འཛམ་གླིང་གཉན་ནད་རེག་དུག་ཉིན་མོ་སྲུང་བརྩི།

འཛམ་གླིང་གཉན་ནད་རེག་དུག་ཉིན་མོ་(World AIDS Day)དེ་བཞིན་ལོ་ལྟར་ཕྱི་ཟླ་ ༡༢ ཚེས་ ༡ ཉིན་ཡུལ་ལུང་ཀུན་ལ་སྲུང་བརྩི་ཞུ་སྲོལ་ཡོད། འདི་ལོའི་ཉིན་དེར་བཞུགས་སྒར་ཁུལ་དུ་སྨན་རྩིས་ཁང་དང་། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས། བདེ་ལེགས་སྨན་ཁང་། ཀུན་ཕན་ནད་གསོ་ཁང་། བོད་ཀྱི་བུད་མེད་ལྷན་ཚོགས་བཅས་ཚོགས་པ་ལྔ་མཉམ་རུབ་ཐོག་ནས་མཛད་རིམ་ཞིག་སྒོ་སྒྲིག་ལེགས་པར་ཞུས་ཡོད། དེའི་དམིགས་ཡུལ་ནི་མང་ཚོགས་ནས་གཉན་ནད་རེག་དུག་ནད་ཡམས་འདི་ལ་དོ་སྣང་སླེབ་ཆེད་དང་། ནད་ཡམས་འདིའི་སྐོར་གོ་རྟོགས་དང་རྒྱུས་མངའ་གོང་སྤེལ་གཏོང་རྒྱུ། དེ་བཞིན་སྤྱི་ཚོགས་ནང་དུ་གཉན་ནད་རེག་དུག་ནད་པར་ལྟ་སྟངས་ཞན་ཆ་ཡོད་པ་དེར་འགྱུར་བ་གཏོང་ཐབས་དང་། མིའི་ལུས་ཟུངས་ཟད་པའི་ནད་ཡམས་འདི་རྩ་མེད་བཟོ་བའི་ཕྱོགས་སུ་གོམ་སྟབས་ལ་མཐུན་འགྱུར་གོང་མཐོར་དགོས་པའི་སྐུལ་མ་གཏོང་ཆེད་བཅས་ཡིན།

དེ་ཉིན་གྱི་བྱེད་སྒོ་ཁག་ཏུ་གོམ་བགྲོད་དང་ལྷན་དུ་རྔམ་སྟོན་ཁྲོམ་སྐོར་དང་། གཅིན་སྙི་དང་། ཁྲག་རླུང་སྟོད་འཚངས་ཚད་གཞི། གཉན་ནད་རེག་དུག་ཚོད་ལྟའི་བརྟག་དཔྱད་བྱས་པ་དང་།  གྲ་སྒྲིག་ཡོད་པའི་སྲང་ལམ་འཁྲབ་སྟོན་གཅིག་བཅས། དེ་ཡང་མེག་གྷན་དབུས་ཀྱི་ཁྲོམ་ར་དང་། སྨན་རྩིས་ཁང་དབུས་ཀྱི་ཚོང་ཁང་མདུན་ཐང་། ནོར་བུ་གླིང་གའི་རྒྱལ་སྒོའི་ཁྲིད། དབུས་བོད་མིའི་སྒྲིག་འཛུགས་ཀྱི་གཞུང་འཁོར་བཀག་འཇོག་ས་ཁུལ་བཅས་སྣ་ཚོགས་སུ་མང་ཚོགས་ལ་སྤྱན་བསྟར་ཞུས་ཡོད། དེ་ཡང་གོམ་བགྲོད་པ་ཚོས་མེག་གྷན་ཁྲོམ་གཞུང་ཡོངས་དང་། དེ་ནས་གངས་སྐྱིད་སྨན་རྩིས་ཁང་དབུས་ཀྱི་བར་དུ་གོམ་བགྲོད་གནང་ཡོད། ལམ་བར་གྱི་འགྲུལ་པོ་ཚོར་གཉན་ནད་རེག་དུག་ནད་པར་རྒྱབ་སྐྱོར་དང་དོ་སྣང་མངའ་བའི་འཛམ་གླིང་ཡོངས་ཁྱབ་ཀྱི་མཚོན་རྟགས་རི་བན་དམར་པོ་དེ་འདོགས་པར་སྐུལ་མ་ཡང་ཞུས་ཡོད།   

མཐའ་མའི་འདོན་ཐེངས་།: 07.12.2021 ཉིན། 10:34 AM