༄༅།། མཚུངས་མེད་ཡོན་ཏན་མགོན་པོའི་གསོལ་འདེབས་དད་བརྒྱའི་པདྨོ་བཞད་པ་བཞུགས་སོ།།

༈ ནམོ་གུརུ་གུཎ་ནཱཐཱཡ།། མ་ལུས་ཕྱོགས་དུས་རྒྱལ་བ་སྲས་བཅས་ཀྱི།། མཁྱེན་བརྩེ་ནུས་པའི་ཡོན་ཏན་གཅིག་བསྡུས་ཉིད།། གངས་ཅན་འགྲོ་བའི་མགོན་པོ་གཡུ་ཐོག་པ།། མཚུངས་མེད་བླ་མ་ཁྱེད་ལ་གསོལ་བ་འདེབས།། གང་སྐུའི་གསང་བ་བརྟན་གཡོ་ཀུན་ལ་ཁྱབ།། གཞོམ་མེད་རྡོ་རྗེའི་གསུང་གི་ཆོས་ཀུན་མཛོད།། ཇི་ལྟ་ཇི་སྙེད་མཁྱེན་པས་ཤེས་བྱ་གཟིགས།། བདེ་ཆེན་རྡོ་རྗེའི་སྐུ་ལ་གསོལ་བ་འདེབས།། མཚན་དཔེའི་དཔལ་འབར་ལྟ་ན་སྡུག་པའི་སྐུ།། བདེ་ཆེན་གཟི་བྱིན་སྟོང་གིས་ལྷམ་མེ་བ།། དྲན་པའི་མོད་ལ་དངོས་གྲུབ་རྣམ་གཉིས་སྟེར།། ཡིད་བཞིན་ནོར་བུ་ཁྱེད་ལ་གསོལ་བ་འདེབས།། འཕྲིན་ལས་རྒྱལ་བ་ཀུན་དང་མཉམ་གྱུར་ཀྱང་།། ཉམ་ཐག་ནད་པའི་ཚོགས་ལ་རྗེས་བརྩེ་བའི།། གསུང་གི་འཕྲིན་ལས་གངས་ཅན་གསོས་སུ་སྨིན།། སྨན་པའི་རྒྱལ་པོ་ཁྱེད་ལ་གསོལ་བ་འདེབས།། འཇམ་དཔལ་དཔའ་བོས་རྗེས་བཟུང་རིག་པའི་གནས།། ཀུན་མཁྱེན་མུ་སྟེགས་རྒོལ་བ་རྩོད་པས་བཅོམ།། རྒྱ་བོད་འཛིན་མའི་ཁྱོན་ལ་ཉི་ལྟར་གསལ།། མཁས་པའི་ཁྱུ་མཆོག་ཁྱེད་ལ་གསོལ་བ་འདེབས།། མེ་ཆུ་གཅན་གཟན་རྐུན་པོ་ལ་སོགས་པ།། ལྟ་སྟངས་ཙམ་གྱིས་བཏུལ་ཞིང་གནས་ཡུལ་འགྲིམས།། རྣམ་མང་སྤྲུལ་པས་ཌཱ་ཀི་དབང་དུ་བསྡུས།། གྲུབ་པའི་དབང་ཕྱུག་ཁྱེད་ལ་གསོལ་བ་འདེབས།། པདྨ་འབྱུང་གནས་མགོན་པོ་ཀླུ་སྒྲུབ་དང་།། འཚོ་བྱེད་གཞོན་ནུ་མཉམ་མེད་དྭགས་པོ་སོགས།། གང་འདུལ་རོལ་པར་སྟོན་པ་ང་ཉིད་ཅེས།། བདེན་པའི་ཞལ་བཞེས་གནང་ལ་གསོལ་བ་འདེབས།། སྨན་བླ་མི་བསྐྱོད་རྒྱལ་བའི་ཡེ་ཤེས་སྐུ།། དེ་ལས་ཅུང་ཟད་གཡོ་བ་མེད་བཞིན་དུ།། སྣ་ཚོགས་སྤྲུལ་པའི་རོལ་པ་ཆུ་ཟླ་བཞིན།། གང་འདུལ་མོས་ངོར་སྣང་ལ་གསོལ་བ་འདེབས།། རྡོ་རྗེའི་ལུས་ཀྱི་འབྱུང་འཁྲུགས་གསོ་བ་དང་།། རྗེས་འབྲེལ་གསང་སྔགས་ཟབ་མོའི་སྨིན་གྲོལ་གྱིས།། སྐལ་ལྡན་གདུལ་བྱའི་ཚོགས་རྣམས་རྗེས་བཟུང་སྟེ།། རྫུ་འཕྲུལ་སྣ་ཚོགས་སྟོན་ལ་གསོལ་བ་འདེབས།། གངས་ཅན་འདི་ན་ཕན་དང་བདེ་བའི་སྒོ།། ཇི་སྙེད་སྣང་བར་མཛད་ནས་གཟུགས་ཀྱི་སྐུ།། སྐྱེ་འཆི་ལས་འདས་མཁའ་སྤྱོད་བདེ་ཆེན་དུ།། མངོན་སུམ་བྱོན་པར་མཛད་ལ་གསོལ་བ་འདེབས།། བསྙེན་སྒྲུབ་གཞན་ལ་ལོ་ཟླར་འབད་པ་ལས།། གང་ཉིད་ཡུད་ཙམ་དྲན་པ་དོན་ཆེ་ཞིང་།། ཞག་བདུན་གསོལ་བཏབ་ངེས་པར་རྗེས་འཛིན་ཞེས།། ཞལ་བཞེས་བསླུ་མེད་མཛད་ལ་གསོལ་བ་འདེབས།། སྲས་བཅས་རྒྱལ་བའི་ཐུགས་རྗེ་རབ་མཉམ་ཡང་།། སྙིགས་འགྲོ་སྐལ་པ་དམན་རྣམས་སྐྱོབ་པའི་ཕྱིར།། སྲས་བཅས་རྒྱལ་བའི་འཕྲིན་ལས་ང་ཡིན་པས།། བྱིན་རླབས་མྱུར་ཞེས་གསུངས་ལ་གསོལ་བ་འདེབས།། དེ་ཕྱིར་མགོན་པོ་ཁྱེད་ལ་སྙིང་ནས་ནི།། མོས་གུས་གདུང་ཤུགས་དྲག་པོས་གསོལ་འདེབས་ན།། སྙིགས་མའི་དུས་སྐྱེས་ནད་གདོན་སྡུག་བསྔལ་གྱི།། འཇིགས་པས་ཉེན་པ་བདག་ལ་སྐྱོབ་མཛོད་ཅིག། ལས་ཉོན་འཁྲུལ་བའི་སྦུབས་སུ་འཐུམས་པ་བདག། རང་གི་ཉེས་པས་སྲས་བཅས་རྒྱལ་བ་ཡི།། འཕྲིན་ལས་འཇུག་པའི་ཡུལ་དུ་མ་གྱུར་པས།། སྐྱབས་བྲལ་ཡིད་ཆད་བདག་ལ་ཐུགས་རྗེས་གཟིགས།། ཁྱེད་ལས་རེ་ས་སྐྱབས་གནས་གཞན་མེད་པས།། མཁྱེན་བརྩེ་ནུས་པའི་བདག་ཉིད་རིགས་གསུམ་དང་།། དབྱེར་མེད་བླ་མ་སྙིགས་མའི་འགྲོ་བ་ཡི།། མགོན་པོ་གཅིག་པུས་བདག་ཅག་མ་འདོར་ཅིག། བདག་གིས་ནམ་མཁའ་ཇི་སྲིད་འགྲོ་ཀུན་དང་།། ཁྱད་པར་སྐལ་དམན་སྡུག་བསྔལ་གྱུར་པ་ལ།། ཕན་འདོད་སྙིང་རྗེའི་དམ་བཅའ་འདི་འཛིན་ན།། མཁྱེན་ནུས་བརྩེ་བའི་དབང་བསྐུར་བདག་ལ་སྩོལ།། འདི་ནས་བྱང་ཆུབ་སྙིང་པོར་མཆིས་ཀྱི་བར།། འབྲལ་མེད་རིགས་ཀྱི་བདག་པོར་དགྱེས་བཞུགས་ནས།། རྒུད་པ་ཀུན་བྲལ་དངོས་གྲུབ་ཡིད་བཞིན་འཐོབ།། མགོན་པོ་ཁྱེད་དང་དབྱེར་མེད་འགྲུབ་པར་ཤོག།     མི་ཕམ་པས་གང་ཤར་དུ་མྱུར་བར་གསོལ་བ་བཏབ་པ་དགེ་ལེགས་འཕེལ།།

མཐའ་མའི་འདོན་ཐེངས་།: 04.07.2024 ཉིན། 12:52 PM