སྨན་རྩིས་དྲ་བ། - མཛུབ་ཚལ།

མཛུབ་ཚལ།

མཛུབ་ཚལ།

མིང་གཞན། Lady's finger, okra 秋葵秋葵莢

སྐྱེ་དབྱིབས། འདི་ནི་ཤིང་མ་ལྡུམ་གྱི་རིགས་ཤིག་སྟེ། སྡོང་པོ་ལྗང་གུ་མཐོ་ཚད་སྨི་ཀྲི་གཉིས་ཙམ་སྐྱེ་ཞིང༌། ལོ་མ་ཆེ་ལ་འཇོང་ནར་ཅན། མེ་ཏོག་སེར་པོ་བཞད་པ། འབྲས་བུའམ་གང་བུ་ལྗང་མདོག་ཟུར་ལྔ་ཅན་ལ་རྩེ་མོ་རྣོ་བ། ནང་འབྲུ་དཀར་པོ་ཆུང་ཆུང་གཤེར་བག་ཅན་འབྱར་ཚི་ཆེ་བ་ཞིག་ཡིན། ཚ་བའི་ཡུལ་དུ་སྐྱེ་ཞིང༌། འདེབས་འཛུགས་ཀྱང་བྱེད་ཀྱི་ཡོད།

བེད་སྤྱོད། འབྲས་བུའམ་གང་བུ་གཙང་འཁྲུ་བྱས་ཏེ། ཁུ་ཐང་བཟོ་བའམ་བརྔོ་གཡོ་བྱེད་ཆོག

རོ་དང་ངོ་བོ། རོ་བསྐ་ལ་མངར། ངོ་བོ་བསིལ།

ཕན་ནུས། མཁལ་ལྒང་ཚ་བའི་ནད་སེལ་ཞིང༌། ཆུ་ལམ་འབྱེད། ལུས་པགས་མཉེན་འཇམ་བཟོ། ཚ་བ་སེལ། ཁྲག་ཤེད་སྙོམས། བཤལ་ནད་དང་རོ་ཙ་གསོ་བ་བཅས་ལ་ཕན།

དོ་སྣང༌། བད་ཀན་གྲང་བའི་རིགས་ལ་གནོད།