས་མང་པོ་ལ་བརྟག་དགོས་ཀྱི། །ང་ལྟ་བུ་ལ་ནི་ཚུལ་དེ་ལྟར་དུ་མ་ཡིན་པས་ཚུལ་ནད་གཅིག་ལ་ཁ་དམར་དུ་ཀུན་གྱི་གོ་བར་གདགས་པར་བྱའོ། །གཞན་དག་གིས་སྨན་པ་འདི་ལ་ནི་མིག་བལྟས་ཙམ་གྱིས་ཆོག་པར་འདུག་ཅེས་གྲགས་པ་ཆེན་པོ་འབྱུང༌བ་ཡིན་ནོ། །ཡང་ན་སྔར་བཤད་པ་ལྟར་ཞིབ་ཏུ་བརྟགས་ཅིང་དཔྱད་པས་སྨན་པ་འདི་ནི་བརྟག་དཔྱད་ལ་མཁས་ཟེར་བའི་གྲགས་པ་ཐོབ་བོ། །

ཐབས་འོག་ཏུ་གཞུག་པ་ནི་ནད་ཀུན་གྱིས་འདི་ཡིན་ཞེས་སྐད་མི་སྟེར་བར་མ་ཤེས་ན། །ནད་ཀྱི་རྣམ་པ་མཚུངས་ཙམ་པའི་ཁ་དམར་བཏགས་ལ་བཏང་སྙོམས་ཀྱི་རྫོང་ལྟ་བུའི་བཙན་ས་ལ་ཡངས་པོར་བྲོས། །

དེ་ཡང་ནད་འདི་དང་པོ་ཟས་དང་སྤྱོད་ལམ་མི་འཕྲོད་པར་གདོན་གྱིས་རྐྱེན་བྱས་པས། །ད་དུང་ཡང་ཟས་རུལ་སྐྱུར་དང་སྤྱོད་ལམ་དྲག་ཤུལ་དང་རྗེན་ཟས་སོགས་ཀྱིས་གནོད་ཅེས་བྱ། །གཉེན་པོ་སྨན་ཡང་ཕན་གནོད་མེད་པའི་བསིལ་དྲོད་སྙོམས་པ་ཞིག་དབོག །

རྫོང་ལ་འབྲོས་པའི་ཚུལ་དུ་ནད་དང་སྨན་གྱི་མིང༌ཚིག །གསར་པ་སྔ་ན་མ་གྲགས་ཤིང་མི་ཤེས་པས་ནད་དང་སྨན་འདི་ཞེས་ངོ་མཚར་ཆེན་པོ་བརྗོད། །དེ་ཡིས་ནད་མ་རྟོགས་པར་གྱུར་ཀྱང་མཁས་ཁྱད་འབྱིན་པ་ཡིན་ནོ། །ཞེས་གསུངས་སོ། །

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ངན་གཡོ་སྐྱོན་གྱི་སྒོ་ནས་བརྟག་པའི་ལེའུ་སྟེ་ཉི་ཤུ་རྩ་ལྔ་པའོ།། །།

མཐའ་མའི་འདོན་ཐེངས་།: 28.05.2019 ཉིན། 12:42 PM