༄༅། །འགྲོ་ཕན་སྨན་རྩིས་ཁང་ཞེས་མཚན་བྱང་སླར་གསོ།

བཙན་བྱོལ་དུ་འབྱོར་རྗེས་མགོན་པོ་གང་ཉིད་ཀྱིས་སྒྲིག་འཛུགས་འདིའི་ཐོག་མའི་མཚན་ལ་འགྲོ་ཕན་སྨན་རྩིས་ཁང་ཞེས་བསྩལ་ཡོད་ཀྱང་བར་སྐབས་ཤིག་ནས་མཚན་བྱང་ལ་བསྒྱུར་བཅོས་རིམ་པ་ཁག་གཅིག་ཕྱིན་ཡོད། ད་ཆ་དགའ་ལྡན་ཕོ་བྲང་གི་ཡིག་ཚང་ནས་དགོངས་འཆར་ཕེབས་པ་བཞིན་སྨན་རྩིས་ཁང་འགན་འཛིན་ལྷན་ཚོགས་ནས་ཀྱང་སླད་མར་བོད་ཡིག་ཏུ་འགྲོ་ཕན་སྨན་རྩིས་ཁང་ཞེས་མཚན་བྱང་སླར་གསོ་མཛད་རྒྱུ་ཡིན་པའི་སྐོར་འགན་འཛིན་མཆོག་ནས་གསལ་བསྒྲགས་ཤིག་བསྐྱངས་པའི་འདྲ་བཤུས་འདི་ལྟར།

ཡིག་ཨང་། འགན་ལས། ཡོངས་གསལ། ༢༠༢༢། ༢༣༥༣

༄༅། །བོད་ཀྱི་སྨན་རྩིས་ཁང་ཞེས་པའི་མཚན་བྱང་ཇི་ལྟར་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གིས་ཐོག་མར་མཚན་གསོལ་མཛད་པ་བཞིན་འགྲོ་ཕན་སྨན་རྩིས་ཁང་ཞེས་པར་བཅོས་རྒྱུའི་སྐོར།

མཁྱེན་གསལ་ལྟར། ཕྱི་ལོ་ ༡༩༥༩ ལོར་བོད་དུ་དུས་འགྱུར་ཆེན་པོ་བྱུང་སྟེ་རང་རེའི་བླ་ན་མེད་པའི་དབུ་འཁྲིད་སྤྱི་ནོར་ྋགོང་ས་ྋསྐྱབས་མགོན་ྋསྐུ་ཕྲེང་བཅུ་བཞི་པ་ཆེན་པོ་མཆོག་རྒྱ་གར་འཕགས་པའི་ཡུལ་དུ་ྋཞབས་སོར་འཁོད་ཅིང་། འགྲོ་བའི་ཕན་བདེ་འབའ་ཞིག་གི་ཐུགས་བསྐྱེད་ཆེན་པོའི་འོག་ནས་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་སླད་གཞིས་ཆགས་དང་། སློབ་གྲྭ། ཆོས་སྡེ། རིག་གཞུང་གི་བསྟི་གནས་བཅས་ཇི་སྙེད་ཅིག་གསར་འཛུགས་སམ་སླར་གསོ་བསྐྱངས་པའི་ཁྲོད། སྙན་གྲགས་ཀྱི་བ་དན་སྲིད་རྩེར་བསྒྲེང་བའི་ལོ་རྒྱུས་མངའ་བ་གཅིག་ནི་སྨན་རྩིས་ཁང་འདི་ཉིད་ཡིན་ཅིང་། དེ་ཡང་མགོན་པོ་གང་ཉིད་ནས་སྨན་དང་རྩིས་ཀྱི་བསྟན་པའི་མེ་རོ་སོར་ཆུད་མཛད་སྐབས་ཚོགས་པའི་མཚན་དུ་འགྲོ་ཕན་སྨན་རྩིས་ཁང་ཞེས་འདོགས་གནང་མཛད་ཡོད་པ་ནི་ལོ་རྒྱུས་ཀྱི་དཔེ་དེབ་ཁག་ཏུ་འཁོད་པ་ཙམ་དུ་མ་ཟད། ད་ཡོད་ལས་བྱེད་རྒན་རབས་རྣམ་པའི་ངག་རྒྱུན་དུའང་གསལ་ཞིང་། དཔལ་ལྡན་དགའ་ལྡན་ཕོ་བྲང་གི་ཡིག་ཚང་ནས་ཀྱང་ལོ་རྒྱུས་རྟེན་འབྲེལ་སོགས་ལ་བསམས་ཏེ་སྔར་གྱི་མཚན་བྱང་སླར་གསོ་ཐུབ་ན་དགེ་་མཚན་ཡོད་ལུགས་དགོངས་འཆར་ཕེབས་པ་སྨན་རྩིས་ཁང་གི་འགན་འཛིན་ལྷན་ཚོགས་ཐེངས་ ༡༠༩ ཐོག་སྙན་སེང་བཀའ་འཁྲོལ་ཞུ་ཐོབ་བྱུང་བ་བཅས་ལ་བརྟེན། སླད་ཕྱིན་སྨན་རྩིས་ཁང་གི་བོད་ཡིག་མཚན་བྱང་དུ་འགྲོ་ཕན་སྨན་རྩིས་ཁང་ཞེས་པར་བཅོས་རྒྱུ་ལགས་པ་དེ་དོན་དགོངས་འཇགས་ཞུ། འགྲོ་ཕན་སྨན་རྩིས་ཁང་གི་སྤྱི་ཁྱབ་འགན་འཛིན་ལས་ཁུངས་ནས་ཕྱི་ལོ་ ༢༠༢༢ ཟླ་ ༨ ཚེས་ ༩ ལ།།

༼འགན་འཛིན།༽ མཚན་རྟགས་དང་དམ་ཕྲུག

མཐའ་མའི་འདོན་ཐེངས་།: 31.03.2023 ཉིན། 11:49 AM