སྨན་རྩིས་དྲ་བ། - མདུན་ངོས།

གསར་འགོད་གསལ་བསྒྲགས།
བརྗོད་བྱ་སྤེལ་མཁན། རྩོམ་སྒྲིག་པ། (admin) ཟླ་ཚེས། 04.03.2019
མདུན་ངོས། >>

གནད་དོན་གསུམ་ཐོག་གསར་འགོད་གསལ་བསྒྲགས།

ཕྱི་ལོ་ ༢༠༡༩ ཟླ་ ༣ ཚེས་ ༡ ཉིན་བཞུགས་སྒར་བོད་ཀྱི་སྨན་རྩིས་ཁང་གི་སྨན་རྩིས་མཐོ་སློབ་ཚོགས་ཁང་དུ་གསར་འགོད་གསལ་བསྒྲགས་ཤིག་སྤེལ་ཡོད། དེར་སྨན་རྩིས་ཁང་གི་འགན་འཛིན་ཚེ་རིང་བཀྲ་ཤིས་མཆོག་དང་། རྒྱལ་བའི་བླ་ཞབས་སྨན་པ་གཙོ་བོ་ཚེ་དབང་རྟ་མགྲིན་མཆོག་དང་། ཉམས་ཞིབ་སྡེ་ཚན་གྱི་སྨན་པ་བསྟན་འཛིན་ལྷུན་གྲུབ་ལགས་དང་། ཌོཀ་ཊར་ས་རཧ་སལ་ལོན་ལགས་ཀྱི་གཙོས་པའི་བོད་རིགས་གསར་འགོད་པ་རྣམས་དང་། སྨན་རྩིས་ཁང་གི་ལས་བྱེད་བཅས་ཚང་འཛོམས་ཐོག་དོན་གནད་གསུམ་གྱི་སྟེང་གསར་འགོད་གསལ་བསྒྲགས་བསྐྱངས།

དེ་ཡང་རྒྱ་གར་ལྷོ་ཕྱོགས་སྦེང་ག་ལུ་རུར་ཏྰ་ལའི་བླ་མའི་མཐོ་སློབ་ནང་དུ་བོད་ཀྱི་སྨན་རྩིས་ཁང་གི་སྨན་རྩིས་མཐོ་སློབ་གསར་རྒྱག་ཆེད་རྒྱ་གར་དབུས་གཞུང་གི་ཨྰཡུཥ་སྡེ་ཚན་དང་། ཀར་ན་ཊ་ཀའི་མངའ་སྡེ་གཞུང་ཐུན་མོང་ནས་ཧིན་སྒོར་འབུམ་དགུ་བརྒྱ་དང་། དེ་བཞིན་འཛིན་ཆས་དང་། ཀཾ་པུ་ཊར། དཔེ་མཛོད་ཀྱི་དེབ་ཀྱི་ཆེད་དུ་ཧིན་སྒོར་འབུམ་བརྒྱ་དང་ལྔ་བཅུ་བཅས་ཁྱོན་བསྡོམས་སྒོར་འབུམ་ཆིག་སྟོང་ལྷག་ཙམ་གྱི་དཔལ་འབྱོར་མཐུན་འགྱུར་གནང་བར་སྨན་རྩིས་ཁང་འགོ་ལས་ཡོངས་ནས་ཐུགས་རྗེ་ཆེ་ཞུས་པ་དང་། འགན་འཛིན་མཆོག་གིས་གསུངས་པར། དེ་རིང་ང་ཚོས་དགའ་ཚོར་བྱེད་དགོས་པའི་རྒྱུ་མཚན་གཉིས་ཡོད། དང་པོ་ནི་སྨན་རྩིས་མཐོ་སློབ་ཁང་གི་ཆེད་དུ་དངུལ་འབོར་ཆེན་པོ་གནང་བའི་དགའ་ཚོར་དང་། གཉིས་ནས་རྒྱ་གར་དབུས་དང་ཀར་ན་ཊ་ཀ་མངའ་སྡེ་གཞུང་གཉིས་ཀས་སྦེང་ལོར་དུ་སྨན་རྩིས་མཐོ་སློབ་གསར་རྒྱག་གི་ལས་གཞི་འགྲོ་བཞིན་པ་དེ་གཞན་ལ་དཔེ་སྟོན་ཆེད་ཡིན་ཞེས་གསུངས་བྱུང་བ་དེ་ཡིན་ཞེས་གསུངས་།

དེ་ནས་གནད་དོན་གཉིས་པ་དེ་ནི་ཕྱི་ལོ་ ༡༩༩༤ ལོར་སྨན་རྩིས་མཐོ་སློབ་ཁང་ནས་ཐོན་པའི་སྨན་པ་དགེ་སློང་བསྟན་འཛིན་བྱང་ཆུབ་ལགས་སྔ་ལོ་ཕྱི་ཟླ་ ༤ པའི་ནང་ Poland ཡུལ་དུ་གློ་བུར་འདས་གྲོངས་སུ་ཕྱིན་པ་རེད། ཁོང་གི་སྨན་ཁང་དེ་ནི་ཁྲིམས་མཐུན་ཡིན་པ་མ་ཟད་ནད་པ་བསྟེན་གཏུགས་བྱེད་མཁན་ཡང་མང་པོ་ཡོད། ད་ཆ་སྨན་ཁང་དེ་སྨན་པ་འདས་པོའི་ཨ་མས་དགའ་ལྡན་ཕོ་བྲང་ལ་ཕུལ་བ་དང་དགའ་ལྡན་ཕོ་བྲང་ནས་སྨན་རྩིས་ཁང་ལ་གནང་ཡོད་ཚུལ་སྐོར་དང་། གཞན་ཡང་འགན་འཛིན་མཆོག་གིས་གསུངས་པར། སྨན་པ་བསྟན་འཛིན་བྱང་ཆུབ་མི་གཅིག་གིས་དཀའ་ལས་བརྒྱབ་ནས་སྨན་ཁང་འཛུགས་སྐྲུན་བྱས་པ་དེ་ཞེ་དྲག་ཡག་པོ་བྱུང་ཡོད། དེ་ལ་སྨན་རྩིས་ཁང་གི་སྨན་པ་རྣམས་ནས་སེམས་ཤུགས་སྐྱེད་དགོས་པ་ཡིན་ཞེས་གསུངས།

གསུམ་པ་གནད་དོན་གལ་ཆེ་བ་ཞིག་ནི། ཕྱི་ལོ་ ༢༠༡༨ ཟླ་ ༨ ནང་ཨ་རིའི་ཚན་རིག་དང་འཁོར་ཡུག་གི་དུས་དེབ་ཏུ། རྒྱ་རིགས་ཉམས་ཞིབ་པ་ཁག་གཅིག་གིས་བོད་སྨན་ནང་དངུལ་ཆུ་བེད་སྤྱོད་གནང་བ་དེས་བོད་ཀྱི་འཁོར་ཡུག་ལ་ཉེན་ཚབས་ཡོད་སྐོར་གསལ་བའི་ཞིབ་འཇུག་བྱས་པའི་རྩོམ་ཡིག་ཅིག་འདོན་སྤེལ་བྱས་ཡོད། དེ་ལ་འདི་ག་སྨན་རྩིས་ཁང་གི་ཉམས་ཞིབ་སྡེ་ཚན་ནས་ཞིབ་ཚགས་ཀྱིས་བསྐྱར་ཞིབ་བྱས་ཏེ་ཉམས་ཞིབ་དེའི་ནང་གི་རྒྱུ་ཆ་དང་ཐབས་ལམ་ལ་ཞན་ཆ་གང་ཡོད་པ་དང་། དེ་བཞིན་ཞིབ་འཇུག་གྲུབ་དོན་དང་གླེང་གཞིའི་ནང་ཞན་ཆ་གང་ཡོད་པའི་སྐོར་ཉམས་ཞིབ་སྡེ་ཚན་གྱི་སྨན་པ་བསྟན་འཛིན་ལྷུན་གྲུབ་ལགས་ནས་རིམ་པ་བཞིན་དུ་ཁ་གསལ་སྒོ་ནས་གསུངས་ཡོད།

མ་ཟད་དེ་སྔ་སྨན་རྩིས་ཁང་དང་ Israel མཐོ་སློབ་གཉིས་ཀྱིས་ཐུན་མོང་སྒོ་ནས་བཞུགས་སྒར་སྨན་རྩིས་ཁང་གི་དངུལ་ཆུ་བཙོ་ཐལ་ཡོད་པའི་རིན་ཆེན་རིལ་བུ་ལ་ཉམས་ཞིབ་ཚད་ལྡན་བྱས་ཡོད།དེ་དུས་ཀྱི་ཉམས་ཞིབ་པ་ Sarah Sallon ལགས་སྨན་རྩིས་ཁང་དུ་ཡོད་པ་དང་སྟབས་བསྟུན་ཁོང་གིས་ཀྱང་རྒྱ་རིགས་ཉམས་ཞིབ་པ་རྣམས་ཀྱི་ཉམས་ཞིབ་ཡིག་ཆ་ལ་དོགས་འདྲི་དང་ཞན་ཆ་གང་ཡོད་སྐོར་དང་། བཞུགས་སྒར་སྨན་རྩིས་ཁང་གི་རིན་ཆེན་རིལ་བུ་ལ་ཉམས་ཞིབ་ཚད་ལྡན་བྱས་པའི་གྲུབ་དོན་ངོ་མཚར་དངོས་མཐོང་བྱུང་བ་རྣམས་ཀྱི་སྐོར་ཞིབ་རྒྱས་གསུང་བཤད་གནང་ཡོད།