ཚ་རླབས་ཀྱི་ཉེན་བརྡ་དང་དེ་ལས་སྲུང་ཐབས།
 

དུས་རབས་ཉེར་གཅིག་ནང་ས་གཞི་ཆེན་པོའི་གནམ་གཤིས་འགྱུར་ལྡོག་རྐྱེན་པས་གོ་ལའི་ཁྱོན་གྱི་གནམ་གཤིས་ཚ་དྲོད་ཀྱི་མྱུར་ཚད་འཕར་ཉེན་ཆེ་བ་ཡོད་པ་འཛམ་གླིང་འཕྲོད་བསྟེན་ལྷན་ཁང་(WHO)གིས་བཤད་ཡོད། ཚ་རླབས་ཞེས་ཨིན་སྐད་དུ་ Heat-Wave དང་ཧིན་སྐད་དུ་ लू ཟེར་ཞིང་དེ་ནི་གནམ་གཤིས་ཉེན་ཚབས་ཆེ་ཤོས་ཤིག་ཡིན་ལ་ཚ་རླབས་དྲག་པོས་འཕྲོད་བསྟེན་དང་། སྤྱི་ཚོགས། ཁོར་ཡུག་དཔལ་འབྱོར་བཅས་ལ་ཉེན་ཚབས་ཆེན་པོ་བཟོ་བ་ཡིན། ཚ་རླབས་འདིས་དུས་ཡུན་ཐུང་ངུའི་ནང་འགྲོ་བ་མི་སོགས་སྲོག་ཆགས་ཀུན་ལ་ཤུགས་རྐྱེན་ཚབས་ཆེན་ཐེབས་པ་དང་། རྒྱུན་དུ་མི་མང་གི་འཕྲོད་བསྟེན་ལ་གནོད་སྐྱོན་ཚབས་ཆེན་ཐེབས་བཞིན་ཡོད། ཉེ་ཆར་རྒྱ་གར་གནམ་གཤིས་རིག་པའི་སྡེ་ཚན་ནས་ཧིམཱཅལ་གཙོས་པའི་རྒྱ་གར་བྱང་ཕྱོགས་མངའ་སྡེ་མང་པོར་ཚ་རླབས་ཀྱི་ཉེན་བརྡ་ཁ་དོག་དམར་པོ་ཅན་ཡང་བཏང་ཡོད། དེ་ལྟར་ན་ཚ་རླབས་དེའི་ཉེན་ཚབས་ལས་ངེས་པར་དུ་སྲུང་དགོས་པ་ཡིན། 

༡། ཚ་རླབས་ཀྱི་གོ་དོན།

ཚ་རླབས་ནི་དབྱར་དུས་རྒྱུན་ལྡན་གྱི་དྲོད་ཚད་ལས་ལྷག་པར་འཕར་བའི་དུས་སྐབས་ཤིག་ལ་ཟེར། དེ་ནི་ནམ་རྒྱུན་ཕྱི་ཟླ་གསུམ་པ་ནས་དྲུག་པའི་བར་དུ་འབྱུང་ལ། མཚམས་རེ་ཕྱི་ཟླ་བདུན་པའི་བར་དུ་འང་གནས་བཞིན་ཡོད།

༢། ཚ་རླབས་ཀྱི་རྒྱུ་རྐྱེན།

ཚ་རླབས་འབྱུང་རྐྱེན་ཡང་རང་འབྱུང་དང་འགྲོ་བ་མིའི་བྱ་སྤྱོད་གཉིས་ཀས་རྐྱེན་བྱེད་སྲིད་པ་ཡིན། རྐྱེན་དེ་གཉིས་ལ་བརྟེན་ནས་བར་སྣང་རླུང་ཁམས་ནང་ཚ་བའི་རླུང་དེ་ཉིད་འཛིན་པར་བྱེད་ནས་རྒྱུན་ལྡན་རླུང་གི་འགུལ་སྐྱོད་ལ་འགོག་རྐྱེན་བཟོས་པར་ཚ་རླབས་ཞེས་ཚ་རླུང་རྒྱས་པའི་གནམ་གཤིས་ཀྱི་འགྱུར་བ་རང་འབྱུང་བ་ཞིག་ཡིན།

༣། ཚ་རླབས་ཀྱིས་འཕྲོད་བསྟེན་ལ་ཤུགས་རྐྱེན།

• ཚ་བ་ཚད་ལས་བརྒལ་ནས་དྲོད་ཚད་མྱུར་དུ་འཕར་བ་དེས་ལུས་ཀྱི་དྲོད་ཚད་སྙོམས་སྒྲིག་བྱེད་པའི་ནུས་པ་ཉམས་དམས་སུ་གཏོང་ཞིང་། དེས་ནད་རིགས་སྣ་ཚོགས་ཚ་གཟེར་དང་། ལུས་ཀྱི་ཆུ་ཁམས་ཟད་པ། ཚ་འབོག ཚ་བས་ངལ་དུབ་ཆེ་བ་བཅས་འབྱུང་བ་ཡིན།
• ཚ་དྲོད་ཆེ་བའི་རྐྱེན་གྱིས་འཆི་བ་དང་སྨན་ཁང་དུ་འགྲོ་དགོས་པའི་གནས་སྟངས་ཧ་ཅང་མྱུར་པོ་ཡོད་ལ། དེ་མ་ཟད་སྙིང་དང་གློ་བ། ཀླད་པ། དེ་བཞིན་གཅིན་སྙིའི་དང་འབྲེལ་བའི་ནད་རིགས་སོགས་ལྡན་པའི་གང་ཟག་རྣམས་ཀྱི་འཕྲོད་བསྟེན་ལ་གནོད་སྐྱོན་ཆེ་རུ་གཏོང་གི་ཡོད།

༤། ཚ་རླབས་ཀྱི་དུས་སུ་སྔོན་འགོག་བྱ་ཐབས།

• ཆུ་ཁམས་རིགས་ལ་ཡང་ཡང་བསྟེན་དགོས།
• ཁྱིམ་བསིལ་པོ་ཉར་དགོས།
• ཉི་མའི་དྲོད་ལ་འཛེམས་དགོས།
• དམིགས་བསལ་བྱིས་པ་དང་། སྦྲུམ་མ། ལོ་ན་རྒན་པ་བཅས་ལ་ཚ་རླབས་ཀྱི་གནོད་སྐྱོན་ཆེ་བ་ཡོད་པས་གཟབ་ནན་གནང་དགོས།

༥། བོད་ཀྱི་གསོ་བ་རིག་པ་ལས་ཚ་རླབས་ཀྱི་དུས་སུ་ཟས་སྤྱོད་བསྟེན་ཚུལ།

གསོ་བ་རིག་པའི་གཞུང་ལུགས་ལྟར་ད་ལྟ་ནམ་དུས་སོ་ག་ཡིན་སྟབས་ཉི་མའི་འོད་ཟེར་རབ་ཏུ་ཚ་བས་ཕྱི་ནང་གི་མེ་དྲོད་ལྷག་པར་སྐྱེས་ཏེ་ལུས་ཟུངས་ཀྱི་སྟོབས་འཕྲོག་པ་ཡིན། དེ་ཕྱིར་ཟས་སྤྱོད་འཕྲོད་པར་བསྟེན་དགོས་པ་ནི།

• རོ་མངར་བའི་རིགས་བསྟེན་དགོས།
• ནུས་པ་ཡང་ཞིང་སྣུམ་པ་དང་། བསིལ་བའི་ཟས་སྐོམ་རིགས་བསྟེན་དགོས།
• རོ་ལན་ཚྭ་ཚ་སྐྱུར་དང་ལྡན་པའི་ཁ་ཟས་སྤང་བ།
• སྤྱོད་ལམ་རྩོལ་བཅག་དང་། ཉི་འོད་ལ་གནས་པ་སོགས་སྤང་བ།
• རབ་ཏུ་བསིལ་བའི་ཆུས་ལུས་ཡང་ཡང་བཀྲུ་བ་དང་། བསིལ་བའི་གོས་རིགས་བསྟེན་པ། ཁང་པ་བསིལ་སར་འདུག་དགོས་པ་ཡིན།
• ཁང་པའི་ཕྱིར་འགྲོ་ཚེ་ཤིང་གྲིབ་ཡོད་ས་དང་། རྫི་ཆར་ཏེ་རླུང་བསིལ་ཆར་ཆུ་ལྡན་པ་རྣམས་སུ་གནས་དགོས་པ་ཡིན།།

མཐའ་མའི་འདོན་ཐེངས་།: 21.05.2024 ཉིན། 1:05 PM