ལེའུ་བཅོ་བརྒྱད་པ། ཟས་ཚོད་རན་པར་བཟའ་བའི་ཚུལ་བསྟན་པ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །དུས་དང་རྣམ་པ་ཀུན་ཏུ་ནི་ཟས་ཚོད་རན་པར་བཟའ་དགོས་ལ། །དེའང་ཟས་རྣམས་ལྕི་བ་དང་ཡང་བ་ཚད་ལས་དཔག་བྱ་སྟེ། །དེའི་ཚུལ་ན་ཡང་ལ་འགྲངས་པར་བཟའ་ཤིང་ལྕི་བ་ལ་ཕྱེད་འགྲངས་ཙམ་དུ་ཟའོ། །ཚེགས་མེད་པར་བདེ་བླག་ནང་དུ་འཇུ་སླ་བའི་ཕྱིར་ཚོད་ཟིན་ཞེས་སུ་བཤད། །དེ་ལྟར་བྱས་པ་ནི་ལུས་འཚོ་ཞིང་མེ་དྲོད་སྐྱེད་པར་བྱེད་པ་ཡིན། །

གལ་ཏེ་ཟས་ཚོད་མ་ཟིན་ཆུང་གྱུར་ན། །སྟོབས་མདངས་མི་འཕེལ་རླུང་ནད་མ་ལུས་འབྱུང༌། །ཚད་ལས་ཐལ་ན་དེ་དག་མ་ཞུ་བེ་སྣབས་སྐྱེད། །དེ་ཡིས་མེ་མཉམ་གྱི་རླུང་རྒྱུ་བའི་རྩ་སྦུབས་བཀག་ནས། །ཕོ་བའི་མེ་དྲོད་ཉམས་པས་ཉེས་པ་རླུང་མཁྲིས་བད་ཀན་སོགས་མ་ལུས་སྐྱེད་པར་བྱེད་དོ། །དེ་ཕྱིར་ཟས་མང་ཉུང་དང་ཕོ་བའི་མེ་དྲོད་ཆེ་ཆུང་སྟོབས་དང་སྦྱར་དགོས། །

ལྟོ་བའི་ཆ་བཞིར་བྱས་པའི་ཆ་གཉིས་ཟས་ལ་ཆ་གཅིག་སྐོམ་དང་། །ཆ་བཞི་པ་ནི་བཞི་ཆ་ཅིག་རླུང་མེ་མཉམ་དང་མཁྲིས་པ་འཇུ་བྱེད་བད་ཀན་མྱག་བྱེད་གསུམ་གྱི་གནས་སུ་བཞགོ །ལྟོ་བའི་ཆ་གཉིས་ཟས་དང་ཆ་གཅིག་སྐོམ་ཞེས་པར་འགྲེལ་བ་བུམ་ནག་ཏུ། ཆ་གཅིག་ཟས་ལ་ཆ་གཉིས་སྐོམ་ཞེས་བྲིས་ནས་ཆ་གཉིས་ཟས་ཆ་གཅིག་སྐོམ་ཟེར་བ་མ་དག་ཅེས་པ་ནི་གཞུང་ལོག་པར་འཆད་པ་སྟེ། ཡན་ལག་བརྒྱད་པར་ཡང་། སྟོང་པའི་ཆ་གཉིས་ཟས་ཀྱི་སྟེ། །ཆ་གཅིག་སྐོམ་གྱིས་གང་བར་བྱ། །ཞེས་གསུངས་པའི་ཕྱིར་རོ།  

།ཟས་ཟོས་པའི་རྗེས་སུ་སྐོམ་ཆུ་འཐུངས་ན་ངོམས་དང་ཁྱབ་པ་དང་། །ཟས་ཀྱི་གོང་བུ་ཀུན་འདྲུལ་ལ་མེ་དྲོད་ཀྱིས་འཇུ་ཞིང་ལུས་བརྟས་པ་དང་སྟོབས་འཕེལ་བར་བྱེད་མོད། །ཐལ་དྲག་ན་སྐད་འགགས་གློ་རྡོལ་ལུད་པ་ཆམ་པ་སོགས། །ཟས་རྗེས་སྐོམ་འཐུང་ན་ནམ་ཚོང་ཡན་ཆད་ཀྱི་ནད་ལ་གནོད་པ་ཡིན་པས་སྤང་ངོ། །གཞན་ཡང་མེ་དྲོད་ཆུང་ལ་ཤ་ཟོས་པའི་རྗེས་སུ་ཆང་འཐུང་བར་བྱའོ། །ཟས་དེ་དག་མི་འཇུ་བར་ཕོ་བ་སྦོས་ན་ཟས་ཟོས་རྗེས་ཆུ་སྐོལ་བཏུང༌དེས་མ་ཞི་ན་རྒྱམ་ཚྭའི་ཆུ་བསྐོལ་བཏུང་ངོ། །སྐེམ་པོ་རྒྱས་པར་བྱེད་ན་ཟས་ཟོས་རྗེས་ཆང་བཏུང་བར་བྱ། །སྦོམ་པོ་དབྲི་བར་བྱེད་པ་ལ་ཟས་ཟོས་རྗེས་སྦྲང་རྩིའི་ཆུ་བཏུང་ངོ༌། །ཞོ་ཆང་མ་ལངས་པ་དང་དུག་གིས་སྦགས་པའི་ཟས་དང་སྦྲང་རྩི་སྦྲང་རྒོད་ཟོས་པ་དང་གཡག་རྒོད་ཤ་དང་ཉ་ཤ་ཟོས་པ་ལ། །རྗེས་སུ་ཆུ་བསིལ་གྲང་མོ་འཐུངས་ན་ཕན་པ་ཡིན། །ཟས་ཟོས་པའི་བར་དང་མཐའ་དང་ཐོག་མར་སྐོམ་འཐུངས་ན། །འདི་ལྟ་སྟེ་ཟས་ཀྱི་བར་དུ་སྐོམ་འཐུངས་ན་ལེགས་པར་ཞུ་བས་ཉམ་འཚག་རན་ཞིང་ཟས་ཀྱི་རྗེས་སུ་སྐོམ་འཐུངས་ན་ཤིན་ཏུ་ཞུ་ནས་ཉམ་འཚག་སྦོམ་པ་དང་ཟས་ཀྱི་སྔོན་དུ་སྐོམ་འཐུངས་ན་མ་ཞུ་བས་སྐེམ་པོར་འགྱུར་རོ། །

ཟས་ཚོད་རན་པར་ཟོས་པས་ཉེས་པ་གསུམ་རང་རང་གི་ལམ་མིན་པར་གཞན་དུ་མི་འགྲོ་བ་དང་མེ་དྲོད་འབར་བ་དང་། །ལུས་ཡང་བ་དང་ག་བདེ་ལ་དབང་པོ་ཀུན་གསལ་བ་དང་། །སྟོབས་ཆེ་ལ་བཤང་བ་དང་གཅིན་པ་འོག་རླུང་བཅས་བདེ་བར་རྒྱུ་བའི་ཕྱིར་ཕན་ཡོན་ཡོད་པ་དེ་རྣམས་ནི། །ཟས་ཚོད་ལེགས་པར་ཟིན་ལས་འབྱུང་བར་འགྱུར་རོ། །ཞེས་གསུངས་སོ། །

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཁ་ཟས་བསྲུང་བ་དང་ཟས་ཚོད་རན་པར་བཟའ་བའི་ལེའུ་སྟེ་བཅོ་བརྒྱད་པའོ། །དེ་ལྟར་ལེའུ་གསུམ་ནི་འཚོ་བ་ཟས་ཀྱི་གནས་ཏེ་ལྔ་པའོ།། །།

མཐའ་མའི་འདོན་ཐེངས་།: 28.05.2019 ཉིན། 12:51 PM