མེ་རི་ཊིའི་གཙུག་ལག་སློབ་ཡོན་གྱི་ལས་གཞི་ལོ་བཅུ་འཁོར་བའི་མཛད་སྒོར་བཅར།

༄༅། །ཕྱི་ལོ་ ༢༠༢༤ ཟླ་ ༡༢ ཚེས་ ༧ ནས་༡༤ བར་འགྲོ་ཕན་བོད་ཀྱི་སྨན་རྩིས་ཁང་གི་འགན་འཛིན་སྐོུ་ཐུབ་བསྟན་ཚེ་རིང་མཆོག་དང་། དྷ་ས་སྨན་རྩིས་མཐོ་སློབ་ཁང་གི་སློབ་སྤྱི་གཞོན་པ་སྨན་དགེ་རྣམ་གྲོལ་ལྷ་མོ་རྣམ་གཉིས་ཨ་རི་མི་ནི་སོ་ཊའི་གཙུག་ལག་སློབ་ཆེན་གྱི་ཁྱབ་ཁོངས་ཤེས་ཡོན་དང་མི་ཤུགས་གོང་སྤེལ་མཐོ་སློབ་ཀྱི་མེ་རི་ཊིའི་གཙུག་ལག་སློབ་ཡོན་གྱི་ལས་གཞི་དབུ་བཙུགས་ནས་ལོ་ངོ་ཧྲིལ་པོ་བཅུ་འཁོར་བའི་དགའ་སྟོན་མཛད་སྒོར་དམིགས་བསལ་སྐུ་མགྲོན་དུ་མགྲོན་འབོད་གནང་བ་ལྟར་དུས་ཡུན་བདུན་ཕྲག་གཅིག་གི་མཛད་རིམ་ཁག་ནང་མཉམ་ཞུགས་འཐུས་འཚང་ཞུས། མི་ནི་སོ་ཊའི་གཙུག་ལག་སློབ་ཆེན་གྱི་རྒྱལ་སྤྱིའི་ལས་གཞི་འདིས་དེ་གའི་འབུམ་རམས་པའི་སློབ་མ་རྣམས་ལ་ཕྱིའི་རྒྱལ་ཁབ་ཁག་གི་ནང་སྤྱི་ཚོགས་ཞབས་ཞུ་བསྒྲུབ་པའི་བརྒྱུད་རིམ་ནང་རང་གི་ནུས་རྩལ་གོང་སྤེལ་དང་ཉམས་མྱོང་གསོག་རྒྱུའི་གོ་སྐབས་བཟང་པོ་སྐྲུན་བཞིན་ཡོད། རང་རེ་སྨན་རྩིས་ཁང་དུའང་འདི་ལོ་མཉམ་འབྲེལ་གྱི་ལས་གཞི་འདི་བཞིན་ཐེངས་དང་པོ་དབུ་འཛུགས་ཐོག་འབུམ་རམས་པའི་སློབ་མ་གཉིས་ཕེབས་ཏེ་དུས་ཡུན་ཟླ་བ་གཅིག་རིང་རང་རེའི་ལས་སློབ་རྣམས་ལ་བརྗོད་གཞི་སྣ་ཚོགས་ཐོག་ཟབ་འཁྲིད་གནང་སྟེ་ཕྱོགས་གཉིས་ཀར་ཕན་ཐོགས་གང་ལེགས་བྱུང་ཡོད།

          དེ་ཡང་ད་ལམ་གྱི་མཛད་རིམ་འདིའི་ཁྲོད་རྒྱ་གར་ཐེ་བའི་མཉམ་འབྲེལ་རྒྱལ་ཁབ་ཁག་ལྔ་ནས་སྐུ་ཚབ་དང་། གཙུག་ལག་སློབ་ཆེན་གྱི་འབྲེལ་ཆགས་དགེ་རྒན་རྣམ་པ། དེ་བཞིན་ལས་རིམ་ནང་མཉམ་ཞུགས་ཟིན་པའི་འབུམ་རམས་སློབ་མ་རྣམ་པ་བཅས་མཉམ་མཛོམས་ཐོག་ཕན་ཚུན་ཉམས་མྱོང་གོ་རྟོགས་དང་། ལས་གཞི་འདིས་འདས་པའི་ལོ་ངོ་བཅུའི་ནང་ཕྱོགས་ཕན་ཚུན་གཉིས་ཀར་དགེ་མཚན་ཕན་རླབས་ཇི་བྱུང་། མ་འོངས་བྱེད་ཕྱོགས་གང་དགེའི་ཐད་བསམ་ཚུལ་གོ་རྟོགས་སྤེལ་རེས་སོགས་བགྲོ་གླེང་ལྷུག་པོ་གནང་ཐུབ་པ་བྱུང་ཡོད། དེ་བཞིན་གཙུག་ལག་སློབ་ཆེན་དང་འབྲེལ་ཆགས་ཉེ་འཁོར་གྱི་འགྲེམ་སྟོན་ཁང་སོགས་ལ་ངོ་བསྐྱོད་བལྟ་སྐོར་གོ་སྒྲིག་དང་། མ་ཟད་འབྲེལ་ཡོད་མཐོ་སློབ་ཀྱི་འགན་འཛིན་སྐུ་ཞབས་ Dr. Michael C. Rodriguez མཆོག་དང་མཇལ་འཕྲད་སོགས་ཀྱང་ཞུས། ཕྱོགས་མཚུངས་དེ་གའི་སེམས་དོན་དང་གསོ་བྱེད་ལྟེ་གནས་སུ་འགན་འཛིན་ Dr. Mary Jo Kreitzer མཆོག་དང་། དེ་གའི་བོད་སྨན་སྡེ་ཚན་གྱི་འགན་འཛིན་སྨན་པ་འབུམ་རམས་པ་བསྟན་འཛིན་རྣམ་གྲོལ་ལགས་ཀྱིས་དབུས་པའི་ལས་བྱེད་བཅུ་གཅིག་དང་ལྷན་དུའང་ཚོགས་འདུ་ཞིག་གོ་སྒྲིག་གནང་སྐབས་གཙོ་བོ་ཚོགས་པ་གཉིས་དབར་ལོ་ངོ་བཅུ་ཕྲག་གཉིས་ཙམ་གྱི་རྒྱུན་མཐུད་འབྲེལ་ལམ་དེ་བཞིན་རྒྱ་བསྐྱེད་ཐོག་ཕྱོགས་གཉིས་ཀར་ཤེས་ཡོན་དང་། ཉམས་ཞིབ། པར་སྐྲུན་བཅས་ཀྱི་མཉམ་འབྲེལ་ལས་གཞི་འོས་མཚམས་རྩོམ་འཆར་ཐོག་མོས་མཐུན་ཡིག་ཆ་སྣོལ་འཇོག་གི་མཛད་རིམ་ཁོངས་སུ་སྐོུ་མཆོག་ནས་ཀྱང་འགྲོ་ཕན་སྨན་རྩིས་ཁང་སྤྱིའི་ངོ་སྤྲོད་དང་། སྨན་དགེ་རྣམ་གྲོལ་ལྷ་མོས་སྨན་རྩིས་མཐོ་སློབ་ཀྱི་ངོ་སྤྲོད་གཏམ་བཤད་ཟབ་ནན་ཞུས་ཡོད་པ་བཅས། ད་ལམ་ཁོང་རྣམ་པ་གཉིས་ཀྱི་ཕྱོགས་བསྐྱོད་ལས་རིམ་འདི་བརྒྱུད་མི་ནི་སོ་ཊའི་གཙུག་ལག་སློབ་ཆེན་དང་སྨན་རྩིས་ཁང་གཉིས་ཀྱི་དབར་འབྲེལ་ལམ་མུ་མཐུད་གཏན་གནས་དང་སྔར་ལྷག་རྒྱ་བསྐྱེད་ཡོང་རྒྱུའི་གྲོས་འཆམ་བཅས་གང་ལེགས་བྱུང་ཡོད། མཇུག་དོན་སྨན་རྩིས་ཁང་གི་ངོས་ནས་དེ་གའི་འབྲེལ་ཡོད་མི་སྣ་ཡོངས་ནས་སྐབས་ཐོག་ཁོང་རྣམ་གཉིས་ལ་སྣེ་ལེན་ཟབ་རྒྱས་གནང་བ་དང་ཡང་སྒོས་སྨན་རྩིས་ཁང་ལ་མུ་མཐུད་འབྲེལ་ལམ་རྒྱབ་སྐྱོར་གནང་བར་ཐུགས་རྗེ་བཀྲིན་ཆེ་ཞུ་རྒྱུ་ཡིན།།

མཐའ་མའི་འདོན་ཐེངས་།: 30.12.2024 ཉིན། 11:55 AM