ཡན་ལག་སྨན་ཁང་གསར་པ་དབུ་འབྱེད།
 

༄༅། །ཕྱི་ལོ་ ༢༠༢༥ ཟླ་ ༡ ཚེས་ ༡༤ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་ཉེ་འདབས་སུ་འགྲོ་ཕན་བོད་ཀྱི་སྨན་རྩིས་ཁང་གི་ཡན་ལག་སྨན་ཁང་གསར་བཙུགས་ཀྱིས་དབུ་འབྱེད་མཛད་སྒོ་སྟབས་བདེ་ཞིག་སྔ་དྲོ་ཆུ་ཚོད་ ༡༠:༣༠ ཐོག་ཚོགས་གནང་ཡོད། དེ་ཡང་རྡ་ས་རིགས་ལམ་སློབ་གཉེར་ཁང་གི་སྤྱི་ཁྱབ་འགན་འཛིན་དགེ་བཤེས་བསམ་གཏན་རྒྱ་མཚོ་ལགས་ཀྱིས་སྨན་ཁང་དབུ་འབྱེད་གནང་བ་དང་བྱང་རྩེ་གྲྭ་ཚང་གི་དགེ་འདུན་པ་བཞི་ནས་རབ་གནས་སོགས་ཆོས་ཕྱོགས་ཀྱི་ཕྱག་ལེན་མཐའ་དག་བསྐྱངས་གནང་སོང་། དབུ་འབྱེད་མཛད་སྒོར་སྨན་རྩིས་ཁང་གི་འགན་འཛིན་དང་། རིག་འགན། དྲུང་ཆེ། དེ་བཞིན་སྡེ་ཚན་ཁག་གི་འགན་འཛིན་བཅས་ཆེད་བཅར་ཞུས་ཡོད། ཡན་ལག་སྨན་ཁང་དེ་ཉིད་གཙོ་བོ་ཐེག་ཆེན་ཆོས་གླིང་གཙུག་ལག་ཁང་དུ་འཛམ་གླིང་ས་ཕྱོགས་གང་སར་ནས་གནས་གཟིགས་ལ་ཕེབས་མཁན་གྱི་ཆོས་ཞུ་བ་དང་། ཡུལ་སྐོར་བ། དེ་བཞིན་ནད་མནར་ཅན་ཀུན་ལ་བོད་སྨན་གྱི་ཁེ་ཕན་ཐོབ་སླད་བཙུགས་པ་ཞིག་ཡིན།

མཐའ་མའི་འདོན་ཐེངས་།: 15.01.2025 ཉིན། 4:07 PM