གུ་རུ་ཀུལ་སློབ་ཕྲུག་ལ་བོད་ཀྱི་སྨན་རྩིས་རིག་པའི་གོ་རྟོགས་སྤེལ།

ཕྱི་ལོ་ ༢༠༢༤ ཟླ་ ༦ ཚེས་ ༢༦ ཉིན་ྋགོང་ས་ྋསྐྱབས་མགོན་ཏཱ་ལའི་བླ་མ་མཆོག་གི་ཀུན་ཕན་བདེ་རྩ་ཚོགས་པས་(Foundation for Universal Responsibility of His Holiness the Dalai Lama: FURHHDL) གོ་སྒྲིག་འོག་གུ་རུ་ཀུལ་ལས་རིམ་ (Gurukul Programme) མཚན་ཐོག་རྒྱ་གར་མཐོ་སློབ་འདྲ་མིན་ནང་སློབ་གཉེར་གནང་བཞིན་པའི་རྒྱ་གར་བ་སློབ་ཕྲུག་ ༣༢ བཞུགས་སྒར་དྷ་སར་བོད་བརྒྱུད་ནང་བསྟན་གྱི་ཆོས་དང་། རིག་གཞུང་། གོམས་གཤིས་སོགས་ལ་གོ་རྟོགས་འཕེལ་ཕྱིར་ཕེབས་པའི་མཛད་རིམ་ནང་དུ་འགྲོ་ཕན་བོད་ཀྱི་སྨན་རྩིས་ཁང་དུའང་གཟིགས་སྐོར་ལ་ཕེབས་ཡོད།

ཁོང་རྣམ་པ་ཐོག་མར་རང་རེའི་སྨན་སྦྱོར་ཁང་དང་སྤུས་ཚད་སྟངས་འཛིན་སྡེ་ཚན་ལ་ཕེབས་སྐབས་སྨན་པ་རྡོ་རྗེ་ཚེ་རིང་ལགས་ནས་སྨན་སྦྱོར་ཁང་ངོ་སྤྲོད་དང་འགྲེལ་བཤད་གནང། དེ་བཞིན་སྤུས་ཚད་སྟངས་འཛིན་འགན་འཛིན་བསྟན་འཛིན་ནོར་ལྷ་ལགས་ཀྱིས་སྤུས་ཚད་སྟངས་འཛིན་སྡེ་ཚན་གྱི་རྒྱུན་ལྡན་ལས་གཞི་ངོ་སྤྲོད་གནང་ཡོད།

དེ་ནས་མཐོ་སློབ་ཚོགས་ཁང་དུ་ཉམས་ཞིབ་སྡེ་ཚན་འགན་འཛིན་སྨན་རམས་པ་རིག་འཛིན་བཟང་མོ་ལགས་དང་། སྐར་རྩིས་པ་བསྟན་འཛིན་བློ་ལྡན་ལགས་གཉིས་ནས་བོད་ཀྱི་གསོ་བ་རིག་པ་དང་སྐར་རྩིས་རིག་པའི་ངོ་སྤྲོད་གཏམ་བཤད་གནང་བས་སློབ་ཕྲུག་རྣམས་དོ་སྣང་ཆེན་པོས་དྲི་བ་དྲིས་ལན་བརྒྱུད་བོད་ཀྱི་སྨན་རྩིས་རིག་པའི་སྐོར་མཁྱེན་རྟོགས་ཟབ་ཏུ་ཕྱིན་ཡོད།

དེ་རྗེས་མཐོ་སློབ་ཚོགས་ཁང་རང་དུ་དཔེ་ཐོག་ཞིབ་འཇུག་དང་པར་སྐྲུན་སྡེ་ཚན་གྱི་སྨན་པ་ལྔ་ནས་སློབ་ཕྲུག་ཚོར་བོད་ཀྱི་གསོ་བ་རིག་པའི་ཐུན་མིན་ཕྱག་རྩ་བརྟག་དཔྱད་དང་སྨན་བཅོས་བྱས་ཤིང་། མཐར་འགྲོ་ཕན་བོད་ཀྱི་སྨན་རྩིས་ཁང་གི་འགྲེམས་སྟོན་ལ་གཟིགས་སྐོར་ཕེབས་ཏེ་མཛད་རིམ་དོན་དང་མཐུན་པར་མཇུག་སྒྲིལ་བ་རེད།།

མཐའ་མའི་འདོན་ཐེངས་།: 05.08.2024 ཉིན། 11:15 AM