དབུ་འཛིན་ཚེ་རིང་བཀྲིས་མཆོག་ལ་གསོལ་རས་བསྩལ།

ཕྱི་ལོ་ ༢༠༢༢ ཟླ་ ༢ ཚེས་ ༢༢ ཉིན་སྨན་རྩིས་ཁང་ཚོགས་ཁང་ནང་དུ་སྨན་རྩིས་ཁང་འགན་འཛིན་སྐུ་ངོ་ཚེ་རིང་བཀྲ་ཤིས་གང་ལ་ྋསྤྱི་ནོར་ྋགོང་ས་སྐྱབས་མགོན་ཆེན་པོ་མཆོག་གིས་རྒྱལ་བའི་སྐུ་པར་མཐོང་གྲོལ་རིན་པོ་ཆེ་དང་། ཐུབ་དབང་གི་སྐུ། མཇལ་དར་བཅས་གསོལ་རས་བསྩལ་བ་དགའ་ལྡན་ཕོ་བྲང་གི་དྲུང་ཆེ་སྐུ་ངོ་བློ་བཟང་སྦྱིན་པ་ལགས་འདིར་ཆེད་མངགས་ཕེབས་ནས་འབུལ་བཞེས་མཛད་སྒོ་སྟབས་བདེ་ཞིག་ཚོགས་གནང་སོང་།

དེ་ཉིན་འགན་འཛིན་ཚེ་རིང་བཀྲིས་མཆོག་དང་། འཕྲོད་བསྟེན་དྲུང་ཆེ་སྐུ་ངོ་དཔལ་ལྡན་དོན་གྲུབ་མཆོག་དབུ་ཞུགས་ཐོག་དགའ་ལྡན་ཕོ་བྲང་གི་དྲུང་ཆེ་སྐུ་ངོ་བློ་བཟང་སྦྱིན་པ་ལགས་ནས་ྋགོང་ས་མཆོག་གིས་གསོལ་བསྩལ་བྱིན་ཆེན་ཕྱག་རྟགས་རྣམས་འབུལ་བཞེས་གནང་སོང་། དེ་དུས་སྐུ་ངོ་བློ་བཟང་སྦྱིན་པ་ལགས་ནས་གསུངས་དོན། “ དེ་རིང་ང་རང་ཆེད་དུ་བཅར་ཡག་འདི་ཚེ་རིང་བཀྲིས་ལགས་དེ་སྔ་སྨན་རྩིས་ཁང་དུ་ལོ་གསུམ་རིང་ཞབས་ཕྱི་ཞུས་གནང་ཡོད། དེ་རྗེས་ཨ་རི་ནས་ཆེད་མངགས་བཀའ་འགུགས་གནང་ནས་ལོ་བཅུ་སྟེ་ཁྱོན་ལོ་བཅུ་གསུམ་རིང་སྨན་རྩིས་ཁང་དུ་ཞབས་ཕྱི་ཞུས་གནང་བ་རེད། དེ་རིང་ཁོ་རང་འདི་ནས་ཕེབས་སྐྱེལ་གནང་ཡག་འདི་ཏོག་དབྱིབས་གཉན་རིམས་ ༡༩ རྐྱེན་གྱིས་ཟུར་དུ་མཇལ་ཁ་མ་བྱུང་ཡང་ྋསྐྱབས་མགོན་རིན་པོ་ཆེ་མཆོག་ནས་ྋསྐུ་པར་དང་། ཐུབ་དབང་སྐུ་དང་། མཇལ་དར་བཅས་གསོལ་རས་གནང་བ་རྣམས་འབུལ་རྒྱུའི་ཆེད་འདིར་བཅར་བ་ཡིན།  དེ་རིང་དམིགས་བསལ་ཞུ་རྒྱུ་གང་ཡང་མེད་ཀྱང་སྤྱིར་བཏང་སྤྱི་ཚོགས་དང་སྒྲིག་འཛུགས་གང་འདྲ་ཞིག་ནང་ཕྱག་ལས་གནང་ཡང་མིའི་མཐོང་སྟངས་དང་བསམ་སྟངས་རིང་ཐུང་སྣ་ཚོགས་ཤིག་ཡོང་བ་ཆོས་ཉིད་རེད་ལ་དེ་ནི་ང་ཚོར་དམིགས་བསལ་ཞིག་མ་ཡིན། སྤྱི་ཡོངས་ཆ་ནས་ཁོང་རང་འདིར་ཕྱག་ལས་གནང་བའི་རིང་ལ་དཀའ་ངལ་ལ་གདོང་ལེན་ཞུས་པ་དང་། ཡར་རྒྱས་དང་འཛུགས་སྐྲུན་བྱས་པ་མཐོང་བཞིན་པ་དེ་ཡིན་པས་ཁོང་ལ་ཐུགས་རྗེ་ཆེ།” ཞེས་ཞུས་གནང་སོང་། དེ་ནས་ྋགོང་ས་མཆོག་གིས་གསོལ་རས་གནང་བའི་ནང་དམིགས་བསལ་རྒྱལ་བའི་ྋསྐུ་པར་སྟེང་མགོན་པོ་གང་ཉིད་ཀྱིས་ “ཚེ་རིང་བཀྲིས་ནས་སྔ་ཕྱི་མི་ལོ་བཅུ་གསུམ་རིང་བོད་ཀྱི་སྨན་རྩིས་ཁང་གི་འགན་འཛིན་གྱི་ཞབས་ཡུན་རིང་འགན་ཁུར་དང་ལེན་ལྷག་བསམ་ཧུར་བསྐྱེད་ཀྱིས་བགྱིས་པར་ལེགས་གསོལ་བསྔགས་བརྗོད་དང་འབྲེལ་རྗེས་འཛིན་སྨོན་ལམ་བཅས།” ཞེས་འཁོད་ཡོད།

དེ་ནས་སྨན་རྩིས་ཁང་འགན་འཛིན་ཚེ་རིང་བཀྲིས་ལགས་ཀྱིས་གསུངས་དོན་དུ། “དེ་རིང་འདིར་དབུས་ཀྱི་སྡེ་ཚན་ཁག་གི་འགན་འཛིན་རྣམ་པ་དང་། སྡེ་ཚན་ཁག་སོ་སོའི་སྐུ་ཚབ་ཚོ་ཕེབས་ཐུབ་པར་དགའ་པོ་བྱུང་། ང་རང་སྨན་རྩིས་ཁང་དུ་མི་ལོ་ ༡༣། དཔལ་འབྱོར་ལས་ཁུངས་སུ་མི་ལོ་ ༡༧། བོད་ཕྲུག་ཁྱིམ་སྡེར་ཐེངས་གཉིས། བཀའ་དྲུང་ཡིག་ཚང་དུ་ཐེངས་༢ བཅས་ཚང་མའི་ནང་ཞབས་ཕྱི་ཞུས་སྐབས་སྤྲོ་སྣང་འཕེལ་བ་བྱུང་སོང་། ད་འདི་ནས་ཨ་རི་གྲོང་ཁྱེར་ Tibet Centre, Chicago དུ་ཤུགས་རྒྱག་རྒྱུ་རེད། དེ་རིང་འདིར་ྋགོང་ས་སྐྱབས་མགོན་ཆེན་པོས་གསོལ་རས་བསྩལ་བ་འདི་ལ་ཐུགས་རྗེ་ཆེ་ཞུ་རྒྱུ་ཡིན་” ཞེས་གསུངས་སོང་།

དེ་ནས་ཟླ་ ༢ ཚེས་ ༢༨ ཉིན་སྨན་རྩིས་ཁང་གི་འགོ་ལས་ཡོངས་ནས་འགན་འཛིན་ཚེ་རིང་བཀྲིས་མཆོག་གི་ཆེད་དུ་ཕེབས་སྐྱེལ་མཛད་སྒོ་ཞིག་ཚོགས་གནང་བའི་སྐབས་སྐུ་ངོ་སྲིད་སྐྱོང་སྤེན་པ་ཚེ་རིང་མཆོག་དང་འཕྲོད་བསྟེན་དྲུང་ཆེ་སྐུ་ངོ་དཔལ་ལྡན་དོན་གྲུབ་རྣམས་གཉིས་གཙོས། སྨན་རྩིས་ཁང་གི་འགན་འཛིན་གསར་པ་སྐུ་ངོ་ཐུབ་བསྟན་ཚེ་རིང་བཅས་ཆེད་བཅར་ཞུས་ཡོད་ལ། དེ་དུས་དམིགས་བསལ་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་འགན་འཛིན་ཚེ་རིང་བཀྲིས་མཆོག་ལ་མི་ལོ་བཅུ་གསུམ་རིང་སྨན་རྩིས་ཁང་དུ་འགན་འཛིན་ངོ་བོའི་ཐོག་ཕུལ་བྱུང་གི་ཞབས་འདེགས་ཞུས་པ་ད་ཆ་རྒས་ཡོལ་ཕེབས་ཁར་ཡི་རང་བསྔགས་བརྗོད་ཀྱི་ཕྱག་འཁྱེར་ཞིག་ཀྱང་གནང་ཡོད། 

མཐའ་མའི་འདོན་ཐེངས་།: 05.04.2022 ཉིན། 9:49 AM