ཛ་དྲག་མ་དངུལ་ཆེད་དུ་ཞལ་འདེབས་ཕུལ།

ཕྱི་ལོ་ ༢༠༢༢ ཟླ་ ༡༠ ཚེས་ ༡༧ ཉིན་འགྲོ་ཕན་སྨན་རྩིས་ཁང་གི་ཛ་དྲག་མ་དངུལ་ཆེད་དུ་སྨན་རྩིས་ཁང་གི་ལས་བྱེད་ཟུར་པ་སྨན་རམས་པ་གཡང་འབུམ་རྒྱལ་ལགས་བརྒྱུད་ནས་ཨ་རིར་རྟེན་གཞི་བྱས་པ་ Mahayana Dharma Foundation And Medicine Buddha Healing Center ཞེས་བདེ་རྩ་ཚོགས་པ་ནས་ཨ་སྒོར་ ༢༤༨༠།༠༠ ཞལ་འདེབས་གནང་སོན་བྱུང་ཡོད།

དུས་རྒྱུན་ལོ་ལྟར་བདེ་རྩ་ཚོགས་པ་འདིས་འགྲོ་ཕན་སྨན་རྩིས་ཁང་ལ་ཨ་སྒོར་དངུལ་རྐྱང་ཞལ་འདེབས་གནང་སྲོལ་ཡོད་ཀྱང་འདི་ལོར་སྨན་རྩིས་ཁང་གི་ཕྱི་ནང་གནས་བབ་ལ་གཞིགས་ཏེ་དུས་རྒྱུན་ལས་ལྡབ་གཉིས་ཀྱི་མང་བ་གནང་ཡོད། ཨ་སྒོར་ཞལ་འདེབས་ཕུལ་བ་དེ་ཉིན་གྱི་འཛའ་ཐང་ལ་སྒྱུར་ན་ཕལ་ཆེར་ཧིན་སྒོར་འབུམ་གཉིས་ལྷག་ཙམ་ཟིན་གྱི་ཡོད། དེ་ཡང་འགྲོ་ཕན་སྨན་རྩིས་ཁང་སྤྱི་ཁྱབ་འགན་འཛིན་མཆོག་གིས་ཐུགས་རྗེ་ཆེ་ཞུའི་ཕྱག་བྲིས་ནང་དུ་དངུལ་རྐྱང་ཞལ་འདེབས་ཕུལ་བ་འདིས་ཛ་དྲག་གནས་སྟངས་གང་ཡང་འཕྲད་པའི་སྐབས་བེད་སྤྱོད་བྱ་རྒྱུ་ཡིན་པ་དང་། འགྲོ་ཕན་སྨན་རྩིས་ཁང་གིས་འབད་བརྩོན་གང་བྱེད་ཀྱང་ྋསྤྱི་ནོར་ྋགོང་ས་སྐྱབས་མགོན་ཆེན་པོ་མཆོག་གི་ཐུགས་རྗེའི་བྱིན་རླབས་དང་། དཔལ་འབྱོར་གྱི་མཐུན་འགྱུར་གནང་མཁན་གྲོགས་པོ་ཁྱེད་ཅག་ལྟ་བུ་མེད་ན་མི་ཡོང་བ་ཡིན་སྐོར་ཡང་གསུངས་ཡོད།

གནས་ཚུལ་འདི་བརྒྱུད་རང་རིགས་རྣམས་ནས་དུས་རྟག་ཏུ་མཁྱེན་དགོས་པ་ཞིག་ལ། འགྲོ་ཕན་སྨན་རྩིས་ཁང་གིས་རྒྱལ་བ་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གི་བཀའ་དགོངས་གཙུག་ཏུ་བཀུར་ནས། དམིགས་བསལ་བཙན་བྱོལ་བོད་རིགས་མང་ཚོགས་ཀྱི་འཕྲོད་བསྟེན་བདེ་རྩར་དམིགས་ཏེ་ལོ་བསྟུད་མར་སྨན་སྦྱིན་ཞབས་ཞུ་སོགས་སྒྲུབ་མུས་རེད། དེ་ཡང་སྨན་རྩིས་ཁང་ནས་ཉམ་ཐག་དང་། ལོ་ན་ ༦༥ ཡན། བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད། བོད་ནས་གསར་དུ་འབྱོར་བ། སྨན་རྩིས་ཁང་གི་ལས་བྱེད་དང་སྡོད་གཅིག་ནང་མི། ནད་གཞི་འབྲས་ནད། གློ་གཅོང་། གཉན་ནད་རེག་དུག མཆིན་ནད་དུག་ཐབས་བཅས་ལྕི་བོ་ཡོད་པའི་ནད་པ་རྣམས་ལ་སྨན་སྦྱིན་དང་། དེ་བཞིན་བོད་མི་སྒྲིག་འཛུགས་ཀྱི་འཕྲོད་བསྟེན་བལྟ་སྐྱོང་ཆེད་སྨན་རིན་བརྒྱ་ཆ་ ༡༠ ཆག་ཡང་།  གཞན་ཡང་ཆོས་བརྒྱུད་རིས་མེད་ཀྱི་གྲྭ་བཙུན་དང་། སློབ་ཕྲུག་བཅས་ལ་སྨན་སྦྱིན་ཕྱེད་བཅག་འབུལ་བཞིན་ཡོད་པ་དཔེར་ན། ཕྱི་ལོ་ ༢༠༢༡ ཟླ་ ༤ ནས་ ༢༠༢༢ ཟླ་ ༣ བར་གྱི་རྩིས་ལོའི་ནང་སྨན་སྦྱིན་དང་ཕྱེད་ཅག་འབུལ་བ་ཧིན་སྒོར་ (46,814,986.35 INR) ས་ཡ་བཞི་བཅུ་ཞེ་དྲུག་དང་བརྒྱད་འབུམ་ཆིག་ཁྲི་བཞི་སྟོང་དགུ་བརྒྱ་གྱ་དྲུག་བཏང་གནང་ཡོད།

ད་རེས་སྨན་རམས་པ་གཡང་འབུམ་རྒྱལ་ལགས་བརྒྱུད་ནས་ Mahayana Dharma Foundation And Medicine Buddha Healing Center བདེ་རྩ་ཚོགས་པས་ཞལ་འདེབས་འབུལ་བར་ཡི་རང་བསྔགས་བརྗོད་ཞུ་བ་དང་སྦྲགས། དེ་ལྟར་བསོད་ནམས་ཀྱི་ཚོགས་རླབས་པོ་ཆེ་གསོག་རྒྱུའི་དགེ་བའི་ལས་ཀྱི་རྗེས་སུ་འབྲང་སྟེ་རང་རིགས་གཏོང་ཕོད་ཅན་རྣམས་ནས་ཀྱང་དེ་དེ་བཞིན་གྱི་འགྲོ་ཕན་སྨན་རྩིས་ཁང་གི་འཕྲོད་བསྟེན་ཞབས་འདེགས་ཀྱི་ལས་གཞིར་མཐུན་འགྱུར་སླད་དུ་ཞལ་འདེབས་འབུལ་བར་སྐུལ་མ་ཞུ་རྒྱུ་ཡིན།།

མཐའ་མའི་འདོན་ཐེངས་།: 31.03.2023 ཉིན། 10:06 AM