༄༅། །བྱིས་པའི་འབུམ་ཆུང་བཞུགས་སོ།།

༄༅། །ཤེས་རབ་ཀྱི་ཕ་རོལ་ཏུ་ཕྱིན་པ་འབུམ་བསྡུས་པ་བཞུགས་སོ།།

༄༅། །རྒྱ་གར་སྐད་དུ། ཤཏ་ས་ཧ་སྲི་ཀ་པྲཛྙཱ་པ་ར་མི་ཏ། བོད་སྐད་དུ། འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པའི་དོན་མ་ནོར་བར་བསྡུས་པ། ཐམས་ཅད་བསྐྱེད་(མཁྱེན་)པའི་ཡུལ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཟབ་མོ་སྣང་བ་ཞེས་བྱ་བའི་ཏིང་ངེ་འཛིན་ལས་བཞེངས་ནས། བཅོམ་ལྡན་འདས་རྒྱལ་པོའི་ཁབ་བྱ་རྒོད་ཕུང་པོའི་རི་ལ། དགེ་སློང་ལྔ་སྟོང་ཙམ་གྱི་དགེ་འདུན་ཆེན་པོ་དང་། ཐབས་ཅིག་ཏུ་བཞུགས་ཏེ། ཐམས་ཅད་ཀྱང་དགྲ་བཅོམ་པ་ཟག་པ་ཟད་པ། ཉོན་མོངས་པ་མེད་པ། དབང་དུ་གྱུར་པ། སེམས་ཤིན་ཏུ་རྣམ་པར་གྲོལ་བ། ཅང་ཤེས་པ། གླང་པོ་ཆེན་པོ། བྱ་བ་བྱས་པ། བྱེད་པ་བྱས་པ། ཁུར་བོར་བ། རང་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། བཀའ་ཡང་དག་པའི་སེམས་ཤིན་ཏུ་རྣམ་པར་གྲོལ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དང་། འཕགས་པ་སྤྱན་རས་གཟིགས་དབང་ཕྱུག་དང་། རབ་འབྱོར་དང་། ཀུན་དགའ་བོ་ལ་སོགས་པའི་ལྷ་དང་། མི་ལ་སོགས་པའི་སེམས་ཅན་མཐའ་ཡས་པས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་འོད་ཟེར་བྱེ་བ་དྲུག་ཅུ་གཟིགས་ཤིང་འཕྲོས་པར་གྱུར་ཏོ། །དེ་ནས་མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་མངོན་པར་རབ་ཏུ་བརྒྱན་པར་གྱུར་ཏོ། །ཚེ་དང་ལྡན་པ་རྣམས་ཀྱིས་ཕྱག་ཕུལ་ཞིང་། མཆོད་པའི་རྣམ་གྲངས་བསྟན་ཏེ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྣམས་ལ་བཀའ་སྕལ་པ། འཕགས་པ་སྤྱན་རས་གཟིགས་དབང་ཕྱུག་དང་། རབ་འབྱོར་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ངེས་པར་འབྱུང་བར་འགྱུར་བ། དེ་བཞིན་དུ་ཁྱོད་སློབ་པར་གྱིས་ཤིག ཡུལ་དྲུག་དང་། ཕུང་པོ་ལྔའོ། །གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་དང་། སྐྱེ་མཆེད་བཅུ་གཉིས་དང་། དབང་པོ་དྲུག་གོ། མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་དང་། གཟུགས་དང་། སྒྲ་དང་། དྲི་དང་། རོ་དང་། རེག་བྱ་དང་། ཆོས་སོ། །རྣམ་པར་ཤེས་པའི་དོན་ནི། མིག་གི་རྣམ་པར་ཤེས་པ་དང་། རྣ་བའི་རྣམ་པར་ཤེས་པ་དང་། སྣའི་རྣམ་པར་ཤེས་པ་དང་། ལྕེའི་རྣམ་པར་ཤེས་པ་དང་། ལུས་ཀྱི་རྣམ་པར་ཤེས་པ་དང་། ཡིད་ཀྱི་རྣམ་པར་ཤེས་པ་དང་། རེག་པའི་དོན་ནི། མིག་གི་འདུས་ཏེ་རེག་པ་དང་། རྣ་བའི་འདུས་ཏེ་རེག་པ་དང་། སྣའི་འདུས་ཏེ་རེག་པ་དང་། ལྕེའི་འདུས་ཏེ་རེག་པ་དང་། ལུས་ཀྱི་འདུས་ཏེ་རེག་པ་དང་། ཡིད་ཀྱི་འདུས་ཏེ་རེག་པ་དང་། རེག་པའི་རྐྱེན་གྱིས་ཚོར་བའི་དོན་ནི། མིག་གི་འདུས་ཏེ་རེག་པའི་རྐྱེན་གྱིས་ཚོར་བ་དང་། རྣ་བའི་འདུས་ཏེ་རེག་པའི་རྐྱེན་གྱིས་ཚོར་བ་དང་། སྣའི་འདུས་ཏེ་རེག་པའི་རྐྱེན་གྱིས་ཚོར་བ་དང་། ལྕེའི་འདུས་ཏེ་རེག་པའི་རྐྱེན་གྱིས་ཚོར་བ་དང་། ལུས་ཀྱི་འདུས་ཏེ་རེག་པའི་རྐྱེན་གྱིས་ཚོར་བ་དང་། ཡིད་ཀྱི་འདུས་ཏེ་རེག་པའི་རྐྱེན་གྱིས་ཚོར་བ་དང་། ཁམས་དྲུག་གི་དོན་ནི། སའི་ཁམས་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་དང་། རྣམ་པར་ཤེས་པའི་ཁམས་དང་། རྟེན་ཅིང་འབྲེལ་བར་འབྱུང་བ་བཅུ་གཉིས་ཀྱི་དོན་ནི། མ་རིག་པ་དང་། འདུ་བྱེད་དང་། རྣམ་པར་ཤེས་པ་དང་། མིང་དང་གཟུགས་དང་། སྐྱེ་མཆེད་དྲུག་དང་། རེག་པ་དང་། ཚོར་བ་དང་། སྲེད་པ་དང་། ལེན་པ་དང་། སྲིད་པ་དང་། སྐྱེ་བ་དང་། རྒ་ཤི་དང་། བྱེད་པ་པོའི་སྐྱེ་མཆེད་བཅུ་གཉིས་ཀྱི་དོན་ནི། བདག་དང་། སེམས་ཅན་དང་། སྲོག་དང་། འགྲོ་བ་དང་། གསོ་བ་དང་། སྐྱེས་བུ་དང་། གང་ཟག་དང་། ཤེད་ཅན་དང་། ཤེད་བདག་དང་། བྱེད་པ་པོ་དང་། ཚོར་བ་པོ་དང་། ཤེས་པ་པོ་དང་། མཐོང་བ་པོ་དང་། འདོད་ཁམས་ཀྱི་ལྷ་རྣམས་ཡོད་དོ། །རྒྱལ་ཆེན་བཞིའི་རིགས་ཀྱི་ལྷན་རྣམས་ཡོད་དོ། །སུམ་ཅུ་རྩ་གསུམ་པའི་ལྷ་རྣམས་ཡོད་དོ། །འཚེ་མའི་ལྷ་རྣམས་ཡོད་དོ། །དགའ་ལྡན་གྱི་ལྷ་རྣམས་ཡོད་དོ། །འཕྲུལ་དགའི་ལྷ་རྣམས་ཡོད་དོ། །གཞན་འཕྲུལ་དབང་བྱེད་ཀྱི་ལྷ་རྣམས་ཡོད་དོ། །གཟུགས་ཁམས་གནས་རིགས་བཅུ་བདུན་གྱི་ལྷ་རྣམས་ཡོད་དོ། །ཚངས་རིས་ཀྱི་ལྷ་རྣམས་ཡོད་དོ། །ཚངས་ལྷ་ཉེ་ཕན་གྱི་ལྷ་རྣམས་ཡོད་དོ། །ཚངས་པ་ཀུན་འཁོར་གྱི་ལྷ་རྣམས་ཡོད་དོ། །སྣང་བའི་ལྷ་རྣམས་ཡོད་དོ། །འོད་སྣང་གི་ལྷ་རྣམས་ཡོད་དོ། །ཚད་མེད་སྣང་བའི་ལྷ་རྣམས་ཡོད་དོ། །ཀུན་ཏུ་སྣང་བའི་ལྷ་རྣམས་ཡོད་དོ། །དགེ་བའི་ལྷ་རྣམས་ཡོད་དོ། །ཆུང་དགེའི་ལྷ་རྣམས་ཡོད་དོ། །ཚད་མེད་དགེ་བའི་ལྷ་རྣམས་ཡོད་དོ། །ཚད་མེད་ཆེ་བའི་ལྷ་རྣམས་ཡོད་དོ། །འབྲས་བུ་ཆེ་བའི་ལྷ་རྣམས་ཡོད་དོ། །མི་ཆེ་བའི་ལྷ་རྣམས་ཡོད་དོ། །མི་གདུང་བའི་ལྷ་རྣམས་ཡོད་དོ། །གྱ་ནོམ་སྣང་བའི་ལྷ་རྣམས་ཡོད་དོ། །ཤིན་ཏུ་མཐོང་བའི་ལྷ་རྣམས་ཡོད་དོ། །འོག་མིན་གྱི་ལྷ་རྣམས་ཡོད་དོ། །གཟུགས་མེད་སྐྱེ་མཆེད་མུ་བཞིའི་ལྷ་རྣམས་ཡོད་དོ། །ནམ་མཁའ་མཐའ་ཡས་སྐྱེ་མཆེད་ཀྱི་ལྷ་རྣམས་ཡོད་དོ། །རྣམ་ཤེས་མཐའ་ཡས་སྐྱེ་མཆེད་ཀྱི་ལྷ་རྣམས་ཡོད་དོ། །ཅུང་ཟད་མེད་པའི་སྐྱེ་མཆེད་ཀྱི་ལྷ་རྣམས་ཡོད་དོ། །འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་ལྷ་རྣམས་ཡོད་དོ། །སྦྱིན་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། ནང་སྟོང་པ་ཉིད་དང་། ཕྱི་སྟོང་པ་ཉིད་དང་། ཕྱི་ནང་སྟོང་པ་ཉིད་དང་། སྟོང་པ་ཉིད་སྟོང་པ་ཉིད་དང་། ཆེན་པོ་སྟོང་པ་ཉིད་དང་། དོན་དམ་པ་སྟོང་པ་ཉིད་དང་། འདུས་བྱས་སྟོང་པ་ཉིད་དང་། འདུས་མ་བྱས་སྟོང་པ་ཉིད་དང་། མཐའ་ལས་འདས་པ་སྟོང་པ་ཉིད་ང་། ཐོག་མ་དང་ཐ་མ་མེད་པ་སྟོང་པ་ཉིད་དང་། དོར་བ་མེད་པ་སྟོང་པ་ཉིད་དང་། རང་བཞིན་སྟོང་པ་ཉིད་དང་། ཆོས་ཐམས་ཅད་སྟོང་པ་ཉིད་དང་། རང་གི་མཚན་ཉིད་སྟོང་པ་ཉིད་དང་། མི་དམིགས་པ་སྟོང་པ་ཉིད་དང་། དངོས་པོ་མེད་པ་སྟོང་པ་ཉིད་དང་། ངོ་བོ་ཉིད་སྟོང་པ་ཉིད་དང་། དངོས་པོ་མེད་པའི་ངོ་བོ་ཉིད་སྟོང་པ་ཉིད་དང་། དྲན་པ་ཉེ་བར་བཞག་པ་བཞི་དང་། ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་ལག་བརྒྱད་དང་། འཕགས་པའི་བདེན་པ་བཞི་དང་། བསམ་གཏན་བཞི་དང་། ཚད་མེད་པ་བཞི་དང་། གཟུགས་མེད་པའི་སྙོམས་པར་འཇུག་པ་བཞི་དང་། རྣམ་པར་ཐར་པ་བརྒྱད་དང་། མཐར་གྱིས་གནས་པའི་སྙོམས་པར་འཇུག་པ་དགུ་དང་། རྣམ་པར་ཐར་བའི་སྒོ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། མངོན་པར་ཤེས་པ་ལྔ་དང་། ཏིང་ངེ་འཛིན་རྣམས་དང་། གཟུངས་ཀྱི་སྒོ་རྣམས་དང་། དེ་བཞིན་གཤེགས་པའི་སྟོབས་བཅུ་དང་། རྣམ་པར་ཐར་པའི་དོན་བསྟན་པ་ནི། ཚེ་དང་ལྡན་པ་ཤཱ་ར་ཏྭ་ཏིའི་བུ་གཟུགས་རྣམ་པར་དག་པ་དང་། ཚོར་བ་རྣམ་པར་དག་པ་དང་། འདུ་ཤེས་རྣམ་པར་དག་པ་དང་། འདུ་བྱེད་རྣམ་པར་དག་པ་དང་། རྣམ་པར་ཤེས་པ་རྣམ་པར་དག་པ་དང་། མིག་རྣམ་པར་དག་པ་དང་། རྣ་བ་རྣམ་པར་དག་པ་དང་། སྣ་རྣམ་པར་དག་པ་དང་། ལྕེ་རྣམ་པར་དག་པ་དང་། ལུས་རྣམ་པར་དག་པ་དང་། ཡིད་རྣམ་པར་དག་པ་དང་། རབ་འབྱོར་གཞན་ཡང་གཟུགས་ཡོངས་སུ་དག་པ། གཟུགས་ཡོངས་སུ་དག་པས། སྒྲ་ཡོངས་སུ་དག་པ། སྒྲ་ཡོངས་སུ་དག་པས། དྲི་ཡོངས་སུ་དག་པ། དྲི་ཡོངས་སུ་དག་པས། རོ་ཡོངས་སུ་དག་པ། རོ་ཡོངས་སུ་དག་པས། རེག་ཡོངས་སུ་དག་པ། རེག་ཡོངས་སུ་དག་པས། ཆོས་ཡོངས་སུ་དག་པ། ཆོས་ཡོངས་སུ་དག་པས། མིག་གི་རྣམ་པར་ཤེས་པ་ཡོངས་སུ་རྣམ་པར་དག་པ་ནས། ཡིད་ཀྱི་རྣམ་པར་ཤེས་པ་ཡོངས་སུ་རྣམ་པར་དག་པའོ། །མི་འཇིགས་པ་བཞི་དང་། སོ་སོ་ཡང་དག་པར་རིག་པ་བཞི་དང་། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། དགའ་བ་ཆེན་པོ་དང་། བཏང་སྙོམས་ཆེན་པོ་དང་། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང་། རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། དགྲ་བཅོམ་པ་ཉིད་དང་། རང་བྱང་ཆུབ་དང་། ལམ་གྱི་རྣམ་པར་ཤེས་པ་ཉིད་དང་། རྣམ་པ་ཐམས་ཅད་མཁྱེན་པ་ཉིད་དང་། འདས་པའི་དུས་ན་མ་ཐོགས་མ་ཆགས་པའི་ཡེ་ཤེས་གཟིགས་པར་འཇུག་གོ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོའི་འཁོར་དེ་དག་དང་། རབ་འབྱོར་དང་། ཀུན་དགའ་བོ་དང་། ཚེ་དང་ལྡན་པ་རྣམས་དང་། དེ་དག་གི་དགེ་སློང་གི་དགེ་འདུན་དང་། ལྷ་དང་། མི་དང་། ལྷ་མ་ཡིན་དང་། དྲི་ཟ་དང་། གྲུལ་བུམ་དང་། ལྟོ་འཕྱེ་ཆེན་པོར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།

༈ དེ་བཞིན་གཤེགས་པ་ཐམས་ཅད་ཀྱི་ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པའི་དོན་མ་ནོར་བར་བསྡུས་པའི་གླེགས་བམ་དང་། ཤླཽཀ་དང་། བམ་པོ་དང་། ཤློཀ་བཀོད་པ་འདི་བྲིས་ན། ཡུམ་ཆེན་མོ་བྲིས་པར་འགྱུར་རོ།། འཆང་ན་ཡུམ་ཆེན་མོ་འཆང་བར་འགྱུར་རོ།།

འདིའི་ལོ་རྒྱུས།

སྔོན་རྒན་རྒོན་རྒྱུ་མེད་པ་གཉིས་ཡོད་པར་འདུག་པ་ལ། ཁང་གཉའ་ན་གྲུབ་ཐོབ་བཟང་པོ་ཅིག་བཞུགས་པ་དེས། ཁང་ཞབས་སུ་འདུག་པའི་རྒན་རྒོན་གཉིས་གནད་(གནངས་)ཉིན་བས་མི་ཚེ་མི་སྣང་བ་སྙིང་རེ་རྗེ། འབུམ་བརྒྱ་གཅིག་དང་། ཆུ་གཏོར་འབུམ་གཏེར་(ཐེར་)ཅིག་བྱས་ན་ཚེ་རིང་བར་འདུག་གསུང་འཕྲིན་རྒན་རྒོན་གཉིས་པོ་དེས་ཚོར་བ་དང་། སྡུག་ནས་ནམ་འཆི་བསམ་ནས་ཡོད་དུས་ན། བསྟན་པའི་བདག་པོ་སངས་རྒྱས་བཅོམ་ལྡན་འདས་བྱོན་ནས་ལྡོམ་བུ་ཕུལ་བྱས་ཙ་ན། རྒན་རྒོན་གཉིས་པོས་ལྡོམ་བུ་འབུལ་རྒྱུ་མེད། དེ་(ངེད་)རང་གཉིས་གནད་(གནངས་)ཉིན་བས་ཚེ་མེད་འཆི་བ་ཡིན་ཟེར། ཚེ་རིང་བ་ལ་འབུམ་བརྒྱ་གཅིག་དང་། ཆུ་གཏོར་[འབུམ་]གཅིག་དགོས་ཟེར་བ་ལ་རྒྱུ་མེད་པས། ཁོང་རང་ལ་ལྡོམ་བུ་འབུལ་རྒྱུ་མེད་ཞུས་ཙ་ན། སྙིང་རེ་རྗེ་གསུངས་ནས། འབུམ་བྲིས་པ་དང་། མཆོད་གནས་ལ་འབུམ་བརྒྱ་བྱེད་ཆུག་གསུངས། རྩམ་པ་ཨེ་ཡོད་གསུངས་ནས། ཆུ་གཏོར་འབུམ་གཏེར་(ཐེར་)ཁོང་རང་གིས་མཛད་པ་དང་། རྒན་རྒོན་གཉིས་པོ་ཚེ་རིང་བ་དང་། ནད་མེད་པ་དང་། རྒྱུ་ཡོད་པ་རྣམས་ཆོས་དེས་ཡོང་གསུངས་སོ། །ཡུམ་ཆེན་མོ་འབུམ་ཆུང་སྟོང་ཕྲག་བརྒྱ་པའི་ཕན་ཡོན་རྫོགས་སོ། །ཡང་འགྱུར་ཅིག་ན།

༈ བཅོམ་ལྡན་འདས་བཞུགས་པའི་དུས་སུ། རྒྱལ་པོ་བི་བི་ས་ར་(བིཾ་བི་སཱ་ར་)དང་། བཙུན་མོ་མ་ག་ཏི་གཉིས་ལ་སྲས་བུ་དགེ་ཆེན་བྱ་བ་ཅིག་ཡོད་པ་དེ་བར་ཆད་ནད་ཀྱིས་ཟིན་ནས་འཆི་ལ་ཐུག་གི་དུས་སུ། རྒྱལ་པོས་བཅོམ་ལྡན་འདས་ཀྱི་དྲུང་དུ་མྱུར་བར་བྱོན་ནས་སྨྲེ་སྔགས་བཏོན་ཏེ་བཅོམ་ལྡན་འདས་ལ་ཞུས་པ། བདག་ལ་བུ་གཅིག་པུ་ཞིག་མཆིས་པ་དེ་བར་ཆད་ནད་ཀྱིས་ཟིན་ནས། འཆི་ལ་ཐུག་པ་ལགས། དེ་མི་འཆི་བའི་ཐབས་ཤིག་བཀའ་སྩལ་དུ་གསོལ། ཞེས་ཞུས་པས། བཅོམ་ལྡན་འདས་ཀྱི་ཞལ་ནས་རྒྱལ་པོ་ཡར་དཀོན་མཆོག་ལ་མཆོད་པ་དང་། རིགས་དྲུག་ཚིམས་པའི་ཆབ་གཏོར་དང་། རྒྱས་པ་འབུམ་བརྒྱ་ཚར་ཉིན་གཅིག་ལ་བཏོན་ན། དུས་མིན་འཆི་བ་ལས་ཟློག་ཅིང་ནད་ལས་གྲོལ་བར་འགྱུར་རོ་ཞེས་གསུངས་པས། རྒྱལ་པོས་གསོལ་པ། བཅོམ་ལྡན་འདས་རྒྱས་པའི་འབུམ་བརྒྱ་ཚར་ཉིན་གཅིག་ལ་ཐོན་པའི་ཐབས་བཀའ་སྩལ་དུ་གསོལ། ཞེས་ཞུས་པ་དང་། བཅོམ་ལྡན་འདས་ཀྱིས་འབུམ་ཆུང་འདི་བཀའ་སྩལ་བ་དང་། རྒྱལ་པོས་འབུམ་ཆུང་འདི་མྱུར་བར་བསྒྲགས་སོ། །རྒྱལ་བུ་ནད་ལས་གྲོལ་ནས། ལོངས་སྤྱོད་ཆེ་ཞིང་ཚེ་རིང་བ་དང་། རྒྱལ་ཁམས་བདེ་ཞིང་ལོ་ཕྱུགས་ལེགས་པ་དང་། རྒྱལ་སྲིད་དར་བར་གྱུར་ཏོ། །གཞན་ཡང་ཕན་ཡོན་མཐའ་ཡས་སོ།།

ཇོ་བོ་རྗེས་བལ་པོ་ཨ་སུ་ལ་གནང་། བལ་པོས་ཤློཀར་བཀོད་པ་རྫོགས་སོ།། ཇོ་བོ་རྗེ་དཔལ་ལྡན་ཨ་ཏི་ཤས་ལོ་བཅུ་གཉིས་ཀྱི་བར་དུ་གསུང་རབ་རྣམས་གཟིགས་པས། འབུམ་ཆུང་འདི་ཁོ་ན་ཕན་ཡོན་ཤིན་ཏུ་ཆེ་བར་འདུག་པས། ཕྱི་རབས་ཀྱི་གང་ཟག་རྣམས་ཀྱིས་ཀྱང་འདི་ལ་ཀློག་འདོན་བྱེད་པ་གལ་ཆེ་གསུངས་སོ།། །། ཤུབྷཾ།།

མཐའ་མའི་འདོན་ཐེངས་།: 12.08.2022 ཉིན། 10:19 AM