ལེའུ་བཅུ་གཉིས་པ།  ནད་ཀྱི་དབྱེ་བ་དང་སོ་སོའི་དོན་བསྟན་པ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །དྲུག་པ་ནད་ཀྱི་དབྱེ་བ་ལ་ནི་རྒྱུ་ཡི་དབྱེ་བ་དང༌། །རྟེན་དང་རྣམ་པའི་སྒོ་ནས་དབྱེ་བ་གསུམ། །

དང་པོ་རྒྱུ་ཡི་སྒོ་ནས་དབྱེ་བ་ནི། །ཚེ་འདིའི་ཉེས་པ་དང་སྐྱེ་བ་སྔོན་གྱི་ལས་ལས་བྱུང༌བ་དང་། །དེ་གཉིས་འདྲེས་པ་ལས་བྱུང་བ་དང་རྣམ་པ་གསུམ་མོ། །

དང་པོ་རྒྱུ་རྐྱེན་འཛོམ་ལས་འབྱུང་བ་སྟེ། །གཉིས་པ་སྔོན་གྱི་ལས་ལས་སྐྱེས་པ་ནི་རྒྱུ་མེད་པ་ལ་ནད་གཞི་དཀྱེལ་ཆེ་བ་ཡིན་ནོ། །གསུམ་པ་རྒྱུ་ཆུང་བ་ལས་ནད་གཞི་དཀྱེལ་ཆེ་བ་སྟེ་ཚེ་འདི་ལ་ཉེས་པ་དང་སྔོན་ལས་གཉིས་ཀ་འདྲེས་པ་ཡིན། །

དང་པོ་ཚེ་འདིའི་ཉེས་པ་རྣམ་གཉིས་ཏེ། །རང་བཞིན་གནས་པ་ཁོང་གི་ཉེས་པ་དང༌། །ཕྱི་རྐྱེན་ལས་བྱུང་བའི་གློ་བུར་ཉེས་པ་གཉིས། །དེ་ཡང་དང་པོ་ནི་རླུང་མཁྲིས་བད་ཀན་གསུམ་ཡིན་ཏེ། །གཉིས་པ་ཕྱི་རྐྱེན་ལས་བྱུང་བའི་དུག་མཚོན་གདོན་དང་རྣམ་པ་གསུམ། །

རྟེན་གྱི་སྒོ་ནས་དབྱེ་ན་སྐྱེས་པ་དང༌། །བུད་མེད་དང་བྱིས་པ་དང་རྒས་པའི་ནད་རིགས་བཞི། །ཀུན་ཁྱབ་ཐུན་མོང་བ་དང་རྣམ་པ་ལྔ། །

དང་པོ་ལ་སྐྱེས་པའི་ནད་ལ་ཁུ་བ་ཟད་རླུགས་གཉིས། །རླིག་རླུགས་ཕོ་མཚན་གྱི་ནད་དྲུག་དང་ཕོ་མཚན་གྱི་ནད་ལའང་དགུ་དེ་དག་སྒྲིལ་བས་ནད་བཅུ་བདུན་དུ་བཤད། །

གཉིས་པ་བུད་མེད་ནད་ལ་མངལ་ལྔ་མངལ་སྐྲན་དགུ། །མངལ་གྱི་སྲིན་བུ་ལངས་པ་དང་ཁྲོས་པ་རྣམ་པ་གཉིས། །རྩ་ནད་བཅུ་དྲུག་སུམ་ཅུ་རྩ་གཉིས་སོ། །འདིའི་སྐབས་རྩ་ནད་བཅུ་དྲུག་གོ་ཞེས་པ་དག་ཅིང་། གཞུང་འགའ་ཞིག་ཏུ། ཕལ་བའི་ནད་བརྒྱད་སུམ་ཅུ་རྩ་ལྔའོ་ཞེས་འབྱུང་བ་མ་དག་སྟེ། མན་ངག་རྒྱུད་དུ། མངལ་ནད་ལྔ་དང་རྩ་ནད་བཅུ་དྲུག་དང་། སྐྲན་ནད་དགུ་དང་སྲིན་བུའི་ནད་རིགས་གཉིས། མོ་ནད་གཙོ་བོ་སུམ་ཅུ་རྩ་གཉིས་དང་། ཕལ་བའི་ནད་བརྒྱད་བཞི་བཅུ་ཐམས་པར་འགྱུར། ཞེས་པ་དང་། དབྱེ་བ་མངལ་ནད་རླུང་མཁྲིས་བད་ཀན་ཁྲག འདུས་པ་རྣམ་ལྔ་གསང་བའི་སྐབས་སུ་བཤད། ཅེས་མངལ་ནད་ལྔ་ལོགས་སུ་ཕྱེ་བའི་ལྷགས་མ་སོ་ལྔ་ཡིན་པའི་ཕྱིར་རོ། །

གསུམ་པ་བྱིས་པའི་ནད་ལ་ཕྲ་རགས་ཞིབ་ཚེགས་བརྒྱད། །བཞི་པ་རྒས་ནད་ནི་འབྱུང་བའི་ལུས་སྟོབས་འགྲིབས་པ་ཡིན། །

ཀུན་ཁྱབ་ཐུན་མོང་ནད་ལ་ཉེས་པ་དང༌། །གཙོ་བོ་དང་གནས་དང་རིགས་ཀྱིས་དབྱེ་བ་བཞིའོ། །ཉེས་པས་དབྱེ་བ་རླུང་མཁྲིས་བད་ཀན་གསུམ། །རླུང་གི་ནད་ལ་སྤྱི་དང་བྱེ་བྲག་གཉིས། །སྤྱི་ལའང་་རིགས་དང་གནས་ཀྱིས་དབྱེ་བ་གཉིས། །དང་པོ་རིགས་ཀྱིས་དབྱེ་ན་རླུང་ནད་ཨ་ཝར་ཏ་སོགས་ཉི་ཤུ་སྟེ། །གཉིས་པ་གནས་ཀྱིས་དབྱེ་ན་པགས་ལ་གྲམ་པ་སོགས་འཇུག་སྒོ་རྣམ་པ་དྲུག །དབང་པོ་ལྔ་ལ་མེ་ཏོག་ཤར་དང་བདུན། །

གཉིས་པ་བྱེ་བྲག་སྲོག་འཛིན་ལ་སོགས་རྣམ་གྱུར་དང་ལྔ་དེ་དག། །བད་ཀན་དང་མཁྲིས་པར་འདྲེས་པས་བཅུ་རུ་འདོད། །སྤྱིའི་དབྱེ་བ་བཞི་བཅུ་རྩ་གཉིས་རླུང་གི་ནད། །

མཁྲིས་པའི་ནད་ལ་སྤྱི་དང་བྱེ་བྲག་གཉིས། །སྤྱི་ལ་རིགས་དང་གནས་ཀྱི་དབྱེ་བ་གཉིས། །དང་པོ་རིགས་ཀྱི་དབྱེ་བ་ཚད་པ་ཐང་ལ་ལྷགས་པ་དང༌། །གཉིས་པ་གནས་གྱུར་ཁ་ལུད་རྩ་རྒྱུག་རྣམ་པ་གསུམ། །གཉིས་པ་གནས་ཀྱིས་དབྱེ་ན་འཇུག་སྒོ་དྲུག་དང་དབང་པོའི་མེ་ཏོག་དང་བདུན། །གཉིས་པ་བྱེ་བྲག་འཇུ་བྱེད་ལ་སོགས་རྣམ་གྱུར་དང་ལྔ་དེ་དག་ནད། །ནད་རླུང་དང་བད་ཀན་འདྲེས་པས་བཅུ་རུ་འདོད། །སྤྱིར་དབྱེ་བ་ཉི་ཤུ་རྩ་དྲུག་མཁྲིས་པའི་ནད། །

བད་ཀན་ནད་ལ་རང་རྒྱུད་ནད་གཞན་མ་འདྲེས་པའི་རྐྱང་པ་དང་ནད་འདྲེས་པར་གཞན་རྒྱུད་ཅན་གཉིས། །དང་པོ་རང་རྒྱུད་ཅན་ལ་ཡང་སྤྱི་དང་བྱེ་བྲག་གཉིས། །དང་པོ་སྤྱི་ལའང་རིགས་དང་གནས་ཀྱིས་དབྱེ་བ་གཉིས། །དང་པོ་རིགས་ཀྱི་སྒོ་ནས་དབྱེ་ན་ལྷེན་སོགས་དྲུག །གཉིས་པ་གནས་ཀྱིས་དབྱེ་ན་སྒོ་དྲུག་དང་དབང་པོ་མེ་ཏོག་དང་བདུན། །

གཉིས་པ་བྱེ་བྲག་རྟེན་བྱེད་ལ་སོགས་རྣམ་གྱུར་ལྔ་དེ་དག་དང་། རླུང་དང་མཁྲིས་པར་འདྲེས་པས་བཅུ་རུ་འདོད། །

གཉིས་པ་གཞན་རྒྱུད་ཅན་ལ་གཞན་རྒྱུད་དེ་ནད་འདྲེས་པའམ་ནད་གཞན་གྱིས་དབང་དུ་སོང་བའི་དོན་དང་དེལའང་སེར་པོ་སྨུག་པོ་གཉིས། སྨུག་པོ་བྱེར་རྒྱས་རྡོལ་དང་འགྱིངས་པ་བཞི། །འདིར་རྡོར་དང་འགྱིངས་བ་ཞེས་པ་མ་དག་སྟེ། མན་ངག་རྒྱུད་དུ། སྨུག་པོའི་རིགས་ལ་བྱེར་རྒྱས་འགྱིངས་འདྲིལ་བཞི། ཞེས་དང་རྡོལ་བ་ནི་རྒྱས་པའི་ཁོངས་སུ་འདུས་ཏེ། སྨྱུག་པོ་རྒྱས་པར་རྡོལ་དང་མ་རྡོལ་གཉིས། ཞེས་གསུངས་པའི་ཕྱིར་རོ། །སྤྱིར་དབྱེ་བ་སུམ་ཅུ་རྩ་གསུམ་བད་ཀན་ནད། །བསྡོམས་པས་བརྒྱ་དང་རྩ་གཅིག་ཉེས་པའི་དབྱེ་བར་འདོད། །

གཉིས་པ་གཙོ་བོས་དབྱེ་ན་རང་རྒྱུད་གཞན་རྒྱུད་ཅན། །རང་རྒྱུད་ཅན་ནི་རྐྱང་པ་རང་རྟགས་སྟོན་པ་རླུང་ལྟ་བུ། །དེ་ཡང་རྟགས་གསུམ་འཕེལ་བ་ཙམ་དང་རྟགས་གསུ་རབ་ཏུ་འཕེལ་བ་དང་རྟགས་རྣམས་ཚང་བར་བྱུང་ན་མཆོག་འཕེལ་དེ་བཞིན་དུ་ཟད་པར་སྦྱར་བས་བཅོ་བརྒྱད་དོ། །

གཞན་རྒྱུད་ཅན་ལ་ནད་གཉིས་ཚོགས་པར་ལྡན་པ་དང་ནད་གསུམ་ཚོགས་པར་འདུས་པ་དང་ནད་གཞན་ཞིག་སྣོན་པ་ལ་བླ་གཉན་ཅན་དང་གསུམ་ལས། །ལྡན་པ་མཉམ་གསུམ་ཅིག་རབ་ལྷག་པ་དྲུག །ལྡན་པ་མཉམ་གསུམ་ཞེས་རླུང་མཁྲིས་གཉིས་ཆ་མཉམ་དུ་འཕེལ་བ་དང་། བད་མཁྲིས་གཉིས་ཆ་མཉམ་དུ་འཕེལ་བ། བད་རླུང་གཉིས་ཆ་མཉམ་དུ་འཕེལ་བ་བཅས་གསུམ་དང་། གཅིག་རབ་ལྷག་པ་དྲུག་ཅེས་པ་དཔེར་ན་རླུང་རབ་ཏུ་འཕེལ་མཁྲིས་པ་ལྷག་པར་འཕེལ་བ་དང་། རླུང་རབ་ཏུ་འཕེལ་བད་ཀན་ལྷག་པར་འཕེལ་བ་སྟེ། དེ་བད་མཁྲིས་གཉིས་ལའང་སྦྱར་བའི་དྲུག་བཅས་བསྒྲིལ་བས་འཕེལ་བ་དགུ། ཟད་པར་ཡང་རླུང་མཁྲིས་གཉིས་ཆ་མཉམ་དུ་ཟད་པ་དང་། བད་མཁྲིས་གཉིས་ཆ་མཉམ་དུ་ཟད་པ། བད་རླུང་གཉིས་ཆ་མཉམ་དུ་ཟད་པ་བཅས་གསུམ་དང་། དེ་བཞིན་རླུང་རབ་ཏུ་ཟད། མཁྲིས་པ་ལྷག་པར་དུ་ཟད། རླུང་རབ་ཏུ་ཟད་ཅིང་བད་ཀན་ལྷག་པར་ཟད་ལྟ་བུ་དེ་ལྟར་བད་མཁྲིས་གཉིས་ལའང་སྦྱར་བའི་དྲུག་སྟེ་བསྒྲིལ་བས་ཟད་པ་དགུ་བཅས་ལྡན་པའི་འཕེལ་ཟད་བཅོ་བརྒྱད་དོ།

འདུས་ལ་མཚུངས་ཅིག་རབ་འབྲིང་གསུམ་སྦྱར་དྲུག །འདུས་ལ་མཚུངས་གཅིག་ཅེས་པ་རླུང་མཁྲིས་བད་ཀན་གསུམ་ག་སྟོབས་མཚུངས་པར་འཕེལ་བ་གཅིག་དང་། རབ་འབྲིང་གསུམ་སྦྱར་དྲུག་ཅེས་པ་རླུང་རབ་ཏུ་འཕེལ་ཞིང་མཁྲིས་པ་འབྲིང་དུ་འཕེལ་བད་ཀན་ཐ་མར་འཕེལ་བ་དང་། རླུང་རབ་ཏུ་འཕེལ་བད་ཀན་འབྲིང་དུ་འཕེལ་མཁྲིས་པ་ཐ་མར་འཕེལ་བ་སྟེ་དེ་ལྟར་བད་མཁྲིས་གཉིས་ལའང་སྦྱར་བ་དྲུག་དང་། །གཉིས་གཅིག་ལྷག་པ་ལ་དྲུག་ཅེས་པ་རླུང་འཕེལ་ཞིང་བད་མཁྲིས་གཉིས་ལྷག་པར་དུ་འཕེལ་བ་དང་། མཁྲིས་པ་འཕེལ་ཞིང་བད་རླུང་གཉིས་ལྷག་པར་དུ་འཕེལ་བ་དང་། བད་ཀན་འཕེལ་ཞིང་རླུང་མཁྲིས་གཉིས་ལྷག་པར་དུ་འཕེལ་བ་སྟེ་གཉིས་ལྷག་པར་འཕེལ་བ་གསུམ་དང་། རླུང་མཁྲིས་གཉིས་འཕེལ་ཞིང་བད་ཀན་ལྷག་པར་དུ་འཕེལ་བ་དང་། བད་མཁྲིས་གཉིས་འཕེལ་ཞིང་རླུང་ལྷག་པར་དུ་འཕེལ་བ་དང་། བད་རླུང་གཉིས་འཕེལ་ཞིང་མཁྲིས་པ་ལྷག་པར་དུ་འཕེལ་བ་བཅས་གཅིག་ལྷག་པར་དུ་འཕེལ་བ་གསུམ་སྟེ་དྲུག་བཅས་བསྒྲིལ་བས་འཕེལ་བ་བཅུ་གསུམ་དང་གོ་ལྡོག་ཟད་ཅེས་པ་གོང་ལས་གོ་ལྡོག་སྟེ་ཉེས་པ་གསུམ་པོ་སྟོབས་མཚུངས་པར་ཟད་པ་དང་གཅིག་དང་། སྟོབས་མི་མཚུངས་པར་རབ་འབྲིང་ཐ་གསུམ་དུ་ཟད་པ་རླུང་རབ་ཏུ་ཟད་ཅིང་མཁྲིས་པ་འབྲིང་དུ་ཟད་བད་ཀན་ཐ་མར་ཟད་པ་དང་། རླུང་རབ་ཏུ་ཟད་བད་ཀན་འབྲིང་དུ་ཟད་མཁྲིས་པ་ཐ་མར་ཟད་པ་དེ་ལྟར་བད་མཁྲིས་གཉིས་ལའང་སྦྱར་བས་དྲུག་དང་། རླུང་ཟད་ཅིང་བད་མཁྲིས་གཉིས་ལྷག་པར་དུ་ཟད་པ་དང་། མཁྲིས་པ་ཟད་ཅིང་བད་རླུང་གཉིས་ལྷག་པར་དུ་ཟད་པ་དང་། བད་ཀན་ཟད་ཅིང་བད་རླུང་གཉིས་ལྷག་པར་དུ་ཟད་པ་སྟེ་གཉིས་ལྷག་པར་ཟད་པ་གསུམ་དང་། རླུང་མཁྲིས་གཉིས་ཟད་ཅིང་བད་ཀན་ལྷག་པར་ཟད་པ་དང་། བད་མཁྲིས་གཉིས་ཟད་ཅིང་རླུང་ལྷག་པར་དུ་ཟད་པ། བད་རླུང་གཉིས་ཟད་ཅིང་མཁྲིས་པ་ལྷག་པར་ཟད་པ་བཅས་གཅིག་ལྷག་པར་དུ་ཟད་པ་གསུམ་སྟེ་དྲུག་བཅས་ཟད་པ་བཅུ་གསུམ་ཏེ་བསྒྲིལ་བ་འདུས་པའི་འཕེལ་ཟད་ཉེར་དྲུག་གོ། །འཕེལ་ཟད་འདྲེས་ལ་མཉམ་འཕེལ་ཟད་སྦྱར་དྲུག་ཅེས་པ་རླུང་ཕལ་ཆེར་མཉམ་ཞིང་མཁྲིས་པ་འཕེལ་བད་ཀན་ཟད་པ་དང་། རླུང་མཉམ་ཞིང་བད་ཀན་འཕེལ་མཁྲིས་པ་ཟད་པ་དང་ལྟ་བུ་སྟེ། དེ་ལྟར་བད་མཁྲིས་གཉིས་ལ་སྦྱར་བས་དྲུག་དང་།  །གཅིག་ཟད་གཉིས་འཕེལ་ནི་རླུང་ཟད་ཅིང་བད་མཁྲིས་གཉིས་འཕེལ་བ། མཁྲིས་པ་ཟས་ཅིང་བད་རླུང་གཉིས་འཕེལ་བ་དང་། བད་ཀན་ཟད་ཅིང་རླུང་མཁྲིས་གཉིས་འཕེལ་བ་སྟེ་གསུམ་དང་གོ་ལྡོག་ནི་རླུང་མཁྲིས་གཉིས་ཟད་ཅིང་བད་ཀན་འཕེལ་བ་དང་། བད་མཁྲིས་གཉིས་ཟད་ཅིང་རླུང་འཕེལ་བ་དང་། བད་རླུང་གཉིས་ཟད་ཅིང་མཁྲིས་པ་འཕེལ་བ་སྟེ་གསུམ་བཅས་པས་དྲུག་བསྒྲིལ་བས་འདྲེས་པའི་འཕེལ་ཟད་བཅུ་གཉིས་སོ། །དེ་ལྟ་བསྟན་པ་ལྟར་འཕེལ་ཟད་དབྱེ་བ་བདུན་ཅུ་རྩ་བཞིའོ། །

བླ་གཉན་བརྡ་རྙིང་རྣོན་པ་ནད་ཀྱི་སྔ་མའི་སྟེང་དུ་ནད་གཞན་གང་ཞིག །བྱུང་བ་དེ་ཡང་དབྱེ་བ་གསུམ་འགྱུར་ཏེ། །ཞུགས་དང་ལོག་དང་འདོམ་པ་ཞེས་སུ་བཤད། །

དེའང་གཅིག་གི་གནས་སུ་ནད་གཞན་ཞུགས་པ་རླུང་གི་གནས་སུ་མཁྲིས་པ་དང་བད་ཀན་རེ་རེ་དང་ནད་གཉིས་ཀ་བཞུགས་པ་སྦྱར་བ་དགུ་དང༌། །ནད་དེ་རང་མ་ཞི་བར་གཞན་དུ་རླུང་མ་ཞི་བར་བད་ཀན་དང་མཁྲིས་པ་རེ་རེར་བཟློག་པ་དང་གཉིས་ཀར་བཟློག་པ་དགུ་རུ་ལོག་པ་དང༌། །ནད་སྣ་གཉིས་སུ་འཐབ་པས་དགུ་ཚན་གསུམ་བླ་གཉན་ཉེར་བདུན་ནོ། །གོང་གི་འདོམ་དང་འདིར་འཐབ་ཞེས་པ་འདྲ། རླུང་གིས་མཁྲིས་ཡུལ་བཟུང་ནས་བད་ཀན་འཕེལ་བ་སོགས་སོ། བརྒྱ་དང་རྩ་གཅིག་འཕེལ་ཟད་བདུན་ཅུ་རྩ་བཞིའི་སྟེང་བླ་གཉན་ཉེར་བདུན་བསྣན་པ་གཙོ་བོའི་དབྱེ་བར་འདོད། །

གཉིས་པ་གནས་ཀྱི་སྒོ་ནས་དབྱེ་ན་ལུས་དང་སེམས་གཉིས། །སེམས་ལ་གནས་པ་སྨྱོ་བྱེད་བརྗེད་བྱེད་གཉིས། །ལུས་ལ་གནས་པ་སྟོད་སྨད་ཕྱི་ནང་བཞི། །ཕྱི་ནང་ཀུན་ཁྱབ་ནད་དང་རྣམ་པ་ལྔ། །

ལུས་སྟོད་དབང་པོ་མགོ་ལ་གནས་པ་ནི། །མགོ་མིག་རྣ་བ་སྣ་དང་མཆུ་སོ་ལྕེ། །རྐན་དང་ལྦ་བ་གྲེ་བ་ནམ་ཚོང་ལྐོག་མ་ནད། །གྲེ་བར་གནས་པ་ལ་གྲེ་ནད་དང་གག་པ་དང༌། །མགུལ་འགགས་ནད་དང་སྐད་འགགས་རྣམ་པ་བཞི། །ནམ་ཚོང་སྤྱིར་གནས་སྐོམ་དད་སྐྱིགས་བུ་དང༌། །དབུགས་མི་བདེ་བ་དང་ཡིད་ག་འཆུས་པ་དང་ཆམ་པ་ལྔ། །དེ་རྣམས་སྤྱི་རུ་སྡོམས་པས་དབྱེ་བ་བཅོ་བརྒྱད་བཤད། །

དོན་སྣོད་ནང་ལ་གནས་པའི་ནད་བསྟན་པ་ནི། །སྙིང་དང་གློ་བ་མཆིན་མཆེར་མཁལ་མ་དང༌། །ཕོ་བ་མཁྲིས་པ་རྒྱུ་ལོང་ལྒང་པ་དང༌། །བསམ་སེའི་ནད་དང་རྣམ་པ་བཅུ་གཅིག་གོ །དོན་སྣོད་ཀྱི་སྤྱིར་གནས་མ་ཞུ་གླང་ཐབས་སྐྲན། །སུར་ཡ་ཚད་འཁྲུ་རྒྱུ་གཟེར་རྣམ་པ་དྲུག །སྣོད་སྤྱིར་གནས་པ་འཁྲུ་སྐྱུག་རྣམ་པ་གཉིས། །དེ་རྣམས་སྤྱི་རུ་སྡོམས་པས་ནད་རིགས་བཅུ་དགུའོ། །

སྨད་ནད་གཞང་འབྲུམ་མཚན་བར་རྡོལ་བ་དང༌། །རྟུག་འགགས་གཅིན་འགགས་གཅིན་སྙི་རྣམ་པ་ལྔ། །

ཕྱིར་གནས་པའི་ནད་པགས་པ་ཤ་དང་རྩ་རུས་ཏེ། །པགས་པའི་ནད་ལ་ཤ་བཀྲ་བས་ལྡགས་དང༌། །གཡན་པ་གླང་ཤུ་ཟ་རྐོང་ཤུ་བ་དང༌། །རེག་པའི་དུག་དང་མཛེར་པ་ངོ་ཁབ་དང༌། །ནད་གཞན་ལྤགས་ལ་གྲམ་དང་བཅུ་རུ་བཤད། །ཤ་ཡི་ནད་ལ་ལྦ་བ་རྨེན་བུ་གཉིས། །ནད་གཞན་ཤ་ལ་རྒྱས་དང་རྣམ་པ་གསུམ། །རྩ་ཡི་ནད་ལ་རྩ་དཀར་རྩ་ནག་གཉིས། །ནད་གཞན་རྩ་རུ་རྒྱུག་དང་རྣམ་པ་གསུམ། །རུས་པའི་ནད་ལ་དྲེག་དང་རྐང་བམ་གཉིས། །ནད་གཞན་རུས་ལ་ཞེན་དང་རྣམ་པ་གསུམ། །ཤ་རུས་ཀུན་ལ་གནས་པ་གྲུམ་བུའི་ནད། །དེ་རྣམས་སྤྱི་རུ་སྡོམས་པས་ཉི་ཤུ་ཐམ་པའོ། །

ཕྱི་ནང་ཀུན་ཏུ་ཁྱབ་པའི་ནད་རིགས་ལ། །མཁྲིས་པ་སྨུག་པོ་དམུ་འོར་སྐྱ་རྦབ་གཅོང༌། །ཚ་བ་མ་སྨིན་རྒྱས་སྟོང་གབ་རྙིང་རྙོགས་སྡེ་དྲུག་འགྲམས་འཁྲུགས་རིམས་ནད་དང༌། །འབྲུམ་བུ་ལྷོག་པ་སྦྱར་དུག་རྫི་ཟེར་དུག །རླངས་དུག་ཤ་དུག་མི་འཕྲོད་པ་ཡི་དུག །བཙན་དུག་ཁྱི་དུག་སྲིན་བུ་སྦྲུལ་གྱི་དུག །འབྱུང་པོ་གཟའ་དང་མཛེ་འབྲས་མེ་དབལ་སྲིན། །མགོ་དང་བྱང་ཁོག་ཡན་ལག་སྐེ་ཡི་རྨ། །དེ་རྣམས་སྤྱི་རུ་སྡོམས་པས་སུམ་ཅུ་རྩ་བདུན་ཏེ། །བརྒྱ་དང་རྩ་གཅིག་གནས་ཀྱི་དབྱེ་བར་འདོད། །

གསུམ་པ་རིགས་ཀྱི་སྒོ་ནས་དབྱེ་ན་ཁོང་ནད་དང༌། །རྨ་དང་ཚད་པ་ཐོར་བུའི་ནད་ཀྱི་རིགས་དང་བཞིའོ། །དང་པོ་ཁོང་ནད་སྒོ་ནས་དབྱེ་བ་ལ། །མ་ཞུ་རྒྱུ་དང་འབྲས་བུ་གཅོང་ནད་གཉིས། །མ་ཞུ་ངོ་བོ་རིགས་གྲོགས་དུས་ཀྱིས་བཞི། །འབྲས་བུ་གཅོང་ནད་དབྱེ་བ་གསར་རྙིང་གཉིས། །གསར་པ་བད་ཀན་སྐྱ་བོ་སྨུག་པོ་དང༌། །མཁྲིས་པའི་ནད་དང་དུག་གཅོང་རྣམ་པ་བཞི། །བད་ཀན་ནད་ལ་སྐྱ་བོ་ལྷེན་དང་ལྕགས་དྲེག་མེ་ཉམས་དང༌། །མགུལ་འགགས་གྲུམ་བུ་དཀར་པོ་འཇུ་སྐེམས་དང་དྲུག་ཡིན། །སྨུག་པོ་ལ་བྱེར་རྒྱས་རྡོལ་རལ་འགྱིངས་དང་འདྲིལ། །གབ་འཐབ་འོར་ལྷུང་གྲང་བ་ལྷིང་ཆད་པ་དང་བཅུ། །མཁྲིས་པ་ནད་ལ་ཁ་ལུད་རྩ་རྒྱུག་གནས་གྱུར་གསུམ། །དུག་གི་གཅོང་ལ་ཚ་སྦྱོར་གྲང་སྦྱོར་གཉིས་རྣམས་སོ། །རྙིང་པ་ལ་སྐྲན་དང་དམུ་འོར་སྐྱ་རྦབ་བཞི། །གཅོང་ཆེན་ཟད་བྱེད་ནད་དང་རྣམ་པ་ལྔའོ། །སྐྲན་ལ་ཁྲག་མཁྲིས་ལྷེན་དང་རྡོ་ཡི་སྐྲན། །རླུང་སྲིན་རྩ་ཆུའི་སྐྲན་དང་བརྒྱད་དུ་བཤད། །དམུ་ཆུ་ལ་བྱེར་ཟགས་འཁྱིམས་ཆུ་རྡོལ་ཆུ་བཞི། །འོར་ལ་ཚ་འོར་གྲང་འོར་རྣམ་པ་གཉིས། །སྐྱ་རྦབ་གློ་སྙིང་མཆིན་མཆེར་ཆུ་སེར་ལྔ། །གཅོང་ཅན་ཟད་བྱེད་ལ་རླུང་མཁྲིས་བད་ཀན་བླ་གཉན་བཞི། །དེ་ལྟར་ཁོང་ནད་སྤྱིར་སྡོམས་པས་བཞི་བཅུ་རྩ་བརྒྱད་དོ། །

གཉིས་པ་རྨ་ལ་ལྷན་ཅིག་ལས་སྐྱེས་པ་དང་གློ་བུར་བ་གཉིས་ལས། །ལྷན་སྐྱེས་རྨ་ལ་འབྲས་དང་རྨེན་བུ་སུར་ཡ་དང༌། །མེ་དབལ་གཞང་འབྲུམ་རྐང་བམ་མཚན་བར་རྡོལ་བ་རྣམས་སོ། །གློ་བུར་བའི་རྨ་ལ་གནས་དང་རིགས་ཀྱིས་དབྱེ་བ་གཉིས་ལས། །གནས་ནི་མགོ་སྐེ་བྱང་ཁོག་ཡན་ལག་ལ། །རྨ་རིགས་ནི་པགས་བཤུས་པ་དང་ཤ་བཅད་ནས་རུལ་བ་ཤས་ཆེར་རྣམ་པར་བཅད་པ་དང༌། །ཤ་ལྷུག་པོར་འཕྱང་བ་མཐུར་དུ་ལྷུང་བ་དང་ཐལ་བྱུང་སུ་ཕུག་པ་དུམ་བུར་གཤགས་པ་གྲུམས་པ་དང་རྣམ་པ་བརྒྱད། །དེ་རྣམས་སྤྱི་རུ་སྡོམས་པས་དབྱེ་བ་བཅོ་ལྔའོ། །

གསུམ་པ་ཚ་བ་མ་སྨིན་རྒྱས་སྟོངས་གབ་རྙིངས་རྙོགས། །འགྲམས་ཚད་འཁྲུགས་ཚད་རིམས་ནད་དང་དུག་ཚད་རྣམ་པ་བཞི་ལས། །འགྲམས་ལ་དབྱེ་བ་ཕྱི་འགྲམས་ནང་འགྲམས་རྣམ་པ་གཉིས། །འཁྲུགས་ལ་དབྱེ་བ་རྒྱས་འཁྲུགས་སྟོང་འཁྲུགས་འཇམ་འཁྲུགས་གསུམ། །རིམས་ནད་ལ་བལ་ནད་རྒྱུ་གཟེར་འབྲུམ་པ་དང༌། །གག་ལྷོག་ཆམ་པའི་ནད་དང་རྣམ་པ་ལྔ། །དུག་ནད་ལ་སྦྱར་དུག་གྱུར་པ་དངོས་དང་གསུམ། །

ཐོར་བུའི་ནད་ལ་་སྐད་འགགས་སྐྱིགས་བུ་ཡི་ག་འཆུས། །སྐོམ་དད་དབུགས་མི་བདེ་དང་གླང་ཐབས་སྲིན། །འཁྲུ་སྐྱུག་དྲི་མ་གཅིན་འགགས་གཅིན་སྙི་དང༌། །ཚད་འཁྲུ་དྲེག་གྲུམ་ཆུ་སེར་རྩ་དཀར་དང༌། །ལྤགས་ནད་ཕྲན་བུ་ཐོར་བུ་བཅུ་དགུའོ། །དེ་རྣམས་བསྡོམས་པས་བརྒྱ་དང་རྩ་གཅིག་རིགས་ཀྱི་དབྱེ་བར་འདོད། །

དེ་ལྟར་ཉེས་པ་དང་གཙོ་བོ་དང་རིགས་དང་གནས་དང་བཞིའི། །དབྱེ་བས་ནད་རིགས་་བཞི་བརྒྱ་རྩ་བཞིའི་ནད་ཡོད་དེ། །དེ་ལ་གཞན་དབང་འཆི་བདག་དབང་དུ་ན་བ་ནི་བཅོས་ཀྱང་འཆི་བ་དང༌། །རྟོག་པ་གཞན་དུ་སྒྲོ་ཀུན་བརྟགས་པ་གདོན་གྱི་ནད་རིམ་གྲོས་གྲོལ་བ་དང༌། །ལུས་ལ་ཡོངས་སུ་གྲུབ་པའི་ནད་མ་བཅོས་འཆི་ལ་བཅོས་ན་འཚོ། །ལྟར་སྣང་ཐམས་ཅད་ནད་ནི་མ་བཅོས་རང་བཞིན་འཚོ་བ་བཞི། །དེ་ཡང་གཅིག་ལའང་དེ་ལྟར་བཞི་སྦྱར་བས་བཞི་བརྒྱ་རྩ་བཞི་རེ་སྟེ། །ཐམས་ཅད་སྡོམས་པས་སྟོང་དང་དྲུག་བརྒྱ་བཅུ་དྲུག་འགྱུར། །

རྣམ་པའི་སྒོ་ནས་ནི་དཔག་ཏུ་མེད་པར་དབྱེ་བ་འགྱུར། །ཉེས་པ་གནོད་བྱ་རྩ་བའི་རླུང་ལྔ། མཁྲིས་པ་ལྔ། བད་ཀན་ལྔ། ལུས་ཟུངས་བདུན། དྲི་མ་གསུམ་བཅས་ཉི་ཤུ་རྩ་ལྔ་ལ། །རྐྱང་པ་དང་ལྡན་པ་དང་འདུས་པ་དང་དུ་མའི་རིགས་འབྱུང་བས། །དེ་རྣམས་ཀྱི་གྲངས་དང་མིང་གི་ངེས་བསྟན་ཚང་མར་ཡོད་མ་ཡིན་ནོ། །

འོན་ཀྱང་བསྡུ་ན་ཉེས་པ་རླུང་མཁྲིས་བད་ཀན་གསུམ་ལས་ནད་མི་འདའ་བ་ཡིན། །ལུས་ཟུངས་བདུན་དྲི་མ་གསུམ་གནོད་བྱ་བཅུ་ལས་ནད་ཀྱི་གནས་མི་འདའ་བ་ཡིན། །དཔེར་ན་འདབ་ཆགས་བྱ་ཡིས་གར་འཕུར་ཡང༌། །ནམ་མཁའི་མཐོངས་ལས་འཕུར་ས་མེད་པ་བཞིན་དུའོ། །བད་རླུང་གཉིས་གྲང་ལ་ཁྲག་མཁྲིས་གཉིས་ཚ་བས་ན། །དུ་མར་ཕྱེ་ཡང་དོན་དུ་ཚ་གྲང་གཉིས་སུ་འདུས། །

དེ་དག་སོ་སོའི་དོན་ལ་རྒྱུ་དང་སྔར་ཚུལ་དང༌། །ཚུལ་ཕྱེད་པ་དང་དཀྱེལ་དུ་གྱུར་པ་བཞི་ལས། །དེ་ཡང་རྒྱུ་ནི་རང་རང་སྐྱེད་པའི་རྐྱེན་ཡིན་ཏེ། །སྔར་ཚུལ་ཞེས་བྱ་བྱེ་བྲག་གསལ་མིན་པ་ལུས་སྙོམ་པ་ལྟ་བུ། །ནད་རྟགས་གསལ་བར་གྱུར་པ་ཚུལ་ཕྱེད་ཡིན། །ནད་རང་གནས་སུ་མཐར་ཕྱིན་ཅིང་ཤུགས་རྫོགས་པ་ནི་དཀྱེལ་དུ་གྱུར་བ་ཟེར་རོ། །

དེ་ལ་རྣམ་གྲངས་དང་བརྟག་པ་དང་གཙོ་བོ་དང་སྟོབས་བཞི་ལས། །དང་པོ་རྣམ་གྲངས་ནད་རིགས་ནང་ཚེགས་དབྱེ་བ་སྟེ། །གཉིས་པ་བརྟག་པ་དེ་རྣམས་མ་འདྲེས་ཕྱེད་པ་ཡིན། །གསུམ་པ་གཙོ་བོ་རང་རྒྱུད་ཅན་དང་གཞན་རྒྱུད་ཅན། །དེ་ལ་སྔར་ནད་སྐྱེས་པར་ཕྱིས་བླ་གཉན་སྣོན་མ་བཅས་པའོ། །བཞི་པ་ནད་སྟོབས་ཆེ་ཆུང་ནི་ངད་ཅན་གྲངས་སོགས་ཡུལ་དང་དབྱར་སོགས་དུས་དང་རང་བཞིན་རླུང་སོགས་ན་ཚོད་རྒས་པ་རྣམས་ནད་དང༌། །རླུང་ལ་སོགས་ནད་ཁམས་བཅུད་མེད་སོགས་ཟས་དང་མྱ་ངན་སོགས་སྤྱོད་ལམ་དབང་གིས་ནད་སྟོབས་ཆེ་ཆུང་གཉིས་སུ་འགྱུར་རོ། །ཞེས་གསུངས་སོ། །

མཐའ་མའི་འདོན་ཐེངས་།: 28.05.2019 ཉིན། 11:42 AM