བརྟན་བཞུགས་སྐབས་ཀྱི་ྋགོང་ས་མཆོག་གི་བཀའ་སློབ། 

ཕྱི་ལོ་ ༢༠༢༤ ཟླ་ ༦ ཚེས་ ༡༡ བོད་ཟླ་ ༥ ཚེས་ ༥ བོད་ལུགས་ཀྱི་སྐུའི་དགུང་གྲངས་དགུ་བཅུར་སོན་པའི་འཁྲུངས་སྐར་གྱི་ཉིན་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ་བོད་མིའི་སྒྲིག་འཛུགས་ལས་བྱེད་ཟུར་པ་དང་། འགྲོ་ཕན་བོད་ཀྱི་སྨན་རྩིས་ཁང་། སྐུ་སྲུང་ཟུར་པ་བཅས་མཐུན་གྲོགས་ཚོགས་པ་གསུམ་གྱིས་སྒྲོལ་དཀར་ཚེ་སྦྱིན་ཡིད་བཞིན་འཁོར་ལོའི་སྒོ་ནས་བརྟན་བཞུགས་བསྟར་འབུལ་རྒྱས་པ་ཞིག་ཞུས་སྐབས་སྤྱི་ནོར་ྋགོང་ས་ྋསྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གིས་བསྩལ་བའི་བཀའ་སློབ།

“དེ་རིང་འདིར་ཆོས་གྲོགས་ཚོས་བརྟན་བཞུགས་ཕུལ་བ་རེད། རྨི་ལམ་ལ་ངོས་རང་ལོ་བརྒྱ་དང་བཅུ་གྲངས་ཤིག་སྡོད་རྒྱུ་ཧ་ཅང་གསལ་པོ་ཞིག་འདུག དཔལ་ལྡན་ལྷ་མོ་ངོས་ཀྱི་མཇིང་པའི་སྒང་དུ་བཞུགས་སྟེ་ཁྱོད་རང་ལོ་བརྒྱ་དང་བཅུ་གྲངས་ཤིག་སྡོད་ཀྱི་རེད་ཅེས་གསུང་གི་འདུག  རིགས་པའི་རྒྱུ་མཚན་བཀོད་པ་ཡིན་ན་ད་ལྟ་ང་ཚོ་བོད་པ་དཀའ་ངལ་ཆེན་པོ་ཞིག་གི་སྒང་ལ་བསྡད་ཡོད། བོད་པའི་སྤྱི་མཐུན་གྱི་ལས་དང་སྨོན་ལམ་གྱི་སྟོབས་ལས་ངོས་རང་མདོ་སྨད་ནས་སྐྱེས་ཤིང་། བོད་པ་མང་པོས་དགའ་བོ་བྱེད་ས་ཞིག་དང་། ལུང་རྟོགས་ཀྱི་བསྟན་པ་ལ་ཡིན་ནའང་ཞབས་འདེགས་གང་ལ་གང་འཚམ་སྒྲུབ་ཐུབ་མཁན་ཞིག་ཆགས་ཡོད་པས་ལྷ་མོའི་ལུང་བསྟན་དེ་རྒྱུ་མཚན་ལྡན་པ་ལྟ་བུ་འདུག ངོས་རང་འདིར་ལས་དང་སྨོན་ལམ་གྱི་དབང་གིས་སྐྱེས་པ་ཞིག་རེད། དེར་བརྟེན། ལྷ་མོའི་ལུང་བསྟན་ནང་བཞིན་ལོ་བརྒྱ་དང་བཅུ་གྲངས་ཤིག་སྡོད་ཀྱི་རེད། ཁྱེད་ཚོ་ཚང་མ་བློ་བདེ་བར་བཞུགས།”

“གལ་ཆེ་བ་ནི་གསོན་པའི་རིང་ང་ཚོ་བཅོམ་ལྡན་འདས་ཀྱི་རྗེས་འབྲང་ཆོས་པ་ཞིག་རེད། སངས་རྒྱས་བཅོམ་ལྡན་འདས་ཀྱིས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་གསུངས་ཡོད་པ་དེ་ག་ཚོད་ཐུབ་ཐུབ་ཀྱིས་ལག་ལེན་ལ་བསྐྱལ་དགོས་པ་རེད། ལྷ་མོའི་ལུང་བསྟན་ནང་བཞིན་བྱས་ནས། གང་ལྟར་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ལ་བསམ་བློ་ཡག་པོ་ཞིག་བཏང་བ་ཡིན་ན་མི་གོ་ཆོད་པ་ལྟ་བུ་ཞིག་རེད། ངོས་རང་ལ་ཆ་བཞག་ན་ཉིན་རེ་བཞིན་དུ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་བསམ་བློ་གཏོང་གི་ཡོད། ཁྱོད་ཚོ་ཆོས་གྲོགས་ཚོས་ཀྱང་ཉིན་རེ་བཞིན་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་དགོངས་པ་ཡག་པོ་བཞེས།”

“ང་ཚོས་ཚོགས་བསགས་སྒྲིབ་སྦྱང་གི་ཐབས་ཤེས་ཡག་ཤོས་ནི་བྱང་ཆུབ་ཀྱི་སེམས་དང་སྟོང་ཉིད་སྒོམ་རྒྱུ་འདི་ཡིན། དཔལ་ལྡན་ལྷ་མོ་དགྱེས་པའི་མཆོད་པའང་བྱང་ཆུབ་ཀྱི་སེམས་དང་སྟོང་ཉིད་སྒོམ་རྒྱུ་འདི་གཙོ་བོ་ཆགས་ཀྱི་འདུག  སངས་རྒྱས་བཅོམ་ལྡན་འདས་དགྱེས་པའི་མཆོད་པ་ཡག་ཤོས་དེ་ཡང་བྱང་ཆུབ་ཀྱི་སེམས་དང་། སྟོང་ཉིད་ཀྱི་ལྟ་བ་སྒོམ་རྒྱུ་འདི་གཙོ་བོ་ཡིན། བོད་ལ་དབང་སྒྱུར་བྱེད་མཁན་རྒྱ་ནག་ཏུའང་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་དོ་སྣང་བྱེད་མཁན་ཇེ་མང་ཇེ་མང་དུ་འགྲོ་བཞིན་འདུག འཛམ་གླིང་ཤར་ནུབ། ལྷོ་བྱང་དུ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་དོ་སྣང་བྱེད་མཁན་ཤུགས་ཆེ་རུ་ཆེ་རུ་འགྲོ་བཞིན་འདུག དེར་བརྟེན།  ག་ཚོད་ཐུབ་ཐུབ་ཀྱིས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་བསམ་བློ་ཡག་པོ་ཐོངས། སོ་སོ་སྒེར་གྱི་འདི་དང་ཕྱི་མའི་དོན་དག་སྒྲུབ་པའི་ཆོས་གལ་ཆེ་ཤོས་ཀྱང་ཆགས་ཡོད། ཚང་མས་ཧུར་ཐག་བྱས་ཏེ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་དགོངས་པོ་ཡག་པོ་བཞེས།  ངོས་རང་མདོ་སྨད་ནས་སྐྱེས་པའི་ཕྲུ་གུ་ཞིག་ལྷ་མོའི་བླ་མཚོ་ནས་གསུངས་པ་ལྟར། བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་བསམ་བློ་ཤུགས་ཆེན་པོ་གཏོང་གི་ཡོད། ངོས་རང་གིས་བསམ་བློ་བཏང་བ་ལྟར་ཆོས་གྲོགས་ཚོས་ཀྱང་དགོངས་པ་ཡག་པོ་ཞིག་བཞེས། སོ་སོའི་ཚོགས་བསགས་པ་དང་། བོད་སྤྱི་བའི་དོན་དུའང་འདིས་ཕན་གྱི་རེད།”

“དེ་རིང་སྐབས་སུ་བབ་པ་བརྟན་བཞུགས་ཕུལ་ཏེ་བསམ་པ་རྣམ་དག་གིས་སྨོན་ལམ་བརྒྱབ་པ་རེད། གང་ལྟར་བརྟན་བཞུགས་ནི་དངུལ་ཕུལ་བའི་སྐད་ཆ་མ་རེད། སོ་སོ་རང་གི་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་ཉམས་ལེན་ཡག་པོ་ཞིག་བྱས་ནས་དངོས་གནས་དྲང་གནས་ཀྱི་སྒྲུབ་པའི་མཆོད་པ་ཡག་ཤོས་ཆགས་ཡོད། བླ་མ་དགྱེས་པའི་མཆོད་པ་དེའི་ཐོག་ནས་ཡོང་གི་རེད། ངོས་རང་ལོ་བརྒྱ་དང་བཅུ་གྲངས་ཤིག་སྡོད་རྒྱུར་དཔལ་ལྡན་ལྷ་མོའི་ལུང་བསྟན་ཧ་ཅང་གསལ་པོ་ཞིག་ཡོད། ངོས་རང་ད་དུང་ལོ་མང་པོ་ཞིག་སྡོད་ཐུབ་པ་ནི་ཕལ་ཆེར་ཐག་ཆོད་པ་ཞིག་རེད། ངོས་ཀྱིས་ཧུར་ཐག་འབད་ཐག་བྱེད་ཀྱི་རེད། ཁྱོད་རང་ཚོ་ཚང་མས་ཧུར་ཐག་འབད་ཐག་གནང་ཤོག” ཅེས་བཀའ་སློབ་སྩལ་རྗེས། “དེ་རིང་ངོས་ཀྱི་སྐྱེས་སྐར་ལ་འཁེལ་ཡོད། གྲོད་ཁོག་སྟོང་པ་སྡོད་ཀྱི་མ་རེད། ལྟོ་ཆས་རྒྱག་ཚད་ཟ་དགོས།” ཞེས་སྐུ་རྩེད་དང་འབྲེལ་བཀའ་སྩལ།།

ཐུགས་སྣང་། བཀའ་སློབ་འདི་ྋགོང་ས་ྋསྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གི་བོད་ཡིག་དྲ་རྒྱ་ https://gyalwarinpoche.com/  ནང་ཡིག་ཐོག་ཏུ་ཕབ་ཡོད་པ་དེ་ཉིད་དང་སྐུ་པར་རྣམས་ཀྱང་དེ་ནས་ཟུར་འདོན་ཞུས་པ་ཡིན།

མཐའ་མའི་འདོན་ཐེངས་།: 17.06.2024 ཉིན། 3:02 PM