སྨན་རྩིས་དྲ་བ། - མདུན་ངོས།

ཀེ་ར་ལ་ཡན་ལག་སྨན་ཁང་གསར་འཛུགས།
བརྗོད་བྱ་སྤེལ་མཁན། རྩོམ་སྒྲིག་པ། (admin) ཟླ་ཚེས། 11.05.2021
མདུན་ངོས། >>

ཀེ་ར་ལ་ཡན་ལག་སྨན་ཁང་གསར་འཛུགས།

ཕྱི་ལོ་ ༢༠༢༡ ཟླ་ ༥ ཚེས་ ༥ ཉིན་རྒྱབ་རྒྱ་གར་ལྷོ་ཕྱོགས་ཀེ་ར་ལ་མངའ་སྡེའི་ Alappuzha རྫོང་ཁོངས་ Pathirapally ས་གནས་སུ་སྨན་རྩིས་ཁང་གི་ཡན་ལག་སྨན་ཁང་གསར་པའི་སྒོ་འབྱེད་རྟེན་འབྲེལ་མཛད་སྒོ་སྟབས་བདེ་ཞིག་བསྐྱངས་གནང་ཡོད། མཛད་སྒོར་ས་གནས་ཀྱི་གནད་ཡོད་མི་སྣ་ Mr. Sethu Das, Mr. Alexander Devasia, Mr. Suresh Babu, Mr. Emmanuel Thompson Mr. Fr. Nelson Thyparampil བཅས་དང་། ལྷག་པར་ཏོག་དབྱིབས་གཉན་རིམས་༡༩ ཛ་དྲག་དུས་སྐབས་སུ་ས་གནས་གཞུང་གི་བཀོད་ཁྱབ་གཞིར་བཟུང་ཚོགས་བཅར་བ་མི་སྣ་བཅོ་ལྔ་ལས་མི་ཉུང་བ་གདན་འདྲེན་ཞུས་ཡོད། མཛད་སྒོའི་ཐོག་མར་ྋསྤྱི་ནོར་ྋགོང་ས་སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེ་སྐུ་མདུན་སྣང་གསལ་སྒྲོན་མེ་ཞལ་ཁ་འབྱེད་ཅིང་སྨན་རྩིས་བསྟན་རྒྱས་སྨོན་ལམ་སོགས་གསོལ་འདེབས་ཁག་གྲུབ་རྗེས་གསོལ་ཇ་འབྲས་སིལ་འདེགས་འབུལ་ཞུས། དེ་ནས་སྨན་རྩིས་ཁང་གི་ལས་བྱེད་ངོས་ནས་སྨན་རྩིས་ཁང་སྒྲིག་འཛུགས་ཀྱི་ངོ་སྤྲོད་གཏམ་བཤད་གནང་ནས་ནད་པ་འགའ་ཞིག་ལ་བརྟག་དཔྱད་སྨན་བཅོས་ཀྱང་ཞུས་ཡོད།

ད་ལྟའི་ཆར་ཡན་ལག་སྨན་ཁང་དུ་སྨན་པ་དཀོན་མཆོག་ནོར་བུ་ལགས་དང་། སྨན་པ་བསོད་ནམས་དཔལ་མོ་ལགས། དེ་བཞིན་སྨན་སྤྲོད་གཉིས་དང་རྩིས་པ་གཅིག་སྟེ་སྨན་རྩིས་ལས་གནས་གསུམ་བཅས་ཁྱོན་བསྡོམས་ལས་བྱེད་ལྔ་ཡོད།

ཡན་ལག་སྨན་ཁང་འདི་ནི་བོད་ཀྱི་གྲོགས་པོ་ཐེབས་རྩ་ (Friends of Tibet foundation) ནས་སྦྱིན་བདག་གནང་བཞིན་ཡོད། ཐེབས་རྩ་འདིས་ཡན་ལག་སྨན་ཁང་ཚད་ལྡན་འདི་གསར་འཛུགས་མ་གནང་སྔོན་ནས་ལོ་ངོ་བཅུ་ཕྲག་རིང་དུ་ཀེ་ར་ལ་མངའ་སྡེའི་ས་གནས་ཁག་ཏུ་གསོ་རིག་སྨན་གྱི་སྐོར་སྐྱོད་ལན་གྲངས་མང་པོ་གོ་སྒྲིག་ཞུས་གནང་ཡོད།

ཡན་ལག་སྨན་ཁང་གི་ཁ་བྱང་།

Sylviander House,
Chettikad Beach Road,
P.O Pathirapally, Alappuzha,
Kerala. India

སྨན་ཁང་གི་དུས་ཚོད།

9:00am to 1:00pm
lunch break: 1:00pm to 2:00pm
2:00pm to 5:00pm

གློག་འཕྲིན་ཁ་བྱང་། kerala@men-tsee-khang.org

མཐའ་མའི་འདོན་ཐེངས་།: 12.05.2021 ཉིན། 11:06 AM

<< སྔ་མ།