དགྲ་ལ་ངོམ་ཆོག་པ་དེ་སྨན་རྩིས་ཁང་ཡིན་གསུངས།

(དུས་དྲན་གསུམ་འཛོམས་ཀྱི་མཛད་སྒོ།)

ཕྱི་ལོ་ ༢༠༢༠ ཟླ་ ༡༠ ཚེས་ ༡༧ ཉིན་བཞུགས་སྒར་སྨན་རྩིས་མཐོ་སློབ་ཚོགས་ཁང་དུ་རྒྱལ་བ་ྋསྐུ་ཕྲེང་བཅུ་གསུམ་པ་ཆེན་པོས་ ༡༩༡༦ ལོར་བོད་ཀྱི་རྒྱལ་ས་ལྷ་སར་ལྷ་ལྡན་སྨན་རྩིས་ཁང་ཕྱག་བཏབ་ནས་ལོ་ངོ་ ༡༠༤ འཁོར་བ་དང་། དེ་བཞིན་ྋགོང་ས་སྐྱབས་མགོན་ྋསྐུ་ཕྲེང་བཅུ་བཞི་པ་ཆེན་པོ་མཆོག་གིས་བཞུགས་སྒར་དུ་བོད་ཀྱི་སྨན་རྩིས་ཁང་བསྐྱར་འཛུགས་མཛད་དེ་ལོ་ངོ་ ༥༩ འཁོར་བ་དང་། ལྷག་པར་ཨ་རི་གྲོས་ཚོགས་ནས་ྋགོང་ས་སྐྱབས་མགོན་ཆེན་པོ་མཆོག་ལ་གསེར་གྱི་གཟེངས་རྟགས་འབུལ་བཞེས་མཛད་དེ་ལོ་ངོ་ ༡༣ འཁོར་བའི་ཉིན་མོ་བཅས་དུས་དྲན་གསུམ་འཛོམས་ཀྱི་བཀྲ་ཤིས་རྟེན་འབྲེལ་གྱི་མཛད་སྒོ་ཞིག་ཚོགས་གནང་སོང་།

སྤྱིར་བཞུགས་སྒར་བོད་ཀྱི་སྨན་རྩིས་ཁང་བསྐྱར་འཛུགས་མཛད་པའི་ཉིན་མོ་ནི་ཟླ་ ༣ ཚེས་ ༢༣ ཉིན་འཁེལ་ཡོད་ཀྱང་འདི་ལོ་རྒྱ་ནག་ཝུ་ཧན་ནས་ཐོག་མར་མཆེད་པའི་ཏོག་དབྱིབས་གཉན་རིམས་ནད་ཀྱི་རྐྱེན་པས་རྒྱ་གར་དབུས་གཞུང་གིས་རྒྱལ་ཡོངས་ནང་ཟླ་ ༣ ཚེས་ ༢༢ ཉིན་ནས་བཀག་བསྐྱིལ་(Lockdown)རིམ་པ་འགོ་འཛུགས་སྟབས་གནས་གཅིག་ཏུ་མང་ཚོགས་འདུ་འཛོམས་ཀྱིས་མཛད་སྒོ་སོགས་བྱེད་སྒོ་ཁག་སྤེལ་ཆོག་གི་མེད།

མཛད་སྒོའི་སྟེང་སྐུ་མགྲོན་གཙོ་བོ་སྨན་རྩིས་ཁང་འགན་འཛིན་ལྷན་ཚོགས་ཀྱི་ཚོགས་གཞོན་བོད་མིའི་སྒྲིག་འཛུགས་ཀྱི་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་མཆོག་དང་།  སྨན་རྩིས་ཁང་འགན་འཛིན་མཆོག་གི་གཙོས་འགན་འཛིན་ལྷན་ཚོགས་ཀྱི་ཚོགས་མི། སྐུ་བཅར་སྨན་པ་ལྷན་རྒྱས། ཚོགས་པ་ཁག་གི་སྐུ་ཚབ། གསར་འགོད་པ། སྨན་རྩིས་ཁང་གི་དགེ་སློབ་ལས་བྱེད་བཅས་དབུས་གཞུང་གིས་ལམ་སྟོན་ལྟར་མི་གྲངས་བརྒྱ་ལས་མི་མང་བ་ཚང་མ་ཁ་རས་གྱོན་ཞིང་རྒྱང་སྡོད་(Social Distancing)ཀྱང་གང་ཐུབ་ལག་བསྟར་གནང་བ་བཞིན་ཚང་མ་ལྷན་འཛོམས་གནང་སོང་།

དེ་ནས་མགྲོན་གྱི་གཙོ་བོ་མཆོག་ནས་སྣང་གསལ་སྒྲོན་མེ་སྤར་བ་དང་སྦྲགས་འདུས་ཚོགས་ནས་གཡུ་ཐོག་གསོལ་འདེབས་རྟ་དབྱངས་དང་བཅས་གསོལ་ཇ་འབྲས་སིལ་འདེགས་འབུལ་ཞུས་རྗེས། སྨན་རྩིས་ཁང་གི་འགན་འཛིན་མཆོག་གི་གསུང་བཤད་གནང་བའི་ནང་དུ་སྨན་རྩིས་ཁང་གི་དམིགས་ཡུལ་དང་རྒྱུན་ལྡན་གྱི་གལ་གནད་ཆེ་བའི་གནས་ཚུལ་དང་། ལོ་འཁོར་གཅིག་ནང་གྲུབ་དང་འགྲུབ་བཞིན་པའི་བྱེད་སྒོ་ཁག་གི་སྐོར་ཁ་གསལ་སྒྲོགས་སྦྱང་ཞུས་གནང་སོང་། དེ་ཡང་སྨན་རྩིས་ཁང་ནས་ལས་དོན་གལ་ཆེ་ཤོས་གཅིག་སྟེ་ྋསྐུའི་འཕྲོད་བཞེས་ལ་དམིགས་ཏེ་གསོལ་སྨན་འབུལ་ཚུལ་དང་དགུང་ཀེག་རྩིས་འབྲས་སོགས་གཞུང་ལུགས་གཞིར་བཟུང་ཞབས་འདེགས་དུས་ཐོག་ཚུལ་བཞིན་ཞུ་ཚུལ་སྐོར།  སྨན་རྩིས་ཁང་གི་དགེ་སློབ་ལས་བྱེད་དང་ལས་མི་བཅས་ཀྱི་མི་ཤུགས་ཁ་གྲངས། བཙན་བྱོལ་བོད་རིགས་མང་ཚོགས་ལ་སྨན་སྦྱིན་དང་ཕྱེད་བཅག་ལ་ཟླ་རེ་ཧིན་སྒོར་འབུམ་ཉི་ཤུ་རྩ་བཞི་(24,00,000.00)གཏོང་བཞིན་པའི་སྐོར། ཏོག་དབྱིབས་གཉན་རིམས་ནད་གཞི་འཕེལ་རྒྱས་ཀྱི་ཛ་དྲག་དུས་སྐབས་སུ་སྨན་རྩིས་ཁང་ནས་མང་ཚོགས་ལ་དངོས་སུ་ཕན་ཐོགས་པའི་ལས་གཞི་གང་དང་གང་སྤེལ་ཡོད་ཚུལ་སྐོར། སྨན་རྩིས་མཐོ་སློབ་ཁང་གཉིས་ཀྱི་སྐོར་སོགས་དོན་གནད་ཁག་ལ་གསུང་བཤད་གནང་སོང་།

དེ་ཉིན་ནི་གོང་ས་སྐྱབས་མགོན་ཆེན་པོ་མཆོག་ལ་ཨ་རི་གཞུང་མང་གཉིས་ནས་རྒྱལ་ཁབ་ཀྱི་མི་སེར་ཆེ་བསྟོད་མཐོ་ཤོས་ཏེ་གྲོས་ཚོགས་ཀྱི་གསེར་གྱི་གཟེངས་རྟགས་འབུལ་བཞེས་མཛད་པའི་ཉིན་མོའི་དུས་དྲན་མཚོན་ཆེད་འདི་ག་བཞུགས་སྒར་སྨན་རྩིས་མཐོ་སློབ་ཁང་གི་སློབ་གཉེར་བ་རྣམས་གཡུ་ཐོག་སྡེ་ཚན་དང་། སྡེ་སྲིད་སྡེ་ཚན། བླ་སྨན་མཁྱེན་རབ་ནོར་བུའི་སྡེ་ཚན་བཅས་གསུམ་དུ་འབྱེད་དེ་མཉམ་གཞས་རེ་དང་། ྋགོང་ས་མཆོག་ལ་བསྟོད་པ་སྙན་ངག་གྱེར་འདོན་སྤྱན་བསྟར་ཞུས་པས་སྐུ་མགྲོན་རྣམས་ཡི་རངས་པར་གྱུར་ཡོད། སྨན་རྩིས་མཐོ་སློབ་ཁང་ནས་སྨན་རྩིས་སློབ་མའི་ལོ་འཁོར་ཡིག་རྒྱུགས་ནང་ཨང་རིམ་རྩེ་གྲས་སོན་པ་རྣམས་དང་རྒན་བདག་བཅས་ལ་སྐུ་མགྲོན་གཙོ་བོའི་ཕྱག་ནས་བྱ་དགའ་བསྩལ། དེ་ནས་སྨན་པ་སྐབས་བཅུ་བཞི་པ་དང་རྩིས་པ་སྐབས་བདུན་པ་རྣམས་གནས་སྤར་ཡིག་རྒྱུགས་དང་འབྲེལ་སྨན་རམས་པ་ཆུང་བ་དང་། རྩིས་རམས་པ་ཆུང་བའི་ཕྱག་ཁྱེར་བསྩལ། དེ་བཞིན་སློབ་ཁྲིད་གནང་མཁན་དགེ་རྒན་རྣམས་ལ་ཐུགས་རྗེ་ལེགས་འབུལ་མཚོན་བྱེད་ལེགས་སྐྱེས་བསྩལ་བ་དང་། ལྷག་པར་འདི་ལོ་སྨན་རྩིས་ཁང་ལ་ཞབས་ཕྱི་ཞུས་ནས་མི་ལོ་ཧྲིལ་པོ་སུམ་ཅུ་འཁོར་བ་ ༩ དང་། ཉི་ཤུ་འཁོར་བ་ ༡༦ བཅས་ལས་བྱེད་རྣམས་ཀྱི་ངོ་སྤྲོད་སྙིང་བསྡུས་དང་སྦྲགས་གཟེངས་བསྟོད་བྱ་དགའ་གསོལ་བསྩལ་གནང་སོང་།

  དེ་ནས་སྨན་རྩིས་ཁང་ནས་གསར་དུ་དཔར་བསྐྲུན་ཞུས་པའི་དཔེ་དེབ་ཁག་བཅུ་དགུ་ཡོད་པ་དབུ་འབྱེད་ཞུས་ཡོད། དེའི་ནང་ྋགོང་ས་མཆོག་གི་བཀའ་རྩོམ་ལས་བཏུས་པའི་ལུས་སེམས་བདེ་སྐྱིད་ཅེས་པའི་དེབ་ཕྲེང་དང་། དེ་བཞིན་ནད་རིགས་སྔོན་འགོག་གྱི་དེབ་ཕྲེང་ཨིན་བསྒྱུར་ཞུས་པ་ཁག་གཅིག ཙ་ར་ཀ་བསྡུ་བ་དེབ་ཕྲེང་གཉིས་པ། རྒྱ་སྐད་ནང་དུ་བྲིས་པའི་སྨན་རྩིས་ངོ་སྤྲོད། སྡེ་སྲིད་རིན་པོ་ཆེའི་བཻ་དཀར་དྲིས་ལན་འཁྲུལ་སྣང་གཡའ་སེལ། གསོ་རིག་ཟིན་ཏིག་དང་གཅེས་བཏུས་ཕྱོགས་བསྒྲིགས། ལུས་ཆགས་འཇིག་དང་ཐུགས་དམ་ལ་དཔྱད་པ། གསོ་རིག་སྨན་རིས་གསལ་བའི་མེ་ལོང་དེབ་ཕྲེང་གསུམ་པ་དང་བཞི་པ། བོད་ཨིན་གཉིས་ཀྱི་སྨན་རྩིས་དུས་དེབ། སྨན་རྫས་སྔོ་འབུམ་ཀུན་བཏུས། གསོ་རིག་ལས་ཕྱུང་བའི་སེམས་ཁམས་འཕྲོད་བསྟེན། ྋསྐུའི་བླ་ཟུར་རྔོག་རིགས་དགེ་སློང་ཡེ་ཤེས་དོན་ལྡན་མཆོག་གི་སྐུ་ཚེའི་ལོ་རྒྱུས། ཨིན་སྐད་ནང་དུ་སེམས་ཁམས་འཕྲོད་བསྟེན་དང་བྱིས་པའི་སེམས་ཁམས་གསོ་ཚུལ་དང་འབྲེལ་ལུས་སེམས་སྲོག་གི་ཚོགས་འདུའི་གཏམ་བཤད་ཕྱོགས་བསྡུས། དེ་དང་ཉམས་ཞིབ་སྡེ་ཚན་ནས་གོ་སྒྲིག་ཞུས་པའི་རྩ་དཀར་ནད་ཀྱི་ངོས་འཛིན་དང་བཅོས་ཐབས་སྐོར་ཉམས་མྱོང་བགྲེས་པོའི་སྨན་པ་ཁག་གཅིག་ལ་བཅར་འདྲི་ཞུས་པའི་འོད་སྡེར་གཉིས་པ་དེ་དང་། སྨན་སྦྱོར་ཁང་ནས་ཟངས་ཐལ་ཉེར་ལྔ་ཞེས་པའི་སྨན་རིལ་གསར་བཟོ་བྱས་པ་བཅས་སྐུ་མགྲོན་གཙོ་བོའི་ཕྱག་ནས་དབུ་འབྱེད་གནང་སོང་།          

མཐར་སྐུ་མགྲོན་གཙོ་བོ་འཕྲོད་བསྟེན་དྲུང་ཆེ་སྐུ་ངོ་དཔལ་ལྡན་དོན་གྲུབ་མཆོག་གི་གསུངས་དོན། ད་ལྟའི་ཆར་ྋགོང་ས་སྐྱབས་མགོན་ཆེན་པོ་མཆོག་ནི་འཛམ་གླིང་ཡོངས་སུ་ནང་པ་སངས་རྒྱས་པའི་ཆོས་ཀྱི་རྒྱལ་པོ་ལྟ་བུ་དང་། ཉི་འོད་ལྟ་བུ་ཁྱབ་ཡོད་ཀྱང་དགྲ་བོའི་ངོས་ནས་ཁོང་གི་མཛད་པ་འཕྲིན་ལས་ལ་གནོད་པ་སྐྱེལ་ཐབས་བྱེད་ཀྱང་ཉི་འོད་སྦར་མོས་མི་ཁེབ་པའི་དུས་ཚོད་ཤར་ཡོད་པ་ནི་འཛམ་གླིང་ཡོངས་ཀྱིས་ངོས་འཛིན་གསལ་པོ་ཞིག་སྟོན་ཡོད་དེ། ནོ་བེལ་ཞི་བདེ་གཟེངས་རྟགས་དང་། ཨ་རི་གྲོས་ཚོགས་གསེར་གྱི་གཟེངས་རྟགས། དེ་བཞིན་སྙན་གྲགས་ཆེ་བའི་གཟེངས་རྟགས་གྲངས་ལས་འདས་པ་ཕུལ་བ་ལས་ཤེས་ཐུབ། ལྷག་པར་ Covid-19 དཀའ་ངལ་ཆེ་བའི་དུས་སུ་ནང་སེམས་ཀྱི་སྡུག་བསྔལ་སེལ་བའི་ལམ་སྟོན་ཞུ་ས་གཙོ་བོར་འཛིན་བཞིན་ཡོད། མི་རིགས་ཤིག་གསོན་གནས་ཐུབ་པར་མི་རིགས་དེའི་གདོད་མའི་རིག་གཞུང་དང་སྐད་ཡིག་གཉིས་རྩ་ཆེན་པོ་ཞེ་དྲགས་ཆགས་ཡོད། ང་ཚོར་རིག་གནས་ཆེ་ཆུང་བཅུ་ཡོད་པའི་ནང་ནས་ཆེ་བ་གཅིག་དེ་སྨན་རྩིས་ཁང་དབུ་བརྙེས་པ་ནས་བཟུང་ད་ལྟའི་བར་འཛིན་སྐྱོང་བྱེད་ཡོད། བོད་ས་ཤོར་བ་དེ་གནས་ཚུལ་སྡུག་པོ་ཞིག་ཡིན་ཀྱང་ྋགོང་ས་སྐྱབས་མགོན་ཆེན་པོ་མཆོག་གིས་གོ་སྐབས་དེ་ཡག་པོ་ཞིག་འཛིན་བཟུང་བྱས་པ་ལ་བརྟེན་ནས་ད་ལྟའི་ཆར་སྨན་རྩིས་རིག་གཞུང་འདི་ལ་དྭགས་དང་ཨ་རུ་ནཱ་ཅལ་གཙོས་ཧི་མཱ་ལ་ཡའི་རི་རྒྱུད་ཀྱི་ཡུལ་ལུང་དང་། སོག་ཡུལ་སོགས་རྒྱལ་ཁབ་ཕལ་མོ་ཆེ་ནང་དར་ཁྱབ་བྱུང་ཡོད། ང་ཚོ་འཕྲོད་བསྟེན་ལས་ཁུངས་ཀྱིས་དུས་ནས་དུས་སུ་བཤད་བསྡད་པ་ནི། ང་ཚོས་དགྲ་ལ་ངོམ་པ་དང་གཉེན་ལ་འཕྱར་བ་དེ་ནི་སྨན་རྩིས་ཁང་ཡིན། Covid-19 སླེབ་པའི་སྐབས་སུ་ཐོག་མའི་བསམ་བློ་དེ་ནི་ད་སྨན་རྩིས་ཁང་ནས་གང་བྱེད་ཡག་འདུག་བསམ་པ་མ་གཏོགས་གཞན་པ་གང་ཡང་འཁོར་མེད། དེ་ལ་སྨན་རྩིས་ཁང་ནས་འཕྲལ་དུ་ལུས་སེམས་གསོ་བྱེད་ཀྱི་སྨན་རྣམས་གྲ་སྒྲིག་བྱས་པ་ན་འཛམ་གླིང་རྒྱལ་ཁབ་ཡོངས་རྫོགས་ཀྱིས་ལྟད་མོ་མཐོང་ཡོད་རེད་བསམ་གྱི་འདུག གང་ལགས་ཞེ་ན། རྒྱབ་ཁབ་མེད་མཁན་མི་རིགས་ཉམས་ཆུང་ཞིག་གིས་སྡུག་ས་ཤིག་ཏུ་སླེབས་སྐབས་རང་གི་ཐོན་སྐྱེན་ངོས་ནས་འཕྲལ་དུ་གྲ་སྒྲིག་བྱས་ཐུབ་ཡོད། Covid-19 ནད་པ་མང་པོ་ལ་སྨན་རྩིས་ཁང་ནས་བོད་སྨན་བཏང་རྗེས་དྲག་སྐྱེད་ཕྱིན་པ་མང་པོ་བྱུང་ཡོད། ང་ཚོས་ནད་པའི་གྲངས་ཐོ་ Data བལྟས་པ་ན་སྨན་རྩིས་ཁང་གི་བོད་སྨན་བཟོས་རྗེས་དྲག་སྐྱེད་ཕྱིན་སོང་ཟེར་མཁན་གང་ལ་གང་འཚམ་འདུག་ཅེས་གསུངས་གནང་སོང་། དེ་བཞིན་ཁོང་གིས་འཛིན་སྐྱོང་སྐོར་གསུངས་དོན་ལ། འཛིན་སྐྱོང་ནི་གལ་ཆེན་པོ་ཞེ་དྲགས་ཡིན། དེའི་ནང་ལས་ཀ་བྱེད་མཁན་ནི་རྒྱ་མཚོའི་རྦ་རླབས་ལྟ་བུ་ཚུར་སླེབ་ཀྱིན་ཕར་ཕེབས་ཀྱིན་བྱེད་པ་ལས་ཚུར་འབྱོར་རྗེས་གཏན་དུ་བསྡད་མཁན་ཞིག་མེད། འཛིན་སྐྱོང་ལས་ཀའི་ནང་དུ་ཕྱི་ནང་བར་གསུམ་ལ་ལྟ་སྐྱོང་བྱེད་དགོས་པའི་གནས་སྟངས་ཡོད་དུས་འཛིན་སྐྱོང་སྤེལ་གསུམ་གྱི་ཕྱག་ལས་འདི་སྨན་རྩིས་ཁང་ལས་ལྷག་པ་ཞིག་སུ་གང་ཡོད་ཀྱི་མ་རེད་བསམ་གྱི་འདུག སྤྱི་པའི་ལས་དོན་ནམ་འཛིན་སྐྱོང་གནང་བའི་སྐབས་སུ་བསམ་བློ་མི་མཐུན་པ་དང་། ལྟ་ཚུལ་མི་མཐུན་པ་སོགས་གནས་སྟངས་མང་པོ་ཞིག་འཛོམས་པ་ཡིན། དེའི་སྐབས་སུ་དེ་ཚོ་དགྲ་ལྟ་བུ་མ་ཡིན་པར་གྲོགས་ཀྱི་འདུ་ཤེས་ཀྱིས་ཉན་ནས་གོ་བསྡུར་བྱས་རྗེས་མང་མོས་ཀྱིས་གཏན་འབེབས་གནང་བ་ཡིན་ན་མང་གཙོའི་འགྲོ་སྟངས་དང་མཐུན་ཞིང་འཛིན་སྐྱོང་ཚགས་ཚུད་པ་དང་ཚང་མའི་འདོད་པ་བསྐངས་ཐུབ་པ་ཡིན། དེ་ལྟར་མ་ཡིན་པར། འཛིན་སྐྱོང་དེ་མི་རེ་ཟུང་ཞིག་གིས་རལ་གྲི་གནམ་གཡུག་གིས་ཐག་ཆོད་བྱེད་པ་ཡིན་ན་དེ་ནི་མང་མོས་མེད་པ་ལབ་གླེང་མང་བ་ཡོང་རྒྱུ་ཡིན། དེས་ན་སྨན་རྩིས་ཁང་གི་འཛིན་སྐྱོང་དེ་ད་ལྟའི་བར་ཚགས་ཚུད་གནང་ཐུབ་པར་གཟི་བརྗིད་ཆེན་པོ་རེད་ཅེས་གསུང་བཤད་ཟབ་རྒྱས་གནང་སོང་།

དེ་ནས་སྨན་རྩིས་ཁང་གི་དྲུང་ཆེ་མཆོག་ནས་ཐུགས་རྗེ་ཆེ་ཞུ་བ་དང་སྦྲགས་སྨན་རྩིས་བསྟན་རྒྱས་སྨོན་ལམ་རྟ་དབྱངས་དང་བཅས་དུས་དྲན་གསུམ་འཛོམས་ཀྱི་མཛད་སྒོ་དེ་ལེགས་གྲུབ་བྱུང་བ་རེད།།

མཐའ་མའི་འདོན་ཐེངས་།: 23.10.2020 ཉིན། 9:45 AM