སྨན་རྩིས་དྲ་བ། - སོ་ལོ་སྔོན་པོ།

སོ་ལོ་སྔོན་པོ།

སོ་ལོ་སྔོན་པོ།

མིང་གཞན། ལ་སྒྱོའུ་སྒྱོ་བ། Capsicum 青辣椒

སྐྱེ་དབྱིབས། འདི་ནི་སོ་ལོ་སྔོན་པོ་སྟེ། སྐྱེ་ཚུལ་གོང་གི་ཙི་ཏྲ་ཀ་དང་མཚུངས་མོད་སྡོང་པོའི་མཐོ་ཚད་ཁྲུ་གང་ཙམ་ལས་མེད་པ། འབྲས་བུའམ་གང་བུ་ཟླུམ་པོའམ་གོར་མོ་ཅན་ཆེ་ལ་ཁོང་སྟོང་ཞིང་པགས་ཤུན་མཁྲེགས་ལ་མཐུག་པར་ཤུར་རིས་དོད་པ། འབྲུ་གུ་དཀར་སེར་ཆུང་ལ་ལེབ་པ་མང་པོ་འབྱུང་བ་དང༌། འབྲས་བུའི་ཁ་མདོག་ལྗང་གུ་ནས་དམར་པོ་དང་སེར་པོར་འགྱུར་བའང་ཡོད། ཚ་བའི་ཡུལ་དུ་འདེབས་འཛུགས་བྱེད་ཅིང༌། སྤྱིར་སོ་ལོ་སྔོན་པོ་ནི་ཆེར་མ་རྒྱས་མ་སྨིན་པའི་སྐབས་བཏོག་སྟེ་བེད་སྤྱོད་བྱེད་དགོས།

བེད་སྤྱོད། འབྲས་བུའམ་གང་བུ་སོས་པ་གཙང་འཁྲུ་བྱས་ཏེ། བཙོ་བའམ་བསྲེག་པ། བརྔོ་གཡོ་བྱེད་ཆོག་ལ། གྲང་ཚལ་བཟོ་བ་དང༌། ཁོག་པའི་ནང་ཤ་རིགས་དང་འབྲས་སོགས་བརྒྱང་སྟེ་བསྲེག་བཙོ་བྱས་ཏེ་བེད་སྤྱོད་ཀྱང་བྱེད་རུང༌།

རོ་དང་ངོ་བོ། རོ་ཅུང་ཟད་མངར། ངོ་བོ་བསིལ།

ཕན་ནུས། གཞང་འབྲུམ་སེལ། སྲིན་གསོད། ཆུ་སེར་འོར་ནད་དང་མཛེ་ནད་འཇོམས། འབྲས་སྐྲན་འགོག་པ་བཅས་ལ་ཕན།

དོ་སྣང༌། འཇུ་དཀའ་ཞིང༌། གྲང་བ་མཁལ་རྐེད་ན་བའི་རིགས་ལ་གནོད།