འཕགས་པ་གསེར་འོད་དམ་པ་མཆོག་ཏུ་རྣམ་པར་རྒྱལ་བའི་མདོ་སྡེའི་རྒྱལ་པོ་ཐེག་པ་ཆེན་པོའི་མདོ་ལས།

ནད་རབ་ཏུ་ཞི་བར་བྱས་པའི་ལེའུ་སྟེ་ཉི་ཤུ་བཞི་པ།

བཅོམ་ལྡན་འདས་ཀྱིས་བྱང་ཆུབ་ཀྱི་ཤིང་གི་ལྷ་མོ་ལ་བཀའ་སྩལ་པ། རིགས་ཀྱི་ལྷ་མོ་ལེགས་པར་ཉོན་ལ་ཤིན་ཏུ་ཡིད་ལ་ཟུང་ཤིག་དང་། ལྷའི་བུ་སྟོང་ཕྲག་བཅུ་པོ་འདི་དག་གི་སྔོན་གྱི་སྨོན་ལམ་གྱི་རྒྱུ་དང་རྐྱེན་གང་ཡིན་པ་དེང་ཁྱོད་ལ་བཤད་པར་བྱའོ། །རིགས་ཀྱི་ལྷ་མོ་སྔོན་བྱུང་བ་འདས་པའི་དུས་ཀྱི་བསྐལ་པ་གྲངས་མེད་པ། ཚད་མེད་ཅིང་བསམ་གྱིས་མི་ཁྱབ་པ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པའི་སྐྱེས་བུ་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རིན་ཆེན་གཙུག་ཕུད་ཅེས་བྱ་བ་འཇིག་རྟེན་དུ་བྱུང་སྟེ། རིགས་ཀྱི་ལྷ་མོ་དེའི་ཚེ་བཅོམ་ལྡན་འདས་དེ་ཡོངས་སུ་མྱ་ངན་ལས་འདས་པའི་འོག་ཏུ་ཡང་དག་པའི་ཆོས་ནུབ་པར་གྱུར་ནས་གཟུགས་བརྙན་གྱི་ཆོས་ཀྱི་ཚེ་རྒྱལ་པོ་ལྷའི་དབང་ཕྱུག་གི་འོད་ཅེས་བྱ་བ་ཞིག་ཡོད་དེ། རྟག་པར་ཡང་དག་པའི་ཆོས་ཀྱིས་ཕ་མ་བཞིན་དུ་མི་རྣམས་ལ་རྗེས་སུ་སྟོན་པར་བྱེད་དོ། །རྒྱལ་པོ་དེའི་ཡུལ་ན་ཚོང་དཔོན་ཆུ་འཛིན་ཅེས་བྱ་བ་སྨན་གྱི་རིག་པ་ལ་ཤིན་ཏུ་མཁས་པ། ཤེས་པའི་ཡན་ལག་བརྒྱད་ལེགས་པར་ཁོང་དུ་ཆུད་པ། སེམས་ཅན་གྱི་ནད་ཀྱི་སྡུག་བསྔལ་འབྱུང་བ་ཆེན་པོ་བཞི་མི་མཐུན་པ་ལས་གྱུར་པ་ཐམས་ཅད་ཡོངས་སུ་སྐྱོབ་ཅིང་གསོ་བར་བྱེད་པ་ཞིག་ཡོད་དེ། རིགས་ཀྱི་ལྷ་མོ་དེའི་ཚེ་ཚོང་དཔོན་ཆུ་འཛིན་དེ་ལ་བུ་ཆུ་འབེབས་ཞེས་བྱ་བ་བྱད་བཞིན་སྡུག་ཅིང་མཛེས་པ། མང་པོ་ཀུན་གྱིས་བལྟ་བར་མོས་པ། རང་བཞིན་གྱིས་སེམས་མྱུར་བ། གཙུག་ལག་རྣམས་ལེགས་པར་རྟོགས་པ། ཡི་གེ་དང་། རི་མོ་དང་། རྩིས་དང་། གྲངས་རྣམས་མངོན་པར་མི་རྟོགས་པ་གང་ཡང་མེད་པ་ཞིག་ཡོད་པར་གྱུར་ཏོ། ། པ།

དེའི་ཚེ་རྒྱལ་པོ་དེའི་ཡུལ་ཁམས་ན་སེམས་ཅན་བརྒྱ་སྟོང་ཚད་མེད་པ་སྙེད་ནད་ཀྱི་སྡུག་བསྔལ་སྣ་ཚོགས་ཀྱིས་རབ་ཏུ་གཟིར་བར་གྱུར་པས་ཐ་ན་དགའ་བར་གྱུར་པའི་སེམས་ཅུང་ཟད་ཙམ་ཡང་མེད་པར་གྱུར་ཏོ། །དེ་ནས་ཚོང་དཔོན་གྱི་བུ་ཆུ་འབེབས་སེམས་ཅན་བརྒྱ་སྟོང་ཚད་མེད་པ་དེ་དག་ནད་ཀྱི་སྡུག་བསྔལ་མྱོང་བར་གྱུར་པ་མཐོང་བ་དང་། སྙིང་རྗེ་ཆེན་པོའི་སེམས་བསྐྱེད་ནས་འདི་སྙམ་དུ་སེམས་ཅན་ཚད་མེད་པ་འདི་སྙེད་སྡུག་བསྔལ་མི་བཟད་པས་ཉོན་མོངས་པར་གྱུར་ཏེ། བདག་གི་ཕ་ཚོང་དཔོན་སྨན་དཔྱད་ལ་ཤིན་ཏུ་མཁས་ཤིང་ཤེས་པའི་ཡན་ལག་བརྒྱད་ལེགས་པར་ཁོང་དུ་ཆུད་དེ། འབྱུང་བ་ཆེན་པོ་བཞི་འཕེལ་ཞིང་འགྲིབ་པ་ལས་བྱུང་བའི་ནད་སྣ་ཚོགས་གསོ་བར་ནུས་ཀྱང་རྒས་འཁོགས་པས་ལུས་ཀྱི་ཉམ་ཆུང་ཞིང་དམའ་བ་དང་། འཁར་བ་ལ་བརྟེན་ནས་གདོད་འགྲོ་བས་གྲོང་དང་། གྲོང་ཁྱེར་དང་། གྲོང་རྡལ་རྣམས་སུ་སོང་ནས་ནད་ཀྱི་སྡུག་བསྔལ་རྣམས་ཡོངས་སུ་སྐྱོབ་པར་བྱེད་མི་ནུས་ལ། དེང་སེམས་ཅན་བརྒྱ་སྟོང་ཚད་མེད་པ་སྙེད་ནི་ནད་ཚབས་ཆེན་པོས་ཐེབས་པས་ཡོངས་སུ་སྐྱོབ་པར་ནུས་པ་མེད་ན། དེང་བདག་ཕ་སྨན་པ་ཆེན་པོའི་དྲུང་དུ་སོང་ལ་ནད་གསོ་བའི་སྨན་དཔྱད་གསང་བ་དྲིས་ཏེ། གལ་ཏེ་ཤེས་པར་གྱུར་ན་གྲོང་དང་། གྲོང་ཁྱེར་དང་། གྲོང་རྡལ་དག་ཏུ་སོང་ལ་སེམས་ཅན་རྣམས་ཀྱི་ནད་རྣམ་པ་སྣ་ཚོགས་གསོས་ཏེ་ཡུན་རིང་པོར་བདེ་བ་མྱོང་བར་བྱའོ་སྙམ་མོ། །དེ་ནས་ཚོང་དཔོན་གྱི་བུས་དེ་སྙམ་དུ་བསམས་ནས་ཕའི་ཐད་དུ་སོང་སྟེ། རྐང་པ་ལ་མགོ་བོས་གཏུགས་ནས་ཕྱག་བྱས་ཏེ་གུས་པས་ཐལ་མོ་སྦྱར་ནས་ཕྱོགས་གཅིག་ཏུ་འཁོད་དེ། ཚིགས་སུ་བཅད་པ་འདི་དག་གིས་ཕ་ལ་འདི་སྐད་ཅེས་དྲིས་སོ། །

བདག་ནི་སེམས་ཅན་བསྐྱབ་པའི་སླད། །སྨན་དཔྱད་རྣམས་ནི་ཞུ་ལུགས་ན། བྱམས་པའི་ཡབ་ཀྱིས་བརྩེར་དགོངས་ཏེ། །བདག་ལ་བཀས་ནི་བཤད་དུ་གསོལ། །ཇི་ལྟར་ལུས་ནི་འཇིག་པ་ན། །འབྱུང་ཆེན་རྣམས་ནི་འཕེལ་འགྲིབ་འགྱུར། །གཞན་ཡང་དུས་ནི་གང་གི་ཚེ། །ནད་མང་རྣམས་ནི་སྐྱེ་འགྱུར་ལགས། །ཇི་ལྟར་ཟས་སྐོམ་འཚལ་འགྱུར་ན། །བདེ་བ་དག་ནི་མྱོང་འགྱུར་ཞིང་། །ལུས་ཀྱི་ནང་གི་མེ་ཡི་མཐུ། །ཉམས་ཤིང་གནོད་པར་མི་འགྱུར་ལགས། །སེམས་ཅན་ནད་ནི་བཞི་མཆིས་ཏེ། །རླུང་དང་མཁྲིས་པ་བད་ཀན་དང་། །ཀུན་འདུས་པ་ཡི་ནད་ལགས་ན། དེ་དག་ཇི་ལྟར་གསོ་བར་བགྱི། །གང་གི་ཚེ་ནི་རླུང་ནད་ལྡང་། །གང་གི་ཚེ་ནི་མཁྲིས་ནད་སློང་། །གང་གི་ཚེ་ནི་བད་ཀན་གཡོ། །གང་གི་ཚེ་ནི་ཀུན་འདུས་སྐྱེ། དེ་ནས་ཚོང་དཔོན་གྱི་བུས་གསོལ་བ་བཏབ་པ་ཐོས་པ་དང་། ཚིགས་སུ་བཅད་དེ་སྨྲས་པ། ངས་དེང་དྲང་སྲོང་རྙིང་པ་ཡི། །ནད་གསོ་དཔྱད་ལ་བརྟེན་ནས་ནི། །རིམ་བཞིན་ཁྱོད་ལ་རབ་བསྟན་གྱིས། །ལེགས་པར་ཉོན་ལ་སེམས་ཅན་སྐྱོབ། །ཟླ་བ་གསུམ་ནི་དཔྱིད་ཀྱི་དུས། །ཟླ་བ་གསུམ་ནི་དབྱར་ཞེས་བྱ། །ཟསལ་བ་གསུམ་ནི་སྟོན་གྱི་ཕྱོགས། །ཟླ་བ་གསུམ་ནི་དགུན་ཞེས་བྱ། །འདི་ནི་ལོ་གཅིག་ལས་བརྩམས་པས། །གསུམ་གསུམ་སོ་སོར་བཤད་པར་བྱ། །གཉིས་གཉིས་དུས་ཚིགས་གཅིག་བྱས་ན། །ལོ་གཅིག་དུས་ནི་དྲུག་ཏུ་འགྱུར། །དང་པོ་གཉིས་ནི་མེ་ཏོག་དུས། །གསུམ་དང་བཞི་པ་ཚ་བའི་དུས། །ལྔ་དང་དྲུག་པ་ཆར་པའི་དུས། །བདུན་དང་བརྒྱད་པ་སྟོན་གྱི་དུས། །དགུ་དང་བཅུ་པ་གྲང་བའི་དུས། །ཕྱི་མ་གཉིས་ནི་ཁ་བའི་དུས། །དེ་ལྟར་བྱེ་བྲག་ཤེས་གྱུར་ན། །འགལ་བ་མེད་པར་སྨན་གཏང་བྱ། །དུས་ནི་འདི་དག་རྗེས་མཐུན་པར། །ཟས་སྐོམ་ལེགས་པར་སྦྱོར་བྱེད་ན། ལྟོར་ནི་མྱུར་དུ་འཇུ་འགྱུར་བས། །ནད་མང་དག་ནི་སྐྱེ་མི་འགྱུར། །དུས་ཚིགས་གལ་ཏེ་ལོག་འགྱུར་ཞིང་། །འབྱུང་ཆེན་བཞི་ནི་འཕོས་གྱུར་ན། །དེ་ཚེ་གསོས་སྨན་མེད་གྱུར་ན། །ངེས་པར་ནད་ཀྱི་སྡུག་བསྔལ་སྐྱེ། །སྨན་པས་དུས་བཞི་ཤེས་བྱ་ཞིང་། དུས་ཚིགས་དྲུག་ཀྱང་ཤེས་པར་བྱ། །ལུས་ཀྱི་ཁམས་བདུན་རིག་བྱས་ནས། །འགལ་བ་མེད་པར་ཟས་སྨན་གཏོང་། །རོ་ཡི་ཁམས་དང་ཁྲག་དང་ཤ །རུས་དང་རྐང་དང་ཀླད་རྒྱས་སུ། །ནད་ནི་འདི་དག་ཞུགས་པའི་ཚེ། །གསོར་རུང་མི་རུང་ཤེས་པར་བྱ། །ནད་ནི་ཐ་དད་རྣམ་བཞི་ཡོད། །རླུང་དང་མཁྲིས་པ་བད་ཀན་དང་། །ཀུན་འདུས་པ་ཡི་ནད་ཡིན་ཏེ། །གཡོ་བའི་དུས་ནི་ཤེས་པར་བྱ། །དཔྱིད་ཀའི་དུས་སུ་བད་ཀན་གཡོ། །དབྱར་ནི་རླུང་ནད་སྐྱེ་བར་འགྱུར། །སྟོན་གྱི་དུས་སུ་མཁྲིས་པ་རྒྱས། །དགུན་ནི་གསུམ་པོ་ཅིག་ཅར་ལྡང་། །དཔྱིད་ནི་ཚ་རྩུབ་དྲོ་བ་བཟའ། །དབྱར་ནི་སྣུམ་དྲོ་ལན་ཚྭ་སྐྱུར། །སྟོན་ནི་གྲང་དང་མངར་དང་སྣུམ། །དགུན་ནི་རྩུབ་སྐྱུར་སྣུམ་དང་མངར། །དུས་ནི་བཞི་པོ་འདི་དག་ཏུ། སྨན་དང་ཟས་སྐོམ་གང་བཟའ་བ། །གལ་ཏེ་དེ་བཞིན་ཟ་བྱེད་ན། །ནད་མང་དག་ནི་སྐྱེ་མི་འགྱུར། །ཟོས་འོག་ན་བ་བད་ཀན་དབང་། །ཞུ་ཚེ་ན་བ་མཁྲིས་ལས་གྱུར། །ཞུ་འོག་ལྡང་བ་རླུང་གི་དབང་། །དུས་དང་སྦྱར་ནས་ནད་ཤེས་བྱ། །ནད་ཀྱི་རྩ་བ་ཤེས་གྱུར་ནས། །ནད་ནི་ཇི་བཞིན་སྨན་གཏང་བྱ། །ནད་དབྱིབས་བྱེ་བྲག་ཐ་དད་ཀྱང་། །སྔར་ནི་རྩ་བ་ཤེས་པར་བྱ། །རླུང་ནད་དག་ལ་སྣུམ་བག་གཏང་། །མཁྲིས་པའི་ནད་ནི་འཁྲུ་ན་བཟང་། །བད་ཀན་ནད་ནི་སྐྱུག་པར་བྱ། །ཀུན་འདུས་ལ་ནི་སྨན་གསུམ་དགོས། །རླུང་མཁྲིས་བད་ཀན་གསུམ་ལྡན་པ། །དེ་ནི་ཀུན་འདུས་པ་ཞེས་བྱ། །ནད་ལྡང་དུས་ནི་ཤེས་གྱུར་ཀྱང་། །རང་བཞིན་དག་ནི་ཤེས་པར་བྱ། །དེ་ལྟར་བརྟགས་ཏེ་ཤེས་གྱུར་ནས། །དུས་བཞིན་དུ་ནི་སྨན་གཏང་བྱ། །ཟས་སྐོམ་སྨན་ནི་འགལ་མེད་པ། །དེ་ནི་སྨན་པ་མཁས་ཞེས་བྱ། །ཤེས་པའི་ཡན་ལག་བརྒྱད་རིག་ན། །སྨན་དཔྱད་རྣམས་ནི་ཀུན་བསྡུད་པས། །འདི་དག་ལ་ནི་གསལ་བྱས་ནས། །སེམས་ཅན་ནད་ནི་གསོ་བར་བྱ། །གཏར་བ་དང་ནི་རྨས་སྣད་དང་། །ལུས་ཀྱི་ནད་དང་འདྲེ་གདོན་དང་། །མ་རུངས་དུག་དང་བྱིས་པ་དང་། །ཚེ་བསྲིང་དང་ནི་མཐུ་སྐྱེད་ཡིན། །སྔར་ནི་དེ་ཡི་ཁ་དོག་དང་། །སྨྲ་ཚིག་རང་བཞིན་རབ་བརྟགས་ནས། །དེ་འོག་རྨི་ལམ་དྲིས་གྱུར་ན། །རླུང་མཁྲིས་བད་ཀན་བྱེ་བྲག་ཤེས། །སྐེམ་རིད་མགོ་ཡི་སྐྲ་ངན་ཅིང་། །སེམས་ཀྱི་རང་བཞིན་མི་བརྟན་ལ། །ཚིག་མང་རྨི་ལམ་འཕུར་མཐོང་བ། །དེ་ནི་རླུང་གི་རང་བཞིན་ཅན། །གཞོན་ནུར་སྐྲ་དཀར་སྐྱེ་བ་དང་། །རྔུལ་ཆེ་གཤེར་བ་མང་བ་དང། །ཡིད་གཞུངས་རྨི་ལམ་མེ་མཐོང་བ། །དེ་ནི་མཁྲིས་པའི་རང་བཞིན་ཅན། །སེམས་བརྟན་ལུས་ནི་མཉམ་ལ་དྲང་། །ཞིབ་རྟོག་མགོ་དག་སྣུམ་ཞིང་རླན། །རྨི་ལམ་ཆུ་དང་རྫས་དཀར་མཐོང་། །བད་ཀན་རང་བཞིན་ཤེས་པར་བྱ། །ཀུན་འདུས་རང་བཞིན་ཀུན་ལྡན་པས། །ཁ་ཅིག་གཉིས་དང་གསུམ་དང་ལྡན། །ཕྱོགས་གཅིག་ལྷག་པར་གང་མང་བ། །དེ་ཡི་རང་བཞིན་ཤེས་པར་བྱོས། །རང་བཞིན་རིག་པར་གྱུར་ནས་ནི། །ནད་བཞིན་སྨན་ནི་གཏང་བར་བྱ། །འཆི་བའི་མཚན་མ་མེད་གྱུར་ན། །མི་དེ་གསོར་རུང་བ་ཞེས་བྱ། །དབང་པོས་ལོག་པར་ཡུལ་འཛིན་ཅིང་། །བླ་མ་སྨན་པ་དག་ལ་བརྙས། །ཉེ་དུ་དག་ལ་ཁོང་ཁྲོ་ན། །འཆི་བའི་མཚན་མར་ཤེས་པར་བྱ། །མིག་ཡོན་ཁ་དོག་དཀར་འགྱུར་ཞིང་། །ལྕེ་གནག་སྣ་ཟུར་ཡོ་བ་དང་། །རྣ་བའི་འཁོར་ལོ་སྔོ་ལས་གྱུར། །མ་མཆུ་ཐུར་འཕྱང་འཆི་བའི་མཚན། །ཨ་རུ་ར་ནི་རྣམ་གཅིག་ལ། །རོ་ནི་རྣམ་པ་དྲུག་ལྡན་ཏེ། །ནད་ནི་ཐམས་ཅད་སེལ་བྱེད་པས། །ཉེས་མེད་སྨན་རྣམས་ཀུན་གྱི་རྒྱལ། །འབྲས་བུ་གསུམ་དང་ཚ་བ་གསུམ། །སྨན་རྣམས་ནང་ན་རྙེད་པར་སླ། །བུ་རམ་སྦྲང་རྩི་འོ་མ་མར། །འདི་དག་ནད་མང་གསོ་བར་ནུས། །དེ་ལས་གཞན་པའི་སྨན་རྣམས་ནི། །ནད་དང་སྦྱར་ཏེ་བསྐྱེད་པར་བྱ། །སྔར་ནི་བརྩེ་བའི་སེམས་བསྐྱེད་ནས། །ནོར་དང་ཁེ་ལ་བལྟ་མི་བྱ། །ངས་ནི་ཁྱོད་ལ་ནད་གསོ་བའི། །གཅེས་པའི་དོན་ནི་བསྟན་པ་ཡིན། །འདི་ཡིས་སེམས་ཅན་གསོ་བྱས་ན། །འཐའ་མེད་འབྲས་བུ་ཐོབ་པར་འགྱུར། །རིགས་ཀྱི་ལྷ་མོ་དེ་ནས་ཚོང་དཔོན་གྱི་བུ་ཆུ་འབེབས་ཕ་ལས་མངོན་སུམ་དུ་ཤེས་པའི་ཡན་ལག་བརྒྱད་ཀྱི་དོན་ཤེས་པ་དང་། འབྱུང་བ་ཆེན་པོ་བཞི་འཕེལ་ཞིང་འགྲིབ་པ་དང་། དུས་ཚིགས་མི་མཐུན་པ་དང་། སྨན་དཔྱད་ཀྱི་ཆོ་ག་ཐོས་པས་ལེགས་པར་ཁོང་དུ་ཆུད་པར་གྱུར་ནས། བདག་ཉིད་ནད་མང་པོ་གསོ་ནུས་པར་རིག་པར་གྱུར་པས་གྲོང་དང་། གྲོང་ཁྱེར་དང་། གྲོང་རྡལ་ཀུན་དུ་ཁྱབ་པར་དེ་དང་དེ་དག་ཏུ་སོང་སྟེ། ནད་ཀྱི་སྡུག་བསྔལ་དང་ལྡན་པའི་སེམས་ཅན་འབུམ་ཕྲག་བརྒྱ་སྟོང་དུ་མ་དེའི་ཐད་དུ་ལྷགས་པ་རྣམས་ལ་ལེགས་པའི་ཚིག་གིས་སྤྲོ་བ་བསྐྱེད་ནས་འདི་སྐད་དུ་ང་ནི་སྨན་པའོ། །ང་ནི་སྨན་པ་སྟེ། སྨན་དཔྱད་ལ་ཤིན་ཏུ་མཁས་པས་དེང་ཁྱེད་ཅག་གི་ནད་མང་པོ་གསོས་ནས་ཐམས་ཅད་སོས་པར་བྱའོ་ཞེས་སྨྲས་སོ། །རིགས་ཀྱི་ལྷ་མོ་དེའི་ཚེ་མི་མང་པོ་རྣམས་ཚོང་དཔོན་གྱི་བུས་ལེགས་པའི་ཚིག་གིས་སྤྲོ་བ་བསྐྱེད་ནས་ནད་གསོ་བར་གནང་བ་ཐོས་པ་དང་། དེ་ནས་སེམས་ཅན་ནད་ཚབས་ཆེན་པོས་བཏབ་པ་བརྒྱ་སྟོང་ཚད་མེད་པ་སྙེད་ཅིག་ཚིག་དེ་སྐད་སྨྲས་པ་ཐོས་ནས་ལུས་དང་སེམས་དགའ་མགུ་རངས་ཤིང་ངོ་མཚར་རྨད་དུ་བྱུང་བ་ཐོས་པར་གྱུར་པས་རྒྱུ་དང་རྐྱེན་དེས་ནད་ཀྱི་སྡུག་བསྔལ་ཇི་སྙེད་པ་ཐམས་ཅད་སོས་ཤིང་ཞི་བར་གྱུར་པས་ཉམས་སྟོབས་རྟས་ཏེ་སྔ་མཁོ་བཞིན་དུ་སོས་པར་གྱུར་ཏོ། །རིགས་ཀྱི་ལྷ་མོ་དེའི་ཚེ་གཞན་ཡང་ནད་ཀྱི་སྡུག་བསྔལ་ཤིན་ཏུ་ལྕི་ཞིང་གསོ་བར་དཀའ་བའི་སེམས་ཅན་བརྒྱ་སྟོང་ཚད་མེད་པ་རྣམས་ཀྱང་ལྷན་ཅིག་ཏུ་ཚོང་དཔོན་གྱི་བུའི་ཐད་དུ་ལྷགས་ནས་ནད་གསོ་བར་གསོལ་བ་བཏབ་པ་དང་། དེའི་ཚེ་ཚོང་དཔོན་གྱི་བུས་སྨན་གྱ་ནོམ་པ་དག་བཏང་ནས་ཐམས་ཅད་སོས་པར་གྱུར་ཏེ། རིགས་ཀྱི་ལྷ་མོ་དེའི་ཚེ་ཚོང་དཔོན་གྱི་བུ་དེས་ཡུལ་ཁམས་དེ་ཀུན་གྱི་ནད་ཀྱི་སྡུག་བསྔལ་གྱིས་ཉེན་པའི་སེམས་ཅན་བྱེ་བ་ཁྲག་ཁྲིག་བརྒྱ་སྟོང་དུ་མ་སོས་པར་བྱས་སོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་ནད་རབ་ཏུ་ཞི་བར་བྱས་པའི་ལེའུ་སྟེ་ཉི་ཤུ་བཞི་པའོ།། །།

- བཀའ་འགྱུར། རྒྱུད།

འཕགས་པ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ཞེས་བྱ་བ་ཐེག་པ་ཆེན་པོའི་མདོ་ལས།

ནད་རབ་ཏུ་ཞི་བར་བྱ་བའི་ལེའུ་ཞེས་བྱ་བ་བཅུ་དྲུག་པ།

རིགས་ཀྱི་ལྷ་མོ་སྔོན་བྱུང་བ་འདས་པའི་དུས་བསྐལ་པ་གྲངས་མེད་པའི་ཡང་ཆེས་གྲངས་མེད་པ་རྒྱས་པ་བསམ་གྱིས་མི་ཁྱབ་པ་ཚད་མེད་པར་གྱུར་པ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རིན་ཆེན་གཙུག་ཏོར་ཅན་ཞེས་བྱ་བ་འཇིག་རྟེན་དུ་བྱུང་ངོ་། །རིགས་ཀྱི་ལྷ་མོ་དེའི་ཚེ་དེའི་དུས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་དེ་ཡོངས་སུ་མྱ་ངན་ལས་འདས་ནས་དམ་པའི་ཆོས་ནུབ་པར་གྱུར་ཏེ་དམ་པའི་ཆོས་ལྟར་བཅོས་པར་གྱུར་པ་ན་རྒྱལ་པོ་ལྷའི་དབང་ཕྱུག་འོད་ཅེས་བྱ་བ་ཆོས་ཅན་ཆོས་ཀྱི་རྒྱལ་པོ་ཆོས་ཀྱི་རྒྱལ་སྲིད་སྐྱོང་གིས་ཆོས་མ་ཡིན་པས་ནི་མ་ཡིན་ཏེ་ཡུལ་ཐམས་ཅད་ན་གནས་པའི་སེམས་ཅན་རྣམས་ཀྱི་ཕ་མ་ལྟ་བུར་གྱུར་པ་ཞིག་བྱུང་ངོ་། །རིགས་ཀྱི་ལྷ་མོ་དེའི་ཚེ་དེའི་དུས་ན། རྒྱལ་པོ་ལྷའི་དབང་ཕྱུག་འོད་ཀྱི་ཡུལ་དུ་ཚོང་དཔོན་རལ་པ་འཛིན་ཅེས་བྱ་བ་སྨན་པ་གསོ་བར་བྱེད་པ། ཁམས་ལ་མཆོག་ཏུ་མཁས་པ། ཚེའི་རིག་བྱེད་ཡན་ལག་བརྒྱད་ཀྱི་རྒྱུད་དང་ལྡན་པ་ཞིག་བྱུང་བར་གྱུར་ཏོ། །ཀྱེ་རིགས་ཀྱི་ལྷ་མོ་དེའི་ཚེ་དེའི་དུས་ན་ཚོང་དཔོན་རལ་པ་འཛིན་ཅེས་བྱ་བ་དེའི་བུ་ཆུ་འབེབས་ཞེས་བྱ་བ། གཟུགས་བཟང་བ། མཛེས་པ་བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ། བསྟན་བཅོས་སྣ་ཚོགས་ལ་མཁས་པ། བསྟན་བཅོས་ཐམས་ཅད་རྟོགས་པར་ཁོང་དུ་ཆུད་པ། ཡི་གེ་དང་གྲངས་དང་ལག་རྩིས་དང་། རྩིས་རྣམས་ཤིན་ཏུ་བསླབས་པར་གྱུར་པ་ཞིག་བྱུང་ངོ་། །རིགས་ཀྱི་ལྷ་མོ་དེའི་ཚེ་དེའི་དུས་ན་རྒྱལ་པོ་ལྷའི་དབང་ཕྱུག་འོད་དེའི་ཡུལ་དེ་ན་སེམས་ཅན་བརྒྱ་སྟོང་ཕྲག་དུ་མ་ནད་སྣ་ཚོགས་ཀྱིས་བཏབ་པར་གྱུར་ཅིང་། ནད་སྣ་ཚོགས་ཀྱིས་ཡོངས་སུ་གཟིར་ཏེ། སྡུག་བསྔལ་མི་བཟད་པ་རྩུབ་པ་དྲག་པ་ཡིད་དུ་མི་འོང་བའི་ཚོར་བ་རྣམས་མྱོང་བར་གྱུར་ཏོ། །རིགས་ཀྱི་ལྷ་མོ་དེའི་ཚེ་དེའི་དུས་ན་ཚོང་དཔོན་གྱི་བུ་ཆུ་འབེབས་དེ། སེམས་ཅན་ནད་སྣ་ཚོགས་ཀྱིས་བཏབ་པ། ནད་སྣ་ཚོགས་ཀྱིས་གཟིར་བ། བརྒྱ་སྟོང་ཕྲག་དུ་མ་དེ་དག་གི་དོན་གྱི་ཕྱིར། སྙིང་རྗེ་ཆེན་པོའི་སེམས་སྐྱེས་པར་གྱུར་ཏོ། །སེམས་ཅན་བརྒྱ་སྟོང་ཕྲག་དུ་མ་དེ་དག་ནི་ནད་སྣ་ཚོགས་ཀྱིས་བཏབ་ཅིང་ནད་སྣ་ཚོགས་ཀྱིས་གཟིར་བ། དེ་ལྟར་སྡུག་བསྔལ་མི་བཟད་པ་རྩུབ་པ་དྲུག་པོ་ཡིད་དུ་མི་འོང་བའི་ཚོར་བ་རྣམས་མྱོང་ལ། བདག་གི་ཕ་ཚོང་དཔོན་རལ་པ་འཛིན་སྨན་པ་གསོ་བོར་བྱེད་པ། ཁམས་ལ་མཆོག་ཏུ་མཁས་པ། ཚེའི་རིག་བྱེད་ཡན་ལག་བརྒྱད་ཀྱི་རྒྱུད་དང་ལྡན་པ་འདི་ནི་རྒས་འཁོགས་གཏུགས་ལམ་དུ་ཞུགས། ན་ཚོད་རྗེས་སུ་ཐོབ་པ། འཁར་བ་ལ་བརྟེན་ཅིང་འདར་ཏེ། གྲོང་དང་། གྲོང་ཁྱེར་དང་། གྲོལ་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་རྣམས་སུ་འགྲོ་མི་ནུས་ན། སེམས་ཅན་ནད་སྣ་ཚོགས་ཀྱིས་བཏབ་པ། ནད་སྣ་ཚོགས་ཀྱིས་གཟིར་བ་བརྒྱ་སྟོང་ཕྲག་དུ་མ་དེ་དག་ནད་སྣ་ཚོགས་ལས་ཡོངས་སུ་ཐར་བར་བྱ་བའི་ཕྱིར། བདག་ཉིད་བདག་གི་ཕ་རལ་པ་འཛིན་གྱི་གན་དུ་སོང་ལ་ནད་ཀྱི་ཕྱིར་ཁམས་ལ་མཁས་པར་བྱ་བ་ཡོངས་སུ་དྲིས་ཏེ། ཁམས་ལ་མཁས་པར་བྱ་བ་དྲིས་པ་དེས་བདག་གྲོང་དང་། གྲོང་ཁྱེར་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་རྣམས་སུ་འགྲོ་བར་བྱའོ། །སོང་ནས་ཀྱང་སེམས་ཅན་ནད་སྣ་ཚོགས་ཀྱིས་བཏབ་པ། ནད་སྣ་ཚོགས་ཀྱིས་གཟིར་བ། བརྒྱ་སྟོང་ཕྲག་དུ་མ་དག་ནད་སྣ་ཚོགས་ལས་ཡོངས་སུ་ཐར་བར་བྱའོ་སྙམ་ནས། རིགས་ཀྱི་ལྷ་མོ་དེའི་ཚེ་དེའི་དུས་ན། ཚོང་དཔོན་གྱི་བུ་ཆུ་འབེབས་རང་གི་ཕ་རལ་པ་འཛིན་ག་ལ་བ་དེར་སོང་སྟེ། ཕྱིན་ནས། རང་གི་ཕ་རལ་པ་འཛིན་གྱི་རྐང་པ་ལ་མགོ་བོས་ཕྱག་འཚལ་ཏེ་ཐལ་མོ་སྦྱར་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ཀྱང་ཚོང་དཔོན་གྱི་བུ་ཆུ་འབེབས་ཀྱིས་རང་གི་ཕ་རལ་པ་འཛིན་ལ་ཚིགས་སུ་བཅད་པ་འདི་དག་གིས་ཁམས་ལ་མཁས་པར་བྱ་བ་དྲིས་པ།

ཇི་ལྟར་དབང་པོ་འཛིན་འགྱུར་ཞིང་། །ཁམས་ཀྱི་རྣམས་ཀྱང་ཡོངས་སུ་འགྱུར། །གང་གི་དུས་ན་ལུས་ཅན་ལ། །ནད་ཀྱི་རྣམས་ནི་འབྱུང་བར་འགྱུར། །དུས་དང་དུས་མིན་ཟས་ཟོས་པ། །ཇི་ལྟ་བུར་ན་བདེ་བར་འགྱུར། །གང་གི་ལུས་ཀྱི་ནང་དུ་ནི། །ལུས་ཀྱི་མི་ལ་གནོད་མི་འགྱུར། །རླུང་ལས་གྱུར་དང་མཁྲིས་གྱུར་དང་། །འདུས་ལས་གྱུར་དང་བད་ཀན་གྱུར། །ནད་རྣམས་ཞི་བར་བགྱི་སླད་དུ། །ཇི་ལྟ་བུར་ནི་གསོ་བར་བགྱི། །གང་གིས་མི་ལ་གནོད་འགྱུར་བའི། །རླུང་ནི་གང་གི་དུས་ན་གཡོ། །གང་གི་དུས་ན་མཁྲིས་པ་གཡོ། །བད་ཀན་གང་གི་དུས་ན་གཡོ། །དེ་ནས་ཚོང་དཔོན་རལ་པ་འཛིན་གྱིས་བུ་ཆུ་འབེབས་ལ་ཚིགས་སུ་བཅད་པ་འདི་དག་གིས་ཁམས་ལ་མཁས་པར་བྱ་བ་རྣམ་པར་བསྟན་ཏོ། །ཟླ་གསུམ་དབྱར་ཏེ་ཟླ་གསུམ་སྟོན་དུ་ཤེས། །གསུམ་ནི་དགུན་ཏེ་གསུམ་ནི་དཔྱིད་ཡིན་ནོ། །དེ་ལྟར་ཟླ་བའི་གོ་རིམས་དུས་ནི་དྲུག །ལོ་གཅིག་ལ་ནི་ཟླ་བ་བཅུ་གཉིས་འདོད། །གསུམ་གསུམ་དུ་ནི་ཚིགས་རྣམས་བསྡུས་པར་ཤེས། །ཟླ་བ་གཉིས་གཉིས་ཤིང་ནི་དུས་སུ་བསྟན། །ཟས་དང་སྐོམ་ནི་དེ་ལྟར་འཇུ་བར་འགྱུར། །སྨན་པ་དང་ནི་ཁམས་དང་དུས་ཀྱང་བསྟན། །དབང་པོ་དང་ནི་ཁམས་རྣམས་དེ་དག་ཀྱང་། །ལོ་གཅིག་ནང་གི་ཚིགས་ཚིགས་ཡོངས་སུ་འགྱུར། །དབང་པོ་དག་ནི་ཡོངས་སུ་འགྱུར་བ་ན། །ལུས་ཅན་རྣམས་ལ་སྣ་ཚོགས་ནད་ཀྱང་འབྱུང་། །དེ་ཉིད་ལ་ནི་སྨན་པས་ཟླ་གསུམ་བཞི། །ཚིགས་ཀྱི་བར་དང་དུས་དྲུག་རྣམས་དང་ནི། །ཁམས་དྲུག་མཁས་པར་བྱ་བ་ཤེས་པར་བྱ། །ཟས་སྐོམ་སྨན་རྣམས་གོ་རིམས་ཇི་བཞིན་ཏེ། །རླུང་གི་ཤས་ཆེའི་ནད་ནི་དབྱར་ན་ལྡང་། །སྟོན་དུ་གྱུར་པ་ན་ནི་མཁྲིས་པ་གཡོ། །དགུན་གྱི་དུས་ན་དེ་བཞིན་འདུས་པ་སྟེ། །བད་ཀན་ཤས་ཆེའི་ནད་ནི་དཔྱིད་ན་ལྡང་། །དབྱར་ནི་སྣུམ་དྲོ་ལན་ཚྭ་སྐྱུར་བའི་རོ། །སྟོན་ནི་མངར་དང་སྣུམ་དང་བསིལ་བག་གོ །དགུན་ནི་མངར་དང་སྣུམ་དང་སྐྱུར་བ་སྟེ། །དཔྱིད་ཀྱི་དུས་ན་རྩུབ་དྲོ་ཚ་བའོ། །བད་ཀན་ཆེ་བ་ཟོས་མ་ཐག་ཏུ་ལྡང་། །མཁྲིས་པ་ཆེ་བ་འཇུ་བའི་དུས་ན་ལྡང་། །རླུང་ཤས་ཆེ་བ་ཞུ་མ་ཐག་ཏུ་ལྡང་། །ཁམས་གསུམ་གཡོ་བ་དེ་ནི་དེ་ལྟའོ། །རླུང་གི་བདག་ཉིད་ལ་ནི་བཅུད་ཀྱིས་གསོ། །བཀྲུ་སྨན་གྱིས་ནི་མཁྲིས་པ་བསལ་བར་བྱ། །འདུས་པ་ལ་ནི་གསུམ་དང་མཐུན་ལྡན་པ། །བད་ཀན་ཚིགས་སུ་བབས་ན་སྐྱུགས་སྨན་གཏང་། །རླུང་ཤས་ཆེ་དང་མཁྲིས་དང་འདུས་པ་དང་། །བད་ཀན་ཤས་ཆེའི་ཚིགས་རྣམས་ཤེས་པར་བྱ། །དུས་གང་ཁམས་གང་ལུས་ནི་གང་ཡིན་པ། །དེ་ཡི་སྨན་དང་བཟའ་བཏུང་བསྟེན་པར་བྱ། །དེ་ནས་ཚོང་དཔོན་གྱི་བུ་ཆུ་འབེབས་ཀྱིས་ཁམས་ལ་མཁས་པར་བྱ་བ་འདི་ལྟ་བུ་དེ་ཙམ་ཞིག་ཡོངས་སུ་དྲིས་པ་དེས། །ཚེའི་རིག་བྱེད་ཀྱི་ཡན་ལག་བརྒྱད་པོ་ཐམས་ཅད་ཁོང་དུ་ཆུད་པར་གྱུར་ཏོ། །རིགས་ཀྱི་ལྷ་མོ་དེའི་ཚེ་དེའི་དུས་ན། ཚོང་དཔོན་གྱི་བུ་ཆུ་འབེབས་རྒྱལ་པོ་ལྷའི་དབང་ཕྱུག་འོད་ཀྱི་ཡུལ་ན་གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་དེ་ཐམས་ཅད་དུ་སོང་ནས། སེམས་ཅན་ནད་སྣ་ཚོགས་ཀྱིས་བཏབ་པ། ནད་སྣ་ཚོགས་ཀྱིས་གཟིར་བ། བརྒྱ་སྟོང་ཕྲག་དུ་མ་དེ་དག་ལ་ཁོ་བོ་ནི་སྨན་པའོ། །ཁོ་བོ་ནི་སྨན་པའོ་ཞེས་བདག་ཉིད་ཀྱིས་ཁས་འཆེས་ཏེ། ཁོ་བོས་ཁྱེད་རྣམས་ནད་སྣ་ཚོགས་ལས་ཡོངས་སུ་ཐར་བར་བྱའོ་ཞེས་དབུགས་ཕྱུང་ངོ་། །རིགས་ཀྱི་ལྷ་མོ་ཚོང་དཔོན་གྱི་བུ་ཆུ་འབེབས་ཀྱིས། འདི་ལྟ་བུའི་ཚིག་བརྗོད་པ་དེ་ཐོས་མ་ཐག་ཏུ་སྲོག་ཆགས་བརྒྱ་སྟོང་ཕྲག་དུ་མ་དེ་དག་ཐམས་ཅད་རབ་ཏུ་དགའ་བ་ཆེན་པོ་སྐྱེས་པར་གྱུར་ཏོ། །དབུགས་ཕྱིན་པ་རྙེད་ནས་ཀྱང་དགའ་བ་དང་བདེ་བ་དང་ཡིད་བདེ་བ་བསམ་གྱིས་མི་ཁྱབ་པ་དང་ལྡན་པར་གྱུར་ཏོ། །དེའི་ཚེ་དེའི་དུས་ན་སེམས་ཅན་ནད་སྣ་ཚོགས་ཀྱིས་བཏབ་པ་ནད་སྣ་ཚོགས་ཀྱིས་གཟིར་བ་བརྒྱ་སྟོང་ཕྲག་དུ་མ་དེ་དག་ནད་སྣ་ཚོགས་ལས་ཡོངས་སུ་ཐར་ཏེ་ནད་མེད་པར་གྱུར་ཏོ། །ནད་མེད་པར་གྱུར་ནས་ཀྱང་སྔ་མཁོ་བཞིན་དུ་མཐུ་དང་སྟོབས་དང་བརྩོན་འགྲུས་དང་ལྡན་པར་གྱུར་ཏོ། །དེའི་ཚེ་དེའི་དུས་ན་སེམས་ཅན་ནད་སྣ་ཚོགས་ཀྱིས་བཏབ་པ་ནད་སྣ་ཚོགས་ཀྱིས་གཟིར་བ་བརྒྱ་སྟོང་ཕྲག་དུ་མ་དེ་དག་གི་ནང་ནས་གང་སུ་དག་ནད་དྲག་པོས་བཏབ་པ་དེ་དག་ཐམས་ཅད་ཚོང་དཔོན་གྱི་བུ་ཆུ་འབེབས་ག་ལ་བ་དེར་དོང་ནས་ཕྱིན་པ་དང་། སེམས་ཅན་ནད་སྣ་ཚོགས་ཀྱིས་བཏབ་པ། ནད་སྣ་ཚོགས་ཀྱིས་གཟིར་བ་བརྒྱ་སྟོང་ཕྲག་དུ་མ་དེ་དག་ལ་ཚོང་དཔོན་གྱི་བུ་ཆུ་འབེབས་ཀྱིས་སྨན་དཔྱད་གང་ཅི་བསྟན་པ་དེས། སེམས་ཅན་དེ་དག་ཐམས་ཅད་ཀྱི་ནད་ཐམས་ཅད་རབ་ཏུ་ཞི་བར་བྱས་སོ། །ནད་མེད་པ་དང་ནད་ཉུང་བར་གྱུར་ནས་ཀྱང་སྔ་མཁོ་བཞིན་དུ་མཐུ་དང་སྟོབས་དང་བརྩོན་འགྲུས་དང་ལྡན་པར་གྱུར་ཏོ། །རིགས་ཀྱི་ལྷ་མོ་དེའི་ཚེ་དེའི་དུས་ན་རྒྱལ་པོ་ལྷའི་དབང་ཕྱུག་འོད་ཀྱི་ཡུལ་ན་གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་ཐམས་ཅད་ན་སེམས་ཅན་ནད་སྣ་ཚོགས་ཀྱིས་བཏབ་པ། ནད་སྣ་ཚོགས་ཀྱིས་གཟིར་བ། བརྒྱ་སྟོང་ཕྲག་དུ་མ་དེ་དག་ཐམས་ཅད་ཚོང་དཔོན་གྱི་བུ་ཆུ་འབེབས་ཀྱིས་ནད་སྣ་ཚོགས་ལས་ཡོངས་སུ་ཐར་བར་བྱས་པར་གྱུར་ཏོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། ནད་རབ་ཏུ་ཞིབ་བར་བྱ་བའི་ལེའུ་ཞེས་བྱ་བ་སྟེ་བཅུ་དྲུག་པའོ།། །།

- བཀའ་འགྱུར། རྒྱུད།

འཕགས་པ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ཞེས་བྱ་བ་ཐེག་པ་ཆེན་པོའི་མདོ་ལས།

ནད་ཐམས་ཅད་རབ་ཏུ་ཞི་བར་བྱས་པའི་ལེའུ་སྟེ་ཉི་ཤུ་རྩ་བཞི་པ།

རིགས་ཀྱི་ལྷ་མོ་སྔོན་གྱི་སྨོན་ལམ་དེ་དག་གང་ཞེ་ན། རིགས་ཀྱི་ལྷ་མོ་སྔོན་བྱུང་བ་འདས་པའི་དུས་ན། བསྐལ་བ་གྲངས་མེད་པའི་ཡང་ཆེས་གྲངས་མེད་པ་རྒྱས་པ་བསམ་གྱིས་མི་ཁྱབ་པ། ཚད་མེད་པར་གྱུར་པ་དེའི་ཚེ། དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རིན་ཆེན་གཙུག་ཏོར་ཅན་ཞེས་བྱ་བ་འཇིག་རྟེན་དུ་བྱུང་ངོ་། །རིགས་ཀྱི་ལྷ་མོ་དེའི་ཚེ་དེའི་དུས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་དེ་ཡོངས་སུ་མྱ་ངན་ལས་འདས་ནས། དམ་པའི་ཆོས་ནུབ་པར་གྱུར་ཏེ། དམ་པའི་ཆོས་ལྟར་བཅོས་པར་གྱུར་པ་ན། རྒྱལ་པོ་ལྷའི་དབང་ཕྱུག་འོད་ཅེས་བྱ་བ། ཆོས་ཅན་ཆོས་ཀྱི་རྒྱལ་པོ། ཆོས་ཀྱིས་རྒྱལ་སྲིད་སྐྱོང་གི །ཆོས་མ་ཡིན་པས་མ་ཡིན་ཏེ། ཡུལ་ཐམས་ཅད་ན་གནས་པའི་སེམས་ཅན་རྣམས་ཀྱི་ཕ་མ་ལྟ་བུར་གྱུར་པ་ཞིག་བྱུང་ངོ་། །རིགས་ཀྱི་ལྷ་མོ་དེའི་ཚེ་དེའི་དུས་ན། རྒྱལ་པོ་ལྷའི་དབང་ཕྱུག་འོད་ཀྱི་ཡུལ་དུ་ཚོང་དཔོན་རལ་པ་འཛིན་ཅེས་བྱ་བ། སྨན་པ་གསོ་བ་བྱེད་པ་ཁམས་ལ་མཆོག་ཏུ་མཁས་པ་ཚེའི་རིག་བྱེད་ཡན་ལག་བརྒྱད་ཀྱི་རྒྱུད་དང་ལྡན་པ་ཞིག་བྱུང་བར་གྱུར་ཏོ། །ཀྱེ་རིགས་ཀྱི་ལྷ་མོ་དེའི་ཚེ་དེའི་དུས་ན། ཚོང་དཔོན་རལ་པ་འཛིན་ཅེས་བྱ་བ་དེའི་བུ་ཚོང་དཔོན་གྱི་བུ་ཆུ་འབེབས་ཞེས་བྱ་བ། གཟུགས་བཟང་བ། མཛེས་པ། བལྟ་ན་སྡུག་པ། ཁ་དོག་བཟང་པོ། རྒྱས་པ་མཆོག་དང་ལྡན་པ། བསྟན་བཅོས་སྣ་ཚོགས་ལ་མཁས་པ། བསྟན་བཅོས་ཐམས་ཅད་རྟོགས་པར་ཁོང་དུ་ཆུད་པ། ཡི་གེ་དང་། གྲངས་དང་། ལག་རྩིས་དང་། རྩིས་རྣམས་ཤིན་ཏུ་བསླབས་པར་གྱུར་པ་ཞིག་བྱུང་ངོ་། །རིགས་ཀྱི་ལྷ་མོ་དེའི་ཚེ་དེའི་དུས་ན། རྒྱལ་པོ་ལྷའི་དབང་ཕྱུག་འོད་དེའི་ཡུལ་དེ་ན་སེམས་ཅན་འབུམ་ཕྲག་དུ་མ་ནད་སྣ་ཚོགས་ཀྱིས་བཏབ་པར་གྱུར་ཅིང་། ནད་སྣ་ཚོགས་ཀྱིས་ཡོངས་སུ་གཟིར་བར་གྱུར་ཏེ། སྡུག་བསྔལ་མི་བཟད་པ། རྩུབ་པ། དྲག་པོ་ཡིད་དུ་མི་འོང་བའི་ཚོར་བ་རྣམས་མྱོང་བར་གྱུར་ཏོ། །རིགས་ཀྱི་ལྷ་མོ་དེའི་ཚེ་དེའི་དུས་ན། ཚོང་དཔོན་གྱི་བུ་ཆུ་འབེབས་དེ་སེམས་ཅན་ནད་སྣ་ཚོགས་ཀྱིས་བཏབ་པ་ནད་སྣ་ཚོགས་ཀྱིས་གཟིར་བ། འབུམ་ཕྲག་དུ་མ་དེ་དག་གི་དོན་གྱི་ཕྱིར། སྙིང་རྗེ་ཆེན་པོའི་སེམས་སྐྱེས་པར་གྱུར་ཏོ། །སེམས་ཅན་འབུམ་ཕྲག་དུ་མ་དེ་དག་ནི་ནད་སྣ་ཚོགས་ཀྱིས་བཏབ་ཅིང་ནད་སྣ་ཚོགས་ཀྱིས་ཡོངས་སུ་གཟིར་ཏེ། དེ་ལྟར་སྡུག་བསྔལ་མི་བཟད་པ། རྩུབ་པ། དྲག་པོ་ཡིད་དུ་མི་འོང་བའི་ཚོར་བ་རྣམས་མྱོང་ལ། བདག་གི་ཕ་ཚོང་དཔོན་རལ་པ་འཛིན་སྨན་པ་གསོ་བར་བྱེད་པ་ཁམས་ལ་མཆོག་ཏུ་མཁས་པ། ཚེའི་རིག་བྱེད་ཡན་ལག་བརྒྱད་ཀྱི་རྒྱུད་དང་ལྡན་པ་འདི་ནི། རྒས། འཁོགས། གཏུགས། ལམ་དུ་ཞུགས། ན་ཚོད་རྗེས་སུ་ཐོབ་འཁར་བ་ལ་བརྟེན་ཅིང་འདར་ཏེ། གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་རྣམས་སུ་འགྲོ་བར་མི་ནུས་ན། སེམས་ཅན་ནད་སྣ་ཚོགས་ཀྱིས་བཏབ་པ། ནད་སྣ་ཚོགས་ཀྱིས་གཟིར་བ། འབུམ་ཕྲག་དུ་མ་དེ་དག་ནད་སྣ་ཚོགས་ལས་ཡོངས་སུ་ཐར་བར་བྱ་བའི་ཕྱིར། བདག་ཉིད་བདག་གི་ཕ་རལ་པ་འཛིན་གྱི་གན་དུ་སོང་ལ། ནད་ཀྱི་ཕྱིར་ཁམས་ལ་མཁས་པར་བྱ་བ་ཡོངས་སུ་དྲིས་ཏེ། ཁམས་ལ་མཁས་པར་བྱ་བ་དྲིས་པ་དེས་བདག་གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་རྣམས་སུ་འགྲོ་བར་བྱའོ། །སོང་ནས་ཀྱང་སེམས་ཅན་ནད་སྣ་ཚོགས་ཀྱིས་བཏབ་པ། ནད་སྣ་ཚོགས་ཀྱིས་གཟིར་བ་འབུམ་ཕྲག་དུ་མ་དག་ནད་སྣ་ཚོགས་ལས་ཡོངས་སུ་ཐར་བར་བྱའོ་སྙམ་ནས་རིགས་ཀྱི་ལྷ་མོ་དེའི་ཚེ་དེའི་དུས་ན། ཚོང་དཔོན་གྱི་བུ་ཆུ་འབེབས་རང་གི་ཕ་རལ་པ་འཛིན་ག་ལ་བ་དེར་སོང་སྟེ། ཕྱིན་ནས་རང་གི་ཕ་རལ་པ་འཛིན་གྱི་རྐང་པ་ལ་མགོ་བོས་ཕྱག་འཚལ་ཏེ། ཐལ་མོ་སྦྱར་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ཀྱང་། ཚོང་དཔོན་གྱི་བུ་ཆུ་འབེབས་ཀྱིས་རང་གི་ཕ་རལ་པ་འཛིན་ལ་ཚིགས་སུ་བཅད་པ་འདི་དག་གིས་ཁམས་ལ་མཁས་པར་བྱ་བ་དྲིས་པ།

ཇི་ལྟར་དབང་པོ་འཇིག་འགྱུར་ཞིང་། །ཁམས་རྣམས་ཀྱང་ནི་ཡོངས་སུ་འགྱུར། །གང་གི་དུས་ན་ལུས་ཅན་ལ། །ནད་ཀྱི་རིགས་རྣམས་འབྱུང་བར་འགྱུར། །དུས་དང་དུས་མིན་ཟས་ཟོས་པ། །ཇི་ལྟ་བུར་ན་བདེ་བར་འགྱུར། །གང་གི་ལུས་ཀྱི་ནང་དུ་ནི། །ལུས་ཀྱི་མི་ལ་གནོད་མི་འགྱུར། །རླུང་ལས་གྱུར་དང་མཁྲིས་གྱུར་དང་། །འདུས་ལས་གྱུར་དང་བད་ཀན་གྱུར། །ནད་རྣམས་ཞི་བར་བགྱི་སླད་དུ། །ཅི་ལྟ་བུར་ནི་གསོ་བར་བགྱི། །གང་གིས་མི་ལ་གནོད་འགྱུར་བའི། །རླུང་ནི་གང་གི་དུས་ན་གཡོ། །གང་གི་དུས་ན་མཁྲིས་པ་གཡོ། །བད་ཀན་གང་གི་དུས་ན་གཡོ། །དེ་ནས་ཚོང་དཔོན་རལ་པ་འཛིན་གྱིས་ཚོང་དཔོན་གྱི་བུ་ཆུ་འབེབས་ལ། །ཚིགས་སུ་བཅད་པ་འདི་དག་གིས་ཁམས་ལ་མཁས་པར་བྱ་བ་རྣམ་པར་བསྟན་ཏོ། །ཟླ་གསུམ་དབྱར་ཏེ་ཟླ་གསུམ་སྟོན་དུ་ཤེས། །གསུམ་ནི་དགུན་ཏེ་གསུམ་ནི་དཔྱིད་ཡིན་ནོ། །དེ་ལྟར་ཟླ་བའི་གོ་རིམས་དུས་ནི་དྲུག །ལོ་གཅིག་ལ་ནི་ཟླ་བ་བཅུ་གཉིས་འདོད། །གསུམ་གསུམ་དུ་ནི་ཚིགས་རྣམས་སྡུད་པར་ཤེས། །ཟླ་བ་གཉིས་གཉིས་ཤིང་ནི་དུས་སུ་བསྟན། །ཟས་དང་སྐོམ་ནི་དེ་ལྟར་འཇུ་བར་འགྱུར། །སྨན་པ་དང་ནི་ཁམས་དང་དུས་ཀྱང་བསྟན། །དབང་པོ་དང་ནི་ཁམས་རྣམས་དེ་དག་ཀྱང་། །ལོ་གཅིག་ནང་གི་ཚིགས་ཚིགས་ཡོངས་སུ་འགྱུར། །དབང་པོ་དག་ནི་ཡོངས་སུ་འགྱུར་བ་ན། །ལུས་ཅན་རྣམས་ལ་སྣ་ཚོགས་ནད་ཀྱང་འབྱུང་། །དེ་ཉིད་ལ་ནི་སྨན་པས་ཟླ་གསུམ་བཞི། །ཚིགས་ཀྱི་བར་དང་དུས་དྲུག་རྣམས་དང་ནི། །ཁམས་དྲུག་མཁས་པར་བྱ་བ་ཤེས་པར་བྱ། །ཟས་སྐོམ་སྨན་རྣམས་གོ་རིམས་ཇི་བཞིན་ཏེ། །རླུང་གི་ཤས་ཆེའི་ནད་ནི་དབྱར་ན་ལྡང་། །སྟོན་དུ་གྱུར་པ་ན་ནི་མཁྲིས་པ་གཡོ། །དགུན་གྱི་དུས་སུ་དེ་བཞིན་འདུས་པ་སྟེ། །བད་ཀན་ཤས་ཆེའི་ནད་ནི་དཔྱིད་ལྡང་ངོ་། །དབྱར་ནི་སྣུམ་དྲོ་ལན་ཚྭ་སྐྱུར་བའི་རོ། །སྟོན་ནི་མངར་དང་སྣུམ་དང་བསིལ་བག་གོ །དགུན་ནི་མངར་དང་སྣུམ་དང་སྐྱུར་བག་སྟེ། །དཔྱིད་ཀྱི་དུས་ན་རྩུབ་རོ་ཚྭ་བའོ། །བད་ཀན་ཆེ་བ་ཟོས་མ་ཐག་ཏུ་ལྡང་། །མཁྲིས་པ་ཆེ་བ་འཇུ་བའི་དུས་ན་ལྡང་། །རླུང་ཤས་ཆེ་བ་ཞུ་མ་ཐག་ཏུ་ལྡང་། །ཁམས་གསུམ་གཡོ་བ་དེ་ནི་དེ་ལྟའོ། །རླུང་གི་བདག་ཉིད་ལ་ནི་བཅུད་ཀྱིས་གསོ། །བཀྲུ་སྨན་གྱིས་ནི་མཁྲིས་པ་བསལ་བར་བྱ། །འདུས་པ་ལ་ནི་གསུམ་དང་མཐུན་ལྡན་པ། །བད་ཀན་ཚིགས་སུ་བབ་ན་སྐྱུགས་སྨན་གཏང་། །རླུང་ཤས་ཆེ་དང་མཁྲིས་དང་འདུས་པ་དང་། །བད་ཀན་ཤས་ཆེའི་ཚིགས་རྣམས་ཤེས་པར་བྱ། །དུས་གང་ཁམས་གང་ལུས་ནི་གང་ཡིན་པ། །དེ་ཡི་སྨན་དང་བཟའ་བཏུང་བསྟན་པར་བྱ། །དེ་ནས་ཚོང་དཔོན་གྱི་བུ་ཆུ་འབེབས་ཀྱིས་ཁམས་ལ་མཁས་པར་བྱ་བ་འདི་ལྟ་བུ་དེ་ཙམ་ཞིག་ཡོངས་སུ་དྲིས་པ་དེས། ཚེའི་རིག་བྱེད་ཀྱི་ཡན་ལག་བརྒྱད་པོ་ཐམས་ཅད་ཁོང་དུ་ཆུད་པར་གྱུར་ཏོ། །རིགས་ཀྱི་ལྷ་མོ་དེའི་ཚེ་དེའི་དུས་ན་ཚོང་དཔོན་གྱི་བུ་ཆུ་འབེབས། རྒྱལ་པོ་ལྷའི་དབང་ཕྱུག་འོད་ཀྱི་ཡུལ་ན། གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་ཐམས་ཅད་དུ་སོང་ནས། སེམས་ཅན་ནད་སྣ་ཚོགས་ཀྱིས་བཏབ་པ། ནད་སྣ་ཚོགས་ཀྱིས་གཟིར་བ་འབུམ་ཕྲག་དུ་མ་དེ་དག་ལ་ཁོ་བོ་ནི་སྨན་པའོ། །ཁོ་བོ་ནི་སྨན་པའོ། ཞེས་བདག་ཉིད་ཀྱིས་ཁས་འཆེས་ཏེ། ཁོ་བོས་ཁྱེད་རྣམས་ནད་སྣ་ཚོགས་ལས་ཡོངས་སུ་ཐར་བར་བྱའོ་ཞེས་དབུགས་ཕྱུང་ངོ་། །རིགས་ཀྱི་ལྷ་མོ་ཚོང་དཔོན་གྱི་བུ་ཆུ་འབེབས་ཀྱིས་འདི་ལྟ་བུའི་ཚིག་བརྗོད་པ་དེ་ཐོས་མ་ཐག་ཏུ་སྲོག་ཆགས་འབུམ་ཕྲག་དུ་མ་དེ་དག་ཐམས་ཅད་རབ་ཏུ་དགའ་བ་ཆེན་པོ་སྐྱེས་པར་གྱུར་ཏོ། །དབུགས་ཕྱིན་པ་རྙེད་ནས་ཀྱང་དགའ་བ་དང་། བདེ་བ་དང་། ཡིད་བདེ་བ་བསམ་གྱིས་མི་ཁྱབ་པ་དང་ལྡན་པར་གྱུར་ཏོ། །དེའི་ཚེ་དེའི་དུས་ན་སེམས་ཅན་ནད་སྣ་ཚོགས་ཀྱིས་བཏབ་པ། ནད་སྣ་ཚོགས་ཀྱིས་གཟིར་བ་འབུམ་ཕྲག་དུ་མ་དེ་དག་ནད་སྣ་ཚོགས་ལས་ཡོངས་སུ་ཐར་ཏེ་ནད་མེད་པར་གྱུར་ཏོ། །ནད་མེད་པར་གྱུར་ནས་ཀྱང་སྔ་མ་ཁོ་ན་བཞིན་དུ། མཐུ་དང་། སྟོབས་དང་། བརྩོན་འགྲུས་དང་ལྡན་པར་གྱུར་ཏོ། །དེའི་ཚེ་དེའི་དུས་ན་སེམས་ཅན་ནད་སྣ་ཚོགས་ཀྱིས་བཏབ་པ། ནད་སྣ་ཚོགས་ཀྱིས་གཟིར་བ། འབུམ་ཕྲག་དུ་མ་དེ་དག་གི་ནང་ནས། གང་སུ་དག་ནད་དྲག་པོས་བཏབ་པ། དེ་དག་ཐམས་ཅད་ཚོང་དཔོན་གྱི་བུ་ཆུ་འབེབས་ག་ལ་བ་དེར་དོང་ནས་ཕྱིན་པ་དང་། སེམས་ཅན་ནད་སྣ་ཚོགས་ཀྱིས་བཏབ་པ། ནད་སྣ་ཚོགས་ཀྱིས་གཟིར་བ། འབུམ་ཕྲག་དུ་མ་དེ་དག་ལ་ཚོང་དཔོན་གྱི་བུ་ཆུ་འབེབས་ཀྱིས། སྨན་དཔྱད་གང་ཅི་བསྟན་པ་དེས་སེམས་ཅན་དེ་དག་ཐམས་ཅད་ཀྱི་ནད་ཐམས་ཅད་རབ་ཏུ་ཞི་བར་བྱས་སོ། །ནད་མེད་པ་དང་། ནད་ཉུང་བར་གྱུར་ནས་ཀྱང་སྔ་མཁོ་བཞིན་དུ་མཐུ་དང་། སྟོབས་དང་། བརྩོན་འགྲུས་དང་ལྡན་པར་གྱུར་ཏོ། །རིགས་ཀྱི་ལྷ་མོ་དེའི་ཚེ་དེའི་དུས་ན། རྒྱལ་པོ་ལྷའི་དབང་ཕྱུག་འོད་ཀྱི་ཡུལ་ན། གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་ཐམས་ཅད་ན། སེམས་ཅན་ནད་སྣ་ཚོགས་ཀྱིས་བཏབ་པ། ནད་སྣ་ཚོགས་ཀྱིས་གཟིར་བ། འབུམ་ཕྲག་དུ་མ་དེ་དག་ཐམས་ཅད་ཚོང་དཔོན་གྱི་བུ་ཆུ་འབེབས་ཀྱིས། ནད་སྣ་ཚོགས་ལས་ཡོངས་སུ་ཐར་བར་བྱས་པར་གྱུར་ཏོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། ནད་ཐམས་ཅད་རབ་ཏུ་ཞི་བར་བྱས་པའི་ལེའུ་ཞེས་བྱ་སྟེ་ཉི་ཤུ་རྩ་བཞི་པའོ།། །།

- བཀའ་འགྱུར། རྒྱུད།

འདིར་ནོན་ནས་གཟིགས།  སྨན་གྱི་བསྟན་བཅོས་སྨན་མིང་རྒྱ་མཚོ་བཞུགས་སོ།། 

མཐའ་མའི་འདོན་ཐེངས་།: 21.07.2017 ཉིན། 11:29 AM