༄༅། །གཡུལ་ལས་རྣམ་པར་རྒྱལ་བའི་རྒྱུད་ཀྱི་རྒྱལ་པོ་དབྱངས་འཆར་གྱི་གནད་དོན་ཅུང་ཟད་གླེང་བ་

བློ་གསར་དགའ་སྐྱེད་ཅེས་བྱ་བ་བཞུགས་སོ།།

- རྩིས་དགེ་བཀྲ་ཤིས་ཚེ་རིང་།

ཝྰཎ་དབུས་བོད་ཀྱི་གཙུག་ལག་སློབ་གཉེར་ཁང་།

སྟོང་ཉིད་སྙིང་རྗེའི་བདག་ཉིད་ཅན།།

སྲིད་གསུམ་སྐྱེ་དང་འཇིག་པ་མེད།།

ཤེས་དང་ཤེས་བྱ་གཅིག་པའི་སྐུ།།

དཔལ་ལྡན་དུས་འཁོར་ལ་ཕྱག་འཚལ།།

           ཞེས་མཆོད་པར་བརྗོད་པའི་ཚིག་གི་མངུན་བསུས་ཏེ་སྐབས་དོན་གླེང་བར་བྱ་བ་དངོས་ནི། དབྱངས་གསལ་འཆར་ཚུལ་ལས་བཟང་ངན་བདེ་སྡུག་བསྟན་ཚུལ་ཡིན་ལ། དེ་ཡང་། དབྱངས་འཆར་གྱི་རྒྱུད་དེ་ཐུགས་རྗེ་ཆེན་པོ་སྤྱན་རས་གཟིགས་དང་རྗེ་བཙུན་སྒྲོལ་མས་གདུལ་བྱ་ཕྱི་རོལ་པ་རྗེས་སུ་འཛིན་པའི་ཆེད་ལྷ་ཆེན་དབང་ཕྱུག་དང་ལྷ་མོ་ཨུ་མའི་སྐུར་བཞེངས་ནས་ཕན་ཚུན་ཞུས་ལན་གྱི་ཚུལ་དུ་བྱུང་བ་ཞིག་ཡིན་ལ། དེ་ཡང་དབྱངས་འཆར་རྒྱུད་ལས། ལྷ་མོས་གསོལ་བ། བཅོམ་ལྡན་ལྷ་ཡི་ལྷ་མཆོག་གཙོ། །རི་བོང་ཅན་གྱི་སྤྱི་བོར་འཛིན། །དབང་ཕྱུག་ཆེན་པོ་ཡེ་ཤེས་དོན། །དཀར་མོ་བདག་ལ་རྣམ་པར་ཕྱེ། །མཆོག་ཏུ་དགེ་བ་གསང་བ་ཅན། །དབྱངས་འཆར་ཞེས་པ་རྒྱས་པའི་རྒྱུད། །ཁྱེད་ཀྱིས་བདག་ལ་སྔར་གསུངས་པ། །སྐྱེ་བོ་བློ་གྲོས་དམན་པ་ལ། །རྒྱས་མིན་ཤིན་ཏུ་གསལ་བ་ནི། །འདོད་པའི་དོན་ཀུན་སྒྲུབ་བྱེད་ཅན། །དབང་ཕྱུག་ཆེ་ལ་བདག་གསོལ་འདེབས། །མདོར་བསྡུས་པ་ནི་བཤད་དུ་གསོལ།། ཞེས་དང། ཡང་ཀུན་གཟིགས་དབྱངས་འཆར་ཤེལ་གྱི་མེ་ལོང་ལས། །ཕྱི་དང་ནང་གི་རྟེན་འབྲེལ་ཟབ་མོའི་ཚུལ། །ཇི་སྐད་བརྗོད་ལ་དུས་ཀྱི་འཁོར་ལོ་སོགས། །ཐེག་མཆོག་རྒྱུད་སྡེ་ཆེན་པོ་རྣམས་དང་ཡང་། །དགོངས་པ་གཅིག་དང་དབྱངས་གཅིག་ཉིད་གྱུར་པ། །སྤྱན་རས་གཟིགས་དབང་སྒྲོལ་མའི་ཐུན་མོང་ངོར། །ལྷ་མཆོག་བདེ་འབྱུང་ཡབ་ཡུམ་རྣམ་རོལ་པའི། །སྐྱེ་རྒུའི་མིག་བཟང་འགྱུར་པ་བླང་དོར་རྩིས། །འདི་འདྲ་འདོམས་པར་མཛད་ལ་སུས་མི་གུས། །ཞེས་དང་། རྒྱུད་དེའི་བརྗོད་བྱ་གཙོ་བོ་ལམ་ལྔ་རླུང་རྩིས་ཀྱི་ཐོག་ནས་སྐྱེ་བོའི་བཟང་ངན་བདེ་སྡུག་བརྟག་ཐབས་དང་དཀར་ནག་ཕྱོགས་ཀྱི་ཚེས་སོ་སོ་ལ་དབྱངས་དང་གསལ་བྱེད་སོགས་འཆར་ནུབ་ཀྱི་དབང་གིས་སྐྱེ་བོའི་གནས་སྐབས་ཀྱི་བདེ་སྡུག་བརྟག་ཚུལ། དེ་བཞིན་དུམ་དྲུག་དུས་སྦྱོར་དང་། ཞི་དྲག་གི་འཁོར་ལོ་དུ་མས་གང་ཟག་སྤྱི་དང་བྱེ་བྲག་གི་བདེ་སྡུག གཡུལ་ལས་རྒྱལ་ཕམ་སྟོན་པ་སོགས་རྗོད་བྱེད་ལེའུ་བཅུའི་བདག་ཉིད་ཅན་དེ་བཞིན་བོད་ཡུལ་དུ་དུས་རབས་བཅུ་གཉིས་ཀྱི་ནང་རྒྱ་གར་གྱི་པཎྜིཏ་ཇཡཱནནྡ་དང་། བོད་ཀྱི་མཁས་དབང་གློ་བོ་ལོ་ཙཱ་བ་ཤེས་རབ་རིན་ཆེན་གྱིས་བསྒྱུར། གང་ཉིད་ཀྱི་གཙོས་མཁས་པ་མང་པོས་ཚིག་དོན་གྱི་འགྲེལ་བ་དང་། དཀའ་གནད་ཟུར་བཤད་སོགས་ཡིག་ཆ་མང་པོ་མཛད་ཡོད་ཀྱང་གཡུལ་རྒྱལ་གྱི་རྒྱུད་དེ་ཆེས་གསང་བ་དང་བཀའ་རྒྱ་མ་ཡིན་པས་དེང་སང་ལག་ལེན་ཇི་བཞིན་ཡོད་པ་ནི་ཉིན་མོའི་སྐར་མ་ལས་ཀྱང་ཆེས་དཀོན་པར་འགྱུར་རོ། །དེ་ཡང་རིགས་ལྡན་སྙིང་ཐིག་ལས། གང་དེའི་གསང་ཚིག་བདེ་སྡུག་རྒྱལ་ཕམ་སོགས། །ལྐོག་གྱུར་གནས་ཀུན་སྟོན་བྱེད་ངོ་མཚར་འཕྲུལ། །དྲུག་ཅུའི་རྩ་དགུའི་གྲངས་ལྡན་ཙཀྲའི་དཔེར། །བསྟན་མོད་དེང་སང་མིང་ཙམ་ཤེས་པའང་དཀོན། ཞེས་དང་། དེ་བཞིན་དབྱངས་འཆར་རྒྱུད་ལས་ཀྱང་། སྔོན་ཚེ་ལྷ་དང་ལྷ་མིན་གང་། །བ་སྤུ་ལྡང་བའི་གཡུལ་འགྱེད་ཚེ། །ལྷའི་དབང་པོས་བདག་ལ་དྲིས། །འདི་བཤད་ལྷ་མིན་ཕམ་པར་བྱས། །རྒྱུད་རྣམས་ཀུན་དུ་སྦས་པ་སྟེ། །གསང་བ་ལས་ཀྱང་ཆེས་གསང་བ། །མཆོག་ཏུ་གསང་བ་རྣ་བཞི་པ། །ཤིན་ཏུ་སྦས་འགྲུབ་ལྷ་མོ་ཀྱེ། །ཞེས་གསུངས།  དེའི་ཕྱིར་ངོས་ལྟ་བུ་ལ་རྒྱུད་རྒྱལ་དབྱངས་འཆར་ཐོག་ཐུགས་ཕན་གསོས་པའི་སྐད་ཆ་བཤད་རྒྱུའི་གདེང་ཚོད་དང་སྤོབས་པ་གང་ཡང་མེད། འོན་ཀྱང་མཁས་དབང་བཤེས་གནེན་རྣམས་ཀྱི་མདུན་ས་ལས་གོ་ཐོས་གང་བྱུང་བ་རྣམས་འདིར་སྟོང་མིན་ཙམ་མདོར་བསྡུས་ཏེ་དགོད་པར་བྱ་བ་ལ། 

དབྱངས་དང་འཆར་ཞེས་པའི་ཚིག་གཉིས་པོ་དེ་ལེགས་སྦྱར་སྐད་དོད་དུ་སྭར(स्वर)དང་། ཨུདཡ(उदय)ཟེར་ཞིང་། དེ་ཡང་སྭར་ཞེས་པ་དབྱངས་སམ་དབུགས་ཀྱི་སྐད་དོད་ཡིན་ལ། ང་ཚོས་སྣ་ནས་དབུགས་ཡར་མར་གཏོང་བཞིན་པ་དེ་དང་། ཨུདཡ་ཞེས་པ་སྣའི་བུ་ག་གཡས་གཡོན་གཅིག་ནས་གཅིག་ལ་རིམ་པས་རླུང་འཕོ་བ་དང་འཆར་བའི་དོན་ཡིན་ལ་སྭར་དང་། ཨུདཡ་ཚིག་གཉིས་པོ་དེ་མཚམས་སྦྱོར་བྱས་པས་ སྭརོདཡ་དབྱངས་འཆར་ཞེས་མིང་དུ་བསྒྲུབས་སོ།།

ས+ཝ+ཨ+ར+ཨུ+ད+ཨ+ཡ+ཨ

ས+ཝ+ཨ+ར+ཨོ+ད+ཨ+ཡ+ཨ༼ཨ ཨུ ལ་ཨོའོ།། ཞེས་པའི་མདོས་ཨ་དང་ཨུ་སྦྱར་བས་ཨོ་བསྒྲུབས་སོ།།༽

ས+ཝ+རོ+ད+ཡ ༼དབྱངས་ཀྱི་དམན་པ་ཕ་རོལ་ཏུ་ཡང་དག་པར་སྦྱར་རོ།། ཞེས་པའི་མདོས་སྲོག་མེད་ཡི་གེ་རྣམས་སྲོག་ལྡན་ཡི་གེའི་སྟེང་སྦྱར་རོ།།༽

སྭརོདཡ(स्वरोदय)ཞེས་གྲུབ་བོ།། དེའི་ཕྱིར་སྣའི་བུ་ག་གཡས་གཡོན་ནས་རླུང་རྒྱུག་ཚུལ་ཞིབ་ཕྲ་བརྟག་ནས་བཟང་ངན་བདེ་སྡུག་དུ་མ་ཤེས་པའམ་བཤད་ཐུབ་པའི་རིག་པའི་གཞུང་ལུགས་དེ་ལ་དབྱངས་འཆར་ཟེར་རོ། །དེ་ཡང་ཀུན་གཟིགས་དབྱངས་འཆར་ལས། ལས་ལ་སྤྱོད་དམ་དྲི་བ་ཡི། །རང་གཞན་བདེ་དྭོགས་རྣམ་གྲངས་ནི། །ནད་པས་སྨན་འཐུང་ཇི་བཞིན་དུ། །འཕྲལ་དུ་མྱོང་བར་བསླུ་བ་མེད། །ཞེས་གསུངས་པ་ལྟར། རླུང་འཆར་ཚུལ་དང་ལམ་ལྔའི་རླུང་སོགས་ལ་གོམས་པ་ཡོད་མཁན་རླུང་གི་རྣལ་འབྱོར་པ་ཞིག་གིས་སྣའི་གཡས་གཡོན་གྱི་རླུང་འཆར་ཚུལ་ཞིབ་ཕྲ་བརྟག་ནས་བླང་དོར་གྱི་འབྲས་བུ་བསླུ་བ་མེད་པ་སྟོན་ཐུབ་ལ། ཕྲན་ལྟ་བུ་རླུང་རྒྱུག་ཚུལ་ཐོག་གོམས་པ་གང་ཡང་མེད་པ་ཞིག་གིས་རླུང་འཆར་ཚུལ་གྱི་ཐོག་ནས་འབྲས་བུ་བཟང་ངན་བསླུ་བ་མེད་པ་ཞིག་བཤད་ཐུབ་དཀའ། དེ་ཡང་དབྱངས་འཆར་གཞུང་ལས། ཉི་ཟླའི་ལམ་ནས་རྒྱུ་བ་ཡི། །དབུས་སྟེང་ཀ་འགྲམ་ཐུར་རྒྱུ་བའི། །སྐྱེད་སྡུད་འབྱུང་ལྔའི་ཚུལ་བརྟག་ནས། །གཞན་ལ་བདེ་སྡུག་ལུང་དུ་སྟོན། །ཞེས་པ་ལྟར་ད་ལྟའི་རང་གི་རླུང་སྟེ། ཉི་མའི་རླུང་དང་ཟླ་བའི་རླུང་གང་རུང་རྒྱུག་བཞིན་ཡོད་མེད་དང་། དེ་ཡི་ནང་ནས་ལམ་ལྔའི་རླུང་གི་དཀྱིལ་འཁོར་ལྔ་པོ་བསྐྱེད་རིམ་དང་སྡུད་རིམ་དབྱེ་བས་རླུང་ཁམས་གང་ཞིག་རྒྱུག་བཞིན་ཡོད་མེད་འཁྲུལ་པ་མེད་པར་ངོས་འཛིན་ཏེ་གཞན་ལ་བདེ་སྡུག་བསླུ་བ་མེད་པ་ལུང་དུ་སྟོན་དགོས་ཀྱང་། རླུང་ལ་གོམས་པ་མེད་པ་ཞིག་གིས་ངོས་བཟུང་དཀའོ།། རླུང་གི་དཀྱིལ་འཁོར་ལྔ་ནི། (གཡས་རྒྱུ་སའི་རླུང་དང་། ཆུའི་རླུང་། མེའི་རླུང་། རླུང་གི་རླུང། ནམ་མཁའི་རླུང་བཅས་སྡུད་རིམ་དང་། གཡོན་རྒྱུའི་དཀྱིལ་འཁོར་ལྔ་ནི། ནམ་མཁའི་རླུང་དང་། རླུང་གི་རླུང་། མེའི་རླུང་། ཆུའི་རླུང་། སའི་རླུང་བཅས་བསྐྱེད་རིམ་མོ།།)འདིར་ས་དམིགས་མ་སྟོང་ཙམ་ཞིག་དབྱངས་འཆར་གཞུང་ནས་བཟང་ངན་འབྲས་བུ་བརྟག་ཚུལ་ཇི་ལྟར་བསྟན་པ་འགའ་ཞིག་དཔེ་མཚོན་ཙམ་དུ་དགོད་པར་བྱ་བ་ལ།

༡། ཉི་ཟླ་གང་དུ་རྒྱུ་བའི་ཕྱོགས། །དེ་ནས་སྐྱེ་བོས་གང་དྲིས་པ། །འོང་ངམ་ཞེ་ན་འོང་ཞེས་དང་། །མིན་ནམ་ཞེ་ན་མིན་ཞེས་སོགས། །ཁོ་ཡིས་གང་དྲིས་དེ་བཞིན་སྟོན།།

༢། རྒྱུ་བ་དང་ནི་འདྲི་བའི་ཕྱོགས། །བསྣོལ་ཏེ་གཡས་རྒྱུར་གཡོན་ནས་སམ། །གཡོན་ནས་རྒྱུ་དུས་གཡས་ནས་དྲི། །འགྲུབ་བམ་དྲི་ན་མི་འགྲུབ་དང་། །འཆི་འམ་ཞེ་ན་མི་འཆི་སོགས། དྲིས་པའི་ལན་དུ་བཟློག་སྟེ་སྟོན། །ཐེ་ཚོམ་མེད་པར་འབྲས་བུ་མཐོང་།།

༣། གང་ནས་ཉི་ཟླ་རྒྱུ་བ་ཡི། །ཕྱོགས་ནས་དྲིས་ན་དོན་འགྲུབ་ཅིང་། །གཞན་ནས་དྲི་ན་དོན་རྣམས་མེད། །ཤོ་རྒྱན་ལ་སོགས་རྩོད་པ་ལ། །གང་རྒྱུའི་ལག་པས་བྱས་པས་འགྲུབ།།

༤། ཉི་ཟླའི་རླུང་རྣམས་དབྱུག་ལྔའི་ཡུན། །རིམ་པས་འཆར་བ་བདེ་ལེགས་འགྱུར། །གལ་ཏེ་མ་རྒྱུ་གོ་ལོག་ན། །རྩོད་པ་ལ་སོགས་མི་དགེ་འབྱུང་། །ཟླ་བ་ཕྱེད་གསུམ་བར་དུ་ནི། །གོ་ལོག་རྒྱུ་ན་འཆི་བར་བཤད།  །

༥། སྦྲུམ་མར་ཕོ་མོ་གང་ཡིན་བརྟག་པ་ན། །དྲི་དུས་ཟླ་རླུང་བོུ་དང་། །ཉི་མའི་རླུང་རྒྱུ་ཕོ་རུ་བཤད།།

༦། ཕྲུ་གུ་ཆགས་ཚུལ་སྐབས་སྨན་གཞུང་ལས། ༡ ༣ ༥ ༧ སོགས་བུ་ཕོ་དང་། ༢ ༤ ༦ སོགས་བོུ་ཆགས་པ་གསུངས་པ་ལྟར། འདིར་དབྱངས་འཆར་ལས་ཀྱང་ཕྲུ་གུ་བུ་ཆགས་པར་བྱེད་པ་ལ། གོང་གི ༡ ༣ ༥ ༧ སོགས་ཀྱི་ཉི་མ་དེ་དག་སྟེང་ཕའི་ཉི་མའི་རླུང་དང་། མ་ཡི་ཟླ་བའི་རླུང་རྒྱུག་པའི་དུས་དང་དེ་བཞིན་ནང་གསེས་ས་ཁམས་ཀྱི་རླུང་ངམ་ཆུ་ཁམས་ཀྱི་རླུང་ཡང་འཆར་དགོས་སོ།།

༧། གལ་ཏེ་ཕྲུ་གུ་བོུ་འདོད་ན་གོང་གི་ཉི་མ་༢ ༤ ༦ སོགས་དེ་དག་གི་སྟེང་ཕའི་ཟླ་བའི་རླུང་དང་མའི་ཉི་མའི་རླུང་འཆར་པའི་དུས་ནང་གསེས་ས་ཁམས་ཀྱི་ངམ་ཆུ་ཁམས་ཀྱི་རླུང་འཆར་དགོས་སོ།།

དབྱངས་གསལ་འཆར་ནུབ་དང་བདེ་སྡུག་བརྟག་ཚུལ།

       སྤྱིར་ལེགས་སྦྱར་ལ་དབྱངས་བཅུ་དྲུག་དང་གསལ་བྱེད་སོ་གསུམ་ཡོད། དེ་དག་ནི། ཨ ཨཱ ཨི ཨཱི ཨུ་ཨཱུ རྀ རཱྀ ལྀ ལཱྀ ཨེ ཨཻ ཨོ ཨཽ ཨཾ ཨཿ དབྱངས་དེ་དག་ལས་མཐའ་མ་གཉིས་ཏེ། ཨཾ ཨཿ ཕུད་པའི་དབྱངས་བཅུ་བཞི་ལྷག དེ་ཡི་ནང་ནས་དབྱངས་རིང་པོ་དང་ཐུང་ངུ་གཉིས་ཡོད་པ་དེ་དག་གཅིག་ཏུ་འདྲིལ་བས་ཨ ཨི ཨུ རྀ ལྀ ཨེ ཨོ བཅས་དབྱངས་གསལ་བདུན་ནོ།། དེ་དག་ལས་ཀྱང་། རྀ ལྀ གཉིས་མ་ནིང་ཡིན་པས་དོར། ལྷག་མ། ཨ་ཨི ཨུ ཨེ ཨོ ལྔ་པོ་དེ་དག་རིང་ཐུང་དབྱེ་བས་བཅུ་རུ་བཤད། དེ་ཡང་དུས་འཁོར་འགྲེལ་ཆེན་ལས། རྀ་ཡིག ལི་ཡིག་དག་ཀྱང་ཡོན་ཏན་དང་ལྡན་པས་ཨི་ཡིག་ལ་སོགས་པ་རྣམས་དང་ཁྱད་པར་མེད་དོ།། དེའི་ཕྱིར། ཨ ཨི ཨུ ཨེ ཨོ ཞེས་པ་ནི་བྱིས་པ་རྣམས་ལ་འཇིག་རྟེན་དུ་གྲགས་པའོ།། ཞེས་པ་ལྟར། དཔལ་ལྡན་དུས་འཁོར་ལུགས་སུ་དབྱངས་ལྔ་ནི། ཨ་ཨི རྀ ཨུ ལྀ བཅས་སོ། གསལ་བྱེད་སོ་གསུམ་ལས། ང ཉ ཎ གསུམ་སྤོང་པ་ཡིན། གསལ་བྱེད་ ཀ ནས་ཧའི་ བར་སུམ་ཅུའོ།།

དབྱངས་ལྔ་དང་གསལ་བྱེད་སུམ་ཅུ་དེ་དག་དཀར་ཕྱོགས་ཚེས་གཅིག་ནས་ཉ་ཡི་བར་ལ་དབྱངས་རིང་པོ་ལྔ་ལན་གསུམ་འཁོར་ཞིང་། གསལ་བྱེད་ཀ་ནས་ད་ཡི་བར་བཅོ་ལྔ་འཆར་རོ།། དེ་བཞིན་ནག་ཕྱོགས་ཚེས་གཅིག་ནས་བཟུང་སྟེ་སྟོང་གི་བར་ལ་དབྱངས་ཐུང་ངུ་ལྔ་ལན་གསུམ་བསྐོར་ཞིང་གསལ་བྱེད་དྷ་ནས་ཧ་ཡི་བར་བཀོད། སྐབས་འདིར་མར་ངོ་སྔོན་འགྲོ་དབྱངས་འཆར་གྱི་ལུགས་འདིར་དཀར་ཕྱོགས་ལ་འཇིག་རྟེན་པའི་ལུགས་དང་རྒྱབ་འགལ་དུ་ཡོད་དོ།། མདོར་ན་འཇིག་རྟེན་པའི་ལུགས་དང་བསྟུན་ན་ཡར་ངོ་སྔོན་འགྲོའི་ཚེས་གཅིག་ནས་ཉ་ཡི་བར་དབྱངས་ཐུང་ངུ་ལྔ་པོ་ལན་གསུམ་འཁོར་བ་དང་གསལ་བྱེད་དྷ་ནས་ཧ་ཡི་བར་དང་། མར་ངོའི་ཚེས་གཅིག་ནས་སྟོང་གི་བར་དབྱངས་རིང་པོ་ལན་གསུམ་གསལ་བྱེད་ཀ་ནས་ད་ཡི་བར་དུ་འཁོར་རོ།།

དབྱངས་གསལ་འཆར་ནུབ་སོགས་ལ་བཟང་ངན་བདེ་སྡུག་བརྟག་ཚུལ་དཔེ་མཚོན་འགའ་ཞིག་འགོད་ན།

༡། དགའ་བའི་ཚེས ༡ ༦ ༡༡ ལ་རེས་གཟའ་མིག་དམར་དང་། རྒྱུ་སྐར་སྨིན་དྲུག དབྱངས་ཨ་ཡིག་རྣམས་འཛོམས་པ་དང་། དེ་བཞིན་བཟང་པོའི་ཚེས ༢ ༧ ༡༢ རེས་གཟའ་ལྷག་པ་དང་། རྒྱུ་སྐར་མཆུ། དབྱངས་ཨི་འཛོམས། རྒྱལ་གྱི་ཚེས་༣ ༨ ༡༣ རེས་གཟའ་ཕུར་བུ་དང་། རྒྱུ་སྐར་སྐག དབྱངས་ཨུ་འཆར་བ། སྟོང་གི་ཚེས ༤ ༩ ༡༤ རེས་གཟའ་པ་སངས་དང་། རྒྱུ་སྐར་མོན་གྲུ། དབྱངས་ཨེ་འཛོམས། རྫོགས་པའི་ཚེས་ ༥ ༡༠ ༡༥ རེས་གཟའ་སྤེན་པ། རྒྱུ་སྐར་བྲ་ཉེ། དབྱངས་ཨོ་རྣམས་འཛོམས་པར་འགྱུར་ན། དབྱངས་ལྔ་པོ་དེ་དག་གི་མིང་ཅན་རྣམས་ལ། ན་འཆི་རྨ་འབྱུང་འབྲས་བུ་མེད། གཡུལ་དང་བག་མ་ལ་སོགས་པའི། །མཐའ་དག་བྱ་བ་རྣམ་པར་འཛེམས། །ཞེས་གསུངས་སོ། །དེ་བཞིན་དུས་འཁོར་རྒྱུད་འགྲེལ་ལས། དེ་ལྟར་དབྱངས་འཆར་བ་རྣམས་ལ་ཡང་རྒྱུ་སྐར་དང་གཟའི་དབང་གིས་འཆི་བའི་སྦྱོར་བར་འགྱུར་རོ། །ཞེས་གསུངས་སོ།།

༢། དབྱངས་གསལ་ནུབ་ཚུལ་ནི། དེ་ཡང་དབྱངས་འཆར་གཞུང་ལས། གང་འཆར་དེ་ནས་བརྩམས་པ་ཡི། །བྱིས་སོགས་གནས་སྐབས་ལྔ་རུ་བགྲང་། །ལྔ་པ་ཤི་དེ་ནུབ་པ་ཡིན། །ན་ཚོད་ཀྱི་ནི་དཔེ་ཡིས་བཤད། །གསལ་བྱེད་ལ་ཡང་དེ་བཞིན་སྦྱར། །བཟང་གསུམ་ངན་པ་གཉིས་སུ་འདོད། །ཞེས་པ་ལྟར། དཔེར་ན་གཤམ་འཁོད་རེའུ་མིག་བཞིན།

དབྱངས་འཆར་ལུགས་ཀྱི་དཀར་ཕྱོགས་སུ་དབྱངས་འཆར་ནུབ།

དབྱངས་འཆར་ལུགས་ཀྱི་ནག་ཕྱོགས་སུ་དབྱངས་འཆར་ནུབ།

དབྱངས་འཆར་ལུགས་ཀྱི་དཀར་ཕྱོགས་གསལ་བྱེད་འཆར་ནུབ་རེའུ་མིག

དབྱངས་འཆར་ལུགས་ཀྱི་ནག་ཕྱོགས་གསལ་བྱེད་འཆར་ནུབ་རེའུ་མིག

གོང་གི་དབྱངས་གསལ་ཡི་གེ་ལས། །བྱིས་པ་བཟང་ཞིང་དེ་ལས་ནི། །གཞོན་ནུ་བཟང་གསུངས་དེ་ལས་ཀྱང་། །ལང་ཚོར་བབས་ན་ཤིན་ཏུ་བཟང་། །རྒ་བ་ངན་ཞིང་ཁྱད་པར་དུ། །མིང་གི་དབྱངས་གསལ་ནུབ་ན་ངན། དེཡང་། གསལ་བྱེད་ནུབ་པས་ནད་འབྱུང་སྟེ། །དབྱངས་ནུབ་པས་ན་འཆི་བ་སྟེར། །དེ་ཕྱིར་རང་གི་དབྱངས་གསལ་ནི། །དར་ཞིང་དགྲ་མིང་ནུབ་པའི་དུས། །དགྲ་ལ་རྒོལ་པར་ལྷ་ཡིས་གསུངས།

༣། གཞན་ཡང་སྐྱེ་བོའི་བདེ་སྡུག་བརྟག་སྐབས་སུ། གང་ཟག་སོ་སོའི་སྐྱེས་སྐར་རམ་མིང་སྐར་ལ་དྲག་གཟའི་གནོད་པ་མཆེ་གདོང་སོགས་ཡོད་མེད་ཞིབ་ཕྲ་བརྟག་དགོས། དེ་ཡང་གཡུལ་རྒྱལ་གཞུང་ལས། དེ་ནས་གནོད་པ་དྲུག་འཛིན་བརྟག །གང་གིས་གནོད་ན་གཟའ་ཡིས་ཏེ། །གང་ལ་གནོད་ན་རྒྱུ་སྐར་དབྱངས། གསལ་བྱེད་ཁྱིམ་དག་ལའོ། །གནོད་ཚུལ་མཆེ་གདོང་མཐོང་ས་དང་། །དུ་སོལ་མེ་ཡི་ཚུལ་དུ་གནོད། །ཞེས་པའོ།། དེ་བཞིན་འཁོར་ལོ་གསུམ་འཛོམས་ཞེས་བྱ་བ། །གཡས་གཡོན་མཆེ་བ་གདོང་དང་བཅས། །དུས་གཅིག་འཛོམས་པའི་སྐྱེ་མིང་ཅན། །གླང་ཆེན་མྱོས་པའི་མཆེ་བ་ཡིས། །བླངས་ནས་ཟ་བར་བྱེད་དང་མཚུངས། །ཞེས་པ་ལྟར། དཔེར་ན། གང་ཟག་ཞིག་གི་སྐྱེས་མིང་སྐར་མ་བྲ་ཉེ་ལ། དྲག་གཟའ་མིག་དམར་ལྟ་བུར་གཡས་མཆེ་དང་། དྲག་གཟའ་སྤེན་པ་ལྟ་བུར་གཡོན་མཆེ། དེ་བཞིན་སྡིག་གཟའ་ཀེ་ཏུ་ལྟ་བུར་གདོང་ཚུགས་འཁེལ་ན་འཁོར་ལོ་གསུམ་འཛོམས་ཡིན་པས་གང་ཟག་དེ་ལ་ཤིན་ཏུ་ནས་ངན་པར་བཤད།

༤། སྐར་མའི་འཕོ་མཚམས་ལས་བཟང་ངན་འབྲས་བུ་དཔེ་མཚོན་ཞིག་འགོད་ན། དེ་ཡང་། མཚམས་ན་གནས་པའི་སྐར་མ་བརྒྱད། (ཤར་ལྷོ་སྐག་དང་མཆུ། ལྷོ་ནུབ་ས་ག་དང་ལྷ་མཚམས། ནུབ་བྱང་བྱི་བཞིན་དང་མོན་གྲེ། བྱང་ཤར་ན་བྲ་ཉེ་དང་སྨིན་དྲུག་བཅས་སོ།། ) སྔ་མ་རྫོགས་པའི་ཆུ་ཚོད་ལྔ། །ཕྱི་མ་སླེབས་པའི་ཐོག་མ་ནས། །བརྩམས་པའི་དུས་ཀྱི་ཆུ་ཚོད་ལྔ། །རྫོགས་དང་ཟུག་པའི་དབྱུགས་གུ་བཅུར། །རང་གི་ཕྱོགས་ལས་ཕྱོགས་གཞན་སྤང་། ཁྱད་པར་སྐར་མ་དེ་གཉིས་ཀྱི། །རྫོགས་དང་ཟུག་པའི་དབྱུག་གཅིག་ལ། །ཟླ་བ་སྤྱོད་ཚེ་འགྲུལ་བྱས་ན། །ཚུར་ལ་ཁྱིམ་དུ་མི་ལྡོག་ཅིང་། །གང་བརྩམ་མི་འགྲུབ་འདི་སྤང་དགོས། །ཞེས་གསུངས་སོ།།

༥། དེ་བཞིན་ཕོ་ཉས་བརྗོད་པའི་དབྱངས་ཀྱི་གྲངས་རྣམས་ལ་བརྟག་ཏེ་བཟང་ངན་བཤད་པ་དང་། བཟའ་ཟླ་ཕོ་མོའི་མིང་གི་དབྱངས་གསལ་གྲངས་ལ་རྩིས་ཏེ་ཕྲུ་གུ་ཕོ་མོ་གང་སྐྱེས་བརྟག་ཚུལ། དེ་ཡང་དབྱངས་འཆར་གཞུང་ལས། ཕོ་མོའི་མིང་ཡིག་ལུས་ཡན་ལག །སོ་སོར་བསྲེ་ལ་ལུས་བཞི་དང་། །ཡན་ལག་མེས་བསྒྱུར་གཅིག་ཏུ་བསྡོམ། །དེ་ལ་གསུམ་གྱིས་དོར་བ་ཡིས། །གཅིག་ཐིག་བུ་སྐྱེས་གཉིས་བུ་མོ། །ཞེས་དང་། མིང་གི་དབྱངས་གསལ་གྲངས་ལ་རྐུན་མ་ངོས་འཛིན་བྱ་ཚུལ། སྔ་ཕྱིའི་སྐྱེ་བ་བརྟག་ཚུལ་སོགས་གྲངས་ལས་འདས་པ་ཡོད་ཀྱང་རེ་ཞིག་འདིར་གླེང་བར་མི་བྱའོ།

༦། དེ་བཞིན་སྒྲ་གཅན་འཁོར་ལོ་ལ་སོགས་པའི་གཟའ་སྐར་ཚེས་སོགས་ཀྱིས་ནུས་པས་རང་ཉིད་གཡུལ་སོགས་ལས་རྒྱལ་ཐབས་དང་ཕྱོགས་མཚམས་གང་ནས་རྩོམ་དགོས་མིན་སོགས་དུ་མ་གསུངས་ཡོད། དཔེར་ན། རྩ་བའི་སྒྲ་གཅན་ཐེབས་ཕྱོགས་གཡུལ་བཤམ་ན། ཕ་རོལ་ཁྱབ་འཇུག་སྟོབས་དང་ལྡན་ན་ཡང་། །ཐལ་བར་ཡང་ནི་བརླག་པར་བྱེད་པས་ན། །དུས་ལྷ་ཀུན་བཏང་འདི་ཉིད་གཅིག་པུ་གཟུང་། །ཞེས་དང་། དེ་བཞིན་དབྱངས་འཆར་རྒྱུད་ལས། བུད་མེད་དབྱུག་ཐོགས་གཅིག་གིས་ནི། །སྐྱེས་པ་མཚོན་ཐོག་བརྒྱ་ཡང་ཐུལ། །ཞེས་གསུངས་སོ།།

༧། དེ་བཞིན་ཉིན་ཞག་གཅིག་གི་དུས་བཟང་ངན་བརྟག་ཚུལ། དུས་སྦྱོར་ཕྱེད་པའི་རིགས་ལྡན་དང་། ཐུན་མཚམས་རཱ་ཧུ། མིག་དམར་གྱི་རཱ་ཧུ་སོགས་དུ་མ་བསྟན་ཡོད་པས། ཉིན་ཞག་གཅིག་གི་ཐུན་ཕྱེད་ཉེར་བཞི་ལ་རིགས་ལྡན་འཆར་དུས་སུ་སྨན་དཔྱད་གཏར་སྲེག་སོགས་བྱས་ཚེ་དུག་ཏུ་འགྱུར་ཚུལ་དང་། དུག་སྦྲུལ་གྱིས་སོས་བཏབ་པ་དང་འདྲ་བར་གསུངས་སོ།། །།

མཐའ་མའི་འདོན་ཐེངས་།: 14.09.2015 ཉིན། 9:47 AM