དཔལ་ལྡན་རྒྱུད་བཞིའི་བླ་བརྒྱུད་གསོལ་འདེབས་བྱིན་རླབས་ཆར་རྒྱུན་བཞུགས་སོ། ། 

སྤྲུལ་འཁོར་སྨན་པ་སྐལ་བཟང་དོན་ལྡན། 

འགྲོ་ལ་ཕན་བཞེད་ཐུགས་རྗེས་རབ་བསྐྲུན་པའི། །

སྤང་རྟོགས་སྐྱོབ་པ་མཆོག་བརྙེས་ལྷ་ཡི་ལྷ། །

རྟེན་འབྱུང་གཏམ་གྱི་འགྲོ་རྣམས་འདྲེན་མཛད་པའི། །

ཐུབ་དབང་སྨྲ་བའི་ཉི་མོར་གསོལ་བ་འདེབས། །

(ྋགོང་ས་སྐྱབས་མགོན་ཐམས་ཅད་མཁྱེན་གཟིགས་སྐུ་ཕྲེང་བཅུ་བཞི་པ་ཆེན་པོས་མཛད་པའི་གསུང་བྱིན་རླབས་ཅན།)

 སྙིགས་དུས་ལྔ་བརྒྱའི་འགྲོ་བ་གྲོལ་བའི་སླད། ། 

ཡངས་པ་ཅན་དུ་བདེ་གཤེགས་གདན་འཛོམས་མཛད། །

སྨན་བླ་བདེ་གཤེགས་ལྷ་ཚོགས་མཆེད་བརྒྱད་ལ། །

(ྋརྒྱལ་བའི་བཀའ་འགྱུར་རིན་པོ་ཆེའི་ནང་བསྟན་པའི་སྨན་མདོ་བརྒྱད་བརྒྱ་བ་གཞིར་བཞག་ཐོག་ཁོ་བོས་གསར་བསྒྲིགས་བྱས།)

དཔལ་ལྡན་སྟོབས་བཅུ་མངའ་བ་མ་ལུས་པ། །ས་གསུམ་འགྲོ་བའི་སྡུག་བསྔལ་བསལ་བའི་ཕྱིར། །མཆོག་གི་སྤྲུལ་སྐུའི་སྒྱུ་འཕྲུལ་དྲྭ་བའི་གར། །བདེ་གཤེགས་སྨན་གྱི་བླ་མར་གསོལ་བ་འདེབས། །གང་གི་རྣམ་སྤྲུལ་རིག་པའི་ཡེ་ཤེས་དང་། །རྒྱུད་བཞིའི་ཞུ་གསོལ་ཆེན་པོ་ཡིད་ལས་སྐྱེས། །རྒྱུན་ཤེས་བུ་དང་འཚོ་བྱེད་གཞོན་ནུ་ལ། །གསོལ་བ་འདེབས་སོ་གཞན་ཕན་སྣང་བ་སྩོལ། །ཐུབ་བསྟན་ཤིང་རྟ་ཆེན་པོ་ཀླུ་སྒྲུབ་མགོན། །གསུང་རབ་རྒྱ་མཚོའི་མཐར་སོན་མ་ཁོལ་དང་། །གནས་ལྔ་རིག་པའི་ཟླ་བ་མངོན་དགའ་ལ། །གསོལ་བ་འདེབས་སོ་གཞན་ཕན་སྣང་བ་སྩོལ། །

ཐེག་ཆེན་མདོ་སྔགས་སྤྱི་དང་གསོ་དཔྱད་ཀྱི། །

དྲི་མེད་ལུགས་ཟུང་གདམས་ངག་མཛོད་འཛིན་པ། །

འཕགས་ཡུལ་གྲུབ་ཆེན་པཎ་ཆེན་བརྒྱད་བཅུ་ལ། །

གསོལ་བ་འདེབས་སོ་གཞན་ཕན་སྣང་བ་སྩོལ། །

                                                                            ཀུན་བཟང་ཆོས་རྒྱལ་ཐོ་རི་གཉན་བཙན་དུས། །

                                                                           འཕགས་ཡུལ་དྲང་སྲོང་བི་བྱི་དགའ་བྱེད་བྱོན། །

                                                                           དེའི་སྲས་བླ་སྨན་དུང་གི་ཐོར་ལྕོག་ལ། །

                                                                           གསོལ་བ་འདེབས་སོ་གཞན་ཕན་སྣང་བ་སྩོལ། །

གང་དེའི་ཐུགས་སྲས་བློ་གྲོས་ཆེན་མོ་དང་། །

དེའི་སྲས་སྨན་པ་མཚུངས་མེད་བློ་གྲོས་སོགས། །

རིགས་བརྒྱུད་གནང་བ་རིགས་ཀྱི་སྨན་པ་ལ། །

གསོལ་བ་འདེབས་སོ་གཞན་ཕན་སྣང་བ་སྩོལ། །

                                                                    གང་ལྗོངས་ཆོས་སྲིད་བསྟན་འགྲོའི་ཉིན་གཅིག་པུ། །

                                                                    རྨད་བྱུང་ཐུགས་བསྐྱེད་སྤྱན་རས་གཟིགས་དབང་དངོས། །

                                                                   རྒྱལ་བས་ལུང་བསྟན་སྲོང་བཙན་སྒམ་པོ་ལ། །

                                                                  གསོལ་བ་འདེབས་སོ་གཞན་ཕན་སྣང་བ་སྩོལ། །

གངས་ལྗོངས་སྐྱེ་དགུའི་མ་རིག་མུན་པ་སེལ། །

རིག་གཞུང་བརྡ་སྤྲོད་གསོ་དཔྱད་གཏན་ལ་ཕབ། །

བཀའ་དྲིན་མཚུངས་བྲལ་འཇམ་དབྱངས་ཐོན་མི་ལ། །

གསོལ་བ་འདེབས་སོ་གཞན་ཕན་སྣང་བ་སྩོལ། །

                                                                  སྲིད་པའི་རིམས་ནད་ཚ་གདུང་འདྲུང་འབྱིན་ཕྱིར། །

                                                                  རིས་མེད་འགྲོ་ལ་སྨན་གྱི་གཞུང་ལུགས་སྤེལ། །

                                                                  རྗེས་སྦྱང་ལས་གོམས་འཚོ་བྱེད་སྨན་པ་ལ། །

                                                                 གསོལ་བ་འདེབས་སོ་གཞན་ཕན་སྣང་བ་སྩོལ། །

མདོ་སྔགས་ཟུང་འཇུག་རྒྱལ་བསྟན་དར་ཞིང་རྒྱས། །

རྒྱལ་བ་སྨན་བླ་རིག་འཛིན་པདྨ་འབྱུང་། །

མཁན་ཆེན་ཞི་འཚོ་ཆོས་རྒྱལ་ཁྲི་སྲོང་ལ། །

གསོལ་བ་འདེབས་སོ་གཞན་ཕན་སྣང་བ་སྩོལ། །

                                                                  རྒྱལ་བ་གསུངས་པའི་གསོ་དཔྱད་གདམས་པའི་མཛོད། །

                                                                 མ་ནོར་ལམ་བཟང་ཡང་དག་ཚད་མར་བསྒྱུར། །

                                                                 ཨུ་རྒྱན་དངོས་མཉམ་བེེ་རོ་ཙ་ན་ལ། །

                                                               གསོལ་བ་འདེབས་སོ་གཞན་ཕན་སྣང་བ་སྩོལ། །

ཕྱི་ནང་མཁས་དགུ་གདན་འཛོམས་གསོ་དཔྱད་སྤེལ། །

དཔལ་ལྡན་རྒྱུད་བཞི་བཀའ་གཏེར་གཉིས་སུ་སྦས། །

སྨན་རྒྱལ་རྙིང་མ་ཡོན་ཏན་མགོན་པོ་ལ། །

གསོལ་བ་འདེབས་སོ་གཞན་ཕན་སྣང་བ་སྩོལ། །

གངས་ཅན་མིག་འབྱེད་བེེ་རོ་ཙ་ནའི་ཞབས། །ཆོས་རྒྱལ་ཚངས་པ་ལྷ་ཡི་མེ་ཏོག་དཔལ། །ཟབ་གཏེར་སྒོ་འབྱེད་གྲྭ་པ་མངོན་ཤེས་ལ། །གསོལ་བ་འདེབས་སོ་གཞན་ཕན་སྣང་བ་སྩོལ། །གང་དེའི་ཐུགས་སྲད་དར་མ་གྲགས་པ་དང་། །ཚེ་ཡི་རིག་བྱེད་འཛིན་པ་དཀོན་མཆོག་སྐྱབས། །འཇའ་ལུས་མངོན་གྱུར་རྗེ་བཙུན་གཡུ་ཐོག་པར། །གསོལ་བ་འདེབས་སོ་གཞན་ཕན་སྣང་བ་སྩོལ། །

                                                            དུས་གསུམ་སངས་རྒྱས་ཀུན་འདུས་གཡུ་ཐོག་རྗེ། །

                                                            རྟ་ཕག་ཡབ་ཡུམ་དཔལ་ལྡན་འཕྲེང་བའི་ཞབས། །

                                                           རྩ་གསུམ་སྨན་གྱི་ཞི་ཁྲོའི་ལྷ་ཚོགས་ལ། །

                                                          གསོལ་བ་འདེབས་སོ་གཞན་ཕན་སྣང་བ་སྩོལ། །

སྣང་སྲིད་ཆོས་ཀུན་གནས་ལུགས་མཐར་ཐུག་གཟིགས། །

གཡུ་ཐོག་སྙན་བརྒྱུད་ཐིག་ལེའི་གདམས་ངག་བཟུང་། །

འཛིན་མཁས་རྒྱལ་སྲས་སུམ་སྟོན་ཡེ་ཤེས་གཟུངས། །

གསོལ་བ་འདེབས་སོ་གཞན་ཕན་སྣང་བ་སྩོལ། །

སྐྱེ་བ་སྙིང་ཐིག་མངའ་བདག་ཡེ་ཤེས་གཟུངས། །དྲི་མེད་ལུགས་འཛིན་གཞོན་ནུ་ཡེ་ཤེས་དང་། །གཞན་ཕན་གཏེར་གྱུར་གཡུ་ཐོག་འབུམ་སེང་ལ། །གསོལ་བ་འདེབས་སོ་གཞན་ཕན་སྣང་བ་སྩོལ། །

                                                                      བྱང་ཆུབ་སེམས་ཀྱི་བདུད་རྩི་སྨན་དུ་བླངས། །

                                                                     ལྷག་པའི་ལྷ་མཆོག་སྒྲོལ་མས་རྗེས་སུ་བཟུང་། །

                                                                    བཀའ་གདམས་ཇོ་བོ་འབྲོམ་སྟོན་ཡབ་སྲས་ལ། །

                                                                     གསོལ་བ་འདེབས་སོ་གཞན་ཕན་སྣང་བ་སྩོལ། །

རྡོ་རྗེ་འཆང་ཆེན་ཏེ་ལོ་ཎ་རོ་པ། །

མར་མི་དྭགས་གསུམ་གྲུབ་བརྒྱུད་དོན་གྱི་བརྒྱུད། །

བཀའ་བབ་སྐྱེས་མཆོག་རང་བྱུང་རྡོ་རྗེ་ལ། །

གསོལ་བ་འདེབས་སོ་གཞན་ཕན་སྣང་བ་སྩོལ། །

ཚུལ་འདིར་མཁས་གྲུབ་བུདྡྷ་རཏྣའི་མཚན། །རིག་བྱེད་མང་ཐོས་དོན་གྲུབ་རིན་ཆེན་དང་། །དོན་ཀུན་གྲུབ་པ་རྒྱལ་མཚན་དཔལ་བཟང་ལ།  །གསོལ་བ་འདེབས་སོ་གཞན་ཕན་སྣང་བ་སྩོལ། །ཚིག་དོན་གསལ་བྱེད་དཀོན་མཆོག་རྒྱལ་མཚན་དཔལ། །མཁྱེན་པའི་སྤྱན་མངའ་དཔལ་ལྡན་འཚོ་བྱེད་ཞབས། །ཚངས་སྤྱོད་བརྟུལ་ཞུགས་འཛིན་པ་དབང་ཕྱུག་གྲགས། །གསོལ་བ་འདེབས་སོ་གཞན་ཕན་སྣང་བ་སྩོལ། །ངེས་དོན་མངོན་གྱུར་རིག་འཛིན་ཕུན་ཚོགས་བཟང་། །མཁས་གྲུབ་ཟུར་མཁར་མཉམ་ཉིད་རྡོ་རྗེའི་ཞབས། །ལག་ལེན་མཐར་ཕྱིར་རྗེ་བཙུན་ཚེ་འབུམ་པར། །གསོལ་བ་འདེབས་སོ་གཞན་ཕན་སྣང་བ་སྩོལ། །བྱར་པོ་པཎ་ཆེན་ཟླ་བའི་དབང་པོ་དང་། །རི་ལྡིང་བློ་བཟང་རྒྱ་མཚོ་བྱང་ངོས་པ། །བསྟན་འཛིན་དར་རྒྱས་བློ་བཟང་རྒྱ་མཚོའི་ཞབས། །གསོལ་བ་འདེབས་སོ་གཞན་ཕན་སྣང་བ་སྩོལ། །ངག་དབང་དོན་གྲུབ་བློ་མཆོག་རྡོ་རྗེ་དང་། །ཀུན་མཁྱེན་ལྔ་པ་རང་ཤར་རང་གྲོལ་རྩལ། །ངག་དབང་གཞོན་ནུ་སྟོད་ལུང་ཆོས་ཀྱི་རྗེར། །གསོལ་བ་འདེབས་སོ་གཞན་ཕན་སྣང་བ་སྩོལ། །ངག་དབང་ཆོས་ལྡན་བླ་དགའ་དོན་གྲུབ་དང་། །ཁྱབ་བདག་རྡོ་རྗེ་རིན་ཆེན་དབང་གི་རྒྱལ། །ལུང་རིགས་རྒྱ་མཚོ་མཁས་བཙུན་རྡོ་རྗེ་གྲགས། །གསོལ་བ་འདེབས་སོ་གཞན་ཕན་སྣང་བ་སྩོལ། །

                                                              མཁས་པས་མདོ་སྔགས་ལུང་རིགས་ཁོང་དུ་ཆུད། །

                                                              བཙུན་པས་གསོ་དཔྱད་བསྟན་པའི་སྒྲོན་མེ་སྤར། །

                                                              སྒྲུབ་པས་གཞན་དོན་བརྩོན་མཛད་མདེའུ་དམར་རྗེར། །

                                                            གསོལ་བ་འདེབས་སོ་གཞན་ཕན་སྣང་བ་སྩོལ། །

ངག་དབང་བརྩོན་འགྲུས་བློ་བཟང་ཆོས་འཕེལ་ཞབས། །གསོ་རིག་མངའ་བདག་ཕུན་ཚོགས་ཡོན་ཏན་དང་། །བཀའ་དྲིན་མཉམ་མེད་ཆོས་ཀྱི་སེང་གེ་ལ། །གསོལ་བ་འདེབས་སོ་གཞན་ཕན་སྣང་བ་སྩོལ། །སྒྲུབ་པ་མཐར་ཕྱིན་འཇིགས་མེད་འཕྲིན་ལས་དཔལ། །སྨན་རྩིས་བསྟན་པ་རྒྱས་མཛད་གཞན་ཕན་གཏེར། །བཀའ་དྲིན་མཚུངས་མེད་མཁྱེན་རབ་ནོར་བུ་ལ། །གསོལ་བ་འདེབས་སོ་གཞན་ཕན་སྣང་བ་སྩོལ། །

སྟོང་ཉིད་སྙིང་རྗེ་ཟུང་དུ་འཇུག་པའི་ལམ། །ཆེས་ཆེར་གསལ་མཛད་གངས་ཅན་བསྟན་འགྲོའི་མགོན། །ཕྱག་ན་པདྨོ་བསྟན་འཛིན་རྒྱ་མཚོ་ལ། །གསོལ་བ་འདེབས་སོ་གཞན་ཕན་སྣང་བ་སྩོལ། །(འདེལ་དགུ་མཁྱེན་བརྩེ་རིན་པོ་ཆེས་བསྐུལ་བའི་ངོརྋགོང་ས་སྐྱབས་མགོན་རྒྱལ་དབང་སྐུ་ཕྲེང་བཅུ་བཞི་པ་ཆེན་པོས་མཛད་པའི་གསུང་བྱིན་རླབས་ཅན།)

རྒྱལ་བསྟན་བཤད་དང་སྒྲུབ་པས་འཛིན་པ་ལ། །ཆགས་ཐོགས་བྲལ་བ་མཁའ་ལ་ཉིན་བྱེད་བཞིན། །འཕྲིན་ལས་བཟང་པོས་འགྲོ་བ་སྒྲོལ་བའི་རྗེར། །གསོལ་བ་འདེབས་སོ་གཞན་ཕན་སྣང་བ་སྩོལ། །(ྋསྤྱི་ནོར་ྋགོང་ས་སྐྱབས་མགོན་ཆེན་པོས་ཡར་འབྲོག་སྟག་ལུང་རྩེ་སྤྲུལ་རིན་པོ་ཆེ་བཤད་སྒྲུབ་འཕྲིན་ལས་ཉིན་བྱེད་དཔལ་བཟང་པོར་ཞབས་བརྟན་གསོལ་འདེབས་འཆི་མེད་བཅུད་སྤུངས་ཞེས་པ་མཛད་པ་ལས་ཁོ་བོས་བཏུས་པ་ཡིན། ) 

 རྗེས་སྦྱངས་གསོ་དཔྱད་ལས་གོམས་བཟོ་ལ་མཁས། །ཀུན་སྙོམས་གཞན་ཕན་རྒྱུད་པའི་ལུགས་བཟང་འཛིན།  །མཚུངས་བྲལ་སློབ་དཔོན་བསྟན་འཛིན་ཆོས་གྲགས་ལ། །གསོལ་བ་འདེབས་སོ་གཞན་ཕན་སྣང་བ་སྩོལ། །   (གང་གི་སློབ་བུ་ཨེ་པ་བསོད་ནམས་རིན་ཆེན་གྱིས་བསྐུལ་བའི་ངོར་དཔལ་ྋརྒྱལ་བ་ཀརྨ་པ་སྐུ་ཕྲེང་བཅུ་བདུན་ཨུ་རྒྱན་འཕྲིན་ལས་རྡོ་རྗེས་མཛད་པའི་གསུངས།) 
སྐབས་འདིར་རང་རང་སོ་སོའི་དབང་ལུང་འཁྲིད་གསུམ་ཞུ་བའི་བླ་མ་གང་ཡིན་པ་དེར་གསོལ་འདེབས་བྱ་དགོས།  རིན་ཆེན་གཏེར་མཛོད་དུ་བཞུགས་སོ་གསོལ་བའི་གཡུ་ཐོག་སྙིང་ཐིག་གི་ཆོས་སྐོར་པུ་ཏིའི་ཆོས་ཚན་ཆ་ཚང་བར་བརྒྱབ་བརྟེན་བླ་མ་བརྒྱུད་པ་བར་མ་ཆད་པའི་ཞལ་ལུང་དང་། གྲོལ་བྱེད་སྔོན་འགྲོ་དང་དངོས་གཞིའི་ཁྲིད། སྨིན་བྱེད་གཡུ་ཐོག་སྙིང་ཐིག་གི་དབང་བསྐུར་དང་། ལྷག་དོན་རིན་ཆེན་གཏེར་མཛོད་ནང་བཞུགས་པའི་དཔལ་ཁྲོ་རྒྱལ་རྟ་མཆོག་རོལ་པའི་ཡི་དམ་དཀྱིལ་འཁོར་གྱི་དབང་བསྐུར་ཞིག་དང་། རྒྱལ་བའི་བཀའ་འགྱུར་རིན་པོ་ཆེ་བརྒྱུད་ཏ་པའི་ནང་བཞུགས་སོ་གསོལ་བའི་སངས་རྒྱས་སྨན་བླའི་ཞིང་བཀོད་དང་། སྨན་མདོ་བརྒྱད་བརྒྱ་བ་རྒྱས་བསྡུས་གཉིས། སྒོས་སུ་མཁས་གྲུབ་ར་ག་ཨསྱས་མཛད་པའི་སྨན་བླའི་ཆོ་ག་བེེ་ཌུརྱའི་ཆུ་རྒྱུན་གྱི་ལུང་དང་ཁྲིད་བཅས་ཁོ་བོས་སྔ་འགྱུར་རྙིང་མའི་ཁྲི་འཛིན་བསྟན་འཛིན་གྱི་སྐྱེས་བུ་བྱང་ཆུབ་སེམས་དཔའ་རྗེ་འདི་ཉིད་ཀྱི་དྲུང་ནས་སྔ་ཕྱིར་ཐོབ་པ་དང་། ཡང་སྒ་རྗེ་ཁམས་སྤྲུལ་རིན་པོ་ཆེའི་དྲུང་ནས་ཀྱང་གཡུ་ཐོག་སྙིང་ཐིག་གི་དབང་བསྐུར་ཟབ་མོ་སྔ་ཕྱིར་ཐེངས་གཉིས་ཐོབ་པ་དང་།  དེ་བཞིན་ྋགོང་ས་རྒྱལ་བ་རིན་པོ་ཆེའི་དྲུང་ནས་ཀྱང་སངས་རྒྱས་སྨན་བླའི་རྗེས་གནང་དང་། ཡིད་དམ་བརྒྱད་ཀྱི་དབང་བསྐུར་ཟབ་མོ་ཞིག་ཐོབ་ཐུབ་བཅས་ལ་བརྟེན་རང་དང་བསྐལ་བ་མཉམ་པའི་མཆེད་གྲོགས་དང་མ་འོངས་གསོ་རིག་དང་གཡུ་ཐོག་སྙིང་ཐིག་གི་སྙན་བརྒྱུད་ཀྱི་གདམས་པ་ཟབ་མོ་འདི་ཉིད་ཉམས་སུ་མྱོང་བའི་བསྐལ་ལྡན་ལས་ཅན་རྣམས་ལ་ཅུང་ཟད་ཕན་ཕྱིར་ཟུར་བལྟའི་ཆེད་དུ་བརྒྱུད་བཞིའི་བླ་བརྒྱུད་ཀྱི་གསོལ་འདེབས་རྩ་ཆེ་འདི་ཉིད་ལ་ཅུང་ཟད་ཁ་བསྣོན་གྱིས་ཟུར་བསྒྲིགས་བྱས་པ་ཞིག་ཡིན།

ཐེག་ཆེན་མདོ་སྔགས་ཐར་ལམ་གསལ་བྱེད་ཕྱིར། །

དབང་བསྐུར་བརྒྱུད་བཤད་ལུང་ཁྲིད་ཆོས་ཀྱི་རྗེ། །

བཀའ་དྲིན་གསུམ་ལྡན་རྩ་བའི་བླ་མ་ལ། །

གསོལ་བ་འདེབས་སོ་གཞན་ཕན་སྣང་བ་སྩོལ། །

སྐབས་འདིར་རང་རང་སོ་སོའི་དབང་ལུང་ཁྲིད་གསུམ་ཞུ་བའི་ཚད་ལྡན་རྩ་བའི་བླ་མ་གང་ཡིན་པ་དེ་ལ་གསོལ་འདེབས་ཟུར་དུ་འདོན་དགོས།  རྒྱུན་དུ་བླ་མ་ལ་གསོལ་བ་འདེབས་པ་དེ་ཤིན་ཏུ་ནས་གལ་ཆེ་བའི་གནད་གཅིག་ཡིན་ཏེ་རྗེ་མི་ལ་ཞབས་ཀྱིས། མི་མེད་ལུང་པའི་བྲག་ཕུག་ན། །སྐྱོ་གདུང་གི་སྡུག་བསྔལ་སངས་དུས་མེད། །བླ་མ་དུས་གསུམ་སངས་རྒྱས་ལ། །ཡིད་གདུང་ངེ་བ་དང་འབྲལ་བ་མེད། །ཅེས་བྱིན་རླབས་མཚན་ཁ་ཆེ་བའི་གནད་འདི་ལྟར་བསྟན་པའོ།།

སྐབས་གསུམ་པ་དང་ཕྱི་ནང་དྲང་སྲོང་འཁོར། །འཆི་མེད་ཚེ་ཡི་རིག་པ་འཛིན་ལ་སོགས། །གནང་རིགས་རྗེས་སྦྱངས་འགྲོ་བའི་ཉེར་འཚོ་གང་། །གསོལ་བ་འདེབས་སོ་གཞན་ཕན་སྣང་བ་སྩོལ། །དངོས་གྲུབ་འདོད་དགུའི་དཔལ་གཏེར་ཡི་དམ་ལྷ། །མཐུན་རྐྱེན་ཀུན་གྲུབ་ཆོས་སྲུང་རྒྱ་མཚོའི་ཚོགས། །ཁྱད་པར་ཆོས་འདིའི་བཀའ་སྲུང་ཞང་བློན་ལ། །གསོལ་བ་འདེབས་སོ་གཞན་ཕན་སྣང་བ་སྩོལ། །མི་མཐུན་འདུ་བ་འཁྲུགས་པའི་ལས་དབང་གིས། །ཉམ་ཐག་ནད་ཀྱིས་གཙེས་པའི་སྐྱེ་བོ་ཀུན། །ལུས་སེམས་བདེ་བར་བསྐྱེད་པའི་བདུད་རྩི་ལ། །མི་ཟད་ལོངས་སུ་སྤྱོད་པར་བྱིན་གྱིས་རློབས། །རོ་ནུས་ཞུ་རྗེས་མཁས་པའི་ཕྱག་ལེན་ལྟར། །མཐུན་པར་བསྡེབས་པའི་ཚ་གྲང་འདུས་པ་ཡི། །ནད་ཀྱི་གཡུལ་ལས་རྒྱལ་བའི་བ་དན་ཆེ། །སྲིད་པའི་རྩེ་མོར་བསྒྲེངས་པར་བྱིན་གྱིས་རློབས། །སྣ་ཚོགས་སྨན་གྱིས་རླུང་མཁྲིས་བད་ཀན་དང་།  །འདུས་པའི་ནད་ཀུན་འཇོམས་པའི་རྟེན་འབྲེལ་གྱིས། །རང་གཞན་འཁོར་བར་ལྟུང་བྱེད་དྲག་པོའི་ནད། །དུག་གསུམ་རྩད་ནས་གཅོད་པར་བྱིན་གྱིས་རློབས། །འགྲོ་མགོན་གུ་ཎའི་སྙིང་ཐིག་གདམས་པའི་མཛོད། །ཉམས་སུ་བསྟར་བས་མ་བཅོས་རང་གི་སེམས། །བདེ་ཆེན་ཆོས་ཀྱི་འཁོར་ལོར་ངོ་འཕྲོད་ནས། །ཚེ་འདི་ཉིད་ལ་གྲོལ་བར་བྱིན་གྱིས་རློབས། །ལྷག་བསམ་ཁ་བའི་རྡུལ་བརྩེགས་ལས་འོངས་པའི། །རླབས་ཆེན་སྨོན་ལམ་མ་འདྲོས་ཀླུང་ཆེན་གྱིས། །གསོ་རིག་བསྟན་པའི་ནོར་འཛིན་ཀུན་ཁྱབ་ནས། །གཞན་ཕན་ནོར་བུའི་དགའ་སྟོན་རྒྱས་པར་མཛོད། །ཅེས་པ་འདི་ཉིད་ཀྱི་མཇུག་གི་བརྒྱུད་རིམ་གསར་བསྒྲིགས་སུ་ཀརྨ་འཇིགས་མེད་ཆོས་ཀྱི་སེང་གེས་མཛད་པ་ལས་གཞིར་བཞག་སྟེ་སྐབས་འགར་བར་མཚམས་སུ་ཁོ་བོས་ལོ་རྒྱུས་ཀྱི་བྱུང་རིམ་ལྟར་ཅུང་ཟད་ཁ་སྐོང་(ཚིགས་བཅད་འཕྲེད་ཉལ་བ་རྣམས།)བྱས་པ་བཅས་སོ།། །།

མཐའ་མའི་འདོན་ཐེངས་།: 18.11.2013 ཉིན། 4:32 PM