སྦེང་ལོར་དུ་འཇམ་དཔྱད་སྨན་ཁང་གསར་འཛུགས།

རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་ཀོ་ར་མངྒལ་ས་གནས་སུ་སྨན་རྩིས་ཁང་གི་འཇམ་དཔྱད་ཁང་ཞིག་གསར་བཙུགས་ཞུས་ཡོད། དེ་ཡང་ཟླ་འདིའི་ཕྱི་ཚེས་ ༡༢ ཉིན་གདན་ས་བཀྲིས་ལྷུན་པོ་ནས་རིན་པོ་ཆེ་དཔལ་ལྡན་སེང་གེ་མཆོག་ཆེད་མངགས་གདན་ཞུས་ཀྱིས་འཇམ་དཔྱད་ཁང་ལ་རབ་གནས་མཛད་ཡོད། ཕྱི་ཚེས་ ༡༤ རེས་གཟའ་ལྷག་དཀར་ཉིན་གྱི་སྔ་དྲོ་ཕྱག་ཚོད་ ༡༠ སྟེང་འཇམ་དཔྱད་ཁང་དེའི་དབུ་འབྱེད་མཛད་སྒོར་དམིགས་བསལ་སྐུ་ངོ་ལྷོ་སྤྱི་ཆོས་འཕེལ་ཐུབ་བསྟན་ལགས་དང་། སྦེང་ལོར་ཡན་ལག་སྨན་ཁང་གི་སྦྱིན་བདག་ཨ་མ་ཀུམ་ཀུམ་བྷགྰརིཡ་གཙོས་གཞུང་འབྲེལ་དང་གཞུང་འབྲེལ་མིན་པའི་ཚོགས་པ་ཁག་གི་འགན་འཛིན་རྣམས་ཕེབས་ཞུགས་གནང་ཡོད།

འཇམ་དཔྱད་ཁང་དེར་ཐུན་མིན་བོད་ཀྱི་གསོ་རིག་ལུགས་ཀྱི་དུགས་དང་། ལུམས། བསྐུ་མཉེ་བཅས་འཇམ་དཔྱད་རིགས་ཀྱི་འཕྲོད་བསྟེན་ཞབས་འདེགས་ཀྱི་མཐུན་རྐྱེན་ལོངས་སུ་སྤྱོད་རྒྱུ་ཡོད་པ་མ་ཟད། སྐམ་ཁབ་དང་གསེར་ཏེལ། དེ་བཞིན་ནད་པར་བལྟ་རེག་གི་བརྟག་དཔྱད་སྨན་བཅོས་ཀྱང་ཞུ་རྒྱུ་ཡོད། ད་ལྟའི་ཆར་འཇམ་དཔྱད་སྨན་པ་པ་སངས་ཚེ་རིང་ལགས་དང་ཕྱག་རོགས་ལས་བྱེད་གསུམ་ཡོད།

མཐའ་མའི་འདོན་ཐེངས་།: 21.03.2018 ཉིན། 10:34 AM