ཚང་མས་སེམས་ཞུམ་རྒྱུ་མེད་ཅེས་བཀའ་བསྩལ།

ྋགོང་ས་ལྷ་མིའི་རྣམ་འདྲེན་ྋསྐྱབས་མགོན་རྒྱལ་བ་ཐམས་ཅད་མཁྱེན་པ་མཆོག་གིས་འདི་ཟླའི་ཕྱི་ཚེས་ ༥ - ༦ བར་ཉིན་གཉིས་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཐའེ་ཝན་གྱི་དད་ལྡན་མི་མང་གིས་ཇི་ལྟར་གསོལ་བ་བཏབ་པ་བཞིན་སློབ་དཔོན་ཆོས་གྲགས་ཀྱིས་མཛད་པའི་ཚད་མ་རྣམ་འགྲེལ་གྱི་གསུང་ཆོས་གནང་བའི་ཉིན་གཉིས་པའི་སྐབས། བར་ལམ་བོད་ཀྱི་རྒྱལ་ས་ལྷ་ས་གཙོས་ས་ཁུལ་ཁག་གཅིག་ནང་ཏོག་དབྱིབས་གཉན་རིམས་ ༡༩ ནད་གཞི་ཁྱབ་བརྡལ་ཤུགས་ཆེར་འགྲོ་བཞིན་ཡོད་པར་བརྟེན་གཞིས་བཞུགས་བོད་མི་རྣམས་ལ་ལུས་སེམས་གཉིས་ཀྱི་དཀའ་སྡུག་ཆེན་པོ་མྱོང་བཞིན་པར་འདི་ནས་ཆོས་སྐྱོང་སྲུང་མའི་ལུང་བརྟག་ཞུས་པ་བཞིན་སྒྲོལ་མའི་གཟུངས་སྔགས་སོགས་སྨོན་ལམ་གསོལ་འདེབས་འདོན་བཞིན་པའི་ཁར། ད་ཐེངས་ྋགོང་ས་ྋསྐྱབས་མགོན་ཆེན་པོ་མཆོག་གི་བཀའ་སློབ་ཕེབས་ཡོད་པའི་གནས་ཚུལ་དགའ་ལྡན་ཕོ་བྲང་གི་བོད་ཡིག་དྲ་རྒྱའི་ནང་སྤེལ་ཡོད་པའི་ཆ་ཤས་འདི་ལྟར།

“གཞན་ཡང་། བོད་ནང་ཁྱབ་བརྡལ་ཕྱིན་པའི་ཏོག་དབྱིབས་ནད་ཡམས་དབང་གིས་དམ་དྲག་ཆེན་པོ་བྱེད་བཞིན་པ་དང་འབྲེལ་ནས་བཀའ་སློབ་སྩལ་དོན།  ད་ལྟ་གནས་ཚུལ་ཞིག་ལ་བོད་ནང་དུ་ནད་ཡམས་རྐྱེན་གྱིས་བཀག་སྡོམ་དམ་དྲག་ཆེན་པོས་མི་མང་ལ་ཧ་ཅང་དཀའ་ངལ་འཕྲད་ཀྱི་འདུག་ཟེར། གང་ལྟར་ང་ཚོ་རྒྱ་བོད་ཀྱི་འཐབ་རྩོད་འདི་གཙོ་བོ་སངས་རྒྱས་པའི་ཆོས་ལའང་འབྲེལ་ཡོད། རྒྱ་མིས་ང་ཚོ་བོད་རྒྱ་ཆེའི་མི་མང་གི་ལྟ་བ་དང་སྤྱོད་པ་གཏན་ནས་བསྒྱུར་ཐུབ་ཀྱི་མ་རེད། ང་ཚོ་བོད་ལ་ཡོད་པའི་སངས་རྒྱས་པའི་ཆོས་དང་། དེ་དང་འབྲེལ་བའི་རིག་གཞུང་རིམ་བཞིན་རྒྱ་ནག་ལ་ཁྱབ་རྒྱུ་ཤུགས་ཆེ་རུ་འགྲོ་བཞིན་ཡོད། དེར་བརྟེན། འཕྲལ་གྱི་རྐྱེན་ངན་དེ་ལྟ་བུ་ཤར་ཡོང་དུས་ཚང་མ་སེམས་མི་ཞུམ་པ་གལ་ཆེ། ང་ཚོ་བོད་གངས་ཅན་འཕགས་པ་སྤྱན་རས་གཟིགས་ཀྱི་གདུལ་ཞིང་ཡིན། ལྷ་སའི་ཇོ་བོ་དང་། དེ་བཞིན་ལོ་ཀེ་ཤྭ་ར་བཅས་ཇོ་ཤཱཀ་རྣམ་གསུམ་ལ་ཚང་མས་སྨོན་ལམ་ཡག་པོ་རྒྱོབ། ངོས་རང་ས་ཁུལ་རྒྱང་ནས་ཡོད་ཀྱང་ལས་དང་འབྲེལ་བ་ཐུན་མོང་མ་ཡིན་པ་ཞིག་ཡོད་པས་༸རྒྱལ་བ་རིན་པོ་ཆེ། ཏཱ་ལའི་བླ་མ་དྲན་པ་བྱོས། གང་ལྟར་གཙོ་བོ་ང་ཚོའི་བདེན་པའི་མཐའ་གསལ་གྱི་རེད་བསམ་པ་ཞིག་གིས་བློ་བདེ་པོ་བྱོས་ནས་སྡོད། ངོས་རང་ལ་མཚོན་ནའང་ད་ལྟ་ལོ་བརྒྱད་ཅུ་གྱ་བདུན་ལ་སླེབས་ཡོད། ད་ལྟ་གཟུགས་པོ་བདེ་ཐག་ཆོད་ཡོད། ཨེམ་ཆི་ཚོས་བརྟག་དཔྱད་སྐབས་ངོས་རང་ད་དུང་ལོ་བཅོ་ལྔ་ཉི་ཤུར་སྡོད་ཀྱི་རེད་ཅེས་རྗོད་ཀྱི་འདུག དེར་བརྟེན། བོད་རྒྱ་ཆེའི་མི་མང་ཚོ་བློ་བདེ་པོར་བཞུགས། རྒྱ་ནག་ནང་དུ་འགྱུར་བ་འགྲོ་བཞིན་འདུག་པས་རིམ་བཞིན་ང་ཚོ་གཞིས་བྱེས་མཉམ་འཛོམས་ཀྱི་ཐོག་ནས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་བསྒོམ་ཐུབ་པ་ཞིག་ཏན་ཏན་ཡོང་གི་རེད། ཚང་མ་བློ་བདེ་པོ་བྱོས། བཀྲ་ཤིས་བདེ་ལེགས། ཐུགས་རྗེ་ཆེ། ཞེས་བཀའ་ཕེབས་ཡོད།”

འདིར་ནོན།   ྋགོང་ས་ྋསྐྱབས་མགོན་ཆེན་པོ་མཆོག་གི་བཀའ་སློབ་དུམ་ཚན་དེ་གསན།

འདིར་ནོན།   གནས་ཚུལ་ཟུར་འདོན་བྱས་པ་དེའི་ཡོང་ཁུངས་ https://gyalwarinpoche.com/news/2022/2022-10-04

                  འདིར་འདྲ་པར་གཉིས་ཀྱང་དགའ་ལྡན་ཕོ་བྲང་དྲ་རྒྱ་ནས་བླངས་པ་ཡིན།

མཐའ་མའི་འདོན་ཐེངས་།: 31.03.2023 ཉིན། 10:59 AM