ཏོག་དབྱིབས་ནད་པར་ཟས་སྦྱིན་ལས་གཞི་སྤེལ་བ།

སྨན་རྩིས་ཁང་ནས་བཞུགས་སྒར་དྷ་སའི་ཁུལ་གྱི་བོད་རིགས་ཏོག་དབྱིབས་གཉན་རིམས་ ༡༩ ནད་པ་རང་ཉིད་ཀྱི་ཁང་ཁྱིམ་དུ་ཟུར་བཀག་བཞུགས་བཞིན་པ་རྣམས་ལ་ཉིན་གུང་ཞལ་ལག་རིན་མེད་ཐོག་འབུལ་བའི་ལས་གཞི་སྤེལ་མུས་རེད་འདུག

            དེ་ཡང་བར་སྐབས་ཏོག་དབྱིབས་༡༩ ནད་རླབས་གཉིས་པ་ཛ་དྲག་ཧ་ཅང་ཆེ་བའི་དུས་སུ་སྣེ་ལེན་ཁང་དུ་ཟུར་བཀག་མལ་ཁྲི་ས་དམིགས་ཡོངས་སུ་ཁེངས་ཏེ། དེར་མལ་ཁྲི་ས་དམིགས་མ་ཐོབ་པའི་ཏོག་དབྱིབས་༡༩ ནད་པ་ལྷག་མ་རྣམས་ལ་ལམ་སྟོན་པས་ནད་པ་རྣམས་རང་རང་སོ་སོའི་ཁང་ཁྱིམ་དུ་ཟུར་བཀག་བཞུགས་དགོས་པའི་མངགས་ཆ་གནང་བའི་ནད་པ་དེ་རྣམས་དང་། ཡང་ན་ཏོག་དབྱིབས་ནད་པ་རང་ངོས་ནས་སྨན་རྩིས་ཁང་བཞུགས་སྒར་ཁུལ་གྱི་ཛ་དྲག་ཕྱིར་བསྐྱོད་རུ་ཁག་གི་སྨན་པ་བརྩོན་འགྲུས་སྒྲོལ་མ་ལགས་སུ་ཁ་པར་བརྒྱུད་འབྲེལ་བ་གནང་སྟེ་བོད་སྨན་བསྟེན་འདོད་ཡོད་པའི་ནད་པ་དེ་རྣམས་ལ་བདུན་རེར་ལུས་སྤྱི་ཡོངས་ཀྱི་གནས་སྟངས་དང་གཙོ་བོ་ནད་རྟགས་མཐུ་ཆེ་ཆུང་ལ་དཔགས་ནས་སྨན་ཡིག་འབྲི་བཞིན་ཡོད། དེ་ནས་སྨན་རིལ་དེ་རྣམས་ལས་བྱེད་ཅིག་གིས་ནད་པ་སོ་སོའི་སྡོད་གནས་སུ་བཅར་ཏེ་སྨན་སྤྲོད་པའི་སྐབས་སུ་གནས་སྟངས་རྒྱུས་ལོན་བྱུང་བ་རྣམས་དང་། དེ་བཞིན་སྨན་པས་ནད་པར་འདྲི་རྩད་བརྒྱུད་གནས་ཚུལ་ཤེས་རྟོགས་བྱུང་བ་ནི། རང་ཁྱིམ་དུ་ཟུར་བཀག་བཞུགས་བཞིན་པའི་ནད་པ་རྣམས་ཀྱི་ནང་ནས་འགའ་ཞིག་གཅིག་པུར་གནས་མཁན་ཡིན་པ་དང་། འགའ་ཞིག་ནང་མི་ཆ་ཚང་ནད་པ་ཡིན་པ། རེ་འགའ་ཉེ་འཁྲིས་སུ་བོད་རིགས་ཁྱིམ་མཚེས་མེད་པ། ཡང་ཁྱིམ་མཚེས་ཡོད་ཀྱང་ཛ་དྲག་ཆེ་བའི་དུས་སུ་འཇིགས་སྐྲག་དང་ཕན་ཚུན་རོགས་རམ་བྱེད་ཐབས་མི་ཤེས་པ། རེ་འགའ་མགྲོན་ཁང་དུ་ལྷག་པ་སོགས་ནད་པའི་གནས་སྟངས་སྣ་ཚོགས་ཡོད་པ་དང་། ནད་པ་དེ་རྣམས་ཏོག་དབྱིབས་གཉན་རིམས་༡༩ དབང་གིས་ལུས་ཤིན་ཏུ་ཐང་ཆད་པ་དང་། ལུས་ཟུངས་ཟད་པའི་རྐྱེན་གྱིས་དགོས་ངེས་ཞལ་ལག་བཟོ་མི་ཐུབ་པའི་དངོས་ཡོད་དཀའ་ངལ་འཕྲད་པར་བརྟེན། ནད་གསོ་བར་གཉེན་པོ་སྨན་དང་ལྷན་དུ་ཟས་སྤྱོད་གཉིས་ཀྱང་གལ་ཆེན་ཡིན་སྟབས་དཀའ་ངལ་འདི་སེལ་བའི་སླད་དུ། སྨན་རྩིས་ཁང་ནས་འདི་ལོའི་ཟླ་ ༥ ཚེས་ ༡༥ ཉིན་ནས་བཟུང་ཏོག་དབྱིབས་༡༩ ནད་པ་རྣམས་ལ་གུང་ཚིགས་ཟས་སྦྱིན་ཞབས་འདེགས་འགོ་འཛུགས་ཞུས་ཡོད། 

            འདི་ལོའི་ཟླ་ ༥ པའི་ནང་ནད་པ་གྲངས་ ༨༤ ལ་བཅུད་ལྡན་གྱི་ཉིན་གུང་ཞལ་ལག་ཕུལ་ཡོད། དེ་ཡང་ཁ་ཟས་སྣ་འཛོམས་ཡོད་པ་མ་ཟད། གྲང་ཚལ་དང་། ཤིང་ཏོག་བཅས་ཕོན་ཆེ་ཡོད་ལ། བདུན་གཅིག་གི་གཟའ་སོ་སོར་ཞལ་ལག་མི་འདྲ་བ་དམིགས་བསལ་རེའུ་མིག་གཞིར་བཟུང་འདི་ག་སྨན་རྩིས་ཁང་གི་སྤྱི་ཐབས་ནས་གཡོས་སྦྱོར་བྱས་ནས་ནད་པ་སོ་སོའི་སྒོ་དྲུང་དུ་སྐྱེལ་བཞིན་པ་བཅས་ནད་པ་རྣམས་ལ་དངོས་སུ་ཕན་ཐོགས་ཆེན་པོ་བྱུང་ཡོད། ཞལ་ལག་དེའི་འགྲོ་གྲོན་ཐད་སྨན་རྩིས་ཁང་འཛིན་སྐྱོང་ནས་གཙོ་འགན་བཞེས་པ་དང་། སྨན་རྩིས་ཁང་གི་ལས་བྱེད་དང་གླ་པ་རྣམས་ནས་རང་ནུས་ཅི་ཅོག་གིས་ཞལ་འདེབས་ཕུལ་བ་བཅས་ལས་བྱུང་བ་ཞིག་ཡིན།

མཐའ་མའི་འདོན་ཐེངས་།: 02.06.2021 ཉིན། 4:57 PM