ལིཐུ་ཨནིཡ་དང་པོ་ལེནྜ་ཡུལ་དུ་སྐོར་སྐྱོད།

འདི་ལོའི་ཟླ་ ༤ ཚེས་ ༢༡ ནས་ཟླ་ ༥ ཚེས་ ༢༣ བར་ཡུ་རོབ་རྒྱལ་ཁབ་ལིཐུ་ཨནིཡ་དང་། པོ་ལེནྜ་གཉིས་སུ་སྨན་རྩིས་ཁང་ནས་སྨན་རྩིས་སྐོར་སྐྱོད་ལས་འཆར་ཞིག་གོ་སྒྲིག་ལེགས་གྲུབ་ཞུས་ཡོད། སྐོར་སྐྱོད་འདི་ལ་སྨན་རྩིས་ཁང་གི་མེཀ་ལོཌ་འཇམ་དཔྱད་སྨན་པ་མིག་དམར་ལགས་དང་། སྐར་དཔྱད་རྩིས་རིག་པ་ཚེ་རིང་དབྱངས་ཅན་ལགས་གཉིས་ཀྱི་གཙོས། སྨན་སྤྲོད་ལྷ་མོ་ཚེ་རིང་ལགས་དང་། སྐོར་སྐྱོད་ཚན་པའི་ལས་བྱེད་བློ་བཟང་སྒྲོལ་མ་ལགས་བཅས་བཞི་ཕེབས་ཡོད།

ཚན་ཁག་འདིས་ལིཐུ་ཨནིཡ་རྒྱལ་ཁབ་ཀྱི་གྲོང་ཁྱེར་ Vilnius, Nida and Kaunas བཅས་སུ་ཉིན་བཅོ་ལྔ་ལྷག་རིང་སྨན་སྐོར་སྐབས་སྨན་པ་མིག་དམར་ལགས་ནས་ནད་པ་གྱ་བཞི་ལ་བརྟག་དཔྱད་སྨན་བཅོས་དང་བོད་ཀྱི་གསོ་བ་རིག་པའི་ལུགས་ཀྱི་ཟས་སྤྱོད་སྤང་བླང་སློབ་སྟོན་གནང་བ་མ་ཟད་བོད་ཀྱི་གསོ་བ་རིག་པའི་སྐོར་ངོ་སྤྲོད་དང་། ཟས་སྤྱོད་རིག་པའི་སྐོར། འབྲས་ནད་བཅོས་ཐབས་སྐོར། དེ་བཞིན་བོད་ལུགས་གསོ་རིག་གི་འཇམ་དཔྱད་སྐུ་མཉེ་དང་ལུམས་རྒྱག་ཚུལ་དང་ཕན་ཡོན་བཅས་ཀྱི་བརྗོད་གཞིའི་སྟེང་གཏམ་བཤད་གནང་ཡོད། དེ་མཚུངས་སྐར་རྩིས་པ་ཚེ་རིང་དབྱངས་ཅན་ལགས་ཀྱིས་དོན་གཉེར་ཅན་མི་སྣ་སོ་དྲུག་ལ་ངག་ཐོག་རྩིས་འབྲས་འདོན་གནང་ཡོད། ལྷག་པར་ས་གནས་དེ་དག་ཏུ་སྨན་སྐོར་སྐབས་བོད་ཀྱི་གསོ་བ་རིག་པའི་སྨན་ཐང་འགྲེམ་སྟོན་དང་སྦྲགས་སྨན་རྩིས་ཁང་ནས་བཟོ་སྐྲུན་གསོ་རིག་ཐོན་སྐྱེད་ཚོང་སྒྱུར་ཞུས་ཡོད།

དེ་ནས་ཟླ་ ༥ ཚེས་ ༩ ནས་བཟུང་པོ་ལེནྜ་ཡུལ་གྱི་ Warsaw  གྲོང་ཁྱེར་དུ་སྨན་སྒར་བཏབ་སྐབས་གསོ་རིག་སྨན་པས་ནད་པ་ཁྱོན་ ༡༡༦ ལ་བརྟག་དཔྱད་སྨན་བཅོས་དང་ཟས་སྤྱོད་སློབ་སྟོན། དེ་བཞིན་སྐར་རྩིས་པས་མི་སྣ་ ༢༢ ལ་ངག་ཐོག་རྩིས་འབྲས་འདོན་གནང་ཡོད། དམིགས་བསལ་བོད་ཀྱི་སྨན་རྩིས་རིག་པར་དོ་ཁུར་ཡོད་པའི་ས་གནས་མང་ཚོགས་ལ་བོད་ཀྱི་གསོ་བ་རིག་པ་དང་། སྐར་རྩིས་རིག་པའི་སྐོར་ངོ་སྤྲོད་གཏམ་བཤད་ཀྱང་གནང་ཡོད།

ད་ཐེངས་ཀྱི་སྨན་རྩིས་སྐོར་སྐྱོད་འདི་ལམ་ལྷོངས་བྱུང་བར་མཐུན་འགྱུར་གནང་མཁན་ Vytis, Ruta, Youlanda དང་། དེ་བཞིན་དང་བླངས་པ་དང་། ཝར་སོ་སྨན་ཁང་གི་ལས་བྱེད་སྤྱི་ཡོངས་ལ་སྨན་རྩིས་ཁང་ནས་ཐུགས་རྗེ་ཆེ་ཞུ་རྒྱུ་ཡིན།

མཐའ་མའི་འདོན་ཐེངས་།: 02.07.2022 ཉིན། 4:24 PM