༄༅། །བྱིས་པའི་གདོན་ཆེན་བཅོ་ལྔ་ཞི་བར་བྱེད་པའི་གཟུངས་བཞུགས་སོ།།

            དཀོན་མཆོག་གསུམ་ལ་ཕྱག་འཚལ་ལོ། །སྟོང་ཆེན་མོ་རབ་ཏུ་འཇོམས་མ་ལ་ཕྱག་འཚལ་ལོ། །དེ་ནས་ཚངས་པ་ཚངས་ཆེན་གྱིས། །ལངས་ཏེ་ཐལ་མོ་སྦྱར་བཏུད་ནས། །སྟོང་ཆེན་རབ་ཏུ་འཇོམས་བྱེད་པ། །ལེགས་པར་གསུངས་པའི་རིག་སྔགས་འདི། །བྱིས་པ་རྣམས་ལ་ཕན་བགྱིད་པ། །རིག་སྔགས་བདག་གིས་བརྗོད་པར་བགྱི། །གང་གིས་དང་པོར་འཛམ་གླིང་དུ། །རིག་སྔགས་རབ་ཏུ་སྟོན་མཛད་པ། །ཆོས་ཀྱི་རྒྱལ་པོ་སྣང་མཛད་པ། །སངས་རྒྱས་དཔལ་ལ་ཕྱག་འཚལ་ལོ། །ཁྱད་པར་འཕགས་པའི་ཆོས་རྣམས་དང༌། །ཚོགས་ཀྱི་དམ་པ་དགེ་འདུན་དང༌། །སངས་རྒྱས་ཞབས་ལ་ཕྱག་འཚལ་ནས། །ཚངས་པས་འདི་སྐད་ཚིག་གསོལ་ཏོ། །གང་དག་སངས་རྒྱས་རང་སངས་རྒྱས། །སངས་རྒྱས་ཀྱི་ནི་ཉན་ཐོས་དང༌། །དྲང་སྲོང་དང་ནི་འཇིག་རྟེན་སྐྱོང༌། །ལྷ་རྣམས་ཇི་སྙེད་མཆིས་པ་དག །དེ་ཀུན་མི་ཡི་འཇིག་རྟེན་ན། །འདི་ལས་སྐྱེས་བ་ཤ་སྟག་གོ། །ཐུབ་ཆེན་མངལ་ལ་འཚལ་བ་ཡི། །གནོད་སྦྱིན་སྲིན་པོ་འདི་ན་མཆིས། །རྒྱལ་པོ་རྣམས་ཀྱིས་མཐོང་མི་ནུས། །བསྟན་པར་ཡང་ནི་མི་ནུས་སོ། །གང་ལ་བུ་ནི་མི་ཆགས་དང༌། །གང་གི་མངལ་དུ་མི་གནས་དང༌། །སྐྱེས་པ་བུད་མེད་འདུ་བ་ན། །དབང་པོ་རྣམས་ནི་མྱོས་པར་བགྱིད། །མེར་མེར་པོ་དང་ནུར་ནུར་པོ། །བུ་ཡི་ས་བོན་མ་རུང་སྟེར། །གང་ཡང་མངལ་ནི་ཐུར་དུ་འགྱུར། །ཤ་མ་མི་འབྱུང་གནོད་བགྱིད་པ། །དེ་རྣམས་མི་འབྱུང་གནོད་བགྱིད་པ། །འཇིག་རྟེན་མགོན་པོ་བདག་ལ་གསོན། །འཇམ་པ་པོ་དང་རི་དྭགས་རྒྱལ། །སྐེམ་བྱེད་བརྗེད་བྱེད་ཁུ་ཚུར་ཅན། །མ་མོ་དང་ནི་ཛ་མི་ཀ །འདོད་པ་ཅན་དང་ནམ་གྲུ་དང༌། །སྲུལ་པོ་དང་ནི་མ་དགའ་བྱེད། བྱ་དང་གཉའ་བའི་ལག་ཅན་དང༌། །བཞིན་བརྒྱན་དང་ནི་མིག་འཕྱང་བ། །དེ་དག་ཐམས་ཅད་ས་ལ་རྒྱུ། །གདོན་རྣམས་བཅོ་ལྔ་དེ་དག་ནི། །བྱིས་པ་རྣམས་ལ་འཇིགས་པར་བགྱིད། །ཇི་ལྟར་བྱིས་པ་འཛིན་པ་ཡི། །མཚན་དང་གཟུངས་ཀྱང་བརྗོད་པར་བགྱི། །འཇམ་པ་པོས་ནི་ཟིན་གྱུར་ན། །མིག་ནི་རབ་ཏུ་འགྱུར་བར་བགྱིད། །རི་དྭགས་རྒྱལ་གྱིས་ཟིན་གྱུར་ན། །སྐྱུགས་པ་མི་བཟད་སྐྱུག་པར་འགྱུར། །སྐེམ་བྱེད་ཀྱིས་ནི་ཟིན་གྱུར་ན། །མིག་ནི་རབ་ཏུ་འགྱུ་བར་བགྱིད། །སྐེམ་བྱེད་པས་ནི་བྱིས་པ་འགུལ། །བརྗེད་བྱེད་ཀྱིས་ནི་ཟིན་གྱུར་ན། །འགྲེ་ཞིང་དེ་ལྟར་སྒྲ་ཡང་འབྱིན། །དབུ་བ་དང་ནི་ཁ་ཆུ་འཛག །ཁུ་ཚུར་ཅན་གྱིས་རབ་ཟིན་ན། །ཁུ་ཚུར་འཆང་ཞིང་འབྱེད་པར་བགྱིད། །མ་མོ་ཡིས་ནི་ཟིན་གྱུར་ན། །རྒོད་ཅིང་དེ་བཞིན་སྒྲ་ཡང་འབྱིན། །ཛ་མི་ཀས་ནི་རབ་ཟིན་ན། །ནུ་ཞོ་ནུ་བར་མངོན་མི་དགའ། །འདོད་པ་ཅན་གྱིས་རབ་ཟིན་ན། །མལ་ན་གཉིད་ལོག་ངུ་བར་འགྱུར། །ནམ་གྲུས་རབ་ཏུ་ཟིན་གྱུར་ན། །ལྕེ་ལ་སོས་ནི་འཆའ་བར་བགྱིས། །སྲུལ་པོས་རབ་ཏུ་ཟིན་གྱུར་ན། །ཀུ་ཅོ་འདོན་ཅིང་སྒྲ་ཡང་འབྱིན། །མ་དགའ་བྱེད་པས་ཟིན་གྱུར་ན། །རྣམ་པ་སྣ་ཚོགས་གཟུགས་སུ་འགྱུར། །བྱ་ཡིས་རབ་ཏུ་ཟིན་གྱུར་ན། །མནམ་པའི་དྲི་ནི་འབྱུང་བར་འགྱུར། །གཉའ་ལག་ཅན་གྱིས་ཟིན་གྱུར་ན། །མགུལ་བ་རབ་ཏུ་འགག་པར་འགྱུར། །བཞིན་བརྒྱན་གྱིས་ནི་ཟིན་གྱུར་ན། །རིམས་ཀྱིས་བཏབ་ཅིང་འཁྲུ་བར་འགྱུར། །མིག་འཕྱང་བས་ནི་ཟིན་གྱུར་ན། །སྐྱིགས་བུ་དང་ནི་རྔམ་པ་འབྱུང༌། །བྱིས་པ་ཇི་ལྟར་སྐྲག་བགྱིད་པ། །དེ་ཡི་གཟུགས་ནི་བརྗོད་པར་བགྱི། །འཇམ་པ་པོ་ནི་བ་ལང་གཟུགས། །རི་དྭགས་རྒྱལ་པོ་རི་དྭགས་འདྲ། །སྐེམ་བྱེད་པ་ནི་གཞོན་ནུའི་གཟུགས། །བརྗེད་བྱེད་པ་ནི་ཝ་འདྲའོ། །ཁུ་ཚུར་ཅན་ནི་བྱ་རོག་གཟུགས། །མ་མོ་དེ་ནི་རི་ཡི་གཟུགས། །ཛ་མི་ཀ་ནི་རྟ་ཡི་གཟུགས། །འདོད་པ་ཅན་ནི་རྡོ་རྗེའི་གཟུགས། །ནམ་གྲུ་ཁྱི་ཡི་གཟུགས་ཀྱིས་ཏེ། །སྲུལ་པོ་ཕག་གི་གཟུགས་ཀྱིས་སོ། །མ་དགའ་བྱེད་པ་བྱི་ལའི་གཟུགས། །བྱ་ནི་འདབ་ཆགས་གཟུགས་ཀྱིས་སོ། །གཉའ་ལག་ཅན་ནི་བྱ་གག་གཟུགས། །བཞིན་བརྒྱན་འུག་པའི་གཟུགས་སུ་སྟེ། །མིག་འཕྱང་བ་ནི་ཕ་ཝང་གཟུགས། །འདི་དག་བྱིས་པ་སྐྲག་པར་བགྱིད། །འདི་དག་བུ་འཕྲོག་མ་རུངས་པ། །བྱིས་པ་རྣམས་ལ་འཇིགས་བགྱིད་པ། །མདོ་སྡེའི་ཞགས་པས་དྲངས་ནས་ནི། །འདི་དག་ཤིན་ཏུ་དགུག་པར་བགྱི། །གནོད་སྦྱིན་སྡེ་དཔོན་ཆེན་པོ་ནི། །དྲི་ཟ་ཙནྡན་ཞེས་བགྱི་བར། །ཡི་གེ་ཕྱག་རྒྱ་དེ་བསྩལ་ཏེ། །སྲོད་ལ་གདོན་ནི་དྲག་པོ་བ། །བཅོ་ལྔ་དེ་དག་ཁུག་ཅིག་ཅེས། །ཕོ་ཉ་ཡང་ནི་བཏང་བར་བགྱི། །དེ་དག་རྣམས་ནི་སྐད་ཅིག་གིས། །བཅིང་བ་ལྔ་ཡིས་བཅིང་བཞིན་དགུག །

            དེ་ནས་འཇིག་རྟེན་མགོན་པོ་ལ། །ཚངས་ཆེན་ཐལ་སྦྱར་འདི་སྐད་གསོལ། །སྲོག་ཆགས་ས་བོན་འཇིག་བགྱིད་པ། །འབྱུང་པོ་འདི་དག་རྣམས་ལྷགས་ཏེ། །མགོན་པོ་ཡི་ནི་སྤྱན་སྔ་རུ། །འདི་དག་ཆད་པ་བཤད་པར་བགྱི། །བུད་མེད་གང་དག་བུ་མི་འཚལ། །གང་ཞིག་བཙས་པ་འཛིན་འཚལ་བས། །ཚེས་བརྒྱད་དང་ནི་བཅུ་བཞི་ལ། །བསླབ་བཟུང་དམ་ཆོས་སྐྱབས་མཆིས་ལ། །མཆོད་རྟེན་ལེགས་པར་མཆོད་པར་བགྱི། །ཁྲུས་བགྱིས་ཤིན་ཏུ་བརྒྱན་ནས་ནི། །ས་གཞིར་ཡུངས་ཀར་གཏོར་ནས་སུ། །མེ་ཏོག་སྤོས་ཀྱིས་བརྒྱན་པར་བགྱི། །སྣ་ལྔའི་ཚོན་གྱི་སྐུད་པས་ནི། །ཁོར་ཡུག་ཏུ་ནི་བསྐོར་བར་བགྱི། །ནམ་ཕྱེད་བར་དུ་མཆིས་ནས་ནི། །སྤྱི་བོར་ཡུངས་ཀར་བཞག་ནས་སུ། །ཚངས་པས་རབ་ཏུ་བྱས་པ་སྟེ། །ཚངས་པས་སྤྲུལ་བཅས་བརྗོད་པར་བགྱི། །ལོ་གྲངས་བཅུ་གཉིས་བར་དུ་ནི། །གཞོན་ནུ་རྣམས་ལ་ཕན་བགྱིད་པ། །ཚངས་པས་སྤྲུལ་པའི་མདོ་སྡེ་ཡི། །རིག་སྔགས་འདི་ལས་གང་འདའ་བ། །ཨརྫ་ཀ་ཡི་དོག་པ་བཞིན། །མགོ་བོ་ཚལ་པ་བདུན་དུ་འགས། །སདྱྰ་ཐེ་དན། ཨཾ་གེ །བཾ་གེ །བྷཾ་གེ །བྷ་བ་ནེ། ཨི་ནན་དི། བི་ནན་དི། སུ་ལུ་རི། གི་རི་གི་རི། ཤ་ཝ་རི། ག་རུ་ནི། ཤ་རུ་ནི། གི་རི། ཨ་བ་རེ་ལོ་ཙ་ནེ། ལ་ས་ནེ། རོ་ཙ་ནེ། ཨ་ལ་བྷེ། ཨཾ་ག་ནེ། ཨ་ལ་བྷེ། ཏ་ལ་བྷེ། བ་ཀར་ཥི་ནི་སྭཱཧཱ། མངལ་ན་བདེ་བར་གནས་གྱུར་ཅིག །དབང་པོ་ཡང་དག་འཕེལ་བར་ཤོག །མངལ་ན་འདུག་པ་བདེ་གྱུར་ཅིག །བཙས་པ་འཇིག་པར་མ་གྱུར་ཅིག །མངལ་ན་བདེ་བར་གནས་གྱུར་ཅིག །དུས་བཞིན་དུ་ནི་འབྱུང་བར་ཤོག །ཚོན་སྐུད་སྣ་ཚོགས་རྣམས་དང་ནི། །ཡུངས་ཀར་འབྲུ་ནི་མ་གྲུགས་པ། །དེ་དག་སྲུང་བར་གསུངས་པ་སྟེ། །བྱིས་པ་རིང་དུ་འཚོ་བར་ཤོག །

            དེ་ནས་སྟོན་པ་ཀུན་མཁྱེན་གྱིས། །རིག་པའི་སྔགས་ནི་འདི་དག་གསུངས། །མངལ་ན་འདུག་པ་སྲུང་བར་ཤོག །བྱིས་པ་རྣམས་ནི་བདེ་གྱུར་ཅིག །སདྱྰ་ཐེ་དན། བོདྷི་བོདྷི། མཧཱ་བོདྷི། བོདྷ་ཨནུམཏེ། ཕ་ལི་ནི། བཧུ་ཕལེ། ཤིཀྵ་ཤིཀྵ། སཱར་བཏེ། སཱ་ག་ལེ། དུ་རཱ་ས་དེ། དུ་རཱ་ག་མེ། ཤཱུར་པྲྰབཏེ། ཤཱུར་བཏེ། བྷགེ །བྷགཱ་བྷགེ །བྷགིནི་ནིབཱརཎི་སྭཱཧཱ། དེ་ནས་གདོན་ནི་བཅོ་ལྔ་པོ། །རྟག་ཏུ་ཁྲག་ལ་འཐུང་རྣམས་ཀྱིས། །འཇིག་རྟེན་མགོན་ལ་ཕྱག་འཚལ་ཏེ། །ཐལ་མོ་སྦྱར་ནས་འདི་སྐད་གསོལ། །གྲོང་ངམ་ཁྱིམ་མམ་གྲོང་ཁྱེར་རམ། །གང་ན་ལེགས་པར་གསུངས་པ་ཡི། །མདོ་སྡེ་འདི་ནི་བཞུགས་པ་དེར། །བྱིས་པ་རྣམས་ནི་འཆི་མི་འགྱུར། །ཐུབ་ཆེན་ཁྱོད་ནི་ཇི་བཞིན་དུ། །རྗེས་སུ་མཐུན་པར་འཇུག་པར་བགྱི། །སངས་རྒྱས་བཅོམ་ལྡན་འདས་ལ་ཕྱག་འཚལ་ལོ། །ཚངས་པ་ལ་ཕྱག་འཚལ་ལོ། །གསང་སྔགས་ཀྱི་ཚིག་རྣམས་གྲུབ་པར་གྱུར་ཅིག །གྲུབ་པར་གྱུར་ཅིག །རིག་སྔགས་ཀྱིས་སྒྲོལ་བར་གྱུར་ཅིག །ཚངས་པས་བསམས་པར་གྱུར་ཅིག་སྭཱཧཱ། བྱིས་པའི་གདོན་ཆེན་བཅོ་ལྔ་ཞི་བར་བྱེད་པའི་གཟུངས་རྫོགས་སོ།། །།

- གཟུངས་བསྡུས་ནས་ཟུར་འདོན་ཞུས།

མཐའ་མའི་འདོན་ཐེངས་།: 15.11.2016 ཉིན། 12:17 PM