སྨན་རྩིས་དྲ་བ། - མདུན་ངོས།

རིན་ཆེན་བཙོ་ཐལ་སྐོར་གསར་འགོད་གསལ་བསྒྲགས།
བརྗོད་བྱ་སྤེལ་མཁན། རྩོམ་སྒྲིག་པ། (admin) ཟླ་ཚེས། 10.08.2018
མདུན་ངོས། >>

རིན་ཆེན་བཙོ་ཐལ་སྐོར་གསར་འགོད་གསལ་བསྒྲགས།

ཕྱི་ལོ་ ༢༠༡༨ ཟླ་ ༨ ཚེས་ ༡༠ ཉིན་སྨན་རྩིས་མཐོ་སློབ་ཚོགས་ཁང་དུ་སྨན་རྩིས་ལས་བྱེད་དང་གསར་འགོད་པ་མང་པོ་ཞིག་འཛོམས་པའི་ཐོག་བཞུགས་སྒར་བོད་ཀྱི་སྨན་རྩིས་ཁང་གི་འགན་འཛིན་མཆོག་དང་། སྨན་པ་གཙོ་བོ་ཚེ་དབང་རྟ་མགྲིན་མཆོག སྨན་སྦྱོར་སྡེ་ཚན་འགན་འཛིན་སྨན་རམས་པ་འཇམ་དབྱངས་བཀྲིས་ལགས། ཉམས་ཞིབ་སྡེ་ཚན་འགན་འཛིན་སྨན་རམས་པ་རིག་འཛིན་བཟང་མོ་ལགས་བཅས་ཀྱིས་རིན་ཆེན་བཙོ་ཐལ་དང་འབྲེལ་བའི་གསལ་བཤད་ཀྱིས་གསར་འགོད་གསལ་བསྒྲགས་གལ་ཆེན་ཞིག་བསྐྱངས་གནང་ཡོད།

བར་སྐབས་གང་ཟག་རེ་ཟུང་གིས་བོད་སྨན་ནང་དངུལ་ཆུ་ཡོད་ཚུལ་སོགས་བབ་ཅོལ་གཏམ་གླེང་བྱས་པ་ལ་བརྟེན་ནས་རང་རེའི་སྤྱི་ཚོགས་ཁྲོད་བོད་ཀྱི་གསོ་བ་རིག་པར་རྒྱུས་མངའ་མེད་པ་རྣམས་དང་། དམིགས་གསལ་གཞོན་སྐྱེས་ཉུང་ཤས་ཤིག་སོམ་ཉི་ནང་ཚུད་ཡོད་སྲིད་པ་བཅས་ལ་དགོངས་ཏེ། དེ་རིང་སྨན་རྩིས་ཁང་གི་འགན་འཛིན་མཆོག་ནས་རྒྱལ་སྤྱིའི་ནང་དངུལ་ཆུའི་ཐོག་ཁྲིམས་དང་འབྲེལ་བའི་གནས་ཚུལ་བྱུང་རིམ་སྐོར་དང་། དེ་བཞིན་ཉམས་ཞིབ་སྡེ་འགན་ནས་བདུད་རྩི་བཅུད་ཀྱི་རྒྱལ་པོ་བཙོ་ཐལ་ནང་གི་དངུལ་ཆུའི་བྱེད་ནུས་དང་བདེ་འཇགས་རང་བཞིན་ལ་ཞིབ་འཇུག་བྱས་པའི་གྲུབ་འབྲས་སོགས་ཀྱི་སྐོར། སྨན་སྦྱོར་སྡེ་འགན་ནས་དངུལ་ཆུ་བཙོ་བཀྲུ་ཆེན་མོའི་ལག་ལེན་རྒྱུད་རིམ་ཁག་གི་སྐོར། སྨན་པ་གཙོ་བོ་མཆོག་ནས་ལོ་ངོ་བཅུ་ཕྲག་བཞི་ལྷག་ཙམ་རིང་ནད་པར་བརྟག་དཔྱད་སྨན་བཅོས་ཀྱི་ཉམས་མྱོང་ཕུན་སུམ་ཚོགས་པ་ཡོད་ལ། ལྷག་པར་བཙོ་ཐལ་བཞུགས་པའི་རིན་ཆེན་རིལ་བུ་སོགས་ནད་པར་བཏང་བའི་ཕན་སྐྱེད་བསམ་གྱིས་མི་ཁྱབ་པ་བྱུང་བའི་དཔེ་མཚོན་འགའ་ཞིག་སྐོར་གསལ་བཤད་བྱས་ཡོད་ལ། གསལ་བསྒྲགས་གྲུབ་རྗེས་གསར་འགོད་པའི་དྲི་བར་ལན་འདེབས་ཀྱང་གནང་ཡོད། གཤམ་དུ་གསར་འགོད་གསལ་བསྒྲགས་སྐབས་གསལ་བཤད་གནང་བ་ཡོངས་རྫོགས་ཉན་བདེ་བའི་ཆེད་དུམ་བུར་བཅད་དེ་སོ་སོར་བཞག་ཡོད་ན་གསན་གནང་བར་ཞུ།