བོད་ཀྱི་གསོ་བ་རིག་པའི་རླབས་ཆེན་འཕུར་འཆོངས།

བྱམས་པ་འཕྲིན་ལས་དང་ཐུབ་བསྟན་ཚེ་རིང་།

དེ་ཡང་ཆོས་རྒྱལ་རིམ་བྱོན་གྱི་ཐུགས་རྗེའི་འཕྲིན་ལས་ལ་བརྟེན་ནས་བོད་ཀྱི་གསོ་བ་རིག་པའི་བསྟན་པ་དེ་དཔྱིད་ཀྱི་དཔལ་ཡོན་དར་བ་ལྟར་རིས་སུ་མ་ཆད་པའི་གསོ་རིག་གི་གཞུང་ལུགས་དང་། ལག་ལེན་གྱིས་མཚོན་ཕྱོགས་གང་ཐད་ནས་དར་ཁྱབ་ཆེས་ཆེ་བ་ཞིག་བྱུང་དང་འབྱུང་བཞིན་པའི་ཐོག་ནས་དེ་ཉིད་སླར་ཡང་ཆུ་ཚད་གསར་པ་ཞིག་ཏུ་འཕུར་མཆོངས་ཡོང་རྒྱུར་རིག་པའི་སྒོ་བརྒྱ་དབྱེ་བཞིན་པའི་དུས་དེའི་ཚེ་གཡུ་ཐོག་རྙིང་མ་ཡོན་ཏན་མགོན་པོས་བོད་ཀྱི་གསོ་རིག་བསྟན་པ་དགུང་དུ་འདེགས་པའི་མཛད་རྗེས་རླབས་ཆེ་བའི་ནང་ཆེས་མཆོག་ཏུ་གྱུར་པ་ནི་གསོ་རིག་རྒྱུད་བཞི་འཆད་ཉན་དར་སྤེལ་གནང་བར་ཚང་མས་སྨན་བླ་གཉིས་པ་ལྟ་བུར་ཡིད་ཆེས་ངེས་རྙེད་ཀྱི་བརྩི་བཀུར་བླ་ན་མེད་པ་ཞུས་པ་རེད། དེ་ལྟར་ན་ཡང་རྒྱུད་བཞི་འདི་ལ་བཀའ་བསྟན་སོགས་བཞེད་པ་མི་འདྲ་བ་དང་། ལུང་རིགས་ཐ་དད་ཀྱི་སྒྲུབ་བྱེད་བཀོད་པའི་བཤད་ཚུལ་མང་པོ་ཡོད་པ་ལས། བཀའ་ལ་འདོད་པ་ཁ་གཅིག་གིས་ <<བྱེ་བྲག་བཤད་མཛོད་ཆེན་མོའི་>> ལུང་དྲངས་ཏེ། སྨན་གྱི་ནགས་སུ་ལོ་བཞི་སྟེ། །ཞེས་སྟོན་པས་སྨན་པའི་རྒྱལ་པོའི་སྐུར་བཞེངས་ཏེ་སྤྲུལ་པའི་གྲོང་ཁྱེར་ལྟ་ན་སྡུག་ཏུ་རྒྱུད་བཞི་གསུངས་པ་དང་། ལྟ་ན་སྡུག་དེ་ཡང་ཨོ་རྒྱན་ཡུལ་སོགས་བཞེད་པ་སྣ་ཚོགས་ཀྱི་ངོས་འཛིན་མཛད་པ། ཡང་རྒྱུད་བཞིའི་ནང་། སྔོན་གྱི་དུས་སུ་ལྷ་དང་ལྷ་མིན་གྱིས། །ཞེས་སོགས་རིག་བྱེད་ཀྱི་གཏམ་རྒྱུད་ཡོད་པས་སྟོན་པའི་གསུང་ཡིན་ཚུལ་འགོག་པ། <<ཐང་ཡིག>>ནང་། རྒྱ་ནག་སྨན་པ་ཧ་ཤང་དེ་ཝ་དང་། །བླ་སྨན་ཉང་བཙན་ཤི་ལ་ལ་སོགས་པས། །ཡན་ལག་བརྒྱད་པ་བདུད་རྩི་སྙིང་པོ་དང་། སྨན་གྱི་བཅུད་ལེན་བྱེད་ཐབས་མང་པོ་བསྒྱུར། །ཞེས་རྒྱུད་བཞི་རྒྱ་ནག་ནས་བསྒྱུར་བར་འདོད་པ། དེ་མིན་བཻ་རོ་རྒྱ་གར་དུ་ཕེབས་ནས་པཎ་ཆེན་ཙནྡྲ་དེ་ཝ་ལ་རྒྱུད་བཞི་ཞུས་ཏེ་ཕྱིར་ཕེབས་དུས་གཡུ་ཐོག་རྒྱ་གར་དུ་ཕེབས་པ་དང་མཇལ་ནས་གཡུ་ཐོག་གིས་བདག་རྒྱ་གར་ནས་མ་འཁོར་བར་རྒྱུད་བཞི་གཏེར་དུ་མ་སྦོས་ཞེས་གསུངས་ཚུལ། ཡང་གཡུ་ཐོག་ངོ་མས་སློབ་དཔོན་ཙནྡྲ་དེ་ཝའི་དྲུང་ནས་རྒྱུད་བཞི་ཆ་ལག་ཁ་སྐོང་དང་བཅས་པ་ཞུས་པའི་སྐོར། ད་དུང་འགའ་རེས་སློབ་དཔོན་པདྨ་དང་། ཁ་ཆེ་ཟླ་དགའ། བཻ་རོ་གསུམ་གྱིས་མཛད་ཅེས་དང་། ཡང་གྲྭ་པ་ངམོན་ཤེས་དང་། དབུས་པ་དར་གྲགས། རོག་སྟོན་དཀོན་མཆོག་སྐྱབས་གསུམ་གྱིས་སྐྱིད་སྨད་ཚད་པ་སྣའི་རི་གདོང་དུ་མཛད་ཅེས་དང་། གཞན་ཡང་གཡུ་ཐོག་པས་མཛད་དེ་འཕྲལ་གཏེར་དུ་སྦས་པ་སོགས་ལ་སྔོན་གྱི་མཁས་དབང་གཞན་དྲིང་མི་འཇོག་པའི་བཀའ་དྲིན་ཅན་རྣམས་ཀྱིས་དཔྱད་གཟོད་ཐུབ་པའི་སྒོ་ནས་ཞིབ་འཇུག་གནང་བ་དང་། ལུང་རིགས་རྣམ་དག་གི་ཁུངས་ལུང་མང་པོ་དྲངས་གནང་མཛད་པའི་ནང་ནས་ཆ་ཙ་མཚོན་ན་མཁས་པའི་དབང་པོ་སྟག་ཚང་ལོ་ཙཱ་བས། རྩ་ཆུའི་སྒོ་ནས་ནད་ངོས་འཛིན་པ་ནི། །རྒྱ་གར་འཕགས་པའི་ཡུལ་དུ་གསུངས་པ་མེད། །བོད་ཀྱི་སྨན་པ་བྱང་ཆུབ་སེམས་དཔས་མཛད།  །ཅེས་གསུངས་པ་དང་། རྒྱལ་དབང་ལྔ་པ་ཆེན་པོའི་གསུང་ལས། འཇིག་རྟེན་གྱི་མིག་གཅིག་པུ་སྟག་ཚང་ལོ་ཆེན་འདི་ལུང་རིགས་ཀྱི་དཔྱད་པ་ཤིན་ཏུ་བཟོད་ཅིང་དེས་མཛད་པའི་སྨན་དཔྱད་སྤྱིའི་རྣམ་གཞག་ཕྱོགས་གཅིག་ཏུ་བསྡུས་པའི་གཞུང་ <<མཁས་པའི་ཡིད་འཕྲོག>>དང་།   <<ལག་ལེན་གཅེས་བསྡུས་རེག་པས་ནད་སེལ་>> ཞེས་བྱ་བ་མཁས་རློམ་གཞན་ལས་ཀྱང་ཁྱད་ཞུགས་པའི་ལེགས་བཤད་ཅིག་སྣང་བས་རྒོལ་བར་ག་ལ་སྤོབས་ཞེས་གདེང་འཇོག་ཆེས་ཆེར་མཛད་པ་དང་། བོ་དོང་ཕྱོགས་ལས་རྣམ་རྒྱལ་གྱིས་ཀྱང་། བོད་སྨན་མཁས་པས་བརྩམས་པའི་རྒྱུད་བཞི་བསླབས། །ཞེས་གསུངས་ཤིང་། <<རྩིས་གཞུང་ཉེར་མཁོ་བུམ་བཟང་>>ལས། གཞན་ཡང་མཁས་གྲུབ་གཡུ་ཐོག་པས། །འཕགས་ཡུལ་རྒྱ་ནག་ཆུ་བཞིན་ཉུལ། །ཀུན་གྱི་བཅུད་བསྡུས་རྒྱུད་བཞི་བརྩམས། །འདི་ལ་རྒོལ་དུ་གཞན་ཅི་ནུས། །ཞེས་དང་། དེ་བཞིན་ཀློང་བརྡོལ་བླ་མ་ངག་དབང་བློ་བཟང་རྒྱ་མཚོའི་གསུང་འབུམ་ནང་། གསོ་བ་རིག་པ་ལས་བྱུང་བའི་མིང་གི་རྣམ་གྲངས་ནི་མགོན་པོ་ཀླུ་སྒྲུབ་ཀྱིས་མཛད་པའི་སྦྱོར་བ་བརྒྱ་པ་དང་། སློབ་དཔོན་དཔའ་བོའི་སྨན་དཔྱད་ཡན་ལག་བརྒྱད་པའི་སྙིང་པོ་བསྡུས་པ། དེའི་འགྲེལ་པ་ཁ་ཆེ་ཟླ་བ་མངོན་དགས་མཛད་པ་གླེགས་བམ་གཉིས་རྣམས་ནི་རྒྱ་གར་གྱི་སྨན་གཞུང་དང་། བོད་ཀྱི་སྨན་གཞུང་ནི་གཡུ་ཐོག་པ་གསར་རྙིང་གཉིས་བྱུང་བའི་རྙིང་མ་ནི་སྟོད་ལུང་སྐྱིད་སྣར་སྐུ་འཁྲུངས་ཤིང་བདེ་གཤེགས་སྨན་པའི་རྒྱལ་པོའི་སྤྲུལ་པར་གྲགས། བསམ་ཡས་ན་ཆོས་རྒྱལ་ཁྲི་སྲོང་ལྡེ་བཙན་གྱི་སྨན་པ་ཡང་མཛད་པ་དེས་རྒྱུད་བཞི་མཛད་པར་གྲགས་ཤིང་བསམ་ཡས་དབུ་རྩེར་གཏེར་དུའང་སྦས། ཕྱིས་སུ་གྲྭ་ཐང་པ་གྲྭ་པ་མངོན་ཤེས་ཅན་གྱིས་གཏེར་ནས་བཏོན་པ་ཡིན་ཡང་ཟེར་རོ་ཞེས་གསུངས་པ་བཅས་ཀྱིས་དོན་དུ་གཡུ་ཐོག་རྙིང་མ་ཡོན་ཏན་མགོན་པོ་མཆོག་དེས་མི་ལོ་ ༡༢༥ བར་གསོ་དཔྱད་ཁོ་ནས་འགྲོ་དོན་མཐའ་ཡས་པ་བསྐྱངས་པ་དང་། སྐབས་དེའི་རིང་རང་ཅག་བོད་ཀྱི་མི་རབས་སྔ་མས་གསར་བསྐྲུན་གནང་བའི་སྨན་གཞུང་གི་རྨང་གཞི་དང་། ཕྱོགས་མཚུངས་རྒྱ་གར་དང་། བལ་ཡུལ། ཁ་ཆེ། ཁྲོམ་སོགས་ཀྱི་གསོ་རིག་གི་ཕུན་སུམ་ཚོགས་པའི་ཉིང་ཁུ་དང་། ལྷག་པར་མེས་རྒྱལ་ཀྲུང་དབྱི་ཀྲུང་སྨན་གྱི་ངོ་མཚར་ཆེ་བའི་ཁྱད་ཆོས་རྣམས་བསྡུ་ལེན་གྱིས་རྒྱུད་བཞི་ཆ་ལམ་ཙམ་ཞིག་མཛད་པ་ནི་གསོ་རིག་གི་སྤྱི་དོན་དང་། གཞུང་ལུགས་ཀྱི་རྣམ་བཤད། ནད་ཐོག་གི་ཉམས་མྱོང་། སྨན་བཅོས་ཀྱི་ཐབས་ཤེས་སོགས་དོན་དངོས་དུ་མའི་སྟེང་ནས་ར་སྤྲོད་མི་འཕེར་བའི་རྒྱུ་མཚན་ཅི་ཡང་མེད། དེ་ནས་གཡུ་ཐོག་ཆེན་པོ་དགུང་ལོ་ལྔ་བཅུ་ང་ལྔ་ཙམ་བཞེས་པའི་དུས་སློབ་མ་བདེ་བ་དཔལ་ཕྱག་ཕྱིར་ཁྲིད་ནས་ཀོང་པོར་བྱོན་ཏེ་ལོ་བཅུ་ཙམ་བཞུགས་པས་སློབ་མ་སུམ་བརྒྱ་ལྷག་ཙམ་འདུ་བ་བྱུང་། དེ་རྣམས་ལ་རྒྱུད་བཞི་ཆ་ལག་ཁ་སྐོང་དང་བཅས་པ་གནང་བས་སྨན་པ་འབུམ་རམས་པ་བྱ་བ་ལྔ་བཅུ་ཙམ་དང་། སྨན་པ་རབ་འབྱམས་པ་བྱ་བ་ཡང་ལྔ་བཅུ་ཙམ་བྱུང་། སྨན་པ་དཀའ་བཅུ་པ་བྱ་བ་བརྒྱ་ཙམ། སྨན་པ་བསྡུས་ར་བ་བྱ་བ་སོགས་དཔྱད་འགོ་ཐོན་པའི་སྨན་པ་མཁས་པ་མང་པོ་བྱུང་། དེ་ནས་རིམ་བཞིན་སློབ་མ་སྟོང་ཙམ་འདུག་པས་ཀོང་པོའི་སྨན་ལུང་བྱ་བར་སྨན་གྱི་དགོན་པ་ལྟ་ན་སྡུག་བྱ་བ་བཏབ་སྟེ། སྨན་པའི་རིགས་སུ་གྱུར་བའི་བྱ་བྲལ་བ་ཐམས་ཅད་བཤད་ཉན་གྱི་སྒྲོ་འདོགས་ཆོད་པ་དང་། འགྲོ་ཕན་ཤིན་ཏུ་ཆེ་བའི་བཀའ་དྲིན་བཟང་པོར་སྩལ་བས་སྔར་ནས་ད་བར་བོད་ཀྱི་རྒྱ་ཆེའི་མང་ཚོགས་ཚོས་གཡུ་ཐོག་རྙིང་མ་ཡོན་ཏན་མགོན་པོ་མཆོག་ལ་དད་གུས་ཚད་མེད་ཞུ་བ་དང་། ཕྱོགས་མཚུངས་རྒྱ་བལ་ཧོར་ཡུལ་སོགས་ཀྱི་ཡུལ་གྲུར་ཡང་མཚན་སྙན་ཧ་ཅང་ཆེ་བ་ཞིག་ཡིན་ནོ། །གཞན་ཡང་སྔ་རྗེས་སུ་ད་དུང་<<གསོ་དཔྱད་མུ་ཏིག་ཕྲེང་བ་>>དང་། <<མཁས་ཁྱད་ངོ་མཚར་བཞི་སྤྲུགས།>><<ཁྱད་པར་ཟབ་པ་རྣམ་གསུམ།>><<ཡང་སྦས་གབ་པ་བཅོ་བརྒྱད། (སུམ་སྟོན་བཞེད་པའང་ཡོད་)>><<ཁ་ཐོར་རིན་ཆེན་སྤུངས་པ་>>སོགས་རྒྱུད་ཀྱི་ཆ་ལག་དང་གསོ་དཔྱད་ཀྱི་དཔེ་མང་པོ་བརྩམས་པར་མཛད་པ་དག་གིས་མི་རིགས་རང་ཉིད་ཀྱི་གསོ་རིག་འཕེལ་རྒྱས་ཀྱི་བྱ་གཞག་ཐད་གཞལ་བར་མི་ནུས་པའི་མཛད་རྗེས་རླབས་པོ་ཆེ་འཇོག་གནང་མཛད་པ་དེར་ཆོས་རྒྱལ་མཆོག་ཤིན་ཏུ་དགྱེས་ཏེ་བཀའ་སྩལ་བར་ “འགྲེལ་ཚད་དོན་ལྡན་གཡུ་ཐོག་པ། །སྨན་པ་ཆེ་མཆོག་གཙོ་བོ་རྒྱལ། །ཁྱད་པར་གསོ་དཔྱད་བསྟན་པ་སྤེལ། །བཀའ་དྲིན་ཆེའོ་གཡུ་ཐོག་པ། །” ཞེས་ཆེད་བསྟོད་དང་འབྲེལ་དྭགས་ཀོང་ཁྱུང་གསུམ་བྱ་དགར་བསྩལ་བར་གྲགས་ལ། དེ་བཞིན་རྒྱལ་པོའི་བླ་སྨན་ཆེན་པོ་བདུན་(སད་མི་བདུན་ཡང་བཞེད་) སོགས་བོད་སྨན་མཁས་པ་རྣམས་ཀྱིས་ཀྱང་མོས་གུས་དད་གསུམ་གྱི་སྒོ་ནས་འདི་ལྟར་གསོལ་ཏེ། གསོ་རིག་ལ་སོགས་བསྟན་པའི་སྲོག་ཤིང་འཛིན། །གངས་ཅན་ལྗོངས་འདིར་ཕན་བདེའི་སྒྲོན་མེ་སྤར། །འགྲོ་བའི་གཙུག་རྒྱན་སྨན་པའི་དེད་དཔོན་ཆེ། །བདག་ཅག་རྣམས་ཀྱི་མགོན་སྐྱབས་ཨེ་མ་མཚར། །ཞེས་པ་སོགས་ཀྱིས་མཆོད་པར་བྱས་ཤིང་། དུས་དེའི་ཚེ་གཡུ་ཐོག་ཆེན་པོས་ཀྱང་རང་ཉིད་ཀྱི་བསྟན་བཅོས་བརྩམས་པའི་ཆེ་བ་བརྗོད་དེ་གསུངས་པར། བོད་ཀྱི་མངའ་བདག་གཙོ་མཛད་པའི། །འདིར་ཚོགས་བོད་ཀྱི་སྨན་པ་རྣམས། །མཁས་པ་གཡུ་ཐོག་མགོན་པོ་ངས། །རྒྱ་གར་ཡུལ་ལ་ལན་གསུམ་ཕྱིན། །བླ་མ་གྲུབ་ཐོབ་འགའ་དང་མཇལ། །གདམས་ངག་རྒྱལ་པོའི་དཀོར་མཛོད་ཐོབ། །རོ་བཀྲ་འཕྲུལ་གྱི་མེ་ལོང་ཤེས། བྱང་ཁོག་གསང་དབྱེའི་མཛུབ་བཙུགས་ཤེས། །ཐུར་དཔྱད་གནད་ཀྱི་ལྡེ་མིག་ཤེས། །ཞེས་སོགས་གསུངས་པ་ལྟར། བདག་ཉིད་ཆེན་པོ་དེས་མཛད་པའི་གསོ་རིག་གི་གཞི་རྩའི་གནས་ལུགས་དང་བཅས་པའི་ནང་དོན་རྣམས་ཚན་རིག་དང་མཐུན་པའི་སྒོ་ནས་འགྲེལ་བཤད་མཛད་པ་དེ་དག་གིས་བོད་ཀྱི་གསོ་བ་རིག་པ་དེ་ཆུ་ཚད་གསར་པ་ཞིག་ཏུ་འཕུར་མཆོངས་བྱུང་བ་དང་འབྲེལ་དུས་དེ་ནས་བཟུང་མི་རིགས་རང་ཉིད་ཀྱི་གསོ་རིག་འདི་དེ་བས་བརྒྱུད་རིམ་དང་ལྡན་ཞིང་ཐུན་མོང་མ་ཡིན་པའི་རིགས་པའི་གཞུང་ལུགས་དང་། ལག་ལེན་གྱི་ཐོག་ནས་འཕེལ་རྒྱས་འགྲོ་ཐུབ་པའང་བྱུང་། དེ་བཞིན་ཆོས་རྒྱལ་ཁྲི་སྲོང་ལྡེ་བཙན་གྱིས་ཐུགས་བསྐྱེད་ལྷག་བསམ་བཟང་པོས་བླ་སྨན་བདུན་དང་། (སད་མི་བདུན་ཡང་ཟེར་) གངས་ཅན་ལོ་པཎ་ཡོངས་ཀྱི་གཙུག་རྒྱན་པཎྜི་ཏ་ཆེན་པོ་བཻ་རོ་ཙ་ན་མཆོག་བཅས་ལ་རྙེད་བཀུར་ཞབས་ཏོག་བསམ་གྱིས་མི་ཁྱབ་པ་ཞུས་ཏེ་ཕྱི་རབས་ནད་པའི་དོན་དུ་གསོ་དཔྱད་ཁྱད་འཕགས་རིན་ཆེན་འཁྲུངས་དཔེ་གསུངས་པར་བསྐུལ་མ་མཛད་པ་ལྟར་བླ་སྨན་བདུན་གྱིས་ <<སྒྲོལ་མའི་སྔོ་འབུམ་མམ་གསོ་དཔྱད་སྔོ་སྣ་ཚོགས་ཀྱི་འཁྲུངས་དཔེ་བསྟན་པ་>>ཞེས་པ་གསུངས་པ་ལས། གནས་གཞི་ཆེན་པོ་ཁྱད་འཕགས་བྲག་དམར་བསམ་ཡས་སུ། ཡོན་ཏན་ཁྱད་འཕགས་སྤྲུལ་སྐུ་འགྲོ་དོན་མཛད། །རྗེ་རྒྱལ་གཞན་ལས་ཁྱད་འཕགས་ཁྲི་སྲོང་ལྡེ་བཙན་གྱིས། །བླ་སྨན་གཞན་ལས་ཁྱད་འཕགས་རྣམ་བདུན་ལ། །དར་ཟབ་གདན་བཏིང་ཞལ་ཟས་བདུད་རྩི་དྲངས། །གསེར་དངུལ་ལ་སོགས་གང་དགྱེས་ནོར་རྣམས་ཕུལ། །ལུས་ངག་ཡིད་གསུམ་གུས་པས་ཕྱག་འཚལ་ནས། མཐའ་ཡས་སེམས་ཅན་ནད་ལས་གྲོལ་བའི་ཕྱིར། །གསོ་དཔྱད་ཁྱད་འཕགས་རིན་ཆེན་འཁྲུངས་དཔེ་ཞུས། ཞེས་གསལ་བ་དང་། ལོ་ཆེན་བཻ་རོ་ཙ་ན་མཆོག་གིས། ཕྱི་རབས་ཀྱི་དོན་དུ་སྨན་གྱི་འཁྲུངས་དཔེ་བཀོད་པའི་ <<འཇམ་དབྱངས་སྔོ་འབུམ་མམ་གསོ་དཔྱད་སྔོའི་མན་ངག་སྔོ་འབུམ་>>ཞེས་པ་སྨན་སྣ་བརྒྱ་དང་བདུན་ཅུ་དོན་བཞི་ཙམ་ཡོད་པ་གསར་དུ་བརྩམས་ནས་རྒྱལ་པོར་ཕུལ་བ་ལས། ཁྲི་སྲོང་ལྡེ་བཙན་བསྐུལ་ནས་བཻ་རོ་ཙ་ན་ནི། བདག་གིས་བསམ་རྒྱ་ཆེར་བསྐྱེད་ནས། རྒྱ་གར་ཡུལ་ཁམས་ཀུན་ཏུ་དཀའ་བ་སྤྱད་པའི་ནོར་བུ་འདི། བི་བྱི་མཁས་པས་ཐོག་མར་དགེ་མཛེས་དམ་ལས་རྙེད། ཕྱི་རབས་དོན་དུ་གདམས་ངག་འཁྲུངས་དཔེ་གུད་དུ་བཀོད། མན་ངག་ཡིན་པས་དུམ་བུ་འཁྲིགས་སུ་བྱས། བརྗེད་ཀྱིས་དོགས་པས་ནན་ཏན་ཡི་གེར་བྲིས། ཤིན་ཏུ་དཀོན་པས་སེམས་ལ་གཏེར་དུ་སྦོས། གཉིས་དང་གསུམ་ལས་སྤེལ་ན་བདག་གཞན་ན་ར་ཀན། མངའ་བདག་ཆེན་པོ་ཁྱེད་ལ་བདག་གིས་གཏད། ཅེས་སོགས་གསུངས་པ་ལྟར་སྐབས་དེར་བོད་ཀྱི་སྨན་རིགས་ནང་སྐྱེ་དངོས་དང་། སྲོག་ཆགས། གཏེར་དངོས་བཅས་དབྱེ་བ་ཕྱེ་ཐུབ་པ་དེའི་སྟེང་དུ་སྨན་གྱི་འདྲ་ཡིག་དང་། རོ་ནུས། སྦྱར་ཐབས་སོགས་བསྟན་པ་མ་ཟད། སྨན་རྫས་ཁག་གཅིག་བོད་ལྗོངས་ཁོ་ནར་མ་གཏོགས་ཡུལ་ལུང་གཞན་པ་གང་ལའང་མེད་པའི་ཁྱད་ཆོས་སྐོར་གསུངས་ཡོད་པའི་འཁྲུངས་དཔེ་དེ་གཉིས་ཐོན་པ་དེས་བོད་ཀྱི་སྨན་རྫས་རིག་པ་སླར་ཡང་འཕེལ་རྒྱས་གསར་པ་ཞིག་ལ་སླེབས་པའི་མཚོན་རྟགས་འགོག་མེད་དུ་འཆར་བ་བཞིན་ནོ།། །།

འདི་ནི་ཕྱི་ལོ་ ༢༠༠༠ ལོར་བོད་ལྗོངས་མི་དམངས་དཔེ་སྐྲུན་ཁང་ནས་པར་སྐྲུན་ཞུས་པ་《ཀྲུང་གོའི་གསོ་རིག་ཀུན་འདུས་ལས་བོད་ཀྱི་གསོ་བ་རིག་པ། སྟོད་ཆ།》 ཞེས་པ་ནས་ཟུར་འདོན་ཞུས།།

མཐའ་མའི་འདོན་ཐེངས་།: 20.09.2024 ཉིན། 4:28 PM