ཝུ་ཧན་ཀོ་རོ་ན་གཉན་སྲིན་སྔོན་འགོག་ལམ་སྟོན།

-          སྨན་རྩིས་ཁང་གི་སྨན་པ་གཙོ་བོ་ྋསྐུ་བཅར་སྨན་པ་ཚེ་དབང་རྟ་མགྲིན།

རྒྱ་ནག་ཝུ་ཧན་ནས་འབྱུང་བའི་ཏོག་དབྱིབས་ནད་དུག་གློ་ཚད་རིམས་ནད་འདི་ལ་བོད་ཀྱི་གསོ་བ་རིག་པའི་ལུགས་སུ་གཉན་རིམས་ནག་པོ་པརྤ་ཏ་ལས་མཆེད་པའི་ནད་གདུག་པ་ཅན་གློ་བའི་གཉན་ནད་ཅིག་ལ་ངོས་འཛིན་བྱེད་ཆོག ནད་འདི་ལ་འཛམ་གླིང་འཕྲོད་བསྟེན་ལྷན་ཁང་ནས་ (2019-nCoV) ཞེས་མིང་བཏགས་ཡོད་པ་དང་། ཡོངས་གྲགས་སུ་ཝུ་ཧན་གྱི་ཀོ་རོ་ན་གཉན་སྲིན་ཞེས་འབོད་བཞིན་ཡོད།

ནད་འདི་མཆེད་ཚུལ་གཙོ་བོ་ནི། དུད་འགྲོ་ནས་མི་དང་། དེ་རྗེས་མི་ནས་མི་ནད་མེད་གཞན་ལ་ནད་པའི་མཆིལ་མ་དང་ཁ་རླངས་ཆུ་སེར་ཁྲག་སོགས་ཀྱི་བརྒྱུད་ལམ་ནས་ཁྱབ་གདལ་དུ་འགྲོ་བཞིན་ཡོད། ད་ཆ་ང་ཚོས་ངེས་པར་དོ་སྣང་བྱེད་དགོས་པ་ཞིག་ལ། རང་རེ་བོད་ལུགས་ཀྱི་ལོ་རྩིས་ལྟར་ན། གང་ཞིག་དགུ་མིག་དང་། དུར་མིག ལོ་ཀེག་འཁེལ་བ་རྣམས་དང་། ལུས་ཀྱི་ཟུངས་སྟོབས་ཉམས་པ། གློ་ནད་ན་མྱོང་བ་རྣམས་དམིགས་བསལ་གྱི་ཟབ་དགོས་པ་ཡིན། དེའི་སྟེང་མང་ཚོགས་སྤྱི་ཡོངས་ནས་སྔོན་འགོག་དུ། སྔགས་འབུམ་རྡོ་རྗེ་གོ་ཁྲབ་དང་། དྲག་པོ་སུམ་སྒྲིལ། ལྷ་མོ་ལོ་གྱོན་མ། སངས་རྒྱས་སྨན་བླ་དང་། རྗེ་བཙུན་འཕགས་མ་སྒྲོལ་མའི་གཟུངས་སྔགས་བཅས་གང་མང་བཟླས་བརྗོད་གནང་དགོས་པ་དང་། དེ་ནས་ཕག་རྒོད་ཀྱི་འཁོར་ལོ། ནག་པོ་དགུ་སྦྱོར། ནད་འགོག་བདུད་རྩི་ཐིགས་པ། སྐག་ཟློག་འཁོར་ལོ་སོགས་ཀྱི་སྲུང་འཁོར་རྣམས་ལུས་ལ་བཏགས་དགོས། དེ་བཞིན་ཟས་སྤྱོད་བསྟེན་སྟངས་ནི་སྤྱོད་ལམ་དུ་རྒྱུན་དུ་བཟའ་བཏུང་ངོམས་པར་བསྟེན་དགོས་པ་དང་། ཡིད་མྱ་ངན་དང་། སེམས་ཞུམ་པར་གྱུར་བའི་ལས་དང་། ཁོང་ཁྲོ་བ་བཅས་བྱ་མི་རུང་། ཟས་སུ་ཕག་ཤ་དང་སྒོ་ང་། དེ་བཞིན་ཟས་རིགས་རྗེན་པ་དང་། རྙིང་པ་གྲང་མོ་མ་འཚོས་པ་ཧམ་རུལ་སོགས་དང་། དེ་སྔ་ཟ་མ་མྱོང་བའི་ཤ་རིགས་གང་བྱུང་དུ་བཟའ་མི་རུང་། ལྷག་པར་ནད་ཡམས་ཡོད་སར་འགྲོ་འདུག་བྱ་བ་སྤང་དགོས་ལ། ས་ཕྱོགས་དེ་ནས་འབྱུང་བའི་ཐོན་དངོས་དང་མི་ལ་འབྲེལ་གཏུག་བྱེད་སྐབས་དྭོགས་ཟོན་ངེས་པར་བྱེད་དགོས་ཤིང་རྒྱུན་དུ་ལག་པ་གཙང་མ་བཀྲུ་བའམ་དུག་སེལ་ངེས་པར་བྱ་དགོས།

ཁོང་སྨན་དུ་རིན་ཆེན་མང་སྦྱོར་དང་། ཁྱུང་ལྔ། རྟ་བཟི་རིལ་བུ། ལོ་གྱོན་རིལ་བུ། མ་ཎི་རིལ་བུ་སོགས་གཏོང་དགོས། དམིགས་བསལ་དོགས་གཞི་ཅན་གྱི་མི་ཚང་མས་ཕྱི་ལུགས་སམ་གཞོགས་འདེགས་ཀྱི་བརྟག་དཔྱད་རིམ་པ་རྣམས་ལག་ལེན་ཚུལ་བཞིན་བྱེད་དགོས་ལ། རང་ཉིད་ནས་བྱང་སེམས་ཀྱིས་ཀུན་ནས་བསླངས་ཏེ་ཡུལ་མིའི་འགན་ཁུར་དགོས། མང་ཚོགས་ཡོངས་ནས་ཐོག་མར་གོང་གི་སྔོན་འགོག་ཐབས་ལམ་རྣམས་མ་འཛོལ་བར་བྱ་རྒྱུ་གལ་ཆེ་ལ། ནད་པ་རྣམས་དམིགས་བསལ་སྙིང་སྟོབས་མ་ཞུམ་པར་སེམས་པ་ཆེན་པོ་བྱ་དགོས། དེ་ལ་རླུང་ཁ་གསོ་དགོས་པ་གལ་ཆེན་པོ་ཡིན་སྟབས། ཨ་གར་སོ་ལྔ་དང་། ཨར་བརྒྱད། དྲང་སྲོང་ཨར་བརྒྱད། ཨ་གར་བཅོ་ལྔ་སོགས་གང་དགོས་པ་དང་། དུས་ཡུན་ཇི་ཙམ་གཏང་དགོས་པ་སྨན་པའི་ངག་ལྟར་བྱ། དེ་དག་གིས་སྲོག་གི་འཇིགས་པ་ལས་མྱུར་དུ་ཐར་ཐུབ།།





 

མཐའ་མའི་འདོན་ཐེངས་།: 01.02.2020 ཉིན། 11:33 AM