ཊོ་མེ་ཊོ་གཉན་རིམས་ (Tomato Flu) ཀྱི་ངོ་སྤྲོད་མདོ་ཙམ།

- ཅོན་ཏ་ར་གསོ་བ་རིག་པ་སློབ་གཉེར་དང་ཉམས་ཞིབ་ཁང་། 

དང་པོ། ངོ་སྤྲོད། 

འཛམ་གླིང་སྤྱི་ཚོགས་ཁྱོན་ཡོངས་ཀྱི་ཚན་རིག་པས་ཏོག་དབྱིབས་གཉན་རིམས་༡༩ (Covid 19)དང་། ཧམ་སྤུ་ནག་པོ།(Black Fungus)ཧམ་སྤུ་དཀར་པོ།(White Fungus)སྤྲེལ་འབྲུམ་ནད་དུག་(Monkeypox)བཅས་ལ་ད་ལྟའང་གདོང་ལེན་བྱེད་བཞིན་པའི་གཉན་འཕྲང་ཅན་གྱི་སྐབས་འདིར་རྒྱ་གར་ནང་རིམས་ནད་གསར་པ་ཊོ་མེ་ཊོ་གཉན་རིམས་ཞེས་སུ་འབོད་པ་ཞིག་འགོས་ཁྱབ་འབྱུང་བཞིན་ཡོད།

དེ་ཡང་ཕྱི་ལོ་༢༠༢༢ ཟླ་ ༥ ཚེས་ ༦ ཉིན་གཉན་རིམས་འདི་ཐོག་མར་རྒྱ་གར་ལྷོ་ཕྱོགས་ཀེ་ར་ལ་མངའ་སྡེར་གསར་ཐོན་བྱུང་སྟེ། ལོ་ལྔ་མན་གྱི་བྱིས་པར་ཕོག་མང་པ་དང་། ནད་རྟགས་སུ་ན་ཟུག་ཆེ་བའི་ཆུ་འབུར་དམར་པོ་ཅན་ཐོན་པ་དེ་རིམ་པས་འཕེལ་ཏེ་ཊོ་མེ་ཊོ་ཆེ་ཆུང་ལྟར་འབྱུང་བ་ལ་བརྟེན་ནས་ཊོ་མེ་ཊོ་གཉན་རིམས་ཞེས་ཐ་སྙད་བཏགས་ཤིང་། ད་བར་རྒྱ་གར་མངའ་སྡེ་ཀེ་ར་ལ་དང་། ཏ་མིལ་ནཱ་ཌུ། ཧར་ཡ་ན། ཨོ་ཌི་ཤ་བཅས་སུ་ནད་གྲངས་བརྒྱ་ལྷག་བྱུང་ཡོད།

གཉན་རིམས་འདི་ Coxsackie ཞེས་པའི་ནད་དུག་རྐྱེན་གྱིས་འབྱུང་ཞིང་། ལག་པ་དང་། རྐང་པ། ཁའི་ནད་ (hand-Foot-and- mouth disease: HFMD) ཞེས་པའི་ནད་རིགས་ཆ་འདྲ་བ་ཡོད་པ་ངོས་འཛིན་བྱེད་བཞིན་ཡོད། ཁྱད་པར་ལོ་ལྔ་མན་གྱི་བྱིས་པ་དང་། ལུས་ཀྱི་སྔོན་འགོག་མ་ལག་ཞན་པའི་གང་ཟག་རྣམས་ལ་འབྱུང་བཞིན་ཡོད།

ཊོ་མེ་ཊོ་གཉན་རིམས་ནད་དུག་ཡོད་མཁན་གྱི་ཁ་ལུད་དང་། མཆིལ་མ། བཤང་བ། འབྲུམ་པའམ་རྨ་ཁ་སོགས་ལ་རེག་ཐུག་བྱུང་བ་ལས་མི་དང་མིའི་བར་ལ་མཆེད་ཅིང་ཁྱབ་གདལ་དུ་འགྲོ་བ་ཡིན། གཞན་ཡང་ནད་འདི་ལག་པ་གཙང་མ་མེད་པ་དང་། ཁོར་ཡུག་བཙོག་པ། རླུང་ཁམས་བཅས་ཀྱི་བརྒྱུད་ནས་འགོས་བཞིན་ཡོད།

གསུམ་པ། ནད་རྟགས།

ཊོ་མེ་ཊོ་གཉན་རིམས་ཞེས་པ་འདི་ཌེང་གྷིའི་(Dengue) དང་། ཅི་ཀན་གུ་ནིཡ་(Chikungunya) ནད་གཉིས་ཀྱི་རྗེས་འབྲས་ཡིན་པ་མཁས་པ་རིགས་གཅིག་ནས་ངོས་འཛིན་བྱེད་བཞིན་པ་མ་ཟད། ནད་རྟགས་ཡང་ཆ་འདྲ་བ་མང་པོ་ཡོད། གཉན་རིམས་འདིའི་ནད་རྟགས་ནི། ཚ་བ་རྒྱས་པ་དང་། པགས་པ་གཡའ་བ། རྐང་ལག་གི་མདོག་འགྱུར་བ། ངལ་དུབ་ཆེ་བ། ཁོག་སྨད་གཟེར་བ། དང་ག་འགག་པ། འཁྲུ་སྐྱུགས་བྱེད་པ། ཞེ་མེར་ལངས་པ། ལུས་ཀྱི་ཆུ་སྐམ་པ། ཚིགས་སྐྲངས་པ། རུས་ཟུག་རྒྱག་པ། འབྲུམ་པ་ཐོན་པ་སོགས་འབྱུང་བ་ཡིན།

བཞི་པ། བརྟག་ཐབས་དང་གསོ་ཐབས།

གལ་ཏེ་གོང་གི་ནད་རྟགས་ཡོད་ན། ཌེང་གྷིའི་(Dengue)དང་། ཅི་ཀན་གུ་ནིཡ།(Chikungunya) ཛི་ཀ་ནད་དུག(Zika Virus) ཝ་རི་སི་ལ་ཛོས་ཊར་ནད་དུག(Varicella-zoster Virus) ཧཱར་པིས་(Herpes) བཅས་ཀྱི་ནད་རྣམས་གྲུབ་རྫས་དང་ཆུ་སེར་གྱི་བརྟག་དཔྱད་(Molecular and Serological Test) བརྒྱུད་མ་ཐོན་ཚེ་ཊོ་མེ་ཊོ་གཉན་རིམས་ཡིན་པ་ཐག་གཅོད་པ་ཡིན་ཞེས་ཉམས་ཞིབ་མཁས་པས་བརྗོད་ཡོད།

ནད་འདི་སྲོག་ལ་ཉེན་ཁ་མེད་ལ། སྨན་བཅོས་ཀྱང་མི་དགོས་པར་རང་བཞིན་གྱི་དྲག་བསྐྱེད་འབྱུང་བ་མང་ལ། ད་ལྟའི་ཆར་ནད་འདིར་བཅོས་ཐབས་དམིགས་བསལ་མེད་པས་ཌེང་གྷིའི་དང་ཅི་ཀན་གུ་ནིཡའི་ནད་ལྟར་སྨན་བཅོས་བྱེད་བཞིན་ཡོད། ཊོ་མེ་ཊོ་གཉན་རིམས་ཕོག་པའི་ནད་པ་རྣམས་ཟུར་བཀག་ཏུ་སྡོད་དགོས་པ་དང་། ངལ་གསོ་རྒྱག་པ། སྐོམ་ཆུའི་རིགས་མང་དུ་བསྟེན་པ། པགས་འབྲུམ་ལ་ཆུ་ཚ་བོའི་དུགས་རྒྱག་པ། གལ་ཏེ་ཚ་བ་དང་ན་ཟུག་ཡོད་ན་སྨན་ Paracetamol སོགས་བསྟེན་བཞིན་ཡོད།

ལྔ་པ། སྔོན་འགོག་བྱེད་ཐབས།

• ལག་པ་གཙང་མ་འཁྲུ་བ་དང་ཁོར་ཡུག་གཙང་མ་ཉར་དགོས།
• གཉན་རིམས་དེ་ཉིད་འགོས་པའི་ནད་པ་རྣམས་ཀྱི་རྩེད་ཆས་དང་། ཟས་གོས། ཅ་དངོས་རིགས་ལ་རེག་ཐུག་མི་རུང་།
• ནད་དེ་ཉིད་མི་དང་མིའི་འབྲེལ་ཐུག་ལ་བརྟེན་ནས་འགོ་བཞིན་ཡོད་སྟབས་ཟུར་བཀག་གི་ཐབས་ལམ་བེད་སྤྱོད་བྱེད་དགོས།
• ལྷག་པར་ལུས་ཟུངས་ཞན་པའི་གང་ཟག་ལ་ཕོག་སླ་བ་ཡོད་པས་ལུས་ཟུངས་ཞན་པ་རྣམས་ཀྱིས་གཟབ་ནན་བྱེད་དགོས།
• གཞན་ཡང་རྒྱུན་དུ་ཟས་སྤྱོད་ཚུལ་བཞིན་བསྟེན་པ་དང་། ལུས་ཟུངས་གསོ་བྱེད་བོད་སྨན་སོགས་བསྟེན་ནས་ལུས་ཟུངས་མ་ཉམས་པར་བྱེད་དགོས་པ་བཅས་ཡིན་ནོ།།

མཐའ་མའི་འདོན་ཐེངས་།: 31.03.2023 ཉིན། 11:01 AM