གཡོ་ཅན་ལ་དོགས་ཟོན་དགོས་པའི་གསལ་བརྡ།

བཞུགས་སྒར་བོད་ཀྱི་སྨན་རྩིས་ཁང་གི་བདུག་སྤོས་དང་། སྨན་བསང་སོགས་སྨན་རྩིས་ཐོན་དངོས་ཁག་གཅིག་རྫུན་བཟོ་བྱས་པའམ། དེ་བཞིན་སྨན་རིལ་དང་། དམིགས་བསལ་རིན་ཆེན་རིལ་བུ་བཅས་ཚུལ་མཐུན་མ་ཡིན་པའི་ཐབས་ཤེས་སྣ་ཚོགས་སྒོ་ནས་ཐོབ་པར་བྱས་ཏེ་མང་ཚོགས་བསླུ་བྲིད་ཀྱི་དོན་རྐྱེན་དེ་སྔ་ཡང་བྱུང་མྱོང་ཡོད་ལ། ད་ཐེངས་ཕྱི་མི་ཞིག་གིས་ཁྲིམས་འགལ་བྱ་སྤྱོད་སྤེལ་བར་འགོག་སླད་སྨན་རྩིས་ཁང་ནས་ཨིན་ཡིག་ཏུ་གསལ་བསྒྲགས་ཞིག་སྤེལ་བའི་ནང་དོན་འདི་ལྟར་ཡིན།

                ཨུ་རུ་སུའི་མི་སེར་ཡིན་པ་མིང་ལ་ Aum Sai ཞེས་པ་སྐྱེས་ཚེས་ཕྱི་ལོ་ ༡༩༦༩ ཟླ་ ༣ ཚེས་ ༢༡། ཕྱི་སྐྱོད་ལག་ཁྱེར་ཨང་གྲངས་ ༣༥༡༡༣༡ ཡིན་པ་དེ་ཡིས་ནད་པ་མང་པོ་ཞིག་མགོ་སྐོར་བསླུ་བྲིད་ཀྱིས་བཞུགས་སྒར་བོད་ཀྱི་སྨན་རྩིས་ཁང་གི་རིན་ཆེན་རིལ་བུ་དྲ་ཐོག་ནས་རིན་འབབ་ཧ་ཅང་མཐོ་པོར་ཚོང་སྒྱུར་བྱེད་པའི་གནས་ཚུལ་འཐོན་འདུག ཁོ་པས་རང་ཉིད་ཚད་ལྡན་ཡིན་ཚུལ་དུ་སྨན་རྩིས་ཁང་གི་མཚོན་རྟགས་དང་ལག་ཁྱེར་གཉིས་བེད་སྤྱོད་ལོག་པ་བཏང་ཡོད།

སྨན་རྩིས་ཁང་གིས་ཆོག་མཆན་གང་ཡང་མེད་པར་སྨན་རྩིས་ཁང་གི་གཞུང་འབྲེལ་དྲ་རྒྱ་ www.men-tsee-khang.org ཡི་ནང་དོན་ཇི་བཞིན་ཁོ་པའི་དྲ་རྒྱ་ www.preciouspills.com ནང་བེད་སྤྱོད་ལོག་པ་བཏང་ཡོད། ཉེ་ཆར་ཁོ་པས་རང་ཉིད་ཀྱི་དྲ་རྒྱའི་ནང་དོན་རྣམས་ལ་བསྐྱར་བཅོས་བྱེད་སྐབས་སྨན་རྩིས་ཁང་དང་འབྲེལ་ཡོད་ནང་དོན་བེད་སྤྱོད་ཉུང་དུ་བཏང་ཡོད། གང་ལྟར་ཡང་དུས་ཡུན་རིང་པོ་ཞིག་ནས་ཁོ་པས་རིན་ཆེན་རིལ་པོའི་སྐོར་ཨིན་ཡིག་དང་ཨུ་རུ་སུའི་སྐད་ཡིག་ནང་ཁྱབ་བསྒྲགས་བྱས་པའི་འཆར་ཤེལ་པར་རིས་རྣམས་ང་ཚོས་བདག་ཉར་བྱས་ཡོད།

ང་ཚོས་སྐྱོན་ཆ་འབྱུང་སླ་བའི་སྨན་རྩིས་ཁང་གི་ཡན་ལག་སྨན་ཁང་ཡོངས་རྫོགས་ལ་གང་ཟག་འདི་ལ་དོགས་ཟོན་དགོས་པ་དང་། དེ་ལ་རིན་ཆེན་རིལ་བུའི་གཙོས་སྨན་རིལ་གང་ཡང་ཚོང་སྒྱུར་བྱེད་མི་ཆོག་པའི་བརྡ་ལེན་སྤྲད་ཟིན།

ཇར་མན་གཞུང་དང་། རྒྱ་གར་གཞུང་གི་འབྲེལ་ཡོད་འགོ་ལས་པ། དེ་བཞིན་སྨན་རྩིས་ཁང་བཅས་ནས་ Aum Sai ཞེས་པའི་གང་ཟག་དེ་འཚོལ་ཞིབ་བྱེད་བཞིན་པ་ཡིན། དེར་བརྟེན་གལ་ཏེ་ཁོ་པ་གང་དུ་ཡོད་པ་སོགས་ཀྱི་གནས་ཚུལ་མཁྱེན་མཁན་ཡོད་པ་ཡིན་ན། སྨན་རྩིས་ཁང་གི་འགན་འཛིན་ལ་འབྲེལ་བ་གནང་རོགས་ཞུ་རྒྱུ་ཡིན།

མཐའ་མའི་འདོན་ཐེངས་།: 25.12.2020 ཉིན། 12:11 PM