ལེགས་གྲུབ་དཔལ།

- བྱམས་པ་འཕྲིན་ལས།
 

ལེགས་གྲུབ་དཔལ་ནི།  ཐོག་མའི་རིགས་རུས་ལ་སོགས་པ་བོད་སྨན་མཁས་པ་མི་དགུའི་ནང་ནས་གཉའ་པ་ཆོས་བཟང་གི་གདུང་རྒྱུད་དུ་འཁྲུངས་པ་ཞིག་དང་།  རིགས་ལྡན་ཆོས་ཀྱི་རྒྱལ་པོ་རྣམ་རྒྱལ་གྲགས་པ་བཟང་པོའི་གསོ་རིག་གཙོ་བོར་གྱུར་པའི་བུ་ཆེན་གནང་རིགས་རྗེས་སྦྱངས་ཀྱི་སྨན་པ་ལྷུན་སྡིངས་ལེགས་གྲུབ་དཔལ་བ་ཞེས་པ་འདི་ཉིད་ཡིན། དམ་པ་དེའི་ཡབ་ནི་དཀོན་ཅོག་གཞོན་ནུ་ཞེས་པ་གསོ་བ་རིག་པ་དང་། སྔགས་རྙིང་མ་ལ་མཁས་ཤིང་སེམས་ཅན་ཐམས་ཅད་ལ་ཐུགས་བརྩེ་བས་བྱང་ཆུབ་སེམས་དཔར་གྲགས།
 

ཐེག་ཆེན་ཆོས་རྗེ་རྒྱའི་བླ་མར་བྱོན་པའི་བླ་སྨན་གནང་བས་རྒྱའི་ལུང་དང་འཇའ་ས་ལོན་པས་སྨན་པ་མཁས་པའི་རྩེ་མོར་སོན། དེའི་དབང་གིས་རང་སྲས་ལེགས་གྲུབ་དཔལ་ཡང་། རིག་གནས་སྤྱི་དང་ཁྱད་པར་གསོ་རིག་ལ་མཆོག་ཏུ་གྱུར། རིགས་ལྡན་རྣམ་རྒྱལ་གྲགས་བཟང་ལ་གསོ་རིག་གི་གཞུང་བཤད་གདམས་པ་མང་དུ་གསན་ཅིང་། གསོ་དཔྱད་བརྒྱུད་འཛིན་འཕེར་བའི་བུ་ཆེན་དུ་མངའ་གསོལ། དེའི་སྲས་ཤེས་རབ་དཔལ་ལྡན་འཁྲུངས་རྟགས་ཡ་མཚན་པ་སོགས་བྱུང་བས། རིགས་ལྡན་རྣམ་རྒྱལ་གྲགས་བཟང་ལ་གསོ་རིག་གཞུང་བཤད་གདམས་པ་མང་དུ་གསན་ཅིང་། གསོ་དཔྱད་བརྒྱུད་འཛིན་འཕེར་བའི་བུ་ཆེན་དུ་མངའ་གསོལ། དེའི་སྲས་ཤེས་རབ་དཔལ་ལྡན་འཁྲུངས་རྟགས་ཡ་མཚན་པ་སོགས་བྱུང་བས། རིགས་ལྡན་རྣམ་རྒྱལ་གྲགས་བཟང་ལ་མིང་ཞུས་པར། འཚོ་བྱེད་པདྨ་སྲི་ཐར་དུ་འདོགས་པར་མཛད། པཎྜིཏ་ནགས་ཀྱི་རིན་ཆེན་བོད་ཡུལ་དུ་ལན་གསུམ་བྱོན་པའི་ཕྱི་མའི་སྐབས་ ( སྤྱི་ལོ་ 1453 ) ཡར་ལམ་མཇལ།  དགུང་ལོ་ཉེར་དྲུག་པ་ལ་གྲུབ་དབང་ཐང་སྟོང་རྒྱལ་པོའི་དྲུང་དུ་བྱོན། ལོ་བཅུ་དྲུག་བར་སྐུ་དངོས་ཀྱི་ཉེ་གནས་མཛད། གདམས་པ་མཐའ་ཡས་པ་གསན་ཅིང་ཉམས་སུ་བཞེས་པས་ཐུགས་སྲས་དམ་པར་གྱུར། མཁས་གྲུབ་ཤེས་རབ་དཔལ་ལྡན་གྲུབ་ཐོབ་ཐང་སྟོང་པའི་དྲུང་དུ་མ་བྱོན་གོང་ལ་སྲས་ལྷུན་སྡིངས་དགེ་མ་ཞེས་པ་དེས་གསོ་རིག་གི་བཤད་སྲོལ་བསྐྱངས་ཏེ་གཡས་རུ་བྱང་པའི་བླ་སྨན་དུ་གྱུར། དེའི་སྐབས་གོང་གི་གཉའ་པའི་རིགས་རྒྱུད་ལས་བྱུང་བའི་སྨན་པ་རྣམས་ལ་ལྷུན་སྡིངས་ཞེས་པའི་མཚན་བྱུང་བ་ནི་ས་གནས་ལ་བརྟེན་ནས་བརྟེན་ནས་ཐོབ་པའི་མིང་མིན་ནམ་སྙམ། ལྷུན་སྡིངས་དགེ་མའི་སྲས་བསྟན་པ་དར་རྒྱས་སྐུ་ཆུང་ངུ་ནས་བཟང་པོའི་ལས་སད་པས་དད་བརྩོན་ཤེས་རབ་སྙིང་རྗེ་དང་ལྡན་ལ། འཛིན་ཤེས་ཡངས་པས་གོས་ཚགས་བྱེད་རིང་ལ་མདའ་ཚད་མའི་ཤོག་ལོགས་རེ་བློར་ཟིན།  བྱང་བདག་པོར་རྒྱུད་བཞི་འགྲེལ་པ་བཅས་དང་། སྙིང་པོ་བསྡུས་པའི་རྒྱུགས་ཕུལ། རྗེས་སུ་བྱང་སྨན་ལྷའི་བཙུན་པ་བཀྲ་ཤིས་དཔལ་བཟང་གི་སྲས་བསོད་ནམས་རྒྱལ་མཚན་སྐུ་གཤེགས་རྗེས་བརྒྱུད་འཛིན་མཁན་ལ་བསྟན་པ་དར་རྒྱས་ཆེད་བསྐོས་བྱུང་བར་བརྟེན་ལྷ་བཙུན་བཀྲ་ཤིས་དཔལ་བཟང་གི་ཞབས་ལ་ཡུན་དུ་བསྟེན་ཏེ་མདོ་སྔགས་རིག་གནས་དང་། ཁྱད་པར་གསོ་བ་རིག་པའི་གཞུང་ལུགས་མན་ངག་ཡི་གེ་འདྲིར་མ་བཏུབ་པའི་སྙན་བརྒྱུད་ཞལ་ཤེས་དང་བཅས་པ་བུམ་པ་གང་བྱོར་བསྩལ།
 

《སྡེ་སྲིད་ཁོག་འབུགས།》 ནང་གཉའ་རིགས་གོང་མ་རྣམས་རིགས་ལྡན་སོགས་ཀྱི་ཞབས་ལ་གཏུགས་པའི་མཁས་པ་ཤ་སྟག་ཡིན་ཀྱང་། བྱང་ལུགས་བཀའ་གཏེར་ཆིག་བརྒྱུད་ཀྱི་གདམས་པ་ཟབ་མོ་འདི་ཡན་ལ་མ་བྱུང་བར་གྲགས། བསྟན་པ་དར་རྒྱས་ལ་རང་སྲས་བསོད་ནམས་ཆོས་འཕེལ་ཞེས་པ་བྱུང་ནས་ཕྱིས་སུ་སྙན་བརྒྱུད་ཞལ་ཤེས་མན་ངག་གི་བདག་པོར་གྱུར་ཞིང་། ངོ་མཚར་རྩ་བདུན་ལ་ནང་བྱན་ཆུད་པས་ཁ་སྨར་ཐམས་ཅད་མངོན་ཤེས་ཡོད་པ་ལྟ་བུ་བྱུང་ཞེས་གསུངས་སོ།།

- འདི་ནི་མཁས་དབང་བྱམས་པ་འཕྲིན་ལས་ཀྱིས་བརྩམས་པའི་དཔེ་དེབ་《གངས་ལྗོངས་གསོ་རིག་བསྟན་པའི་ཉིན་བྱེད་རིམ་བྱོན་གྱི་རྣམ་ཐར་ཕྱོགས་བསྒྲིགས་》ནས་ཟུར་འདོན་བྱས་པ་ཞིག་ཡིན།

 

མཐའ་མའི་འདོན་ཐེངས་།: 29.06.2017 ཉིན། 12:32 PM