གསོ་རིག་ལུགས་ཀྱི་ལུས་ཆགས་ཚུལ་སོགས་གླེང་བ།

ཕྱི་ལོ་ ༢༠༡༨ ཟླ་ ༥ ཚེས་ ༣ - ༤ ཉིན་གཉིས་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་དབུ་བཞུགས་ཐོག་ར་ཤི་ཡའི་ཚན་རིག་པ་དང་ནང་པའི་མཁས་པའི་དབར་འཇིག་རྟེན་ཁམས་ལ་དཔྱད་པ་ཞེས་པའི་བརྗོད་གཞི་སྟེང་བགྲོ་གླེང་ཐེངས་གཉིས་པ་ཚོགས་སྐབས་སྨན་རྩིས་ཁང་གི་སྨན་པ་རྣམ་གྲོལ་ལྷ་མོ་ལགས་ནས་བོད་ཀྱི་གསོ་རིག་སྐོར་ལ་གཏམ་བཤད་གནང་ཡོད།
    

               Photo courtesy: www.dalailama.com
དེ་ཡང་ར་ཤི་ཡ་ནས་ཕེབས་པའི་ཚན་རིག་མཁས་པ་མི་གྲངས་ ༢༦ དང་ནང་པའི་མཁས་དབང་དབར་བགྲོ་གླེང་ཐེངས་གཉིས་པའི་ཉིན་མཐའ་མའི་སྔ་དྲོ་ཕྱག་ཚོད་ ༡༠ མ་ཟིན་ཙམ་ལ་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གཙོ་བཞུགས་ཐོག་བཞུགས་སྒར་སྨན་རྩིས་མཐོ་སློབ་ཁང་གི་སྨན་དགེ་རྣམ་གྲོལ་ལྷ་མོ་ལགས་ནས་བོད་ཀྱི་གསོ་རིག་སྒོ་ནས་འཇིག་རྟེན་ཁམས་ཤེས་རྟོགས་བྱེད་པ་ཞེས་པའི་བརྗོད་གཞི་དང་འབྲེལ་ནས། བོད་ཀྱི་གསོ་བ་རིག་པའི་དགོངས་དོན་གཞིར་བཟུང་མིའི་ལུས་ཆགས་ཚུལ་སྐོར་གཏམ་བཤད་གནང་ཡོད། ཁོང་གིས་མི་ལུས་གྲུབ་པར་འབྱུང་བ་ལྔ་དང་བར་དོའི་རྣམ་ཤེས་ངེས་པར་ཚང་དགོས་པ་དང་། དེ་བཞིན་བདུན་ཕྲག་སོ་སོར་མངལ་གནས་ལུས་ཀྱི་འཕེལ་རིམ། དེ་དང་སྦྲགས་ནས་ཉེས་གསུམ་གྱི་རྣམ་གཞག དབུ་རྐྱང་རོ་གསུམ་གྱི་རྩའི་སྐོར། ནད་ཀྱི་རྒྱུ་རྐྱེན་དང་ཟས་སྤྱོད་སྤང་བླང་སོགས་ཀྱི་སྐོར་གསུང་བཤད་གནང་བ་མ་ཟད་ྋགོང་ས་སྐྱབས་མགོན་ཆེན་པོ་མཆོག་གིས་དོགས་འདྲིའི་ཚུལ་མཛད་པ་དང་ཚན་རིག་པའི་དྲི་བར་ལན་འདེབས་ཀྱང་གནང་ཡོད།

བགྲོ་གླེང་འདི་བོད་ཀྱི་དོན་གཅོད་དང་བོད་སྐྱོབ་ཐེབས་ཁང་། ཏྰ་ལའི་བླ་མའི་དགེ་རྩ་བཅས་ཐུན་མོང་ནས་གོ་སྒྲིག་གནང་བ་ཞིག་ཡིན། དུས་རྒྱུན་ནས་བགྲོ་གླེང་དེའི་རིགས་དྲ་རྒྱ་བརྒྱུད་ཐད་གཏོང་གནང་སྲོལ་ཡོད་པ་བཞིན་ད་ཐེངས་ཀྱི་བགྲོ་གླེང་དེ་ཡང་ཐད་སྲིང་གནང་བར་འཛམ་གླིང་ས་ཕྱོགས་གང་སར་ནས་མི་གྲངས་སྟོང་ཕྲག་བརྒལ་བས་ལྟ་ཉན་བྱས་ཡོད།  དེ་ལྟར་གོ་སྒྲིག་ཚོགས་ཆུང་གིས་བླ་ན་མེད་པའི་གོ་སྐབས་བསྩལ་བ་ལྟར་གཏམ་བཤད་བྱས་པས་བོད་ཀྱི་གསོ་རིག་བསྟན་པར་གོ་རྟོགས་ཁྱབ་འཕེལ་ཐད་ཕན་ཐོགས་འབྱུང་ཡོད་ངེས་ཡིན།

འདིར་ནོན། སྨན་རམས་པ་རྣམ་གྲོལ་ལྷ་མོ་ལགས་ཀྱིས་གཏམ་བཤད་གསན་གཟིགས་ཐུབ།

མཐའ་མའི་འདོན་ཐེངས་།: 07.05.2018 ཉིན། 3:29 PM