ཟངས་དཀར་ཁུལ་དུ་སྨན་བསྐོར་ཞབས་ཞུ།

རྒྱ་གར་གཞུང་མང་ལ་ཐུགས་རྗེ་ཆེ་ཞུའི་ལས་རིམ་ནང་ཚན་ལ་དྭགས་སྨན་རྩིས་རིག་གཞུང་བསྟི་གནས་ཁང་ནས་ཟངས་དཀར་ཁུལ་གྱི་ས་གནས་མང་ཚོགས་ལ་ཉིན་བཅུའི་རིང་སྨན་སྐོར་ཞབས་འདེགས་ཞུས་ཡོད། དེ་ཡང་ལ་དྭགས་བོད་ཀྱི་སྨན་རྩིས་ཁང་དང་ཟངས་དཀར་རོ་ཡལ་སྐྱིད་སྡུག་ཚོགས་པ་(Zanskar Royal Club)ཟུང་འབྲེལ་ཐོག་འདི་ལོའི་ཟླ་ ༥ ཚེས་ ༢༢ ནས་ ༣༡ བར་ལས་གཞི་འདི་བརྩམས་གནང་ཡོད།

 
སྨན་སྐོར་འདི་མང་ཚོགས་ལ་དངོས་སུ་ཕན་ཐོགས་ཐུབ་པ་དང་ལས་གཞི་ཚགས་ཚུད་ཡོང་ཆེད་ཉིན་ཤས་སྔོན་ནས་ཟངས་དཀར་ཁུལ་གྱི་གྲོང་གསེབ་ཁག་སུམ་ཅུ་ཙམ་ལ། སྐྱིད་སྡུག་ཚོགས་མི་རྣམས་དངོས་སུ་བཅར་ནས་རྒྱང་བསྒྲགས་གནང་ཡོད། མ་ཟད་ས་གནས་རླུང་འཕྲིན་(All India Radio)ཁང་ནས་ཀྱང་གནས་ཚུལ་སྔོན་བརྡ་བཏང་གནང་བ་རེད།

ལ་དྭགས་རིག་གཞུང་བསྟི་གནས་ཁང་ནས་སྨན་པ་བསོད་ནམས་བདེ་སྐྱིད་ལགས་དང་། ཉམས་གསོག་སྨན་པ་བདེ་ཆེན་དབང་མོ་ལགས། རྩིས་པ་ཤེས་རབ་ལགས། ཁ་ལོ་བ་བསྟན་འཛིན་ཐར་ལམ་ལགས།(སྨན་སྤྲོད་ལས་ཁུར་ཞུས) འགན་འཁུར་བ་ཀརྨ་ཚེ་རིག་ལགས་བཅས་མི་སྣ་ལྔ་པོ་ཕྱི་ཟླ་ ༥ ཚེས་ ༢༢ དགོང་མོ་ཀར་གིལ་དུ་འབྱོར་མཚམས་ཟངས་དཀར་རོ་ཡལ་སྐྱིད་སྡུག་ཚོགས་པའི་སྤྱི་ཁྱབ་དྲུང་ཆེ་དང་ཀར་གིལ་རི་རྒྱུད་རང་སྐྱོང་ལྷན་ཁང་གི་ཚོགས་མི་གཅིག་ལྕོགས་ཕུན་ཚོགས་བཀྲིས་ལགས་དང་ཐུག་འཕྲད་ཀྱིས་ལས་འཆར་སྐོར་གྲོས་བསྡུར་གནང་།   

དེ་ནས་ཕྱི་ཟླ་ ༥ ཚེས་ ༢༣ ཉིན་ནས་སྨན་སྐོར་ཞབས་ཞུ་དངོས་གཞི་དེ་ཐོག་མར་པར་ཀ་ཅིག་(Parkachik)ཞེས་ཁ་ཆེའི་གྲོང་གསེབ་ཡིན་པ། དེའི་ནང་གཞུང་གི་འཕྲོད་བསྟེན་སྨན་ཁང་ཞིག་ཏུ་མང་ཚོགས་ལ་བརྟག་དཔྱད་སྨན་བཅོས་མཛད་པ་ནས་འགོ་ཚུགས་ཏེ། རིམ་བཞིན་ཉིན་དེ་གའི་དགོང་མོ་རང་དུམ་(Rangdum)ཞེས་ཟངས་དཀར་གྱི་ས་མཚམས་སུ་ཆགས་པའི་གྲོང་གསེབ་དེའི་ནང་ཕལ་ཆེ་བ་འབྲོག་པ་ཡིན་འདུག་པ་རྣམས་ལ་སྨན་བཅོས་ཞུས་པ་རེད། དེ་ནས་པ་དུམ་ལམ་ཕྱོགས་སུ་འཁེལ་བ་འཕྲོད་བསྟེན་མཐུན་རྐྱེན་ཧ་ཅང་ཞན་པོ་ཡོད་པ་བཀྲིས་སྟོང་བདེ་ཞེས་པའི་སྟེང་ཕྱོགས་ཀྱི་གྲོང་གསེབ་ཏུ་ཆམ་རིམས་སོགས་ཕོག་པའི་ཕྲུ་གུ་མང་དག་ཅིག་ལ་སྨན་བཅོས་ཞུས། དེ་ནས་པ་དུམ་དུ་ཉིན་ཤས་བཞུགས་རིང་ཟངས་དཀར་གསོ་རིག་ཉམས་ཞིབ་ལྟེ་གནས་ཁང་ནས་འཕྲལ་སེལ་སྨན་ཁང་དང་སྡོད་གནས་མཐུན་རྐྱེན་སྦྱར་གནང་བ་ལྟར་རོ་ཡལ་སྐྱིད་སྡུག་ཚོགས་པས་སྨན་ལས་རྣམས་ལ་ཞལ་ལག་གོ་སྒྲིག་གནང་ཡོད།  

ཕྱི་ཚེས་ ༢༨ ཉིན་ཟངས་དཀར་གྱི་ལུང་ཁུག་ས་ཁུལ་ལུང་ནག་ཞེས་པའི་ས་ཕྱོགས་སུ་གྲོང་གསེབ་བདུན་ཙམ་ཡོད་པ་དེར། རོ་ཡལ་སྐྱིད་སྡུག་ཚོགས་མི་རྣམས་སྔ་སར་ཐོན་ནས་ཨུམ་ལ་ཞེས་པའི་གྲོང་གསེབ་དུ་སྨན་སྒར་བཏབ་པ་དེ་དང་། དགོང་མོ་བར་གདན་མགོན་པར་མང་ཚོགས་འདུ་འཛོམས་ཆེ་བ་དེར་ཕྱིན་ནས་ནད་པར་བརྟག་དཔྱད་སྨན་བཅོས་ཞུས།

སྨན་སྐོར་འདིའི་སྐབས་ཟངས་དཀར་གྱི་པ་དུམ་གཙོ་བོར་བྱས་ཏེ་འཕྲོད་བསྟེན་མཐུན་རྐྱེན་ཞན་པོ་ཡོད་པའི་ས་ཁུལ་གཞན་མང་པོའི་ནང་ལྷག་པའི་ནད་པ་དག་ལ་བོད་ཀྱི་གསོ་རིག་སྒོ་ནས་བརྟག་དཔྱད་སྨན་བཅོས་དང་ཟས་སྤྱོད་སྤང་བླང་གི་ལམ་སྟོན་ཡང་དག་པ་གནང་ཡོད་ལ། ཐེངས་འདི་རྒྱ་གར་གཞུང་མང་ལ་ཐུགས་རྗེ་ཆེ་ཞུའི་ལས་འགུལ་ཆ་ཤས་ཡིན་པར་བརྟེན། གཏན་འབེབས་བཞིན་སྨན་པ་བསྟེན་གཏུགས་ལག་དོད་རིན་མེད་བཏང་གནང་ཡོད། ཁྱོན་བསྡོམས་ནད་པ་ ༧༠༩ ལ་འཕྲོད་བསྟེན་ཞབས་འདེགས་དངོས་སུ་ཞུས་ཐུབ་པ་བྱུང་ཡོད།

མཐའ་མའི་འདོན་ཐེངས་།: 08.06.2018 ཉིན། 3:08 PM