ལ་སྨན་རྩིས་ཁང་གི་སྨན་པ་རྣམས་ནས་སྨན་བཅོས་ཇི་ལྟར་བྱ་དགོས་པའི་ཐད་སྔ་ཕྱི་ཐེངས་གཉིས་

རྒྱས་འཛོམས་ཀྱིས་གོ་བསྡུར་བྱུང་བའི་ལམ་སྟོན་གཤམ་གསལ།

༡། ཏོག་དབྱིབས་གཉན་རིམས་༡༩ ཡི་སྔོན་འགོག་སྨན་ཁབ་དེ་བཞིན་བརྒྱབ་དང་མ་བརྒྱབ་ཀྱི་ཐག་གཅོད་ཐད་སྨན་རྩིས་ཁང་གི་ཁྱབ་ཁོངས་སྨན་པ་སུ་གང་ཞིག་ལ་ཐེ་ཇུས་བྱེད་ཆོག་པའི་དབང་ཆ་མེད། དེ་ནི་གཙོ་བོ་གང་ཟག་རང་ཉིད་ཀྱི་འདོད་དབང་ལྟར་འགྲོ་དགོས་པ་དང་རྒྱ་གར་དབུས་

གཞུང་དང་མངའ་སྡེ་གཞུང་གི་སྒྲིག་ཁྲིམས་ལྟར་ལག་བསྟར་འགྲོ་དགོས།

༢། རྒྱ་གར་ནང་བེད་སྤྱོད་བྱེད་བཞིན་པའི་སྔོན་འགོག་སྨན་ཁབ་དང་ཕྱི་རྒྱལ་ཁག་ཏུ་བེད་སྤྱོད་བཞིན་པའི་སྨན་ཁབ་གཉིས་ཐ་དད་སོང་། སྨན་རྩིས་ཁང་ངོས་ནས་ཕྱི་རྒྱལ་ཁག་ཏུ་བེད་སྤྱོད་གནང་བཞིན་པའི་སྔོན་འགོག་སྨན་ཁབ་ལ་ཐེ་ཇུས་བྱ་རྒྱུ་མིན།

༣། སྨན་རྩིས་ཁང་ནས་བཟོ་སྐྲུན་གནང་བཞིན་པའི་གསོལ་སྨན་རྣམས་ཀྱི་མ་འཐུས་པ་མེད་པས། སྔོན་འགོག་སྨན་ཁབ་ཀྱི་མི་འཕྲོད་པའི་ནད་རྟགས་རྣམས་བཅོས་ཐབས་སུ་སྨན་རྩིས་ཁང་ནས་གསོལ་སྨན་གསར་བཟོ་གནང་དགོས་པ་མིན་འདུག

༤། ཕྱིས་སུ་མི་མང་ལ་སྔོན་འགོག་སྨན་ཁབ་བརྒྱབ་པའི་སྐབས་སྨན་རྩིས་ཁང་གི་སྨན་པ་རྣམས་ནས་དམིགས་བསལ་དོ་སྣང་བྱ་དགོས་པ་ནི་གཞིས་ཆགས་ཁག་གི་རྒན་བགྲེས་རྣམས་ཡིན། ལྷག་པར་དུ་རྒན་གསོ་ཁང་ཁག་ལ་དམིགས་བསལ་གཟིགས་རྟོགས་གནང་དགོས།

༥། སྔོན་འགོག་སྨན་ཁབ་མ་བརྒྱབ་གོང་དང་བརྒྱབ་པའི་རྗེས་སུ་མི་འཕྲོད་པའི་ནད་རྟགས་གང་ཡང་མེད་པ་ལ་གསོལ་སྨན་རིན་ཆེན་མང་སྦྱོར་ལ་སོགས་པ་མི་འཕྲོད་པ་སེལ་བྱེད་དུ་གཏོང་མི་རུང་བ་དམ་དོན་བྱེད་དགོས། རྒྱུ་མཚན་ནི། བོད་སྨན་ལ་ཟུར་ཟ་བྱེད་མཁན་མང་དག་ཅིག་ཡོད་པ་དང་། སྟབས་མ་ལེགས་པའི་དབང་གིས་ཁུངས་མེད་སྐྱོན་བརྗོད་སོགས་བྱེད་སྲིད་པས་སྨན་རྩིས་ཁང་གི་སྨན་པ་རྣམས་ནས་དེ་དོན་ཡིད་ལ་འཇགས་དགོས།

༦། སྤྱིར་བཏང་མ་ཡིན་པའི་མི་འཕྲོད་པའི་ནད་རྟགས་རྣམས་རྒྱུན་མཐུད་དེ་ཉིན་གསུམ་ལས་མང་བ་གནས་ཚེ་སྨན་པ་རྣམས་ནས་སྨན་བཅོས་བྱ་དགོས་པ་ཡིན། གཙོ་བོ་སྨན་བཅོས་ཀྱི་དགོས་མཁོ་སྨན་པ་ཉིད་ནས་གཟིགས་དགོས།

༧། དམིགས་སུ་ཏོག་དབྱིབས་གཉན་རིམས་༡༩ སྔོན་འགོག་སྨན་ཁབ་ཀྱི་མི་འཕྲོད་པ་རྣམས་བཅོས་ཐབས་ཆེད་གསོལ་སྨན་གཏན་འབེབས་ཞུས་མེད་པ་དང་། སྐབས་ཐོག་མི་འཕྲོད་པའི་ནད་རྟགས་བྱུང་ཚེ་གསོལ་སྨན་གང་ལ་གང་འཚམས་ལམ་སྟོན་ཚུལ་དུ་ནད་རྟགས་ལ་གཞིག་སྟེ་གསོལ་སྨན་གཤམ་དུ་རེའུ་མིག་ནང་བཀོད་ཡོད་པས། གཙོ་བོ་ས་གནས་སྨན་པ་ཉིད་རང་ལ་སྨན་བཅོས་ཀྱི་རང་དབང་ཆ་ཚང་ཡོད་པ་དང་། ཆོས་བཅུ་ལ་དཔག་པས་གང་ལ་གང་འཚམས་ཀྱིས་སྨན་བཅོས་གནང་དགོས་པ་སྐབས་ཐོག་སྨན་པ་ཉིད་ནས་ཤེས་དགོས་པ་ཡིན།

༨། གཤམ་གྱི་རེའུ་མིག་ནང་གསལ་བའི་གསོལ་སྨན་གཏོང་ཚུལ་རྣམས་སྐུ་བཅར་སྨན་པ་རྣམས་དང་། དབུས་སུ་ཡོད་པའི་ནད་བཅོས་དང་ནད་བཅོས་ཉམས་ཞིབ་ཚོགས་ཆུང་དང་། སྨན་སྦྱོར་དང་སྨན་རྫས་ཚོགས་ཆུང་གི་ཚོགས་མི་རྣམས་ནས་རང་ཉིད་ཀྱི་རྣམ་དཔྱོད་ཀྱི་རྩལ་དང་། ནད་ཐོག་ཉམས་མྱོང་གི་དགོངས་འཆར་ཕུལ་བ་ཡིན་སྟབས། སྨན་པ་གཞན་རྣམས་ལ་ཕན་འབྲས་ཡོང་སླད་དང་ལེགས་ཆ་ལེན་རྒྱུའི་ཆེད་བསྒྲིགས་པ་ཡིན།

༩། མི་མང་རྣམས་ཀྱི་ཆེད་སྔོན་འགོག་སྨན་ཁབ་མ་བརྒྱབ་གོང་དང་བརྒྱབ་པའི་རྗེས་སུ་དོ་སྣང་བྱེད་དགོས་པའི་ལམ་སྟོན་ཁག་ལོགས་སུ་ཡོད་པས་སྨན་རྩིས་ཁང་གི་ཁྱབ་ཁོངས་སྨན་པ་རྣམས་ནས་ངེས་པར་ཤེས་དགོས་པ་གལ་གནད་ཡིན།

*** གོང་གི་གསོལ་སྨན་རྣམས་གཏན་འབེབས་མ་ཡིན་པས། གཙོ་བོ་སྨན་པ་སོ་སོའི་རྣམ་དཔྱོད་ཀྱིས་མི་འཕྲོད་པར་གསོ་བཅོས་བྱ་དགོས།

མཆན། བཀའ་འདྲི་གནང་འདུན་མཆིས་ཚེ་ཆེས་མཐོའི་སྨན་རྩིས་རིག་གཞུང་ལྷན་ཚོགས་ཀྱི་ཚོགས་དྲུང་སྨན་པ་ཉི་མ་ཚེ་རིང་ལ་

mac@men-tsee-khang.org ཐོག་འབྲེལ་བ་གནང་རོགས།

  སྨན་རྩིས་ཁང་། (གསོ་བ་རིག་པ་) ནས། ཕྱི་ལོ་ ༢༠༢༡ ཟླ་བ་ ༢ ཚེས་ ༡༠ ལ།

མཐའ་མའི་འདོན་ཐེངས་།: 24.02.2021 ཉིན། 4:48 PM