བོད་ཀྱི་གསོ་རིག་སྨན་གཞུང་དུ་སྨན་རྫས་ཀྱི་རིགས་ལ་ཐོག་མར་ཚང་དགོས་པའི་ཆ་རྐྱེན་གཙོ་བོ་དག་གསལ་བར་བཀོད་པ།

སྨན་རྩིས་རིག་གཞུང་ཞིབ་འཇུག་སྡེ་ཚན།

གཅེས་པའི་ཡན་ལག་བདུན།
བཤད་པའི་རྒྱུད་ལས། སྐྱེ་སར་སྐྱེས་དང་དུས་སུ་བཏུས་པ་དང༌།།སྐམ་གསེད་ལེགས་དང་སོ་མ་རྙིང་པ་དང༌། །དུག་འདོན་འཇམ་བཙལ་འཕྲོད་པར་སྦྱར་བའོ། །ཞེས་རྣམ་པ་བདུན་དུ་གསུངས་སོ།།
དང་པོ། སྐྱེ་སར་སྐྱེས་པ།
དེ་ཉིད་ལས། གངས་ཅན་འབིགས་བྱེད་བསིལ་དྲོད་རང་གནས་སྐྱེས། །ཉི་ཟླའི་སྟོབས་ལྡན་སྐྱེ་སར་སྐྱེས་ཞེས་བྱ། །ཞེས་གསུངས་པའི་དོན་ནི་སྔར་གོང་དུ་བཤད་པས་འཐུས་ལ། བདུད་རྩི་བུམ་པ་ལས། རོ་རྣམས་ཀྱི་ནི་དབྱེ་བ་ལས། །ས་ཕྱོགས་སྐམ་ཞིང་ས་གཞི་བཟང༌། །དུར་ཁྲོད་ཤིང་ཆེན་ལྷ་གནས་དང༌། །གཡང་ས་ཕྱོགས་མཁར་ཅན་མ་གཏོགས། །འཇམ་ཞིང་ཆུ་ནི་གཡས་ནས་འབབ། །འཇག་མ་དུར་ས་དང་ལྡན་པ། །ཐོང་ལྕགས་ཀྱིས་ནི་མ་སྣད་པ། ལྗོན་ཤིང་གྲིབ་མས་མ་ཕོག་པ། །ཁ་དོག་བཅུད་ལ་སོགས་པར་ལྡན། །སྨན་སྐྱེས་པ་ནི་བསྔགས་པ་ཡིན།། འབུས་མ་ཟོས་ཤིང་མེས་མ་ཚིག །འབྱུང་བ་སོགས་ཀྱིས་གནོད་མ་གྱུར། །ཉི་གྲིབ་ཆུ་ལ་སོགས་མ་ཉེན། །ཇི་བཞིན་དུས་སུ་བརྟན་གྱུར་པ། །རྩ་བ་ཆེ་ཞིང་གཏིང་དུ་ཟུག།བྱང་གི་ཕྱོགས་སུ་བརྟན་པ་བཟང༌། །ཞེས་གསུངས་པས། ས་སྐམ་ཤས་ཅན་ཧ་ཅང་སྒེག་པ་དང་བཟང་བས་སྤང་རྩ་དྲུངས་མ་ལས་ལྡུམ་སྣ་མང་མི་སྐྱེ་བ་དུར་ཁྲོད་སོགས་གོ་སླ། གཡང་ས་མཐའ་ཁ་དང༌། ཁ་མཁར་ཅན་ས་མཁྲེགས་གྱོང་ས་སྐམ་པོ་འདྲ་བ་རྣམས་ནས་མི་བཏུ། ཁ་དོག་གསལ་ལ་ཟོས་ན་རོ་བཅུད་བྲོ་བ་ཆེ་བ་དང༌། འབྱུང་བས་མ་གནོད་སོགས་ནི་སྐམ་ཚིག་ཆག་གྲུགས་སད་སེར་རླན་ཆེ་མ་ཡིན་པའོ། །ཇི་བཞིན་དུས་སུ་བརྟན་པ་ནི། །ནམ་མཇུག་རྫོགས་ནས་རང་སྐེམས་སུ་མ་སོང་བར་རྐྱེན་གྱིས་མི་ཐུབ་པར་བརྟན་པར་གནས་པ་སྟེ་གོ་དཀའ་བ་བཤད་པ་ལས་གཞན་གསལ་བའོ།།

གཉིས་པ། དུས་སུ་བཏུ་བ།
གཉིས་པ་དུས་ནི། སྨན་གྱི་སྐྱེ་རྒྱུད་བདུད་རྩི་ལུང་གི་ཐེམས་ལས། གེ་སར་སྡོང་བུ་རློན་དུས་ལེན། །མཱུ་ལ་རྩ་བ་དཔྱིད་དུས་བརྐོ། །པ་ཊ་ལོ་མ་དབྱར་དུས་བཏུ།། པུཥྤེ་མེ་ཏོག་དབྱར་སྟོད་བླང༌། །ཕ་ལ་འབྲས་བུ་སྟོན་དུས་ལེན། །རྩ་རྨ་ཤུན་པ་དགུན་དཔྱིད་སྟོན། །ཀརྣི་ཐང་ཆུ་དཔྱིད་དང་སྟོན། །ཞེས་རྒྱ་བོད་སྐད་སྤེལ་བཅས་གསུངས་པ་དང༌། རྒྱུད་ལས། བཏུ་དུས་རྩ་བ་ཡལ་ག་སྡོང་པོ་གསུམ། །སྡོང་པོའི་རིགས་ཡིན་རུས་རྩ་ཤ་ནད་སེལ། སྟོན་ཀ་རྩི་སྐམ་དུས་སུ་བཏུ་བར་བསྔགས། །ལོ་མ་ཞོ་དང་མྱུ་གུ་རྣམ་པ་གསུམ། །ལོ་མའི་རིགས་ཡིན་སྣོད་རྐང་ལྷ་ནད་སེལ། ། འདབ་རྒྱས་ཆར་གྱི་དུས་སུ་བཏུ་བར་བསྔགས། །མེ་ཏོག་འབྲས་བུ་རྩེ་མོ་རྣམ་པ་གསུམ། །འབྲས་བུའི་རིགས་ཡིན་མིག་དོན་མགོ་ནད་སེལ། །སྟོན་སེར་སྨིན་པའི་དུས་སུ་བཏུ་བར་བསྔགས། །སྒོག་པ་བར་ཤུན་ཚི་བ་རྣམ་པ་གསུམ། །ཤུན་པའི་རིགས་ཡིན་ལྤགས་རྒྱུས་ཡན་ལག་སེལ། །ཁ་འབུས་དཔྱིད་ཀྱི་དུས་སུ་བཏུ་བར་བསྔགས། །བཤལ་སྨན་རྩི་སྐམ་ནུས་པ་གཏིང་འགྲོའི་དུས། །སྐྱུགས་སྨན་ཁ་འབུས་གྱེན་འདྲེན་དུས་སུ་བཏུ། །ཞེས་གསུངས་པ་རྣམས་གོ་གསལ་ལ། ཁྱད་པར་བཤལ་སྨན་ས་ཆུའི་ནུས་པ་ཐུར་འགྲོ་དུས་དང༌། འདྲེན་སྨན་མེ་རླུང་གི་ནུས་པ་གྱེན་འགྲོ་དུས་བཏུ་དགོས་པ་རྒྱུ་མཚན་བཅས་སྔར་ཨ་རུ་མཆུ་སྙུང་གི་སྐབས་སུ་བཤད་པ་དྲན་པར་བྱ་དགོས་སོ།།
ཉེ་བའི་དུས་ཡང༌། བདུད་རྩི་མཆོག་གི་ལུང་བམ་པོ་བརྒྱད་པ་ལས། སྟོན་ཟླ་ཐ་ཆུང་དཔྱིད་ཟླ་འབྲིང༌། །ཉ་ཡི་ཚེ་ན་བཙལ་བར་བྱ། །ཞེས་བཤད། །སྭ་རོ་ད་ཡའི་རྒྱུད་ལས། བདུན་པ་ནས་བཅོ་ལྔའི་བར་སྨན་བདུད་རྩིར་འགྱུར་བར་བཤད་པ་དང༌། རྒྱུད་ལས། ཁྱད་པར་ཟླ་བ་ཡར་ངོའི་དུས་བཟང་ལ། ཞེས་པ་རྣམས་རྩ་བར་བཟུང་ལ། མོ་ཟླའི་ཚེས་བཅུ་གཉིས་སྤངས་པའི་རང་རང་གི་བཏུ་དུས་དང་སྦྱར་ཞིང་སྟོན་བཏུ་བ་རི་ཥིའི་དུས་དང་སྤྲད། དབྱར་བཏུ་ཚེ་ཕག་ཞག་བྱོལ། དུས་ནམ་ཡང་ཀླུ་རིགས་ལྡན་འཆར་ཚེ་སྤང་དགོས་ཏེ། སྭ་རོ་ད་ཡ་ལས། རིགས་ལྡན་འཆར་བའི་ནུས་པ་ཡིས། །ཟས་ཞིམ་ཟོས་ཀྱང་ནད་བྱུང་ཞིང༌། །སྨན་གྱི་ལས་བྱས་དུག་ཏུ་འགྱུར། །སྦྲུལ་གྱི་སོས་བཏབ་རྨ་ཡི་དུག ཁྱུང་གིས་སོས་པ་མ་ཡིན་ནོ། །ཞེས་དཔེ་དང་བཅས་པ་གསུངས་པས་སོ། །བདུད་རྩི་ཐུན་ཕྱེད་འཆར་བའི་དུས་བཏུ་བ་བསྔགས་པ་ཡིན་ལ། དེ་ཉིད་ལས། བདུད་རྩི་ཐུན་ཕྱེད་འཆར་བའི་ཚེ། །ལུས་ཀུན་ཕུན་སུམ་ཚོགས་པར་བྱེད། །ཁྱད་པར་ཟས་ཟོས་སྨན་དང་མཚུངས། །སྨན་སྦྱར་བདུད་རྩི་ཉིད་ཟིལ་གནོན། །ཞེས་གསུངས་པའི་སྤང་བླང་འདི་ཞིབ་པར་བརྩི་བ་ནི་སྨན་སྦྱར་བསྟེན་སོགས་གང་ལའང་ཤེས་དགོས་པའོ།།
བཏུ་བའི་ཚུལ་ཡང༌། བདུད་རྩི་མཆོག་ལུང་ལས། བཙལ་བའི་ཐབས་ནི་འདི་ལྟར་བྱ། །བྱིས་པ་ལོ་དྲུག་ལོན་བདུན་མན། །ཁྲུས་བྱས་དར་དཀར་གོས་གྱོན་ནས། །ཤར་ཕྱོགས་ལོགས་སུ་ཁ་བལྟས་ཏེ། །ལྷ་ཕྱག་ལན་གསུམ་བཙལ་ནས་ནི། །ཞེས་དང༌། རྒྱུད་ལས། གཙང་མའི་བྱིས་པ་ཁྲུས་བྱས་མཛེས་པར་བརྒྱན། །གཟུངས་སྔགས་རྟེན་འབྲེལ་སྙིང་པོ་བཟླས་ཤིང་བཏུ། །ཞེས་གསུངས་པའི་གཟུངས་ནི་སྨན་བླའི་གཟུངས་བྷཻ་ཥ་ཛྱེའི་གཟུངས་རིང་དང༌། སྔགས་ནི། བདུད་རྩི་མཆོག་གི་ལུང་ལས། དེ་ནི་རྩ་ནས་འབྱུང་བའི་སྔགས། ཏངྱ་ཐཱ། ཤོ་ཧོང་ག་རེ་ཏ་རེ་སྭཱཧཱ། ཞེས་གསུངས་པ་དང༌། རྟེན་འབྲེལ་སྙིང་པོ་བཟླ་ཞིང༌། ཤར་ཕྱོགས་སུ་བཻ་ཌཱུརྱ་སྣང་གི་ཞིང་ཁམས་དང༌། སྟོན་པ་མི་བསྐྱོད་སྨན་རྒྱལ་འཁོར་བརྒྱུད་པར་བཅས་པ་ཡིད་ལ་གསལ་བར་བྱས་ལ་ཕྱག་འཚལ་ཞིང༌། སྨན་གྱི་ནུས་མཐུ་དང་གཟི་བརྗིད་ཐམས་ཅད་རྒྱུད་ལས་བཤད་པ་བཞིན་འགྲུབ་པར་མཛོད་ཅིག ཅེས་སྨོན་ལམ་བཅས་བཏུ་བར་བྱའོ། །ཟླ་ཟེར་ལས་ཀྱང༌། དེ་ནས་དགེ་བ་ལ་སྤྱོད་ཅིང༌། །དད་ལྡན་གཙང་སྦྲ་སྨྱུང་བར་བྱས། སྨན་ནི་ལེགས་པར་གནས་པ་བཏུ།།གསུངས་སོ། །
གསུམ་པ། སྐམ་གསེད་ལེགས་པ།
སུམ་པ་སྐམ་གསེད་ནི། རྒྱུད་ལས། སྐམ་གསེད་གང་ཡང་བཏུ་དུས་རྨ་ཕབ་ལ། །བསིལ་སྨན་གྲིབ་ལྷགས་དྲོད་སྨན་མེ་ཉིས་བསྐམ། །བསེར་གྱིས་མ་ཞིག་མེ་ཉིས་མ་གདུངས་པ། །དུ་བ་མ་ཕོག་གཞན་གྱི་དྲིས་མ་གོས། །རང་གི་ནུས་ལྡན་ཡོན་ཏན་དཔག་ཏུ་མེད། །གསུངས་པའི་གཞན་གྱི་དྲི་ནི། ཕན་ཚུན་དུ་བསྲེས་ལ་སྐམ་པས་གཅིག་གི་དྲིས་གཅིག་གི་དྲི་བཅོམ་པས་དེ་ལྟར་མ་བྱས་པར་སོ་སོར་སྐམས་པས་རང་གི་ནུས་པར་ལྡན་པ་སྟེ། གསེར་གྱི་མིག་མང་རིས་ཀྱི་རྒྱུད་ལས། མེ་དང་མར་གཉིས་ལྷན་ཅིག་ཏུ། །སྐད་ཅིག་གཞག་པར་མི་བྱའོ། །དེ་སྟེ་ཆོ་གས་སྦྱར་བྱས་ན། །མར་མེའི་འོད་ནི་བླ་ན་མེད། །སྨན་ཡང་རྩི་དུག་སྦྲག་མི་ཉན། །ངན་པ་བློ་རྣོས་བཟང་པོའི་བློ་ཕྲོག་བྱེད། །ཆོ་གས་སྦྱར་ན་རྒྱལ་པོའི་དམག་དཔུང་འདྲ། །ཞེས་གསུངས། རྨ་ཕབ་པ་ནི་སྔོ་ལྡུམ་སོགས་ཅུང་ཟད་རྙིང་པ་ནས་བརྡུངས་ལ་སྔོ་ཆོལ་བྱས་པས་ངར་མི་ཡལ་དྲི་རོ་དང་ལྡན་ལ། དེ་ལྟར་མ་ལྕོགས་ཀྱང་ལེགས་པར་ལག་པ་གཙང་མས་ཕུར་བས་སྔོ་ཁུ་ཕྱིར་དོན་པས་ཀྱང་འཐུས། རྨ་མ་ཕབ་པར་རང་སྐམ་བྱས་པས་རྩ་སྐྱ་ལྟར་སྒོག་ནས་བྲོ་བ་དང་ནུས་པ་མི་འབྱུང་ངོ༌། །ནམ་ཡང་སྨན་ལ་ཁ་ཆུ་ལག་དྲེག་མ་སོང་བར་གཙང་སྦྲ་ཤིན་ཏུ་ཆེ་བ་དགོས་ཏེ། མི་ཏྲ་ཛྭ་ཀཱིས། གཙང་སྦྲ་ཆེ་བ་བྲམ་ཟེ་ལྟ་བུར་དགོས། །སྨན་གཙང་བྱིན་རླབས་ལྡན་ལ་མཆོད་རྫས་རུང༌། །ཁྱི་ཕག་ལྟར་སྤྱོད་བྱིན་ཡལ་མཆོད་མི་རུང༌། །གང་ཟག་མཆོག་ལ་དྲངས་པས་ལྟུང་བ་འབྱུང༌། །ཞེས་གསུངས་པ་འདི་གནད་ཆེ། སྨན་པ་ཕལ་ཆེར་བག་མེད་པས་ལག་ལེན་མི་གཙང་བ་དང༌། སྨན་གཞན་ལ་སྨན་རྩི་ལྟ་བུར་མ་འབྱེད་པའམ་ལེགས་ཉེས་བརྟག་ཚེ་རོ་མྱང་ཕྱིར་སོས་འདེབས་པ་དང༌། ཚ་སྣ་སོགས་ལ་ལྕེས་རེག་ནས་མཆིལ་མ་བཅས་པར་སྨན་མང་ནང་དུ་ཕར་བཅུག་ལ་འཚག་པ་ནི་ཤིན་ཏུ་སྤྱོད་པ་ཐ་ཆད་པ་ཡིན་ཞེས་དྭགས་སྨན་ཟླ་བ་རྒྱལ་མཚན་གསུངས་སོ།།
བཞི་པ། སོ་མ་རྙིང་པ།
བཞི་པ་སོ་མ་རྙིང་པ་ནི། རྒྱུད་ལས། སོ་མ་རྙིང་པ་ལོ་དུས་མ་ལོན་པ། །དུས་འདས་ནུས་པ་འཆོར་ཕྱིར་ལོ་དུས་སྤོ། །གསུངས་པས། །སོ་ནི་ནུས་པ་སྟེ་དེ་མ་རྙིང་པ་སྨན་སོ་གསར་པ་དགོས། ལོ་དང་དུས་སྔ་ལོ་བཏུས་ཚོད་མ་ཡོལ་པས་སོ་མ་རྙིང་པའོ། །བཻ་སྔོན་དུ་སྨན་གང་ཡང་གསུངས་ཀྱང༌། །སྔོ་ལྡུམ་ལས་གཞན་ལ་སྨན་ཤིང་འབྲས་བཟང་དྲུག་སོགས་རྙིང་ནས་མ་སྒོག་པ་ནུས་པ་ཆེ་བར་བཤད་པས་མི་གནོད་ལ། གལ་སྲིད་གནོད་དུ་ཤར་ཡང་བཻ་སྔོན་མཛད་པོ་བོད་ཁམས་ཡོངས་ཀྱི་དེད་དཔོན་ཡིན་ཡང་བརྗེ་མི་འབྱོར་རམ་སྙམ་མོ། །འདི་སྔོ་སྦྱོར་སྐབས་སུ་གསུངས་པས་སྔོ་ལྡུམ་ལ་དགོངས་པར་ཀུན་གྱིས་བཞེད་དོ།།
ལྔ། དུག་འདོན་པ།
ལྔ་པ་དུག་འདོན་ནི། རྒྱུད་ལས། དུག་དང་ཕྲལ་བ་རྩ་སྡོང་ལྤགས་རྐང་དུག །ཡལ་གའི་ཚིགས་དུག་ངར་བ་ལོ་མའི་དུག །མེ་ཏོག་གོས་དུག་རུས་པ་འབྲས་བུ་དུག །ཞོ་རྐང་ཚི་བ་གསུམ་ལ་དུག་མེད་དེ། །དྲེག་པ་ལྤགས་དུག་ཤ་གདན་བར་ཤུན་དུག །དུག་ཕྲལ་སྨན་ནི་འཇམ་ཞིང་འཇུ་བ་སླ། །ཞེས་པས། རྩ་བ་དང་སྡོང་པོ་གཉིས་ཀྱི་དུག་ནི་ཕྱིའི་པགས་པ་དང་ནང་གི་རྐང་ཡིན་པ་ཕྱུང་ནས་ཕྱིར་དོར་བ་ཡིན། དེ་བཞིན་དུ་ཡལ་གའི་དུག་ནི་ཚིགས་པ་སྟེ། འོན་ཀྱང་དམིགས་ཀྱིས་བསལ་བས་བཙོད་ཀྱི་ཚིགས་མདུད་དགོས་པ་མ་གཏོགས་དོར་རོ། །ལོ་མའི་དུག་ནི་ངར་པའོ། །མེ་ཏོག་གི་དུག་ནི་གོས་ཏེ་ཕྱིའི་ཐུམ་ཤུན་ནོ། །འབྲས་བུའི་དུག་ནི་ནང་གི་རུས་པ་ཚི་གུ་བཅས་ཏེ་འགའ་ཞིག་སྐབས་སུ་ཚི་གུ་དགོས་པ་ཡང་ཡོད། པགས་པ་རྣམས་ཀྱི་དུག་ནི་ཕྱིའི་ཉི་ཆར་གྱིས་གདུངས་པའི་དྲེག་པ་ནག་པོའོ། །བར་ཤུན་རྣམས་ཀྱི་དུག་ནི་ཤ་གདན་ཏེ་སྡོང་པོའི་ཕྱི་ཤ་འབྱར་བ་དེའོ། །ཞོ་དང་རྐང་དང་ཚི་བ་སྟེ་ཐང་ཆུའི་རིགས་ཡིན་པ་འདི་གསུམ་གྱི་སྐབས་འགའ་ཞིག་དང་བཻ་སྔོན་སོགས་སུ། ཞོ་དང་རྐང་དང་ཚི་བ་གསུམ་ལ་དུག་མེད་དེ། ཞེས་བཤད་པ་ནི། ཚིགས་བཅད་དེ་ལྷུག་པར་བཏང་བ་ཙམ་ལ་འགྲེལ་པའི་ཐ་སྙད་མ་བྱས་འདུག་ཀྱང༌། ཞོ་ནི་ཐར་ནུ་དུར་བྱིད་སོགས་ལ་ཞོའི་རང་བཞིན་ཡིན་པ་དེ་ནི་དུག་མ་བཏོན་པར་གཏོང་མི་བཏུབ་པ་དང༌། བསེ་ཞོ་ནི། རེག་དུག་གི་གཙོ་བོ་ཡིན་པ་སོགས་ལ་དུག་མེད་པར་བཤད་པ་ནི་ལོག་པར་འགྲེལ་པའོ། །འོ་ན་ཁྱོད་ཀྱི་འདོད་པ་གང་ཞེ་ན། གཞན་གྱི་དུག་ནི་ཕྱི་དང་ནང་སོགས་ནས་ཟུར་དུ་ལེན་ནས་དོར་རྒྱུ་ཡོད་པ་བཤད་བཞིན་ལ། ཞོ་སོགས་གསུམ་ལ་དུག་ཡེ་ནས་མེད་པ་ནི་མ་ཡིན་ལ་ཡོད་དེ། མེད་ཅེས་པ་ནི། དུག་དང་དབྱེར་མེད་པ་ཡིན། དབྱེར་མེད་ལུགས་ནི། གཞན་ལ་དུག་ཡོད་ཀྱང་ཟུར་དུ་དབྱེ་ཡོད་ལ། འདི་ལ་འདྲེས་པས་གཞན་ལྟར་དབྱེ་བའི་ཁ་ནས་ཞག་གམ་འོག་ནས་སྙིགས་སམ་ཟུར་ནས་རྩི་སོགས་འདི་ཡིན་འདི་དོར་ཞེས་དབྱེ་རུ་མེད་གསུངས་པའོ། །ཡེ་ནས་མེད་པ་མིན་པས་ཐར་ནུ་དུར་བྱིད་དུག་འདུལ་བཤལ་སྐབས་སུ་བཤད་པས་འདིར་བསྡུས་དབང་གིས་བསྐྱར་ནས་མ་བཤད་པ་ཡིན། དེ་བཞིན་དུ་དན་ད་ཡང་རྐང་ཚི་གཉིས་ཀའི་རང་བཞིན་དུག་དབྱེ་རུ་ཡོད་ཀྱང་བཤལ་སྐབས་ལྕེ་དུག་འདོར་བར་བཤད་པས་འདིར་མ་བསྐྱར་མོད། དེ་ལྟ་བུའི་སྨན་ཕལ་ཆེར་དུག་འདོན་པ་དང་འདུལ་བ་སོགས་དགོས་པ་ནི་མང་ཞིག་ཡོད་པ་རྣམས་ཀྱི་དུག་བསལ་རྣོ་འདོན་ངར་འདོགས་སོགས་དགོས་རིགས་ལ་བྱ་ཐབས་ཁོ་བོས་ལག་ལེན་གཅེས་བཏུས་སུ་བྱས་པ་ལ་རྟོགས་པར་བྱའོ།།

དྲུག་པ། འཇམ་བཙལ་བ།
དྲུག་པ་འཇམ་བཙལ་ནི། རྒྱུད་ལས། འཇམ་བཙལ་གསུམ་སྟེ་སྦྱོར་བས་འཇམ་པ་དང། །ཁ་འཛིན་འཇམ་དང་གཉེན་པོས་འཇམ་པ་འོ། །སྦྱོར་བས་འཇམ་པ་རིགས་མཐུན་མང་སྣ་སྤྲད། །ཁ་འཛིན་འཇམ་པ་ཕོ་བ་དོན་སྣོད་རྣམས། །གང་ལ་བབས་པའི་ཁ་འཛིན་བཅས་ཏེ་བསྟེན། །གཉེན་པོས་འཇམ་བཙལ་སྔོ་རྣམས་ཐམས་ཅད་ཀུན། །རླུང་འབུད་ཕོ་བའི་མེ་གསོད་ལུས་ཟུངས་སྐེམ། །དེ་ཕྱིར་རླུང་གནོན་ཤ་ཆེན་བུར་རྙིང་སྟེ། །ཕོ་བའི་མེ་གསོ་སེ་འབྲུ་པི་པི་ལིང་། །ལུས་ཟུངས་རྒྱས་པར་བྱེད་ལ་ཨ་རུ་ར། །དེ་རྣམས་མ་འཛོམ་ཁཎྜ་ཤིས་པ་ཡིན། །ཞེས་པ་སྟེ། འཇམ་བཙལ་གྱི་སྦྱོར་བ་ལ་གསུམ་སྟེ་སྦྱོར་བའི་སྒོ་ནས་འཇམ་བཙལ་བ་དང། ཁ་འཛིན་བསྡེབས་ཏེ་འཇམ་བཙལ་བ། གཉེན་པོའི་སྨན་གྱིས་འཇམ་བཙལ་བའོ། །དེ་ཡང་སྦྱོར་བས་འཇམ་བཙལ་བ་ནི། ཚ་བའི་ནད་རྣམས་ལ་ཚ་སེལ་གྱི་སྔོ་སྨན་གང་རིགས་རོ་ནུས་མཐུན་པ་རྣམས་དང་གྲང་བའི་ནད་ལ་གྲང་སེལ་གྱི་སྔོ་སྨན་གང་རིགས་རོ་ནུས་མཐུན་པ་སོགས་ནད་རིགས་སོ་སོ་ལ་ཕན་པའི་སྔོ་སྨན་རིགས་མཐུན་མང་པོ་སྣ་སྤྲད་དེ་གཏོང་བ་དང་། ཁ་འཛིན་གྱིས་འཇམ་བཙལ་བ་ནི། ཕོ་བ་གཙོ་བོར་བྱས་པའི་དོན་ལྔ་དང་། སྣོད་དྲུག དབང་པོ་རྣམ་ལྔ། ཁྲག ཆུ་སེར། གཉན་སྲིན་རྣམས་གང་ལ་བབས་པའི་ཁ་འཛིན་དང་བཅས་ཏེ་བསྟེན་པ་སྟེ་ཚ་གྲང་རླུང་གསུམ་གང་ཡིན་ཀྱང་སྙིང་ལ་བབས་ན་ཛཱ་ཏི་དང་། གློ་ལ་ཅུ་གང་། མཆིན་པར་གུར་ཀུམ། མཆེར་པར་ཀ་ཀོ་ལ། མཁལ་མར་སུག་སྨེལ། སྲོག་རྩར་ལི་ཤི། ཕོ་བར་སེ་འབྲུ། མཁྲིས་པར་དོམ་མཁྲིས། རྒྱུ་མར་དུག་མོ་ཉུང་། ལོང་ལ་རུ་རྟ། ལྒང་པར་རྒྱ་ཚྭ། མངལ་ལ་བ་སྤྲུ། བསམ་སེར་གངས་སྦལ་ལམ་དབང་ལག་རྣམས་སྣོད་དྲུག་གི་ཁ་འཛིན་དང་། རུས་པ་ལ་ཆུ་སྲིན་སྡེར་མོ་དང་ན་གིའམ་ཅོང་ཞི། ཤ་ལ་བྲག་ཞུན། རྩ་ནག་ལ་ཤིང་མངར། རྩ་དཀར་ལ་ཉ་ཕྱིས་གཞན་ཡང་མིག་ལ་མདུང་རྩེའམ་ལྕགས་སྦྲུལ། རྣ་བར་རུ་རྟ་དང་ཨ་རུ། སྣ་ལ། བྱང་ཁྲ་དང་སུག་པ། ལྕེ་ལ་སྤྱང་ལྕེ་དང་སྦལ་ཤ། ཡན་ལག་ལ་དབང་ལག་དང་སླེ་ཏྲེས། ཁྲག་ལ་བ་ཤ་ཀ་ཆུ་སེར་ལ་སྤོས་དཀར་ཐལ་ཀར་རྡོ་རྗེ་སོ་མ་ར་ཛ་གསུམ། གཉན་སྲིན་ལ་གླ་རྩི་དང་གུ་གུལ། ཕྱི་ནང་བར་གསུམ་ཚ་གྲང་ཐམས་ཅད་ལ་ཨ་རུ་ར་དང་བྲག་ཞུན་སོགས་ཁ་འཛིན་གྱི་སྨན་དེ་རྣམས་དོན་སྣོད་སོགས་གང་ལ་བབས་པར་གཞིགས་ཏེ་བསྟེན་པའོ། །གཉེན་པོའི་སྨན་གྱིས་འཇམ་བཙལ་བ་ནི། སྔོ་རྣམས་ཐམས་ཅད་དེ་ཀུན་ནུས་པ་རྩུབ་པས་ལུས་ཀྱི་རླུང་འབུད་པ་དང་། ཕོ་བའི་མེ་དྲོད་གསོད་ཅིང་ལུས་ཟུངས་སྐེམ་པར་བྱེད་པ་ཡིན་པས། དེའི་ཕྱིར་དེ་དག་གི་གཉེན་པོའི་སྨན་རླུང་གནོན་པའི་ཕྱིར་ཤ་ཆེན་དང་། བུར་རྙིང་། ཕོ་བའི་མེ་དྲོད་གསོ་བ་ལ་སེ་འབྲུ་དང་། པི་པི་ལིང་། ལུས་ཟུངས་རྒྱས་པར་བྱེད་པ་ལ་ཨ་རུ་ར་རྣམས་སྔོ་སྦྱོར་ཐམས་ཅད་ལ་བསྣན་པའམ། དེ་རྣམས་མ་འཛོམས་ན་སྔོ་སྨན་རྣམས་ཁཎྜར་བྱས་ན་མཆོག་ཏུ་ཤིས་པ་ཡིན་ཏེ་འཇམ་ཞིང་འཇུ་སླ་བའི་ཕྱིར་རོ། །
བདུན་པ། འཕྲོད་པར་སྦྱར་བ།
བདུན་པ་འཕྲོད་པར་སྦྱར་བ་ནི།་རྒྱུད་ལས། འཕྲོད་པར་སྦྱར་བ་གནད་གསུམ་ཤེས་པ་ཡིས། །བསིལ་དྲོད་མ་འདྲེས་མཐུན་བསྡེབས་སྦྱར་བྱས་ཏེ། །ཚ་སེལ་གྲང་སེལ་གཉིས་སུ་ཤེས་པར་བྱ། །ཞེས་པ་སྟེ། ཡན་ལག་བདུན་པ་འཕྲོད་པར་སྦྱར་བའི་ཐབས་ནི། རོས་ལས་བྱེད་པའི་གནད་དང། ནུས་པས་ལས་བྱེད་པའི་གནད། ཞུ་རྗེས་ཀྱིས་ལས་བྱེད་པའི་གནད་རྣམ་པ་གསུམ་པོ་དེ་གོང་གི་སྦྱོར་བ་སྨན་སྐབས་རྒྱས་པར་བཤད་པ་ལྟར་དེ་དག་ཤེས་པར་བྱས་ཏེ་བསིལ་དྲོད་མ་འདྲེས་པར་རོ་ནུས་ཞུ་རྗེས་ཀྱི་ལས་བྱེད་པའི་སྨན་རྣམས་ཕྱོགས་མཐུན་པར་བསྡེབས་སུ་སྦྱར་བར་བྱས་ཏེ་གཏོང་དགོས་ལ། དེ་ལྟར་སྔོ་སྨན་གྱི་རིགས་སུ་གཏོགས་པ་ངོ་མ་ཤེས་པ་རྣམས་ཀྱང་བསིལ་དྲོད་གཉིས་སུ་འདུས་ཏེ། སྐྱེས་ས་ཁ་ལྷོར་བསྟན་པ་དང་། སྐམ་ས་དང་། དྲོ་སར་སྐྱེས་པ། སྨན་གྱི་རིགས་མདོག་དམར་སེར་མེ་འབར་བ་ལྟ་བུའི་དབྱིབས་ཅན་རོ་ཤིན་ཏུ་ཚ་བ་རྐྱང་པ་དང་། རོ་སྐྱུར་བ་འགའ་ཞིག་ཁོ་ན་བྲོ་བ་ནི་གྲང་སེལ་གྱི་སྨན་ནོ། །ས་ཕྱོགས་ཁ་བྱང་དུ་བལྟ་བ་དང་། རླན་ས་དང་། བསིལ་བ་དང་། མཐོ་སར་སྐྱེས་པ་དང་། མདོག་སྔོ་བ་དང་དཀར་བ། ལྗང་བ་འཁྱགས་ས་ལྟ་བུ་དང་ཆུ་འབབ་པ་ལྟ་བུའི་དབྱིབས་ཅན། རོ་ཤིན་ཏུ་ཁ་བ་རྐྱང་པ་ཡང་ན་སྐ་བ་རྐྱང་པ་བྲོ་བ་ནི་ཚ་སེལ་གྱི་སྨན་ནོ། །དེས་ན་གཅེས་པའི་ཡན་ལག་བདུན་ལྡན་གྱི་སྔོ་ཐམས་ཅད་ཀྱང་། སྦྱོར་བའི་དབང་དུ་བྱས་ན་ཚ་སེལ་དང་གྲང་སེལ་གྱི་སྦྱོར་བ་གཉིས་སུ་ཤེས་པར་བྱའོ།།
འོན་ཀྱང་གཉེན་པོ་དང་འཕྲོད་སྦྱོར་སྐབས་དགོས་གནད་ཆེ་ལ་གོང་དུ་སོང་བས་སྒེར་དུ་མ་བསྐྱར་བ་ནི། གོང་དུ་བཏུ་སྐབས་བཤད་པའི་གོ་རིམ་ནི། བཏུས་པ་ཙམ་གྱིས་མི་ཆོག་པར་སོ་སོར་འཕྲོད་པའི་གཉེན་པོ་སྦྱར་དགོས་པས། རུས་པའི་ནད་ལ་རྩ་བ། རྩ་ནད་ལ་ཡལ་ག ཤ་ནད་ལ་སྡོང་པོ། སྣོད་ནད་ལ་ལོ་མ། རྐང་ནད་ལ་ཞོ། ལྷ་བའི་ནད་ལ་མྱུ་གུ། མིག་ནད་ལ་མེ་ཏོག དོན་ནད་ལ་འབྲས་བུ། མགོ་ནད་ལ་རྩེ་མོ། ལྤགས་ནད་སྐོགས་པ་སྟེ་དྲེག་པའི་ཞབས་བར་ཤུན་གྱི་ཕྱི་རྩི། རྒྱུས་ནད་ལ་བར་ཤུན། ཡན་ལག་ལ་ཚི་བ་སྟེ། དེ་ལྟར་གཏོང་ལུགས་གབ་སྤྲད་ནས་གཏོང་བ་འདི་ནི་ཤིན་ཏུ་གནད་ཆེ་ལ་རྒྱུ་མཚན་ཀྱང༌། ནམ་ཟླའི་དུས་དང༌། དེ་ལས་བྱུང་བ་འབྱུང་ལྔའི་ཤུགས་དང༌། དེས་བསྐྱེད་པ་སྨན་གྱི་རྩ་སྡོང་ལོ་འབྲས་སོགས་དང༌། དེ་ལ་གནས་པ་རོ་ནུས་ཞུ་རྗེས་དང༌། དེའི་འབྲས་བུ་ཡོན་ཏན་ནུས་པ་དང༌། དེ་བཞིན་དུ་འབྱུང་བ་ན་སོས་སྐྱེད་པའི་ཉེས་པ་གསུམ་དང༌། དེ་ལས་གྱུར་པའི་འདུ་འཁྲུགས་འཕེལ་ཟད་དང༌། དེའི་ནུས་པའི་མཚན་ཉིད་ཉི་ཤུ་དང༌། དེ་ཡང་ཉེས་པ་དང༌། གཙོ་བོ་དང༌། རིགས་དང༌། གནས་ལ་སྦྱར་བའི་ལག་ལེན་དམར་ཁྲིད་ཀྱི་སྒོ་ནས་བཏུ་བའི་དུས། བཏུས་པའི་རྩ་ལོ་སོགས་སོ་སོར། ལུས་གནས་ཕྱི་ནང་གི་ནད་སོ་སོ་ལ་འཕྲོད་མི་འཕྲོད་ཀྱི་རྡེའུ་བཞག་ངོ་དོན་འཕྲོད་པ་ངོ་མཚར་ལ་ཡིད་ཆེས་པ་བྱ་རྒྱུ་ཡོད་པ་ནི་འཚོ་མཛད་རྣམས་ཀྱི་དགོངས་པར་གསལ་བ་ལྟར་རོ། །དེ་ལྟར་སྨན་ངོ་འཕྲོད་པ་དང་རོ་ནུས་སོགས་གསལ་ལ་བཏུ་བའི་དུས་རྒྱུ་མཚན་བཅས་ཤེས་ཀྱང༌། ལེ་ལོ་མེད་པའི་བརྩོན་འགྲུས་དགོས་པ་ནི། རྗེ་ཟུར་མཁར་བ་མཉམ་ཉིད་རྡོ་རྗེའི་ཞལ་གདམས་བརྩོན་འགྲུས་ཀྱི་བསྐུལ་མ་སྙིང་གི་ཞུན་ཐིགས་ལ་གོ་བ་ལེན་པའི་ལྟ་རྟོག་བྱེད་པ་གལ་ཆེ་ལ། སྨན་བཏུ་རྩོལ་བྱེད་པ་ལ་ཡང་འདི་ལྟར་དགོས་ཏེ། རྗེ་དྭགས་པོ་རིན་ཆེན་ཟླ་བ་རྒྱལ་མཚན་གྱི་ཞལ་གདམས་ལྟར། སྨྲས་པ། སྨན་གྱིས་འགྲོ་དོན་མཛད་པ་རྣམས། །སྨན་འདི་ཤེས་པ་ཕྱིན་ཆད་ནས། །ཤེས་པས་མི་ཆོག་རྩོལ་སྒྲུབ་དགོས། །སློབ་དཔོན་ཀླུ་སྒྲུབ་ཞལ་ནས་ཀྱང༌། །ཤིང་རྡོ་ལྡུམ་གྱི་རི་བོ་ལ། །གདམས་ངག་གནད་ཀྱིས་ངོ་ཤེས་ན། །མི་ཤི་སོས་པའི་བདུད་རྩི་ཡོད། །དད་བརྩོན་ངེས་པའི་ཤུགས་ཀྱིས་བཏུ། །གསུངས་བཞིན་དབྱར་གཅིག་ཉིན་གཅིག་གིས། །ལས་ལ་མ་གཡེལ་བཏུ་ནུས་ལ། །དོན་ཆེ་རང་གི་སྲོག་ཀྱང་གནས། །མིན་ཀྱང་སྡུག་བསྔལ་སེམས་ཅན་ལ། །ཕན་པའི་འགྲོ་དོན་ཆེན་པོ་ཡོད། །ཡང་ན་ཟང་ཟིང་བསྙེན་བཀུར་དང༌། །གསེར་གཡུ་སྟག་གཟིག་ཁྲབ་གོས་རྟ། །བཟའ་བཏུང་ཤ་ཆང་མར་ཐུད་སོགས། །གང་དགོས་ངེས་མེད་འབྱུང་སྒོ་ཡོད། །དབྱར་ཡང་ལྡུམ་ལ་དགྲ་མང་བས། །སད་སེར་མ་བཅོམ་གོང་དུ་བཏུ།། མི་ཁོམ་གཡེང་བ་ཚེ་གཅིག་ཡིན། །ལེ་ལོ་ཅན་ལ་ཁོམ་དུས་མེད། །སྨན་གྱི་ཚེ་ཚད་ཞག་གཅིག་ཡིན། །སད་སེར་ཕོག་ནས་སོས་རྒྱུ་མེད། །འགྲོ་འདུག་སྤྱོད་ལམ་ཀུན་ཏུ་བརྩོན། །གོམ་རེར་སོང་ལམ་ལྡུམ་རེ་བཏུ། །ཞག་རེའི་ལམ་དུ་ཁུར་རེ་ལོན། །གང་ཞིག་ཚགས་སུ་མ་བྱས་ན། །མོད་པའི་ཡུལ་དུ་དེ་ཉིད་དཀོན། །ལ་ནས་འོང་བའི་བཟང་སྨན་ཡང༌། །གང་ཡོད་དངོས་པོས་མ་བསྒྲུབས་ན། །སེར་སྣ་ཅན་ལ་ཡོད་དུས་མེད། །རྫས་མེད་སྨན་པའི་ཡི་དྭགས་ཡིན། །སྔ་ནས་གྲབས་སུ་མ་བྱས་ན། །ཁྱི་ཁར་ཕྱིན་དུས་འཕེན་རྡོ་ཡང༌། །གྲམ་པའི་ཁྲོད་དུའང་དཀོན་དཀོན་འདྲ། །སྐྱེས་ཚད་མཐོང་ཚད་མ་བསྒྲུབས་ན། །ཁ་ཡར་བསྒྲུབས་པས་དོན་མི་འགྲུབ། །བཟང་སྨན་རྒྱབ་གྲངས་བརྒྱ་འཛོམ་ཡང༌། །སྔོ་ལྡུམ་མེད་ན་སྦྱར་ཐབས་དཀའ། །སྦྱར་ཡང་ཕན་པའི་ཡོན་ཏན་ཆུང༌། །ཇ་མར་ཤ་ནས་བརྒྱ་འཛོམ་ཡང༌། །མེ་ཆས་བཤོལ་ན་བསྟེན་ཐབས་མེད། །བསྟེན་ཡང་བཀྲེས་སྐོམ་སེལ་དཀའ་འདྲ། །དབྱར་ཁ་སྨན་པའི་ཚོང་ཡུལ་ཡིན། །ཆར་ཞོད་སྨན་པའི་བསོད་ནམས་ཡིན། །སད་སེར་སྨན་པའི་ཇག་པ་ཡིན། །བརྩོན་འགྲུས་སྨན་པའི་ཟོང་རྫས་ཡིན། །དབྱར་ཡོལ་སྨན་པའི་དགེ་ཡུལ་འཁོར། །ཕྱག་ལེན་ལྡན་པའི་མཁས་པ་དེ། །དམན་པའི་ཁྲོད་དུ་འདུག་ན་ཡང༌།། གཙུག་དུ་ཁུར་ནས་མི་སློབ་ན། །གཏི་མུག་ཅན་ལ་ཤེས་དུས་མེད། །ཐེ་ཚོམ་མདུད་པ་སུ་ཡིས་འགྲོལ། །རང་ཉིད་མཁས་པའི་མིང་ཐོབ་ནས། །ཐེ་ཚོམ་མི་འདྲི་ངོ་ཚ་སྙམ། །ལྷ་ཡི་བདུད་ཀྱིས་བསླུས་པ་ཡིན། །འདྲི་དང་སློབ་ལ་ངོ་ཚ་མེད། །འཇམ་དཔལ་གྱིས་ཀྱང་དང་པོ་བསླབས། །མ་བསླབས་མཁས་པ་གར་ཡང་མེད། །མི་སློབ་ཤེས་ཚུལ་འདུག་པ་དེ། །ཚ་ན་དེ་ཉིད་ངོ་ཚ་ཡིན། །མཁས་པས་འདྲི་ཚེ་ལ་ལུང་གཏམ།། ཡང་ན་ལངས་ནས་གཞན་དུ་བྱོལ། །ཚ་ན་ངོ་ཚ་དེ་ཡིན་མོད། །མཁས་ལ་མི་དད་རྒྱུན་དུ་བྱོལ། །བླུན་མང་དབུས་ན་མཁས་གཏམ་བྱེད། ངོ་ཚ་ཆེ་སྟེ་ཤེས་པ་དཀོན།། ཡོན་ཏན་སྣ་རེ་གར་ཡང་ཡོད། །དམན་ཁྲོད་ཡན་ནས་བསླབ་ལ་སྦྱོང༌། །ཆུ་ཐིགས་བཞིན་དུ་མ་བསགས་ན། །ཡོན་ཏན་རྒྱ་མཚོ་འདྲ་བ་དཀའ། །ཐམས་ཅད་ཤེས་པའི་སློབ་དཔོན་དཀོན། །ཕྱོགས་ནས་བསགས་ན་སྤྲང་པོའང་བརྒྱགས། །བབ་ཅོལ་སྤྱོད་པ་ནད་པའི་བདུད། །སྟོང་ཟོབ་མཁན་པོ་བསྟན་པའི་བདུད། །འདི་ལ་དགོངས་ནས་ཀླུ་སྒྲུབ་ཀྱིས། །སྨན་སྦྱར་ཁའི་དུས་ན་སྨན་པ་སྐྲག །ནད་གཞུང་ཆེའི་དུས་སུ་ནད་པ་སྐྲག །མཐའ་རི་ཐང་མཚམས་ནས་ནད་བདག་སྐྲག འདི་ལག་ལེན་མེད་ལ་ཡོང་བ་ཡིན། །ཞེས་གསུངས་འདི་དག་ཡིད་ལ་ཆོངས། མཁས་པ་རང་གིས་བྱེད་པས་ཆོག མཐོ་དམན་ཐམས་ཅད་བསྟེན་པས་ཡོང༌། ཕྱུག་པོ་རང་གིས་བྱེད་པས་ཆོག བརྩོན་འགྲུས་ཐང་ལྷོད་མེད་པས་ཡོང༌། །གཙོ་བོ་རང་གིས་བྱེད་པས་ཆོག ཀུན་དང་བསྟུན་ན་ཡོང་བ་ཡིན། །འབྲིམ་སྒོ་རང་གིས་བྱེད་པས་ཆོག །ཟ་འདོད་འགུལ་འཚེར་མེད་པས་ཡོང༌། །འགྲོ་ཕན་རང་གིས་བྱེད་པས་ཆོག རྒྱུད་བཞིན་ཞིབ་ཏུ་དཔྱད་པས་ཡོང༌། །དེ་སྐད་དྭགས་སྨན་འབངས་ཐ་ངས། །བརྒྱུད་འཛིན་སློབ་མའི་སྙིང་ནོར་དུ། །ཨ་ཀྵ་སྨན་ཁང་བསིལ་ཆུང་ནས། །གདམས་པའི་སྙིང་གཏམ་སྤེལ་བ་དགེ། །ཞེས་སྨྲས་པ་འདི་ནི་ཡང་དག་པའོ།། །།

མཐའ་མའི་འདོན་ཐེངས་།: 23.02.2011 ཉིན། 11:34 PM