༢༠༢༡ ལོའི་བྱང་ཐང་ཁུལ་དུ་སྨན་སྐོར་ཐེངས་དང་པོ་ལེགས་གྲུབ།

ལ་དྭགས་རྒྱལ་ས་ལེཧ་སྨན་རྩིས་ཁང་ནས་འདི་ལོའི་ལ་དྭགས་བྱང་ཐང་ས་ཁུལ་ཁག་ཏུ་སྨན་སྐོར་ཐེངས་དང་པོ་དེ་བསྐྱོད་ཐུབ་པ་བྱུང་ཡོད། དེ་ནི་གཙོ་བོ་ལ་དྭགས་ས་གནས་ལྷན་ཚོགས་ནས་ལན་མང་དགོས་འདུན་བཏོན་པ་དང་། ལ་དྭགས་རིག་གཞུང་བསྟི་གནས་ཁང་གི་ཡན་ལག་འགན་འཛིན་སྐར་མ་ཚེ་རིང་ལགས་ནས་གོ་སྒྲིག་ཞུས་པ་བཞིན། ཕྱི་ལོ་ ༢༠༢༡ ཟླ་ ༣ ཚེས་ ༡༥ ནས་ ༢༨ བར་བདུན་ཕྲག་གཉིས་རིང་སྨན་པ་ལེགས་བཤད་མཚོ་མོ་ལགས་དང་། སྨན་རྩིས་ལས་སྣེ་བསོད་ནམས་སྟོབས་ལྡན་ལགས། ཁ་ལོ་བ་དང་སྨན་སྤྲོད་གཅིག་ལྕོགས་བསྟན་འཛིན་ཐར་ལམ་ལགས་བཅས་ལ་དྭགས་བྱང་ཐང་ས་ཁུལ་ཚང་མའི་ནང་དུ་སྨན་བསྐོར་དུ་ཕེབས་ཡོད།

དེ་ཡང་ཟླ་ ༣ ཚེས་ ༡༥ ཉིན་ལེཧ་ནས་ཐོན་ཏེ་གཤམ་གསལ་བྱང་ཐང་ས་ཁུལ་ཁག་བཀག་གཞུང་དང་། སྒོ་ཡུལ། སྒོ་ཡུལ་གཟི་དཀར་དང་གཟི་ནག ཧེན་ལེ། མ་ཁྱུ། རོང་སྒོ། ཉོ་མ། སུམ་མདོ། ཆུ་དམར་ལ་ཙམ་ཉག ཆུ་མུར་དོང་གོ། ས་སྨད་བཅས་སུ་ཁྱོན་བསྡོམས་ནད་པ་ ༧༢༠ ལ་བརྟག་དཔྱད་སྨན་བཅོས་དང་ཟས་སྤྱོད་སྤང་བླང་ལམ་སྟོན་ཞུས་ཡོད། དེའི་ནང་ནས་བོད་རིགས་ཙམ་མ་ཟད་རིས་མེད་ཉམ་ཐག་ནད་པ་ ༦༢༩ ལ་སྨན་རྩིས་ཁང་ནས་རིན་མེད་སྨན་སྦྱིན་ཕུལ་བ་ཧིན་སྒོར་ཁྱོན་ ༣༠༡,༦༧༩་༥༣ ཕྱིན་ཡོད། 

ད་ཐེངས་ཀྱི་སྨན་སྐོར་འདི་ནི་རྒྱ་གར་ནང་དུ་ཏོག་དབྱིབས་གཉན་རིམས་ ༡༩ ནད་རླབས་གཉིས་པ་འགོ་མ་ཚུགས་པའི་སྔོན་དུ་བསྐྱོད་པ་ཞིག་ཆགས་ཡོད་ལ། དུས་རྒྱུན་ལ་དྭགས་བྱང་ཐང་ཁུལ་དུ་སྨན་སྐོར་སྐྱོད་སྲོལ་ཡོད་པ་ལྟར་ཕྱི་ལོ་ ༢༠༢༡ ནང་གི་ཐེངས་དང་པོ་དེ་ཡིན།

མཐའ་མའི་འདོན་ཐེངས་།: 07.07.2021 ཉིན། 11:28 AM