རབ་བྱུང་ ༡༧ བོད་རྒྱལ་ལོ་ ༢༡༤༤ རབ་གནས་མེ་བྱ།  ཕྱི་ལོ་ 2017-2018

༄༅། །དངོས་ཀུན་མ་ལུས་སྐྱེ་བའི་རྒྱུ་གཅིག་པུ།།

སྣང་ཡུལ་འབྱུང་བ་ལྔ་ཞེས་ཡོངས་གྲགས་པ།།

ངེས་དོན་ཡེ་ཤེས་ལྔ་ཡི་རང་བཞིན་ཅན།།

ལྷུན་གྲུབ་རིགས་ལྔའི་རྒྱལ་ལ་ཕྱག་འཚལ་ལོ།།

ལོ་འདིའི་ཀེག་རྩིས་ནང་གསལ་བའི། །དམིགས་བསལ་རྩུབ་རིགས་ཞབས་རིམ་བཅས། །ཟུར་འདོན་ཞུས་པ་འདི་ལྟར་ཏེ། །ྋབྱ་ལོ་ཀུན་ལ་རང་ཀེག་ཤར། །ནད་པའི་མདུན་བསྐྱོད་མཁར་ལས་སྤོངས། །ཚེ་དབང་ཞུ་ཞིང་ཚེ་སྒྲུབ་དང་། །འབུམ་དང་གདུགས་དཀར་ཏོག་གཟུངས་འདོན། །ཀེག་བཟློག་ལ་སོགས་བཟློག་རིམ་བྱ། །ྋཡོས་ལོ་ཀུན་ལ་བདུན་ཟུར་རྩུབ། །སྟོབས་ཆེན་མཆུ་གསུམ་སྡོང་རྒྱན་དང་། །ཏོག་གཟུངས་རྒྱལ་མཚན་རྩེ་མོ་འདོན། །ལམ་འཕྲང་བཅོས་ཤིང་དགྲ་ལྷ་གསོལ། ། ྋགླང་སྦྲུལ་གཉིས་ནི་མཐུན་གསུམ་རྩུབ། །དགྲ་ལྷ་གསོལ་ཞིང་བརྒྱ་བཞི་གཏོང་། །ྋབྱི་རྟ་གཉིས་ལ་བཞི་གཤེད་དམ། །ལོ་སྐར་ཆེ་ཆུང་ལ་བབས་པས། །ཉི་ཁྲི་འདོན་ཞིང་སྲོག་བསླུ་བྱ། །ཚོང་དང་བྱེས་སུ་འགྲོ་བ་སྤོངས། །སྨན་མདོ་དང་ནི་སྨན་བླ་ཡི། །ཆོ་ག་བྱ་ཞིང་གཟུངས་བསྡུས་འདོན། །འཆི་ངེས་སྲོག་བསླུ་དག་ཀྱང་བྱ། །ྋལོག་མེན་ཕོ་ཁྱི་མོ་འབྲུག་ལ། །གནམ་སྒོ་བབས་པས་ཐོག་མི་འབུབ། །ནམ་སྙིང་མཚན་བརྒྱ་ཏོག་གཟུངས་འདོན། །སྐྱེས་པ་ཕག་དང་བུད་མེད་སྦྲུལ། །ས་སྒོ་ལ་བབས་ས་ལས་སྤོངས། །ས་སྙིང་མཚན་བརྒྱ་རྨ་བྱ་ཆེ། །འདོན་ཞིང་བབས་སྤར་ཕོ་ལི་དང་། །བུད་མེད་ཁམས་སྟེང་བབས་པ་རྣམས། །མཁར་ལས་རོ་བག་ཐབ་གཞོབ་འཛེམས། །བྱབ་ཁྲུས་ཞུ་ཞིང་བབས་སྨེ་ནི། །དཀར་གསུམ་བོན་དང་རྒན་བྱིས་རྩུབ། །ཕལ་ཆེན་འདོན་ཞིང་དགྲ་ལྷ་གསོལ། །གཉིས་ནག་ཀུན་དང་སྐྱེས་དར་གནད། །ཏོག་གཟུངས་འདོན་ཞིང་བརྒྱ་བཞི་དང་། །ཁྲོམ་བཟློག་ལ་བརྩོན་གསུམ་མཐིང་དང་། །བཞི་ལྗང་བུད་མེད་ཀུན་ལ་ངན། །གདུགས་དཀར་ལོ་གྲངས་འདོན་པར་བྱ། །ལྔ་སེར་བནྡེ་རྣམས་ལ་ངན། །མཚན་བརྗོད་འདོན་ཞིང་དམར་གཉིས་ལ། །རྒན་དང་བྱིས་པར་ངན་པས་ན། །ཚེ་དབང་ཞུ་ཞིང་ཚེ་གཟུངས་འདོན། །ལོ་གྲངས་འདི་དག་ ྋདགུ་མིག་ཏུ། །

ཚུད་པས་སྤྱི་བཅོས་གཞུང་ལྟར་ལ། །བྱེ་བྲག་བྱིས་པར་གདུགས་དཀར་དང་། །བུད་མེད་རྣམས་ལ་སྒྲོལ་བསྟོད་དང་། །སྐྱེས་པ་དར་མར་རྣམ་རྒྱལ་མའི། །གཟུངས་དང་རྒན་པོར་བརྒྱད་སྟོང་པ། །རྒན་མོར་བགྲེས་ཞུས་མི་དཔོན་ལ། །རྒྱལ་པོ་མདོ་ལྔ་གཙོ་བོ་རྣམས། །བློ་གྲོས་བཟང་མོས་ཞུས་མདོ་དང་། །འཇམ་དཔལ་མཚན་བརྗོད་བཅས་པ་འདོན། །ྋཕོ་མོ་ཁྱད་མེད་དུར་མིག་ཏུ། །ཚུད་པ་ས་གླང་ལོ་གྲངས་ ༩།༦༩ ཡིས། །དགྲ་བཟློག་དུར་སྲིའི་མནན་པ་བྱ། །ཤིང་གླང་ལོ་གྲངས་ ༣༣།༩༣ འདུས་སྡེ་ལ། །བསྙེན་བཀུར་གཏོ་གླུད་གཏོང་བ་དང་། །ལྕགས་གླང་ ༥༧ དམ་སྲི་མི་ཁ་མནན། །མེ་གླང་ ༢༡།༨༡ རང་དུར་ཆེ་ལ་བབས། །བདུད་ཀྱི་ཁྲམ་ཁ་སྟོང་བཟློག་བྱ། །ཆུ་གླང་ ༤༥ གཤེད་དུར་ཆེར་བབས་པས། །གསེར་འོད་འདོན་ཞིང་ཆབ་གཏོར་གཏོང་། །གཞན་ཡང་མེ་ལུག་ ༥༡ རང་དུར་ཆུང་། །ཆུ་ལུག་ ༡༥།༧༥ གཤེད་དུར་ཆུང་བབས་པས། །རྟེན་ལ་མཆོད་འབུལ་ངན་སྤྲང་ལ། །སྦྱིན་དང་སྲོག་བསླུ་བཅས་པར་བརྩོན། །དེ་བཞིན་དུར་ཚུད་གཞན་རྣམས་དང་། །ངན་ཀེག་བབས་རིགས་ཐམས་ཅད་ཀྱིས། །རང་རང་འཁོས་བསྟུན་རྣམ་དཀར་ལ། །འབད་པ་ཤིན་ཏུ་གལ་ཆེའོ།། སླར། མི་ལུས་རིན་ཆེན་ལན་གཅིག་ཐོབ་པ་འདིར། །མི་མཐུན་ངན་ཀེག་མཚན་མ་ལས་གྲོལ་ཕྱིར། །མི་བསླུའི་བཟློག་རིམ་གསལ་བར་བསྟན་འདིའི་དགེས། །མི་ཞིག་རྡོ་རྗེའི་ངོ་བོར་བརྟན་གྱུར་ཅིག།

དགུང་འདིར་གནམ་གཤིས་འགྱུར་ལྡོག་དང་། རང་འབྱུང་གནོད་འཚེའི་སྐོར།

༈ བརྩེ་ཆེན་སྙིང་རྗེའི་རང་གཟུགས་ཅན་མངའ་ཁྱོད། །བརྩེ་བའི་ཡུམ་དང་རྟག་ཏུ་རྣམ་རོལ་ཞིང་། །བརྩེ་བའི་འགྲོ་ལ་ལྐོག་གྱུར་གནས་མ་ལུས། །བརྩེ་བའི་སྙིང་གཏམ་ཚུལ་དུ་གསུངས་དེ་རྒྱལ། །སྟོང་དང་དྲུག་བརྒྱ་ལྷ་ཡི་སྐྱེད་ཚལ་ངོས། །དགའ་བའི་ལྷ་མོ་ཉེར་བརྒྱད་དང་རོལ་བའི། །གཟའ་མཆོག་དཔའ་བོའི་བགྲོད་པ་ལས་བརྩམ་སྟེ། །བླང་དོར་འབྱེད་པ་འདི་ཡང་རྟེན་འབྱུང་ཤིས།།

ས་ཚིགས་འགྱུར་མེད་ཡུལ་དབུས་རྡོ་རྗེ་གདན། །ཆོས་ཚིགས་དབུས་གྱུར་ཐེག་ཆེན་ཆོས་གླིང་ཆེ། །དབུས་སུ་བཟུང་ནས་ཕྱོགས་བཞི་ཕྱོགས་མཚམས་ཀྱི། །རྒྱལ་ཁམས་བདེ་སྡུག་བསྟན་པ་ལ། །གསུམ་པའི་འགོ་སྟོད་ཡུལ་དབུས་ལ། །དམར་པོས་ཅུང་ཞིག་འཁྲུག་ཅིང་ཟླ་སྨད་ནས། །བཞི་པའི་ཉེར་གཉིས་ཉི་མ་འཁྱུད་པ་ཡིས། །འཐབ་རྩོད་ཅུང་ཞིག་དྲག་ཅིང་ཐན་ངོའང་ཤར། །ྋཤར་ཕྱོགས་བཞི་པའི་ཉེར་གསུམ་ནས་བརྩམ་སྟེ། །དྲུག་པའི་ཉེར་གཉིས་དམར་པོས་འཐབ་མོ་ཡི། །འཇིགས་པའི་ངོ་དང་ལྔ་པའི་ཚེས་ཤར་ནས། །ཉི་མས་ཆར་དཀོན་འཐན་ངོ་ཤར་ན་ཡང་། །ཟླ་བུས་ཅུང་ཞིག་དགེ་བའི་རྟགས་སུ་གསལ། །ྋཤར་ལྷོར་ལོ་ཧྲིལ་སྒྲ་གཅན་གདོང་གིས་ནི། །འཐབ་རྩོད་འཇིགས་དང་དྲུག་པའི་ཟླ་སྨད་ནས།  །བརྒྱད་པའི་ཟླ་སྨད་ཉི་ལྷག་དམར་གསུམ་འཁྱུད།  །དུས་དེར་འཐབ་རྩོད་ཅུང་དྲག་སྲིད།  །ྋལྷོ་ཕྱོགས་གསུམ་པའི་ཚེས་ཤར་ནས་བཟུང་སྟེ། །བརྒྱད་པའི་ཚེས་ཤར་ལྷ་ཡི་བླ་མ་ནི། །ཕྱིར་ལྡོག་ལ་སྤྱོད་ནད་མཚོན་མུ་གེ་དང་། །འདི་ནས་བཟུང་སྟེ་བཅུ་པའི་གནམ་སྟོང་བར། །ཉིན་བྱེད་དབང་པོ་དང་ནི་ལུས་དམར་གྱིས། །མི་བདེ་འཁྲུག་རྩོད་འཇིགས་པའི་ངོ་རུ་བཤད། །ྋལྷོ་ནུབ་བཅུ་གཅིག་ཚེས་ཤར་ནས་བཟུང་སྟེ། །བཅུ་གཉིས་ཟླ་མཇུག་དམར་པོས་འཐབ་ངོ་ལས། །ལོ་ཧྲིལ་རྒྱལ་འབངས་ཆོས་སྤྱོད་བདེ་སྐྱིད་ལྡན། །ྋནུབ་ཕྱོགས་ལོ་ཧྲིལ་སྤེན་པས་མུ་གེ་ཡང་། །བཅུ་པའི་ཚེས་ཤར་ནས་བཟུང་ཟླ་གཅིག་རིང་། །ལྷག་པས་ཅུང་ཞིག་དགེ་ངོར་སྣང་། །ྋནུབ་བྱང་ལོ་ཧྲིལ་ཀེ་ཏུས་འཐབ་རྩོད་དང་། །མི་བདེ་དུཿཁས་མནར་ཞིང་བཅུ་གཉིས་ནང་། །ཅུང་ཞིག་བདེ་སྐྱིད་ལྡན་སོགས་དགེ་བའི་མཚན། །ྋབྱང་ཕྱོགས་གསུམ་པའི་བརྒྱད་ནས་གནམ་སྟོང་བར། །པ་ཝ་སངས་ཀྱིས་རྒྱལ་འབངས་བདེ་ཞིང་སྐྱིད། །དེ་བྱིངས་ལོ་ཧྲིལ་འབྲས་བུ་བཏང་སྙོམས་བཤད། །ྋབྱང་ཤར་གསུམ་པའི་ཚེས་གཅིག་ནས་བཟུང་སྟེ། །ཉེར་བདུན་བར་དུ་ཉི་མས་ཐན་ངོ་ཡང་། །གསུམ་པའི་ཚེས་བརྒྱད་ནས་བཟུང་བཞི་པའི་བརྒྱད། །དེ་བཞིན་བཞི་པའི་ཉ་ནས་སྣྲོན་ཟླའི་བརྒྱད། །ལྷག་སངས་རིམ་པར་སྤྱོད་པས་ལོ་ལེགས་ཤིང་། །ཡུལ་ཁམས་ཀུན་ཏུ་བདེ་ཞིང་སྐྱིད་པ་འབྱུང་།།

གནམ་གཤིས་སྔོན་བརྡ།

དགུང་འདིར་གནམ་ཤིས་སྔོན་དཔག་ལས། ཆར་རླུང་སྦྲགས་མར་བབས་པ་མང་ཞིང་རླུང་གིས་གཏོར་ཚད་ཀྱང་ཆེ་ཙམ་དུ་སྣང་། བྱེ་བྲག་བབས་ཚེས་ཟླ་བ་སོ་སོའི་ཚེས་ཁོངས་སུ་གསལ།