༄༅། །སྨན་རྩིས་ཁང་དབུ་བརྙེས་ནས་མི་ལོ་ ༡༠༣ དང་བྱེས་སུ་བསྐྱར་འཛུགས་བསྐྱངས་ནས་ལོ་ངོ་ ༥༨ འཁོར་བའི་

                                         དུས་དྲན་མཛད་སྒོའི་སྟེང་སྨན་རྩིས་ཁང་འགན་འཛིན་གྱི་གསུང་བཤད།

སྤྱི་ལོ་ ༢༠༡༩ ནི་༸རྒྱལ་དབང་༸སྐུ་ཕྲེང་བཅུ་གསུམ་པ་ཆེན་པོས་བོད་ཀྱི་རྒྱལ་ས་ལྷ་སར་སྨན་རྩིས་ཁང་ཕྱག་བཏབ་ནས་མི་ལོ་ ༡༠༣ འཁོར་བ་དང་། བཞུགས་སྒར་ངྷ་རམ་ས་ལར་༸རྒྱལ་དབང་༸སྐུ་ཕྲེང་བཅུ་བཞི་པ་ཆེན་པོས་སྨན་རྩིས་ཁང་བསྐྱར་འཛུགས་མཛད་ནས་མི་ལོ་ ༥༨ འཁོར་བའི་རྗེས་དྲན་མཛད་སྒོའི་སྟེང་ཆིབས་བསྒྱུར་བསྐྱངས་པའི་མགྲོན་གྱི་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་དང་།  དམིགས་བསལ་སྐུ་མགྲོན་ཀང་ར་རྫོང་གི་སྨན་པ་གཙོ་བོ་ Dr. Gurdarshan Gupta མཆོག  བོད་མིའི་སྒྲིག་འཛུགས་ཀྱི་མཛད་གཙོ་ལས་ཟུར་རྣམ་པ། རྒྱ་གར་གྲོགས་པོ་རྣམ་པ།  སྨན་རྩིས་ཁང་འགན་འཛིན་ལྷན་ཚོགས་ཀྱི་ཚོགས་མི་རྣམ་པ། ༸སྐུ་བཅར་སྨན་པ་རྣམ་པ།  གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག་གི་ཚོགས་གཙོ་དང་རྒྱུན་ལས་རྣམ་པ།  གསར་འགོད་པ་རྣམ་པ། དེ་བཞིན་སྨན་རྩིས་ཁང་གི་ལས་བྱེད་དང་ལས་མི། བགྲེས་ཡོལ་བ་རྣམ་དང་།  སློབ་ཕྲུག་བཅས་ལ་འཚམས་འདྲིའི་བཀྲིས་བདེ་ལེགས་ཞུ་རྒྱུ་ཡིན།

སྒྲིག་འཛུགས་འདིའི་ཞུ་བྱའི་གཙོ་བོར་གྱུར་པའི་ལས་འགན་གལ་ཆེ་ཤོས་ནི་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་༸སྐུའི་འཕྲོད་བཞེས་ཞབས་ཞུ་ལས་ལྷག་པ་མ་མཆིས་སྟབས། སྐུའི་འཕྲོད་བཞེས་ཞབས་ཞུ་སྨན་པ་རྣམས་ནས་མགོན་པོ་གང་ཉིད་ཀྱི་༸སྐུའི་འཕྲོད་བཞེས་དང་མཐུན་པའི་ལྗགས་སྨིན་གསོལ་སྨན་ཁག རྒྱུད་གཞུང་མན་ངག་དང་མཐུན་པར་སྦྱོར་འབུལ་ཞུ་བཞིན་པ་དང་། སྐར་དཔྱད་རྩིས་རིག་སྡེ་ཚན་ནས་སྐུ་ཡི་དགུང་ཀེག་ཀེག་རྩིས་རིགས་ཀྱང་འཚེམས་ལུས་མེད་པར་འབུལ་ལམ་ཞུ་བཞིན་པ་ཡིན།  ༸རྒྱལ་བའི་སྐུ་བཅར་སྨན་པ་རྣམ་དང་སྐར་རྩིས་པ་གཙོ་བོ་ཙམ་མིན་པ་སྡེ་ཚན་མང་པོའི་ལས་བྱེད་མང་པོར་དགའ་ལྡན་ཕོ་བྲང་གི་ཕྱག་ལས་ཐོག་རམ་འདེགས་ཞུ་རྒྱུའི་གོ་སྐབས་མང་པོ་ཡོད་པ་དགའ་ངོམས་དགོས་པ་ཞིག་ཡིན། 

མི་ཤུགས་གོང་སྤེལ་སྡེ་ཚན་ཁོངས་ལས་བྱེད་དང་། ལས་མི། སློབ་ཕྲུག་བཅས་ཀྱི་རྣམ་གྲངས།

  ད་ལྟའི་ཆར་སྨན་རྩིས་ཁང་དུ་ངོ་བོ་དང་ལས་འགན་གྱི་ཐོག་ནས་འཛིན་སྐྱོང་ཁོངས་སྡེ་ཚན་ཁག་ ༡༡ དང་། རིག་གཞུང་ཁོངས་སྡེ་ཚན་ ༡༡ བཅས་སྡེ་ཚན་ ༢༢ དང་།  འཛིན་སྐྱོང་ཚགས་ཚུད་དང་མཉམ་རུབ་ཆེད་སྒྲིག་གསལ་ལས་ཀའི་ངོ་བོའི་ཆ་ནས་དབང་ཚད་བགོ་འགྲེམས་བྱས་པའི་ཚོགས་ཆུང་ཁག་ ༩ བཅས་ཡོད།

སྨན་སྦྱིན་ཞབས་ཞུ།
སྨན་རྩིས་ཁང་ནས་ཉམ་ཐག་དང་། ལོ་ན་ ༦༥ ཡན། བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད། བོད་ནས་གསར་དུ་འབྱོར་བ། སྨན་རྩིས་ཁང་གི་ལས་བྱེད་དང་སྡོད་གཅིག་ནང་མི། ནད་གཞི་འབྲས་ནད། གློ་གཅོང་། གཉན་ནད་རེག་དུག མཆིན་ནད་དུག་ཐབས་བཅས་ལྕི་བོ་ཡོད་པའི་ནད་པ། བོད་མི་སྒྲིག་འཛུགས་ཀྱི་འཕྲོད་བསྟེན་བལྟ་སྐྱོང་ཆེད་སྨན་རིན་བརྒྱ་ཆ་ ༡༠། ཆག་ཡང་།  གྲྭ་བཙུན། སློབ་ཕྲུག་བཅས་ལ་སྨན་སྦྱིན་ཕྱེད་བཅག་ཕུལ་བ་ཟླ་རེར་ཆ་སྙོམས་བྱས་ན་ཧིན་སྒོར་འབུམ་ ༣༣ ཙམ་གཏོང་བཞིན་ཡོད་པ་དེ་དག་གཙོ་བོ་ྋརྒྱལ་དབང་ྋསྐུ་ཕྲེང་བཅུ་བཞི་པ་ཆེན་པོ་མཆོག་གི་ཐུགས་རྗེ་བཀའ་དྲིན་དང་། ཡང་སྒོས་རྒྱ་གར་གྱི་གྲོང་ཁྱེར་ཆེ་ཁག་ནང་ཡོད་པའི་སྨན་རྩིས་ཁང་ལ་བསྟེན་གཏུགས་བྱེད་མཁན་གྱི་ནད་པའི་ཞལ་འདེབས་དང་སྨན་རིན་སོགས་ལ་བརྟེན་ནས་བྱུང་བ་ཡིན།

ཉམ་ཐག་གི་ཐོ་གཞུང་འདེམ་སྒྲུག་ལ་མཚོན་ནའང་། བོད་མིའི་སྒྲིག་འཛུགས་ཀྱི་ནང་སྲིད།  ཤེས་རིག  འཕྲོད་བསྟེན་གསུམ་གྱི་ཉམ་ཐག་འདེམ་སྒྲུག་སྲིད་ཇུས་ལས་གུ་ཡངས་པ་ཡོད་པས་སྨན་སྦྱིན་ཞུ་མཁན་གྱི་གྲངས་ཐོ་ཡང་མང་བ་ཡོད། སྨན་རྩིས་ཁང་ལ་མཚོན་ན་ས་གནས་འགོ་འཛིན་སོ་སོས་ཟླ་བ་གསུམ་རེའི་མཚམས་སུ་གནང་བའི་ཐོ་གཞུང་རང་ལ་སྨན་རྩིས་ཁང་ནས་རྩ་འཛིན་བྱེད་བཞིན་ཡོད། ད་དུང་གལ་ཏེ་ཐོ་གཞུང་ཁོངས་མ་ཚུད་པའི་ཉམ་ཐག་ལྷག་བསྡད་རིགས་ཡོད་ན། དེ་ནི་ས་གནས་འགོ་འཛིན་སོ་སོས་འཐུས་ཤོར་དང་ལྷོད་ཡངས་སུ་བཏང་པར་ངོས་འཛིན་ཞུ་རྒྱུ་ཡིན་ཞེས་ངོས་འགན་འཛིན་ས་གནས་ཁག་ལ་རྟོག་ཞིབ་ཏུ་བསྐྱོད་སྐབས་བརྗོད་ཀྱི་ཡོད། 

རྒྱ་ཡིག་སྡེ་ཚན།
ྋརྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གིས་འབྱུང་འགྱུར་རྒྱ་ནག་སྐམ་ས་ཆེན་མོའི་ནང་བོད་ཀྱི་གསོ་བ་རིག་པའི་སྒོ་ནས་ཞབས་འདེགས་ཞུ་ཐུབ་པའི་དུས་ཤིག་ཤར་སྲིད་པའི་སྐོར་བཀའ་སློབ་ཕེབས་པ་ལྟར། འདིའི་ཕྱོགས་ནས་ཀྱང་ད་ལྟ་ནས་སྔོན་འགྲོའི་གྲ་སྒྲིག་ཚུལ་དུ་རྒྱ་ཡིག་སྡེ་ཚན་ཆེད་འཛུགས་ཞུས་ཡོད་པ་མ་ཟད། རྒྱ་ཡིག་གི་སྨན་རྩིས་དྲ་རྒྱ་ཞིག་གསར་བཟོ་བྱས་པ་དེས་རྒྱ་ནག་སྐམ་ས་ཆེན་མོའི་རྒྱ་མི་རིགས་གཙོས་པའི་ཐའེ་ཝན་དང་། སིང་གྷ་པུར། ཧོང་ཀོང་སོགས་འཛམ་གླིང་ཡུལ་གྲུ་གང་སར་གནས་པའི་རྒྱ་རིགས་རྣམས་ལ་ཕན་ཐོགས་ཆེན་པོ་འབྱུང་བཞིན་པ་ར་འཕྲོད་བྱུང་། དེ་བཞིན་ང་ཚོའི་སྨན་པ་ཁག་གཅིག་ཐའེ་ཝེན་གཞུང་དང་སྒེར་གྱི་སྨན་ཁང་དུ་ཀྲུང་དབྱིའི་ལུགས་ཀྱི་སྐམ་ཁབ་ཟབ་སྦྱོང་སླད་བཏང་བ་རྣམས་ད་ལྟ་གསོ་རིག་སྨན་པ་གཞན་ལ་སྐམ་ཁབ་ཟབ་སྦྱོང་སྤྲོད་ཐུབ་པའི་གནས་སྟངས་ཆགས་ཡོད། ལྷག་པར་ Fundamentals of Tibetan Medicine ཞེས་སྨན་རྩིས་ཁང་ནས་རྩོམ་སྒྲིག་ཞུས་ཤིང་།  དེབ་འདི་ཉེ་བའི་ཆར་རྒྱ་ཡིག་སྡེ་ཚན་ནས་རྒྱ་སྐད་ནང་བསྒྱུར་ཏེ་དཔར་བསྐྲུན་ཞུས་ཡོད།  གསོ་རིག་རྒྱུད་བཞི་སྨན་ཐང་བརྒྱད་ཅུའི་འགྲེལ་བཤད་བོད་ཡིག་དང་ཨིན་ཡིག་སྟེང་ཡོད་པ་རྒྱ་ཡིག་ཏུ་བསྒྱུར་བསྒྲིགས་ཟིན་པ་ཡིན།

ལོ་མང་གསུང་ཆོས་གོ་སྒྲིག་གནང་མཁན་ཐའེ་ཝན་ནང་པའི་ཆོས་ཚོགས་ཤིག་ནས་ས་ཆ་མཐུན་འགྱུར་གྱིས་ཐའེ་ཝན་དུ་སྨན་རྩིས་ཁང་གི་ཡན་ལག་ཤིག་འཛུགས་འཆར་དང་། དེར་སྨན་པ་གཅིག་དང་སྐར་རྩིས་པ་གཉིས།  འཛིན་སྐྱོང་ལས་བྱེད་གཅིག་བཅས་གཏོང་འཆར་ཡོད། དེའི་ཆེད་ཐའེ་ཝན་ནས་རྒྱ་སྐད་དགེ་རྒན་ཞིག་གཏོང་གཏན་འཁེལ་ཡང་རྒྱ་གར་གཞུང་ནས་མཐོང་མཆན་དུས་ཡུན་ཐུང་ངུ་ཞིག་ལས་གནང་གི་མེད་སྟབས་མཇུག་སྐྱོང་དགོས་ཀྱི་ཡོད།

སྦེང་ལོར་མཐོ་སློབ།
སྨན་རྩིས་མཐོ་སློབ་ཁང་དེ་བཞིན་སྦེང་ལོར་དུ་གནས་སྤོས་ཆ་ཚང་བ་ཞིག་བྱུང་མཚམས། ད་ལྟའི་བཞུགས་སྒར་སྨན་རྩིས་མཐོ་སློབ་ཁང་དེ་ཉིད་ (ཕལ་ཆེར་སྤྱི་ལོ་ ༢༠༢༡ ཟླ་ ༣ ནང་)  གནའ་སྔ་མོ་ནས་རང་རེའི་བོད་ཀྱི་ཆོས་དང་རིག་གཞུང་གཉིས་ཀྱི་འབྲེལ་བ་དམ་ཟབ་ཡོད་པའི་ཧི་མ་ལ་ཡའི་རི་རྒྱུད་ཁག་དང་། དེ་བཞིན་བལ་ཡུལ། འབྲུག རུ་སུ། སོག་ཡུལ། ཀལ་མིག ཏུ་པ། སྦུ་རི་ཡཏ་སོགས་ཡུལ་གྲུ་ཁག་ནས་དོན་གཉེར་ཡོད་པའི་གཞོན་སྐྱེས་ཕོ་མོ་གྲངས་མཉམ་ལ་བོད་ཀྱི་སྐད་ཡིག་སློབ་ཁྲིད་དང་། དེ་ནས་བོད་ཀྱི་སྐར་རྩིས་རིག་པ་དང་བོད་ཀྱི་གསོ་བ་རིག་པའི་ལུགས་ཀྱི་སྨན་པ་བསྡུས་ར་བའི་རྩ་འཛིན་སློབ་གཞི་ཁག་བཤད་ཁྲིད་མཐར་ཕྱིན་པ་སྤྲད་དེ་སོ་སོའི་ལུང་པར་བོད་ལུགས་གསོ་བ་རིག་པའི་སྒོ་ནས་ཞབས་འདེགས་ཞུ་ཐུབ་པའི་འཆར་གཞི་ངེས་བརྟན་ཡོད།

སྨན་དང་ཐོན་སྐྱེད་ཀྱི་སྤུས་ཚད་སྟངས་འཛིན་ཚོགས་ཆུང་།
སྨན་རྩིས་ཁང་ལ་ཁྲིམས་དང་བཟང་སྤྱོད་གཉིས་ཀྱི་འགན་ཡོད་པའི་ཐོག་སྨན་རྩིས་ཁང་གི་སྨན་དང་ཕྱིར་ཚོང་ཐོན་སྐྱེད་ལ་རྒྱ་ཆེ་མང་ཚོགས་ནས་ཡིད་ཆེས་དང་ཆེ་མཐོང་ཆེན་པོ་གནང་བཞིན་ཡོད་སྟབས། སྨན་རྒྱུའི་རིན་འབབ་ལ་མ་བལྟས་པར་སྨན་རྒྱུ་སྤུས་ལེགས་མཁོ་སྒྲུབ་དང་། སྦྱོར་བཟོ་རྣམས་སྨན་གྱི་གཞུང་ལུགས་ལྟར་ཚད་ལྡན་དགོས་པ་གཞིར་བཞག་སྟེང་། སྤུས་ཚད་སྟངས་འཛིན་ཚོགས་ཆུང་ཞེས་སྨན་པ་གཙོ་བོ་ཚོགས་གཙོར་ཡོད་པའི་ཐོག་སྨན་སྦྱོར་འགན་འཛིན་དང་། སྨན་རྫས་འགན་འཛིན། ཉམས་ཞིབ་འགན་འཛིན། སྔོ་སྦྱོར་འགན་འཛིན། ཚན་རིག་པ་བཅས་ལས་གྲུབ་པའི་སྤུས་ཚད་སྟངས་འཛིན་ཚོགས་ཆུང་ནི་གལ་ཆེའི་ཚོགས་ཆུང་ཞིག་ཡིན།

བླ་བྲང་དང་།  གྲ་ཚང་ཁག་ནས་སྨན་རྩིས་ཁང་ལ་རེ་བ་དང་ཡིད་ཆེས་ཆེན་པོས་གསོལ་སྨན་དང་སྨན་པའི་མཐུན་སྦྱོར་རེ་སྐུལ་ཞུ་མཁན་མང་དུ་འགྲོ་འདུག  སྨན་དང་སྨན་པ་གཉིས་ཀ་སྨན་རྩིས་ཁང་ནས་གཏོང་གནང་ཡོང་བའི་རེ་སྐུལ་ཞུ་མཁན་ལ་ངོས་ལེན་དང་མཐུན་སྦྱོར་གང་ཐུབ་ཞུ་བཞིན་ཡོད་ལ།  སྨན་གཞན་ནས་མཁོ་སྒྲུབ་དང་སྨན་པ་རྒན་པ་ཞིག་སྨན་རྩིས་ཁང་ནས་གཏོང་གནང་ཡོང་བ་དང་།  ཡང་སྨན་དེ་སྨན་རྩིས་ཁང་དང་སྨན་པ་ང་ཚོར་ཡོད་ཞུ་མཁན་རིགས་ལ་ཁས་ལེན་ཞུས་མེད།

སེམས་ཁམས་འཕྲོད་བསྟེན།
དེང་དུས་ཕྱི་ནང་གི་གནས་སྟངས་མང་པོ་ཞིག་གི་རྐྱེན་པས་སེམས་ཁམས་འཕྲོད་བསྟེན་གྱི་བརྗོད་གཞི་དེ། དེ་སྔ་ལས་གལ་ཆེ་བ་ཞིག་ཆགས་ཡོད། དེའི་ཐོག་རང་རེའི་བོད་ཀྱི་སྨན་རྩིས་རིག་པ་གཉིས་ཀྱི་སྒོ་ནས་ཞབས་འདེགས་སྔར་ལྷག་ཞུ་ཕྱིར། འདི་ནས་ཆེད་དུ་བཙུགས་པའི་ལུས་སེམས་སྲོག་གི་སྡེ་ཚན་ནས་གནའ་རབས་དང་དེང་རབས་གཉིས་ལྡན་གྱི་རིག་གཞུང་གསར་རྙིང་མང་པོའི་ཉིང་ཁུ་བསྡུ་ལེན་གང་ཐུབ་མཁོ་འདོན་བྱས་ནས་འགྲོ་བ་མིའི་ལུས་སེམས་གཉིས་ལས་གཙོ་བོ་སེམས་ཁམས་འཕྲོད་བསྟེན་ཞབས་ཞུ་ཚད་མཐོར་ཡོང་ཐབས་ལོ་ལྟར་སེམས་ཁམས་འཕྲོད་བསྟེན་དང་འབྲེལ་བའི་བརྗོད་གཞི་སྣ་ཚོགས་ཐོག་རྒྱལ་སྤྱིའི་རང་བཞིན་ལྡན་པའི་ལུས་སེམས་སྲོག་གི་བགྲོ་གླེང་ཚོགས་ཆེན་བསྐོང་ཚོགས་ཞུ་མུས་ཡིན། ༢༠༡༨ སྤྱི་ཟླ་ ༤ ཚེས་ ༢/༣ ནང་སེམས་ནད་བཅོས་ཐབས་ཞེས་པའི་བརྗོད་གཞིའི་ཐོག་རྒྱལ་ས་དི་ལླིར་༸གོང་ས་མཆོག་གི་ཀུན་ཕན་དགེ་རྩའི་མཉམ་བགྲོ་གླེང་ཚོགས་ཆེན་ཐེངས་བདུན་པ་དེ་ཚུགས་ཡོད། རྒྱུན་ལྡན་བགྲོ་གླེང་ཚོགས་ཆེན་དེ་གཙོ་བོ་རང་རེའི་སྨན་རྩིས་ཁང་དང་བོད་རིགས་སློབ་གཉེར་བ་ལ་དམིགས་ཏེ་འདི་ག་སྨན་རྩིས་ཁང་རང་དུ་གོ་སྒྲིག་ཞུ་བཞིན་ཡོད་པ་དེ་ག་རང་འཇགས་འགྲོ་མུས་སྟེང་། ༢༠༡༧ ནས་བཟུང་བགྲོ་གླེང་ཚོགས་ཆེན་གྱི་བརྗོད་གཞི་གང་ཡིན་པ་དེ་རང་ཐོག་རྒྱ་གར་གྱི་གྲོང་ཁྱེར་ཆེ་ཁག་དཔེར་ན་མུམ་བྷ་ཡི་དང་དི་ལླི་ལྟ་བུ་རྒྱ་གར་བ་ཤེས་ཡོན་ཅན་དང་གནད་ཡོད་མི་སྣ་མང་སའི་ཁྲོད་དུ་གོ་སྒྲིག་ཞུ་ཐུབ་ན་དགེ་མཚན་ཆེན་པོ་ཡོད་པར་མཐོང་བ་བཞིན་གོ་སྒྲིག་བྱེད་བཞིན་ཡོད།  བགྲོ་གླེང་ཚོགས་ཆེན་དེ་ཚོའི་ནང་བགྲོ་གླེང་གང་བྱུང་བ་རྣམས་རིམ་པ་བཞིན་དེབ་གཟུགས་སུ་དཔར་བསྐྲུན་འགྲེམས་སྤེལ་ཞུས་དང་ཞུ་མུས་ཡིན།

ཕྱི་རྒྱལ་ཁག་ཏུ་སྐོར་བསྐྱོད་ལས་རིམ།
ཤར་ནུབ་རྒྱལ་ཁབ་ཁག་ལ་སྨན་སྐོར་དང་གཏམ་བཤད། འགྲེམས་སྟོན། རིག་གཞུང་སྤེལ་རེས་བྱེད་རྒྱུ་ནི་བོད་ཀྱི་གསོ་བ་རིག་པ་དང་རྩིས་ཀྱི་རིག་པ་གཉིས་ཀྱི་བསྟན་པ་འཛམ་གླིང་ཡོངས་ལ་རྒྱས་ཐབས་དང་། སྨན་རྩིས་ཁང་ལ་དཔལ་འབྱོར་གྱི་རྒྱབ་རྟེན་འཚོལ་སྒྲུབ་ཀྱི་ཐབས་ཤེས་ཀྱི་ཆ་ཤས་གལ་ཆེན་ཞིག་ཡིན་པས་ངོས་ནས་སྨན་རྩིས་ཁང་གི་འགན་འཛིན་ལས་འཁུར་ལོ་བདུན་ཞུས་པའི་རིང་སྨན་རྩིས་པ་སྐོར་བསྐྱོད་ཀྱི་གྲངས་འབོར་དེ།  དེ་སྔའི་འགན་འཛིན་རིམ་པ་བཞི་ཡིས་ལོ་བཅོ་ལྔ་རིང་ལས་བརྡབས་བཞི་ཡི་མང་བ་བྱུང་ཡོད་ལ།  དེའི་ཁྲོད་ནས་ཕི་ལི་པིན་ (Philippines) གྱི་སྐོར་བསྐྱོད་གཅིག་པུ་དེ་དཔལ་འབྱོར་གྱི་ཆ་ནས་ཁེ་མེད་གྱོང་མེད་བྱུང་བ་ལས་གཞན་རྣམས་ནས་གསོ་བ་རིག་པ་དང་རྩིས་རིག་པའི་བསྟན་པ་ཁྱབ་སྤེལ་དང་། ལས་བྱེད་མང་པོར་ཉམས་མྱོང།  སྨན་རྩིས་ཁང་ལ་དཔལ་འབྱོར་གྱི་རྒྱབ་རྟེན་གཟེངས་སུ་ཐོན་པ་འཚོལ་སྒྲུབ་ཞུ་ཐུབ་ཡོད།

དམིགས་བསལ་ ༢༠༡༧ ལོར་ཟླ་བ་གཅིག་མ་ཟིན་ཙམ་རིང་སྐབས་ ༡༧ པའི་ཉམས་གསོག་སྨན་པ་བུ་གསུམ་དང་། བུ་མོ་གསུམ་ཨ་རི་ Emory University School of Medicine, University of Minnesota, North Western Health Science University in Minneapolis བཅས་སུ་བཅར་ནས་དེ་གའི་དགེ་སློབ་རྣམས་དང་མཇལ་འཕྲད་དང་། སློབ་ཕྲུག་སྐུ་མགྲོན་གྱི་ངོ་བོར་འཛིན་གྲྭའི་གཏམ་བཤད་ཀྱི་སློབ་ཐུན་འགའ་ཤིག་ལ་གསན་བསམ། ཕྱི་ལུགས་སྨན་པའི་ལས་ཀ་བྱེད་སྟངས་ལ་རྟོག་ཞིབ། རིག་གཞུང་བྱེད་སྒོ་ཁག་ལ་མཉམ་ཞུགས་བྱས་ནས་མྱོང་ཚོར་དང་ཉམས་མྱོང་གསར་པ་གང་མང་བསགས་ཐུབ་པ་བྱུང་ཡོད།  འོན་ཀྱང་ཉམས་གསོག་སྨན་པ་དང་རྩིས་པ་གཉིས་ཀ་ཡོད་པ་ལྟ་སྐོར་གཏོང་ཐེངས་ ༢ དང་ ༣ པར་མཐོང་མཆན་མ་ཐོབ་པར་བརྟེན་བསྐྱོད་ཐུབ་མེད། 

རིན་ཆེན་རིལ་བུའི་སྐོར།

སྨན་རྩིས་ཁང་ནས་བཟོ་སྐྲུན་ཞུས་པའི་རིན་ཆེན་རིལ་བུ་ཁག་བརྒྱད་ཡོད། བོད་རིགས་མང་ཚོགས་ལ་རིན་ཆེན་རིལ་བུའི་ཚོང་སྒྱུར་བྱེད་ལུགས་ད་ལྟ་ཡག་པོ་འགྲོ་བཞིན་པ་འདི་མུ་མཐུད་རྒྱུན་འཁྱོངས་དགོས་གལ་ཆེ། འགྲོ་ལུགས་དེ་ལྟར་བཟོས་དགོས་པའི་རྒྱུ་མཚན་ཡང་བར་སྐབས་དངུལ་རྐྱང་ཁོ་ན་མ་གཏོགས་མི་སེམས་པའི་རང་རིགས་ཚོང་པ་ཁག་གཅིག་གིས་ཐབས་ལམ་སྣ་ཚོགས་བེད་སྤྱོད་བྱས་ནས་སྨན་རྩིས་ཁང་གི་རིན་ཆེན་རིལ་བུ་འབོར་ཆེན་ཐོབ་པར་བྱས་ཏེ་བོད་དུ་བཏང་ནས་སྨན་རིན་ལྡབ་མང་པོ་ལེན་བཞིན་པའི་གནས་ཚུལ་བྱུང་བ་དང་། བཙན་བྱོལ་ནང་གི་རང་རིགས་ལ་རིན་ཆེན་རིལ་བུ་མ་ལྡེང་བའི་རྒྱུ་མཚན་གཅིག་དེར་ཐུག་ཡོད། དེར་བརྟེན་མང་ཚོགས་ཀྱིས་ཀྱང་ཧམ་སེམས་ཆེ་བའི་ཚོང་པ་དག་གི་བེད་སྤྱོད་ལོག་པའི་འོག་མི་ཚུད་པ་བྱ་རྒྱུ་གལ་ཆེ། གང་ལྟར་རིན་ཆེན་རིལ་བུ་ཚོང་སྒྱུར་ཐད་གནས་སྟངས་ཇི་འདྲ་ཞིག་ཡོད་ཀྱང་སྨན་རྩིས་ཁང་གི་ཡན་ལག་སྨན་ཁང་ཁག་གི་ནང་དུ་སྨན་པས་བརྟག་དཔྱད་བྱས་རྗེས་ནད་པ་གང་ཞིག་ལ་རིན་ཆེན་རིལ་བུ་གང་དང་ཐུན་གྲངས་ཇི་ཙམ་གཏོང་དགོས་རིགས་སྨན་པའི་འགན་དབང་ཆ་ཚང་ཡོད་པས་ནད་པའི་ཆེད་དུ་རིན་ཆེན་རིལ་བུ་མ་རག་པའི་སྐད་ཆ་སྦྲང་སྐད་ཙམ་ཡང་མེད་པ་དགོས་རྒྱུ།

སྨན་པ་དགེ་སློང་བསྟན་འཛིན་བྱང་ཆུབ་ལགས་ཀྱི་སྨན་ཁང་རྩིས་ལེན།

སྨན་པ་དགེ་སློང་བསྟན་འཛིན་བྱང་ཆུབ་ལགས་ནི་སྨན་རྩིས་མཐོ་སློབ་ཁང་ནས་སྨན་པ་སྐབས་ ༨ པའི་ཁོངས་སུ་ཕྱི་ལོ་ ༡༩༩༤ ལོར་བསླབ་པ་མཐར་ཕྱིན་པའི་སྨན་པ་ཞིག་ཡིན། ལོ་མང་སྔོན་ནས་ཡུ་རོཔ་ནང་གི་ Poland རྒྱལ་ཁབ་ཀྱི་རྒྱལ་ས་ Warsaw  ནང་དུ་ཁོང་རང་གིས་གསར་འཛུགས་བྱས་པའི་ Institute of Traditional Tibetan Medicine (ITTM) སྲོལ་རྒྱུན་བོད་སྨན་ལྟེ་གནས་ཁང་ཞེས་སྒེར་གྱི་སྨན་ཁང་གཉེར་བཞིན་ཡོད་པ་དང་། སྨན་ཁང་དེ་ནི་ཁྲིམས་མཐུན་དེབ་འགོད་ཡོད་ལ་བོད་སྨན་བསྟེན་གཏུགས་བྱེད་མཁན་ནད་པ་ཧ་ཅང་མང་པོ་ཡོད། འོན་ཀྱང་སྟབས་མ་ལེགས་པ་ཞིག་ལ་སྔ་ལོ་ ༢༠༡༨ ཟླ་ ༤ ཚེས་ ༢༧ དགོང་དྲོ་གློ་བུར་དུ་སྨན་པ་དགེ་སློང་བསྟན་འཛིན་བྱང་ཆུབ་ལགས་འདས་གྲོངས་སུ་གྱུར་བ་རེད། ཁོང་གི་རྗེས་ཤུལ་སྐྱེད་མ་རང་ལོ་ ༩༤ སོན་པ་གཅིག་པོ་ལྷག་པ་དེ་ཡིས་སྨན་ཁང་དེ་༸རྒྱལ་དབང་སྐུ་ཕྲེང་བཅུ་བཞི་པ་མཆོག་ལ་དད་རྫས་ཚུལ་དུ་ཕུལ་ཡོད། ༧གོང་ས་མཆོག་སྔ་ལོ་ཟླ་ ༦ ནང་ ཡུ་རོབ་ Latvia ས་གནས་སུ་ཞབས་ཀྱིས་བཅགས་སྐབས་རྒྱལ་ས་ཝར་སོ་རུ་ཡོད་པའི་སྨན་ཁང་དང་།  པོ་ལནཊ་གྲོང་ཁྱེར་ཆེ་ཤོས་གཉིས་པ་དེ་རུ་ཡོད་པའི་ས་ཁང་སོགས་སྨན་རྩིས་ཁང་ལ་གསོལ་རས་བསྩལ་གནང་ཡོད། དེ་རིང་སླར་ཡང་ཞུ་འདོད་ཞིག་ལ། སྨན་པ་དགེ་སློང་བསྟན་འཛིན་བྱང་ཆུབ་ལྟ་བུ་མི་སྒེར་གཅིག་གིས་དཀའ་ལས་བརྒྱབ་སྟེ་ཁྲིམས་མཐུན་དེབ་འགོད་ཡོད་པའི་སྨན་ཁང་། དེ་ཡང་ཕྱི་ཡི་རྣམ་པ་གཟི་བརྗིད་ལྡན་པ་དེ་ལྟ་བུ་ཞིག་འཛུགས་སྐྲུན་དང་སྨན་ཁང་དེ་ཡག་པོ་བསྐྱངས་ཐུབ་པ་བྱུང་བ་ལ་ང་ཚོས་བསྔགས་བརྗོད་བྱེད་འོས་པ་ཞིག་ཡིན། དེ་ལ་སྨན་རྩིས་ཁང་གི་འགོ་ལས་སྨན་པ་རྣམས་ནས་མིག་ལྟོས་ཡར་འགྲན་དང་ལེགས་ཆ་བླངས་ཏེ་སྔར་ལས་ལྷག་པ་སེམས་ཤུགས་སྐྱེད་དགོས་པ་ཡིན། 

གསོ་བ་རིག་པ་ལ་བོད་སྨན་ལབ་ཆོག

གཡུ་ཐོག་ཡོན་ཏན་མགོན་པོས་རྩོམ་སྒྲིག་བྱས་པའི་དཔལ་ལྡན་རྒྱུད་བཞི་དང་། དེ་བཞིན་བོད་གངས་ཅན་ལྗོངས་ཀྱི་མཁས་པ་རྣམས་ཀྱིས་མཛད་པའི་སྨན་གཞུང་རྣམས་གཞི་རྩར་བཞག་སྟེ་སློབ་གཉེར་བྱེད་པ་དང་། གཞུང་དེ་དག་ནང་བསྟན་པའི་བརྟག་ཐབས་རིག་པ་དང་། སྨན་རྫས་མཁོ་སྒྲུབ། སྨན་སྦྱོར་ལག་ལེན་བཅས་ཀྱི་སྒྲོམ་གཞི་དེ་ལ་བསྟན་བཅོས་ཀྱི་ཐ་སྙད་དུ་བོད་ཀྱི་གསོ་བ་རིག་པ་ཞེས་པ་དང་། ཡོངས་གྲགས་དམངས་ཁྲོད་དུ་བོད་སྨན་ཞེས་སྒྲ་གཏིང་ཚུགས་པ་ཞིག་གྱུར་ཟིན་མོད། བོད་ཀྱི་ཁྱིམ་མཚེས་ཀྱི་ཡུལ་ལུང་འབྲུག་དང་། བལ་ཡུལ། སོག་པོ་ལ་སོགས་པའི་ནང་དུ་ལག་བསྟར་བཞིན་པའི་སྨན་གྱི་རིག་པ་དེ་ང་ཚོའི་བོད་ཀྱི་གསོ་བ་རིག་པའི་སྒྲོམ་གཞི་དེ་ཉིད་དང་གཅིག་མཚུངས་ཤིག་ཡིན་ན་དེ་ལའང་བཟང་སྤྱོད་སྒོ་ནས་བོད་སྨན་ཞེས་འབོད་དགོས་པ་ཡིན། དེང་སང་བོད་ཀྱི་གསོ་བ་རིག་པ་ལ་གསོ་རིག་ཁོ་ན་མ་གཏོགས་བོད་དང་བོད་སྨན་ཞེས་པའི་ཐ་སྙད་ཙམ་ཡང་བེད་སྤྱོད་གནང་བདེ་མེད་པའི་གནས་བབ་འདི་ཆབ་སྲིད་ཀྱིས་རིག་གཞུང་བྱེ་བྲག་པ་ཞིག་གི་འབྱུང་ཁུངས་ལ་རྩིས་མེད་གཏོང་བའི་རང་གཤིས་ལས་མ་འདས། འོན་ཀྱང་ང་ཚོ་བོད་མིས་ད་དུང་ཡང་བོད་སྨན་ལ་བོད་སྨན་ཞེས་འབོད་པ་འདི་ང་ཚོའི་ལྷན་སྐྱེས་སུ་ཡོད་པའི་ཐོབ་ཐང་ཞིག་ཡིན། དཔེར་ན་ང་ཚོ་བོད་པས་དུས་ད་ལྟའི་བར་དུ་དཔལ་ནྰ་ལེན་དྲའི་ཆོས་བརྒྱུད་དྲི་མ་མེད་པར་ཐོས་བསམ་སྒོམ་གསུམ་གྱི་སྒོ་ནས་ལུང་རྟོགས་ཀྱི་བསྟན་པ་འཛིན་སྐྱོང་བྱས་པ་ན་བོད་ཀྱི་ནང་ཆོས་ཞེས་འཛམ་གླིང་ཡོངས་ལ་གྲགས་ཤིང་དེ་ལྟར་འབོད་པ་ལ་དཀའ་ངལ་གང་ཡང་མེད། དེ་བཞིན་དུ་ང་ཚོའི་མེས་པོ་དམ་པ་རྣམས་ཀྱིས་བོད་ཀྱི་གསོ་བ་རིག་པའི་ཁྱད་ནོར་ལ་གཅེས་སྤྲས་བྱས་པ་དེ་ལའང་མུ་མཐུད་ནས་བོད་སྨན་ཞེས་འབོད་པར་དཀའ་ངལ་གང་ཡང་འཕྲད་དགོས་དོན་མེད།

བོད་སྨན་གྱི་ཡར་རྒྱས་དང་ཉེན་ཁ།

སྨན་རྩིས་ཁང་དང་། སྨན་རྩིས་ཁང་གིས་བཟོ་སྐྲུན་བྱས་པའི་སྨན་རིགས། སྨན་རྩིས་ཐོན་དོངས་བཅས་ལ་རྒྱ་གར་ཙམ་དུ་མ་ཟད་བོད་དུ་རང་རིགས་རྣམས་ཀྱིས་ཀྱང་ཡིད་ཆེས་དང་གདེང་འཇོག་ཆེན་པོ་གནང་བཞིན་ཡོད། དེ་ནི་གཙོ་བོ་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོས་བཀའ་སློབ་ལམ་སྟོན་གང་ཕེབས་པ་སྙིང་ལ་བཅངས་པའི་སྒོ་ནས་གོམ་པ་མདུན་སྐྱོད་ཀྱིས་ཡར་རྒྱས་ཀྱི་འབྲས་བུ་ཞིག་ཡིན། ཡར་རྒྱས་གོང་འཕེལ་དང་ལྷན་དུ་གདོང་ལེན་བྱེད་དགོས་པའི་ཉེན་ཁ་ཞིག་ཀྱང་ཡོང་བཞིན་པ་ནི། ལོ་ཤས་སྔོན་ནས་སྨན་རྩིས་ཁང་གི་མིང་བེད་སྤྱོད་ལོག་པ་བཏང་སྟེ་སྨན་དང་རིན་ཆེན་རིལ་བུ། བདུག་སྤོས་སོགས་སྨན་རྩིས་ཁང་གི་མ་ཡིན་བཞིན་དུ་སྨན་རྩིས་ཁང་གི་ཡིན་ཁུལ་བཤད་པ་དང་། སྨན་རྩིས་ཁང་གི་མིང་དུ་བརྫུས་ཏེ་སྨན་རིགས་མང་པོ་བོད་དུ་བཏང་ཡོད་པའི་གནས་ཚུལ་རབ་དང་རིམ་པ་མང་པོ་བྱུང་ཡོད། བོད་རིགས་མང་ཚོགས་ནས་མི་ངན་དག་གི་བསླུ་བྲིད་འོག་མི་ཚུད་པའི་ཆེད་དུ་སྨན་རྩིས་ཁང་ནས་དེ་སྔ་གསར་འགོད་གསལ་བསྒྲགས་ཤིག་ཀྱང་སྤེལ་ཡོད། དེ་ལྟར་རང་རིགས་མི་ངན་ཉུང་ཤས་ཤིག་གི་བྱས་ཉེས་དབང་གིས་སྨན་རྩིས་ཁང་དང་བོད་སྨན་ལ་མཚན་ཤས་བཟོ་བའི་ཉེན་ཁ་ཡོད་མུས་སྟེང་། བོད་རིགས་མ་ཡིན་པ་ནས་དེ་ལྟའི་ཉེན་ཁ་མེད་པའང་མ་ཡིན། ཡང་།  ཚད་ལྡན་གསོ་རིག་མཐོ་སློབ་ཁང་ནས་སློབ་ཐོན་བྱུང་བའི་སྨན་པ་མ་ཡིན་པའམ། ནུས་པ་ཕྱོགས་བསྡུས་ལྟ་བུར་བལྟས་ཏེ་བོད་སྨན་ཉམས་ལེན་བྱེད་པས་བོད་སྨན་སྤྱི་ལ་མིང་ཆད་ངན་པ་འཕོག་སྲིད་པ་ཡིན། ལྷག་པར་སྨན་པ་དེ་ལྟ་བུ་ནུབ་ཕྱོགས་སོགས་ཕྱི་རྒྱལ་ཡུལ་ཕྲུ་ཁག་ཏུ་སླེབ་སྐབས་སྐུ་ཚབ་དོན་གཅོད་སོགས་བོད་མིའི་གནས་ཡོད་དབུ་ཁྲིད་མི་སྣ་རྣམས་ཀྱིས་ངེས་པར་དུ་དོ་དམ་ཡིད་གཟབ་གནང་རོགས་ཞེས་འབོད་སྐུལ་ཞུ་རྒྱུ་ཡིན།

སུད་སིའི་ནང་དུ་བོད་སྨན་གསུམ་དེབ་སྐྱེལ་བྱ་རྒྱུ།

སུད་སིའི་གཞུང་གིས་སྔོ་སྨན་ཐོག་འཛིན་པའི་ཁྲིམས་ལ་བསྐྱར་བཅོས་མཛད་དེ་སྤྱི་ལོ་ ༢༠༡༩  ཟླ་ ༡ ཚེས་ ༡ ཉིན་ནས་དངོས་སུ་ལག་བསྟར་དབུ་འཛུགས་ཞུས་ཡོད། ང་ཚོའི་བོད་སྨན་དེ་ཡང་སུད་སིའི་སྨན་སྦྱོར་ལག་ལེན་ལམ་ལུགས་འོག་གི་ཁ་སྐོང་སྨན་གྱི་སྡེ་ཚན་གྱི་ཆ་ཤས་སུ་ངོས་འཛིན་ཞུས་ཡོད། འདི་ག་སྨན་རྩིས་ཁང་ནས་གོ་སྐབས་བཟང་པོ་དེ་དམ་འཛིན་བྱེད་པའི་སྒོ་ནས་ཐོག་མར་སྨན་པ་བསྟེན་མི་དགོས་པར་སྨན་རྩིས་ཁང་གིས་བཟོ་སྐྲུན་བྱས་པའི་སྨན་གལ་ཆེ་བ་གསུམ་དེབ་སྐྱེལ་ངོས་འཛིན་ཡོང་བའི་འབད་བརྩོན་ཞུ་རྒྱུ་ཡིན།

ཀུན་ཕན་ཚོགས་པར་གཞོགས་འདེགས།

བར་སྐབས་ཤིག་ནས་རང་རེའི་བཙན་བྱོལ་བོད་པའི་སྤྱི་ཚོགས་ཆུང་ངུ་འདིའི་ནང་དུའང་རང་རིགས་ན་གཞོན་གང་འཚམ་ཞིག་སྨྱོ་རྫས་ངན་གོམས་དབང་དུ་ཚུད་དེ་མཇུག་འབྲས་ཡ་ང་བ་མྱོང་བཞིན་པ་ཀུན་གྱིས་མཐོང་གསལ་ལྟར་ཡིན། ཀུན་ཕན་ལྟེ་གནས་ཁང་གིས་བོད་རིགས་ངན་གོམས་ལང་ཤོར་བ་རྣམས་ལ་དུས་ཡུན་རིང་པོ་ནས་ལམ་སྟོན་དང་སྨན་བཅོས་གང་ལེགས་གནང་ཡོད་ཀྱང་། བོད་རིགས་རང་གི་ཆེད་དུ་ནད་གསོ་ཁང་ཞིག་ཟུར་འཛུགས་དགོས་ངེས་སུ་གཟིགས་ཏེ་དྷ་ས་སྣེ་ལེན་ཁང་ཉེ་འགྲམ་དུ་ཀུན་ཕན་ནད་གསོ་ཁང་ (Kunphen Recovery Centre) ཞེས་པ་ཞིག་གསར་རྒྱག་ཞུས་ནས་ངན་གོམས་ལང་ཤོར་བ་རྣམས་ལ་སྨྱོ་རྫས་ངན་གོམས་སྐོར་ལེགས་ཉེས་བླང་དོར་གྱི་གོ་བསྐོན་སློབ་གསོ་དང་། ཕན་ཚུན་བགྲོ་གླེང་། སྨན་བཅོས་སོགས་ལས་རིམ་གཟེངས་སུ་ཐོན་པ་སྐྱོང་བཞིན་ཡོད་པ་ལ་ངས་ཡི་རངས་བསྔགས་བརྗོད་ཞུ་རྒྱུ་ཡིན། འདི་ག་སྨན་རྩིས་ཁང་ནས་ཀྱང་ཀུན་ཕན་ནད་གསོ་ཁང་གི་ནད་པ་རྣམས་ལ་བོད་སྨན་སྒོ་ནས་འཕྲོད་བསྟེན་ཞབས་འདེགས་ཞུ་བའི་ཆེད་དུ་ཟླ་རེ་མཚམས་སུ་ང་ཚོའི་སྨན་པ་རྒན་པ་ཞིག་སྐོར་སྐྱོད་དུ་ཕེབས་ཏེ་བརྟག་དཔྱད་སྨན་བཅོས་དང་ཟས་སྤྱོད་སློབ་སྟོན། དེ་བཞིན་སེམས་ཁམས་ལ་ཕན་པའི་བསླབ་བྱ་རྒྱག་བཞིན་ཡོད། གཞན་ཡང་ན་གཞོན་དེ་དག་ལ་ས་གནས་རང་དུ་ཉིན་ཕྱེད་རིང་ལས་ཀ་གོ་སྒྲིག་ཞུས་པ་མ་ཟད། ང་ཚོའི་དབུས་ཀྱི་ལས་མི་དང་གཅིག་མཚུངས་གླ་ཆ་ཡང་སྤྲོད་བཞིན་ཡོད། དགེ་ཕན་མངོན་སུམ་ཡོད་པའི་ལས་གཞི་འདི་ཡིས། ན་གཞོན་རྣམས་ཀྱི་ལག་རྩལ་གསར་པ་ཞིག་ཤེས་པའི་སྒོ་ནས་འབྱུང་འགྱུར་འཚོ་བའི་ནང་ཕན་ཐོགས་ཕྲན་བུ་འབྱུང་བའི་རེ་བ་དང་། ལྷག་པར་ཉམས་ཞིབ་སྡེ་ཚན་ནས་བོད་ཀྱི་གསོ་བ་རིག་པའི་སྨན་བཅོས་བྱས་པ་ལ་བརྟེན་ནས་སྨྱོ་རྫས་ངན་གོམས་ཀྱི་ནད་ལ་ཕན་བསྐྱེད་བརྟག་ཐབས་ཀྱི་ཉམས་ཞིབ་ཀྱི་ལས་གཞི་གསར་པ་ཞིག་འགྲོ་མུས་ཡིན། 

ཐུགས་རྗེ་ཆེ་ཞུའི་ལོ་སྲུང་བརྩི།

བོད་མིའི་སྒྲིག་འཛུགས་བཀའ་ཤག་ནས་ཕྱི་ལོ་ ༢༠༡༨ དེ་རྒྱ་གར་གཞུང་མང་ལ་ཐུགས་རྗེ་ཆེ་ཞུའི་ལོར་སྲུང་བརྩི་ཞུ་རྒྱུའི་བཀོད་ཁྱབ་ཕེབས་པ་བཞིན། སྨན་རྩིས་ཁང་གི་དབུས་ས་ཡན་ལག་གཉིས་ནས་ཀྱང་དུས་སྟོན་སྲུང་བརྩི་རྒྱ་ཆེར་ཞུས་ཡོད་པ་ལས། ཐོག་མར་བོད་མིའི་སྒྲིག་འཛུགས་ཀྱིས་ཕྱི་ལོ་ ༢༠༡༨ ཟླ་ ༤ ཚེས་ ༢ ནས་ ༤ བར་རྒྱལ་ས་དིལླིར་བོད་ཀྱི་རིག་གཞུང་དགའ་སྟོན་ཞེས་རྒྱ་གར་གཞུང་མང་གཉིས་ལ་དུས་ད་ལྟའི་བར་བོད་མིར་བཀའ་དྲིན་བསྐྱངས་པ་ལ་ཐུགས་རྗེ་ཆེ་ཞུའི་དུས་སྟོན་མཛད་སྒོ་རྒྱས་པ་ཞིག་གོ་སྒྲིག་ཞུས་པའི་སྐབས། སྨན་རྩིས་ཁང་ནས་སྨན་རྩིས་པ་དང་ལས་བྱེད་པ་ཁྱོན་གྲངས་དགུ་མཉམ་ཞུགས་གནང་ཡོད། དེ་དུས་ང་ཚོའི་སྨན་རྩིས་ལས་བྱེད་པ་རྣམས་ཀྱི་འགྲོ་གྲོན་བོད་མིའི་སྒྲིག་འཛུགས་ཀྱི་དངུལ་རྩིས་ནས་ཞུ་མི་དགོས་པར་སྨན་རྩིས་ཁང་རང་ཁོངས་ནས་འགྲོ་གྲོན་ཡོངས་རྫོགས་བཏང་བ་མ་ཟད་སྨན་རྩིས་རིག་པའི་འགྲེམ་སྟོན་དང་། སྨན་པ་བསྟེན་གཏུགས་དང་ངག་ཐོག་རྩིས་འབྲས་གཉིས་རིན་མེད་བཏང་གནང་ཡོད། གཞན་ཡང་སྨན་རྩིས་ཁང་འཛིན་སྐྱོང་ནས་ཡན་ལག་ཁག་ལ་ཐུགས་རྗེ་ཆེ་ཞུའི་ལོ་སྲུང་བརྩི་ཞུ་དགོས་པའི་ཡོངས་ཁྱབ་གསལ་བསྒྲགས་བཏང་བའི་ནང་དུ། ས་གནས་འགོ་འཛིན་ནམ། བོད་ཀྱི་གཞོན་ནུ་ཚོགས་པ་དང་།  བོད་ཀྱི་བུད་མེད་ཚོགས་པ་སོགས་ཚོགས་སྡེ་ཁག་གིས་ཐུགས་རྗེ་ཆེ་ཞུའི་ལས་རིམ་དང་སྦྲགས་ས་གནས་མང་ཚོགས་ལ་བོད་སྨན་སྒོ་ནས་སྨན་བཅོས་འཕྲོད་བསྟེན་ཞབས་ཞུ་སྒྲུབ་པར་ཡན་ལག་སྨན་ཁང་ལ་རེ་འདུན་བྱེད་པ་ཡིན་ན། ཡན་ལག་སྨན་ཁང་རང་ཉིད་ནས་ལྕོགས་ན་དབུས་འཛིན་སྐྱོང་ལ་དམིགས་བསལ་བཀའ་ཁྲོལ་ཞུ་སྒུག་མི་དགོས་པར་ཐད་ཀར་ཚོགས་སྡེ་གང་དང་མཉམ་རུབ་གནང་དགོས་པའི་ལམ་སྟོན་བྱས་པ་ཡིན།   དེ་ནས་སྨན་རྩིས་ཁང་རང་ཉིད་ནས་ཀྱང་རྒྱལ་ས་ Delhi གཙོས་པའི་ Ladakh, Chennai, Pondicherry,  Bengaluru, Kalaburagi, Mumbai, Jaipur, Bhubaneswar, Shimla བཅས་ཀྱི་ཡན་ལག་སྨན་ཁང་ཁག་ཏུ་ལུས་སེམས་བདེ་སྐྱིད་ཞེས་སྨན་རྩིས་ཁང་དབུ་བརྙེས་ནས་ལོ་ངོ་ ༡༠༢ འཁོར་བའི་དུས་དྲན་དང་ལྷན་ཅིག་ཏུ་རྒྱ་གར་དབུས་དང་ས་གནས་གཞུང་མང་གཉིས་ལ་ཐུགས་རྗེ་ཆེ་ཞུའི་དུས་སྟོན་གཉིས་ཐུན་མོང་སྲུང་བརྩི་ཞུས་ཡོད། དེ་ཡང་མཛད་སྒོ་དེ་ཉིན་ ༣ ནས་ ༥ བར་བསྐྱངས་པའི་སྐབས་སྨན་རྩིས་རིག་པའི་སྐོར་གཏམ་བཤད་དང་། འགྲེམ་སྟོན། ནད་པར་བརྟག་དཔྱད་སྨན་བཅོས་དང་། ངག་ཐོག་རྩིས་འབྲས་འདོན་པ། སྨན་རྩིས་ཐོན་དངོས་དང་དེབ་རིགས་ཚོང་སྒྱུར་ཞུས་ཡོད། ཐུགས་རྗེ་ཆེ་ཞུའི་ལས་རིམ་མཐའ་མ་དེ་འདི་ལོའི་སྤྱི་ཟླ་ ༣ ཚེས་ ༢༢ ནས་ ༢༤ བར་ Kolkata ཡན་ལག་སྨན་ཁང་དུ་གོ་སྒྲིག་ཞུས་པ་རེད། སྨན་རྩིས་སྐོར་བསྐྱོད་འདིའི་རིགས་ཀྱིས་རྒྱ་གར་ས་གནས་མང་ཚོགས་ལ་བོད་ཀྱི་སྨན་རྩིས་རིག་པའི་སྐོར་གོ་རྟོགས་ཁྱབ་འཕེལ་ཐུབ་པ་དང་། ནད་པ་དེ་ཉིད་ལའང་དངོས་སུ་ཕན་ཐོགས་ཡོད་པ། སྨན་རྩིས་ཁང་ནས་ཡོང་འབབ་ཀྱང་བཟོ་ཐུབ་པའི་དགེ་མཚན་ཆེན་པོ་འདུག  དེར་བརྟེན་ཕྱི་ལོ་ ༢༠༡༩ ནང་དུའང་སྔ་ལོ་ལས་མང་བ་སྨན་རྩིས་སྐོར་སྐྱོད་ཀྱི་ལས་གཞི་སྤེལ་རྒྱུ་ཡིན།

ཚོང་ཁྲལ་ GST མཐོ་ཤོས་འབུལ་མཁན་གྲས་སུ་ཡིན།

རྒྱ་གར་གཞུང་ཧི་མྰ་ཅལ་མངའ་སྡེའི་ Kangra རྫོང་ཁོངས་སུ་སྨན་རྩིས་ཁང་དེ་བཞིན་རྒྱ་གར་དབུས་དང་ས་གནས་གཞུང་ལ་ཚོང་ཁྲལ་ GST འབུལ་མཁན་མཐོ་ཤོས་ཨང་རིམ་གསུམ་པ་དེ་ཡིན།  ཁྲལ་འབབ་ཀྱི་སྒོ་ནས་ཀྱང་རྒྱ་གར་གཞུང་མང་ལ་ཞབས་འདེགས་ཞུ་བཞིན་པ་དེ་ང་ཚོས་དགའ་སྦོབས་བྱེད་འོས་པ་ཞིག་ཡིན། 

མཉམ་རུབ་ཀྱིས་ལས་དོན་སྒྲུབ་པར་བསྐུལ་བ།

སྨན་རྩིས་ཁང་གི་སྒྲིག་འཛུགས་འདི་ནི་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་ཐུགས་རྗེའི་གྲིབ་བསིལ་འོག་ཏུ་འཚར་ལོངས་བྱུང་བ་དང་། ད་ལྟའི་ཆར་སྨན་རྩིས་ཁང་གི་ཕྱིའི་སྣོད་ཀྱི་བཀོད་པའང་རྒྱ་སྐྱེད་འགྲོ་བཞིན་ཡོད། དེ་ཡང་ལོ་རེ་སྨན་རྩིས་གཉིས་ཀྱི་སློབ་མ་གསར་བསྡུ་ཐུབ་པའི་གནས་སྟངས་དང་། ལོ་ལྟར་སྨན་རྩིས་སློབ་མ་སློབ་ཐོན་བྱེད་བཞིན་པ། ལས་བྱེད་དང་ལས་མིའི་གྲངས་འབོར་སོགས་གནས་སྟངས་གང་ཅིར་བཟང་ཕྱོགས་ཀྱི་རྣམ་པ་མངོན་ཐུབ། ལྷག་པར་སྨན་རྩིས་ཁང་འཛིན་སྐྱོང་དང་ཆེད་ལས་པ་གཉིས་ཀར་འོས་འགན་དམིགས་བསལ་བ་རེ་ཡོད་གཤིས། འཛིན་སྐྱོང་ནི་མིག་ལྟ་བུ་ཡིན་ལ། སྨན་རྩིས་ཆེད་ལས་པ་ནི་ཡུལ་གྱི་ཕྱོགས་སུ་སོང་སྟེ་དངོས་སུ་བྱ་བ་བྱེད་མཁན་རྐང་པ་ལྟ་བུ་དེ་ཡིན། སྒྲིག་འཛུགས་ཤིག་གི་ནང་དུ་དེ་གཉིས་ནི་གཅིག་ལ་གཅིག་རྟེན་ཚུལ་དུ་གནས་ཡོད་པ་དང་། ལས་དོན་གང་ཞིག་གྲུབ་པའམ། ཡར་རྒྱས་གོང་འཕེལ་འགྲོ་བར་ནུས་པ་མཉམ་སྤུངས་དགོས་པ་ཚང་མས་དགོངས་པར་འཇགས་དགོས་པ་གལ་ཆེ། ད་ལྟའི་བར་དུ་སྨན་རྩིས་ཁང་གི་ལས་བྱེད་ལས་མི་ཡོངས་ཀྱིས་རང་འགན་ངོས་ཟིན་པའི་སྒོ་ནས་བྱེད་སྒོ་སྒྲུབ་པ་བཞིན་འབྱུང་འགྱུར་ཡང་བག་མེད་ཀྱི་གནས་སུ་མ་སོང་བར་སྔར་ལྷག་ནུས་པ་མཉམ་རུབ་ཡོང་བའི་སྐུལ་འདེབས་ཞུ་རྒྱུ་ཡིན།

བཀའ་དྲིན་རྗེས་དྲན།

སྨན་རྩིས་ཁང་ནི་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གིས་ཕྱག་བཏབ་ཅིང་། དུས་ནས་དུས་སུ་བཀའ་སློབ་ལམ་སྟོན་ཕེབས་པར་བརྟེན། ད་ལྟའི་ཆར་སྨན་རྩིས་ཁང་སྤྱིའི་གནས་སྟངས་ཡར་རྒྱས་གོང་འཕེལ་གྱི་རྣམ་པ་གསལ་པོ་ཡོད་ཀྱང་། བོད་ཀྱི་སྲོལ་རྒྱུན་གྱི་སྨན་རྩིས་རིག་པའི་ཤེས་བྱ་ཁོ་ནར་ཡིད་ཚིམ་ནས་མ་བསྡད་པར་ལུགས་གཞན་དང་འབྲེལ་འདྲིས་སྒོ་ནས་གསར་གཏོད་དགོས་པ་དང་། སྒྲིག་འཛུགས་འདི་ཉིད་གཞན་ལ་དངོས་སུ་ཞབས་འདེགས་ཞུ་མཁན་ཞིག་ཡིན་པའི་ཆ་ནས་སྨན་རྩིས་ཁང་རྒྱ་སྐྱེད་དགོས་པ་སོགས་༸རྒྱལ་བའི་དགོངས་པ་སྒྲུབ་པར་ཕྱོགས་ཡོངས་ནས་འབད་བརྩོན་གནང་དགོས། སྨན་རྩིས་ཁང་ལ་༸མགོན་པོ་གང་ཉིད་ཀྱི་བཀའ་དྲིན་ཤིན་ཏུ་ཆེ་ཞིང་།  ཐོག་མར་ཕྱག་བཏབ་པ་ནས་བཟུང་། བོད་ཀྱི་སྨན་རྩིས་རིག་པའི་སྐོར་རྒྱལ་སྤྱིའི་ནང་དུ་དྲིལ་བསྒྲགས་མཛད་པ་དང་། ཡར་རྒྱས་ཀྱི་རྣམ་པ་མངོན་གྱུར་བྱུང་སྐབས་བསྔགས་བརྗོད་དང་། འཐུས་ཤོར་འགྲོ་སྐབས་བཀའ་སློབ་ལྗིད་མོ་ཕེབས་སྟེ་མཛུབ་སྟོན་མཛད་པ་དང་། དགོས་མཁོ་ནམ་བྱུང་ལ་དཔལ་འབྱོར་མཐུན་འགྱུར་ཟམ་མ་ཆད་པ་བསྩལ་བ་སོགས་བཀའ་དྲིན་དཔག་མེད་བསྐྱངས་དང་སྐྱོང་བཞིན་པ་ལ་ང་ཚོ་སྨན་རྩིས་ཁང་གི་འགོ་ལས་ཡོངས་ནས་དུས་རྟག་ཏུ་ཐུགས་རྗེ་ཆེ་ཞུ་བ་དང་།  ངེས་ཅག་འགོ་མང་ཡོངས་ཀྱིས་བཀའ་དགོངས་ལམ་སྟོན་འགལ་མེད་སྙིང་བཅངས་རང་ནུས་ཅི་ཐུབ་ལྷག་བསམ་རྣམ་དག་ཧུར་བསྐྱེད་ཞུ་རྒྱུའི་དམ་བཅའ་འབུལ་རྒྱུ་ཡིན། 

སྨན་རྩིས་ཁང་གི་འགན་འཛིན་ནས་སྤྱི་ལོ་ ༢༠༡༩ ཟླ་ ༣ ཚེས་ ༢༩ ལ།།

མཐའ་མའི་འདོན་ཐེངས་།: 03.04.2019 ཉིན། 3:49 PM