མོན་རྟ་དབང་ཁུལ་དུ་སྨན་སྐོར་ཐེངས་གསུམ་པ།

ཕྱི་ལོ་ ༢༠༢༡ ཟླ་ ༡༢ ཚེས་ ༢༧ ཉིན་ཨརུཎཱཅལ་མངའ་སྡེའི་རྟ་དབང་རྫོང་ཁོངས་པདྨ་མཁར་གྲོང་གསེབ་ས་གནས་སུ་རིན་མེད་སྨན་སྐོར་ཞབས་འདེགས་ཞུས་ཡོད། དེར་ནད་པ་ ༤༧ ལ་བརྟག་དཔྱད་སྨན་བཅོས་ཞུས་པས་སྨན་རིན་ཧིན་སྒོར་ ༡༨༨༨༠ ཙམ་སོང་བ་སྟོད་འཚོ་གསུམ་གྱི་བདེ་དོན་ཚོགས་ཆུང་ (Welfare Association of Toitso Sum(WATS) དང་རྟ་དབང་ཡན་ལག་སྨན་རྩིས་ཁང་ཟུང་འབྲེལ་ཐོག་འགྲོ་གྲོན་བཏང་གནང་ཡོད།

དེའི་སང་ཉིན་ཟླ་ ༡༢ ཚེས་ ༢༨ ཉིན་རྟ་དབང་རྫོང་ཁོངས་བོད་ཀྱི་ས་མཚམས་ཀྱི་ཉེ་འགྲམ་འཛད་མེད་ཐང་ཞེས་པའི་གྲོང་གསེབ་ས་ཁུལ་དུའང་ཉིན་གཅིག་རིང་རིན་མེད་སྨན་སྐོར་ཞུས་པས་དེར་ནད་པ་ ༥༢ ལ་བོད་ལུགས་གསོ་རིག་གི་བརྟག་དཔྱད་སྨན་བཅོས་དང་ཟས་སྤྱོད་སློབ་སྟོན་གནང་། ས་ཁུལ་འདིའི་སྨན་རིན་འགྲོ་གྲོན་ཧིན་སྒོར་ ༢༤༨༥༩ ཙམ་སོང་བ་ཆ་ཚང་དེཧ་རཱ་དཱུན་རྟ་ར་ཐེབས་རྩ་དང་རྟ་དབང་མོན་པ་ལས་མི་ཚོགས་པ་གཉིས་ནས་རྟ་དབང་ཡན་ལག་སྨན་རྩིས་ཁང་དང་ཟུང་འབྲེལ་ཐོག་བཏང་གནང་ཡོད། དེ་ལྟར་ཉིན་གཉིས་རིང་རྟ་དབང་གི་མཐའ་འཁོབ་ས་ཁུལ་ཁག་གཉིས་སུ་སྨན་སྐོར་དང་སྨན་སྦྱིན་ཞབས་འདེགས་གང་ལེགས་ཞུས་ཡོད།

མཐའ་མའི་འདོན་ཐེངས་།: 06.01.2022 ཉིན། 2:43 PM