གཉན་ནད་ཧམ་སྤུ་ནག་པོ། (Black Fungus)

གཉན་ནད་ཧམ་སྤུ་ནག་པོ་འདི་བཞིན་སྔ་ལོ་རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་འཛམ་གླིང་ཡོངས་ལ་ཁྱབ་བརྡལ་ཕྱིན་པ་མཉམ་དུ་རྒྱ་གར་གཙོས་པའི་གཙང་འཕྲོད་མཐུན་རྐྱེན་ཞན་པའི་རྒྱལ་ཁབ་དང་ས་ཁུལ་ཁག་མང་པོའི་ནང་ཁྱབ་འགོ་ཚུགས་ཏེ། འཕྲོད་བསྟེན་སྡེ་ཁག་དང་གསར་འགྱུར་བརྒྱུད་ལམ་ཁག་ནས་དོ་སྣང་བྱེད་ཡུལ་གྱི་གལ་ཆེའི་གནད་དོན་ཞིག་ཆགས་པར་བརྟེན།བརྒྱུད་ལམ་ཆེ་ཁག་ནས་དེ་སྐོར་གྱི་གནས་ཚུལ་ཤུགས་ཆེར་སྤེལ་བཞིན་ཡོད། གཉན་ནད་ཧམ་སྤུ་ནག་པོའི་མིང་ལ་ཕྱི་ལུགས་སྨན་གཞུང་ནས་ཐོག་མར་zygomycosis ཞེས་འབོད་ཅིང་།དེང་སྐབསས་སྤྱི་ཚོགས་བརྒྱུད་ལམ་ཁག་ནང་ Mucormycosis ཞེས་པའི་ཐ་སྙད་བེད་སྤྱོད་བྱེད་བཞིན་ཡོད།ནད་གཞི་འདི་ཧམ་སྤུའི་གཉན་སྲིན་moldགྱིས་བསྐྱེད་དེ་ཧམ་སྤུའི་སྡེ་ཚན་mucormycosisལས་གྲུབ་པ་ཞིག་རེད། 

གཉན་ནད་ཧམ་སྤུ་ནག་པོ་འདི་ཡང་རིམས་ནད་སྤྱི་མཚུངས་བཞིན། ཟུངས་སྟོབས་ཞན་ཅིང་ལུས་ཟུངས་རིམས་འགོག་མ་ལག་ཉམས་ཞན་དུ་གྱུར་བ་རྣམས་ལ་འབྱུང་ཉེན་ཆེ། དེ་ཡང་ཧམ་སྤུའི་ཕྲ་ཕུང་མཁའ་རླུང་ནས་རྔུབ་པ་དང། ཟས་སོགས་རུལ་སུངས་རིགས་བཟས་པ། ཧམ་སྤུའི་ཕྲ་ཕུང་རྨ་བརྒྱུད་ནས་པགས་པར་ཁྱབ་བཞིན་ཡོད། 

ཧམ་སྤུའི་ཕྲ་ཕུང་དེ་སྐྱེ་དངོས་རུལ་སུངས་རིགས་ལ་འཚོ་གནས་བྱེད་པ་སྟེ། ཤིང་ཏོག་དང་། ཚལ་རིགས་རུལ་བ། ལོ་མ་དང། སྒོ་ཕྱུགས་སེམས་ཅན་གྱི་ལུད་སོགས་སུ་གནས་པས་རྒྱུན་ལྡན་མི་ལ་འགོ་བའམ་མི་དང་མིའི་དབར་ལ་འགོ་དཀའ་བ་དང་། དེ་བར་སྣང་དུ་གནས་པའི་ཆེས་ཕྲ་བའི་ཧམ་སྤུའི་ཕྲ་ཕུང་གཞན་དང་ལྷན་དུ་བསྡོངས་བ་ལས་མི་ལ་འགོ་བཞིན་ཡོད་པ།དཔེར་ན་སྐབས་རེ་བར་སྣང་དུ་ཡོད་པའི་ཧམ་སྤུའི་ཕྲ་ཕུང་རྣམས་རྔུབ་པའི་རྗེས་སུ་གློ་བ་དང་སྣ་རུས་རྣམས་ལ་གཉན་ཁ་རྒྱས་པ་དང་།མི་འཕྲོད་པའི་ནད་ཀྱི་རྐྱེན་བྱས་ཏེ་འཕྲོད་བསྟེན་ལ་དཀའ་ངལ་སྤྲོད་པ་མ་ཟད།སྨན་འགའ་ཤས་ལ་ཟུར་ཕོག་སློང་རྐྱེན་བྱས་ཏེ་ནད་འགོག་མ་ལག་ཉམས་ཞན་དུ་བཏང་སྟེ་སྲོག་འཕྲོག་གི་ཡོད། 

༡      གཉན་ནད་ཧམ་སྤུ་ནག་པོའི་བྱུང་རིམ། 

གཉན་ནད་ཧམ་སྤུ་ནག་པོའི་ནད་དུག་ཕྲ་ཕུང་དེ་ཐོག་མར་ཕྱི་ལོ་ ༡༨༥༥ ཙམ་ལ་ Friedrich Kuchenmeister  ཡིས་རྙེད་སོན་བྱུང་བ་དང་བབ་ས་དེ་གློ་བ་ཡིན་པའི་འགྲེལ་བརྗོད་བྱས་ཡོད། དེ་རྗེས་ཉམས་ཞིབ་པས་སེམས་ཅན་རི་བོང་གི་ནང་དུ་ནད་གཞི་དེའི་འཕེལ་རིམ་ཚོད་ལྟ་བྱས་པའི་འགྲེལ་དོན་ཁག་ལ་གཞིགས་ན་དེ་ལ་རིགས་གཉིས་སུ་དབྱེ་སྟེ་ཡོད་པ་སྟེ།་Mucor Corymbifera དང་ Mucor Rhizopodiforཞེས་བརྗོད།ཕྱི་ལོ་༡༩༤༣ ལོར་གཉན་ནད་ཧམ་སྤུ་ནག་པོ་དེ་གཅིན་སྙི་སྟངས་འཛིན་བྱེད་ལས་ཉམས་པ་དང་།  ཀླད་པ། མིག་གི་གཟུགས་འཛིན་བྱེད་ལས་གསུམ་ལ་འབྱུང་བའི་ངོས་འཛིན་བྱས་ཡོད། དེ་རྗེས་རིམ་པས་ཤིང་ནགས་དང་། རུལ་སུངས། རྫས་ལུད་སོགས་མི་གཙང་བའི་རིགས་ལ་རྟེན་གནས་བྱེད་བཞིན་པ་ཤེས་རྟོགས་བྱུང་ཡོད

          ཧམ་བུའི་ཕྲ་ཕུང་ནི་ཁོར་ཡུག་ནང་གནས་ཤིང་བཟའ་བཅའི་རིགས་ལ་ཧམ་བུ་བརྒྱབ་པ་དང་། ཤིང་ཏོག་ལ་ཧམ་བུ་བརྒྱབ་པ་རྣམས་ཟོས་པ་དང་ཕྲ་ཕུང་རྣམས་དབུགས་གཏོང་ལེན་བྱེད་སྐབས་གློ་བའི་ནང་དུ་རྔུབ་པ་ལ་བརྟེན་ནས་གཟུགས་པོའི་ནང་བསྐྱེད་དེ་འཕེལ་བར་བྱེད་ཅིང་།ཁྲག་གི་བརྒྱུད་ལམ་ནས་ཁྲག་ལིང་ཆགས་ཏེ་ཉེ་འཁོར་གྱི་ཕུང་གྲུབ་རྣམས་བྱེད་ལས་ཉམས་པ་དང་ཤི་བར་འགྱུར། 

གཞན་ནད་དུག་དེ་རྨ་དཀྲིས་བཙོག་གྲིབ་ཕོག་པའི་ནང་ལ་གནས་བཅའ་བ་དང་། སྨན་ཁང་གི་དངོས་ཆས་དང། ཟུར་བཀག་སྨན་ཁང་། ཆུའི་ཐིགས་པ་རྒྱག་ས་དང་ཁང་པ་བརླན་གཤེར་ཅན། མཁའ་རླུང་གི་རྒྱུ་བ་ཞན་པ། སྨན་བཅོས་ཡོ་ཆས་མི་གཙང་བ་སོགས་ལས་ཀྱང་འབྱུང་བཞིན་ཡོད།Mucormycosis གྱི་ནད་འདི་ཐོག་མར་ཕྱི་ལོ་ ༡༨༥༥ ཙམ་ལ་ངོས་འཛིན་རྙེད་སོན་བྱུང་བ་དང་།ཕྱི་ལོ་༢༠༠༤  ལོར་རྒྱ་གར་རྒྱ་མཚོར་རླུང་གིས་མཚོ་འཁྱོམ་བྱུང་བའི་སྐབས་སུ་ནད་གཞི་འདི་བསྐྱར་དུ་ཁྱབ་འགོ་ཚུགས་པ་དང་། ༢༠༡༡ ལོར་རྒྱ་གར་ལ་ཆར་རླུང་འཁྲུག་སྟེ་རང་བྱུང་གནོད་འཚེ་ཕོག་སྐབས་བསྐྱར་དུ་ཁྱབ་པར་བཤད། སྔ་ལོ་ནས་བཟུང་ཏོག་དབྱིབས་གཉན་རིམས་ནད་ཡམས་འཛམ་གླིང་ཁྱོན་ཡོངས་སུ་ཁྱབ་པ་དང་དུས་མཚུངས་སུ་ཧམ་བུ་ནག་པོའི་ནད་གཞི་འདི་ཡང་བསྐྱར་ཁྱབ་འགོ་ཚུགས་པ་དང་། ཏོག་དབྱིབས་རིམས་ནད་ཀྱི་སྨན་བཅོས་ཤུགས་ཆེར་བསྟེན་པས་རིམས་འགོག་མ་ལག་གི་ནུས་པ་ཉམས་ཏེེ་ནད་གཞི་འདི་ཁྱབ་བརྡལབྱུང་བར་སྨན་པ་དང་ཉམས་ཞིབ་པ་རྣམས་ཀྱིས་བརྗོད་བཞིན་ཡོད།

༢      གཉན་ནད་ཧམ་བུ་ནག་པོའི་དབྱེ་བ། 

 ནད་འདི་ལུས་ཀྱི་ཆ་ཤས་གང་ལ་བབས་ཤིང་གང་ལ་གནོད་སྐྱོན་བྱེད་པར་བསྟུན་ནས་རིགས་ལྔ་ལ་དབྱེ་བ་སྟེ། ཡ་གསང་ངམ་ཡང་ན་སྣ་སྦུབས་དང་ཀླད་པའི་པར། དེས་སྣ་རུས་ནས་རིམ་པས་གཉན་ཁ་རྒྱས་ཏེ་ཀླད་པ་ལ་ཁྱབ་འགྲོ་བ་དང་།གཅིན་སྙི་ནད་པ་མང་ཆེ་དང་མཁལ་མ་བརྗེ་སྒྱུར་བྱས་པའི་ནད་པའི་རིགས་ལ་མང་དུ་འབྱུང་། གློ་བར་འབྱུང་ཉེན་ཆེ་བ་ནི་ནད་གཞི་དེ་ནམ་རྒྱུན་ཁྲག་རིལ་དཀར་པོའི་ཆ་ཤས་neutrophilཀྱི་ལྡང་ཚད་ཉུང་དྲགས་པའི་ནད་པ་ཚོར་ཕོག་གི་ཡོད་ལ། འབྲས་ནད་ཡོད་པ་དང་དོན་སྣོད་གཤག་བཅོས་སམ་བརྗེ་སྒྱུར་བྱས་པ། ཡང་ན་རྩ་བའི་ཕྲ་ཕུང་གི་འགྱུར་བ་ལ་བརྟེན་ནས་ནད་འདི་མང་དུ་འབྱུང་བར་བཤད།  ཕོ་བ་དང་རྒྱུ་མ། བྱིས་པར་མང་དུ་འབྱུང་བ་སྟེ། སྔ་སྐྱེས་ཕྲུ་གུ་དང་བྱིས་པ་ལྗིད་ཚད་དམའ་བ། གཉན་འཇོམས་སྨན་རིགས་མང་དུ་བསྟེན་དགོས་རིགས་ལ་འབྱུང་བ་ཡིན།  པགས་པ། པགས་པར་མེའི་འཚིག་སྐྱོན་བྱུང་བའམ་པགས་པར་རྨས་སྐྱོན་བྱུང་བ། ཁྲག་འབྲས་སམ་ཁྲག་རིལ་དཀར་པོའི་ནད། གཅིན་སྙི། གཉན་ནད་རེག་དུག་ན་མཁན་རིགས་ལ་འབྱུང་། ལུས་ཀུན་ཁྱབ་པའི་ཧམ་སྤུའི་ནད་ནི་གོང་དུ་འགྲེལ་བརྗོད་བྱས་པའི་ཧམ་སྤུ་ནག་པོའི་རིགས་གང་རུང་འབྱུང་སྲིད་པ་དང། ནམ་རྒྱུན་དུ་ཁྲག་རིལ་དཀར་པོའི་ཆ་ཤས་neutrophils ཞེས་པ་ཉུང་དྲགས་པས་འབྱུང་གི་ཡོད། ནད་དེ་ཁྲག་བརྒྱུད་ནས་ལུས་ཀྱི་དོན་སྣོད་ཀུན་ལ་ཁྱབ་པ་དང། ནད་དེ་ཁྱབ་གནས་གཙོ་བོ་ནི་ཀླད་པ་དང་། མཚེར་པ། སྙིང་། ཁྱད་པར་པགས་པར་ཉེན་ཆེ་ཞིང་དོན་སྣོད་གཞན་ལ་ཡང་ཁྱབ་སྲིད་པ་ཡིན།

༣   གཉན་ནད་ཧམ་བུ་ནག་པོའི་ནད་རྟགས། 

ནད་རྟགས་སུ་ནད་གང་དུ་བྱུང་སའི་གནས་སུ་རང་རྟགས་མངོན་ཞིང་། ཐོག་མར་ཁ་དང། སྣ། མིག།དབང་རྩའི་མ་ལག་ལ་འབྱུང་ཞིང་། གདོང་ཕྱེད་སྐྲངས་པ། མགོ་ན་བ། སྣ་འགག་པ། སྣའམ་ཁའི་སྒང་ལ་རྨ་མདོག་ནག་པོ་མྱུར་ཏུ་འཕེལ་ཞིང་རྒྱས་པ། ཚ་བ་འབར་བ། མིག་སོགས་ལ་གཉན་ཁ་རྒྱས་ཏེ་ཀླད་པར་ཤུགས་རྐྱེན་སྤྲད་ཀྱི་ཡོད། མིག་འབྲས་ཕྱིར་སྐྲངས་པ་ལ་སོགས་འབྱུང་། གློ་རྒྱག་པ། བྲང་གཟེར་བ། དབུགས་གཏོང་ལེན་དཀའ་བ། གློ་ལུ་སྐབས་ལུད་པ་དང་མཉམ་དུ་ཁྲག་ཐོན་པ་རྣམས་གློ་བར་བབས་པའི་རྟགས་ཡིན།  རྒྱུ་ཞབས་ངེས་མེད་དུ་ན་ཟུག་དང་སྦོས་རྒྱངས་བྱེད་པ། ཞེ་མེར་ལངས་ཤིང་སྐྱུགས་ལྡང་བྱེད་པ་སོགས་ནི་སྤྱིར་བཏང་གི་ནད་རྟགས་ཡིན་ལ། སྐབས་རེར་ཕོ་ལོང་ནས་ཁྲག་འབྱམས་པ་སོགས་ཀྱང་འབྱུང་སྲིད། ནད་རྟགས་འདི་བྱིས་པ་གསར་སྐྱེས་རྣམས་ལ་མང་བ་ཡོང་གི་ཡོད། དེའི་རྟགས་སུ་རྒྱུ་མར་གཉན་ཚད་རྒྱས་པ་དང་།ནད་གཞི་དབྱིན་སྐད་དུ་necrotizingenterocolitis,དང་འདྲ་ཤས་ཆེ་བས་ངོས་འཛིན་ཁག་པོ་ཡོད་པར་བཤད།

ཧམ་སྤུ་ནག་པོའི་ནད་འདི་པགས་པར་ཕོག་པའི་ཚེ་གནས་དེའི་ཕུང་གྲུབ་ཤི་བས་ཐིག་ལེ་དམར་ཤས་ཤས་སྨུག་ནག་ཅན་ལྷན་དུ་དཀྱིལ་ལ་ནག་ཐིག་འབྱུང་། མཐའ་འཁོར་དུ་རྨ་འབྲུམ་ཡང་འབྱུང་སྲིད་ཅིང་དེ་ལ་གཟེར་ཤུགས་ཧ་ཅང་ཆེ། ཧམ་སྤུ་ནག་པོའི་ཕྲ་ཕུང་དེས་ཁྲག་རྩའི་ནང་བཙན་འཛུལ་བྱས་པའི་རྐྱེན་གྱིས་ཁྲག་གི་འཁོར་རྒྱུགས་ཉམས་ཏེ་ཁྲག་ལིང་ཆགས་པ་དང་། ཉེ་འགྲམ་གྱི་ཕྲ་ཕུང་རྣམས་ཤི་བ། ནད་དེ་ལུས་ཀུན་ལ་ཁྱབ་པ་དང་། མི་དེ་ལ་བླ་གཉན་གྱི་ནད་གཞན་དང་བསྡོངས་ཚེ་ནད་རྟགས་སུ་ངོས་འཛིན་དཀའ་བ་ཡོད། ཧམ་སྤུ་ནག་པོའི་ཕྲ་ཕུང་དེ་ཀླད་པ་ནས་ལུས་ཀུན་ཏུ་ཁྱབ་ན་སེམས་ཁམས་དང་དབང་ཤེས་འཁྲུགས་པའམ་ཡང་ན་དྲན་པ་ཉམས་པ་སོགས་འབྱུང་བར་གསུངས།

༤   གཉན་ནད་ཧམ་བུ་ནག་པོ་ངོས་འཛིན། 

བརྟག་ཐབས་ནི་ཕྲ་ཕུང་བརྟག་དཔྱད་ཁང་གི་ཕྲ་མཐོང་ཆེ་ཤེལ་བརྒྱུད་ནད་གཞི་དེའི་ཁྱབ་ཚད་ངོས་འཛིན་ཐུབ་པ་ཡིན་ལ། ཕྲ་ཕུང་བརྟག་དཔྱད་བྱེད་སྐབས་ཕུང་གྲུབ་ལ་ཧམ་བུའི་གནོད་རྐྱེན་བྱུང་མིན་བརྟག་ནས་ནད་ངོས་བཟུང་དགོས། བརྟག་དཔྱད་ལས་གློ་བའི་གཤེར་གཟུགས་བཏོན་ནས་བརྟག་པ། ཁྲག། ཆུ་སེར། ་དྲི་ཆུ་སོགས་ལ་བརྟག་དགོས་ཤིང། ཁྲག་གི་བརྟག་དཔྱད་ལས་ཁྲག་གི་གྲངས་ཚད་ཆ་ཚང་བར་ (CBC) ཁྱད་པར་དུ་ (Neutrophil) དང། ཁྲག་གི་ལྡང་ཚད། ཁྲག་གི་མངར་རྫས། (Bicarbonate) ནག་ཚྭ་ཆ་ཤས་གཉིས་ལྡན་དང་ (Electrolyte) སོགས་ལ་བརྟག་དགོས།

༥     སྔོན་འགོག་བྱེད་ཚུལ།

གཉན་ནད་ཧམ་སྤུ་ནག་པོ་ནི་ཧ་ཅང་དཀོན་པོ་ཡོད་པ་ཞིག་རེད། འོན་ཀྱང་འཕྲོད་བསྟན་གྱི་དཀའ་ངལ་ཡོད་པ་དང་ང་ཚོའི་ལུས་པོས་ནད་རིགས་དང་ནད་འབུ་འགོག་སྲུང་གི་ནུས་པ་ཞན་དུ་གཏོང་མཁན་གྱི་སྨན་སོགས་ལ་བརྟེན་ཡོད་པའི་ནད་པ་རྣམས་ལ་ནད་གཞི་དེ་ཕོག་སླ་བ་ཆགས་བསྡད་ཡོད། གཤམ་གསལ་གྱི་ནད་པ་ངེས་ཅན་ཞིག་ལ་གཉན་ནད་ཧམ་སྤུ་ནག་པོའི་ནད་ཕོག་སླ་བ་ཡོད་པ་རེད། མི་དེ་དག་ནི་གཅིན་སྙི་ཟ་ཁུ།འབྲས་ནད།ནང་ཁྲོལ་སྤོ་འཛུགས་བྱས་པ།  organ transplantStem cell སྤོ་འཛུགས་བྱས་པ།ཁྲག་རིགས་དཀར་པོ་ཉུང་དྲགས་པ། NeutropeniaCorticosteroidསྨན་རྒྱུན་རིན་པོ་བསྟེན་མཁན།སྨན་ཁབ་རིགས་བསྟེན་བཞིན་པ།ལུས་པོའི་ནང་ironཞེས་པ་ཁྲག་གི་འཚོ་བཅུད་མང་དྲགས་པ།གཤག་བཅོས་དང་མེས་འཚིག་པ་དང་པགས་པར་རྨས་སྐྱོན་བྱུང་བ་སོགས་ཡིན།ང་ཚོ་འཚོ་གནས་བྱེད་སའི་ཉེ་འཁོར་དུ་ཧམ་སྤུའི་ཕྲ་ཕུང་རིགས་ནི་གང་སར་ཡོད་པ་དང་ཧ་ཅང་མང་བས་དེ་ལས་གཡོལ་ཐབས་མེད་པ་དང་། ལྷག་པར་དུ་དབྱར་ཁའི་ཆར་དུས་དང་ཆར་ཆུའི་འབབ་ཚད་མཐོ་བའི་ས་ཁུལ་རྣམས་ལ་འགོས་ཁྱབ་འགྲོ་བའི་ཉེན་ཁ་ཆེ། ཧམ་སྤུ་ནག་པོའི་གཉན་ནད་ལ་སྔོན་འགོག་སྨན་དང་སྨན་ཁབ་ཀྱང་བཟོ་ཐུབ་མེད། ནད་སྲུང་མ་ལག་ཞན་པོ་ཡོད་པའི་མི་རྣམས་ལ་གཉན་ནད་ཧམ་སྤུ་ནག་པོའི་ཉེན་ཚབས་ཆུང་དུ་འགྲོ་བའི་ཐབས་འགའ་ཡོད་པ་ནི།

• ཨར་ལས་སོགས་ཐལ་རྡུལ་མང་སའི་གནས་སུ་འགྲོ་མི་ཉན། གལ་ཏེ་འགྲོ་དགོས་བྱུང་ན་ཁ་རས་N95 ཞེས་པ་གྱོན་དགོས་དང་། རྙིང་སོང་དང་ཁེངས་པའི་བཟའ་བཅའི་སྤང་དགོས།
• བཤའ་བརླན་ཆེ་བའི་ཁང་པའི་ནང་དང་། རླུང་འཚུབ་རྗེས་ཀྱི་རྩིག་པ་དང་ཤིང་སྡོང་། ཁང་སྟོང་ནང་གི་ཅ་དངོས་དང་རང་བྱུང་རྐྱེན་ངན་གྱི་ཆུ་ལོག་སོགས་བྱུང་ནས་ཁང་པ་ལོག་པ་རྣམས་ལ་རེག་ཐུག་སྤང་དགོས། 
• ས་དང་ཐལ་རིགས་ལ་རེག་ཐུག་དང་ལྡུམ་རྭའི་ལས་རིགས་དང་འབྲེལ་བའི་ལས་ཀ་བྱེད་སྐབས་འགྱིག་གི་ལག་ཤུབས་གྱོན་དགོས། ལྡུམ་ལས་དང་ཤིང་ནགས་གསེབ་ཏུ་བསྐྱོད་སྐབས་ལྷམ་གོས་གྱོན་དགོས།
• སྔོ་དྲེགས་དང་ས་དང་སེམས་ཅན་གྱི་ལུད་རྣམས་ལ་རེག་པའི་སྐབས་ལག་པར་འགྱིག་གི་ལག་ཤུགས་གྱོན་དགོས།
• པགས་ནད་གཉན་རིགས་ལས་སྲུང་བའི་ཆེད་དུ་པགས་པར་རྨས་སྐྱོན་ཕོག་པ་དང་། ལྷག་པར་དུ་ས་དང་ཐལ་བར་རེག་ཐུག་བྱས་རྗེས་ལག་པ་སྨན་ཆུས་གཙང་མར་བཀྲུས་དགོས།

བདེ་སྐྱིད་གླིང་གསོ་རིག་ཞིབ་འཇུག་ཁང་དཔེ་ཐོག་ཞིབ་འཇུག་སྡེ་ཚན་ནས་ ༢༠༢༡་ཟླ་ ༧་ཚེས་ ༢༢ ལ།

མཐའ་མའི་འདོན་ཐེངས་།: 23.07.2021 ཉིན། 3:56 PM