༄༅། །ཏོག་དབྱིབས་གཉན་རིམས་ ༡༩ སྔོན་འགོག་སྨན་ཁབ་དང་འབྲེལ་བའི་བོད་ཀྱི་གསོ་བ་རིག་པའི་

ཐོག་ནས་མི་མང་རྣམས་ལ་རྩ་འཛིན་ལམ་སྟོན།

 ༼ ཏོག་དབྱིབས་སྔོན་འགོག་སྨན་ཁབ་བརྒྱབ་དང་མ་བརྒྱབ་གཙོ་བོ་གང་ཟག་རང་ཉིད་ཀྱི་འདོད་དབང་ལ་རག་ལུས་ཡོད་པ་དང་། རྒྱ་གར་

དབུས་གཞུང་དང་མངའ་སྡེ་གཞུང་གཉིས་ཀྱི་ལམ་སྟོན་གནང་བ་རྣམས་བརྩི་སྲུང་དང་ལེན་ཞུ་དགོས་པ་གལ་ཆེ་ཡིན། ༽ 

ཀ༽ སྔོན་འགོག་སྨན་ཁབ་ཀྱི་ཤེས་བྱ། 

༡། སྔོན་འགོག་སྨན་ཁབ་གང་འདྲ་ཞིག་ཡིན་རུང་བརྒྱབ་རྗེས་མི་འཕྲོད་པའི་རིགས་ཕྲན་བུ་ཡོང་གི་ཡོད་པ་རྒྱུན་ལྡན་ཡིན།

༢། སྔོན་འགོག་སྨན་ཁབ་ཀྱི་མི་མང་ཆེ་བར་མི་འཕྲོད་པའི་རིགས་ཡོང་གི་མེད་ཀྱང་འགའ་ཤས་ལ་མི་འཕྲོད་པའི་རིགས་བྱུང་སྲིད་པས།

   དེ་ནི་མི་སོ་སོའི་ཁམས་དང་རང་བཞིན་སོགས་ལ་རག་ལུས་པ་ཡིན།

༣། ད་ལྟའི་སྔོན་འགོག་སྨན་ཁབ་ལ་མི་འཕྲོད་པའི་རིགས་གསུམ་ཙམ་དབྱེ་ཡོད་པ་སྟེ།  ༡) སྤྱིར་བཏང་ཕྲན་ཚེགས་མི་འཕྲོད་པ།

    ༢) སྤྱིར་བཏང་གི་མི་འཕྲོད་པ།   ༣) སྤྱིར་བཏང་མ་ཡིན་པའི་མི་འཕྲོད་པ་བཅས་ཡིན།

*** གོང་གི་མི་འཕྲོད་པའི་ནད་རྟགས་རྣམས་སྔོན་འགོག་སྨན་ཁབ་བརྒྱབ་མཁན་ཚང་མ་ལ་འབྱུང་བའི་ངེས་པ་མེད།  

ཁ༽ སྔོན་འགོག་སྨན་ཁབ་མ་བརྒྱབ་གོང་དོ་སྣང་བྱེད་དགོས་པ་ཁག 

༡། ཏོག་དབྱིབས་སྔོན་འགོག་སྨན་ཁབ་གང་ཟག་སུ་དང་སུ་ཡི་བརྒྱབ་ཆོག་པ་དང། བརྒྱབ་རུང་བའི་གང་ཟག་སུ་དང་སུ་ཡིན་པ་རྒྱ་གར་

     དབུས་གཞུང་དང་མངའ་སྡེ་གཞུང་གི་ལམ་སྟོན་ལྟར་ཁ་གསལ་ཤེས་རྟོགས་དགོས། 

༢། ལྟོ་སྟོང་མ་ཡིན་པར་དགོས།

༣། སྨན་ཁབ་མ་བརྒྱབ་གོང་གི་དོ་ནུབ་ལུས་ལ་ངལ་གསོ་མེད་པ་དང་མཚན་གཉིད་མ་ལོག་པ། ཆགས་པས་དུབ་པ་སོགས་མ་ཡིན་པར་དགོས།

༤། ལུས་ངག་ཡིད་གསུམ་སྟེ་སྒོ་གསུམ་གྱི་བྱ་བ་དྲག་ཤུལ་བྱེད་དྲགས་པ་མ་ཡིན་པ་དགོས།

༥། བུད་མེད་ཟླ་མཚན་འབབ་དུས་མ་ཡིན་པ་དང་། ལྟོ་བ་འཁྲུ་བའི་སྐབས་མ་ཡིན་པ། བརྡབ་འགྲམས་སོགས་ཀྱི་ལུས་ཀྱི་ཟུངས་ཁྲག་ཤོར་

    བའི་དུས་མ་ཡིན་པ་དགོས།

༦། སྔོན་འགོག་སྨན་ཁབ་མ་བརྒྱབ་གོང་ཟས་སུ་ར་ཤ་དང་ཕག་ཤ ཚལ་ཁ་ཏིག་སོགས་རོ་ཁ་བའི་རིགས། གཡེར་མ། དེ་བཞིན་བཅུད་མེད་

    སྟབས་བདེའི་བཟའ་བཏུང་རིགས་འཛེམ་དགོས།

༧། སྐོམ་གྱི་རིགས་ལས་ཇ་གར་པོ་དང་འཚིག་ཇ་ཀོ་ཕི། ཇ་ཐང་གར་པོ། ཆང་རག་རྣམས་འཛེམ་དགོས།

༨། ཆེས་ཤིན་ཏུ་གལ་ཆེ་བ་གཅིག་ནི་གང་ཟག་རང་ཉིད་སྔོན་འགོག་སྨན་ཁབ་མ་བརྒྱབ་གོང་སེམས་ཀྱི་སྤྱོད་པ་ཞི་ཞིང་དུལ་བ། ཞི་བདེ་བག་ཕེབས་དགོས་པ་ལས། དངངས་ཚབས་དང་། སེམས་ངལ། ཐེ་ཚོམ་དང་རྣམ་རྟོག་དོར་ནས་སེམས་གུ་ཡངས་བློ་གཏད་ཐུབ་པ་དགོས།

༩། རང་ཉིད་ལ་བླ་གཉན་ནད་གཞི་སོགས་ཡོད་ཚེ། མི་གང་བྱུང་ལ་བློ་འདྲི་མ་ཞུས་པར། ཕྱི་ལུགས་ཆེད་ལས་སྨན་པ་དང་འབྲེལ་ཡོད་སྨན་ཁབ་རྒྱག་མཁན་ལ་ལམ་སྟོན་ཞུ་དགོས་པ་ཡིན། སྤྱིར་ན། རྒྱ་གར་དབུས་གཞུང་དང་མངའ་སྡེ་གཞུང་གི་ལམ་སྟོན་གང་གནང་བ་རྣམས་ཡིད་ལ་འཇགས་དགོས་པ་ཡིན།

༡༠། རང་ཉིད་ལ་རྒྱུན་ལྡན་མི་འཕྲོད་པའི་ (allergic reaction) རིགས་ཡོད་པ་དང་རྒྱ་སྨན་བསྟེན་གྱིན་ཡོད་ཚེ་སྨན་ཁབ་རྒྱག་མཁན་གྱི་འབྲེལ་ཡོད་ལ་ཉིན་གཅིག་སྔོན་ནས་སྙན་སེང་བཀའ་འདྲི་ཞུ་དགོས་པ་གལ་གནད་ཡིན།

ག༽ སྔོན་འགོག་སྨན་ཁབ་བརྒྱབ་ཚར་བའི་རྗེས་སུ་ཐུགས་སྣང་དགོས་པའི་ཤེས་བྱ། 

༡། ཐུགས་སེམས་ཞི་བར་གནས་ཐུབ་པ་དགོས་པ་ལས་ཐེ་ཚོམ་དང་དོགས་པ་རྣམ་རྟོག་སོགས་བྱེད་མི་རུང་།

༢། དྲག་ཤུལ་སོགས་ཀྱི་ལུས་པོ་འཁྲུགས་པ་མ་ཡིན་པར་ལྷོད་ལྷོད་ངང་གནས་དགོས།

༣། སྨན་ཁབ་བརྒྱབ་པའི་རྗེས་སུ་བཅུད་མེད་ཟས་བསྟེན་པ་དང་། ལྟོ་སྟོང་དུ་ཡུན་རིང་ལས་ཀ་བྱེད་པ། མཚན་གཉིད་མ་ལོག་པ་སོགས་

    རླུང་ནད་འཕེལ་བའི་བྱ་སྤྱོད་རིགས་ལ་ཡིད་གཟབ་གནང་དགོས།

༤། གལ་སྲིད་རང་ཉིད་ལ་མི་འཕྲོད་པའི་ནད་རྟགས་རྣམས་རྒྱུན་མཐུད་དེ་ཡོད་པ་ཡིན་ན། རང་ཉིད་ཀྱི་འདོད་མོས་ལྟར་ཕྱི་ལུགས་སམ་

    བོད་ལུགས་སྨན་པར་བསྟེན་གཏུགས་བྱ་དགོས་པ་ལས་རང་ཉིད་ནས་གང་བྱུང་དུ་སྨན་རིགས་བསྟེན་མི་རུང་།

༥། རྒྱུན་དུ་བོད་སྨན་མཆོད་བཞིན་པ་རྣམས་ནས་ཉིན་གསུམ་རིང་མཆོད་མི་རུང་།

                                                   སྨན་རྩིས་ཁང་། (གསོ་བ་རིག་པ་) ནས། ཕྱི་ལོ་ ༢༠༢༡ ཟླ་བ་ ༢ ཚེས་ ༩ ལ།

མཐའ་མའི་འདོན་ཐེངས་།: 18.02.2021 ཉིན། 4:41 PM