རྒྱ་གར་ལྷོ་ཕྱོགས་ཁུལ་གྱི་གསོ་རིག་སྨན་པར་དེབ་སྐྱེལ་ལག་འཁྱེར་བསྩལ།

འགྲོ་ཕན་སྨན་རྩིས་ཁང་གི་སྤྱི་ཁྱབ་འགན་འཛིན་སྐུ་ངོ་ཐུབ་བསྟན་ཚེ་རིང་མཆོག་དང་བཟང་སྤྱོད་མཁས་པའི་ཚོགས་ཆུང་གི་ཚོགས་མི་སྨན་པ་འཆི་མེད་སྒྲོལ་དཀར་ལགས་གཉིས་ནས་འབྲེལ་མཐུད་གནང་བའི་ཐོག  རྒྱ་གར་ལྷོ་ཕྱོགས་གསོ་རིག་སྨན་པ་རྣམས་ལ་དེབ་སྐྱེལ་ལག་འཁྱེར་མཁོ་སྤྲོད་ཆོག་པའི་དབང་ཚད་འགན་ཁྲིད་ལྡན་པའི་སྨན་པ་དེབ་སྐྱེལ་དང་བཟང་སྤྱོད་ཚོགས་ཆུང་གི་གཙོ་འཛིན་བཻདྱ་རཱཀེཤ་ཤརྨཱ་མཆོག་གིས་སྣེ་ཁྲིད་དབུས་གཞུང་ཨཱཡུཥ་ལྷན་ཁང་གི་རྒྱལ་ཡོངས་རྒྱ་གར་སྨན་གྱི་ལམ་ལུགས་ལྷན་ཚོགས་ཀྱི་སྐུ་ཚབ་ཚོགས་ཆུང་ཞིག་འདི་ཟླའི་ཚེས་ ༨ ཉིན་སྨན་རྩིས་ཁང་སྦེང་ལོར་མཐོ་སློབ་ཁང་དུ་ཆེད་ཕེབས་གནང་ཡོད། དེ་ཉིན་ལྷོ་ཕྱོགས་ཁུལ་གྱི་སྨན་རྩིས་ཁང་གི་ཡན་ལག་སྨན་ཁང་ཁག་ཏུ་ཞབས་འདེགས་ཞུ་བཞིན་པའི་ལས་ཐོག་སྨན་པ་ཉེར་གཅིག་དང་། སྨན་རྩིས་ཁང་གི་སྨན་པ་ཟུར་པ་བཞི། ལྕགས་པོ་རིའི་དྲན་རྟེན་བོད་སྨན་སློབ་གཉེར་ཁང་གི་སྨན་པ་གཅིག་བཅས་ཁྱོན་གསོ་རིག་སྨན་པ་ཉེར་དྲུག་དེབ་སྐྱེལ་ཟིན་རྗེས་ལག་འཁྱེར་བསྩལ་ཐོབ་བྱུང་ཡོད།

དེ་ནས་སྐུ་ཚབ་ཚོགས་མི་རྣམས་སྦེང་ལོར་སྨན་རྩིས་མཐོ་སློབ་ཁང་གི་དཔེ་མཛོད་དང་། འགྲེམ་སྟོན་ཁང་། སྨན་ཁང་བཅས་དེ་གའི་ཁོར་ཡུག་ལ་འཚམས་གཟིགས་གནང་ཡོད། འདི་ལྟར་སྨན་རྩིས་ཁང་སྦེང་ལོར་མཐོ་སློབ་འཛིན་སྐྱོང་ནས་ཆེད་ཕེབས་སྐུ་ཚབ་ཚོགས་ཆུང་དང་། དེ་བཞིན་སྨན་རྩིས་ཁང་གི་འགན་འཛིན་མཆོག་དང་སྨན་པ་འཆི་མེད་སྒྲོལ་དཀར་ལགས་བཅས་ནས་མཐུན་སྦྱོར་གནང་བར་ཐུགས་རྗེ་ཆེ་ཞུས་གནང་འདུག

གནས་ཚུལ་འབྱུང་ཁུངས། 

https://bcollege.men-tsee-khang.org/ncism-registration-for-men-tsee-khang-sorig-doctors-in-south-india/

མཐའ་མའི་འདོན་ཐེངས་།: 31.03.2023 ཉིན། 11:44 AM