༄༅། །དྭང་བླངས་སྨན་ཞབས་པ་གཉིས་ཅོན་ཏ་ར་ཁུལ་དུ་ཉིན་གཉིས་རིང་ཏོག་དབྱིབས་གཉན་རིམས་དང་འབྲེལ་བའི་ལམ་སྟོན་དང་། ཛ་དྲག་སྐབས་མྱུར་སྐྱོབས་བྱེད་སྟངས་སྐོར་ལ་ཟབ་སྦྱོང་ལས་སྡོམ།

རྒྱ་གར་ནང་ཏོག་དབྱིབས་གཉན་རིམས་ཀྱི་ནད་རླབས་གཉིས་པ་ཁྱབ་གདལ་ཕྱིན་པ་དང་མཉམ་དུ་བོད་མིའི་སྤྱི་ཚོགས་ཁྲོད་དུ་ཁྱབ་གདལ་ཤུགས་ཆེར་སོང་བས། བོད་མི་མང་པོ་ཞིག་ལ་ལུས་སེམས་གཉིས་ཀྱི་དཀའ་ངལ་ཛ་དྲག་གི་སྐབས་དང་བསྟུན། ཨ་རིར་རྟེན་གཞི་བྱས་པའི་བོད་ཀྱི་སྨན་ཞབས་མཐུན་ཚོགས་ངོས་ནས་གོ་སྒྲིག་བྱས་ཏེ་ཏོག་དབྱིབས་གཉན་རིམས་སྨན་བཅོས་མྱུར་སྐྱོབ་ཀྱི་ཉམས་མྱོང་ལྡན་པའི་བོད་པའི་སྨན་ཞབས་པ་ཁག་ཅིག་དྭང་བླངས་སྨན་བཅོས་ཆེད་རྒྱ་གར་དུ་འབྱོར་པའི་ཁོངས་ནས་སྨན་པ་ཞབས་པ་བསྟན་འཛིན་བདེ་ཆེན་ལགས་དང་མོན་གྷོ་ནས་ཕེབས་པའི་དང་བླངས་སྨན་ཞབས་པ་བསྟན་འཛིན་མཁའ་འགྲོ་གཉིས་སྨན་རྩིས་ཁང་དུ་ལས་བགོས་གནང་བ་བཞིན། ༢༠༢༡ ཟླ་ ༦ ཚེས་ ༣༠ སྨན་ཞབས་བསྟན་འཛིན་བདེ་ཆེན་ལགས་ཅོན་ཏ་ར་ཁུལ་དུ་ཏོག་དབྱིབས་གཉན་རིམས་དང་འབྲེལ་བའི་ལམ་སྟོན་གནང་བ་དེ་ཕན་རླབས་ཆེན་པོ་བྱུང་ཡོད།

༢༠༢༡ ཟླ་ ༧ ཚེས་ ༡༢ དང་༡༣ བཅས་ཉིན་སྨན་རྩིས་ཁང་འགན་འཛིན་མཆོག་གིས་བཀོད་མངགས་ལྟར་ཅོན་ར་ཏ་ཁུལ་དུ་ཡོད་པའི་སྨན་རྩིས་ཁང་གི་སྡེ་ཚན་ཁག་དང་། ཉེ་འཁོར་གྱི་དགོན་སྡེ་ཁག་དང་། སློབ་གྲྭ རྒས་གསོ་ཁང་སོགས་ལ་འཕྲོད་བསྟེན་ལམ་སྟོན་ཆེད། སྨན་ཞབས་པ་བསྟན་འཛིན་བདེ་ཆེན་ལགས་དྭང་བླངས་སྨན་ཞབས་བསྟན་འཛིན་མཁའ་འགྲོ་ལགས་གཉིས་སྨན་རྩིས་ཁང་གི་སྨན་པ་ལྷུན་གྲུབ་རྡོ་རྗེ་ལགས་མཉམ་ཅོན་ཏ་ར་ཁུལ་དུ་ཆེད་ཕེབས་གནང་ཡོད།

         ཕྱི་ལོ་ ༢༠༢༡ ཟླ་ ༧ ཚེས་ ༡༢ ཉིན་གུང་ཆུ་ཚོད་ ༢།༠༠ ནས་སྨན་རྩིས་ཁང་གི་བགྲེས་ཡོལ་བ་རྣམས་དང་། ཅོན་ཏ་ར་གསོ་རིག་ཉམས་ཞིབ་ཁང་གི་སྨན་པ།  དཔེ་ཐོག་ཞིབ་འཇུག་དང་པར་སྐྲུན་སྡེ་ཚན་གྱི་སྨན་པ་དང་ལས་བྱེད། ཅོན་ར་ཏ་ར་གསོ་བ་རིག་པའི་བརྟག་དཔྱད་སྨན་ཁང་གི་སྨན་པ་དང་ལས་སྣེ། སྨན་རྩ་འདེབས་ལས་སྡེ་ཚན་གྱི་ལས་སྣེ། རྒྱ་ཡིག་སྡེ་ཚན་དང་པར་སྐྲུན་སྡེ་ཚན་གྱི་སྨན་པ་དང་སྨན་རྩིས་ལས་སྣེ་བ་རྣམས་ལ་བརྙན་སྟོན་འཕྲུལ་འཁོར་(Projector)ཐོག་གཞི་རྩའི་སྲོག་སྐྱོབས་ཐབས་(Basic Life Support)སྐོར་ལམ་སྟོན་བྱས་ཤིང་། དེ་ཡང་ཕྲུ་གུ་དང་ལོ་ན་བགྲེས་པར་མིད་པ་འགག་པའི་ཛ་དྲག་གནས་སྐབས་ཀྱི་ཐབས་ལམ་རྣམས་མིག་སྟོན་གསལ་བཤད་དང་མཉམ་འགྲེལ་བརྗོད་ཟབ་ཅིང་རྒྱས་པ་གནང་། དེ་ནས་ཆུ་ཚོད་ ༤།༣༠ ནས་རྫོང་སར་བཤད་གྲྭར་དགེ་འདུན་པ་དང་ལས་བྱེད་རྣམས་ལ་དྭང་བླངས་སྨན་ཞབས་པ་གཉིས་ནས་རང་ཉིད་ངོ་སྤྲོད་དང་ཏོག་དབྱིབས་གཉན་རིམས་དང་འབྲེལ་བའི་ནད་ཀྱི་རྒྱུ་རྐྱེན་དང་། ནད་རྟགས། སྔོན་འགོག་བྱ་ཚུལ་སོགས་རང་ཉིད་ཀྱི་མཐོང་ཐོས་རེག་གསུམ་གྱི་ཉམས་མྱོང་ཐམས་ཅད་སྦེད་གསང་མེད་པའི་ཐོག་བརྙན་སྟོན་འཕྲུལ་འཁོར་(Projector)པར་རིས་ལམ་ནས་སློབ་ཁྲིད་གནང་།

ཅོན་ར་ཏ་གསོ་བ་རིག་པ་སློབ་གཉེར་དང་ཉམས་ཞིབ་ཁང་ནས་ཕྱི་ལོ་ ༢༠༢༡ ཟླ་ ༧ ཚེས་ ༡༦ ཉིན་ཕུལ།།

མཐའ་མའི་འདོན་ཐེངས་།: 04.08.2021 ཉིན། 3:32 PM