ཆོས་རིག་དྲུང་ཆེ་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ།

འགྲོ་ཕན་བོད་ཀྱི་སྨན་རྩིས་ཁང་གི་འགན་འཛིན་ལྷན་ཚོགས་ཀྱི་ཚོགས་མི་བོད་མིའི་སྒྲིག་འཛུགས་ཀྱི་ཆོས་རིག་དྲུང་ཆེ་ཀླུ་ཁྲི་ཚང་འཆི་མེད་ཚེ་དབྱངས་ལགས་ཟླ་ ༤ ཚེས་ ༩ ཞོགས་པ་ཆུ་ཚོད་ ༦ ཙམ་ལ་རྒྱལ་ས་དིལླིའི་སྨན་ཁང་ཞིག་ཏུ་དུས་མིན་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་ཐོན་པར་འདི་ག་འགྲོ་ཕན་བོད་ཀྱི་སྨན་རྩིས་ཁང་གི་འགོ་ལས་ཡོངས་ནས་ཉིན་རྒྱབ་ཆུ་ཚོད་ ༣ ནས་ ༤ བར་མཆོད་ཁང་དུ་གཞུང་འབྲེལ་མཆོད་འབུལ་སྨོན་ལམ་ཚོགས་པ་དང་། དེ་ནས་དམ་པ་དེ་ལ་མྱ་ངན་མཚོན་བྱེད་དབུས་ཀྱི་སྡེ་ཚན་ཡོངས་རྫོགས་ལས་མཚམས་བཞག་ཡོད། འགྲོ་ཕན་བོད་ཀྱི་སྨན་རྩིས་ཁང་གི་འགོ་ལས་ཡོངས་ནས་ཤུལ་ལུས་ནང་མི་གཉེན་ཚན་རྣམས་ལ་གདུང་སེམས་མཉམ་སྐྱེད་ཀྱིས་སེམས་གསོ་ཞུ་བཞིན་མཆོག་གསུམ་སྨན་བླ་མཆེད་བརྒྱད་ལ་ལྷག་བསམ་དག་པའི་དགེ་བའི་སྟོབས་དང་། ལྷག་པར་ཇི་ལྟར་འཕགས་མཆོག་སྤྱན་རས་གཟིགས་ཀྱིས་དམིགས་བསལ་བོད་མིའི་སྒྲིག་འཛུགས་ཀྱི་སྲི་ཞུ་བར་ཚེ་རབས་ནས་ཚེ་རབས་སུ་རྫེས་འཛིན་ཞལ་བཞེས་བཟང་པོ་ཡོད་པ་ལྟར་དམ་པ་དེ་འཕྲལ་མྱུར་ཕྱག་ན་པདྨོའི་གདུལ་ཞིང་དུ་མངོན་མཐོའི་ལུས་རྟེན་རིམ་བརྒྱུད་ཀྱིས་མཐར་ཐུག་ངེས་ལེགས་མངོན་དུ་འགྱུར་བའི་བསྔོ་སྨོན་ཞུ།།

དམ་པ་དེའི་སྐུ་པར་དང་ལོ་རྒྱུས་སྙིང་བསྡུས་བོད་མིའི་སྒྲིག་འཇུགས་བོད་ཡིག་དྲ་རྒྱ་ནས་ཟུར་འདོན་ཞུས་པ་འདི་ལྟར།



དམ་པ་ཁོང་ནི། ཕྱི་ལོ་ ༡༩༧༢ ཟླ་ ༨ ཚེས་ ༡ ཉིན་ཅོན་ཏ་ར་བོད་མིའི་གཞིས་ཆགས་སུ་སྐྱེས་ཤིང་། ཕྱི་ལོ་ ༢༠༠༠ ཟླ་བ་ ༡ ཚེས་ ༢༤  ནས་ཟླ་དྲུག་ཚོད་ལྟའི་ཐོག་ཤེས་རིག་ལས་ཁུངས་ཀྱི་དྲུང་གཞོན་ལས་རོགས་སུ་བསྐོ་གཞག་གནང་།  ཕྱི་ལོ་ ༢༠༠༠ ཟླ་བ་ ༨ ཚེས་ ༡༨ ནས་གཞུང་ཞབས་ངོ་མར་བསྐོ་གཞག་དང་ཤེས་རིག་ལས་ཁུངས་སུ་ལས་འགན་རང་འཇགས། ཕྱི་ལོ་ ༢༠༠༤ ཟླ་བ་ ༡༡ ཚེས་ ༡༩  ནས་དྲུང་ཆེ་གཞོན་པར་གནས་སྤར་གནང་། ཕྱི་ལོ་ ༢༠༠༤ ཟླ་བ་ ༡༢ ཚེས་ ༡༥   ནས་ཤེས་རིག་ལས་ཁུངས་ཀྱི་དྲུང་ཆེ་གཞོན་པའི་ལས་འགན་ཐོག་བཀོད་སྒྲིག  ཕྱི་ལོ་ ༢༠༡༠ ཚེས་ ༡༠ ཚེས་ ༡༣   ནས་ཟུང་འབྲེལ་དྲུང་ཆེར་གནས་སྤར་གནང་། ཕྱི་ལོ་༢༠༡༠ ཟླ་བ་ ༡༠ ཚེས་ ༡༩  ནས་ཤེས་རིག་ལས་ཁུངས་ཀྱི་ཟུང་འབྲེལ་དྲུང་ཆེར་ལས་འགན་བཀོད་སྒྲིག་གནང་། ཕྱི་ལོ་ ༢༠༡༦ ཟླ་བ་ ༩ ཚེས་ ༡  དྲུང་ཆེ་ལས་འཕར་དུ་གནས་སྤར་གནང་། ཕྱི་ལོ་ ༢༠༡༦ ཟླ་བ་ ༡༠ ཚེས་ ༡ ནས་ཕྱི་དྲིལ་ལས་ཁུངས་ཀྱི་དྲུང་ཆེ་ལས་འཕར་དུ་ལས་འགན་བཀོད་སྒྲིག་གནང་། ཕྱི་ལོ་ ༢༠༢༠ ཟླ་བ་ ༨ ཚེས་ ༡༧ ནས་དྲུང་ཡིག་ཆེན་མོའི་གནས་རིམ་དུ་གནས་སྤར་གནང་། ཕྱི་ལོ་ ༢༠༢༠ ཟླ་བ་ ༩ ཚེས་ ༡ ནས་ཕྱི་དྲིལ་ལས་ཁུངས་ཀྱི་དྲིལ་བསྒྲགས་དྲུང་ཆེའི་ལས་འགན་བཀོད་སྒྲིག་གནང་། ཕྱི་ལོ་ ༢༠༢༡ ཟླ་བ་ ༩ ཚེས་ ༡  ནས་ཆོས་རིག་ལས་ཁུངས་ཀྱི་དྲུང་ཆེར་བཀོད་སྒྲིག་གནང་ནས་ཐུགས་འགན་བཞེས་མུས་ཡིན་པ་བཅས།།

མཐའ་མའི་འདོན་ཐེངས་།: 12.04.2024 ཉིན། 11:00 AM