༄༅། །ས་མཐོའི་སྟེང་སྨན་དཔྱད་ཀྱི་བྱ་བ་གནང་མཁན་དྲང་སྲོང་དཔྱད་བུ་ཁྲི་ཤེས་ཀྱི་ལོ་རྒྱུས་ལ་རགས་ཙམ་དཔྱད་པ།

-          བྱམས་པ་འཕྲིན་ལས།

            ལོ་ངོ་ཉིས་སྟོང་གི་སྔོན་ནས་ས་མཐོའི་སྟེང་སྨན་དཔྱད་ཀྱི་བྱ་བ་མཛད་མཁན་དྲང་སྲོང་དཔྱད་བུ་ཁྲི་ཤེས་ཞེས་པ་ནི། སྔ་རབས་ཞང་ཞུང་(1)ཡུལ་དུ་བྱུང་བའི་གསོ་དཔྱད་མཁས་པ་ཞིག་ཡིན་པ་དང་། སྟོན་པ་གཤེན་རབས་ཀྱི་སྐུའི་གདུང་སྲས་བརྒྱད་ཀྱི་ནང་ནས་བགྲེས་ཤོས་དེ་ཡིན། དེའི་སྐོར་བོན་གཞུང་ <<ལེགས་བཤད་མཛོད་ >>ལས། “བདུད་རྒྱལ་རམ་པ་དུག་འགྱེད་ཀྱིས་སེམས་ཅན་རྣམས་ལ་ནད་ཀྱི་བསྐལ་པ་དར་བར་བྱེད་པ་ལ། སྟོན་པས་དཔྱད་བུ་ཁྲི་ཤེས་ལ་བདུད་རྩི་དཔྱད་ཀྱི་མདོ་དགུ་སོགས་བསྟན་ནས་སེམས་ཅན་བདེ་ལ་བཀོད།’’ ཅེས་དང་། <<བསྟན་པ་གཉེར་བཏད་ཀྱི་མདོ་>>ལས་ཀྱང་། “དཔྱད་རྒྱུད་ཉིས་ཁྲིར་གྱུར་པ་རྣམས། །དཔྱད་བུ་ཁྲི་ཤེས་དག་གིས་བསྡུས།།’’ ཞེས་སྔ་རབས་ཞང་ཞུང་གི་གསོ་རིག་བསྟན་པའི་སྒྲོན་མེ་དྲང་སྲོང་དཔྱད་བུ་ཁྲི་ཤེས་ཡིན་པར་ཁུངས་སྐྱེལ་བྱས་འདུག

            རང་ཅག་བོད་སྨན་མཁས་པའི་དབང་པོ་དེའུ་དམར་བསྟན་འཛིན་ཕུན་ཚོགས་ཞབས་ཀྱིས་མཛད་པའི་གསོ་རིག་གི་ཡིག་ཐོ་གསལ་བྱེད་མལླི་ཀའི་རྒྱུན་ཐག་ཅེས་པའི་དཀར་ཆག་ཀུ་པའི་ནང་ཚན་དབང་པོ་རིལ་བུ་གསུམ་གྱི་ལག་ལེན་གསལ་བའི་བསྟན་བཅོས་ཟབ་གསང་སྙིང་གི་ཐིག་ལེ་ལས། ཞང་ཞུང་ལུགས་ཀྱི་དྲང་སྲོང་དཔྱད་བུ་ཁྲི་ཤེས་ཀྱི་མཛད་པའི་<<དུག་བཅོས་གཡུང་དྲུང་འཁྱིལ་བ་>>ཞེས་པའི་ནང་། སྔོན་དུས་སྟོན་མཆོག་དབང་པོ་གཤེན་རབ་ཀྱིས། །སྐྱབས་གནས་སྲུང་མར་བཅས་ལ་དམོད་འདི་བོར། །སྙིགས་དུས་མ་རུངས་བདུད་ཀྱི་སྤྲུལ་པ་འགས། །ཟུངས་ངན་དུག་སྦྱོར་ཉེས་པ་ཡོད་མིན་གྱིས། །མི་ཆེན་སྲོག་ལ་ཧུར་ཐུམ་བྱེད་དུས་སུ། །དེ་ཉིད་འཇོམས་པའི་སྨན་མཆོག་རིན་ཆེན་འདི། །མཐུ་ལྡན་རང་བཞིན་དངོས་གྲུབ་སྩལ་དུ་གསོལ། །གསུངས་པས་ལྷུང་བཟེད་ནང་དུ་དངོས་གྲུབ་ཀྱི། །རིལ་བུ་རིགས་ལྔ་བྱུང་བ་ཕྱོགས་བཅུར་བོར། །ཕྱོགས་ཀུན་ཁྱབ་ནས་འགྲོ་ལ་ཕན་པར་ཤོག །ཅེས་གསུངས་དབང་གིས་གནས་ལ་མ་ངེས་པ། །སྲོག་ཆགས་ཀུན་དང་ཁྱད་པར་རྨ་བྱ་སོགས། །སྲོག་རྩ་རྭ་རྩེ་མཁྲིས་རྩ་ཀླད་པ་དང་། །ཕོ་ལོང་རྒྱུ་མ་མཆིན་པ་སོགས་ལས་འབྱུང་། །རྒྱ་གར་སྨན་གྱི་ནགས་སུ་སྐྱེས་པའང་ཡོད། །ཡུལ་དེའི་གླ་བ་དཀར་པོ་སྨན་ཟ་བའི། །རྩི་ཤིང་ཁ་ལྟེམ་དག་ལས་ངེས་པར་འབྱུང་། །ཞེས་དང་། ཡང་དེ་ཉིད་ལས། དཀར་པོ་ཆེ་བ་ཅོ་གའི་སྒོ་ང་ཙམ། །རྒྱལ་པོ་རིལ་བུས་མི་རྟ་བཅུ་གསུམ་སོས། །དམར་སེར་འབྲིང་བ་ཤ་བའི་རིལ་མ་ཙམ། །བློན་པོ་རིལ་བུས་མི་རྟ་དགུ་མཚོ་ཐུབ། །ཆུང་བ་སེར་པོ་ལུག་གི་རིལ་མ་ཙམ། །བཙུན་མོ་རིལ་བུས་མི་རྟ་བདུན་ལ་ཕན། །སྔོ་དང་དཀར་པོ་ཨང་ཆུང་སྲན་མ་ཙམ། །འབངས་ཀྱི་ཡིན་པས་སྔ་མ་དེ་ཡི་ནི། །མི་རྟ་ལྔ་མཚོ་ཕྱི་མས་གསུམ་ལ་ཕན། །ཁ་དོག་དབང་གིས་ཆེ་ཆུང་ཁྱད་པར་ལས། །ཆེ་དང་སྲ་མཁྲེགས་ལྡན་པ་བཟང་བའི་རིགས། །ཆུང་དང་གསོབ་ལ་བཀྲག་འཚེར་མེད་ངན་རིགས། །ཞེས་དུག་འཛོམས་དབང་པོ་རིལ་བུའི་ལོ་རྒྱུས་དང་། ནང་གསེས་དབྱེ་བ། སོ་སོའི་ཕན་ཡོན་ཞིབ་གསལ་འཁོད་པར་གཞིགས་ན་ཞང་ཞུང་གི་དཔྱད་བུ་ཁྲི་ཤེས་ཞེས་པ་ནི་ཧ་ཅང་སྔ་བའི་དུས་ནས་སྨན་དཔྱད་ཀྱི་བསྟན་པའི་བྱ་བར་ཞུགས་མཁན་ཞིག་ཡིན་པ་དོན་གྱིས་གྲུབ། དེ་བཞིན་མཁས་པའི་དབང་པོ་ཟུར་མཁར་བློ་གྲོས་རྒྱལ་པོས་མཛད་པའི་<<ཤེས་བྱ་སྤྱིའི་ཁོག་འབུགས་>>ནང་། ཐོ་ཐོ་རི་སྙན་ཤལ་གྱི་རིང་ལ་གསོ་དཔྱད་ཀྱི་དབུ་བརྙེས་ཟེར་བ་དེའང་མ་ངེས་ཏེ། བོན་པོ་ལ་བརྟེན་པའི་གསོ་དཔྱད་ཇི་སྙེད་ཅིག་ཡོད་ལ། བོན་པོ་ནི་བཅོམ་ལྡན་འདས་ཤཱཀྱ་ཐུབ་པ་འཇིག་རྟེན་དུ་བྱོན་པ་དང་དུས་མཚུངས་སུ་གཤེན་རབ་མི་བོ་ཆེ་ཞེས་བྱ་བ་པུ་རངས་སུ་བྱོན་པར་བཤད་པའི་ཕྱིར་རོ། །ཞེས་གསུངས་པ་ནི་ལོ་རྒྱུས་དང་མཐུན་པའི་བསྡོམས་ཚིག་ཡང་དག་པ་ཡིན་པར་སེམས།

            དེ་རྗེས་གཉའ་ཁྲིའི་སྐབས་སྨན་དཔྱད་ཡར་རྒྱས་ཇི་བྱུང་སྐོར། གཡུང་དྲུང་བོན་གྱི་བསྟན་པའི་བྱུང་བ་བརྗོད་པ་<<ལེགས་བཤད་སྐལ་བཟང་མགྲིན་རྒྱན་>>ལས། རྒྱུ་ཡི་བོན་བཞི་སྤྱི་ལས་སྔར་དར་བ། །ཤེས་པ་ཅན་གྲངས་བཅུ་གཉིས་སྔོན་རིམ་ལྟར། །ཁྱད་པར་རྒྱལ་པོ་གཉའ་ཁྲིའི་སྐུ་རིང་དར། །དེ་ཡང་ཤེས་པ་ཅན་ཞེས་གང་ཞེ་ན། །ཞེས་པ་ནས། ཕན་ཤེས་སྨན་དཔྱད་བོན་ཞེས་བྱ་བ་ནི། །བྲོ་ནད་གསོ་བས་ཚེ་ཡི་བར་ཆད་སེལ། །ཞེས་གསལ་བ་དང་། ཕྱོགས་མཚུངས་གཉའ་ཁྲིའི་དུས་སུ་སྨན་དཔྱད་དར་ཚུལ་སྐོར། ཡང་རྗེ་ཨོ་རྒྱན་གླིང་པས་གཏེར་ནས་སྤྱན་དྲངས་པའི་བཀའ་ཐང་སྡེ་ལྔའི་ནང་ཚན་<< བློན་པོ་བཀའ་ཐང་>>ཤོག་གྲངས་ 7 བ 6 ནང་། བོད་རྗེའི་ཐོག་མ་གཉའ་ཁྲི་བཙན་པོ་ཡར་ལུང་བཙན་ཐང་སྒོ་བཞིར་བྱོན་དུས་དོགས་པ་དྲུག་སྟེ། རྐུ་ཡོད། སྡང་ཡོད། དགྲ་ཡོད། གཡག་ཡོད། དུག་ཡོད། བྱད་སྟེམས་ཡོད་ཅེས་གསུངས་པར། རྩིབ་ལྷ་སྐར་མ་ཡོལ་སྡེས། བོད་འདིར་རྐུ་ལ་ལན་ཡོད། སྡང་ལ་བྱམས་ཡོད། དགྲ་ལ་གཉེན་ཡོད། གཡག་ལ་མཚོན་ཡོད། དུག་ལ་སྨན་ཡོད། བྱད་སྟེམས་ལ་འགྲོལ་ཐབས་ཡོད་ཅེས་ཞུས་པའི་ནང་ནས་དུག་ལ་སྨན་ཡོད་ཅེས་པ་དེས་སྐབས་དེར་སྨན་ དཔྱད་ཀྱི་སྲོལ་ཀ་དར་རྒྱས་བྱུང་སྟེ་དུག་སེལ་སྨན་གྱི་བྱ་ཐབས་ཤིན་ཏུ་གསལ། དེ་དང་འདྲ་བར་ <<ལྡེའུ་རྒྱལ་སྲས་ཀྱི་ཆོས་འབྱུང་>>ལས་ཀྱང་། དུས་དེ་ཙམ་ན་རྒྱལ་ཕྲན་བཅུ་གཉིས་ཀྱིས་དབང་བྱེདཔ་ལ། རྒྱལ་ཕྲན་ཆེ་བ་མ་མཆམ་ནས་བོད་ཀྱི་རྗེ་མ་བཏུབ་པའི་དུས་སུ། ཞང་གསུམ། བློན་བཞི་ལ་སོགས་པ་ད ང་། ཤེས་པ་མཁན་མི་བཅུ་གཉིས་ཀྱིས་མཆིད་བགྲོལ་ནས་རྗེ་བཙལ་ཏེ། སྲིབས་ཀྱི་ལྷ་དཀར་མང་པོའི་སྡེ་ལ། རྗེ་བཏུབ་པ་གང་ན་ཡོད་དྲིས་པས། སྨྲས་པ། གནམ་རིམ་པ་ལྔའི་སྟེང་ན། རྗེ་གཉའ་ཁྲི་བཙན་པོ་བྱ་བ། ལྷའི་སྲས་པོ། རྨུའི་ཚ་བོ་ཡོད་པ་དེ་བདག་གིས་སྤྱན་དྲང་ངོ་ཟེར་ནས། སྐར་མ་ཡོལ་སྡེས་སྨྲས་པ། རྗེ་གཉའ་ཁྲི་བཙན་པོ་ཡུལ་སོ་དྲུག་མ་གི་ན། ཡུལ་ན་རྗེ་མེད་དེ་ཁ་དོད་ཀུན་ཀྱང་རྗེ། གནག་ན་གཡག་མེད་དེ་རྭ་ཐོག་ཀུན་ཀྱང་རུང་། རྟ་ལ་སྐྱོན་མ་མཆིས་ངམ་འབྲོག་ཁྱུང་ཕྱུར་ཙམ། དོག་ཡབ་ཀྱི་ཁབ་གཤེགས་འཚལ་ལོ་ཞུས་པས། རྗེའི་ཞལ་ནས། ས་མ་གི་ལ་རྐུ་ཡོད། སྡང་ཡོད། དགྲ་ཡོད། གཡག་ཡོད། དུག་ཡོད། བྱད་དང་སྟེམས་ཡོད་གསུངས་པས། སྨྲས་པ། རྐུ་ལ་ལན་ཡོད། སྡང་ལ་བྱམས་ཡོད། དགྲ་ལ་གཉེན་ཡོད། གཡག་ལ་མཚོན་ཡོད། དུག་ལ་སྨན་ཡོད། བྱད་སྟེམས་ལ་གྲོལ་ས་ཡོད། ཅེས་གསོལ་ནས་གཤེགས་པར་ཆས་པ་སོགས་གོང་གི་ལུང་དང་མཚུངས་པར་སྣང་།

            རྗེས་སུ་དུས་རབས་བརྒྱད་པའི་སྐབས་ཆོས་རྒྱལ་ཁྲི་སྲོང་ལྡེའུ་བཙན་གྱིས་བསམ་ཡས་སུ་ཕྱོགས་རིགས་ཀྱི་སྨན་པ་མཁས་པ་དགུ་གདན་དྲངས་ཏེ་གཡུ་ཐོག་རྙིང་མ་ཡོན་ཏན་མགོན་པོ་དང་ཕན་ཚུན་བགྲོ་གླེང་གནང་སྐབས། འཕགས་ཡུལ་གྱི་སྨན་པས། གསོ་བ་རིག་པའི་བཀའ་བབས་ཚུལ་ཇི་ལྟར་ཡིན་ཞེས་གཡུ་ཐོག་པར་དྲི་བ་བཏོན་དུས་རེ་རེ་བཞིན་ལན་བཏབ་པའི་ནང་ཞང་ཞུང་གི་ལུགས་ལ་ནད་ཐུར་དུ་བབས་པ་བཤལ་གྱི་རྒྱུད། བོད་ཀྱི་ལུགས་ལ་ནད་ཞི་བར་བྱེད་པ་གཉེན་པོ་བཞི་ལྡན་གྱི་རྒྱུད། གཡུང་དྲུང་བོན་གྱི་ལུགས་ལ་ནད་ཞི་བར་བྱེད་པ་དུགས་ལུམས་བྱུག་གསུམ་གྱི་རྒྱུད་ཡོད་ཅེས་གསུངས་པའི་སྐོར་གཡུ་ཐོག་རྙིང་མ་ཡོན་ཏན་མགོན་པོའི་རྣམ་ཐར་<<གཟི་བརྗིད་རིན་པོ་ཆེའི་མཛོད་>>ཅེས་པའི་ནང་གསལ་བ་ལྟར། བོད་ཀྱི་གསོ་རིག་<<རྒྱུད་བཞི་>>ཡི་ནང་ཚན་ << ཕྱི་མ་རྒྱུད་>>ཀྱི་སྦྱོང་་བྱེད་ལས་ཀྱི་མདོ་ཞེས་པའི་ནང་བཤལ་གྱི་ལེའུ་ཡོད་པ་དང་། དེ་བཞིན་འཇམ་རྩུབ་དཔྱད་ཀྱི་མདོ་ཞེས་པར་འཇམ་པོའི་དཔྱད་དུགས་ལུམས་བྱུག་པ་གསུམ་གྱི་ལེའུ་སོ་སོར་ཡོད་པ་དེས་ཞང་བོད་གསོ་རིག་དབར་གྱི་ལོ་རྒྱུས་འབྲེལ་བ་ཇི་བཞིན་གསལ་བཤད་བྱུང་ཡོད། དེ་དང་ཕྱོགས་མཚུངས་ཟུར་མཁར་བློ་གྲོས་རྒྱལ་པོས་གྲ་ཐང་རྒྱུད་བཞི་ཞུས་དག་དང་། པར་བརྐོ་མཛད་དུས་དང་། དེ་རྗེས་མི་དབང་པཎ་ཌི་ཏ་སངས་རྒྱས་རྒྱ་མཚོས་སླར་ཡང་རྒྱུད་བཞིར་དག་བཅོས་གནང་སྐབས་འཕགས་ཡུལ་དང་། རྒྱ་ནག ཏ་ཟིག་སོགས་ཀྱི་སྨན་གཞུང་དང་། ཡང་སྒོས་ << འཁོར་ལོ་རྒྱལ་པོའི་བེ་བུམ་>>ལྟ་བུ་ཞང་ཞུང་གི་སྨན་དཔྱད་ལའང་དཔྱད་གཞི་མཛད་པ་མཇུག་བྱང་དུ་འཁོེད་པ་མ་ཟད། རྒྱུད་བཞིའི་ནང་དར་ཡ་ཀན་དང་། སླེ་ཏྲེས། ད་ཏྲིག མོན་ཆ་ར། བ་རུ་ར། ཏྲེས་སམ་སོགས་སྔ་རབས་ཞང་ཞུང་གི་སྨན་མིང་མི་ཉུང་བ་མཐོང་རྒྱུ་ཡོད་ཅིང་། ལྷག་པར་ཏུན་ཧོང་ནས་རྙེད་པའི་ <<བོད་ཀྱི་གསོ་རིག་མེ་བཙའི་བཅོས་ཐབས་>>ཞེས་པའི་མཇུག་ཏུ་དཔྱད་ཡིག་འདི་ནི་ཕྱག་སྦལ་(2)ན་ཡང་མེད་དེ་ཞང་ཞུང་དཔྱད་ཕུགས་པ་དང་། སྦྱར་ཏེ་བགྱིས་པ་ལགས་སོ་ཞེས་གསལ་བ་བཅས་ཀྱིས་བོད་ཀྱི་གསོ་རིག་ལ་ལོ་ངོ་ཉིས་སྟོང་ལྷག་ཙམ་གྱི་ལོ་རྒྱུས་ཡོད་པའི་ར་སྤྲོད་འདི་ལྟར་ཡིན་པས་མཁྱེན་ལྡན་རྣམས་ཀྱིས་འགྲིག་མིན་དགོངས་འཆར་གནང་རོགས་ཞུ་རྒྱུ་ཡིན།

མཆན་འགྲེལ།

(1) <<རྦ་བཞེད>>ལས། ཞང་ཞུང་བོན་གྱི་ས་བརྟག་ལ། སྟོད་གངས་དཀར་ཏི་སེའི་གནས་མཆོག་འདིར། སྤུ་རངས་གངས་ཀྱིས་སྐོར་དང་གཅིག མང་ཡུལ་ཆབ་ཀྱིས་སྐོར་དང་གཉིས། གུ་གེ་གཡའ་ཡིས་སྐོར་དང་གསུམ། སྐོར་གསུམ་ཡོད་པས་རྫིང་བུ་འདྲ། བོན་མངའ་འབངས་ཀྱི་རིས་སུ་གཏོགས་པ་ལ། སྟོད་མངའ་རིས་སྐོར་གསུམ་གྲགས་པ་ཡིན། ཞེས་དང་། ཡང་ <<རྩ་པྲ་འཕྲུལ་གྱི་ལྡེ་མིག་གསེར་གྱི་བང་མཛོད་>>ཅེས་པའི་མཇུག་བྱང་དུ། དེ་ལྟར་ངོ་མཚར་རྩ་ཡི་རྣམ་བཤད་འདི། །རྒྱུད་ཚིག་ཤིན་ཏུ་བརླིང་ཞིང་ཟབ་པ་དེ། །རྗེས་འཇུག་དོན་གཉེར་རྣམས་ཀྱིས་རྟོགས་དཀའ་བར། །མཐོང་ནས་མངའ་རིས་ཞང་ཞུང་སྨན་ལྗོངས་སུ། །སྐྱེས་པའི་སྨན་པ་སངས་རྒྱས་མགོན་པོས་སྦྱར། །ཞེས་གསལ།

(2) << བཙན་པོ་ཁྲི་ལྡེ་སྲོང་བཙན་གྱི་ལོ་རྒྱུས་མདོ་ཙམ་བརྗོད་པ།>>ཤོག་གྲངས་32 18 ལས། ཞྭའི་ལྷ་ཁང་གི་རྡོ་རིང་གི་ཡི་གེ་གཉིས་པ་ཞེས་པའི་མཇུག་ཏུ། ཞིབ་ཏུ་ནྀ་གཙྀགས་ཀྱི་ཡི་གེ་བྲིས་ཏེ་ཕྱག་སྦལ་དུ་བཞག དཔེ་གཅིག་གཙྀགས་པ་སྔ་མ་དང་ཕྱོགས་སུ་གཙྀགས་ཀྱི་མཁར་བུ་འདིར་བཞག་དཔེ་གཅྀག་འོག་དཔེར་འཆག་དུ་བཅུག་གོ། ཞེས་དང་། <<རྦ་བཞེད་>>ནང་། བཙན་པོའི་བཀའ་མཆིད་ཀྱི་ཡི་གེ་ཞིབ་མོ་གསུམ་ལས། གཅིག་ལྷ་ས་ན་ཡོད། གཅིག་ཁམས་སུ་འཁྱེར། གཅིག་རྗེའི་ཕྱག་སྦལ་ན་མཆིས་སོ་ཞེས་པའི་ཕྱག་སྦལ་ནི་བརྡ་རྙིང་སྟེ། ནང་རྟེན་དང་། ཡིག་ཆ་གལ་ཆེན་ཁག་བཞག་སའི་མཛོད་སྦག་ཟེར་བ་ཡིན་འདུག་ཅེས་མཁས་དབང་དགེ་འདུན་ཆོས་འཕེལ་གྱི་རྣམ་ཐར་ཤོག་གྲངས་ 143 བ 13 ནང་གསལ།།

-          བྱམས་པ་འཕྲིན་ལས་ཀྱི་རྩོམ་ཡིག་འདི་ནི་བོད་ལྗོངས་ཞིབ་འཇུག་དུས་དེབ་ནས་ཟུར་འདོན་ཞུས་པ་ཡིན།

མཐའ་མའི་འདོན་ཐེངས་།: 20.09.2022 ཉིན། 3:14 PM